តាមការចុះផ្សាយរបស់ Nikkei Asian Review បានឲ្យដឹងថា ក្រុមហ៊ុនផលិតរថយន្តអគ្គិសនីរបស់អាមេរិក Tesla យល់ព្រមបង់ថ្លៃប្រចាំឆ្នាំប្រមាណ ៣២៣ លានដុល្លារដល់រដ្ឋាភិបាលចិនចាប់ពីចុងឆ្នាំ ២០២៣ ជាថ្លៃជួលដីសង់រោងចក្រផលិតរថយន្តនៅទីក្រុងសៀងហៃ។
បន្ថែមពីនេះ Tesla ក៏យល់ព្រមថានឹងវិនិយោគជាទឹកប្រាក់ ២,០៤ ពាន់លានដុល្លារ ក្នុងរយៈពេល ៥ ឆ្នាំបន្ទាប់ លើរោងចក្រថ្មីនេះផងដែរ។ ប្រសិនមិនបានបំពេញតាមលក្ខខណ្ឌទាំងពីរនេះ Tesla នឹងត្រូវប្រគល់ដីដល់រដ្ឋាភិបាលចិនវិញ ហើយត្រូវបង់ថ្លៃសំណងទៀតផង។
កាលពីខែមករា រោងចក្រផលិតរថយន្តនៅសៀងហៃរបស់ Tesla បានធ្វើការបុកគ្រឹះសាងសង់។ ក្រុមហ៊ុនជឿជាក់ថាការផលិតរថយន្តនៅចិន នឹងអាចជួយកាត់បន្ថយតម្លៃរថយន្ត Model 3 លក់នៅប្រទេសចិន ថោកជាងការនាំចូលពីសហរដ្ឋអាមេរិក ១៣%៕
