ក្រុមហ៊ុន Honda Thailand បានធ្វើការចេញលក់នូវរថយន្ត HR-V e:HEV ឆ្នាំ២០២២ ជាផ្លូវការ ជាមួយជម្រើសម៉ូឌែល ៣ប្រភេទ E, EL និង RS។
រថយន្ត SUV ខ្នាតតូចនេះត្រូវបានទទួលការឌីស្សាញថ្មីប្លែកជាងមុន ជាមួយរូបរាងនៃផ្នែកខាងក្រៅ និងខាងក្នុង មើលទៅកាន់តែទាន់សម័យ និងទំនើប។ តួរយ៉ាងវាបានបំពាក់ជាមួយចង្កៀងមុខប្រភេទ Full LED, ជម្រើសថាសកង់ទំហំ ១៧-១៨អ៊ីញ, កៅអីអាចបញ្ជាបាន ៨បែប, ដំបូល Panoramic Sunroof, កុងទ័របង្ហាញទំហំ ៧អ៊ីញ, អេក្រង់កម្សាន្ត Touchscreen ទំហំ ៨អ៊ីញ, កន្លែងសាកថ្មឥតខ្សែ, ឧករណ៍បំពងសម្លេងចំនួន ៤ ឬ ៨ចំណុច, ម៉ាស៊ីនត្រជាក់ ភ្ជាប់មកជាមួយមុខងារបន្សុតខ្យល់, អំពូល LED សម្រាប់អានសៀវភៅ និងរន្ធ USB ៤ចំណុច។
រថយន្ត HR-V ២០២២ នឹងចេញលក់នៅលើទីផ្សារប្រទេសថៃ ជាមួយជម្រើសម៉ាស៊ីនតែមួយប្រភេទប៉ុណ្ណោះគឺ ម៉ាស៊ីនសាំងចំណុះ ១.៥លីត្រ DOHC i-VTEC ដំណើរការជាមួយប្រព័ន្ធ Hybrid ដែលអាចផលិតកម្លាំងសរុបបាន ១៣១សេះ និងកម្លាំងរមួល ២៥១ញ៉ូតុនម៉ែត្រ។ បន្ថែមពីនេះប្រព័ន្ធ e:HEV នៅលើរថយន្ត HR-V ផ្តល់នូវជម្រើសការបើកបរធំៗ ៣រួមមាន EV, Hybrid Drive Mode និង Engine Drive Mode។
សម្រាប់ម៉ូឌែលប្រភេទ E មានតម្លៃចាប់ពី ២៩ ៧៩១ដុល្លារ, EL មានតម្លៃចាប់ពី ៣៣ ១០២ដុល្លារ និង RS មានតម្លៃចាប់ពី ៣៦ ១១១ដុល្លារ៕
