ក្រុមហ៊ុន Dodge បានលក់ដាច់រថយន្តស្ព័រ Challenger ចំនួន ១៥ ០៩៦ គ្រឿងនៅសហរដ្ឋអាមេរិក ក្នុងរយៈពេល ៣ខែដំបូង នៃឆ្នាំ២០២១ ហើយនេះគឺជាការកើនឡើងគួរឲ្យកត់សំគាល់ បើធៀបនឹងចំនួន ១២ ១៣៨ គ្រឿង ដែលបានលក់ដាច់នៅក្នុងត្រីមាសទី ១ នៃឆ្នាំ២០២០។ គួរឲ្យដឹងដែរថា Challenger ឥឡូវនេះ គឺជាផលិតផលដែលលក់ដាច់បំផុតទី 3 របស់ក្រុមហ៊ុន Dodge។
ទោះបីជាការលក់កើនឡើងក៏ដោយ ប៉ុន្តែ Challenger នៅតែស្ថិតពីក្រោយរថយន្ត Ford Mustang ដែលលក់បាន ១៧ ២៧៤ គ្រឿងនៅត្រីមាសដំបូងនៃឆ្នាំនេះ។ ទោះជាយ៉ាងណា វាគឺជាការធ្លាក់ចុះ ៤,៤% ពីឆ្នាំមុន ដែលមានចំនួន ១៨ ០៦៩ គ្រឿង។ យ៉ាងណា Mustang ឥឡូវនេះ គឺជារថយន្តដែលលក់ដាច់បំផុតរបស់ Ford។
ដោយឡែក ចំពោះរថយន្ត Chevrolet Camaro វិញ បានឈរនៅលំដាប់លេខ៣ ជាមួយនឹងចំនួនលក់ត្រឹមតែ ៧ ០៨៩គ្រឿងប៉ុណ្ណោះ។
ជាការពិតណាស់ ការធ្លាក់ចុះនៃការលក់របស់ Camaro គឺមិនគួរឲ្យភ្ញាក់ផ្អើលនោះទេ ព្រោះថាតម្រូវការនៃរថយន្តនេះបានធ្លាក់ចុះអស់រយៈពេល ៧ ឆ្នាំជាប់ៗគ្នាមកហើយ៕
