ក្រុមហ៊ុនរថយន្តអាមេរិក Rivian បានបញ្ចេញភីកអាប់ដំណើរការដោយថាមពលអគ្គិសនីថ្មី ម៉ូដែល R1T ដែលអាចបើកបានចម្ងាយ ៦៤០ គីឡូម៉ែត្រពេលសាកភ្លើងពេញ។
Rivian R1T ត្រូវបានរចនាឡើងរូបរាងបែបស្លីម ដូចរថយន្តពេលអនាគត ហើយខុសស្រឡះពីរថយន្តដទៃនាពេលបច្ចុប្បន្ននេះ។ ក្រៅពីមានរូបរាងប្រណីតគួរឲ្យទាក់ទាញ R1T ក៏មានកម្លាំងមិនធម្មតាដែរ។
R1T មាន ៣ ជម្រើស គឺ ប្រើអាគុយ ១០៥ គីឡូវ៉ាត់ម៉ោង សាកភ្លើងម្តងបើកបានចម្ងាយ ៣៧០ គីឡូម៉ែត្រ , ១៣៥ គីឡូវ៉ាត់ម៉ោង អាចបើកបានចម្ងាយ ៤៨០ គីឡូម៉ែត្រ និង ១៨០ គីឡូវ៉ាត់ម៉ោង អាចបើកបានចម្ងាយ ៦៤០ គីឡូម៉ែត្រ ។ R1T ទាំង ៣ ជម្រើសនេះ សុទ្ធតែមានសមត្ថភាពអាចបើកដល់ល្បឿនអតិបរមា ២០០ គីឡូម៉ែត្រក្នុងមួយម៉ោង។
មិនតែប៉ុណ្ណោះ ប្រព័ន្ធម៉ូទ័រអគ្គិសនីចំនួន ៤ កម្លាំង ១៤៧ គីឡូវ៉ាត់ នឹងបញ្ជូនទៅកាន់កង់ទាំង ៤ មានន័យថាវាជារថយន្តប៉ុងពីរ អនុញ្ញាតឲ្យវាអាចស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលត្រឹមតែ ៣ វិនាទីប៉ុណ្ណោះ៕
