Toyota Prius អាចបន្លំខ្លួនជា Ferrari FF ចាយលុយមិនដល់ ២ពាន់ដុល្លារ

May 6, 2020

កាលពីពេលថ្មីៗនេះ រថយន្ត Toyota Prius មួយគ្រឿង បានលេងតួខ្លួនដូចទៅនឹងរថយន្តស្ព័រ Ferrari FF ដែលមើលទៅពិតជាគួរឲ្យភ្ញាក់ផ្អើលមែនទែន។

អ្វីដែលគួរឲ្យចាប់អារម្មណ៍នោះគឺ រថយន្ត Prius ខាងលើ អាចលេងគ្រឿងយ៉ាងឡូយ ដោយចំណាយអស់លុយតិចតួចប៉ុណ្ណោះ។ Albermo ដែលជាអ្នកលក់គ្រឿងលេងនៅក្នុងប្រទេសជប៉ុន បានបង្ហាញតម្លៃឲ្យឃើញថា កាងលេងខាងមុខសម្រាប់រថយន្ត Prius ឲ្យដូចទៅនឹង Ferrari FF គឺមានតម្លៃត្រឹមតែ ១០៨ ០០០ យ៉េន ឬប្រហែល ១ ០០០ ដុល្លារប៉ុណ្ណោះ។

ដោយឡែក កាងលេងខាងក្រោយវិញ មានតម្លៃថោកជាងកាងមុខ គឺត្រឹមតែ ៧៨ ០០០ យ៉េន ឬប្រហែល ៧០០ ដុល្លារប៉ុណ្ណោះ។

ជាមួយនឹងការចំណាយលុយអស់ប្រហែល ១ ៧០០ ដុល្លារ លោកអ្នកអាចកែរថយន្ត Prius ឲ្យមានរូបរាងស្រដៀងទៅនឹងរថយន្ត Ferrari FF យ៉ាងស្រស់ស្អាត៕

ផ្ទាំងផ្សាយពាណិជ្ជកម្ម

ជិតឈប់ផលិត ឥឡូវ Lexus ចាប់ផ្ដើមបញ្ចុះតម្លៃរថយន្ត GS មួយប្រភេទ

May 5, 2020

រថយន្ត Lexus GS និង GS F នឹងត្រូវបញ្ឈប់ការផលិតនាខែសីហានេះ ដោយមិនមានរថយន្តណាចូលមកជំនួសតំណែងវានៅឡើយទេ។ ជាមួយការចែកផ្លូវពី GS នេះ ម៉ាករថយន្តប្រណីតរបស់ជប៉ុនបានធ្វើការបញ្ចុះតម្លៃសម្រាប់ម៉ូដែល GS F ឆ្នាំ ២០២០ ដែលលក់នៅអាមេរិក។

GS F ស៊េរីឆ្នាំ ២០២០ ដែលមានប្រើម៉ាស៊ីន V8 នាក្នុងខែឧសភានេះគឺមានបញ្ចុះតម្លៃរហូតដល់ ៦ពាន់ដុល្លារ សម្រាប់រដ្ឋជាច្រើន។ រថយន្ត Lexus GS F ឆ្នាំ ២០២០ គឺមានតម្លៃដើមចេញពីរោងចក្រ ៨៥ ០១០ដុល្លារ ដូចនេះជាមួយការបញ្ចុះតម្លៃនេះធ្វើឲ្យតម្លៃមាននៅក្រោម ៨ម៉ឺនដុល្លារ។

គួរដឹងថា Lexus សម្រេចចិត្តឈប់ផលិតរថយន្តម៉ូដែល GS ក៏ដោយសារតែចំនួនលក់ក្នុងរយៈពេលប៉ុន្មានឆ្នាំចុងក្រោយនេះ ហាក់មិនកាក់កបឡើយ ពោលគឺមានចំនួនតិច៕

ផ្ទាំងផ្សាយពាណិជ្ជកម្ម

គ្រឿងលេងតម្លៃជាង ២ពាន់ដុល្លារ ធ្វើឲ្យ Toyota RAV4 មុខមាត់ដូច Lamborghini

May 5, 2020

ហាងលេងរថយន្តមួយរបស់ជប៉ុនឈ្មោះថា Albermo បានបង្កើតគ្រឿងលេងមួយឈុតសម្រាប់ Toyota RAV4 ដែលគេឲ្យឈ្មោះថា XR51 មានការឌីហ្សាញដែលយកលំនាំតាម Lamborghini Urus។

កាងខាងមុខមើលទៅមានលក្ខណៈស្រដៀងនឹងអត្តសញ្ញាណរបស់រថយន្ត Lamborghini Urus ខ្លាំង ប៉ុន្តែនៅផ្នែកខាងក្រោយវិញមិនសូវជាដូចជា Urus ប៉ុន្មានឡើយ។ ចំពោះគ្រឿងលេងនេះ មួយឈុតគឺមានតម្លៃសរុប ២៤០ ០០០ យេន ដែលស្មើប្រមាណ ២ ២៥០ ដុល្លារ។

ទស្សនាវីដេអូខាងក្រោម ៖

ផ្ទាំងផ្សាយពាណិជ្ជកម្ម

ឥណ្ឌា លក់ឡានអត់ដាច់សូម្បីមួយគ្រឿង កាលពីខែមុន

May 5, 2020

ការផ្ទុះឡើង និងរីករាលដាលនៃជំងឺកូវីដ-១៩ បានធ្វើឲ្យប៉ះពាល់យ៉ាងខ្លាំងដល់ទីផ្សាររថយន្ត នៅទូទាំងពិភពលោក។ ជាមួយគ្នានេះ ប្រទេសឥណ្ឌាដែលមានប្រជាជនសរុបចំនួន ១,៣៥ពាន់លាននាក់ បែរជាលក់រថយន្តមិនដាច់សូម្បីមួយគ្រឿង នៅក្នុងខែមេសា។

មូលហេតុដែលលក់រថយន្តមិនដាច់សូម្បីមួយគ្រឿងបែបនេះ ក៏ដោយសារតែការចាក់សោរប្រទេស ដែលបង្ខំឲ្យរោងចក្ររថយន្ត និងហាងលក់រថយន្តទាំងអស់បិទទ្វារផងដែរ។

មិនតែប៉ុណ្ណោះ ចំនួននាំចេញរថយន្តនៅក្នុងខែមេសា ក៏បានធ្លាក់ចុះយ៉ាងខ្លាំងផងដែរ នៅក្នុងប្រទេសឥណ្ឌា។ ជាក់ស្តែង ក្រុមហ៊ុន Maruti Suzuki បាននាំចេញរថយន្តចំនួនត្រឹម ៦៣២គ្រឿង ខណៈក្រុមហ៊ុន Mahindra & Mahindra នាំចេញបាន ៧៣៣គ្រឿងប៉ុណ្ណោះ៕

ផ្ទាំងផ្សាយពាណិជ្ជកម្ម

ចិន នាំយកឡានអត់ប្រើសាំងទៅលក់នៅអឺរ៉ុប

May 5, 2020

BYD Auto ដែលជាក្រុមហ៊ុនផលិតរថយន្តអគ្គិសនីធំបំផុតរបស់ប្រទេសចិន និងធំបំផុតលំដាប់លេខ២ នៅលើពិភពលោក បានបង្ហាញពីគម្រោងលម្អិត ក្នុងការនាំយករថយន្តរបស់ខ្លួនទៅលក់នៅអឺរ៉ុប។

ជាការបោះជំហ៊ានដំបូងចូលក្នុងអឺរ៉ុប BYD បានជ្រើសរើសយកប្រទេសន័រវែស ធ្វើជាទីផ្សារសម្រាប់រថយន្តអគ្គិសនីរបស់ខ្លួន ដោយនាំយករថយន្តម៉ូដែល BYD Tang EV600 ទៅលក់នៅទីនោះ។

រថយន្ត SUV អត់ប្រើសាំងខាងលើ អាចបើកបរបានចម្ងាយរហូតដល់ទៅ ៥២០គីឡូម៉ែត្រ រាល់ពេលសាកភ្លើងពេញម្តង។ Tang EV600 បំពាក់កញ្ចប់អាគុយកម្លាំង ៨២,៨គីឡូវ៉ាត់ម៉ោង មានកម្លាំងសរុប ២៤២សេះ។

យ៉ាងណាក៏ដោយ ក្រុមហ៊ុន BYD នឹងប្រកាសតម្លៃរបស់រថយន្តខ្លួន នៅពេលចេញលក់ជាផ្លូវការ នាចុងឆ្នាំនេះ៕

ផ្ទាំងផ្សាយពាណិជ្ជកម្ម

កម្មវិធីបង្ហាញរថយន្តនៅបាងកក ប្ដូរពេលជាលើកទីបី

May 4, 2020

ដោយសារតែការផ្ទុះនូវជំងឺកូវីដ១៩កំពុងបន្តកើតមាននោះ អ្នករៀបចំកម្មវិធី Bangkok International Motor Show បានលើកពេលកម្មវិធីជាលើកទីបី ពោលត្រូវលើកដល់ខែកក្កដាខាងមុខ។

នេះគឺជាការលើកពេលលើកទីបី ដោយការកំណត់ចុងក្រោយនេះគឺកម្មវិធីនឹងធ្វើឡើងនាថ្ងៃទី ១៥ ដល់ ២៦ ខែកក្កដា។ ដំបូងឡើយកម្មវិធីនេះត្រូវប្រព្រឹត្តទៅនាថ្ងៃទី ២៥ ខែមេសា ដល់ ៣ ឧសភា បន្ទាប់មកទើបលើកទៅថ្ងៃទី ២០ ដល់ថ្ងៃទី ៣១ ឧសភាវិញ។

បញ្ហាជំងឺកូវីដ១៩កំពុងស្ថិតក្នុងស្ថានភាពលំបាកមួយនៅប្រទេសថៃ ដោយរដ្ឋាភិបាលសម្រេចបន្តការចាត់វិធានការគម្លាតសង្គម និងរឹតត្បិតការធ្វើដំណើររយៈពេល ១ ខែទៀត រហូតដល់ដំណាច់ខែឧសភា។

មិនមែនតែកម្មវិធីរថយន្តនៅថៃនោះ កម្មវិធីរថយន្តធំៗជាច្រើនទៀតនៅទូទាំងពិភពលោកមានឈានដល់ការរំសាយចោល និងមានខ្លះត្រូវលើកពេលដោយមិនមានបញ្ជាក់ថ្ងៃ ដូចជា Beijing Auto Show (ចិន), Geneva Motor Show (ស្វីស) និង New York Auto Show (សហរដ្ឋអាមេរិក)៕

ផ្ទាំងផ្សាយពាណិជ្ជកម្ម

Tesla Model S ពិសេសមានតែមួយគ្រឿងគត់ តម្លៃជិត ២៥ម៉ឺនដុល្លារ

May 4, 2020

Tesla Model S P85 Shooting Brake ដែលជារថយន្តមានតែមួយគ្រឿងគត់ក្នុងលោកច្នៃឡើងដោយ RemetzCar នាពេលនេះកំពុងដាក់លក់លើវិបសាយរថយន្តនៅអឹរ៉ុបក្នុងតម្លៃប្រមាណ ២៤៥ ៨១០ ដុល្លារឯណោះ។

រថយន្តពិសេសនេះគឺឌីហ្សាញដោយ Niels van Roij ហើយផលិតឡើងដោយ RemetzCar ដែលត្រូវបានបង្ហាញមុខលើអនឡាញកាលពីប្រមាណ ២ ឆ្នាំមុន មុនការបង្ហាញមុខក្នុងកម្មវិធី Geneva Motor Show ឆ្នាំ ២០១៩។ រថយន្តនេះទទួលបានការចាប់អារម្មណ៍ខ្លាំងនាពេលបង្ហាញមុខ ដោយអាចឲ្យ RemetzCar សម្រេចថានឹងផលិតរថយន្តនេះ ២០ គ្រឿងសម្រាប់អតិថិជន។ ប៉ុន្តែចុងក្រោយផែនការផលិតត្រូវរំសាយចោល ធ្វើឲ្យរថយន្តនេះមានតែមួយគ្រឿងប៉ុណ្ណោះ។

ក្រៅពីមានការផ្លាស់ប្ដូររូបរាងបន្តិចបន្តួច រថយន្តនេះគឺនៅតែមានបំពាក់ម៉ូទ័រអគ្គិសនីមួយដែលមានកម្លាំង ៤២២ សេះ គួបផ្សំនឹងអាគុយចំណុះ ៨៥ គីឡូវ៉ាត់ម៉ោង។ គួរដឹងថា Tesla Model S Shooting Brake នេះប្រើប្រាស់បានចម្ងាយ ៦ម៉ឺនគីឡូម៉ែត្ររួចមកហើយ៕

ផ្ទាំងផ្សាយពាណិជ្ជកម្ម

Lexus គ្រោងចេញ IS 500 ប្រើម៉ាស៊ីន V8 ប្រជែង BMW

May 4, 2020

ក្រុមហ៊ុន Toyota និង Lexus បានបញ្ជាក់យ៉ាងច្បាស់ហើយថា ពួកគេនឹងបោះបង់ម៉ាស៊ីន Naturally Aspirated ចំណុះ ៥,០លីត្រ V8 ចោល ហើយប្រើម៉ាស៊ីន twin-turbo V6 ជំនួសវិញ។

ទោះជាយ៉ាងណា Lexus ប្រហែលជានឹងចេញរថយន្តបំពាក់ម៉ាស៊ីន V8 ចុងក្រោយបង្អស់របស់ខ្លួន ដើម្បីប្រជែងនឹងរថយន្តត្រកូល M របស់ BMW។

យោងតាមគេហទំព័រ Carsensor ឲ្យដឹងថា Lexus អាចនឹងចេញរថយន្ត IS 500 ដែលបំពាក់ម៉ាស៊ីន V8 មានកម្លាំងរហូតដល់ទៅ ៤៧៥សេះ សម្រាប់ទីផ្សារអាមេរិកខាងជើង៕

ផ្ទាំងផ្សាយពាណិជ្ជកម្ម

Honda Jazz ថ្មី ជិះ១០០គ.ម៉ ស៊ីសាំង ៤លីត្រ ឥឡូវនេះកាន់តែសុវត្ថិភាព

May 4, 2020

Honda Jazz ឬលើទីផ្សារមួយចំនួនហៅថា Honda Fit នឹងក្លាយជារថយន្តដំបូងបង្អស់របស់ Honda នៅអឺរ៉ុប ដែលបំពាក់ពោងការពារសុវត្ថិភាព នៅចំផ្នែកខាងមុខ-កណ្តាល មកស្តង់ដារ។

ពោងសុវត្ថិភាពផ្នែកខាងមុខ-កណ្តាលនេះ អាចការពារទាំងអ្នកបើកបរ និងអ្នកដំណើរនៅខាងមុខ ពោលគឺអាចការពាររបួសក្បាលរហូតដល់ទៅ ៨៥% សម្រាប់អ្នកដំណើរដែលអង្គុយក្បែរ និង ៩៨% ឯណោះសម្រាប់អ្នកដំណើរអង្គុយឆ្ងាយ។

ក្រៅពីនោះ Honda Jazz ក៏បំពាក់ប្រព័ន្ធសុវត្ថិភាព Honda Sensing Suite មកស្តង់ដារផងដែរ ដោយក្នុងនោះរួមមានមុខងារដូចជា Collision Mitigating Braking, Adaptive Cruise Control, Lane Keep Assist, Traffic Sign Recognition និង Auto High Beam ជាដើម។

រថយន្តខ្នាតតូចនេះបំពាក់ម៉ាស៊ីន Hybrid ចំណុះ ១,៥លីត្រ ទំហំ ៤ស៊ីឡាំង មានកម្លាំង ១០៧សេះ សម្រាប់ទីផ្សារអឺរ៉ុប។ វាមានកម្រិតស៊ីសាំងជាមធ្យមត្រឹមតែ ៤,៥លីត្រប៉ុណ្ណោះ សម្រាប់ការបើកបរចម្ងាយ ១០០គីឡូម៉ែត្រ៕

ផ្ទាំងផ្សាយពាណិជ្ជកម្ម

កម្រឃើញ! ឡាន Tesla អស់អាគុយ ពឹងឡាន Hybrid ឲ្យជួយ

May 2, 2020

ទស្សនីយភាពកម្រជួបប្រទះមួយកំពុងត្រូវបានគេចាប់អារម្មណ៍ខ្លាំងនៅប្រទេសចិន ដោយគេឃើញរថយន្ត Tesla Model S មួយគ្រឿងអស់អាគុយតាមផ្លូវ ហើយបានពឹងរថយន្ត BYD ឲ្យជួយសាកភ្លើងឲ្យ ត្បិតថារថយន្តដែលជួយនោះគឺជារថយន្ត Hybrid។

រថយន្ត BYD ដែលបានជួយសង្គ្រោះ Tesla Model S គឺជាម៉ូដែល BYD Song Pro DM ដែលមានបំពាក់ម៉ាស៊ីន Turbocharged ចំណុះ ១,៥លីត្រ គួបផ្សំនឹងម៉ូទ័រអគ្គិសនីនិងអាគុយចំណុះ ១៥,៧ គីឡូវ៉ាត់ម៉ោង អាចផលិតកម្លាំងបានសរុប ៣១៩សេះ។ រថយន្តរបស់ក្រុមហ៊ុនចិននេះអាចបើកបរដោយប្រើថាមពលអគ្គិសនីសុទ្ធបានចម្ងាយដល់ ៨១គីឡូម៉ែត្រ ហើយវាមានគាំទ្រមុខងារសាកភ្លើងឲ្យរថយន្តផ្សេងទៀតផង។

គួរដឹងថាការសាកភ្លើងពីរថយន្តមួយទៅរថយន្តមួយគឺកំណត់ត្រឹមល្បឿន ២គីឡូវ៉ាត់ ដែលមានន័យថាត្រូវប្រើពេល ២ម៉ោង ទើបរថយន្ត Tesla អាចទទួលបានថាមពលគ្រប់គ្រាន់ដើម្បីបើកទៅកាន់ស្ថានីយសាកភ្លើងល្បឿនលឿនដែលនៅក្បែរ៕

ផ្ទាំងផ្សាយពាណិជ្ជកម្ម