BMW ចាប់ដៃ Great Wall ដើម្បីផលិតរថយន្ត Mini អគ្គិសនីក្នុងប្រទេសចិន

November 30, 2019

ក្រុមហ៊ុន BMW និង Great Wall បានប្រកាសការចាប់ដៃគ្នានៅក្នុងប្រទេសចិន ហៅថា Spotlight Automotive ដែលនឹងបង្កើតរោងចក្រថ្មីមួយ ដើម្បីផលិតរថយន្ត Mini អគ្គិសនីនាពេលអនាគត។

រោងចក្រថ្មីនោះនឹងស្ថិតនៅក្បែរទីក្រុង Zhangjiagang ដែលអាចផលិតរថយន្ត ១៦០ ០០០គ្រឿងក្នុងមួយឆ្នាំ។ តាមរបាយការណ៍ពីមុនមក រោងចក្រនេះ នឹងផលិតទាំងរថយន្ត Mini អគ្គិសនី និងរថយន្ត Great Wall អគ្គិសនីផងដែរ។

គួរឲ្យដឹងថា រោងចក្រផលិតរថយន្ត Mini ធំបំផុតគឺស្ថិតនៅទីក្រុង Oxford ចក្រភពអង់គ្លេស ហើយវានឹងនៅតែដំណើរការធម្មតាដដែល ខណៈ Spotlight Automotive នឹងបន្ថែមសមត្ថភាពផលិត និងភាពបត់បែនផ្សេងៗប៉ុណ្ណោះ។

យ៉ាងណាមិញ រោងចក្រថ្មីនៅក្នុងប្រទេសចិន ដែលជាការវិនិយោគទុន ៧១៦លានដុល្លារ នឹងចាប់ផ្តើមសាងសង់នៅឆ្នាំ២០២០៕

ផ្ទាំងផ្សាយពាណិជ្ជកម្ម

ប៉ូលិសឌុយបៃនឹងប្រើប្រាស់រថយន្តភីកអាប់អគ្គិសនី Cybertruck សម្រាប់ល្បាតទីក្រុង

November 30, 2019

Dubai Polic បានបង្ហោះរូបភាពមួយសន្លឹកនៃរថយន្តភីកអាប់អគ្គិសនី Cybertruck ដែលខ្លួនរបស់វាមានបិតដោយស្លាកសញ្ញារបស់ប៉ូលិសឌុយបៃ។

ការបង្ហោះបាននិយាយថា Cybertruck នឹងក្លាយជារថយន្តល្បាតទីក្រុងរបស់ប៉ូលិសឌុយបៃនៅឆ្នាំ ២០២០ ប៉ុន្តែវានឹងមិនអាចទៅរួចនោះឡើយ ព្រោះថានៅឆ្នាំ ២០២១ ទើបរថយន្តនេះចាប់ផ្ដើមចូលក្នុងសង្វាក់ផលិតកម្មដើម្បីផលិត។

យ៉ាងណាក្ដីក្នុងកិច្ចសម្ភាសន៍ជាមួយ Arabian Business លោកមេបញ្ជាការប៉ូលិសឌុយបៃ បានបង្ហាញថា Tesla Cybertruck នឹងត្រូវប្រើជារថយន្តសម្រាប់ល្បាតនៅតំបន់ដែលមានភ្ញៀវទេសចរណ៍ច្រើន។ មិនច្បាស់ទេថាពួកគេបានកុម្ម៉ង់យករថយន្តប្រភេទមួយណា ប៉ុន្តែគេយល់ថាទំនងជាប្រភេទថ្លៃជាងគេតម្លៃ ៦៩ ៩០០ ដុល្លារ ដែលបង្កើនសន្ទុះពី ០-៩៦ គ.ម/ម៉ ក្នុងពេល ២,៩ វិនាទី និងជិះបានចម្ងាយជាង ៨០០ គីឡូម៉ែត្រពេលសាកភ្លើងពេញ៕

ផ្ទាំងផ្សាយពាណិជ្ជកម្ម

មកស្គាល់ម៉ាករថយន្តលក់ដាច់បានច្រើនជាងគេទាំង ១០ នៅអាល្លឺម៉ង់

November 30, 2019

ដោយសារតែជាទឹកដីកំណើតរបស់ម៉ាកប្រណីតល្បីៗជាច្រើននោះ ហេតុនេះអាល្លឺម៉ង់មិនសូវចាប់អារម្មណ៍នឹងរថយន្តនាំចូលខ្លាំងប៉ុន្មានឡើយ។ ម៉ាករថយន្តក្នុងស្រុក ជាពិសេសគឺ Volkswagen គឺក្ដោបក្ដាប់ចំណែកទីផ្សារយ៉ាងធំក្នុងប្រទេសនេះ។

គិតត្រឹមដំណាច់ត្រីមាសទី ៣ ឆ្នាំ ២០១៩ (រយៈពេល ៩ ខែដំបូងនៃឆ្នាំនេះ) ចំនួនរថយន្តដែលលក់ចេញនៅអាល្លឺម៉ង់កើនឡើង ២,៥%។ ក្នុងនោះម៉ាករថយន្តដែលលក់ដាច់បានច្រើនជាងគេនៅអាល្លឺម៉ង់មានដូចខាងក្រោម ៖

១. Volkswagen លក់បាន ៤៩៨ ៤៨១ គ្រឿង (-២,៦%)

២. Mercedes លក់បាន ២៤៨ ០៩៣ គ្រឿង (+6%)

៣. Audi លក់បាន ២១៤ ០៣៩ គ្រឿង (-១,៧%)

៤. Ford លក់បាន ២១១ ៣២៤ គ្រឿង (+១១,៦%)

៥. BMW លក់បាន ២០៥ ៥០៦ គ្រឿង (+៥,៤%)

៦. Opel លក់បាន ១៧៥ ២២៧ គ្រឿង (+០,៨%)

៧. Skoda លក់បាន ១៦១ ៣៨៥ គ្រឿង (+៥,៥%)

៨. Seat លក់បាន ១០៩ ១៦០ គ្រឿង (+១៣,១%)

៩. Renault លក់បាន ៩៩ ៣៤៧ គ្រឿង (-៥,៦%)

១០. Hyundai លក់បាន ៩៨ ០៦៥ គ្រឿង (+១២,១%)

ផ្ទាំងផ្សាយពាណិជ្ជកម្ម

អ្នកស្រាវជ្រាវកំពុងរិះរកវិធីសាកភ្លើង ១០នាទី ជិះបាន ៣២១ គីឡូម៉ែត្រ

November 29, 2019

ពីរចំណុចដែលអាចធ្វើឲ្យគ្រប់គ្នាចាប់អារម្មណ៍លើរថយន្តអគ្គិសនីនោះគឺអាគុយដែលជិះបានចម្ងាយឆ្ងាយ និងការសាកឆាប់ពេញ។ នៅពេលនេះអ្នកស្រាវជ្រាវនៅសកលវិទ្យាល័យ Penn State ជឿជាក់ថាពួកគេរកឃើញវិធីសាស្ត្រមួយដែលអាចជួយដោះស្រាយដល់បញ្ហាសាកអាគុយមិនងាយពេញ។

អ្នកវិទ្យាសាស្ត្របានមើលឃើញបច្ចេកវិទ្យាសាកថ្មឆាប់ពេញនៅលើស្មាតហ្វូន ហើយដោយប្រាស់បច្ចេកវិទ្យាប្រភេទនេះ ពួកគេអាចបង្កើតបាននូវការសាកថ្មឆាប់ពេញបំផុត (Extreme Fast Charging) នៅលើអាគុយលីចូម។ តាមការប៉ាន់ស្មានរបស់ពួកគេ វាអាចជួយឲ្យយានយន្តបើកបរបានចម្ងាយ ៣២១ គីឡូម៉ែត្រ បន្ថែមទៀត ដោយការសាកថ្មត្រឹមតែ ១០ នាទី។

យ៉ាងណាក្ដីដើម្បីឲ្យបច្ចេកវិទ្យាសាកថ្មនេះអាចប្រើប្រាស់លើរថយន្តបានជាផ្លូវការ អាចនឹងត្រូវចំណាយពេលស្រាវជ្រាវបន្ថែមទៀត ហើយបច្ចេកវិទ្យានេះអាចនឹងផ្ដល់ផលប្រយោជន៍ដល់យានយន្តអគ្គិសនីគ្រប់ប្រភេទ មិនថាម៉ូតូអគ្គិសនី, រថយន្តអគ្គិសនី និងក្ដារស្គីអគ្គិសនីជាដើម៕

ផ្ទាំងផ្សាយពាណិជ្ជកម្ម

ចំនួនអ្នកទិញឡានភីកអាប់អគ្គិសនី Cybertruck កើនឡើងច្រើនសន្ធឹក

November 29, 2019

លោក Elon Musk បានប្រាប់ឲ្យដឹងតាមរយៈគណនី Twitter របស់ខ្លួនថាចំនួនអ្នកកុម្ម៉ង់ទិញរថយន្ត Tesla Cybertruck បានឡើងដល់ចំនួន ២៥០ ០០០ គ្រឿង ក្នុងរយៈពេល ៥ ថ្ងៃ គិតចាប់ពីថ្ងៃទី ២១ ខែវិច្ឆិកា។

មើលទៅចំនួនកុម្ម៉ង់ទិញថ្មីនៅតែមានការកើនឡើងខ្ពស់ ដោយក្នុងរយៈពេល ៣ ថ្ងៃ វាអាចទទួលបានការកុម្ម៉ង់ទិញ ២០០ ០០០ គ្រឿង។ បើគិតគូរមើលទៅចំនួនលក់រថយន្ត Cybertruck ចំនួន ២៥ ម៉ឺនគ្រឿង អាចឲ្យក្រុមហ៊ុន Tesla រកចំណូលបានជាង ១៤ ពាន់លានដុល្លារ។

Cybertruck មានជម្រើសចំនួន ៣ គឺ ៖

Single Motor RWD តម្លៃ ៣៩ ៩០០ដុល្លារ មានចម្ងាយបើកបរជាង ៤០០គីឡូម៉ែត្រ
Dual Motor តម្លៃ ៤៩ ៩០០ដុល្លារ មានចម្ងាយបើកបរជាង ៤៨០គីឡូម៉ែត្រ
Tri-Motor AWD អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹមតែ ២,៩វិនាទីប៉ុណ្ណោះ ហើយមានល្បឿនអតិបរមា ២១០គីឡូម៉ែត្រក្នុងមួយម៉ោង និងចម្ងាយបើកបរជាង ៨០០គីឡូម៉ែត្រ ឯតម្លៃវិញគឺ ៦៩ ៩០០ដុល្លារ៕

ផ្ទាំងផ្សាយពាណិជ្ជកម្ម

Toyota GR Supra ចេញលក់នៅថៃផ្លូវការ ហើយនេះតម្លៃវា

November 29, 2019

ក្រុមហ៊ុន Toyota Motor Thailand បានចេញលក់រថយន្តស្ព័រ GR Supra សេរ៊ីឆ្នាំ២០១៩ ជាផ្លូវការ ដើម្បីបំពេញចំណង់អ្នកស្រលាញ់រថយន្តស្ព័រជប៉ុន។

រថយន្ត Toyota GR Supra បំពាក់ម៉ាស៊ីនសាំងចំណុះ ៣,០លីត្រ Turbo ទំហំ ៦ស៊ីឡាំង មានកម្លាំង ៣៤០សេះ ដំណើរការដោយប្រអប់លេខអូតូ ៨វគ្គ និងប៉ុងមួយវិលកង់ក្រោយ។

រថយន្តស្ព័រជប៉ុនខាងលើត្រូវបានដាក់លក់តម្លៃ ៥លានបាត ឬប្រហែលខ្ទង់ ១៦៥ ០០០ដុល្លារនៅប្រទេសថៃ។

គួរឲ្យដឹងថា រថយន្ត BMW Z4 M40i ដែលប្រើម៉ាស៊ីនដូចគ្នាទៅនឹង GR Supra ក៏មានតម្លៃដូចគ្នាដែរ។ ដោយឡែក រថយន្ត Ford Mustang GT កម្លាំង ៤៦០សេះ មានតម្លៃ ៤,៨លានបាតប៉ុណ្ណោះ ខណៈរថយន្ត Mercedes-AMG C43 Coupe កម្លាំង ៣៩០សេះ មានតម្លៃត្រឹម ៤,២លានបាត៕

ផ្ទាំងផ្សាយពាណិជ្ជកម្ម

Cadillac បង្ហាញតម្លៃរថយន្ត CT5-V ឆ្នាំ២០២០ ជាផ្លូវការ

November 29, 2019

ក្រុមហ៊ុន Cadillac បានប្រកាសចេញនូវតម្លៃលក់នៃរថយន្ត CT5-V ស៊េរីឆ្នាំ២០២០ ជាផ្លូវការ ដោយចាប់ពី ៤៨ ៦៩០ដុល្លារសម្រាប់ម៉ូដែលប៉ុងមួយ និង ៥១ ២៩០ដុល្លារសម្រាប់ម៉ូដែលប៉ុងពីរ។

ជាមួយគ្នានេះ Cadillac ក៏ផ្តល់នូវ Option ទឹកថ្នាំប្រភេទ Premium (តម្លៃ ៦២៥ ដល់ ១ ២២៥ដុល្លារ), ដុំហ្វ្រាំងពណ៌ខៀវ ឬក្រហម (តម្លៃ ៥៩៥ដុល្លារ), យ៉ាន់ Alloy ទំហំ ១៩អ៊ីង (តម្លៃ ៦០០ដុល្លារ), កញ្ចប់ Driver Awareness Plus (តម្លៃ ១ ៣០០ដុល្លារ) ដែលបន្ថែមកុងទ័របាញ់លើកញ្ចក់, មុខងារ Lane Keep Assist, Lane Departure Warning និង កុងទ័រឌីជីថលទំហំ ៨អ៊ីង។

ចំណែកឯកញ្ចប់សុវត្ថិភាព Driver Assistance និង Advanced Security (តម្លៃ ១ ៩៥០ដុល្លារ) មានបន្ថែមមុខងារ Adaptive Cruise Control, Automatic Emergency Braking, Reverse Automatic Braking ជាដើម។

ក្រៅពីនោះក៏មានកញ្ចប់ Option ជាច្រើនទៀតដូចជា កញ្ចប់ Parking (តម្លៃ ២ ០៩០ដុល្លារ), កញ្ចប់ Premium (តម្លៃ ៤ ១៩០ដុល្លារ) និង កញ្ចប់ Platinum (តម្លៃ ៦ ២៩០ដុល្លារ)។

សូមបញ្ជាក់ថា រថយន្ត Cadillac CT5-V ប្រើម៉ាស៊ីនចំណុះ ៣,០លីត្រ Twin-turbo ទំហំ ៦ស៊ីឡាំង មានកម្លាំង ៣៦០សេះ៕

ផ្ទាំងផ្សាយពាណិជ្ជកម្ម

Mercedes នឹងចាប់ផ្ដើមដឹកជញ្ជូនឡានមហាកម្លាំង AMG One ឲ្យអតិថិជននៅឆ្នាំ ២០២១

November 28, 2019

អ្នកដឹកនាំផ្នែកគ្រប់គ្រងផលិតផលរបស់ Mercedes-AMG បានបង្ហាញថា ក្រុមហ៊ុនបានប្រាប់ដល់អតិថិជនអំពីការពន្យារពេលនៃការដឹកជញ្ជូនរថយន្ត AMG One រួចហើយ ដោយវានឹងចាប់ផ្ដើមនៅក្នុងឆ្នាំ ២០២១។

នេះជាការបញ្ជាក់ជាលើកដំបូងពី Mercedes-AMG ក្រោយមានការចុះផ្សាយអំពីការពន្យារពេលនេះ ដោយសារបញ្ហាទាក់ទងនឹងប្រព័ន្ធម៉ាស៊ីន F1។ Michael Knoller ប្រធានផ្នែកគ្រប់គ្រងផលិតផលបាននិយាយថា ៖ “នៅពេលដែលអ្នកចង់ឲ្យបច្ចេកវិទ្យា F1 អាចប្រើប្រាស់លើដងផ្លូវធម្មតាបាននោះ អ្នកត្រូវធ្វើការពុះពារ។ យើងបានជួបបញ្ហាខ្លះ ប៉ុន្តែពេលនេះត្រូវបានដោះស្រាយរួចហើយ។”

រថយន្ត Mercedes-AMG One គឺមានប្រើប្រាស់នូវម៉ាស៊ីនដូចរថយន្តប្រណាំង F1 ឆ្នាំ ២០១៧ ដែលវាប្រើប្រាស់ប្រព័ន្ធម៉ាស៊ីន Hybrid ចំណុះ ១,៦ លីត្រ ៦ ស៊ីឡាំង។ វានឹងមានបច្ចេកវិទ្យា Turbocharger, ម៉ូទ័រអគ្គិសនី MGU-K, អាគុយបញ្ចុះកម្ដៅដោយទឹក ជាដើម។

Mercedes សន្យាថារថយន្ត AMG One នេះអាចបង្កើតសន្ទុះពី ០ ដល់ ២០០ គ.ម/ម៉ ដោយប្រើពេលមិនដល់ ៦ វិនាទី និងមានល្បឿនអតិបរមា ៣៥០ គ.ម/ម៉៕

ផ្ទាំងផ្សាយពាណិជ្ជកម្ម

BMW សើចចំអកកំហុសបច្ចេកទេសលើរថយន្ត Cybertruck

November 28, 2019

BMW បានធ្វើការបង្ហោះលើ Twitter ដែលផ្សព្វផ្សាយអំពីរថយន្តម៉ូដែល X5 Protection VR6 ថ្មី ដែលមានសមត្ថភាពអាចការពារគ្រាប់កាំភ្លើងបាន។

BMW បានសរសេរថា ៖ “មកជាមួយបង្អួតកញ្ចក់ការពារគ្រាប់ ដែលអាចការពារបានយ៉ាងល្អករណីដែលវាត្រូវមួយដុំដែក”។ ច្បាស់ណាស់ BMW ចង់សើចចំអកដល់ការធ្វើតេស្តលើកញ្ចក់ដ៏រឹងមាំរបស់ រថយន្ត Cybertruck ដែលពេលធ្វើតេស្តវាមិនបានដូចការគ្រោងទុកនោះឡើយ។

គួរដឹងថាអំឡុងពេលប្រកាសចេញរថយន្ត Cybertruck លោក Elon Musk នាយកប្រតិបត្តិក្រុមហ៊ុន Tesla បានធ្វើគប់កញ្ចក់រថយន្តភីកអាប់អគ្គិសនីនេះជាមួយដុំដែក ដើម្បីបង្ហាញថាវាមានភាពរឹងមាំ ដោយកញ្ចក់នេះជាប្រភេទធន់ខ្លាំង ដែលក្រុមហ៊ុនឲ្យឈ្មោះថា “Tesla Amor Glass”។ ប៉ុន្តែសមត្ថភាពរបស់វាមិនដូចនឹងការអួតអាងរបស់លោក Elon Musk ឡើយ៕

ផ្ទាំងផ្សាយពាណិជ្ជកម្ម

រថយន្តអគ្គិសនី Ford Mustang Mach-E អាចនឹងផលិតនៅចិន

November 28, 2019

រថយន្តអគ្គិសនីថ្មីរបស់ Ford គឺ Mustang Mach-E អាចនឹងត្រូវផលិតនៅក្នុងប្រទេសចិន បន្ថែមពីលើការផលិតនៅក្នុងប្រទេសមិចស៊ីកូ។

ក្រុមហ៊ុន Ford កំពុងពិចារាណាផលិតរថយន្ត SUV ដើរដោយថាមពលអគ្គិសនីខាងលើនៅក្នុងប្រទេសចិន ប៉ុន្តែការសម្រេចចិត្តចុងក្រោយ គឺអាស្រ័យលើលទ្ធផលនៃសង្គ្រាមពាណិជ្ជកម្មរវាងសហរដ្ឋអាមេរិក និងចិនតែប៉ុណ្ណោះ។

CEO ក្រុមហ៊ុន Ford លោក Jim Hackett បានប្រាប់ទៅកាន់សារព័ត៌មាន Bloomberg ថា “យើងមានគម្រោងផលិត Mach-E នៅទីនោះ បើរឿងពន្ធត្រូវបានដោះស្រាយ”។

ជាមួយគ្នានេះ លោក Jim បានបន្ថែមថា “ចិន កំពុងភ្លូកទឹកប្រើរថយន្តអគ្គិសនី ដូច្នេះ Mach-E នឹងមានសង្ឃឹមនៅទីនោះ”។ ទោះជាយ៉ាងណា Ford មិនបានប្រកាសឡើយថា នៅពេលណាទើបចេញលក់រថយន្តនេះ៕

ប្រភព ៖ Carscoops

ផ្ទាំងផ្សាយពាណិជ្ជកម្ម