Toyota អាចជាការគំរាមកំហែងធំរបស់ Tesla

January 17, 2020

ក្រោយពីយ៉ាប់យ៉ឺនអស់ត្រូវរយៈពេលប៉ុន្មានឆ្នាំចុងក្រោយនេះរួចមក Tesla ចាប់ផ្ដើមឃើញសញ្ញាវិជ្ជមានវិញ។ រថយន្ត Tesla Model 3 របស់ក្រុមហ៊ុនកំពុងផលិតតាមតម្រូវ, រោងចក្រថ្មីនៅសៀងហៃបានបើកដំណើរការ ហើយនឹងមានរោងចក្រទីពីរឆាប់ៗនៅប្រទេសអាល្លឺម៉ង់។ បន្ថែមពីនេះ បច្ចុប្បន្ន Tesla គឺមានតម្លៃទីផ្សារច្រើនជាង GM និង Ford រួមបញ្ចូលគ្នាទៅទៀត។

ជាក់ស្ដែងទៅអ្នកវិភាគសហគ្រាសរថយន្ត និងសេដ្ឋកិច្ចជឿជាក់ថា Tesla អាចជាការគំរាមកំហែងដល់ក្រុមហ៊ុនផលិតរថយន្តនាពេលបច្ចុប្បន្ន។ ទោះយ៉ាងណាគេនៅរង់ចាំមើលសិន ប៉ុន្តែមានក្រុមហ៊ុនរថយន្តមួយក៏កំពុងតែឡើងកូដលើការលក់រថយន្តប្រើប្រាស់ថាមពលអគ្គិសនីផងដែរ នោះគឺ Toyota។

តួលេខដែលទស្សនាវដ្ដី Forbes ប្រមូលបាន បង្ហាញថាចំនួនលក់រថយន្តប្រភេទ Hybrid របស់ Toyota បានកើនឡើង ២៨,៧% នៅសហរដ្ឋអាមេរិក ខណៈដែលចំនួនលក់ Lexus Hybrid គឺកើនឡើងជិត ៤៣,១%។ Toyota លក់រថយន្ត Hybrid បានសរុប ២៧៤ ៥៥០ គ្រឿងក្នុងឆ្នាំ ២០១៩ លើទីផ្សារអាមេរិក។ ធៀបនឹង Tesla ឯណោះលក់រថយន្តបានប្រហែល ២០ ម៉ឺនគ្រឿងកាលឆ្នាំមុន។

គួរដឹងថា Toyota មានលក់ប្រភេទមិនមែនជា Hybrid សម្រាប់រថយន្តល្បីៗរបស់ខ្លួន ដូចជា RAV4 ជាដើម។ យ៉ាងណាក្ដីអតិថិជនពេញចិត្តនឹង Toyota RAV4 Hybrid ជាង។ មានរថយន្ត RAV4 Hybrid ចំនួន ៩២ ៥០០ គ្រឿង លក់ចេញកាលពីឆ្នាំ ២០១៩ ដែលកើនឡើង ៩២,៣% ធៀបនឹងឆ្នាំមុន។

ជាមួយសមិទ្ធផលនេះគេជឿជាក់ថា Toyota អាចជាការគំរាមកំហែងខ្លាំងក្លាមួយរបស់ Tesla លើផ្នែករថយន្តដែលមានប្រើប្រាស់ថាមពលអគ្គិសនី។ ប្រសិនបើ Toyota បញ្ចេញលក់រថយន្តប្រើថាមពលអគ្គិសនីសុទ្ធទៀតនោះ Tesla អាចនឹងរងការប្រកួតប្រជែងរឹតតែខ្លាំង៕

ផ្ទាំងផ្សាយពាណិជ្ជកម្ម

Honda Clarity ប្រើម៉ាស៊ីន Plug-in Hybrid ឆ្នាំ២០២០ សន្សំសំចៃហួសការស្មាន

January 17, 2020

ក្រុមហ៊ុន Honda បានប្រកាសពីតម្លៃនៃរថយន្ត Clarity ប្រើម៉ាស៊ីន Plug-In Hybrid ស៊េរីឆ្នាំ២០២០ ដែលនឹងចាប់ផ្តើមដាក់លក់ នៅលើទីផ្សរសហរដ្ឋអាមេរិក ពីពេលនេះតទៅ។

រថយន្ត Honda Clarity Plug-In Hybrid ថ្មី មានតម្លៃចាប់ពី ៣៤ ៣៥៥ដុល្លារ ពោលគឺតម្លៃមិនផ្លាស់ប្តូរ ដូចពេលកាលចេញឆ្នាំ២០១៩ ដែរ។ ទោះជាយ៉ាងណា វាបានបន្ថែមមុខងារពិសេសមួយហៅថា Acoustic Vehicle Alert System (AVAS) ដែលអនុញ្ញាតឲ្យរថយន្តព្រមានដល់អ្នកដំណើរថ្មើរជើងខាងក្រៅ ពីវត្តមានរបស់វា នៅពេលបើកក្នុងល្បឿនយឺត ដោយប្រើថាមពលអគ្គិសនី។

Clarity Plug-In Hybrid នេះ ប្រើម៉ាស៊ីនចំណុះ ១,៥លីត្រ ទំហំ ៤ស៊ីឡាំង, ម៉ូទ័រអគ្គិសនីមួយ និងកញ្ចប់អាគុយកម្លាំង ១៧គីឡូវ៉ាត់ម៉ោង មានកម្លាំងសរុប ២១២សេះ។ វាអាចបើកបរដោយថាមពលអគ្គិសនីសុទ្ធចម្ងាយ ៧៥គីឡូម៉ែត្រ ល្អសម្រាប់ការប្រើប្រាស់ក្នុងទីក្រុងប្រចាំថ្ងៃ ហើយអាចសាកភ្លើងពេញវិញ ប្រើពេលត្រឹម ២,៥ម៉ោងប៉ុណ្ណោះ។

លើសពីនេះទៅទៀត បើដំណើរការដោយម៉ាស៊ីនសាំងសុទ្ធវិញ វាមានកម្រិតស៊ីសាំងត្រឹម ៥,៦លីត្រប៉ុណ្ណោះ សម្រាប់ការបើកបរចម្ងាយ ១០០គីឡូម៉ែត្រ។ រឹតតែពិសេស Clarity Plug-In Hybrid មានបំពាក់មុខងារពិសេសៗជាច្រើន ដូចជា អេក្រង់ទំហំ ៨អ៊ីង មានមុខងារ Android Auto និង Apple CarPlay, កៅអីមុខមានមុខងារកម្តៅ, ផ្លិតទឹកអូតូ និងប្រព័ន្ធសុវត្ថិភាព Honda Sensing ផងដែរ៕

ផ្ទាំងផ្សាយពាណិជ្ជកម្ម

Audi បង្ហាញតម្លៃឡាន A8 ប្រភេទ Plug-in Hybrid ជិះ១០០គ.ម៉ ស៊ីសាំងត្រឹម២,៥លីត្រ

January 17, 2020

ក្រុមហ៊ុន Audi បានប្រកាសតម្លៃនៃរថយន្ត A8 TFSI e ស៊េរីឆ្នាំ២០២០ ដែលបំពាក់ម៉ាស៊ីន Plug-in Hybrid ជាផ្លូវការ សម្រាប់ទីផ្សារសហរដ្ឋអាមេរិក។

រថយន្ត Audi A8 TFSI e ថ្មីនេះ នឹងមានតម្លៃ ៩៤ ០០០ដុល្លារ ពេលចេញលក់លើទីផ្សារសហរដ្ឋអាមេរិក នាពេលឆាប់ៗខាងមុខននេះ។ តម្លៃនេះបានធ្វើឲ្យរថយន្តប្រើម៉ាស៊ីន Plug-in Hybrid ខាងលើ ថ្លៃជាងរថយន្ត A8 55 TFSI ដែលប្រើម៉ាស៊ីនសាំងធម្មតា រហូតដល់ទៅ ៨ ៨០០ដុល្លារ (៨៥ ២០០ដុល្លារ)។

A8 TFSI e បំពាក់ម៉ាស៊ីន Turbocharged ចំណុះ ៣,០លីត្រ ទំហំ ៦ស៊ីឡាំង, កញ្ចប់អាគុយ ១៤,‌១គីឡូវ៉ាត់ម៉ោងមួយ និងម៉ូទ័រអគ្គិសនីមួយ ហើយដំណើរការដោយប្រអប់លេខអូតូ ៨វគ្គ មានកម្លាំងសរុប ៤៤៣សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៤,៩វិនាទី។

ដោយសារតែជាប្រភេទម៉ាស៊ីន Plug-in Hybrid វាអាចបើកបរដោយប្រើថាមពលអគ្គិសនីសុទ្ធចម្ងាយប្រហែល ៣០គីឡូម៉ែត្រ។

ថ្វីបើ Audi មិនទាន់បង្ហាញលក្ខណៈពិសេសលម្អិតបន្ថែម ប៉ុន្តែ A8 TFSI e មានបំពាក់ប្រព័ន្ធចង្កៀងមុខដ៏ពិសេសប្លែកខុសពីគេ ហើយបំពាក់យ៉ាន់ Alloy ទំហំ ១៩អ៊ីងមកស្តង់ដារតែម្តង៕

ផ្ទាំងផ្សាយពាណិជ្ជកម្ម

Toyota Land Cruiser មុខមាត់ថ្មី អាចនឹងលេចមុខប៉ុន្មានខែទៀត

January 16, 2020

ផ្អែកតាមការចុះផ្សាយរបស់វិបសាយរថយន្តជប៉ុន Best Car Web បានឲ្យដឹងថារថយន្ត Toyota Land Cruiser ជំនាន់ថ្មី នឹងបង្ហាញមុខក្នុងពេលតែប៉ុន្មានខែទៀត ដែលមានការផ្លាស់ប្ដូរច្រើន។

Land Cruiser ជំនាន់ថ្មីនឹងមានជាប្រភេទម៉ាស៊ីន Hybrid ជាលើកដំបូង ដែលមានម៉ាស៊ីនសាំង ៣,៥ លីត្រ ៦ ស៊ីឡាំង អមនឹងម៉ូទ័រអគ្គិសនី។ ដែលវានឹងជំនួសនូវប្រភេទម៉ាស៊ីន ៤,៦ លីត្រ ៨ ស៊ីឡាំង នាពេលបច្ចុប្បន្ននេះ។

កំពូល SUV ជំនាន់ថ្មីនេះដែរ មិនរំពឹងថាផ្លាស់ប្ដូរមុខមាត់ខ្លាំងក្លានោះទេ ដោយរំពឹងថានឹងមានប្រើប្រាស់រន្ធខ្យល់ថ្មីដែលបានប្រើប្រាស់លើរថយន្ត Toyota ម៉ូដែលថ្មីជាច្រើនរួចមកហើយ ដូចជានៅលើ Toyota Corolla ជំនាន់ថ្មី ដែលវានឹងធ្វើឲ្យរថយន្ត Land Cruiser មានរូបរាងទាន់សម័យជាងមុន។

Best Car Web អះអាងថា Toyota នឹងប្រកាសចេញ Land Cruiser ថ្មីនៅក្នុងខែសីហាឆ្នាំ ២០២០ នេះ ហើយមុនការប្រកាសអាចនឹងមានលេចធ្លាយរូបរាងរថយន្តរត់សាកល្បងនៅលើអនឡាញជាមិនខានទេ៕

ផ្ទាំងផ្សាយពាណិជ្ជកម្ម

ការសាកល្បងស្ដែងៗ ពិនិត្យមើលថាក្រុមហ៊ុនរថយន្តណាស្មោះត្រង់ជាងគេនឹងរថយន្តអគ្គិសនីខ្លួន

January 16, 2020

ក្រុមការងារ Carwow បានប្រមូលរថយន្តអគ្គិសនីជំនាន់ចុងក្រោយចំនួន ៦ ម៉ូដែល ដែលមានលក់លើទីផ្សារបច្ចុប្បន្ន ដោយយកមកបើកបររហូតដល់រថយន្តទាំងនោះរលត់ភ្លើង។

ក្រោយគេសាកល្បងគេដឹងថារថយន្តណាបើកបរបានឆ្ងាយជាងគេពេលសាកមួយពេញ និងរថយន្តណាដែលបើកបរបានចម្ងាយដូចដែលក្រុមហ៊ុនអះអាងខ្លះ។ តាមការធ្វើតេស្តទទួលបានលទ្ធផលដូចខាងក្រោម ៖

១. Tesla Model 3 ជិះបាន ៤៣៤ គ.ម (ស្មើនឹង ៧៨% នៃរយៈចម្ងាយដែលអះអាង)

២. Kia e-Niro ជិះបាន ៤១០ គ.ម (ស្មើនឹង ៩០% នៃរយៈចម្ងាយដែលអះអាង)

៣. Jaguar I-Pace ជិះបាន ៣៥៩ គ.ម (ស្មើនឹង ៧៦% នៃរយៈចម្ងាយដែលអះអាង)

៤. Nissan Leaf ជិះបាន ៣៣៤ គ.ម (ស្មើនឹង ៨៧% នៃរយៈចម្ងាយដែលអះអាង)

៥. Audi E-Tron ជិះបាន ៣៣១ គ.ម (ស្មើនឹង ៨១% នៃរយៈចម្ងាយដែលអះអាង)

៦. Mercedes EQC ជិះបាន ៣១២ គ.ម (ស្មើនឹង ៧៥% នៃរយៈចម្ងាយដែលអះអាង)

ផ្ទាំងផ្សាយពាណិជ្ជកម្ម

Toyota ជះលុយដុំ ៣៩៤លានដុល្លារ ផលិតឡានហោះ

January 16, 2020

កាលពីឆ្នាំ២០១៧ ក្រុមហ៊ុន Toyota បានបោះទុនជិត ៤០ម៉ឺនដុល្លារ លើក្រុមហ៊ុនផលិតរថយន្តហោះ Cartivator។ ឥឡូវនេះ ក្រុមហ៊ុនរថយន្តជប៉ុនខាងលើ បានជះលុយរហូតដល់ទៅ ៣៩៤លានដុល្លារលើក្រុមហ៊ុន Joby Aviation ដើម្បីផលិតរថយន្តហោះអគ្គិសនី។

ក្រៅពីបោះទុនលុយច្រើនសម្បើម Toyota ក៏នឹងជួយដល់ក្រុមហ៊ុន Joby Aviation ដោយចែករំលែកចំណេះដឹងក្នុងការផលិត, គុណភាព និងការគ្រប់គ្រងការចំណាយផងដែរ ដើម្បីជួយក្រុមហ៊ុនខាងលើឲ្យអភិវឌ្ឍ និងផលិតរថយន្តហោះអគ្គិសនី ឈ្មោះថា eVTOL។

ថ្វីបើមិនទាន់មានព័ត៌លម្អិតពី eVTOL ប៉ុន្តែគេហទំព័រក្រុមហ៊ុន Joby Aviation បានឲ្យដឹងថា វានឹងអាចផ្ទុកអ្នកដំណើរចំនួន ៤នាក់ ហើយអាចបើកដល់ល្បឿន ៣២០គីឡូម៉ែត្រក្នុងមួយម៉ោង។ មិនតែប៉ុណ្ណោះ វាអាចបើកបានចម្ងាយ ២៤០គីឡូម៉ែត្រ នៅពេលសាកភ្លើងពេញម្តង៕

ផ្ទាំងផ្សាយពាណិជ្ជកម្ម

ឆ្នាំ២០១៩ Lamborghini លក់ឡាន Urus បានលុយ១ពាន់លានដុល្លារ

January 16, 2020

Urus កំពុងក្លាយជារថយន្តលក់ដាច់បំផុតមួយរបស់ Lamborghini ដោយក្រុមហ៊ុនមួយនេះបានលក់រថយន្តដាច់រហូតដល់ទៅ ៨ ២០៥គ្រឿងក្នុងឆ្នាំ២០១៩។

ចំនួនលក់នេះកើនឡើង ៤៣% បើប្រៀបធៀបនឹងឆ្នាំ២០១៨ ហើយក្នុងនោះ Lamborghini លក់ Urus បានចំនួនរហូតដល់ទៅ ៤ ៩៦២គ្រឿងឯណោះ ស្មើនឹង ៦១% នៃចំនួនលក់សរុប។

គួរឲ្យដឹងថា Lamborghini បានចេញលក់ Urus កាលពីខែកុម្ភៈ ឆ្នាំ២០១៨ ហើយលក់បានតែ ១ ៧៦១គ្រឿងប៉ុណ្ណោះ គិតត្រឹមដាច់ខែធ្នូ ឆ្នាំ២០១៨។

រថយន្ត Lamborghini Urus បំពាក់ម៉ាស៊ីនចំណុះ ៤,០លីត្រ Turbo ទំហំ ៨ស៊ីឡាំង មានកម្លាំង ៦៤១សេះ ហើយមានតម្លៃចាប់ពី ២០០ ០០០ដុល្លារលើទីផ្សារបរទេស៕

ផ្ទាំងផ្សាយពាណិជ្ជកម្ម

រថយន្ត SUV ប្រណីតរបស់កូរ៉េ បង្ហាញមុខជាផ្លូវការ

January 15, 2020

រថយន្ត Genesis GV80 ឆ្នាំ ២០២០ ដែលជារថយន្ត SUV ដំបូងរបស់ក្រុមហ៊ុនផលិតរថយន្តប្រណីតកូរ៉េខាងត្បូងនេះ បានបង្ហាញមុខជាផ្លូវការ ក្រោយពីលេចធ្លាយរូបរាងអស់ជាច្រើនសប្ដាហ៍រួចមក។

Genesis បានឲ្យពិភពលោកបានឃើញពី GV80 ដំបូងកាលពីឆ្នាំ ២០១៧ ដែលកាលនោះគឺជា Concept។ ចំពោះប្រភេទដែលផលិតលក់នេះនៅតែបន្តប្រើប្រាស់រូបរាងដូចប្រភេទ Concept មិនមានការផ្លាស់ប្ដូរអ្វីច្រើនឡើយ។

ផ្នែកខាងក្នុងក៏មានការរក្សាទុកនូវចំណុចពិសេសដែលមានលើប្រភេទ Concept ផងដែរ ហើយគេបានបំពាក់នូវចង្កូតស្រោបដោយស្បែកពីរពណ៌ និងតាប្លូបង្ហាញប្រភេទឌីជីថល, មានអេក្រង់កម្សាន្តទំហំ ១៤,៥ អ៊ីញដែលអេក្រង់នេះអាចបញ្ជាមុខងារជាច្រើន។ តាមរយៈប្រព័ន្ធ Road-Noise Active Noise Control ធ្វើឲ្យរថយន្តអាចទប់សំឡេងរំខានពីខាងក្រៅបានយ៉ាងល្អ។

ពោងសុវត្ថិភាពមានចំនួន ១០, មានមុខងារ Smart Cruise Control, មុខងារបញ្ចៀសគ្រោះថ្នាក់ពីខាងមុខ, មុខងារបញ្ចៀសគ្រោះថ្នាក់ពីខាងក្រោយ, មុខងាររំឭកអ្នកបើកបរ និងមានមុខងារសុវត្ថិភាពជាច្រើនទៀត។

នៅកូរ៉េ រថយន្ត GV80 នឹងមានលក់ជាមួយប្រភេទម៉ាស៊ីនម៉ាស៊ូត ៣,០ លីត្រ Turbo ដែលមានកម្លាំង ២៧៤ សេះ ហើយក៏មានម៉ាស៊ីនសាំង ២ ប្រភេទឲ្យជ្រើសរើសដែលមានកម្លាំង ៣០០ សេះ និង ៣៧៥ សេះ។

រថយន្ត GV80 នឹងដាក់លក់នៅកូរ៉េខាងត្បូងនាខែមករានេះ ហើយសម្រាប់ទីផ្សារអាមេរិកក៏នឹងមានលក់នាឆ្នាំ ២០២០ នេះដែរ៕

ផ្ទាំងផ្សាយពាណិជ្ជកម្ម

មើលរថយន្តដែលគេនិយមជិះបំផុតនៅវៀតណាម កាលឆ្នាំ ២០១៩

January 15, 2020

រថយន្តដែលលក់ដាច់បានច្រើនជាងគេទាំង ១០ ប្រចាំឆ្នាំ ២០១៩ ក្នុងប្រទេសវៀតណាម ឃើញរថយន្តខ្លះដែលមានលេចមុខកាលពីឆ្នាំមុន នៅតែបន្តមានមុខនៅឆ្នាំនេះ។ បន្ថែមពីនេះក៏មានរថយន្តថ្មីហក់ចូលតំណែងកំពូលទាំង ១០ គឺ Mitsubishi Xpander ដែលធ្វើឲ្យកក្រើកនៅវៀតណាម។

១. Toyota Vios លក់បាន ២៧ ១៨០ គ្រឿង

២. Mitsubishi Xpander លក់បាន ២០ ០៩៨ គ្រឿង

៣. Hyundai Accent លក់បាន ១៩ ៧១៨ គ្រឿង

៤. Hyundai Grand i10 លក់បាន ១៨ ០៨៨ គ្រឿង

៥. Mazda 3 លក់បាន ១៣ ៧៦១ គ្រឿង

៦. Honda CR-V លក់បាន ១៣ ៣៣៧ គ្រឿង

៧. Ford Ranger លក់បាន ១៣ ៣១៩ គ្រឿង

៨. Toyota Fortuner លក់បាន ១២ ៦៦៧ គ្រឿង

៩. Toyota Innova លក់បាន ១២ ១៦៤ គ្រឿង

១០. Kia Cerato លក់បាន ១១ ៣១៣ គ្រឿង

ផ្ទាំងផ្សាយពាណិជ្ជកម្ម

Toyota ចេញ RAV4 ប្រភេទសាកភ្លើងថ្មី សម្រាប់ទីផ្សារអឺរ៉ុប!

January 15, 2020

ក្រុមហ៊ុន Toyota បានបញ្ចេញរថយន្ត RAV4 ប្រើម៉ាស៊ីនប្រភេទ Plug-in Hybrid ស៊េរីថ្មីរបស់ខ្លួន នៅលើទីផ្សារអឺរ៉ុបជាផ្លូវការ ដោយហៅឈ្មោះថា RAV4 Prime។

រថយន្ត RAV4 Prime បំពាក់ម៉ាស៊ីនចំណុះ ២,៥លីត្រ ម៉ូទ័រអគ្គិសនីមួយ និង អាគុយ Hybrid មួយ មានកម្លាំងសរុប ៣០២សេះ ប្រើប៉ុងពីរ AWD-i (intelligent electric all-wheel drive system) អាចជាន់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៦,២វិនាទី។

ដោយសារតែជារថយន្តប្រភេទ Plug-in Hybrid ដូច្នេះវាអាចបើកដោយប្រើថាមពលអគ្គិសនីសុទ្ធចម្ងាយ ៦៥គីឡូម៉ែត្រ ដល់ល្បឿនអតិបរមា ១៣៥គីឡូម៉ែត្រក្នុងមួយម៉ោងឯណោះ។

RAV4 Prime មានភាពខុសប្លែកពី RAV4 ធម្មតា ត្រង់តួខ្លួន២ពណ៌, កាងបែបស្ព័រជាង, ឡូហ្គូពណ៌ខៀវ ក៏ដូចជាយ៉ាន់ថ្មីទំហំ ១៨អ៊ីង និង ១៩អ៊ីងផដែរ។ ចំណែកឯផ្នែកខាងក្នុង វាផ្តល់នូវអារម្មណ៍បែបស្ព័រ ជាមួយអេក្រង់ Touchscreen ទំហំ ៩អ៊ីង មានមុខងារ Apple CarPlay និង Android Auto, កៅអីមុខក្រោយមានមុខងារកម្តៅ, ឃ្លុបក្រោយចុច, ដំបូលកញ្ចក់លាតធំ និង កុងទ័របាញ់លើកញ្ចក់ ជាដើម។