[ទីផ្សារបរទេស] ក្រុមហ៊ុនផលិតរថយន្ត Ford បានធ្វើការប្តេជ្ញាចិត្តនឹងចំណាយថវិកា ៣០ ពាន់លានដុល្លារលើរថយន្តអគ្គិសនី រហូតដល់ឆ្នាំ ២០២៥ ហើយប្រភពនៅក្នុងក្រុមហ៊ុន Ford អះអាងថា ថវិកាបន្ថែមពី ១០ ទៅ ២០ ពាន់លានដុល្លារអាចនឹងត្រូវចំណាយ ដើម្បីអភិវឌ្ឍន៍រោងចក្រដែលមានស្រាប់ទៅជារោងចក្រអគ្គិសនី ក្នុងរយៈពេលប៉ុន្មានឆ្នាំខាងមុខនេះ។
យោងតាមរបាយការណ៍ពី Bloomberg រាយការណ៍ថា ផែនការនេះគឺជាផ្នែកមួយនៃការជំរុញឲ្យក្រុមហ៊ុន Ford ក្លាយជាក្រុមហ៊ុនរថយន្តអគ្គិសនីដែលអាចប្រកួតប្រជែងជាមួយក្រុមហ៊ុន Tesla ។ ការវិនិយោគកើនឡើងនឹងឃើញក្រុមហ៊ុន Ford ជ្រើសរើសនៅវិស្វករថ្មីដែលមានឯកទេសខាងអាគុយគីមី, AI និង software នៃរថយន្តអគ្គិសនី ។
ក្នុងនោះ លោក Mark Truby ប្រធានផ្នែកទំនាក់ទំនងរបស់ក្រុមហ៊ុន Ford បានប្រាប់ Bloomberg ថា “យើងកំពុងអនុវត្តផែនការ Ford Plus របស់យើងដើម្បីផ្លាស់ប្តូរក្រុមហ៊ុន និងបន្តការរីកចម្រើនក្នុងយុគសម័យថ្មីនៃរថយន្តអគ្គិសនី យើងនឹងមិនធ្វើអត្ថាធិប្បាយលើការរំពឹងទុកនោះទេ” ។
ទន្ទឹមនឹងនេះ អ្នកគាំទ្រដ៏សំខាន់នៃក្រុមហ៊ុន Ford ដែលជំរុញការវិនិយោគរបស់ខ្លួនទៅលើរថយន្តអគ្គិសនី គឺលោក Doug Field ដែលជាអតីតប្រធានគម្រោងរថយន្តរបស់ក្រុមហ៊ុន Apple និងជាអ្នកបង្ហាញចេញនៅរថយន្ត Tesla Model 3 ខណៈដែលលោកនៅជានាយកប្រតិបតិ្តក្នុងក្រុមហ៊ុនរបស់លោក Elon Musk ។ គាត់ត្រូវបានគេនិយាយថាកំពុងធ្វើការជាមួយលោក Farley ដើម្បីជំរុញឲ្យក្រុមហ៊ុន Ford កាន់តែមានភាពរហ័សរហួនផងដែរ។
ខណៈពេលនេះ Ford គឺស្ថិតនៅក្នុងជំហរខុសពី Tesla ដោយសារពឹងផ្អែកលើប្រាក់ចំណេញដែលបានមកពីរថយន្តដំណើរការដោយថាមពលចំហេះក្នុងដើម្បីផ្តល់ការវីនិយោគដល់រថយន្តអគ្គិសនីនាពេលអនាគតរបស់ខ្លួន។ វិធីមួយដែលក្រុមហ៊ុនផលិតរថយន្តអាចបង្កើតប្រាក់ចំណូលបន្ថែមក្រៅពីការលក់រថយន្ត ថាមពលចំហេះក្នុង របស់ខ្លួនគឺតាមរយៈការជំរុញសេវាកម្មដែលខ្លួនលក់ទៅឲ្យម្ចាស់រថយន្ត ដែលជាការផ្លាស់ប្តូរដែលអាចរកចំណូលបានរហូតដល់ ២០ ពាន់លានដុល្លារ/ឆ្នាំ៕
