Lexus នឹងបង្ហាញរថយន្តអគ្គិសនីជាផលិតផលសម្រេច នៅសប្ដាហ៍ក្រោយ

November 16, 2019

Lexus នឹងនាំយកនូវរថយន្តអគ្គិសនីដែលជាផលិតផលសម្រេចសម្រាប់ផលិតផលលក់លើទីផ្សារ មកបង្ហាញនៅក្នុងកម្មវិធី Guangzhou International Automobile Exhibition នៅប្រទេសចិន នាថ្ងៃទី ២២ ខែវិច្ឆិកាខាងមុខ។

ក្រុមហ៊ុនមិនបានអ្វីលម្អិតជុំវិញរថយន្តអគ្គិសនីដំបូងនេះទេ ដោយគ្រាន់តែបញ្ចេញរូបភាព Teaser ដែលមានឡូហ្គោ “Electric” ហើយក្រុមហ៊ុននិយាយថារថយន្តថ្មីនេះនឹងចេញលក់នៅចិន និងនៅអឺរ៉ុបផងដែរ។

គួរដឹងថាក្រុមហ៊ុនជប៉ុននេះបានសាកល្បងស្ទាបស្ទង់ទឹកចិត្តអ្នកគាំទ្រម្ដងរួចមកហើយកាលពីខែមុន ជាមួយរថយន្ត Concept ឈ្មោះ LF-30 Electrified ដែលវាជារថយន្តប្រើប្រាស់ថាមពលអគ្គិសនីសុទ្ធ។ រង់ចាំមើលថារថយន្តអគ្គិសនីដែលជាផលិតផលសម្រេចនឹងជារថយន្តមានរូបរាងផ្សេងពី LF-30 Electrified ឬយ៉ាងណា៕

ផ្ទាំងផ្សាយពាណិជ្ជកម្ម

ម៉ាករថយន្តគួរទុកចិត្តជាងគេទាំង ១០ ប្រចាំឆ្នាំ ២០១៩ នៅអាមេរិក

November 16, 2019

ការវាយតម្លៃរបស់ទស្សនាវដ្ដី Consumer Reports ដែលផ្អែកលើទិន្នន័យនៃរថយន្តចំនួន ៤២០ ០០០ គ្រឿង បានជាលទ្ធផលនូវម៉ាករថយន្តគួរឲ្យទុកចិត្តជាងគេចំនួន ១០ នៅសហរដ្ឋអាមេរិក ដែលមានន័យថាម៉ាករថយន្តទាំងនេះមិនសូវមានបញ្ហាខូចខាតច្រើន និងមិនខាតបង់តម្លៃខ្លាំងពេលលក់ចេញនោះឡើយ។

១. Lexus

ទទួលបាន ៨១ ពិន្ទុ
ម៉ូដែលគួរទុកចិត្តជាងគេគឺ Lexus IS
ម៉ូដែលសូវគួរទុកចិត្តជាងគេគឺ Lexus LS

២. Mazda

ទទួលបាន ៧៧ ពិន្ទុ
ម៉ូដែលគួរទុកចិត្តជាងគេគឺ Mazda MX-5 Miata
ម៉ូដែលសូវគួរទុកចិត្តជាងគេគឺ Mazda3

២. Toyota

ទទួលបាន ៧៧ ពិន្ទុ
ម៉ូដែលគួរទុកចិត្តជាងគេគឺ Corolla Hatchback
ម៉ូដែលសូវគួរទុកចិត្តជាងគេគឺ C-HR

៤. Porsche

ទទួលបាន ៧៥ ពិន្ទុ
ម៉ូដែលគួរទុកចិត្តជាងគេគឺ Cayenne
ម៉ូដែលសូវគួរទុកចិត្តជាងគេគឺ 718 Boxster/718 Cayman

៥. Genesis

ទទួលបាន ៧១ ពិន្ទុ
ម៉ូដែលគួរទុកចិត្តជាងគេគឺ G70
ម៉ូដែលសូវគួរទុកចិត្តជាងគេគឺ G90

៦. Hyundai

ទទួលបាន ៦៩ ពិន្ទុ
ម៉ូដែលគួរទុកចិត្តជាងគេគឺ Kona
ម៉ូដែលសូវគួរទុកចិត្តជាងគេគឺ Tucson

៧. Subaru

ទទួលបាន ៦៨ ពិន្ទុ
ម៉ូដែលគួរទុកចិត្តជាងគេគឺ BRZ
ម៉ូដែលសូវគួរទុកចិត្តជាងគេគឺ Ascent

៨. Dodge

ទទួលបាន ៦៣ ពិន្ទុ
ម៉ូដែលគួរទុកចិត្តជាងគេគឺ Challenger
ម៉ូដែលសូវគួរទុកចិត្តជាងគេគឺ Durango

៩. Kia

ទទួលបាន ៦២ ពិន្ទុ
ម៉ូដែលគួរទុកចិត្តជាងគេគឺ Soul
ម៉ូដែលសូវគួរទុកចិត្តជាងគេគឺ Stinger

១០. Mini

ទទួលបាន ៥៩ ពិន្ទុ
ម៉ូដែលគួរទុកចិត្តជាងគេគឺ Cooper
ម៉ូដែលសូវគួរទុកចិត្តជាងគេគឺ Countryman

ផ្ទាំងផ្សាយពាណិជ្ជកម្ម

រថយន្ត Lamborghiniមានតែមួយគ្រឿងក្នុងលោក លេចមុខដាក់ដេញថ្លៃម្ដងទៀត

November 15, 2019

កាលពីឆ្នាំ ២០០៥ ក្រុមហ៊ុន Lamborghini បានបង្ហាញចេញរថយន្ត Concept S នៅកម្មវិធីរថយន្ត Geneva Motor Show។ ដោយសារទទួលបានការចាប់អារម្មណ៍ខ្លាំងពីសំណាក់មហាជន ក្រុមហ៊ុនអ៊ីតាលីសម្រេចចិត្តផលិតរថយន្តនេះ ១០០ គ្រឿង។ ប៉ុន្តែដោយសារតែការចំណាយលើការផលិតខ្ពស់ ទើបចុងក្រោយរថយន្តនេះមានតែមួយគ្រឿងប៉ុណ្ណោះក្នុងលោក។

រថយន្ត Concept S ដែលមានតែមួយគ្រឿង ត្រូវបានលក់ទៅឲ្យអតិថិជន ហើយអតិថិជនរូបនោះត្រូវបានអញ្ជើញចូលរួមកម្មវិធីជួបជុំរបស់ Lamborghini ជាច្រើនលើកផងដែរ។ កន្លងមករថយន្តបានប្ដូរម្ចាស់ច្រើនដងមកហើយ។ ការប្ដូរលើកចុងក្រោយដែលគេដឹង គឺប៉ុន្មានឆ្នាំមុនពេលដែលវាលក់ចេញក្នុងកម្មវិធីដេញថ្លៃក្នុងតម្លៃ ១,៣២ លានដុល្លារ។ ហើយពេលនេះ Concept S ត្រូវគេយកដាក់លក់ដេញថ្លៃម្ដងទៀត ក្នុងកម្មវិធីធ្វើឡើងនៅ Abu Dhabi នាថ្ងៃទី ៣០ វិច្ឆិកានេះ។

រថយន្តនៅតែមានសភាពថ្មីដោយទើបរត់បានចម្ងាយមិនដល់ ២០០ គីឡូម៉ែត្រឡើយ។ មិនទាន់មានការប៉ាន់ស្មានអំពីតម្លៃដែលរថយន្តនេះអាចលក់បាននោះទេ ប៉ុន្តែច្បាស់ជាលើស ១ លានដុល្លារជាមិនខាន៕

ផ្ទាំងផ្សាយពាណិជ្ជកម្ម

Ford ជ្រុលដៃបង្ហាញឡាន SUV អគ្គិសនីដំបូងរបស់ខ្លួន តម្លៃចាប់ពីជាង ៤ ម៉ឺនដុល្លារ

November 15, 2019

រថយន្ត Mustang Mach-E ដែលជារថយន្ត SUV អគ្គិសនីដំបូងរបស់ Ford នឹងបង្ហាញមុខជាផ្លូវការនៅថ្ងៃទី ១៧ ខែវិច្ឆិកា ប៉ុន្តែបុគ្គលិកផ្នែកបច្ចេកទេសរបស់ក្រុមហ៊ុនបានជ្រុលដៃបង្ហាញចេញរូបរាង តម្លៃ និងលក្ខណៈសម្បត្តិរថយន្តនេះមុនបាត់ទៅហើយ។

កំហុសបច្ចេកទេសបានបង្ហាញឲ្យឃើញថារថយន្ត Mustang Mach-E នេះមានរចនាបថអំពូលមុខ/ក្រោយ ជាអត្តសញ្ញាណរបស់រថយន្ត Mustang ប្រភេទធម្មតា។ នៅផ្នែកខាងក្នុងមានបំពាក់អេក្រង់ធំមួយសម្រាប់បញ្ជាមុខងារជាច្រើន ហើយនៅខាងក្រោយចង្កូតក៏មានអេក្រង់តូចមួយដែរ ដែលដើរតួជាកុងទ័ររថយន្ត។

ម៉ូទ័រអគ្គិសនីប្រភេទ Base នៃរថយន្តនេះ អាចបង្កើតកម្លាំងបាន ២៥៥ សេះ ប្រើប្រព័ន្ធបើកបរវិលកង់ក្រោយ និងអាចបន្ថែមលុយយកប្រព័ន្ធបើកបរវិលកង់ទាំងអស់បាន។ Ford រំពឹងថារថយន្តអគ្គិសនីនេះអាចរត់បានចម្ងាយ ៣៧០ គ.ម ពេលវិលតែកង់ក្រោយ និងបាន ៣៣៨ គ.ម ពេលវិលកង់ទាំងអស់។

រថយន្តនេះមានតម្លៃចាប់ពី ៤៣ ៨៩៥ ដុល្លារសម្រាប់ប្រភេទ First Edition ដល់ ៦០ ៥០០ ដុល្លារសម្រាប់ប្រភេទ GT។ ប្រភេទដែលមកដល់មុនគេនៅចុងឆ្នាំ ២០២០ ខាងមុខគឺ First Edition និង Premium ចំណែកប្រភេទ GT ចេញលក់នៅអំឡុងឆ្នាំ ២០២១៕

ផ្ទាំងផ្សាយពាណិជ្ជកម្ម

ឡាន Mazda CX-30 ទទួលលទ្ធផល “ល្អឥតខ្ជោះ” ពីការធ្វើតេស្តបុករបស់ Euro NCAP

November 15, 2019

ទីភ្នាក់ងារ European New Car Assessment Program (Euro NCAP) បានធ្វើតេស្តសុវត្ថិភាពលើរថយន្តថ្មីចំនួន ៤ម៉ូដែល គឺ Mazda CX-30, Mercedes-Benz GLB, Ford Explorer PHEV និង Opel Corsa។

ក្នុងនោះ រថយន្ត Mazda CX-30 បានឈរលើកំពូលតារាង ផ្នែកការពារអ្នកដំណើរពេញវ័យ (Adult Occupant Protection) ដោយទទួលបានពិន្ទុ៩៩ តែម្តង។ ក្រៅពីនេះ CX-30 ទទួលបានពិន្ទុ ៨៦ ផ្នែកការពារកុមារ, ៨០ ផ្នែកការពារអ្នកថ្មើរជើង និង ៧៧ ផ្នែក Safety Assist។

ក្រៅពីនោះ រថយន្ត Mercedes-Benz GLB និង Ford Explorer Hybrid ក៏ទទួលបានចំណាត់ថ្នាក់ផ្កាយ៥ ដែរ។ GLB ទទួលបានពិន្ទុ ៩២, ៨៨, ៧៨ និង ៧៤ ខណៈ Explorer Hybrid ទទួលបានពិន្ទុ ៨៧, ៨៦, ៦១ និង ៧៦ លើផ្នែកទាំង៤ ខាងលើ។

ដោយឡែក រថយន្ត Opel Corsa ទទួលបានត្រឹមចំណាត់ថ្នាក់ផ្កាយ៤ ប៉ុណ្ណោះ ជាមួយនឹងពិន្ទុ ៨៤, ៨៦, ៦៦ និង ៦៩៕

ផ្ទាំងផ្សាយពាណិជ្ជកម្ម

មកស្គាល់ឡានជប៉ុនមួយ អាចរត់ពីកុងទ័រ ០-១០០គ.ម៉/ម៉ ប្រើពេលមិនដល់ ២វិនាទី

November 15, 2019

ក្រុមហ៊ុនរថយន្តអគ្គិសនីជប៉ុនដ៏អាថ៌កំបាំងមួយ មានឈ្មោះថា Aspark បានបញ្ចេញគំរូរថយន្តស្ព័រអគ្គិសនី ម៉ូដែល Owl កាលពីឆ្នាំ២០១៧។ ស្ថិតនៅជារថយន្តគំរូ វាអាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេល ១,៩វិនាទី។

ឥឡូវនេះ រថយន្ត Aspark Owl ដែលបានបង្ហាញខ្លួនជាផ្លូវការនៅក្នុងទីក្រុង Dubai ជាមួយកម្លាំង ១ ៩៨៤សេះនេះ អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹមតែ ១,៦៩វិនាទីប៉ុណ្ណោះ ហើយមានល្បឿនអតិបរមាដល់ទៅ ៤០០គីឡូម៉ែត្រក្នុងមួយម៉ោង ព្រមទាំងអាចបើកបរបានចម្ងាយ ៤៥០គីឡូម៉ែត្រ រាល់ពេលសាកភ្លើងពេញ ជាមួយខ្សែសាកកម្លាំង 44KW ក្នុងរយៈពេលត្រឹម ៨០នាទីប៉ុណ្ណោះ។

Aspark Owl នឹងត្រូវផលិតតែ ៥០គ្រឿងប៉ុណ្ណោះ ជាមួយតម្លៃខ្លួន ៣ ១៨៨ ០០០ដុល្លារ។ បើតាមក្រុមហ៊ុន Aspark បានអះអាងថា Owl របស់ខ្លួនមិនត្រឹមតែជារថយន្តអាចរត់ពីកុងទ័រ ០ ដល់ ១០០គីឡូម៉ែត្រលឿនបំផុតទេ ថែមទាំងជារថយន្តស្ព័រអគ្គិសនីអាចបើកបរតាមផ្លូវស្របច្បាប់ មានកម្ពស់ទាបបំផុតលើលោកទៀតផង ពោលគឺត្រឹមតែ ៩៩សង់ទីម៉ែត្រប៉ុណ្ណោះពីដី។

លក្ខណៈពិសេសស្តង់ដារលើរថយន្តនេះមានដូចជា ចង្កៀង LED, ប្រព័ន្ធកាមេរ៉ា Rear Camera Mirror System (CMS), ផែនទី, ទូរទស្សន៍៤, ប្រព័ន្ធភ្លើង Ambient Lighting, Keyless-go, ប្រព័ន្ធ Battery Monitoring System (BMS), Tire Pressure Monitoring System (TPMS), ESP, ABS, TCS និង Steering Assistance ផងដែរ៕

ផ្ទាំងផ្សាយពាណិជ្ជកម្ម

ច្បាស់ហើយ! រថយន្តភីកអាប់របស់ Hyundai នឹងចេញលក់ឆ្នាំ ២០២១

November 14, 2019

Hyundai បានបញ្ជាក់ថារថយន្តភីកអាប់ម៉ូដែល Santa Cruz ដែលគ្រប់គ្នាទន្ទឹងរង់ចាំយូរមកហើយនោះ នឹងត្រូវចាប់ផ្ដើមផលិតនៅឆ្នាំ ២០២១ និងចេញលក់ឆ្នាំដូចគ្នា ដែលការផលិតនឹងធ្វើឡើងនៅរោងចក្រក្នុងរដ្ឋ Alabama សហរដ្ឋអាមេរិក។

រថយន្ត Hyundai Santa Cruz បានបង្ហាញមុខជាលើកដំបូងក្នុងនាមជា Concept នៅឆ្នាំ ២០១៥ ក្នុងកម្មវិធី Detroit Auto Show ហើយវាទទួលបានការចាប់អារម្មណ៍ខ្លាំងតាំងពីពេលនោះមក ដោយសារមានរូបរាងប្លែក។

រោងចក្រនៅ Alabama នឹងទទួលបានទឹកប្រាក់ ៤១០ លានដុល្លារ លើការពង្រីកសង្វាក់ផលិតកម្ម ដើម្បីផលិតរថយន្តភីកអាប់នេះ ដែលវាអាចជួយបង្កើតការងារថ្មីចំនួន ២០០ កន្លែង។ រោងចក្រនៅ Alabama នេះ បច្ចុប្បន្នមានផលិតរថយន្តម៉ូដែល Santa Fe, Sonata និង Elantra៕

ផ្ទាំងផ្សាយពាណិជ្ជកម្ម

Rolls-Royce បញ្ឈប់ការផលិតរថយន្តម៉ូដែល Ghost ជំនាន់ទីមួយ

November 14, 2019

Rolls-Royce បានប្រកាសឲ្យដឹងថាសង្វាក់ផលិតកម្មនៃរថយន្តម៉ូដែល Ghost ជំនាន់ទីមួយ ត្រូវបានបញ្ចប់ហើយ ដើម្បីត្រៀមខ្លួនសម្រាប់រថយន្ត Ghost ជំនាន់ទីពីរ។

ក្រុមហ៊ុនបានប្រាប់អំពីផែនការ ដែលគ្រោងនឹងបង្ហាញចេញ Rolls-Royce Ghost ថ្មីប្រភេទ Black Badge នៅកម្មវិធីតាំងបង្ហាញរថយន្តបុរាណ NEC Classic Motor Show នៅឆ្នាំនេះ ដើម្បីអបអរខួប ១០ ឆ្នាំ នៃសង្វាក់ផលិតកម្មផលិតរថយន្តម៉ូដែល Ghost នេះ និងជាការបញ្ចប់ការផលិតផងដែរ។

រថយន្តម៉ូដែល Ghost បានបង្ហាញមុខក្នុងកម្មវិធី Frankfurt Motor Show នាឆ្នាំ ២០០៩ ដែលវាជាម៉ូដែលមានគួបផ្សំនូវប្រណីតភាពរបស់ Rolls-Royce ជាមួយតម្លៃធូរ។ សម្រាប់ Ghost ជំនាន់ថ្មីគឺមានប្រើប្រាស់គ្រោងឆ្អឹងថ្មី ប៉ុន្តែរូបរាងទាំងស្រុងរបស់វាទំនងជាមិនផ្លាស់ប្ដូរខ្លាំងនោះឡើយ អាចមានការផ្លាស់ប្ដូរអំពូលមុខក្រោយ ឲ្យទាន់សម័យជាងមុន៕

ផ្ទាំងផ្សាយពាណិជ្ជកម្ម

McLaren ចេញឡានស្ព័រថ្មី អត់ដំបូល អត់កញ្ចក់មុខ តែតម្លៃជិត ២លានដុល្លារ

November 14, 2019

ក្រុមហ៊ុន McLaren បានប្រកាសចេញរថយន្តស្ព័រម៉ូដែលថ្មី Elva ដោយផលិតមានចំនួនកំណត់ទៀតផង។

រថយន្ត McLaren Elva បំពាក់ម៉ាស៊ីនចំណុះ ៤,០លីត្រ Twin-Turbo ទំហំ ៨ស៊ីឡាំង មានកម្លាំង ៨០៤សេះ ប្រើប្រអប់លេខ Dual-clutch ៧វគ្គ អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលមិនដល់ ៣វិនាទីឡើយ។ រថយន្តស្ព័ររបស់អង់គ្លេសនេះនឹងត្រូវផលិតតែ ៣៩៩គ្រឿងប៉ុណ្ណោះ ជាមួយតម្លៃចាប់ពី ១ ៦៩០ ០០០ដុល្លារ។

McLaren Elva គឺជារថយន្តដំបូងបង្អស់ដែលបំពាក់ប្រព័ន្ធគ្រប់គ្រងខ្យល់ Active Air Management System (AAMS) ដែលបញ្ចូនខ្យល់តាមរយៈច្រមុះរថយន្ត ទៅខាងលើ និងរំលងកាប៊ីនរថយន្ត ដូចជាកញ្ចក់សប្បនិម្មិតអីចឹង។

សូមបញ្ជាក់ថា រថយន្តនេះគ្មានដំបូល និងកញ្ចក់មុខឡើយ ប៉ុន្តែ McLaren ក៏នឹងផ្តល់ Option កញ្ចក់មុខដែរ។ រថយន្ត McLaren Elva នឹងចេញលក់នៅចុងឆ្នាំ២០២០៕

ផ្ទាំងផ្សាយពាណិជ្ជកម្ម

Ferrari ចេញរថយន្តស្ព័រថ្មីម៉ូដែល Roma រចនារូបរាងប្លែក ឯកម្លាំងជាង ៦០០សេះ

November 14, 2019

Ferrari បានប្រកាសចេញរថយន្តស្ព័រស៊េរីចុងក្រោយបង្អស់របស់ខ្លួនជាផ្លូវការ មានឈ្មោះថា Roma។ ថ្វីបើមិនបាននិយាយអ្វីច្រើនពីវា ប៉ុន្តែ Ferrari Roma មានការរចនាថ្មីប្លែក ខុសពីរថយន្ត Ferrari ដទៃទៀត។

Roma មានរូបរាងខាងមុខបែប Aerodynamic និង ប៉ាណាប្រភេទ Retro យ៉ាងទាក់ទាញ។ មិនតែប៉ុណ្ណោះ ចង្កៀងបំភ្លឺពេលថ្ងៃ Daytime Running Lights របស់វា ស្ថិតនៅចន្លោះចង្កៀងមុខ មើលទៅហាក់បីដូចជាអណ្តែតអីចឹង។

ចំណែកឯផ្នែកខាងក្រោយ Roma បានរចនាដំបូលបែបទាល ជាមួយនឹងការបំពាក់ចង្កៀងក្រោយ LED យ៉ាងស្រស់ស្អាត និងបំពង់ស៊ីម៉ាំងដល់ទៅ៤ ឯណោះ។

ដោយឡែក ផ្នែកខាងក្នុង រថយន្តអ៊ីតាលីនេះក៏បំពាក់បច្ចេកវិទ្យាទំនើបៗដែរ ដូចជា កុងទ័រឌីជីថល, ប្រព័ន្ធ Infotainment System បញ្ឈរថ្មី ហើយអ្នកដំណើរមុខក៏មានប្រព័ន្ធ Infotainment System ផ្ទាល់ខ្លួនផងដែរ។

សូមបញ្ជាក់ថា រថយន្ត Ferrari Roma ថ្មី នឹងប្រើម៉ាស៊ីនចំណុះ ៣,៩លីត្រ Turbocharged ទំហំ ៨ស៊ីឡាំង មានកម្លាំង ៦១២សេះ ប្រើប្រអប់លេខ Dual-clutch ៨វគ្គ អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៤វិនាទីប៉ុណ្ណោះ ហើយមានល្បឿនអតិបរមាដល់ ៣២០គីឡូម៉ែត្រក្នុងមួយម៉ោង៕