ទីតាំងបើកសាកល្បងរថយន្តឈ្មោះថា Nardò Ring ស្ថិតនៅក្រុង Nardò ប្រទេសអ៊ីតាលី បានសាងសង់ឡើងនៅឆ្នាំ ១៩៧៥ ហើយកាន់កាប់ដោយក្រុមហ៊ុនរថយន្ត Fiat។ នៅឆ្នាំ ២០១២ ក្រុមហ៊ុន Porsche បានទិញយកទីតាំងនេះ និងដាក់ឈ្មោះឲ្យថា Nardò Technical Center។
កាលពីឆ្នាំ ២០១៨ ក្រុមហ៊ុនរថយន្តអាល្លឺម៉ង់ខាងលើសម្រេចចិត្តបិទ ដើម្បីធ្វើការជួសជុលរហូតដល់ចុងឆ្នាំ ២០១៨។ នៅពេលនេះ Nardò Technical Center ត្រូវបានបើកដំណើរការឡើងវិញ សម្រាប់ការសាកល្បងរថយន្ត Porsche។
Nardò Technical Center មានផ្លូវខ្សែជារង្វង់ដែលមានប្រវែងសរុប ១២,៦ គីឡូម៉ែត្រ និងមានទទឹង ១៦ ម៉ែត្រ ហើយពីខាងក្នុងមានផ្លូវខ្វាត់ខ្វែងច្រើនប្រភេទសម្រាប់ការធ្វើតេស្តរថយន្តក្នុងស្ថានភាពផ្លូវខុសៗគ្នា ដែលសរុបផ្ទៃដីមានទំហំ ១០៦ ០០០ ម៉ែត្រការ៉េ។
ការជួសជុលបានធ្វើឲ្យទីតាំងសាកល្បងរថយន្តកាន់តែទំនើបជាងមុន ដែលការជួសជុលនេះប្រើពេល ៧ ខែ និងចំណាយអស់ថវិកាប្រមាណ ៣៩,៥ លានដុល្លារផងដែរ៕
