កម្ពុជា បានប្រកាសដាក់ឲ្យប្រើច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ដោយក្នុងនោះមាត្រាមួយចំនួននៅក្នុងច្បាប់នេះ ត្រូបានធ្វើវិសោធនកម្ម ដែលពាក់ព័ន្ធជាមួយការផាកពិន័យកាន់តែធ្ងន់ធ្ងរជាងមុន ចំពោះការដឹកជញ្ជូនលើសកម្រិតកំណត់។
ក្នុងចំណោមមាត្រាទាំងនោះ គឺមាត្រា៦០ថ្មី បានចែងពីការពិន័យជាទឹកប្រាក់ច្រើនជាងមុន និងការដក និងព្យួរបណ្ណបើកបរ ចំពោះអ្នកប្រើប្រាស់យានយន្តដឹកជញ្ជូនធុនធ្ងន់ ដែលដឹកជញ្ជូនទំនិញលើផ្លូវថ្នល់ ដូចខាងក្រោម៖
១. មិនចូលថ្លឹងនៅស្ថានីយ ពិន័យ ១លានរៀល។
២. ផ្ទុកទម្ងន់លើសពី ៥% ទៅ ១០% ត្រូវពិន័យ ១០ម៉ឺនរៀលក្នុង១តោន ព្រមទាំងដក និងព្យួរបណ្ណបើកបរ មិនលើសពី ១០ថ្ងៃ។
៣. ផ្ទុកលើសពី ១០% ទៅ ២០% ត្រូវពិន័យ ២០ម៉ឺនរៀលក្នុង១តោន ព្រមទាំងដក និងព្យួរបណ្ណបើកបរ ចំនួន ៦ខែ។
៤. ផ្ទុកលើសពី ២០% ទៅ ៣០% ត្រូវពិន័យ ៣០ម៉ឺនរៀលក្នុង១តោន ព្រមទាំងដក និងព្យួរបណ្ណបើកបរ ចំនួន ៦ខែ។
៥. ផ្ទុកលើសពី ៣០% ទៅ ៤០% ត្រូវពិន័យ ៥០ម៉ឺនរៀលក្នុង១តោន ព្រមទាំងដក និងព្យួរបណ្ណបើកបរ ចំនួន ៩ខែ។
៦. ផ្ទុកលើសពី ៤០% ទៅ ៥០% ត្រូវពិន័យ ៨០ម៉ឺនរៀលក្នុង១តោន ព្រមទាំងដក និងព្យួរបណ្ណបើកបរ ចំនួន១២ខែ។
៧. ផ្ទុកលើសពី ៥០%ឡើងទៅ ត្រូវពិន័យ ១លានរៀលក្នុង១តោន ព្រមទាំងដក និងព្យួរបណ្ណបើកបរ ចំនួន១២ខែ៕
