Ferrari បញ្ចេញវីដេអូខ្លីនៃរថយន្ត Ferrari Purosangue V12 មុនពេលបង្ហាញខ្លួនជាផ្លូវការនៅសប្តាហ៍ក្រោយ

September 8, 2022

[បរទេស] ក្រុមហ៊ុនផលិតរថយន្ត Ferrari បានធ្វើការដាក់បង្ហាញចេញនៅវីដេអូ teaser របស់រថយន្ត Ferrari Purosangue ប្រភេទ Crossover មុនពេលបង្ហាញខ្លួនជាផ្លូវការនៅថ្ងៃទី ១៣ ខែកញ្ញា ឆ្នាំ ២០២២ ខាងមុខនេះ។

យោងតាមវីដេអូ teaser ដែលបង្ហាញពីផ្នែកខាងមុខនៃរថយន្ត Ferrari Purosangue និងសំឡេងកម្លាំងនៃម៉ាស៊ីនដែលប៉ុណ្ណោះ។ ខណៈ មិនសូវមានអ្វីច្រើនបង្ហាញក្នុងវីដេអូនេះ ប៉ុន្តែមុននោះរូបភាពរថយន្តសាកល្បងបានលេចចេញតាំងពីខែកុម្ភៈ និងនៅខែមីនាឆ្នាំ ២០២២ ក្រុមហ៊ុន Ferrari បានបន្តបញ្ចេញរូបភាព teaser នៃរថយន្ត ដែលបង្ហាញការរចនាគួរឲ្យចាប់អារម្មណ៍ជាមួយនឹងតួខ្លួន។

You heard it here first.
More will be revealed on the 13th of September.#FerrariPurosangue #Ferrari pic.twitter.com/xQOTpdJBiM

— Ferrari (@Ferrari) September 6, 2022

រថយន្តនេះមានការរចនាផ្នែកខាងមុកគួរឲ្យទាក់ទាញជាមួយនឹងប៉ាណាមួយផ្ទាំងធំ អបដោយចង្កៀងមានការរចនារាងស្លីម។ ខណៈនៅផ្នែកខាងក្រោយរបស់រថយន្តគឺដូចជាការបញ្ចូលគ្នារវាងម៉ូដែល Ferrari Roma និង Ferrari FF ដោយមានបំពង់ស៊ីមាំងចំនួន ៤ ជាដើម។

Ferrari មិនបានបង្ហាញអ្វីច្រើនអំពីម៉ូដែល CUV ថ្មីនោះទេ ប៉ុន្តែក្រុមហ៊ុនផលិតរថយន្តអ៊ីតាលីបានបញ្ជាក់ថា រថយន្ត Ferrari Purosangue នឹងត្រូវបានបំពាក់ដោយម៉ាស៊ីន V12 ។ បន្ថែមពីនេះ អ្នកតំណាង Ferrari បាននិយាយថា ម៉ាស៊ីន V12 តែងតែជាផ្នែកនៃ DNA របស់ Ferrari ។

គួរបញ្ជាក់ផងដែរ សម្រាប់ម៉ាស៊ីន V12 ដែលមានបំពាក់នៅលើរថយន្ត 812 GTS ចំណុះ ៦,៥ លីត្រ អាចផលិតកម្លាំងបាន ៧៨៩ សេះ និងកម្លាំងរមួល ៧១៨ ញ៉ូតុនម៉ែត្រ បង្កើនល្បឿនពី ០-១០០ គីឡូម៉ែត្រ/ម៉ោង ក្នុងរយៈពេលតិចជាង ៣ វិនាទី ប៉ុន្តែយើងនឹងរកឃើញថាតើ Purosangue លឿនប៉ុណ្ណានៅសប្តាហ៍ក្រោយ៕

ផ្ទាំងផ្សាយពាណិជ្ជកម្ម

ឡានអគ្គិសនី MG 4 ស៊េរីឆ្នាំ ២០២៣ គ្រោងបង្ហាញខ្លួននៅក្នុងទីផ្សារប្រទេសអូស្តា្រលីឆ្នាំក្រោយ

September 8, 2022

[បរទេស] ក្រុមហ៊ុនផលិតរថយន្ត MG Motor ប្រចាំនៅប្រទេសអូស្រ្តាលីបានធ្វើការបញ្ជាក់ថារថយន្តអគ្គិសនី MG 4 ស៊េរីឆ្នាំ ២០២៣ គ្រោងនឹងបង្ហាញខ្លួននៅក្នុងឆមាសទីមួយនៃឆ្នាំក្រោយជាមួយតម្លៃរំពឹងទុក ៥០ ០០០ ដុល្លារនៅក្នុងទីផ្សាររបស់ខ្លួន ។

ជាមួយគ្នានេះ លោក Giles Belcher នាយកផ្នែកលក់ និងទីផ្សាររបស់ MG Motor Australia បាននិយាយថា “យើងអាចបញ្ជាក់បានថា រថយន្តអគ្គិសនី MG 4 គ្រោងនឹងដាក់លក់នៅពាក់កណ្តាលឆ្នាំក្រោយ ។

ក្នុងនោះ ក្រុមហ៊ុន MG ធ្លាប់បាននិយាយថា ខ្លួនកំពុងពិនិត្យមើលម៉ូដែលសម្រាប់ការចេញលក់នៅឆមាសទីមួយនៃឆ្នាំ ២០២៣ ប៉ុន្តែវាមិនទាន់បានបញ្ជាក់ជាផ្លូវការនៅក្នុងពេលវេលានៃការដាក់បង្ហាញនោះទេ រង់ចាំការពន្យារពេលបន្ថែមទៀត។

រថយន្តអគ្គិសនីនេះត្រូវបានគេប្រទះឃើញក្នុងប្រទេសអូស្ត្រាលីរួចហើយជាមួយការបិទបាំងតួខ្លួន។ ខណៈ ម៉ូដែលនេះត្រូវបានអនុម័តសម្រាប់លក់ក្នុងប្រទេសអូស្ត្រាលីនាពេលថ្មីៗនេះ បន្ទាប់ពីមានការបញ្ជាក់អំពី Australian Design Rules កាលពីសប្តាហ៍មុន។

គួរឲ្យដឹងថា រថយន្តអគ្គិសនិ MG 4 ដែលមានលក់នៅចក្រភពអង់គ្លេសមានបំពាក់ជាមួយម៉ូទ័រអគ្គិសនី ផ្គួបដោយអាគុយទំហំ ៥០,៨ គីឡូវ៉ាត់ម៉ោង និង ៦១,៧ គីឡូវ៉ាត់ម៉ោង អាចបើកបរបានចម្ងាយពី ៣៥០ គីឡូម៉ែត្រ និង ៤៥២ គីឡូម៉ែត្រ៕

ផ្ទាំងផ្សាយពាណិជ្ជកម្ម

ប្លែក! យកឡាន Lexus GX 460 កែទៅជារថយន្ត Toyota Land Cruiser Prado ដើម្បីងាយស្រួលក្នុងការលក់បន្ត

September 7, 2022

[បរទេស] រថយន្ត Land Cruiser Prado ត្រូវបានឈប់ផលិតនៅសហរដ្ឋអាមេរិកតាំងពីឆ្នាំ ២០១៤ មកម្ល៉េះ ដូច្នេះការផ្គត់ផ្គង់រថយន្តនេះកាន់តែខ្វះខាត។ ជាហេតុធ្វើឲ្យ ម្ចាស់រថយន្ត Lexus GX 450 សម្រេចចិត្តកែរូបរាងរថយន្ត SUV ស៊េរីឆ្នាំ ២០១០ ដែលប្រើបានចម្ងាយ ៣០៥ ០០០ គីឡូម៉ែត្រ ទៅជារថយន្ត Land Cruiser Prado ស៊េរីឆ្នាំ ២០១៨ ដោយបានបង្ហោះនៅលើគេហទំព័រដេញថ្លៃអនឡាញលក់ក្នុងតម្លៃ ១៨ ២៥០ ដុល្លារ។

ការផ្លាស់ប្តូរផ្នែកខាងក្រៅរួមមាន កាងខាងមុខ ចង្កៀងមុខ ប៉ាណា គម្របម៉ាស៊ីន ឈ្នាន់ជើងចំហៀង និងចង្កៀងក្រោយថ្មី។ ឡូហ្គោ Toyota ដាក់ជំនួស Lexus នៅលើដៃចង្កូត និងសូម្បីតែនៅលើគម្របម៉ាស៊ីន ឬពាក្យ “Land Cruiser Prado” នៅលើទ្វារខាងក្រោយ។ ខណៈការផ្លាស់ប្តូរនៅក្នុងកាប៊ីនមានដូចជា ដៃចង្កូត កុងសូលកណ្តាល និងកន្លែងដាក់ដបទឹកជាដើម ។

រថយន្តនេះ នៅតែប្រើប្រាស់ជាមួយម៉ាស៊ីនចំណុះ ៤,៦ លីត្រ V8 អាចផលិតកម្លាំងបាន ៣០១ សេះ និងកម្លាំងរមួល ៤៤៦ ញ៉ូតុនម៉ែត្រ ភ្ជាប់ដោយប្រអប់លេខស្វ័យអូតូ ៦ វគ្គ ប្រព័ន្ធបើកបរប៉ុង ២ វិលទាំងបួន។ លើសពីនេះ ក៏បានបំពាក់មកជាមួយប្រព័ន្ធចាក់សោរប៉ុង Torsen’s limited-slip center differential , ប្រព័ន្ធ dynamic suspension និងមានកម្ពស់ខ្ពស់ពីដី ២០០ ម.ម ដែលជួយឲ្យរថយន្តនេះបើកបរលើផ្លូវលំបាក ឬ Off-Road កាន់តែល្អប្រសើរ។

គួរបញ្ជាក់ផងដែរថា នៅសហរដ្ឋអាមេរិក រថយន្ត Lexus GX 460 ស៊េរីឆ្នាំ ២០១០ ចេញថ្មីដំបូងមានតម្លៃ ៥១ ៩៧០ ដុល្លារ។ ទន្ទឹមនឹងនេះ នៅលើទីផ្សាររថយន្តមួយទឹកបច្ចុប្បន្នរថយន្ត Lexus GX 460 ស៊េរីឆ្នាំ ២០១០ អាចមានតម្លៃចន្លោះពី ១២ ០០០ ដុល្លារ ដល់ ១៩ ០០០ ដុល្លារ អាស្រ័យលើលក្ខខណ្ឌ៕

ផ្ទាំងផ្សាយពាណិជ្ជកម្ម

ភីកអាប់អគ្គិសនី Ford F-150 Lightning វ៉ាដាច់គូប្រជែងភឹង

September 7, 2022

[ទីផ្សារបរទេស] ខណៈដែលក្រុមហ៊ុនផលិតរថយន្តដទៃជួបបញ្ហាជាមួយការផលិត និងការលក់ធ្លាក់ចុះនោះ ក្រុមហ៊ុន Ford បែរជាកំពុងអបអរនឹងជោគជ័យនៃការលក់សម្រាប់ខែសីហា ដោយក្នុងនោះរថយន្ត F-150 Lightning ទទួលបានការគាំទ្រខ្លាំង អាចលក់ចេញបានសរុប ២ ៣៧៣គ្រឿង លើទីផ្សារអាមេរិក។

តាមការលើកឡើងរបស់ Ford រថយន្តភីកអាប់អគ្គិសនី F-150 Lightning បានលក់ដាច់លើសរថយន្ត Tesla Model 3, Model Y និងរថយន្ត Ram ផងដែរ។ ការលក់របស់រថយន្តនេះមានការកើនឡើង ៣០៧% ខណៈដែលការលក់របស់ F-150 ដែលប្រើសាំងក៏មានការកើនឡើង ២៥% ផងដែរ។

ក្រៅពីសមទ្ធិផលថ្មីនេះ ការលក់ដ៏ខ្លាំងក្លាក៏បានជួយឲ្យ Ford ឡើងដល់ចំណាត់ថ្នាក់កំពូលនៃតារាងផងដែរ ដោយបានជាប់ជាក្រុមហ៊ុនលក់រថយន្តបានច្រើនជាងគេនៅអាមេរិក រយៈពេលពីរខែជាប់គ្នា។ សរុបរួម Ford អាចលក់រថយន្តបាន ១៥៨ ០៨៨គ្រឿង ក្នុងខែសីហា។

ពិតណាស់ រថយន្តភីកអាប់មានចំណែកយ៉ាងធំក្នុងការលក់សរុប ដោយកាលពីខែសីហា មានរថយន្តភីកអាប់ចំនួន ៨៣ ៣៤៧គ្រឿង បានធ្វើដំណើរចេញពីហាងលក់រថយន្ត Ford។ ធៀបនឹងឆ្នាំមុន តួលេខនេះមានការកើនឡើង ១៣,២% ខណៈដែលរថយន្ត SUV មានកំណើនលក់ ៤៧,៧% ផងដែរ៕

ផ្ទាំងផ្សាយពាណិជ្ជកម្ម

Toyota Land Cruiser GR-SPORT 300 ២០២២ ចេញលក់ក្នុងប្រទេសថៃ ជាមួយតម្លៃជិត ២៥០ ០០០ ដុល្លារ

September 7, 2022

[ទីផ្សារបរទេស] ក្រុមហ៊ុននាំចូលរថយន្ត Sakura Auto បានធ្វើការដាក់បង្ហាញចេញនៅរថយន្ត Toyota Land Cruiser GR-SPORT 300 ស៊េរីឆ្នាំ ២០២២ ជាមួយតំលៃលក់ ២៤៤ ៥៣៨ ដុល្លារនៅក្នុងប្រទេសថៃ។

សម្រាប់ GR SPORT ត្រូវបានផលិតដោយផ្អែកលើគ្រោងឆ្អឹង TNGA-F platform មានប្រវែងតួខ្លួនសរុប ៤ ៩៩០ ម.ម ទទឹង ១ ៩៨០ ម.ម កំពស់ ១ ៨៧៩ ម.ម និងប្រវែងគម្លាតកង់មុខក្រោយ ២ ៨៥០ ម.ម ។ សម្រាប់ការរចនានៅផ្នែកខាងមុខបំពាក់ដោយប៉ាណាមុខមួយផ្ទាំងធំជាមួយឡូហ្គោ Toyota នៅចំកណ្តាល, កញ្ចក់ចំហៀងពណ៌ខ្មៅ មានឡូហ្គោ GR និងថាសកង់ស្ព័រប្រភេទ 6-spoke ទំហំ ១៨ អ៊ីញជាដើម ។

រីឯនៅផ្នែកខាងក្នុងកាប៊ីនមាន កៅអី ៣ជួរ ៧ កៅអី ត្រូវបានបំពាក់ដោយកុងទ័រព័ត៌មានទំហំ ៩ អ៊ីញ និងអេក្រង់កំសាន្ត touchscreen ទំហំ ១២,៣ អ៊ីញ ភ្ជាប់មុខងារ Apple CarPlay និង Android Auto, ឧបករណ៍បំពងសំឡេងម៉ាក JBL, កៅអីពូស្បែកម៉ាក Nappa ពណ៌ខ្មៅ-ក្រហមមានឡូហ្គោអក្សរ GR Sport, ប្រព័ន្ធកាំមេរ៉ា Multi-Terrain Monitor, កន្លែងសាកថ្មឥតខ្សែ និងឈ្នាន់ស្រោបដោយអាលុយមីញ៉ូម។

ចូលទៅកាន់ផ្នែកម៉ាស៊ីនវិញ រថយន្តនេះដំណើរការដោយម៉ាស៊ីនចំណុះ ៣,៣ លីត្រ V6 twin-turbo អាចផលិតកម្លាំងបាន ៣០៩ ញ៉ូតុនម៉ែត្រ និងកម្លាំងរមួល ៧០០ ញ៉ូតុនម៉ែត្រ ភ្ជាប់ដោយប្រអប់លេខអូតូ ១០ វគ្គ ប្រភេទ Direct Shift ប្រព័ន្ធបើកបរប៉ុង ២ វិលកង់ទាំងបួន និងមានរបៀបបើកបរចំនួន ៤ គឺ Sport, Sport S+, Comfort និង Customise ។ មិនតែប៉ុណ្ណោះ រថយន្ត Toyota Land Cruiser GR-Sport 300 ក៏បានបំពាក់ជាមួយប្រព័ន្ធសុវត្ថភាព Toyota Safety Sense ចុងក្រោយបង្អស់ផងដែរ៕

ផ្ទាំងផ្សាយពាណិជ្ជកម្ម

Bentley Flying Spur Speed បង្ហាញវត្តមានជាមួយម៉ាស៊ីន ១២ស៊ីឡាំង

September 7, 2022

[ទីផ្សារបរទេស] រថយន្ត Bentley Flying Spur ជំនាន់ទីបី បានបង្ហាញវត្តមានកាលពីពាក់កណ្ដាលឆ្នាំ២០១៩ សម្រាប់ម៉ូដែលឆ្នាំ២០២០ ហើយចាប់តាំងពីពេលនោះ Bentley បានណែនាំប្រភេទផ្សេងៗគ្នាដូចជា Flying Spur Hybrid និង Flying Spur S ជាដើម ហើយពេលនេះ Flying Spur Speed ក៏បានបង្ហាញវត្តមានជាផ្លូវការផងដែរ។

Flying Spur Speed នឹងជារថយន្តតែមួយប្រភេទគត់ដែលមានបំពាក់ម៉ាស៊ីន១២ស៊ីឡាំង (W12) របស់ Bentley បន្ទាប់ពីក្រុមហ៊ុនបានសម្រេចដកម៉ាស៊ីន១២ស៊ីឡាំង ចេញពី Flying Spur ជាស្តង់ដារកាលពីដើមឆ្នាំកន្លងទៅ។

ម៉ាស៊ីន ១២ស៊ីឡាំង លើ Flying Spur Speed គឺជាប្រភេទ Twin-Turbocharged ចំណុះ៦,០លីត្រ អាចផលិតកម្លាំងបាន ៦២៦សេះ និងមានកម្លាំងរង្វិល ៩០០ញ៉ូវតុនម៉ែត្រ។ ថាមពលរបស់វាត្រូវបានបញ្ជូនតាមរយៈប្រអប់លេខ ZF ចំនួន៨វគ្គ ដែលអាចឲ្យរថយន្តស្ទុះពី ០ ដល់ ៩៦គ.ម/ម៉ ក្នុងពេល ៣,៧វិនាទី និងមានល្បឿនអតិបរមា ៣៣៣គ.ម/ម៉។

Bentley បានកែសម្រួលរូបរាងលើប្រភេទ Speed ជាមួយការបំពាក់យ៉ាន់កង់ទំហំ ២២អ៊ីញដែលមានជម្រើសពណ៌ខ្មៅរលោង, ពណ៌ខ្មៅងងឹត ឬពណ៌ប្រាក់។ Bentley ក៏បានបន្ថែមរចនាបថពណ៌ខ្មៅលើផ្ទាំងប៉ាណាមុខ, លើអំពូលភ្លើង, លើផ្លាករថយន្ត និងលើភ្លើងស្តុបក្រោយផងដែរ។

ជាមួយ Flying Spur Speed នេះ Bentley បានបង្ហាញក្ដីរំពឹងថាវានឹងមានចំណែក ១ភាគ៣ នៃការកុម្ម៉ង់របស់ត្រកូល Flying Spur នៅលើទីផ្សារសហរដ្ឋអាមេរិក និងអឺរ៉ុប ខណៈដែលនៅលើទីផ្សារមជ្ឈឹមបូព៌ា រំពឹងថានឹងមានចំណែក ១ភាគ៥៕

ផ្ទាំងផ្សាយពាណិជ្ជកម្ម

Hongqi បង្ហាញគំរូរថយន្តអគ្គិសនីដ៏ប្រណិតចំនួន ៣ នៅក្នុងពិភព Metaverse

September 7, 2022

[បរទេស] ក្រុមហ៊ុនផលិតរថយន្តរបស់ចិន Hongqi បានធ្វើការដាក់បង្ហាញចេញនៅគំរូរថយន្តអគ្គិសនីដ៏គួរឲ្យចាប់អារម្មណ៍ចំនួន ៣ គឺ Hongqi Sedan EV, Hongqi SUV EV និង Hongqi E-LS ដែលផ្អែកលើស្ថាបត្យកម្ម Super Electric Intelligent Vehicle Platform Architecture រួមជាមួយនឹងការចាប់ផ្តើមនៃ Hongqi Yuan Universe នៅក្នុង metaverse ។

ចាប់ផ្តើមគឺ Hongqi Sedan EV រថយន្តនេះគឺជារថយន្តប្រភេទ B-segment EV ដែលត្រូវបានគេរំពឹងថាអាចបើកបរបានចម្ងាយជាង ១ ០០០ គីឡូម៉ែត្រ។ លើសពីនេះ Hongqi បន្ថែមថា រថយន្តនេះអាចស្ទុះដល់ ១០០ គីឡូម៉ែត្រ/ម៉ោង ត្រឹមតែ ៣ វិនាទីប៉ុណ្ណោះ។

ការរចនាផ្នែកខាងក្រៅរបស់រថយន្ត Sedan គឺមានលក្ខណៈអនាគត ក្នុងចំណោមព័ត៌មានលម្អិតសំខាន់ៗនៃរចនាប័ទ្មគឺ កញ្ចក់ឆ្នូតដ៏ស្រស់ស្អាត ។ រថយន្តនេះមានគំនូរ “ទង់ក្រហម”ជាអត្តសញ្ញាណរបស់ Hongqi នៅលើគម្របម៉ាស៊ីន ហើយក៏មានថាសកង់ប្រភេទដែលរំពឹងថានឹងមាននៅលើតែគំរូរថយន្តនេះប៉ុណ្ណោះ ។

រថយន្តទីពីរគឺ Hongqi SUV EV វាមានការរចនាដែលស្រដៀងទៅនឹងរថយន្ត Kia Telluride និង Bentley EXP 9F SUV ។ រថយន្ត SUV នេះត្រូវបានគេនិយាយថាមានបំពាក់ប្រព័ន្ធ sport intelligent active air suspension និងប្រព័ន្ធបើកបរកង់បួនដ៏ឆ្លាតវៃ និងការបញ្ជាកង់ក្រោយដើម្បីជួយដល់ការបើកបរលើផ្លូវលំបាក ឬ Off-road ផងដែរ។

ចុងក្រោយគឺរថយន្ត Hongqi E-LS ជារថយន្តដែលអាចបើកដំបូលបាន តុបតែងជាមួយពណ៌ដ៏ស្រស់ឆើតឆាយ បៃតងខ្ចី ពណ៌ខ្មៅ ក្រហម និងទឹកក្រូចផ្សេងៗ។

ដោយសារគោលគំនិតទាំងបីត្រូវបានបង្កើតឡើងជាផ្នែកមួយនៃ Hongqi Yuan Universe ដែលសុទ្ធសឹងតែជារថយន្តគំរូដែលត្រូវបានរំពឹងថានឹងផលិតនាពេលអនាគត និងចាប់ផ្តើមពីឆ្នាំ ២០២៤ តទៅ៕

ផ្ទាំងផ្សាយពាណិជ្ជកម្ម

Toyota GR Corolla ស៊េរីឆ្នាំ២០២៣ លក់តម្លៃចាប់ពីជាង៣ម៉ឺនដុល្លារ ដល់ជិត ៥ម៉ឺនដុល្លារ នៅអាមេរិក

September 6, 2022

[ទីផ្សារបរទេស] បន្ទាប់ពីបានប្រកាសចេញរថយន្តថ្មីសន្លាង Toyota GR Corolla សម្រាប់ទីផ្សារអាមេរិករួចមក នាពេលនេះ Toyota បានឲ្យដឹងអំពីតម្លៃរបស់រថយន្តកម្លាំងខ្លាំងនេះ មុនការចេញលក់ជាផ្លូវការនៅអំឡុងចុងឆ្នាំ២០២២នេះ។

GR Corolla នឹងមានចែកចេញជាបីប្រភេទ រួមមាន Core មានតម្លៃចាប់ពី ៣៥ ៩០០ដុល្លារ, Circuit មានតម្លៃចាប់ពី ៤២ ៩០០ដុល្លារ និងប្រភេទផលិតមានកំណត់ Morizo Edition ដែលមានតម្លៃចាប់ពី ៤៩ ៩០០ដុល្លារ ឡើងទៅ។

សម្រាប់ Core និង Circuit នឹងប្រើប្រាស់ម៉ាស៊ីន៣ស៊ីឡាំង ចំណុះ១,៦លីត្រ ប្រភេទ Turbocharged ដែលអាចផលិតកម្លាំងបាន ៣០០សេះ និងមានកម្លាំងរង្វិល ៣៧០ញ៉ូវតុនម៉ែត្រ។ ចំណែកប្រភេទ Morizo នោះក៏មានកម្លាំង ៣០០សេះ ដូចគ្នាដែរ ប៉ុន្តែមានកម្លាំងរង្វិលដល់ ៤០០ញ៉ូវតុនម៉ែត្រ ហើយរថយន្តទាំងបី មានមកជាស្តង់ដារនូវប្រអប់លេខដៃ ៦វគ្គ។

តម្លៃរបស់ GR Corolla ស្ថិតក្នុងកម្រិតណាដែរបើធៀបនឹងគូប្រជែង? សម្រាប់ Volkswagen Golf R មានតម្លៃចាប់ពី ៤៤ ០៩០ដុល្លារ ចំណែក Subaru WRX មានតម្លៃចាប់ពី ២៩ ៦០៥ដុល្លារ ខណៈដែលរថយន្ត Hyundai Kona N និង Hyundai Elantra N មានតម្លៃចាប់ពី ៣៤ ២០០ដុល្លារ និងចាប់ពី ៣២ ១៥០ដុល្លារ។ ដូចនេះ GR Corolla មានតម្លៃស្ថិតនៅកណ្ដាលគូប្រជែងឯទៀត៕

ផ្ទាំងផ្សាយពាណិជ្ជកម្ម

ឡានអគ្គិសនីសុទ្ធ Toyota Hiace អាចនឹងបង្ហាញខ្លួននៅឆ្នាំ ២០២៥

September 6, 2022

[បរទេស] យោងតាមគេហទំព័រ Bestcarweb.jp ប្រព័ន្ធផ្សព្វផ្សាយរថយន្តរបស់ប្រទេសជប៉ុន បានបង្ហាញពីព័ត៌មានថ្មីអំពីរថយន្ត Toyota Hiace ជារថយន្តអគ្គិសនីសុទ្ធប្រភេទ BEV គ្រោងនឹងធ្វើការដាក់បង្ហាញនៅឆ្នាំ ២០២៥ ដែលត្រូវបានបង្កើតឡើងលើគ្រោងឆ្អឹង e-TNGA platform ដូចទៅនឹងរថយន្ត Toyota bZ4X និង Lexus RZ ។

ក្នុងការផ្លាស់ប្តូរដ៏ធំមួយនាពេលអនាគតរបស់រថយន្ត Toyota Hiace ជំនាន់ទី ៦ បច្ចុប្បន្នត្រូវបានដាក់បង្ហាញនៅក្នុងឆ្នាំ ២០១៩ ដោយផ្អែកលើគ្រោងឆ្អឹង TNGA platform (Toyota New Global Architecture)។ មិនត្រឹមតែប៉ុណ្ណោះ រថយន្តអគ្គិសនី Toyota Hiace ថ្មីនឹងមានការរចនាបថរថយន្តអគ្គិសនី បំពាក់ដោយប៉ាណាមុខបិទជិត ឬប្រើ DNA BZ Series ជាដើម។

បន្ថែមពីនេះ សម្រាប់រថយន្ត Toyota Hiace ប្រភេទ plug-in hybrid អាចនឹងត្រូវបានបន្ថែម ហើយត្រូវបានគេរំពឹងថាវាអាចនឹងត្រូវបានដំឡើងនៅលើម៉ាស៊ីនសាំងចំណុះ ២,0 លីត្រ ទំហំ ៤ ស៊ីឡាំង ម៉ូទ័រអគ្គិសនី plug-in hybrid ដែលផលិតកម្លាំងបានរហូតដល់ ២៩០ សេះ។

គួរឲ្យដឹងដែរថា ទាំងអស់នេះមិនទាន់មានការបញ្ជាក់ជាមួយក្រុមហ៊ុន TOYOTA នៅឡើយទេ ប៉ុន្តែលទ្ធភាពដែលនឹងឃើញរថយន្តប្រភេទដឹកជញ្ជូដូចជា Toyota Hiace PHEV គឺពិតជាអាចនឹងមានការផលិត៕

ផ្ទាំងផ្សាយពាណិជ្ជកម្ម

ភីកអាប់អគ្គិសនី Geely Radar RD6 សាកថ្មម្តងជិះបាន ៦០០ គីឡូម៉ែត្រ បង្ហាញខ្លួនជាផ្លូវការ

September 6, 2022

[បរទេស] ក្រុមហ៊ុនផលិតរថយន្ត Geely សហការជាមួយក្រុមហ៊ុន Radar Auto បានធ្វើការដាក់បង្ហាញចេញជាផ្លូវការនៅរថយន្តភីកអាប់ Geely Radar RD6 ខណៈដែរ តម្លៃលក់គ្រោងនឹងប្រកាសចេញនៅត្រីមាសទី ៤ ឆ្នាំ ២០២២ សម្រាប់ទីផ្សារប្រទេសចិន។

រថយន្តភីកអាប់ Rada RD6 ថ្មីដែលត្រូវបានបង្កើតឡើងនៅលើស្ថាបត្យកម្ម Geely SEA architecture មានប្រវែងតួខ្លួនសរុប ៥ ២៦០ ម.ម ទទឹង ១ ៩០០ ម.ម កំពស់ ១ ៨៣០ ម.ម និងប្រវែងគន្លាតកង់មុខ-ក្រោយ ៣ ១២០ ម.ម ។ ដែលមានការរចនាជាមួយនឹងរូបរាងដ៏ស្វាហាប់ ប៉ាណាមុខបិទជិត អបដោយចង្កៀងមុខប្រភេទ LED ថ្មី, ដំបូលពីរពណ៌ ចង្កៀងក្រោយរាងជាអក្សរ X អូសកាត់ពីផ្នែកម្ខាងទៅផ្នែកម្ខាង ។ លើសពី ឃ្លុបក្រោយភ្ជាប់មកជាមួយបន្ទះផ្គត់ផ្គង់ថាមពលទំហំ ៦ គីឡូវ៉ាត់ អាចផ្គត់ផ្គង់ថាមពលខាងក្រៅបានយ៉ាងល្អប្រសើរ។

ចំពោះនៅផ្នែកខាងក្នុងកាប៊ីនវិញ រថយន្តភីកអាប់ Radar RD6 បង្ហាញពីការរចនាជាមួយប្រណិតភាព និងផាសុកភាព ដោយបំពាក់ជាមួយកុងទ័រព័ត៌មានឌីជីថល និងអេក្រង់កំសាន្ត touchscreen រចនាបែបបញ្ឈរ, ដៃចង្កូតប្រភេទ 3-spoke ថ្មី, ប្រអប់លេខអេឡិចត្រូនិច, កៅអីស្បែក Premium និងកន្លែងដាក់ឥវ៉ាន់សរុបលើសពី ១ ២០០ លីត្រផងដែរ។

ចូលទៅកាន់ផ្នែកម៉ាស៊ីនវិញ រថយន្តនេះដំណើរការដោយម៉ូទ័រអគ្គិសនីចំនួន ១ មានកម្លាំង ២៧២ សេះ អាចបង្កើតល្បឿនពី ០-១០០ គីឡូម៉ែត្រ/ម៉ោង ក្នុងរយៈពេល ៦ វិនាទី ផ្គួបជាមួយអាគុយទំហំ ១០០ គីឡូវ៉ាត់ម៉ោង អាចបើកបរបានចម្ងាយប្រហែល ៦០០ គីឡូម៉ែត្រក្នុងការសាកថ្មម្តង៕