[ទីផ្សារបរទេស] ចំនួននៃការលក់រថយន្តនាំចូលពីប្រទេសចិន នៅប្រទេសអូស្ត្រាលី បានឈានដល់ចំណុចខ្ពស់ថ្មីមួយ ដោយពេលនេះរថយន្តចិន ក្លាយជាប្រភេទរថយន្តថ្មីធំលំដាប់ទីបីសម្រាប់ទីផ្សារនេះ។
ទិន្នន័យលក់នៃរថយន្តថ្មីប្រចាំខែកញ្ញា ឆ្នាំ២០២២ បានបង្ហាញថា រថយន្តដែលនាំចូលពីប្រទេសចិន ពេលនេះស្ថិតនៅចំណាត់ថ្នាក់លេខបីពីក្រោយរថយន្តនាំពីជប៉ុន និងថៃ និងនាំមុខរថយន្តកូរ៉េខាងត្បូង, អាល្លឺម៉ង់ រួមជាមួយសហរដ្ឋអាមេរិក។
កាលពីឆ្នាំ២០២១ រថយន្តនាំពីប្រទេសចិន ធ្លាប់ជាប្រភពធំទីបួន នៃរថយន្តថ្មីដែលលក់ចេញនៅអូស្ត្រាលី បន្ទាប់ពីបានឈរលេខរៀងទី៦ នៅឆ្នាំ២០២០, លេខរៀងទី៨ នៅឆ្នាំ២០១៩ និងលេខរៀងទី១២ នៅឆ្នាំ២០១៨។
ការកើនឡើងនៃការលក់របស់រថយន្តចិននៅអូស្ត្រាលី ក៏ដោយសារកំណើននៃការលក់រថយន្តរបស់ក្រុមហ៊ុន MG, Great Wall Motors-Haval និងក្រុមហ៊ុន LDV ជាដើម។
ចំនួនលក់រថយន្តពីប្រទេសចិន ទទួលបានការជម្រុញបន្ថែមទៀត ក្រោយពីរថយន្ត Tesla ដែលផលិតនៅចិន ចាប់ផ្ដើមចាក់បញ្ចូលក្នុងតួលេខផ្លូវការចាប់ពីខែមីនា ឆ្នាំ២០២២ ខណៈដែលរថយន្តអគ្គិសនី Polestar ក៏ផលិតនៅប្រទេសចិនដែរ។
បច្ចុប្បន្ននេះ MG កំពុងឈរនៅតំណែងលេខ៧ ជាក្រុមហ៊ុនលក់រថយន្តចេញបានច្រើនជាងគេនៅអូស្ត្រាលី ក្រោយពីបានហក់ឡើងចំណាត់ថ្នាក់កំពូលទាំង១០ជាលើកដំបូង ដោយបានជាប់លេខ៩ នៅឆ្នាំ២០២១ នាំមុខក្រុមហ៊ុន Subaru និងនៅពីក្រោយ Volkswagen៕
