Lamborghini Urus Hybrid នឹងមានកម្លាំងខ្លាំងជាង Urus ធម្មតាទៅទៀត!

July 19, 2019

បច្ចុប្បន្ននេះ Lamborghini Urus កំពុងកាន់កាប់តំណែង “រថយន្ត SUV លឿនបំផុតនៅលើពិភពលោក”។ វាប្រើម៉ាស៊ីនសាំងចំណុះ ៤,០ លីត្រ Twin-turbo ទំហំ ៨ ស៊ីឡាំង មាន ៦៤១ សេះ ហើយមានល្បឿនអតិបរមា ៣០៥ គីឡូម៉ែត្រក្នុងមួយម៉ោង។

នាពេលថ្មីៗកន្លងទៅនេះ លោក Maurizio Reggiani ប្រធានផ្នែកបច្ចេកវិទ្យារបស់ក្រុមហ៊ុន Lamborghini បានប្រាប់គេហទំព័ររថយន្ត Drive ថា ក្រុមហ៊ុនកំពុងមានគម្រោងផលិត Urus Hybrid ដែលមានកម្លាំងខ្លាំងជាងនេះទៅទៀត។ វាមានបច្ចេកវិទ្យាស្រដៀង Porsche Cayenne Turbo S E-Hybrid ប៉ុន្តែបន្ថែមកម្លាំងកាន់តែខ្លាំង ដើម្បីជួយឲ្យវារក្សាតំណែង “រថយន្ត SUV លឿនបំផុត” ។

តាមរយៈការអះអាងខាងលើ គេអាចរំពឹងថា Lamborghini Urus Hybrid នឹងមានកម្លាំងលើសពី ៦៨០ សេះ ស្របពេលដែលលោក Reggiani បញ្ជាក់បន្ថែមថា វាអាចនឹងបង្ហាញខ្លួនក្នុងពេលឆាប់ៗខាងមុខ៕

ផ្ទាំងផ្សាយពាណិជ្ជកម្ម

ឡានភីកអាប់អគ្គិសនីតម្លៃជិត ២ ម៉ឺនដុល្លារ ជិះបាន ៤០៣ គីឡូម៉ែត្រ

July 19, 2019

គ្រប់គ្នាកំពុងចាប់អារម្មណ៍ខ្លាំងលើរថយន្តភីកអាប់អគ្គិសនី ក្រោយក្រុមហ៊ុនមួយចំនួនដូចជា Rivian បានបង្ហាញចេញរថយន្តប្រភេទនេះជាសាធារណៈ។ នៅប្រទេសចិនឯណោះវិញក៏មានក្រុមហ៊ុនបានចាប់ផ្ដើមផលិតរថយន្តភីកអាប់អគ្គិសនីនេះដែរ ដោយសុទ្ធសឹងមានតម្លៃធូរ។

ចុងក្រោយបង្អស់នេះគឺជារថយន្តភីកអាប់របស់ក្រុមហ៊ុនរថយន្ត Dongfeng ម៉ូដែល Rich 6 EV ដែលផលិតឡើងផ្អែកតាមរថយន្ត Dong Rich 6 ប្រភេទម៉ាស៊ីនសាំង។ Rich 6 EV ប្រើប្រាស់ម៉ូទ័រអគ្គិសនីចំនួនមួយ ដែលមានកម្លាំង ១៦០ សេះ អាគុយមានថាមពល ៦៨ គីឡូវ៉ាត់ម៉ោង។

រថយន្តនេះអាចបើកបរនៅល្បឿនអតិបរមា ១១០ គ.ម/ម៉ និងបើកបរបានចម្ងាយ ៤០៣ គីឡូម៉ែត្រ ពេលសាកពេញ ហើយចំណាយពេលត្រឹមតែ ៤៥ នាទី អាចសាកថ្មបាន ៨០%។ Rich 6 EV ជាភីកអាប់ទំហំធំ មានវិមាត្រ ៥២៩០ x ១៨៥០ x ១៧៩០ ម.ម មានទម្ងន់ ១៩៨៣ គីឡូក្រាម និងមានកៅអីអង្គុយចំនួន ៥។

Rich 6 EV នឹងចេញលក់លើទីផ្សារចិននៅចុងខែនេះ ដោយរំពឹងថាមានតម្លៃប្រមាណ ១៣០ ០០០ យ័ន ឬ ស្មើប្រមាណ ១៨ ៩០០ ដុល្លារ៕

ផ្ទាំងផ្សាយពាណិជ្ជកម្ម

ឡាន Chevrolet Silverado ពិសេសកង់ ៦ ថ្លៃជាងប្រភេទធម្មតា ១៣ ដង

July 19, 2019

ក្រោយពីបានធ្វើការកែច្នៃរថយន្ត Ford Raptor ដាក់កង់ ៦ រួចមកហើយនោះ ពេលនេះក្រុមហ៊ុនជំនាញកែច្នៃរថយន្ត Hennessey Peroformance បានសម្រេចចិត្តកែរថយន្ត Chevrolet Silverado ស៊េរីឆ្នាំ ២០២០ វិញម្ដង។

រថយន្តដែលទទួលបានការកែច្នៃពិសេសនេះ ត្រូវបានគេដាក់ឈ្មោះឲ្យថា Goliath 6×6។ វាមានបំពាក់នូវប្រព័ន្ធទំហំធំ, ថាសកង់ Hennessey ទំហំ ២០ អ៊ីញ និងសម្បកកង់ទំហំ ៣៧ អ៊ីញប្រភេទ Off-Road, មានប្រព័ន្ធភ្លើង LED បាញ់ភ្លើងបានខ្លាំង, តួខ្លួនវែងជាងមុន និង ថែមកាងមុខក្រោយពោរពេញដោយអំណាច។

រថយន្ត Goliath 6×6 នេះបំពាក់ម៉ាស៊ីន General Motor ចំណុះ ៦,២ លីត្រ មាន ៨ ស៊ីឡាំង ដែលជាការផ្លាស់ប្ដូរធំមួយបើធៀបនឹងម៉ាស៊ីនដើមមានចំណុះ ២,៩ លីត្រ ហើយវាអាចបង្កើតកម្លាំងបាន ៧០៥ សេះ។

រថយន្តកែច្នៃពិសេសនេះ មានគម្រោងថាផលិតត្រឹម ២៤ គ្រឿងប៉ុណ្ណោះ ដោយមួយគ្រឿងៗមានតម្លៃ ៣៧៥ ០០០ ដុល្លារឯណោះ ថ្លៃជាងរថយន្ត Chevrolet Silveradoដែលលក់នៅអាមេរិកដល់ ១៣ ដង៕

ផ្ទាំងផ្សាយពាណិជ្ជកម្ម

មកស្គាល់ រថយន្តដំបូងគេបំផុតនៅលើពិភពលោក

July 19, 2019

រថយន្ត Benz Patent-Motorwagen គឹជារថយន្តដំបូងរបស់ពិភពលោកដែលទទួលបានអាញ្ញាប័ណ្ណ និងផលិតនៅឆ្នាំ ១៨៨៥។ រថយន្តនោះត្រូវបានបង្កើតដោយលោក Karl Benz ជនជាតិអាឡឺម៉ង ដែលជាស្ថាបនិករថយន្តដំបូងគេបង្អស់។ ការផលិតនោះគឺចំនាយថវិការអស់ចំនួន ៦០០ imperial German marks ដែលមានតម្លៃប្រហែល ១៥០ ដុល្លារនៅសម័យនោះ បើធៀបមកតម្លៃលុយត្រឹមឆ្នាំ ២០១៨ ប្រហែល ៤,១៨៣ដុល្លារ។ រថយន្តដំបូងនោះត្រូវបានផលិតដោយប្រើប្រាស់ម៉ាសុីនសាំង ប្រើប្រាស់សុីឡាំងចំនួន ១ ទំហំ ៩៥៤ សេស។ អ្វីដែលអស្ចារ្យនោះ គឺមានកង់តែ ៣ប៉ុណ្ណោះ ដែលអាចបើកបរបានត្រឹមតែ ១៦គ.ម ក្នុងម៉ោង។

ផ្ទាំងផ្សាយពាណិជ្ជកម្ម

Hyundai Sonata ឆ្នាំ ២០២០ ក្នុង-ក្រៅរចនាថ្មីទាំងអស់ ស្អាតកប់ហ្មង!

July 18, 2019

កាលពីពេលថ្មីៗនេះ ក្រុមហ៊ុន Hyundai បានបញ្ចេញរថយន្ត Sedan ដ៏ពេញនិយមរបស់ខ្លួន គឺ ម៉ូដែល Sonata ស៊េរីឆ្នាំ ២០២០ ដែលទទួលបានការរចនាថ្មីសន្លាង ទាំងផ្នែកខាងក្រៅ និងខាងក្នុង។

Sonata ស៊េរីថ្មី ប្រើប្រាស់គំរូរចនា Sensuous Sportiness របស់ក្រុមហ៊ុន Hyundai ដំបូងបង្អស់ ដែលពាំនាំការរចនាពីគំរូរថយន្តម៉ូដែល Le Fil Rouge ដែលធ្លាប់បានបង្ហាញខ្លួននៅក្នុងកម្មវិធី Geneva Motor Show កាលពីឆ្នាំ ២០១៨។

រថយន្ត Sedan នេះ មានកម្ពស់ទាបជាងមុន ១,១ អ៊ីញ និង ទទឹងរីកធំជាងមុន ០,៩ អ៊ីញ ដែលមើលទៅពិតជាមានភាពស្ព័រ និងទាក់ទាញជាងម៉ូដែលមុនៗខ្លាំងតែម្តង។ មិនតែប៉ុណ្ណោះ វាក៏បានពង្រីកប្រវែងពីកង់មុខទៅកង់ក្រោយ ១,៣ អ៊ីញ និង មានប្រវែងសរុបវែងជាងមុន ១,៧ អ៊ីញផងដែរ។

រឹតតែពិសេស អំពូល Daytime Running Lights ផ្នែកខាងមុខរបស់ Sonata គឺជាប្រភេទ Hidden Lighting Lamps ដែលយកពីគំរូម៉ូដែល HDC-2 ទៀតផង។ បើនិយាយពីផ្នែកខាងក្នុងវិញ ត្រូវបានរចនា និងរៀបចំយ៉ាងប្រណីត ផ្តល់នូវផាសុកភាពខ្ពស់ចំពោះអ្នកប្រើប្រាស់។

Sonata ឆ្នាំ ២០២០ ប្រើម៉ាស៊ីនសាំងចំណុះ ២,៥ លីត្រ Naturally Aspirated ទំហំ ៤ ស៊ីឡាំង មានកម្លាំង ១៩១ សេះ សម្រាប់ម៉ូដែល SE និង SEL ។ ដោយឡែក ម៉ូដែល SEL Plus និង Limited វិញ ប្រើម៉ាស៊ីនសាំងចំណុះ ១,៦ លីត្រ Turbocharged ទំហំ ៤ ស៊ីឡាំង មានកម្លាំង ១៨០ សេះ ។ ពួកវាប្រើប្រអប់លេខអូតូ ៨ វគ្គ ហើយមានតម្លៃចន្លោះពី ២២ ៥០០ ដុល្លារ និង ៣២ ១០០ ដុល្លារ៕

ផ្ទាំងផ្សាយពាណិជ្ជកម្ម

ឡាន Lexus LX470 ឆ្នាំ២០០១ នេះ លក់ថ្លៃជាង LX570 ឆ្នាំ២០១៩ ទៀត ដោយសារហេតុផលពិសេស

July 18, 2019

បច្ចុប្បន្ននេះ រថយន្តចាស់ដែលមានចម្ងាយបើកបរតិច និងស្ថិតនៅក្នុងសភាពថ្មី ពិតជាកម្រមានណាស់។

ផ្ទុយទៅវិញ រថយន្ត Lexus ម៉ូដែល LX470 ស៊េរីឆ្នាំ ២០០១ មួយគ្រឿង ដែលម្ចាស់វាទើបប្រើបានចម្ងាយ ១ ០៤៣ ម៉ាយ (១៦៧៨ គីឡូម៉ែត្រ) ត្រូវបានដាក់លក់ក្នុងតម្លៃរហូតដល់ទៅ ១៣៩ ០០០ ដុល្លារឯណោះ ពោលគឺថ្លៃជាង Lexus LX570 ស៊េរីឆ្នាំ ២០១៩ ដែលមានតម្លៃត្រឹមតែខ្ទង់ ១០ ម៉ឺនដុល្លារប៉ុណ្ណោះនៅលើទីផ្សារបរទេស។

អ្នកលក់រថយន្ត SUV ខាងលើ បានរៀបរាប់ដំណើររឿង និងបង្ហាញពីមូលហេតុដែលវាត្រូវគេប្រើតិចបំផុតបែបនេះថា វាត្រូវបានគេលួចយកចេញពីកន្លែងលក់រថយន្ត Lexus មួយកន្លែង កាលពីឆ្នាំ ២០០១ មុនពេលរថយន្តត្រូវដឹកទៅឲ្យម្ចាស់។ មិនតែប៉ុណ្ណោះ ចោរបានទុករថយន្ត LX470 ខាងលើ នៅក្នុងឃ្លាំងមួយដែលមានរថយន្តប្រណីតជាង ២០ គ្រឿងផ្សេងទៀតផង។

អ្វីគ្រប់យ៉ាងនៅលើ Lexus LX470 នេះ មើលទៅស្រស់ស្អាត ខណៈប៊ូតុងប្លាស្ទិកនៅលើផ្ទៃតាប្លូមានសភាពថ្មីសន្លាងតែម្តង ហាក់បីដូចជាមិនទាន់បានប្រើពីមុនមកអីចឹង។

រថយន្ត Lexus LX470 ប្រើម៉ាស៊ីនសាំងចំណុះ ៤,៧ លីត្រ ទំហំ ៨ ស៊ីឡាំង មានកម្លាំង ២៣០ សេះ ដំណើរការដោយប្រអប់លេខអូតូ ៤ វគ្គ និងប្រព័ន្ធបើកបរប៉ុងពីរ៕

ផ្ទាំងផ្សាយពាណិជ្ជកម្ម

ឡាន MG ZS EV សាកថ្មមួយពេញជិះបាន ២៦០ គ.ម តម្លៃជាង ២ ម៉ឺនដុល្លារ

July 18, 2019

ការទទួលការកុម្ម៉ង់ទិញរថយន្តអគ្គិសនី MG ZS EV ត្រូវបានបើកទទួលនៅចក្រភពអង់គ្លេស ដោយអតិថិជនដំបូងចំនួន ១ ពាន់នាក់ អាចទិញរថយន្តនេះក្នុងតម្លៃចាប់ពីត្រឹម ២៦ ៧០០ ដុល្លារប៉ុណ្ណោះ ហើយទទួលបានឧបករណ៍សាកភ្លើងនៅផ្ទះ និងដំឡើងឥតគិតថ្លៃ។

រថយន្តអគ្គិសនីនេះប្រើប្រាស់ម៉ូទ័រអគ្គិសនីបំពាក់នៅផ្នែកខាងមុខ ដែលមានកម្លាំង ១០៥ គីឡូវ៉ាត់ (១៤១ សេះ) ដែលទទួលបានពីអាគុយប្រភេទលីចូមទំហំ ៤៤,៥ គីឡូវ៉ាត់ម៉ោង ហើយអាចបើកបរបានចម្ងាយ ២៦២ គីឡូម៉ែត្រពេលសាកចេញ។

ZS EV គឺជារថយន្តទំនើបជាងគេបំផុតរបស់ MG មានដូចជា Advanced Emergency Braking, Blind Spot Monitoring, Lane Keep Assist និង Adaptive Cruise Control។ បន្ថែមពីនេះក៏មានដំបូលថ្លាអាចបើកបាន, អេក្រង់ Touch ទំហំ ៨ អ៊ីញជាមួយមុខងារនាំផ្លូវ, ប្រព័ន្ធ Bluetooth ហើយផ្នែកខាងក្នុងរថយន្តមានទំហំធំទូលាយ។ រថយន្ត MG ZS EV នឹងចាប់ផ្ដើមបញ្ចេញលក់នៅខែកញ្ញា ឆ្នាំ ២០១៩ នេះ៕

ផ្ទាំងផ្សាយពាណិជ្ជកម្ម

រថយន្តភីកអាប់ Mercedes X-Class អាចនឹងត្រូវពិឃាធចោល

July 18, 2019

រថយន្តភីកអាប់របស់ Mercedes-Benz ម៉ូដែល X-Class អាចនឹងត្រូវជម្រុះចោល ដោយសារតែចំនួនលក់មានតិចតួច ដែលធ្វើឲ្យវាមិនអាចរកប្រាក់ចំណេញបានដល់ក្រុមហ៊ុន ត្បិតថាដាក់លក់តម្លៃខ្ពស់ក្ដី។

របាយការណ៍ចេញពីអឺរ៉ុប ចុះផ្សាយដោយសារព័ត៌មានរថយន្ត Automative News បានឲ្យដឹងថា មានប្រភពលាក់ឈ្មោះដែលដឹងច្បាស់ពីរឿងរ៉ាវផ្ទៃក្នុង បានអះអាងថា X-Class នឹងត្រូវបញ្ឈប់ការលក់ និងផលិត ដោយសារក្រុមហ៊ុនចង់កាត់បន្ថយការចំណាយ។

ឆ្នាំ ២០១៨ រថយន្តម៉ូដែល X-Class អាចលក់ចេញបានត្រឹម ១៦ ៧០០ គ្រឿងប៉ុណ្ណោះនៅទូទាំងពិភពលោក។ ធៀបនឹង Toyota អាចលក់រថយន្តភីកអាប់ម៉ូដែល Hilux របស់ខ្លួន បានជិត ៥៥ ម៉ឺនគ្រឿងទូទាំងពិភពលោក កាលពីឆ្នាំមុន។

X-Class ពិបាកជ្រៀតចូលទីផ្សារដោយសារតែវាមានតម្លៃខ្ពស់ និងមិនសូវមានចំណុចលេចធ្លោខ្លាំង។ ឧទាហរណ៍រថយន្ត Ford Ranger និង Mitsubishi Triton មានបំពាក់បច្ចេកវិទ្យាដែលមិនទាន់មានលើ Mercedes X-Class ដូចជា radar cruise control, lane-keeping assistance និង blind-zone warning ទោះបីជារថយន្តពីរនេះមានតម្លៃធូរជាងក្ដី៕

ផ្ទាំងផ្សាយពាណិជ្ជកម្ម

ជាន់ម៉ាឆ្ងាញ់! Ford Focus ST ប្រើម៉ាស៊ីន ២,៣ លីត្រ តែលឿនជាង Lexus 570 ទៀត!

July 17, 2019

កាលពីពេលថ្មីៗនេះ Ford បានបញ្ចេញរថយន្តស្ព័រខ្នាតតូចម៉ូដែល Focus ST ស៊េរីថ្មី ជាមួយនឹងម៉ាស៊ីន និងតួខ្លួន ២ ជម្រើស។

វាប្រើម៉ាស៊ីនសាំងចំណុះ ២,៣ លីត្រថ្មី ជំនួសម៉ាស៊ីនចំណុះ ២,០ លីត្រចាស់ ហើយប្រើ Turbocharged ទំហំ ៤ ស៊ីឡាំង បង្កើតកម្លាំងបាន ២៧៦ សេះ។ បើធ្វើការបៀបធៀប វាមានកម្លាំងខ្លាំងជាងមុន ១២% ដោយអាចជាន់ស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលត្រឹម ៦ វិនាទីប៉ុណ្ណោះសម្រាប់ម៉ូដែល EcoBoost។

Focus ST បានប្រើប្រព័ន្ធ Electronic Limited-Slip Differential (eLSD) ដែលជួយដល់ការទប់លំនឹង ក៏ដូចជា ជម្រើសនៃការបើកបរ Selectable Drive Modes ដូចជា Sport និង Track Drive Mode ជាដើម។

ក្រៅពីជម្រើសម៉ាស៊ីនសាំង Ford ក៏ផ្តល់ជាជម្រើសម៉ាស៊ីនម៉ាស៊ូត ចំណុះ ២,០ លីត្រ EcoBlue ផងដែរ ដែលបង្កើតកម្លាំងបាន ១៨៧ សេះ ជាម៉ាស៊ីនម៉ាស៊ូតមានកម្លាំងខ្លាំងបំផុតមិនធ្លាប់មានលើ Focus ST។ ម៉ាស៊ីនទាំង ២ ជម្រើសនេះ នឹងប្រើជាមួយលេខដៃ ៦ វគ្គស្តង់ដារ ឬ Option លេខអូតូ ៧ វគ្គ។

Focus ST ត្រូវបានផលិតឡើងលើគ្រោងឆ្អឹង C2 ថ្មី ដែលមានបំពាក់លើម៉ូដែល Focus ស៊េរីមុន ដោយកែប្រព័ន្ធបូម, ហ្វ្រាំង និង ដំណើរការយ៉ាងពិសេស។ Focus ST ស៊េរីថ្មីនេះនឹងមានជាប្រភេទ Hatchback និង Wagon (ទ្វារ៥) ជាមួយនឹងតម្លៃចាប់ពី ៣២ ០០០ ដុល្លារលើទីផ្សារបរទេស៕

ផ្ទាំងផ្សាយពាណិជ្ជកម្ម

សមត្ថកិច្ចចុះបង្ក្រាបទីតាំងផលិត Lamborghini ក្លែងក្លាយតម្លៃជាង ៤ ម៉ឺនដុល្លារ

July 17, 2019

សមត្ថកិច្ចប្រេស៊ីលបានចុះបង្ក្រាបទីតាំងផលិតរថយន្តក្លែងក្លាយមួយកន្លែង។ ទីតាំងនេះបង្កើតឡើងឪពុក និងកូនប្រុសម្នាក់ ដែលមានទីតាំងនៅរដ្ឋ Santa Catarina ហើយឪពុកនិងកូនត្រូវបានចាប់ខ្លួនព្រោះតែផលិតរថយន្តក្លែងក្លាយលក្ខណៈទ្រង់ទ្រាយធំ។

សមត្ថកិច្ចបានឲ្យដឹងថារថយន្តក្លែងក្លាយដែលផលិតមានដូចជា Ferrari និង Lamborghini ដែលឪពុកកូន បានដាក់លក់លើបណ្ដាញសង្គមក្នុងតម្លៃចន្លោះពី ៤៥ ០០០ ដុល្លារ ទៅ ៦០ ០០០ ដុល្លារ។

គេមិនបានបង្ហាញឡើយថាម៉ាស៊ីនប្រភេទថាត្រូវបានប្រើប្រាស់ក្នុងការផលិតរថយន្តស្ព័រក្លែងក្លាយនេះ។ យ៉ាងណាក្ដីបើតាមរូបភាពគេឃើញថារថយន្តទាំងនេះកំពុងស្ថិតក្នុងដំណាក់កាលផលិតចុងក្រោយ មានលាបថ្នាំរលើបរលោង កៅអីមានដេរប៉ាក់ដោយឡូហ្គោ ហើយក៏មានឡូហ្គោជាច្រើនសម្រាប់បិទផងដែរ។

ទីតាំងផលិតរថយន្តក្លែងក្លាយនេះត្រូវបានបង្ក្រាប ក្រោយពីសមត្ថកិច្ចទទួលបានពាក្យបណ្ដឹងពីក្រុមហ៊ុនរថយន្តអ៊ីតាលីទាំង ២។ នៅពេលចុះបង្ក្រាបគេរឹបអូសបានរថយន្ត ៨ គ្រឿង ហើយមិនមានការបញ្ជាក់ថាកន្លងមករថយន្តក្លែងក្លាយលក់ចេញបានប៉ុន្មានគ្រឿងនោះទេ៕

ផ្ទាំងផ្សាយពាណិជ្ជកម្ម