Nissan បង្ហាញចេញគូប្រជែង Ford Ranger Raptor

November 6, 2019

Nissan បានបង្ហាញចេញនូវ Concept ដ៏ប្លែកច្នៃចេញពីរថយន្ត Nissan Frontier ដែលវាជាការ Tease មួយសម្រាប់កម្មវិធីតាំងបង្ហាញរថយន្ត SEMA ឆ្នាំ ២០១៩ ដែល Nissan គឺជាតារាប្រចាំកម្មវិធីនេះ។

សម្រាប់ប្រភេទ Concept នេះ Nissan បានដកម៉ាស៊ីន ៤,០ លីត្រ ៦ ស៊ីឡាំងចេញ ដែលជំនួសដោយម៉ាស៊ីន ៥,៦ លីត្រ ៨ ស៊ីឡាំង នៃរថយន្ត Nissan Titan វិញ។ ម៉ាស៊ីននេះត្រូវបានឆ្លងកាត់ការ Turbocharge ដែលវាអាចផលិតកម្លាំងបានលើសពី ៦០០ សេះ។ រថយន្តនេះដែរក៏មានការកែច្នៃរូបរាងប្រៀបដូចជារថយន្តប្រណាំងយ៉ាងអ៊ីចឹង ពោរពេញដោយអំណាចបំផុត៕

ផ្ទាំងផ្សាយពាណិជ្ជកម្ម

មើលរូបរាងខាងក្នុងរថយន្ត Aston Martin DBX តម្លៃចាប់ពី ១៨ ម៉ឺនដុល្លារ

November 6, 2019

ការប្រកាសចេញរថយន្ត SUV ដំបូងរបស់ Aston Martin កាន់តែកៀកចូលមកដល់ហើយ ពោលគឺនៅថ្ងៃទី ២០ ខែវិច្ឆិកាដែលនឹងបង្ហាញចេញនៅទីក្រុងប៉េកាំង ប្រទេសចិន។

ដើម្បីឲ្យរថយន្តនេះកាន់តែទទួលបានការចាប់អារម្មណ៍ ក្រុមហ៊ុនបានបញ្ជាក់អំពីតម្លៃរបស់រថយន្តម៉ូដែល DBX នេះដែលមានតម្លៃចាប់ពី ១៨៩ ៩០០ ដុល្លារនៅសហរដ្ឋអាមេរិក។ បន្ថែមពីនេះ Aston Martin ក៏បានបង្ហាញរូបភាពមួយសន្លឹក ដែលជាផ្នែកខាងក្នុងនៃរថយន្ត DBX ទៀតផង។

ផ្នែកខាងក្នុងរបស់រថយន្ត DBX គឺមានចង្កូតស្រោបដោយស្បែកចំនួនពីរពណ៌ដែលស្ថិតនៅចំពីមុខកុងទ័រប្រភេទឌីជីថលទំហំធំ។ នៅចំកណ្ដាលក៏មានអេក្រង់កម្សាន្តទំហំធំ ហើយផ្នែកខាងក្នុងមានលាយឡំដោយឈើផងដែរ។

រថយន្ត DBX នេះនឹងប្រើប្រាស់ម៉ាស៊ីន Twin-Turbo ៤,០ លីត្រ ៨ ស៊ីឡាំង ដែលបានមកពីក្រុមហ៊ុន Mercedes-AMG។ វាអាចផលិតកម្លាំងបាន ៥៤២ សេះ ហើយក្រុមហ៊ុនអះអាងថារថយន្តនេះអាចបើកបរដល់ល្បឿន ២៩០ គ.ម/ម៉៕

ផ្ទាំងផ្សាយពាណិជ្ជកម្ម

Toyota ចេញគំរូឡាន Supra ថ្មី ៥ម៉ូដែល មើលៗពេញចិត្តមួយណា?

November 6, 2019

Toyota បានត្រៀមគំរូរថយន្ត Supra ស៊េរីឆ្នាំ២០២០ រហូតដល់ទៅ ៥ម៉ូដែលខុសៗគ្នា សម្រាប់កម្មវិធី SEMA ដែលខ្លួនបានបង្កើតដោយខ្លួនឯងខ្លះ និងចាប់ដៃជាមួយក្រុមហ៊ុនផ្សេងខ្លះ។

តោះ! ទៅមើលៗ តើអ្នកពេញចិត្តមួយណាដែរ?

១) Toyota GR Supra 3000GT Concept

២) Toyota GR Supra HyberBoost Edition 750HP

៣) Toyota GR Supra Wasabi Concept

៤) Toyota GR Supra Heritage Edition 500hp

៥) Toyota GR Supra Performance Line Concept

ផ្ទាំងផ្សាយពាណិជ្ជកម្ម

BMW M2 CS ឆ្នាំ២០២០ មាឌតូចមែន តែកម្លាំង៤៤៤សេះ ឯរាងម៉ាអេម

November 6, 2019

ក្រុមហ៊ុន BMW បានបញ្ចេញរថយន្តស្ព័រមាឌតូច M2 CS ស៊េរីឆ្នាំ២០២០ ជាផ្លូវការ ដោយបំពាក់ម៉ាស៊ីនចំណុះ ៣,០លីត្រ TwinPower Turbo ទំហំ ៦ស៊ីឡាំង មានកម្លាំងរហូតដល់ទៅ ៤៤៤សេះឯណោះ។

BMW M2 CS ថ្មីមានទាំងជម្រើសលេខអូតូ ៧វគ្គ Dual Clutch និង លេខដៃ ៦វគ្គ ដែលអាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេល ៤,០វិនាទី ហើយមានល្បឿនអតិបរមា ២៨០គីឡូម៉ែត្រក្នុងមួយម៉ោង។ M2 CS បំពាក់ប្រព័ន្ធបូម Active M Differential និង Adaptive M Suspension ដែលអាចឱ្យអ្នកបើកបរជ្រើសរើសយក Comfort, Sport និង Sport+ បាន។

វាមាន ៤ ពណ៌ គឺ ស (Alpine White), ខៀវ (Misano Blue Metallic), ខ្មៅ (Black Sapphire) និង ទឹកប្រាក់ (Hockenheim Silver Metallic)។

ផ្នែកខាងក្នុង វាបានបំពាក់កៅអីស្ព័រប្រភេទ M Competition រំលេចដោយស្បែក និងកាំម្ញី ព្រមទាំងថ្នេរដេរពណ៌ក្រហមយ៉ាងទាក់ទាញទៀតផង។ វាក៏មានបំពាក់ប្រព័ន្ធភ្លើង Ambient Interior Lighting, GPS, មុខងារ Apple CarPlay និងប្រព័ន្ធសំឡេង Harman / Kardon ផងដែរ។

សូមបញ្ជាក់ថា រថយន្ត BMW M2 CS ឆ្នាំ២០២០ នឹងមានតម្លៃខ្ទង់ ១០ម៉ឺនដុល្លារលើទីផ្សារប្រទេសអាល្លឺម៉ង់៕

ផ្ទាំងផ្សាយពាណិជ្ជកម្ម

ចំណូលរបស់ Ferrari កើនឡើងលើសការរំពឹងទុក

November 5, 2019

ក្រុមហ៊ុន Ferrari បានបង្ហាញចេញចំណូលដែលរកបានប្រចាំត្រីមាសទី ៣ ឆ្នាំ ២០១៩ នេះ ដែលចំណូលមានការកើនឡើង ៤% អាចរកបាន ១,០២ ពាន់លានដុល្លារ។

ជាមួយលទ្ធផលល្អលើសការរំពឹងទុក ក្រុមហ៊ុនបានព្យាករណ៍ថាចំណូលប្រចាំឆ្នាំ ២០១៩ អាចនឹងមានប្រមាណ ៣,៧ ពាន់លានអឺរ៉ូ ដែលតួលេខប៉ាន់ស្មានចាស់គឺ ៣,៥ ពាន់លានអឺរ៉ូ។ ចំណូលរបស់ Ferrari ភាគច្រើនគឺបានពីកំណើនលក់នៃរថយន្ត Portofino និង 812 Superfast។ ជាក់ស្ដែងនៅត្រីមាសទី ៣ នេះ Ferrari អាចលក់រថយន្តបាន ២ ៤៧៤ គ្រឿង កើនឡើង ៩,៤% ធៀបនឹងឆ្នាំមុន៕

ផ្ទាំងផ្សាយពាណិជ្ជកម្ម

Toyota Raize 2020 ចេញលក់នៅជប៉ុន តម្លៃចាប់ពីជាង ១,៤ ម៉ឺនដុល្លារ

November 5, 2019

ក្រោយពីបានលេចធ្លាយរូបរាងកាលពីខែមុនរួចមក រថយន្ត Toyota Raize ឆ្នាំ ២០២០ បានចេញលក់ជាផ្លូវការនៅប្រទេសជប៉ុនចាប់ពីថ្ងៃនេះ។

រថយន្តនេះប្រើប្រាស់គ្រោងឆ្អឹងថ្មីរបស់ Daihatsu ឈ្មោះថា DNGA ដែលវាទំហំតូចជាងរថយន្ត C-HR ដោយមានប្រវែង ៣៩៩៥ ម.ម ទទឹង ១៦៩៥ ម.ម និងកម្ពស់ ១៦២០ ម.ម។ ត្បិតថាមានទំហំតូចប៉ុន្តែរថយន្តនេះផ្ដល់នូវទំហំខាងក្នុងធំទូលាយ និងមានកន្លែងដាក់ឥវ៉ាន់ទំហំ ៣៦៩ លីត្រផងដែរ។

ម៉ាស៊ីនរបស់រថយន្តនេះអាចផលិតកម្លាំងបាន ៩៧ សេះ ដែលក្រុមហ៊ុននិយាយថាអាចផ្ដល់នូវការបង្កើនសន្ទុះថាមពលខ្លាំង និងរលូនល្អ ហើយសន្សំសំចៃប្រេងបានល្អ និងបញ្ចេញសំឡេងស្ងាត់ពេលបើកបរនៅល្បឿនលឿន។

កម្រិតស៊ីប្រេងជាមធ្យមគឺ ១ លីត្រ ជិះបាន ១៨,៦ គ.ម ឬ ៥,៤ លីត្រ/១០០ គ.ម សម្រាប់ប្រភេទ 2WD និងប្រភេទ 4WD ស៊ីប្រេង ៥,៧ លីត្រក្នុងចម្ងាយ ១០០ គីឡូម៉ែត្រ។ នៅពេលនិយាយដល់ជំនួយការបើកបរ រថយន្ត Raize នេះមានមុខងារ Crash Avoidance Braking Function, Erroneous Start Prevention Function, Adaptive Cruise Control និង Smart Panorama Parking Assist ជាដើម។

រថយន្តនេះមានលក់ជា ៣ ប្រភេទនៅជប៉ុន ដែលវាមានតម្លៃចាប់ពីប្រមាណ ១៤ ៤២៥ ដុល្លារ ហើយក៏មានសេវាកម្មបង់ប្រចាំខែចាប់ពី ៣៦៦ ដុល្លារផងដែរ៕

ផ្ទាំងផ្សាយពាណិជ្ជកម្ម

មកមើលវីដេអូបង្ហាញរូបរាងឡាន Rolls-Royce រុស្ស៊ី ពិតជាស្អាត និងទំនើបខ្លាំង (វីដេអូ)

November 5, 2019

ការបង្កើតក្រុមហ៊ុនរថយន្តប្រណីតមួយ ទាំងគ្មានបទពិសោធន៍ និងកេរ្តិ៍ឈ្មោះពីមុនមក គឺជាការប្រថុយប្រថានដ៏ធំមួយ ប៉ុន្តែក្រុមហ៊ុនរុស្ស៊ី Aurus Motors មិនខ្លាចឡើយ។

នាពេលថ្មីៗកន្លងទៅនេះ ក្រុមហ៊ុន Aurus Motors ទើបតែប្រកាសចេញលក់រថយន្តស៊េរីទំនើប និងប្រណីត ម៉ូដែល Senat ដែលមានរហស្សនាមថា Rolls-Royce រុស្ស៊ី ព្រោះតែមានរូបរាងស្រដៀងរថយន្ត Rolls-Royce Phantom សម្រាប់លក់ឱ្យតែមន្ត្រីរាជរដ្ឋាភិបាលប៉ុណ្ណោះ ប៉ុន្តែក្រោយមកនឹងដាក់លក់ឱ្យមហាជនដែលសម្បូរទ្រព្យប្រើប្រាស់ដែរ។

ជាការពិតណាស់ រថយន្ត Aurus Senat ប្រភេទ Base Model នឹងមានតម្លៃចាប់ពី ២៨០ ០០០ដុល្លារលើទីផ្សារប្រទេសរុស្ស៊ី។ វាបំពាក់ម៉ាស៊ីនសាំងចំណុះ ៤,៤លីត្រ Twin-turbo ទំហំ ៨ស៊ីឡាំង មានកម្លាំង ៥៩០សេះ និងម៉ូទ័រអគ្គិសនីមួយមានកម្លាំង ៦២សេះ។

វាប្រើប្រអប់លេខអូតូ ៩វគ្គ និង ប៉ុងពីរ AWD ដែលអាចរត់ពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេល ៤,៩វិនាទី ហើយមានល្បឿនអតិបរមា ២៥០គីឡូម៉ែត្រក្នុងមួយម៉ោង។ រថយន្តប្រភេទ Sedan ខ្នាតធំនេះមានទម្ងន់រហូតដល់ទៅ ៣តោនឯណោះ។

ចង់ដឹងថារថយន្តតម្លៃជិត ៣០ម៉ឺនដុល្លារខាងលើទំនើប និងប្រណីតយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

Honda CR-V ឆ្នាំ២០២០ ចេញរូបរាងផ្លូវការ តម្លៃជាង២ម៉ឺនដុល្លារនៅអាមេរិក

November 5, 2019

Honda បានប្រកាសចេញនូវរថយន្ត CR-V ស៊េរីឆ្នាំ២០២០ ជាផ្លូវការ ដោយទទួលបានការអាប់ដេតមួយចំនួន ទាំងផ្នែកខាងក្រៅ និងខាងក្នុងផងដែរ។

រថយន្ត Honda CR-V ឆ្នាំ២០២០ នឹងមានតម្លៃចាប់ពី ២៦ ១៤៥ដុល្លារលើទីផ្សារសហរដ្ឋអាមេរិក ថ្លៃជាងម៉ូដែលឆ្នាំ២០១៩ ចំនួន៦០០ដុល្លារ ហើយមាន Option ប៉ុងពីរ AWD ទៀតផង។

វាបំពាក់បច្ចេកវិទ្យា Honda’s Sensing មកស្តង់ដារ ដោយក្នុងនោះរួមមានមុខងារដូចជា Lane Departure Warning, L:ane Keep Assist, Automatic Emergency Braking with Pedestrian Detection និង Adaptive Cruise Control ជាដើម។

CR-V ថ្មី ប្រើម៉ាស៊ីនសាំងចំណុះ ១,៥លីត្រ Turbo ទំហំ៤ស៊ីឡាំង។ វាក៏បំពាក់មុខងារ Honda’s Keyless Entry និង Remote Start System ក៏ដូចជា អេក្រង់ Touchscreen ទំហំ ៧អ៊ីង អាចភ្ជាប់មុខងារ Apple CarPlay និង Android Auto បានផងដែរ។ Honda នឹងចេញលក់ CR-V Hybrid នៅពេលក្រោយទៀតផង៕

ផ្ទាំងផ្សាយពាណិជ្ជកម្ម

រថយន្តប្រណីតរបស់ម៉ាឡេស៊ីបង្ហាញមុខជាផ្លូវការ តម្លៃជាង ៣០ម៉ឺនដុល្លារ

November 4, 2019

ក្នុងកម្មវិធីតាំងបង្ហាញរថយន្ត PACE ឆ្នាំ ២០១៩ នៅប្រទេសម៉ាឡេស៊ី ក្រុមហ៊ុន Bufori ដែលមានមូលដ្ឋាននៅម៉ាឡេស៊ី បានដាក់បង្ហាញរថយន្តចំនួនបួនម៉ូដែល ក្នុងនោះមានប្រភេទ Sedan ប្រណីតម៉ូដែល Geneva និងបីទៀតជារថយន្តប្រភេទស្ព័រ។

ចំពោះរថយន្ត Geneva ទទួលបានការចាប់អារម្មណ៍ជាងគេ។ វាគឺជារថយន្តទ្វារបួនដែលប្រណីតមិនចាញ់រថយន្ត Rolls-Royce នោះឡើយ។ នៅផ្នែកខាងក្នុងរថយន្ត អតិថិជនអាចធ្វើការកុម្ម៉ង់ការរចនាតាមចិត្តចង់ ដោយប្រើប្រាស់វត្ថុធាតុស្បែកគុណភាពខ្ពស់។ បន្ថែមពីនេះក៏អាចដាក់នូវទូទឹកកក ម៉ាស៊ីនឆុងកាហ្វេ កម្រាលព្រំ ប្រព័ន្ធម៉ាស្សា និងប្រអប់ស៊ីហ្គាផងដែរ។

រថយន្តប្រណីតនេះប្រើប្រាស់ម៉ាស៊ីន ៣,៦ លីត្រ ៦ ស៊ីឡាំង និង ៦,៤ លីត្រ ៨ ស៊ីឡាំង ប្រើប្រអប់លេខស្វ័យប្រវត្តិ ៨ វគ្គ ដែលវាមានតម្លៃចាប់ផ្ដើមពី ៣៩២ ០០០ ដុល្លារឯណោះ។ រថយន្តរបស់ Bufori មានតម្លៃថ្លៃ ដោយសារដំឡើងដោយផ្ទាល់ដៃ និងចំណាយពេលចន្លោះ ៣ ៥០០ ម៉ោង ទៅ ៩ ពាន់ម៉ោង៕

ផ្ទាំងផ្សាយពាណិជ្ជកម្ម

រថយន្ត Mercedes ចាស់តែថ្មី ដាក់លក់តម្លៃ ១៧ ម៉ឺនដុល្លារ

November 4, 2019

រថយន្ត Mercedes-Benz 560 SEL ស៊េរីឆ្នាំ ១៩៨៦ ដ៏ថ្មីសន្លាងមួយគ្រឿង ត្រូវបានបង្ហោះដាក់លក់លើវិបសាយ Mobile.de ដោយកំណត់តម្លៃលក់រហូតដល់ជិត ១៧០ ០០០ ដុល្លារឯណោះ។

រថយន្តអាយុកាល ៣៣ ឆ្នាំនេះ ត្រូវបានម្ចាស់អះអាងថាមិនដែលបានបើកបរលើដងផ្លូវនោះឡើយ ហើយកុងទ័ររថយន្តវិលបាន ៤៦ គីឡូម៉ែត្រប៉ុណ្ណោះ ដែលជាកុងទ័រពេលចេញពីរោងចក្រផ្ទាល់។ រូបភាពបានបង្ហាញថារថយន្តស៊េរីចាស់នេះ ពិតជាមានសភាពថ្មីសន្លាងពិតមែន។

រថយន្តនេះដែរគឺប្រើប្រាស់ម៉ាស៊ីន ៥,៥ លីត្រ ៨ ស៊ីឡាំង ភ្ជាប់នឹងប្រអប់លេខស្វ័យប្រវត្តិ ៤ វគ្គ។ ម៉ាស៊ីននេះផលិតកម្លាំងបាន ២៩៥ សេះ ដែលអាចឲ្យរថយន្តបង្កើនសន្ទុះពី ០ – ១០០ គ.ម/ម៉ ដោយប្រើពេលតែ ៦,៩ វិនាទី៕

ផ្ទាំងផ្សាយពាណិជ្ជកម្ម