រថយន្តអគ្គិសនី Mercedes EQC ឆ្នាំ២០២០ ចេញតម្លៃលក់ផ្លូវការហើយ!

November 22, 2019

កាលពីឆ្នាំមុន ក្រុមហ៊ុន Mercedes បានបញ្ចេញរថយន្តអគ្គិសនី EQC ជាផ្លូវការ នៅក្នុងកម្មវិធី Paris Auto Show។ ឥឡូវនេះ Mercedes បានបញ្ជាក់ថា វានឹងចេញលក់លើទីផ្សារសហរដ្ឋអាមេរិក នៅដើមឆ្នាំ២០២០ ជាមួយតម្លៃចាប់ពី ៦៧ ៩០០ដុល្លារ ដោយចែកចេញជា ៣ម៉ូដែល គឺ Progressive, Premium និង Advanced។

តម្លៃប៉ុណ្ណេះ ធ្វើឱ្យ Mercedes EQC ថោកជាងគូប្រជែង Tesla Model X ដែលមានតម្លៃចាប់ពី ៨៤ ៩៩០ដុល្លារ, Audi e-tron តម្លៃចាប់ពី ៧៤ ៨០០ដុល្លារ ណិង Jaguar I-Pace តម្លៃចាប់ពី ៦៩ ៨៥០ដុល្លារ។

រថយន្ត Mercedes EQC 400 4MATIC បំពាក់ម៉ូទ័រអគ្គិនសីពីរ មានកម្លាំងសរុប ៤០២សេះ អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេល ៤,៩វិនាទី ហើយមានល្បឿនអតិបរមា ១៨០គីឡូម៉ែត្រក្នុងមួយម៉ោង។

ជាមួយនឹងកញ្ចប់អាគុយកម្លាំង ៨០គីឡូវ៉ាត់ម៉ោង រថយន្ត SUV នេះអាចបើកបរបានចម្ងាយ ៣២០គីឡូម៉ែត្រ រាល់ពេលសាកភ្លើងពេញម្តង។ មិនតែប៉ុណ្ណោះ EQC ប្រើខ្សែសាកល្បឿនលឿន ដែលអាចសាកភ្លើងពី ១០ ទៅ ៨០% ប្រើពេលត្រឹម ៤០នាទីប៉ុណ្ណោះ។

ជាស្តង់ដារ រថយន្ត Mercedes EQC បានបំពាក់ប្រព័ន្ធ Infotainment System “MBUX” ដែលបង្ហាញព័ត៌មានដូចជា ចម្ងាយបើកបរ, ពេលសាកភ្លើង និងលំហូរនៃថាមពលជាដើម៕

ផ្ទាំងផ្សាយពាណិជ្ជកម្ម

ភីកអាប់អត់ប្រើសាំងដំបូងបង្អស់របស់ Tesla ចេញជាផ្លូវការ តម្លៃស្មើ Corolla នៅខ្មែរ

November 22, 2019

ក្រុមហ៊ុនរថយន្តអគ្គិសនីអាមេរិក Tesla បានបញ្ចេញភីកអាប់ដំបូងបង្អស់របស់ខ្លួនជាផ្លូវការ ហៅថា Cybertruck។

ចំណាយពេល៧ឆ្នាំក្នុងការផលិត រថយន្តអគ្គិសនី Tesla Cybertruck ត្រូវបានរចនារូបរាងយ៉ាងចម្លែកខ្លាំងតែម្តង។ វាមានប្រវែង ៥,៩ម៉ែត្រ ទទឹង ២ម៉ែត្រ និងកម្ពស់ ១,៩ម៉ែត្រ អាចផ្ទុកអ្នកដំណើរបាន ៦នាក់។

Cybertruck ចែកចេញជា ៣ម៉ូដែល គឺ Single Motor RWD តម្លៃ ៣៩ ៩០០ដុល្លារ មានចម្ងាយបើកបរជាង ៤០០គីឡូម៉ែត្រ និង Dual Motor តម្លៃ ៤៩ ៩០០ដុល្លារ មានចម្ងាយបើកបរជាង ៤៨០គីឡូម៉ែត្រ ព្រមទាំង Tri-Motor AWD អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹមតែ ២,៩វិនាទីប៉ុណ្ណោះ ហើយមានល្បឿនអតិបរមា ២១០គីឡូម៉ែត្រក្នុងមួយម៉ោង និងចម្ងាយបើកបរជាង ៨០០គីឡូម៉ែត្រ ឯតម្លៃវិញគឺ ៦៩ ៩០០ដុល្លារ។

CEO ក្រុមហ៊ុន Tesla លោក Elon Musk អះអាងថា រថយន្តភីកអាប់ Cybertruck របស់ខ្លួន នឹងអាចយកឈ្នះរថយន្តស្ព័រដូចជា Porsche 911 ផុយ ថែមទាំងមានសមត្ថភាពបើកបរលើផ្លូវលំបាក (Off-road) យ៉ាងអស្ចារ្យថែមទៀតផង៕

ផ្ទាំងផ្សាយពាណិជ្ជកម្ម

រថយន្ត SUV កំពូលប្រណីតរបស់ Mercedes ចេញមុខជាផ្លូវការ

November 21, 2019

រថយន្ត Mercedes-Maybach GLS ដែលជារថយន្ត SUV កំពូលប្រណីតរបស់ Mercedes បានបង្ហាញមុខជាផ្លូវការក្នុងប្រទេសចិន ក្នុងកម្មវិធីតាំងបង្ហាញរថយន្ត Guangzhou Auto Show។

នេះគឺជាលើកដំបូងដែលម៉ាក Maybach លេចមុខលើរថយន្តសម្រាប់លក់លើទីផ្សារ ដែលមិនមែនជាម៉ូដែល S-Class។ Mercedes-Maybach GLS គឺដំណើរការដោយម៉ាស៊ីន ៤,០ លីត្រ Twin-Turbo ៨ ស៊ីឡាំង កម្លាំង ៥៥០ សេះ ដែលអាចឲ្យរថយន្តទម្ងន់ ២,៧៨ តោននេះ បង្កើនសន្ទុះពី ០ ដល់ ១០០ គ.ម/ម៉ ក្នុងពេល ៤,៩ វិនាទី និងល្បឿនអតិបរមាកំណត់នៅត្រឹម ២៥០ គ.ម/ម៉។

ចំពោះការឌីហ្សាញរូបរាងរថយន្តនេះ គឺវាជាការឌីហ្សាញដែលធ្លាប់ឃើញពីមុនមក ពោលគឺមានផ្ទាំងប៉ាណាខាងមុខមានរន្ធជាបញ្ឈរដែលជាអត្តសញ្ញាណមួយរបស់ប្រភេទរថយន្ត Maybach អមនឹងយ៉ាន់កង់ទំហំ ២២ អ៊ីញ យ៉ាងទាក់ទាញ។

នៅផ្នែកខាងក្នុងមានកៅអីអង្គុយតែពីរជួរប៉ុណ្ណោះ ដើម្បីធានាថាអាចផ្ដល់ទំហំធំទូលាយសម្រាប់អ្នកដំណើរ។ កៅអីជួរក្រោយគឺជាប្រភេទកៅអី Business-Class ដែលទ្រេតចុះខ្លាំង ប្រៀបដូចជាកៅអីក្នុង Mercedes-Maybach S-Class ដែរ ដើម្បីផ្ដល់នូវផាសុកភាពពេញទី។

រថយន្ត Mercedes-Maybach នេះនឹងមានលក់នៅអំឡុងពាក់កណ្ដាលឆ្នាំ ២០២០។ ក្រុមហ៊ុនមិនបានបង្ហាញតម្លៃលក់នោះទេ ប៉ុន្តែរំពឹងថាមានចាប់ពីប្រមាណ ២០ ម៉ឺនដុល្លារឡើង ដែលជាតម្លៃប្រកួតប្រជែងនឹង Bentley Bentayga និង Aston Martin DBX ជាដើម៕

ផ្ទាំងផ្សាយពាណិជ្ជកម្ម

Hyundai Grandeur 2020 តម្លៃជិត ៣ម៉ឺនដុល្លារ លក់ដាច់សាហាវអស់ទាស់នៅកូរ៉េ

November 21, 2019

ត្បិតថា Hyundai លែងដាក់លក់រថយន្ត Grandeur នៅអាមេរិកខាងជើងតទៀត ប៉ុន្តែស៊េរីឆ្នាំ ២០២០ នៃរថយន្តម៉ូដែលនេះ លក់ដាច់បានច្រើនបំផុតនៅប្រទេសកូរ៉េខាងត្បូង ក្រោយបើកទទួលការកុម្ម៉ង់បានប៉ុន្មានថ្ងៃ។

ក្នុងរយៈពេល ១១ ថ្ងៃ Hyundai ទទួលបានការកុម្ម៉ង់ទិញទុកមុន ៣២ ១៧៩ គ្រឿង សម្រាប់រថយន្ត Grandeur ស៊េរីឆ្នាំ ២០២០ ដែលជាចំនួនលក់ដ៏ខ្ពស់បំផុតមួយសម្រាប់រថយន្តម៉ូដែលនេះ។ ការចេញលក់ជាផ្លូវការបានធ្វើឡើងនៅថ្ងៃទី ១៩ ខែវិច្ឆិកា ដោយក្រុមហ៊ុនបានប្រកាសចេញលក្ខណៈសម្បត្តិលម្អិត និងតម្លៃលក់នាពេលនោះផងដែរ។

អតិថិជននៅកូរ៉េអាចជ្រើសរើសជម្រើសប្រព័ន្ធម៉ាស៊ីនចំនួន ៤ ដែលមានចាប់ផ្ដើមពី SmartStream ចំណុះ ២,៥ លីត្រ ៤ ស៊ីឡាំង កម្លាំង ១៩៦ សេះ ដែលស៊ីប្រេងប្រមាណ ៨,៤ លីត្រ ក្នុងចម្ងាយ ១០០ គ.ម។

ក្នុងនោះក៏មានម៉ាស៊ីន ៣,៣ លីត្រ ៦ ស៊ីឡាំង កម្លាំង ២៩០ សេះ និងប្រភេទ Hybrid ប្រើម៉ាស៊ីន ២,៤ លីត្រ ដែលមានកម្រិតស៊ីប្រេង ៦,២ លីត្រ ក្នុងចម្ងាយ ១០០ គ.ម។ ទីបួនគឺម៉ាស៊ីន ៣,០ លីត្រ Lpi ដែលប្រើប្រាស់ឧស្ម័នហ្គាស។

តម្លៃសម្រាប់ Hyundai Grandeur ឆ្នាំ ២០២០ គឺមានចាប់ពីប្រមាណ ២៨ ១៥០ ដុល្លារសម្រាប់ប្រភេទ Base និងថ្លៃបំផុតគឺ ៣៨ ៣៦០ ដុល្លារ ដែលជាប្រភេទ Hybrid៕

ផ្ទាំងផ្សាយពាណិជ្ជកម្ម

រថយន្តអគ្គិសនី Hyundai Ioniq ឆ្នាំ២០២០ រចនាស្ទីលថ្មី សាកភ្លើងពេញបើកបានឆ្ងាយជាងមុន

November 21, 2019

រថយន្ត Hyundai Ioniq បានចេញលក់តាំងពីឆ្នាំ២០១៦ មកម្ល៉េះ ហើយវាជារថយន្តដំបូងបង្អស់លើពិភពលោក ដែលផ្តល់ជម្រើសម៉ាស៊ីនអគ្គិសនី ៣ប្រភេទខុសគ្នា គឺ Hybrid, Plug-in Hybrid និង អគ្គិសនី។

នៅក្នុងឆ្នាំនេះ Hyundai Ioniq ស៊េរីឆ្នាំ២០២០ ដែលដំណើរការដោយថាមពលអគ្គិសនីសុទ្ធ បានរចនារូបរាងថ្មី ហើយអាប់ដេតអាគុយពីកម្លាំង ២៨គីឡូវ៉ាត់ម៉ោង ទៅ ៣៨,៣គីឡូវ៉ាត់ម៉ោង ជួយឱ្យវាអាចផ្ទុកថាមពលបានច្រើនជាងមុន ៣៦% ដែលអាចបើកបរបានចម្ងាយ ២៧០គីឡូម៉ែត្រ រាល់ពេលសាកភ្លើងពេញម្តង ពោលគឺច្រើនជាងរថយន្ត Nissan Leaf ទៅទៀត។

ម៉ូទ័រអគ្គិសនីបំពាក់លើ Ioniq ថ្មី ផ្តល់កម្លាំងសរុប ១៣៤សេះ ហើយអាចសាកភ្លើងពី ០ ដល់ ៨៤% ក្នុងពេលត្រឹម ៥៤នាទីប៉ុណ្ណោះ។

Hyundai Ioniq ឆ្នាំ២០២០ បំពាក់អេក្រង់ Touchscreen ទំហំ ១០,២អ៊ីង ជាមួយមុខងារ Android Auto និង Apple CarPlay មកស្តង់ដារ ព្រមទាំងប្រព័ន្ធភ្លើង Ambient Lighting ពណ៌ខៀវផងដែរ។

មុខងារសុវត្ថិភាពដែលបំពាក់មកស្តង់ដារ មានដូចជា Front Collision Warning and Avoidance Assist with Pedestrian Detection, Cyclist Detection Ability, Driver Attention Warning, Lane-keeping Assist និង High Beam Assist ជាដើម។

ទោះជាយ៉ាងណា ក្រុមហ៊ុន Hyundai មិនទាន់បញ្ចេញតម្លៃលក់របស់វានៅឡើយទេ៕

ផ្ទាំងផ្សាយពាណិជ្ជកម្ម

Mazda CX-30 ឆ្នាំ២០២០ ចេញតម្លៃលក់ផ្លូវការ តែជាង ២ម៉ឺនដុល្លារ

November 21, 2019

ក្រុមហ៊ុន Mazda បានប្រកាសតម្លៃរថយន្ត SUV ខ្នាតមធ្យមម៉ូដែលថ្មីសន្លាងរបស់ខ្លួន គឺ CX-30 ជាផ្លូវការ ដោយមានតម្លៃចាប់ពី ២១ ៩០០ដុល្លារសម្រាប់ម៉ូដែលប៉ុងមួយ និង ២៣ ៣០០ដុល្លារសម្រាប់ម៉ូដែលប៉ុងពីរ លើទីផ្សារសហរដ្ឋអាមេរិក។

រថយន្ត Mazda CX-30 ចែកចេញជាច្រើនម៉ូដែលទៀត ដូចជា CX-30 Select តម្លៃ ២៣ ៩០០ដុល្លារ, CX-30 Preferred តម្លៃ ២៦ ២០០ដុល្លារ និង CX-30 Premium តម្លៃ ២៨ ២០០ដុល្លារ។

CX-30 បំពាក់អេក្រង់ Infotainment System ទំហំ ៨,៨អ៊ីង ជាមួយមុខងារ Mazda Connect, ផ្លិតទឹកអូតូ, ចង្កៀង LED, ប៊ូតុងបញ្ឈេះម៉ាស៊ីន, កាមេរ៉ាមើលក្រោយ ព្រមទាំងមុខងារសុវត្ថិភាព ដូចជា Driver Attention Alert, Radar Cruise Control with Stop and Go, Lane Departure Warning with Lane-keep Assist, Smart Brake Support និង High Beam Control ជាដើម។

Mazda CX-3០ បំពាក់ម៉ាស៊ីនថ្មី Skyactiv-G ចំណុះ ២,៥លីត្រ ទំហំ ៤ស៊ីឡាំង មានកម្លាំង ១៨៦សេះ ប្រើប្រអប់លេខអូតូ ៦វគ្គ ហើយមានជម្រើសប៉ុងមួយ និងប៉ុងពីរ៕

ផ្ទាំងផ្សាយពាណិជ្ជកម្ម

Ford Ranger ប្រភេទថ្មី បញ្ចេញលក់នៅថៃ តម្លៃជិត ៣ម៉ឺនដុល្លារ

November 20, 2019

រថយន្ត Ford Ranger ដែលដាក់លក់នៅប្រទេសថៃមានបន្ថែមនូវម៉ូដែលថ្មីគឺ Ford Ranger FX4 ដែលវាមានតម្លៃប្រមាណ ២៩ ៧០០ ដុល្លារ ជាម៉ូដែលដែលផលិតឡើងផ្អែកតាមប្រភេទ XLT ដែលមានស្រាប់។

FX4 នេះប្រើប្រាស់ម៉ាស៊ីនម៉ាស៊ូត Duratorq ចំណុះ ២,២ លីត្រ កម្លាំង ១៦០ សេះ ភ្ជាប់នឹងប្រអប់លេខស្វ័យប្រវត្តិ ៦ វគ្គ។ ប្រភេទ FX4 នេះគឺមានតម្លៃថ្លៃជាងប្រភេទ XLT ប្រមាណ ១ ពាន់ដុល្លារ។

វាមានបំពាក់នូវកង់ថ្មី ១៨ អ៊ីញ ប្រភេទ Alloy, ផ្ទាំងរន្ធខ្យល់ខាងមុខមានពណ៌ខ្មៅ, កាងមុខ/ក្រោយមានពណ៌ខ្មៅ, កញ្ចក់ចំហៀងពណ៌ខ្មៅ និងដៃទ្វារក៏មានពណ៌ខ្មៅដែរ។ នៅផ្នែកខាងក្នុងមានបំពាក់ស្បែកពណ៌ខ្មៅ រំលេចដោយថ្នេរអំបោះពណ៌ក្រហម។

ចំពោះមុខងារគឺដូចនឹង Ford Ranger XLT ដែរ។ ជាក់ស្ដែងមានអេក្រង់ទំហំ ៨ អ៊ីញដែលភ្ជាប់មុខងារ Apple CarPlay និង Android Auto, រន្ធបំពងសំឡេងចំនួន ៦, កុងទ័រឌីជីថលទំហំ ៤,២ អ៊ីញ, កៅអីអ្នកបើកបរអាចផ្លាស់ប្ដូរបាន ៦ បែប និងកញ្ចក់ចំហៀងបែបអេឡិចត្រូនិកជាដើម៕

ផ្ទាំងផ្សាយពាណិជ្ជកម្ម

ចេញជាផ្លូវការហើយ រថយន្ត SUV ដំបូងរបស់ Aston Martin

November 20, 2019

រថយន្ត Aston Martin DBX ដែលគេទន្ទឹងរង់ចាំយ៉ាងអន្ទះសានោះ ត្រូវបានក្រុមហ៊ុនបង្ហាញចេញរូបរាងជាផ្លូវការ ដែលនេះគឺជារថយន្ត SUV ដំបូងរបស់ក្រុមហ៊ុន Aston Martin។

រូបភាពផ្លូវការបានបង្ហាញថាម៉ូដែល DBX នេះមានការឌីហ្សាញខាងមុខ មិនចាកឆ្ងាយពីរថយន្តម៉ូដែលមុនៗរបស់ក្រុមហ៊ុន Aston Martin នោះទេ ជាពិសេសនៅត្រង់រន្ធខ្យល់ខាងមុខមានរាងដូចមាត់តែម្ដង។ រថយន្តដែលបង្ហាញក្នុងរូបភាពមានពណ៌ក្រហម ប៉ុន្តែគ្រឿងផ្នែកខាងក្រោមមានពណ៌ខ្មៅ ដែលធ្វើឲ្យរថយន្តនេះទាក់ភ្នែកមហាជន។

រថយន្តនេះប្រើម៉ាស៊ីន AMG ប្រភេទ Twin-Turbo ចំណុះ ៤,០ លីត្រ ៨ ស៊ីឡាំង ដែលមានកម្លាំង ៥៤២ សេះ។ វាអាចបង្កើនសន្ទុះពី ០ ដល់ ១០០ គ.ម/ម៉ ដោយប្រើពេលតែ ៤,៥ វិនាទី និងអាចជិះដល់ល្បឿន ២៩១ គ.ម/ម៉។

ត្បិតថាជារថយន្តមហាកម្លាំងមួយ ប៉ុន្តែផ្នែកខាងក្នុងមានការឌីហ្សាញពោរពេញដោយប្រណីតភាពខ្ពស់ ដែលជាទីកន្លែងពិសេសមួយសម្រាប់ចំណាយពេល។ នៅពីក្រោយចង្កូតគឺមានកុងទ័រឌីជីថលទំហំ ១២,៣ អ៊ីញ, នៅចំកណ្ដាលមានអេក្រង់ ១០,២៥ អ៊ីញ សម្រាប់បញ្ជាមុខងារផ្សេងៗ។ រថយន្តនេះក៏អាចមុខងារ Apple CarPlay ផងដែរ។

អតិថិជននៅសហរដ្ឋអាមេរិកអាចទិញរថយន្ត Aston Martin DBX នេះ ដែលមានតម្លៃចាប់ពី ១៨៩ ០០០ ដុល្លារ ហើយនៅចក្រភពអង់គ្លេសមានតម្លៃចាប់ពីប្រមាណ ២០ ម៉ឺនដុល្លារ និងនៅអាល្លឺម៉ង់ចាប់ពីជាង ២១ ម៉ឺនដុល្លារ៕

ផ្ទាំងផ្សាយពាណិជ្ជកម្ម

ឃើញការធ្វើតេស្តបុករថយន្ត Nissan Leaf អាណិតជំនួស តែលទ្ធផលគួរឱ្យភ្ញាក់ផ្អើល (វីដេអូ)

November 20, 2019

រថយន្តអគ្គិសនីត្រូវប្រឈមខ្លាំងចំពោះបញ្ហាសុវត្ថិភាព ដោយសារតែការប្រឈមមុខខ្ពស់នៃការឆាបឆេះ ក្នុងអំឡុងពេលជួបគ្រោះថ្នាក់ ព្រោះតែអាគុយអេឡិចត្រូនិចរបស់វា។

ដើម្បីស្វែងយល់ថារថយន្តអគ្គិសនីនាពេលបច្ចុប្បន្នមានសុវត្ថិភាពកម្រិតណា សមាគមត្រួតពិនិត្យរថយន្តអាល្លឺម៉ង់ DEKRA (German Motor Vehicle Inspection Association) បានយករថយន្តអគ្គិសនីជប៉ុន Nissan Leaf ដែលទទួលបានពិន្ទុសុវត្ថិភាព Euro NCAP ផ្កាយ៥ មកធ្វើតេស្តបុកយ៉ាងព្រៃផ្សៃ ដែលមើលហើយអាណិតរថយន្តតែម្តង។

ការធ្វើតេស្តរបស់ DEKRA នេះ ស្ថិតនៅក្នុងផ្នែកមួយនៃការស្រាវជ្រាវគ្រោះថ្នាក់ចរាចររបស់សាកលវិទ្យាល័យ University Medical Center Göttingen ដោយត្រូវបំបុកផ្នែកចំហៀង និងចំពីមុខនៃរថយន្តអគ្គិសនីទៅនឹងបង្គោលដែក ក្នុងរយៈល្បឿនលឿនជាងការធ្វើតេស្តបុកធម្មតា រហូតដល់ទៅ ៨៤គីឡូម៉ែត្រក្នុងមួយម៉ោង៕

ចង់ដឹងថាការធ្វើតេស្តនោះយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

ស្ងាត់ៗ! លេចមុខរថយន្តអគ្គិសនី BMW i7 ដើម្បីប្រជែង Mercedes EQS

November 20, 2019

បន្ទាប់ពីបានប្រកាសថានឹងផលិតរថយន្តអគ្គិសនីម៉ូដែល i4 រួចមក ក្រុមហ៊ុន BMW ក៏បានបញ្ជាក់ថា នឹងបញ្ចេញរថយន្តអគ្គិសនីផ្សេងទៀតដូចជា iNext និង iX3 SUV ផងដែរ។

មិនតែប៉ុណ្ណោះ ថ្មីៗនេះគេប្រមាញ់បានរូបថតជាច្រើនសន្លឹកនៃរថយន្ត BMW 7 Series ប្រើប្រាស់ថាមពលអគ្គិសនី ដែលទំនងត្រូវគេហៅថា i7 ដើម្បីប្រជែងនឹងរថយន្ត Mercedes EQS។

i7 ត្រូវបានគេរំពឹងថា នឹងចូលរួមក្នុងត្រកូល 7 Series ជាមួយនឹងម៉ូដែលប្រើម៉ាស៊ីនសាំង និងម៉ាស៊ូតធម្មតា ព្រមទាំងម៉ូដែលប្រើម៉ាស៊ីន Plug-in Hybrid ផងដែរ។ យោងតាមរបាយការណ៍បានឱ្យដឹងថា BMW i7 នឹងប្រើកញ្ចប់អាគុយកម្លាំង ៨០គីឡូវ៉ាត់ម៉ោង ដល់ ១២០គីឡូវ៉ាត់ម៉ោង។

តាមរយៈការប្រើប្រាស់កញ្ចប់អាគុយធំបែបនេះ រថយន្តអគ្គិសនី BMW i7 អាចមានចម្ងាយបើកបរដល់ ៧០០គីឡូវ៉ាត់រាល់ពេលសាកភ្លើងពេញម្តង។ ក្នុងនោះដែរ ក៏មានពាក្យចចាមអារ៉ាមនិយាយថា រថយន្តនេះនឹងចែកជា ២ម៉ូដែល គឺ i7 ធម្មតា និង i7S ហើយមានកម្លាំងដល់ ៦៥០សេះ និងអាចចេញលក់នៅចុងឆ្នាំ២០២១ ឬដើមឆ្នាំ២០២២ ខាងមុខនេះ៕

ផ្ទាំងផ្សាយពាណិជ្ជកម្ម