យោងតាមប្រភពព័ត៌មានបានឲ្យដឹងថា ក្រុមហ៊ុន Porsche បានចាប់ផ្តើមដំណើរការខ្សែសង្វាក់ផលិតកម្មថ្មីរបស់ខ្លួន នៅក្នុងរោងចក្រដែលស្ថិតក្នុងរដ្ឋ Kedah ប្រទេសម៉ាឡេស៊ី ជាផ្លូវការហើយ។
គួររំលឹកឲ្យដឹងដែរថា ក្រុមហ៊ុនផលិតរថយន្តរបស់អាល្លឺម៉ង់ខាងលើ បានប្រកាសជាលើកដំបូងថា នឹងបើកខ្សែសង្វាក់ផលិតកម្មថ្មីក្នុងប្រទេសម៉ាឡេស៊ី កាលពីខែកញ្ញាឆ្នាំមុន។ វាគឺជារោងចក្រ Porsche ដំបូងគេនៅក្រៅទ្វីបអឺរ៉ុប ហើយនឹងដំឡើងរថយន្តម៉ូដែល Cayenne ជាពិសេស សម្រាប់ទីផ្សារម៉ាឡេស៊ី។
រោងចក្រនោះមានទីតាំងនៅក្នុងរោងចក្រដំឡើងរបស់ Sime Darby Berhad ដែលជាក្រុមហ៊ុនពាណិជ្ជកម្ម និងដឹកជញ្ជូនរបស់ប្រទេសម៉ាឡេស៊ី។ រោងចក្រនេះក៏មានតែបុគ្គលិកជាជនជាតិម៉ាឡេស៊ីផងដែរ ដែលសុទ្ធតែត្រូវបានបណ្តុះបណ្តាលដោយក្រុមហ៊ុន Porsche ទៀតផង។
គួរឲ្យដឹងថា តាមរយៈការដំឡើងរថយន្ត Cayenne នៅក្នុងប្រទេសម៉ាឡេស៊ី ក្រុមហ៊ុន Porsche អាចកាត់បន្ថយតម្លៃរបស់វាបានយ៉ាងច្រើន។ Cayenne ដែលផលិតក្នុងស្រុកមានតម្លៃចាប់ពី ៥៥០ ០០០ រីងហ្គីត ឬ ១៣០ ០០០ដុល្លារ ខណៈម៉ូដែលនាំចូលពីក្រៅប្រទេស ត្រូវបានដាក់លក់ក្នុងតម្លៃ ៦៦៥ ០០០ រីងហ្គីត ឬ ១៥៧ ០០០ដុល្លារឯណោះ។
រថយន្ត Porsche Cayenne ដំឡើងនៅម៉ាឡេស៊ី មានតែជម្រើសម៉ាស៊ីនសាំងចំណុះ ៣,០លីត្រ turbocharged V6 កម្លាំង ៣៣៥សេះ និងកម្លាំងរមួល ៤៥០ញ៉ូតុនម៉ែត្រ ប្រើប្រអប់លេខអូតូ ៨វគ្គ ប្រភេទ Tiptronic S និង ប៉ុងពីរ ប៉ុណ្ណោះ៕
