Hyundai នឹងជះលុយ ៣៥ពាន់លានដុល្លារ លើបច្ចេកវិទ្យាបើកបរស្វ័យប្រវត្តិថ្មី

ក្រុមហ៊ុន Hyundai នឹងវិនិយោគទឹកប្រាក់ចំនួន ៣៥ពាន់លានដុល្លារលើយានយន្ត និងបច្ចេកវិទ្យាយានយន្តផ្សេងៗទៀតនៅត្រឹមឆ្នាំ២០២៥។

នៅក្នុងសេចក្តីប្រកាសមួយ ក្រុមហ៊ុននេះបានបង្ហាញថា ការវិនិយោគដ៏ធំរបស់ខ្លួននឹងរួមបញ្ចូលទាំងយានយន្តស្វ័យប្រវត្តិ និង រថយន្តអគ្គិសនី ក៏ដូចជាបច្ចេកវិទ្យាដែលពាក់ព័ន្ធសម្រាប់សេវាកម្មចែករំលែកការជិះ (Ride-sharing Services) ផងដែរ។

ពាណិជ្ជកម្ម

ជាមួយគ្នានេះ រដ្ឋាភិបាលកូរ៉េខាងត្បូងបានគាំទ្រយ៉ាងពេញទំហឹង ចំពោះគម្រោងរបស់ក្រុមហ៊ុន Hyundai ដោយលោកប្រធានាធិបតី Moon Jae-in បានប្រកាសយ៉ាងមុតមាំថា រថយន្តបើកបរដោយស្វ័យប្រវត្តិ អាចនឹងលក់បានចំនួនពាក់កណ្តាល នៃរថយន្តថ្មីទាំងអស់នៅក្នុងប្រទេស នៅឆ្នាំ២០៣០។

មន្ត្រីក្រសួងឧស្សាហកម្មរបស់ប្រទេសកូរ៉េខាងត្បូងម្នាក់ បានប្រាប់ថា រដ្ឋាភិបាលនឹងចំណាយលុយ ១,៤ពាន់លានដុល្លារ លើបច្ចេកវិទ្យាបើកបរដោយស្វ័យប្រវត្តិ រវាងឆ្នាំ២០២១ និង ២០២៧ ហើយរំពឹងថា ក្រុមហ៊ុន Hyundai នឹងដាក់ឲ្យប្រើប្រាស់ យានយន្តបើកបរស្វ័យប្រវត្តិ កម្រិត៤ (Level 4 Autonomous Vehicles) សម្រាប់អតិថិជននៅឆ្នាំ២០២៤ និងសម្រាប់សាធារណជនទូទៅនៅឆ្នាំ២០២៧៕

Sponsored