ឡានអគ្គិសនីចិនថ្មី តម្លៃត្រឹមតែ ៥០០០ដុល្លារ ចេញមកប្រជែង HongGuang Mini EV

July 2, 2022

ក្រុមហ៊ុនផលិតរថយន្តចិន BAW បានប្រកាសចេញរថយន្តអគ្គិសនីខ្នាតតូចថ្មី ហៅថា Yuanbao សម្រាប់ទីផ្សារប្រទេសចិន ដោយវាត្រូវបានឌីហ្សាញឡើងដើម្បីប្រជែងជាមួយនឹងរថយន្តអគ្គិសនីចិនដ៏ល្បីឈ្មោះ Wuling HongGuang Mini EV។

រថយន្ត BAW Yuanbao នេះ មានប្រវែងត្រឹមតែ ៣,១៦ម៉ែត្រ ទទឹង ១,៤៩ម៉ែត្រ, កម្ពស់ ១,៥៨ម៉ែត្រ និង ប្រវែងពីកង់មុខទៅកង់ក្រោយ ២,០៥ម៉ែត្រប៉ុណ្ណោះ។

កាប៊ីនខាងក្នុងរបស់វា មានបំពាក់អេក្រង់ភ្លោះទំហំ ១០,២៥អ៊ីញ ដែលដើរតួជាកុងទ័រឌីជីថល និងអេក្រង់កម្សាន្ត ផងដែរ។ ក្រៅពីនោះ វាក៏មានប្រព័ន្ធកាមេរ៉ា ៣៦០ដឺក្រេ, សេនស័រចូលចត, ប្រព័ន្ធហ្វ្រាំង ABS និង មុខងារជំនួយពេលឡើងចំណោទ ជាដើម។

រថយន្តអគ្គិសនីខ្នាតតូចនេះមានបំពាក់ម៉ូទ័រអគ្គិសនីមួយ មានកម្លាំង ២៧សេះ និងកម្លាំងរមួល ៨៥ញ៉ូតុនម៉ែត្រ អាចរត់ដល់ល្បឿនអតិបរមា ១០០គីឡូម៉ែត្រក្នុងមួយម៉ោង។ វាមានជម្រើសកញ្ចប់អាគុយអគ្គិសនីទំហំ ៩,៦គីឡូវ៉ាត់ម៉ោង និង ១៣,៦គីឡូវ៉ាត់ម៉ោង ដែលផ្តល់ចម្ងាយបើកបរ ១២០គីឡូម៉ែត្រ និង ១៧០គីឡូម៉ែត្រ នៅពេលសាកភ្លើងពេញម្តង។

BAW Yuanbao ត្រូវបានដាក់លក់ក្នុងតម្លៃចន្លោះពី ៥ ០៦០ ដុល្លារ ដល់ ៧ ៤៥០ដុល្លារ នៅលើទីផ្សារប្រទេសចិន៕

ផ្ទាំងផ្សាយពាណិជ្ជកម្ម

Toyota ចេញឡានថ្មី Urban Cruiser Hyryder ប្រើម៉ាស៊ីន Hybrid សន្សំសំចៃខ្លាំងបំផុត

July 2, 2022

ក្រុមហ៊ុន Toyota ទើបតែបានប្រកាសចេញរថយន្ត SUV ដំណើរការដោយប្រើម៉ាស៊ីន Hybrid ថ្មី នៅក្នុងប្រទេសឥណ្ឌា គឺ ម៉ូដែល Urban Cruiser Hyryder ដែលបានសហការណ៍ផលិតដោយក្រុមហ៊ុន Maruti Suzuki។

រថយន្ត Toyota Urban Cruiser Hyryder មានប្រវែង ៤,៣៦ម៉ែត្រ ទទឹង ១,៧៩ម៉ែត្រ កម្ពស់ ១,៦៣ម៉ែត្រ និងប្រវែងពីកង់មុខទៅកង់ក្រោយ ២,៦ម៉ែត្រ។

ផ្នែកខាងក្នុង វាមានបំពាក់អេក្រង់កម្សាន្ត Touchscreen ទំហំ ៩អ៊ីញ និងកុងទ័រឌីជីថលទំហំ ៧អ៊ីញ ព្រមទាំងដំបូលកញ្ចក់វែក Panoramic Sunroof, ប្រព័ន្ធភ្លើងក្នុងកាប៊ីន Ambient Lighting, កុងទ័របាញ់លើកញ្ចក់ Head-up Display, កាមេរ៉ា ៣៦០ដឺក្រេ, កន្លែងសាកថ្មឥតប្រើខ្សែ, កៅអីមានមុខងារបញ្ចេញខ្យល់ត្រជាក់, រន្ធម៉ាស៊ីនត្រជាក់ក្រោយ និង រន្ធសាកថ្មនៅជួរខាងក្រោយផងដែរ។

រថយន្ត Toyota Urban Cruiser Hyryder ថ្មីនេះផ្តល់ជម្រើសម៉ាស៊ីនសាំងចំនួន ២ គឺ៖

ចំណុះ ១,៥លីត្រ ដំណើរការជាមួយប្រព័ន្ធ mild-hybrid ១២វ៉ុល និង អាគុយ hybrid ៦អំពែ មានកម្លាំងសរុប ១០១សេះ និងកម្លាំងរមួល ១៣៥ញ៉ូតុនម៉ែត្រ ហើយមានទាំងជម្រើសប្រអប់លេខដៃ ៥វគ្គ ឬ ៦វគ្គអូតូ និង ប្រើប៉ុងមុខ។
ចំណុះ ១,៥លីត្រ ដំណើរការជាមួយម៉ូទ័រអគ្គិសនីមួយ និងកញ្ចប់អាគុយ hybrid មួយ មានកម្លាំងសរុប ១១៤សេះ និងកម្លាំងរមួល ១៤១ញ៉ូតុនម៉ែត្រ ប្រើប៉ុងមុខ តាមរយៈ e-Drive transmission។

រថយន្ត Toyota Urban Cruiser Hyryder នឹងត្រូវផលិតនៅរោងចក្រ Bidadi ក្នុងរដ្ឋ Karnataka ប្រទេសឥណ្ឌា៕

ផ្ទាំងផ្សាយពាណិជ្ជកម្ម

Hyundai នឹងឈប់លក់ឡាន ២ ម៉ូដែលទៀត នៅអាមេរិក

July 2, 2022

ថ្ងៃអវសាន្តនៃរថយន្តនៅតែបន្តកើតឡើង ខណៈពេលដែលក្រុមហ៊ុន Hyundai Motor America បានប្រកាសពីការសម្លាប់នៃម៉ូដែលចំនួន ៣ ផ្សេងគ្នា សម្រាប់ឆ្នាំ ២០២៣។

ជាដំបូង និងសំខាន់បំផុតនោះគឺ ម៉ូដែល Accent នឹងត្រូវអស់ជីវិត។ ក្រុមហ៊ុន Hyundai បាននិយាយថា ម៉ូដែលនេះកំពុងត្រូវបានបញ្ឈប់ “ដោយសារតែការពង្រីកត្រកូល SUV” ដែលរួមបញ្ចូលទាំង Venue ដែលនឹងក្លាយជារថយន្តម៉ុដែលកម្រិតដំបូងបំផុតរបស់ពួកគេ។

ទោះជាយ៉ាងណាក៏ដោយ វាជារឿងសំខាន់ក្នុងការកត់សម្គាល់ថា Accent ត្រូវបានដាក់លក់ក្នុងតម្លៃចាប់ពី ១៦ ៦៤៥ដុល្លារ ខណៈ Venue មានតម្លៃចាប់ពី ១៩ ០០០ដុល្លារ។

វាជាភាពខុសគ្នាគួរឲ្យកត់សម្គាល់ ប៉ុន្តែអ្នកប្រើជាច្រើនបានងាកទៅចាប់អារម្មណ៍ជាមួយនឹងប្រភេទ Crossover ហើយការលក់ Accent ក៏បានធ្លាក់ចុះទៀត។ ក្រុមហ៊ុន Hyundai បានលក់ Accents ចំនួន ៧៩ ៧៦៦គ្រឿងនៅសហរដ្ឋអាមេរិក ក្នុងឆ្នាំ ២០១៦ ប៉ុន្តែការលក់បានធ្លាក់ចុះមកត្រឹម ១៩ ៦១៤ គ្រឿងកាលពីឆ្នាំមុន។

ទោះយ៉ាងណាក៏ដោយ មានពាក្យចចាមអារ៉ាមថា Hyundai Sonata ក៏អាចនឹងត្រូវឈប់លក់នៅឆ្នាំ ២០២៧ ឬ ២០២៨ ខាងមុខដែរ។

យ៉ាងណាមិញ Accent មិនមែនជាម៉ូដែលតែមួយគត់ដែលនឹងត្រូវអស់ជីវិតនោះទេ ព្រោះថាម៉ូដែល Veloster N ក៏ត្រូវបានបញ្ឈប់ផងដែរ ដោយសារតែអតិថិជន Hyundai ឥឡូវនេះមានជម្រើស Elantra N និង Kona N ដែលប្រសើរជាង។

ចុងក្រោយបង្អស់គឺម៉ូដែល Ioniq ដោយការផលិតនឹងបញ្ចប់នៅរោងចក្ររបស់ក្រុមហ៊ុន នៅទីក្រុង Ulsan ប្រទេសកូរ៉េខាងត្បូង នៅខែក្រោយ៕

ផ្ទាំងផ្សាយពាណិជ្ជកម្ម

Jaguar នឹងប្រកាសចេញឡានប្រើម៉ាស៊ីន V8 ចុងក្រោយនៅឆ្នាំ២០២៣

July 1, 2022

[ទីផ្សារបរទេស] ក្រុមហ៊ុន Jaguar កំពុងស្ថិតក្នុងដំណាក់កាលនៃការផ្លាស់ប្ដូរដ៏ធំមួយ ដែលគេនឹងឃើញក្រុមហ៊ុននេះប្រកាសចេញរថយន្ត SUV អគ្គិសនីចំនួនបីនៅក្នុងឆ្នាំ២០២៥ ដែលជាការផ្លាស់ខ្លួនចូលទីផ្សាររថយន្តប្រណីតថ្មីផងដែរ។ យ៉ាងណាក៏ក្រុមហ៊ុននៅមានគម្រោងផលិតរថយន្តប្រើម៉ាស៊ីនមួយចំនួនោងដែរ។

ក្នុងកិច្ចសម្ភាសន៍ជាមួយ Autocar ប្រធានក្រុមហ៊ុន Jaguar Land Rover ឈ្មោះថា Nick Collins បានបង្ហាញថា Jaguar នឹងប្រកាសចេញស៊េរីពិសេសនៃរថយន្តដែលមានលក់បច្ចុប្បន្ន មុនពេលដែលក្រុមហ៊ុនផ្លាស់ខ្លួនជាក្រុមហ៊ុនផលិតរថយន្តអគ្គិសនីសុទ្ធ ហើយរថយន្តទាំងនោះ នឹងមានជា F-Type ប្រភេទពិសេសផងដែរ។

ប្រធានរូបនេះលើកឡើងថារថយន្ត F-Type ស៊េរីពិសេសនឹងត្រូវប្រកាសចេញនៅឆ្នាំ២០២៣ ជាឆ្នាំដែលរថយន្តស្ព័ររបស់ Jaguar ចម្រើនវៃ៧៥ឆ្នាំ។ រថយន្តពិសេសនេះដែរ នឹងជារថយន្តស្ព័រចុងក្រោយគេរបស់ Jaguar ដែលប្រើប្រាស់ម៉ាស៊ីន V8។

ក្នុងទម្រង់ស្តង់ដារ រថយន្ត F-Type ដែលប្រើម៉ាស៊ីន V8 អាចផលិតកម្លាំងបាន ៤៤៤សេះ ដែលវាជាម៉ាស៊ីន Supercharged និងមានចំណុះ៥,០លីត្រ។ រថយន្ត F-Type ក៏មានជាប្រភេទ F-Type R ដែលម៉ាស៊ីន V8 របស់វាអាចផលិតកម្លាំងបានដល់ ៥៧៥សេះ៕

ផ្ទាំងផ្សាយពាណិជ្ជកម្ម

ឡាន Kia Soul ស៊េរីឆ្នាំ២០២៣ លក់តម្លៃមិនដល់២ម៉ឺនដុល្លារ នៅអាមេរិក

July 1, 2022

[ទីផ្សារបរទេស] ក្រុមហ៊ុន Kia បានបង្ហាញចេញតម្លៃរថយន្ត Kia Soul ស៊េរីឆ្នាំ២០២៣ សម្រាប់ទីផ្សារសហរដ្ឋអាមេរិក ដែលមានតម្លៃត្រឹមចាប់ពី ១៩ ៧៩០ដុល្លារ ពេលដែលរថយន្តនេះចេញលក់នៅរដូវក្ដៅ។

តម្លៃនេះថ្លៃជាងស៊េរីឆ្នាំ២០២២ ចំនួន ៥០០ដុល្លារ ប៉ុន្តែស៊េរីឆ្នាំ២០២៣នេះ មានផ្នែកខាងមុខដែលទាក់ទាញជាងមុន, មានអំពូលភ្លើងថ្មី និងមានរន្ធស្រូបខ្យល់ដែលស្រស់ស្អាតជាងមុនផងដែរ ហើយផ្នែកខាងក្រោយក៏មានការដុសខាត់បន្តិចបន្តួចផងដែរ។

សម្រាប់គ្រឿងបរិក្ខារវិញ រថយន្តតម្លៃធូរថ្លៃជាងគេគឺលំដាប់ Soul LX មានបំពាក់កញ្ចក់ខាងក្រោយពណ៌ខ្មៅការពារភាពឯកជន, មានយ៉ាន់កង់ទំហំ ១៦អ៉ីញ, មានកុងទ័រប្រភេទឌីជីថល ហើយមានអេក្រង់កម្សាន្តទំហំ ៨អ៉ីញ ដែលគាំទ្រមុខងារ Android Auto ជាមួយ Apple CarPlay។

លើផ្នែកសុវត្ថិភាពវិញ មានមុខងារមួយចំនួនមានមកជាស្តង់ដារតែម្ដង ដូចជាមុខងារ Forward Collision Avoidance with Pedestrian Detection, Lane Keep Assist និង Rear Occupant Alert ជាដើម។

ជុំវិញម៉ាស៊ីនវិញ គ្រប់កម្រិតទាំងអស់នៃរថយន្ត Soul ស៊េរីឆ្នាំ២០២៣ គឺមានបំពាក់ម៉ាស៊ីនចំណុះ ២,០លីត្រ ៤ស៊ីឡាំង ដែលអាចផលិតកម្លាំងបាន ១៤៧សេះ ហើយវាមានភ្ជាប់ជាមួយប្រអប់លេខវៃឆ្លាតដែលផ្ដល់ថាមពលផ្ដាច់មុខទៅកង់ខាងមុខ៕

ផ្ទាំងផ្សាយពាណិជ្ជកម្ម

Suzuki Brezza រូបរាងថ្មី កាន់តែសន្សំសំចៃ បង្ហាញខ្លួនជាផ្លូវការនៅទីផ្សារប្រទេសឥណ្ឌា

July 1, 2022

[ទីផ្សារបរទេស] ក្រុមហ៊ុន Suzuki ប្រចាំនៅប្រទេសឥណ្ឌា បានធ្វើការដាក់បង្ហាញជាផ្លូវការនៅរថយន្ត Suzuki Brezza ថ្មី ជាមួយនឹងការរចនាថ្មីទាំងខាងក្រៅ និងខាងក្នុង ព្រមទាំងដំណើរការដោយប្រព័ន្ធកូនកាត់ Hybrid ផងដែរ ដែលមានតម្លៃចាប់ពី ១០ ០៤៥ ដុល្លារ ដល់ ១៧ ៥២៩ ដុល្លារ នៅក្នុងទីផ្សារប្រទេសឥណ្ឌា។

រថយន្ត Suzuki Brezza ថ្មីត្រូវបានរចនាឡើងវិញដោយមានចង្កៀងមុខប្រភេទ dual LED និងអំបូលបំភ្លឺពេលថ្ងៃប្រភេទ LED និងប៉ាណាមុខតុបតែងដោយក្រូម។ កាងខាងមុខពណ៌ខ្មៅធំ កញ្ចក់ចំហៀងពណ៌ខ្មៅ ចង្កៀងក្រោយ LED ផ្ដេក អង់តែន Shark Finn ដំបូលកញ្ចក់ sunroof និងកង់យ៉ាន់ស្ព័រទំហំ ១៦ អ៊ីញជាដើម។

ចំពោះការរចនាផ្នែកខាងក្នុង សង្កត់ធ្ងន់ទៅលើភាពប្រណីត ដោយបំពាក់ជាមួយកុងទ័រព័ត៌មានឌីជីថល, អេក្រង់កំសាន្តបញ្ឈរ touchscreen ទំហំ ៩ អ៊ីញ, ដៃចង្កូតប្រភេទ 3-spoke ថ្មី, អេក្រង់បង្ហាញលើកញ្ចក់ head-up display, ឧបករណ៍បំពងសំឡេង Arkamys, កាំមេរ៉ា ៣៦០ ដឺក្រេ, កន្លែងសាកថ្ម AC ខាងក្រោយ, កន្លែងសាកថ្មឥតខ្សែ រួមទាំងបានបំពាក់ជាមួយបច្ចេកវិទ្យាសុវត្ថិភាព ADAS ថ្មី ពោងសុវត្ថិភាពចំនួន ៦ចំនុច។

ចូលទៅកាន់ផ្នែកម៉ាស៊ីនវិញ រថយន្តនេះដំណើរការដោយម៉ាស៊ីនចំណុះ ១,៥ លីត្រ hybrid ផលិតកម្លាំងបាន ១០២ សេះ និងកម្លាំងរមួល ១៣៧ ញ៉ូតុនម៉ែត្រ ភ្ជាប់ជាមួយប្រអប់លេខដៃ ៥វគ្គ និងប្រអប់លេខអូតូ ៦ វគ្គជាមួយនឹងចង្កឹះលេខ paddles gearshift៕

ផ្ទាំងផ្សាយពាណិជ្ជកម្ម

ឡានអគ្គិសនីសុទ្ធ NETA V សាកថ្មម្តងជិះបានជិត ៤០០ គីឡូម៉ែត្រ បង្ហាញខ្លួនជាផ្លូវការក្នុងប្រទេសថៃ

July 1, 2022

[ទីផ្សារបរទេស] ក្រុមហ៊ុន Neta Auto (Thailand) Co., Ltd នឹងធ្វើការដាក់បង្ហាញចេញជាផ្លូវការនៃរថយន្តអគ្គិសនីសុទ្ធ NETA V ជាលើកដំបូងនៅក្នុងប្រទេសថៃ នៅថ្ងៃទី ២០ ខែកក្កដា ឆ្នាំ ២០២២ បន្ទាប់ពីត្រូវបានដាក់តាំងបង្ហាញក្នុងកម្មវិធី Bangkok International Motor Show 2022 កាលពីខែមីនាកន្លងទៅ ចំពោះតម្លៃលក់ NETA V នៅក្នុងប្រទេសថៃ ទំនងជាមានតម្លៃចាប់ពី ១៦ ៩១៦ ដុល្លារ។

ក្រុមហ៊ុន NETA AUTO គឺជាក្រុមហ៊ុនផលិតរថយន្តអគ្គិសនីសុទ្ធមកពីប្រទេសចិនដែលត្រូវបានបង្កើតឡើងក្នុងឆ្នាំ ២០១៤។ បច្ចុប្បន្ននេះ មានរថយន្តអគ្គិសនីចំនួន ៣ នៅលើទីផ្សារគឺ NETA U, NETA V និង NETA S ជាមួយការលក់សរុបមានចំនួនជាង ១៤០ ០០០ គ្រឿង។

រថយន្ត NETA V ដែលជារថយន្តប្រភេទ SUV ដើរដោយថាមពលអគ្គិសនីមានប្រវែងរថយន្តសរុប ៤ ០៧០ ម.ម ទទឹង ១ ៦៩០ ម.ម កម្ពស់ ២ ៤២០ ម.ម និងប្រវែងគន្លាតកង់មុខ-ក្រោយ ២ ៤២០ ម.ម ភ្ជាប់មកជាមួយតួរថយន្តទ្វារ ៥ និងផ្នែកខាងក្នុងដែលអាចដាក់បាន ៥ កៅអីផងដែរ។

NETA V ត្រូវបានបំពាក់ដោយម៉ូទ័រអគ្គិសនី ៩៥ សេះ អាចបង្កើនល្បឿនពី ០-៥០ គីឡូម៉ែត្រ/ម៉ោងក្នុងរយៈពេលតិចជាង ៣,៩ វិនាទី និងល្បឿនអតិបរម៉ា ១០១ គីឡូម៉ែត្រ/ម៉ោង ភ្ជាប់ជាមួយអាគុយទំហំ ៣៨,៥៤ គីឡូវ៉ាត់ម៉ោង អាចបើកបរបានចម្ងាយប្រហែល ៣៨០ គីឡូម៉ែត្រក្នុងការសាកថ្មម្តង គាំទ្រមុខងារសាកថ្ម Type 2 AC និងប្រភេទ CCS DC ដែលពេញនិយមនៅក្នុងប្រទេសថៃ។

ចំពោះ NETA V ដែលដាក់តាំងក្នុង Motor Show នោះ គេអាចសង្កេតឃើញថា មានដៃចង្កូតនៅផ្នែកខាងស្តាំសម្រាប់ទីផ្សារប្រទេសថៃ។ ភ្ជាប់មកជាមួយអេក្រង់កំសាន្តបញ្ឈរទំហំ ១៤,៦ អ៊ីញ ជាមួយនឹងកុងទ័រព័ត៌មានឌីជីថលដែលដាក់នៅខាងលើកុងសូល កំណែចិនក៏ត្រូវបានបំពាក់ដោយ AI-powered voice recognition, built-in support for the TikTok app ជាដើម៕

ផ្ទាំងផ្សាយពាណិជ្ជកម្ម

ឡានថ្លៃដាច់គេមួយគ្រឿងដំបូងរបស់ Cadillac នឹងត្រូវដាក់លក់ដេញថ្លៃ

June 30, 2022

[ទីផ្សារបរទេស] រថយន្ត Escalade-V ដែលជារថយន្តថ្លៃដាច់គេរបស់ Cadillac គ្រោងដាក់លក់ដេញថ្លៃនៅថ្ងៃទី០១ ខែកក្កដា សម្រាប់រថយន្តមួយគ្រឿងដំបូងគេ ដោយការដេញថ្លៃនឹងធ្វើឡើងដោយ Barrett-Jackson ហើយថវិកាដែលទទួលបាននឹងយកបរិច្ចាគដល់សកលវិទ្យាល័យ Pensole Lewis។

រថយន្តមួយគ្រឿងដំបូងគេនេះនឹងមានលេខកូដសម្គាល់ VIN 001 ដោយវាមានប្រើប្រាស់ម៉ាស៊ីន Supercharged ៦,២លីត្រ ៨ស៊ីឡាំង អាចផលិតកម្លាំងបាន ៦៨២សេះ។ ម៉ាស៊ីននេះភ្ជាប់ជាមួយប្រអប់លេខស្វ័យប្រវត្តិ១០វគ្គ និងប្រព័ន្ធបើកបរប៉ុងពីរ ដែលអាចស្ទុះពី ០ ដល់ ៩៦គ.ម/ម៉ ក្នុងពេលមិនដល់ ៤,៤វិនាទី។

ក្រៅពីមានម៉ាស៊ីនខ្លាំងហើយ Escalade-V ក៏មានបំពាក់កាងមុខដែលអង់អាច និងមានប្រព័ន្ធបំពង់ស៊ីមាំងចំនួនបួន ហើយមានប្រើយ៉ាន់អាលុយមីញ៉ូមទំហំ ២២អ៉ីញ ដែលអមដោយដុំហ្វ្រាំងកម្លាំងខ្លាំង Edge Red ផងដែរ។ រថយន្ត SUV នេះក៏មាននូវបូមខ្យល់ និងមានមុខងារ Magnetic Ride Control 4.0 ដ៏ទំនើបទៀតផង។

នៅផ្នែកខាងក្នុងមានបំពាក់ឈើប្រភេទ Zebra និងអេក្រង់ OLED រាងកោង ដែលសរុបតំបន់អេក្រង់ចូលគ្នាគឺមានទំហំរហូតដល់ ៣៨អ៉ីញ ហើយមានទៅដោយប្រព័ន្ធសំឡេង AKG Studio Reference ដែលមានរន្ធបំពងសំឡេងចំនួន៣៦។

រថយន្តមួយគ្រឿងដំបូងដែលគ្រោងដាក់ដេញថ្លៃនេះ មិនមានការប៉ាន់ស្មានពីតម្លៃឡើយ ប៉ុន្តែរថយន្តនេះមានតម្លៃចាប់ពី ១៤៩ ៩៩០ដុល្លារ ជារថយន្ត Cadillac ដែលមានតម្លៃខ្ពស់ជាងគេ៕

ផ្ទាំងផ្សាយពាណិជ្ជកម្ម

ឡានអ៉ីដ្រូហ្សែនជំនាន់ថ្មីរបស់ Hyundai ពន្យារពេលប្រកាសចេញដល់ឆ្នាំ២០២៤

June 30, 2022

[ទីផ្សារបរទេស] រថយន្ត Hyundai Nexo ជំនាន់ថ្មី មានការរាយការណ៍មកថាត្រូវពន្យារពេលប្រកាសចេញរហូតដល់ឆ្នាំ២០២៤ ដោយសារមានបញ្ហាជុំវិញការអភិវឌ្ឍន៍ប្រព័ន្ធម៉ាស៊ីនដែលដើរដោយថាមពលអ៉ីដ្រូហ្សែនរបស់វា។

ការចុះផ្សាយរបស់ Seoul Economic Daily បានអះអាងថា Hyundai មានគម្រោងផលិតរថយន្ត និងចេញលក់នៅឆមាសទីពីរនៃឆ្នាំ២០២៣។ ត្បិតថាគេមិនច្បាស់អំពីបញ្ហាអភិវឌ្ឍន៍នេះ ប៉ុន្តែអ្នកវិភាគមួយចំនួនបានលើកឡើងថា Hyundai ប្រហែលជាវាយតម្លៃឡើងវិញលើអាជីវកម្មរថយន្តអ៉ីដ្រូហ្សែននេះ។

កាលពីខែកញ្ញា ឆ្នាំ២០២១ Hyundai បាននិយាយថាខ្លួនអាចនឹងចេញលក់រថយន្តប្រើឧស្ម័នអ៉ីដ្រូហ្សែនសម្រាប់រថយន្តពាណិជ្ជកម្មគ្រប់ម៉ូដែលនៅត្រឹមឆ្នាំ២០២៨។ ក្រុមហ៊ុនបាននិយាយទៀតថាខ្លួនអាចនឹងបង្កើតរថយន្តអ៉ីដ្រូហ្សែនសម្រាប់ Kia និង Genesis ដែលរថយន្តទាំងពីរអាចប្រកាសចេញក្រោយឆ្នាំ២០២៥។

ប្រភពខាងលើបានបន្ថែមថាការប្រកាសចេញរថយន្ត Genesis ដែលប្រើឧស្ម័នអ៉ីដ្រូហ្សែននៅមិនទាន់សម្រេចជាផ្លូវការនៅឡើយទេ ក្រោយពីមានការសម្រេចចិត្តថាផ្អាកការអភិវឌ្ឍន៍រថយន្តអ៉ីដ្រូហ្សែនដំបូងរបស់ Genesis កាលពីចុងឆ្នាំ២០២១៕

ផ្ទាំងផ្សាយពាណិជ្ជកម្ម

Kia បញ្ចេញ Kia Seltos រូបរាងថ្មីកាន់តែទាក់ទាញ គ្រោងនឹងបង្ហាញខ្លួនក្នុងពេលឆាប់ៗនេះ

June 30, 2022

[ទីផ្សារបរទេស] កាលពីពេលថ្មីៗនេះ កន្លងទៅ ក្រុមហ៊ុនផលិតរថយន្ត Kia បានធ្វើការដាក់បញ្ចេញជាផ្លូវការនៃរូបរាងថ្មីរបស់ Kia Seltos ត្រូវបានគេរំពឹងថានឹងបង្ហាញខ្លួននៅក្នុងប្រទេសឥណ្ឌាក្នុងពេលឆាប់ៗនេះ បន្ទាប់ពីបានធ្វើតេស្តកាលពីថ្ងៃទី១១ ខែមិថុនា កន្លងទៅ។

រថយន្ត Kia Seltos មុខមាត់ថ្មី គឺជាប្រភេទ SUV ដំបូងបង្អស់របស់ KIA ដែលត្រូវបានដាក់ចរាចរណ៍នៅក្នុងប្រទេសឥណ្ឌាក្នុងឆ្នាំ ២០១៩ ហើយឥឡូវនេះកំពុងទទួលបានការកែទម្រង់ជាមួយនឹងម៉ូដែលឆ្នាំ ២០២២ ដែលរំលេចនូវការរចនាខាងក្រៅ និងខាងក្នុងថ្មី ជាមួយនឹងឡូហ្គោ KIA ថ្មី។

KIA Seltos គ្រាន់តែជាការអាប់ដេតប៉ុណ្ណោះ មិនមែនការផ្លាស់ប្តូរថ្មីទាំងស្រុងនោះទេ។ ប៉ុន្តែផ្តោតលើរូបរាងដ៏ប្រណិតជាងមុនដោយ ប៉ាណាមុខបានរចនាឡើងវិញ ចង្កៀងមុខប្រភេទ LED ថ្មីជាមួយនឹងអំពូលបំភ្លឺពេលថ្ងៃ LED ។ កាងខាងមុខថ្មី ខ្សែដំបូលពីរពណ៌ ថាសកង់ស្ព័រថ្មីពិសេស និចង្កៀងក្រោយអូសកាត់ពីផ្នែកម្ខាងទៅផ្នែកម្ខាង។

សម្រាប់ផ្នែកខាងក្នុងកាប៊ីន បានកែប្រែនៅកុងទ័រព័ត៌មានជាប់ជាមួយអេក្រង់កំសាន្ត touchscreen ផ្តល់នៅភាពទំនើបជាងមុន ដៃចង្កូតនៅតែប្រើដូចដើម ប្រអប់លេខបែប ‘shift-by-wire’ ការរចនារន្ធខ្យល់ថ្មី កុងសូលកណ្តាលត្រូវបានតុបតែងដោយឆ្នូតក្រហម ដំបូលកញ្ចក់បែប Panoramic Sunroof វាក៏បានភ្ជាប់មកជាមួយបច្ចេកវិទ្យា ADAS ថ្មី និងកាំមេរ៉ា ៣៦០ ដឺក្រេផងដែរ។

បើនិយាយអំពីផ្នែកម៉ាស៊ីនវិញ រថយន្តនេះត្រូវគេរំពឹងថាប្រើប្រាស់ម៉ាស៊ីនសាំងចំណុះ ១,៥ លីត្រ មានកម្លាំង ១១៥ សេះ ម៉ាស៊ីនម៉ាស៊ូតចំណុះ ១,៥ លីត្រ មានកម្លាំង ១១៥ សេះ និងម៉ាស៊ីនសាំង ១,៤ លីត្រ មានកម្លាំង ១៤០ សេះ៕

ផ្ទាំងផ្សាយពាណិជ្ជកម្ម