លុយខាប់! Ferrari ចែកប្រាក់រង្វាន់បុគ្គលិករហូតដល់ ១៣ ៧០០ដុល្លារ ក្នុងម្នាក់

February 7, 2022

[ទីផ្សារបរទេស] ២០២១គឺជាឆ្នាំដែល Ferrari ធ្វើបានល្អបំផុតលើការលក់ ដែលដូចនេះហើយទើបក្រុមហ៊ុនសម្រេចថាផ្ដល់ប្រាក់រង្វាន់ប្រចាំឆ្នាំ២០២១ជូនដល់បុគ្គលិកម្នាក់ៗ ដោយច្រើនបំផុតមានអ្នកបានរហូតដល់ប្រមាណ ១៣ ៧០០ដុល្លារ។

ការចុះផ្សាយរបស់ Reuters បានឲ្យដឹងថាប្រាក់លើកទឹកចិត្តដល់បុគ្គលិកគឺបានភ្ជាប់ជាមួយកំណត់ត្រាលក់ដ៏អស្ចារ្យរបស់ Ferrari។ កាលពីឆ្នាំកន្លងទៅនេះ ម៉ាករថយន្តមួយនេះអាចលក់រថយន្តបានសរុប ១១ ១៥៥គ្រឿងនៅទូទាំងពិភពលោក កើនឡើង ២២,៣% ធៀបនឹងឆ្នាំ២០២០។ បន្ថែមពីនេះ ការលក់ក៏មានកំណើន ១០,១% ផងដែរ បើធៀបនឹងឆ្នាំ២០១៩។

Ferrari បានបង្ហាញឲ្យដឹងថាផងដែរថាការកុម្ម៉ង់ទិញរថយន្តពីសំណាក់អតិថិជន បានអូសបន្លាយរហូតដល់ឆ្នាំ២០២៣ ទើបអាចសម្រេចជូនរាល់ការកុម្ម៉ង់ទាំងអស់។ ជាមួយរថយន្ត SUV ដំបូងគ្រោងប្រកាសចេញឆ្នាំនេះ គេរំពឹងថាលទ្ធផលនៃការលក់សម្រាប់ឆ្នាំ២០២២ នឹងកាន់តែល្អប្រសើរ។

រថយន្ត Ferrari ត្រូវប៉ាន់ខ្លាំងនៅតំបន់អឺរ៉ុប, មជ្ឈឹមបូព៌ា និងអាហ្រ្វិក ដែលមានរថយន្ត ៥ ៤៩២គ្រឿង បានលក់ចេញ បន្ទាប់មកគឺសហរដ្ឋអាមេរិកដែលមានចំនួនជិត ៣ពាន់គ្រឿង ខណៈដែលនៅចិន ហុងកុង និងតៃវ៉ាន់ លក់ចេញបាន ៨៩៩គ្រឿង កើនឡើង ៩៧%៕

ផ្ទាំងផ្សាយពាណិជ្ជកម្ម

ទេវរូប Rolls-Royce ទទួលបានការអាប់ដេតថ្មី ត្រៀមសម្រាប់ឡានអគ្គិសនី

February 7, 2022

[ទីផ្សារបរទេស] ចាំបានថាថ្ងៃទី៦ ខែកុម្ភៈ ឆ្នាំ១៩១១ គឺជាថ្ងៃចាប់កំណើតរបស់ទេវរូបរថយន្ត Rolls-Royce ដែលជាទេវរូបដ៏មានកេរ្តិ៍ឈ្មោះល្បីបំផុតមួយក្នុងវិស័យរថយន្ត ដែលទេវរូបនេះតែងតែដាក់នៅផ្នែកខាងមុខនៃរថយន្ត Rolls-Royce។

ពេលនេះដែរ ទេវរូបរបស់ Rolls-Royce ទទួលបានការអាប់ដេតថ្មី សម្រាប់អនាគតរថយន្តអគ្គិសនីសុទ្ធនៅថ្ងៃខាងមុខ។ រូបរាងរបស់ទេវរូបថ្មីនៅតែមានលក្ខណៈស្រដៀងរូបរាងពីមុន ប៉ុន្តែវាមិនបានឈរជើងត្រង់ដូចពីមុនឡើយ គឺតួខ្លួននៃទេវរូបហាក់អោនទៅខាងមុខបន្តិច ដែលប្រៀបដូចជាការតំណាងឲ្យការប្រុងប្រៀបឆ្ពោះដំណើរទៅមុខ។

ការផ្លាស់ប្ដូរថ្មីនេះត្រូវបានអះអាងថាផ្ដល់ជូននូវសមត្ថភាពពុះជ្រែកខ្យល់ (aerodynamics) ប្រសើរជាងមុន ដែលនេះគឺជាចំណុចសំខាន់មួយសម្រាប់រថយន្តអគ្គិសនី ដោយសារវានឹងចូលរួមចំណែកក្នុងការធ្វើឲ្យរថយន្ត Rolls-Royce អគ្គិសនីអាចផ្ដល់ចម្ងាយបើកបរបានកាន់តែឆ្ងាយ។

ទេវរូបថ្មីនេះមិនទាន់ចាប់ផ្ដើមប្រើប្រាស់នៅឡើយទេ ហើយវាទំនងជានឹងបង្ហាញវត្តមានលើរថយន្តអគ្គិសនីម៉ូដែល Rolls-Royce Spectre ដែលអាចនឹងប្រកាសចេញជាផ្លូវការនៅក្នុងឆ្នាំ២០២៣៕

ផ្ទាំងផ្សាយពាណិជ្ជកម្ម

Volvo Cars បង្កើតរោងចក្រផលិតអាគុយថ្មី សម្រាប់រថយន្តអគ្គិសនីជំនាន់ក្រោយខ្លួន

February 7, 2022

[ទីផ្សារបរទេស] ថ្មីៗនេះក្រុមហ៊ុនរថយន្ត Volvo Cars បានប្រកាសថាខ្លួននឹងសាងសង់រោងចក្រអាគុយថ្មីមួយសម្រាប់រថយន្តអគ្គិសនីជំនាន់ក្រោយនៅក្នុងប្រទេសស៊ុយអែតនៅក្នុងឆ្នាំ ២០២៥ ដោយសហការជាមួយក្រុមហ៊ុន Northbolt ។

សម្រាប់ក្រុមហ៊ុន Northbolt គឺជាអ្នកផ្គត់ផ្គង់នៅអឺរ៉ុបផ្តល់នូវកោសិកាថ្ម និងអាគុយដែលមានគុណភាពខ្ពស់ប្រកបដោយនិរន្តរភាព។ ដើម្បីដំណើរការការផ្លាស់ប្តូរទៅជាក្រុមហ៊ុនដែលកាត់បន្ថយនូវការបំភាយឧស្ម័ននៅអឺរ៉ុប ក្រុមហ៊ុនកំពុងតែផលិតអាគុយលីចូម-អ៊ីយ៉ុង ជាមួយនឹងការកាត់បន្ថយការបំភាយឧស្ម័ន CO2 ។ បន្ថែមពីនេះមកទល់នឹងពេលនេះ ក្រុមហ៊ុន Northbolt បានចុះកិច្ចព្រមព្រៀងដែលមានតម្លៃរហូតទៅដល់ ២៧ ពាន់លានដុល្លារ ជាមួយក្រុមហ៊ុន BMW និង Volkswagen។

ចំពោះការសាងសង់រោងចក្រថ្មីនេះគ្រោងនឹងចាប់ផ្តើមនៅឆ្នាំ ២០២៣ ដើម្បីផលិតកោសិកាថ្មសម្រាប់រថយន្ត Volvo និង Polestar ជំនាន់ក្រោយ។ ហើយរោងចក្រថ្មីនេះនឹងមានសមត្ថភាពផលិតថ្មប្រចាំឆ្នាំជាអតិបរមា ៥០ ជីហ្គាវ៉ាត់ម៉ោង ហើយនឹងផ្គត់ផ្គង់អាគុយដល់រថយន្តចំនួន ៥០០,០០០ គ្រឿងជារៀងរាល់ឆ្នាំ។

ហើយរោងចក្រថ្មីនេះនឹងត្រូវសាងសង់នៅក្នុងទីក្រុង Gothenburg ប្រទេសស៊ុយអែត ហើយនឹងមានអត្ថប្រយោជន៍ទាក់ទងនឹងការចូលទៅកាន់រោងចក្រដំឡើងដ៏ធំបំផុតរបស់ក្រុមហ៊ុន Volvo Cars និងថាមពលកកើតឡើងវិញ។

សូមបញ្ជាក់ថាកិច្ចសន្យាផ្គត់ផ្គង់ថ្មនេះ ត្រូវបានការសហការជាមួយក្រុមហ៊ុន Northbolt នឹងធានាបាននូវតម្រូវការកោសិកាថ្មនៅក្នុងទ្វីបអឺរ៉ុប ដែលជាផ្នែកមួយនៃមហិច្ឆតារបស់ក្រុមហ៊ុន Volvo Cars។ បន្ថែមពីនេះ Volvo Cars មានបំណងផលិតរថយន្តអគ្គិសនីសុទ្ធ ១០០% នៅត្រឹមឆ្នាំ ២០៣០ផងដែរ៕

ផ្ទាំងផ្សាយពាណិជ្ជកម្ម

តូចតែខ្លឹម! កូនឡាន Hyundai Casper Van តម្លៃខ្ទង់ ១ម៉ឺនដុល្លារ នៅទីផ្សារប្រទេសកំណើត

February 7, 2022

[ទីផ្សារបរទេស] ក្រុមហ៊ុនផលិតរថយន្ត Hyundai បានធ្វើការដាក់បញ្ចេញនៅរថយន្តម៉ូឌែលប្រភេទ Casper Van ថ្មីសម្រាប់ទីផ្សារប្រទេសកំណើត បន្ថែមចូលទៅកាន់ត្រកូល Casper សម្រាប់អតិថិជនអាជីវកម្មដែលត្រូវការរថយន្តដឹកទំនិញធុនតូចមានសមត្ថភាពដាក់អីវ៉ាន់បាន ៩៤០ លីត្រ ជាមួយតម្លៃ ១១ ៥០០ ដុល្លារ។

ដោយរថយន្តនេះបានបំពាក់ដោយអំពូលភ្លើងបំភ្លឺពេលថ្ងៃ ប្រភេទ LED, សេនស័រក្រោយ, នាឡិកាឌីជីថលទំហំ ៤,២ អ៊ីញ, ឧបករណ៍បំពងសំឡេងចំនួន ២ចំនុច និងថាសកង់ដែកទំហំ ១៥ អ៊ីញ។

សម្រាប់មុខងារសុវត្ថិភាពនៅលើរថយន្ត Casper Van មានដូចជាប្រព័ន្ធជំនួយអ្នកបើកបរដូចជា cruise control, automatic emergency braking, lane keeping assist។

ជាមួយគ្នានេះ ក្រុមហ៊ុនក៏បានបន្ថែមជម្រើបន្ថែមសម្រាប់អតិថិជនផងដែរ ដោយរួមមានកៅអីត្រជាក់/ក្តៅ, កៅអីស្បែកតម្លៃ ៥០០ ដុល្លារ, ដៃចង្កូតមុខងារកម្តៅ, កញ្ចក់មើលក្រោយ auto-dimming rearview mirror តម្លៃ ២៨០ ដុល្លារ។ រួមជាមួយ កាងខាងមុខពី Casper Active មានតម្លៃ ២៧០ ដុល្លារ ហើយដំបូលពី Thule មានតម្លៃ ៤៦០ ដុល្លារ ផងដែរ។

ចូលទៅកាន់ផ្នែកម៉ាស៊ីនវិញ រថយន្ត Casper Van បំពាក់ជាមួយជម្រើសម៉ាស៊ីន២ប្រភេទរួមមាន ម៉ាស៊ីន MPi ចំណុះ ១,០ លីត្រ naturally aspirated ទំហំ ៣ស៊ីឡាំង ផលិតកម្លាំងបាន ៧៦ សេះ និងកម្លាំងរមួល ៩៥ ញ៉ូតុនម៉ែត្រ និងម៉ាស៊ីនចំណុះ ១,០ លីត្រ turbocharged ប្រភេទ Kappa II ដែលមានកម្លាំង ១០០ សេះ កម្លាំងរមួល ១៧២ ញ៉ូតុនម៉ែត្រ ដំណើរការដោយកង់ខាងមុខ ភ្ជាប់ជាមួយប្រអប់លេខអូតូ ៤វគ្គ៕

ផ្ទាំងផ្សាយពាណិជ្ជកម្ម

Ferrari គ្រោងចេញរថយន្ត Purosangue ប្រភេទ SUV ដំបូងបង្អស់នៅចុងឆ្នាំ ២០២២

February 7, 2022

[ទីផ្សារបរទេស] ក្រុមហ៊ុន Ferrari បានធ្វើការប្រកាសថាខ្លួននឹងគ្រោងផលិតមនូវរថយន្ត Purosangue ប្រភេទ SUV ដំបូងបង្អស់នៅចុងឆ្នាំ ២០២២ ។

ទោះបីជារថយន្ត SUV នេះមានព័ត៌មានតាំងពីឆ្នាំ ២០១៨ ក៏ដោយមុនពេលរូបភាពបានបែកធ្លាយពេលកំពុងដំណើរការសាកល្បង ប៉ុន្តែ Ferrari មិនដែលបញ្ចេញព័ត៌មានណាមួយឡើយពាក់ព័ន្ធនឹងរថយន្តនេះសូម្បីតែបន្តិច។

ដោយទ្បែកមានប្រព័ន្ធផ្សព្វផ្សាយជាច្រើនបានរំពឹងថារថយន្ត Purosangue នឹងប្រើប្រាស់ម៉ាស៊ីន V8 plug-in hybrid ដូច SF90 Stradale ផងដែរ។ ប៉ុន្តែវាអាចទៅរួចដែលវានឹងត្រូវបានបំពាក់ដោយ V12 ឬ V6 hybrid ដូចគ្នាទៅនឹង 296 GTB ជាជម្រើសមួយផ្សេងទៀតផងដែរ។

ទោះជាយ៉ាងណាក៏ដោយ Purosangue ទំនងភ្ជាប់មកជាមួយម៉ូទ័រអគ្គិសនីដើម្បីជំរុញវា ខណៈពេលតែ Ferrari ធ្លាប់បានប្រកាសថា 812 Competizione នឹងក្លាយជាម៉ូឌែលចុងក្រោយដែលប្រើម៉ាស៊ីនចំហេះសុទ្ធ។

សម្រាប់ទីផ្សាររថយន្តប្រភេទ SUV ដែលមានសមត្ថភាពខ្ពស់ គឺជាផ្នែកមួយដែលមានសក្តានុពលខ្លាំងដែលជាគូប្រជែង Lamborghini Urus មានចំនួន ៦០% នៃការលក់សរុបរបស់ Lamborghini។ ខណៈពេលដែលរថយន្ត Aston Martin DBX បានជួយជំរុញការលក់របស់ Aston Martin កើនឡើង ៨២% កាលពីឆ្នាំមុន។ ដូច្នេះវាមិនមែនជារឿងគួរឱ្យភ្ញាក់ផ្អើលទេដែល Ferrari កំពុងព្យាយាមប្រកួតប្រជែងដើម្បីចំណែកទីផ្សារនៅក្នុងក្រុមនេះផងដែរ។

យ៉ាងណាមិញ Purosangue ក៏ជាផ្នែកមួយនៃគម្រោងរបស់ Ferrari ក្នុងការចេញលក់ម៉ូឌែលថ្មីចំនួន ១៥ គ្រឿងនៅឆ្នាំ ២០២២ ដូចជា៖ 812 GTS និង F8 Tributo/Spider, Roma, Monza SP1/SP2 ហើយបញ្ជាក់ថានឹងភ្ជាប់មកជាមួយម៉ូទ័រអគ្គិសនីទៅលើ ៦០% នៃរថយន្តទាំងអស់ដែលបានដាក់លក់៕

ផ្ទាំងផ្សាយពាណិជ្ជកម្ម

Nissan GT-R Nismo នឹងត្រៀមបង្ហាញខ្លួននៅក្នុងប្រទេសវៀតណាម

February 7, 2022

[ទីផ្សារបរទេស] ថ្មីៗនេះក្រុមហ៊ុន Nissan បានបញ្ចេញនូវរថយន្ត GT-R Nismo Special Edition ហើយក៏កំពុងត្រៀមបង្ហាញខ្លួន នៅក្នុងប្រទេសវៀតណាម។

ជាពិសេសរថយន្ត Nissan GT-R Nismo Special Edition ត្រូវបានបញ្ជាទិញដោយក្រុមហ៊ុនយក្សរបស់វៀតណាមកាលពីដើមឆ្នាំនេះ តាមរយៈក្រុមហ៊ុននាំចូលឯកជននៅទីក្រុងហាណូយ។ ជាពិសេសរថយន្ត Nissan GT-R Nismo Special Edition ត្រូវបានផលិតត្រឹមចំនួនតែ ៣០០ គ្រឿងនៅទូទាំងពិភពលោក។ បន្ថែមពីនេះក្រុមហ៊ុនផលិតរថយន្តជប៉ុនធ្លាប់បានប្រកាសថារថយន្តស្ព័រនេះត្រូវបានបញ្ជាទិញអស់ពីស្តុក។

សម្រាប់លក្ខណៈពិសេសដែលគួរអោយកត់សម្គាល់ដោយផ្នែកមួយចំនួននៃរថយន្តត្រូវបានធ្វើឡើងពីកាបូនដោយរួមមាន៖ គម្របម៉ាស៊ីន, កាងខាងមុខ, ប៉ាណា, កាងជមហៀង, កាងខាងក្រោយ, ដំបូលខាងលើ និង spoiler រួមជាមួយការកំលេចដោយពណ៌ក្រហមផងដែរ។

បន្ថែមពីនេះ Nissan GT-R Nismo Special Edition ក៏បានភ្ជាប់មកជាមួយថាសកង់ទំហំ ២០អ៊ីញ រំលេចជាមួយពណ៌ក្រហម និងកាបូន និងអមដោយដុំហ្វ្រាំងប្រភេទសេរ៉ាមិចពណ៌លឿងផងដែរ។ រីឯផ្នែកខាងក្នុងបានប្រើប្រាស់ជាមួយពណ៌ខ្មៅលលាយពណ៌ក្រហម និងបានប្រើប្រាស់ជាមួយកៅអីស្ព័រប្រភេទស្បែក រួមជាមួយ Console កណ្តាលស្រោបដោយកាបូនផងដែរ។

ដោយទ្បែកចំពោះផ្នែកម៉ាស៊ីននៃរថយន្ត Nissan GT-R Nismo Speciale Edition ប្រើប្រាសម៉ាស៊ីនសាំង V6 ចំណុះ ៣,៨ លីត្រ ផលិតកម្លាំង ៥៩២ សេះ និងកម្លាំងរមួល ៦៥២ ញ៉ូតុនម៉ែត្រ ភ្ជាប់ជាមួយនឹងប្រអប់លេខ ៦ វគ្គ ដែលអាចបង្កើនល្បឿនពី ០-១០០ គីឡូម៉ែត្រក្នុងមួយម៉ោងក្នុងរយៈពេលត្រឹមតែ ៣ វិនាទីជាមួយនឹងល្បឿនអតិបរមា ៣៣០ គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

ម្ចាស់រថយន្ត BMW នឹងទទួលបានការសាកថ្មដោយឥតគិតថ្លៃរយៈពេល ២ឆ្នាំ នៅទូទាំងសហរដ្ឋអាមេរិក

February 7, 2022

[ទីផ្សារបរទេស] ក្រុមហ៊ុនផលិតរថយន្ត BMW បានធ្វើការប្រកាសថា រថយន្តអគ្គិសនី iX និង i4 ដែលនឹងមកដល់សហរដ្ឋអាមេរិកក្នុងខែមិនា ខាងមុខនេះ នឹងផ្តល់ជូនជាមួយការសាកថ្មឥតគិតថ្លៃរយៈពេល ៣០ នាទី ក្នុងពេល ២ ឆ្នាំ គ្រប់ទីតាំង Electrify America នៅទូទាំងប្រទេស។ ខណៈ កិច្ចព្រមព្រៀងនេះមិនបានបន្ថែមលើតម្លៃដើមរបស់តម្លៃរថយន្តឡើយ។ ដោយអតិថិជននឹងអាចចូលប្រើឆ្នាំងសាក Electrify America ច្រើនជាង ៣,០០០ ស្ថានីយ៍។

លោក Sebastian Mackensen ប្រធាន និង CEO ក្រុមហ៊ុន BMW នៃអាមេរិកខាងជើងបាននិយាយថា “កិច្ចសហការជាមួយ Electrify America គឺជាជំហានមួយបន្ថែមទៀតនៅលើផ្លូវរបស់យើងឆ្ពោះទៅរកអនាគតប្រកបដោយនិរន្តរភាព។ ភាពអាចរកបាននៃការសាកថ្មគឺជាលក្ខណៈសំខាន់នៅពេលនិយាយអំពីរថយន្តអគ្គិសនី។ យើងមានសេចក្តីរំភើបរីករាយក្នុងការផ្តល់ជូនអតិថិជនរបស់យើងនូវការបញ្ចូលថាមពលថ្មដែលមានល្បឿនលឿន តម្លៃសមរម្យ និងងាយស្រួល នៅពេលយើងដាក់លក់រថយន្តអគ្គិសនីទាំងអស់ពី BMW ជំនាន់ក្រោយ”។

ចំពោះ ក្រុមហ៊ុន Electrify America ដំណើរការបណ្តាញឆ្នាំងសាកលឿនដ៏ធំបំផុតរបស់អាមេរិក ដែលមានសមត្ថភាពផ្តល់ថាមពលពី ១៥០ គីឡូវ៉ាត់ ទៅ ៣៥០ គីឡូវ៉ាត់ ។ ក្នុងនោះម៉ូដែល iX អាចបើកបរបានចម្ងាយ ១៤៤ គីឡូម៉ែត្រ ក្នុងរយះពេល ១០នាទី នៃការសាកថ្ម ខណៈពេលដែល ម៉ូដែល i4 អាចរត់បានចម្ងាយ ១៧៤ គីឡូម៉ែត្រ ក្នុងរយះពេលដូចគ្នាផងដែរ។

ជាមួយគ្នានេះ ម្ចាស់រថយន្តនឹងអាចស្វែងរកស្ថានីយ៍សាកថ្មដែលនៅជិតបំផុត ឬងាយស្រួលបំផុតរបស់ពួកគេដោយប្រើកម្មវិធី myBMWapp ឬ Electrify America ។ ក្នុងនោះ កម្មវិធីក៏នឹងអនុញ្ញាតឲ្យអ្នកបើកបរកំណត់ឆ្នាំងសាក និងទទួលបានការណែនាំអំពីរបៀបទៅការសាកថ្មផងដែរ។

ទន្ធឹមនឹងនេះ លោក Giovanni Palazzo ប្រធាន និងជានាយកប្រតិបត្តិនៃ Electrify America បាននិយាយថា “នេះគឺជាពេលវេលាដ៏គួរឱ្យរំភើបមួយ ខណៈដែលអ្នកបើកបរកាន់តែច្រើនកំពុងងាកទៅរក e-mobility សម្រាប់តម្រូវការដឹកជញ្ជូនរបស់ពួកគេក្នុងការធ្វើដំណើរជុំវិញទីក្រុង និងទូទាំងប្រទេស” ៕

ផ្ទាំងផ្សាយពាណិជ្ជកម្ម

Honda Beat ស៊េរីឆ្នាំ ២០២២ បង្ហាញខ្លួនផ្លូវការលើទីផ្សារប្រទេសឥណ្ឌូនេស៊ី

February 7, 2022

[ទីផ្សារបរទេស] ថ្មីៗនេះក្រុមហ៊ុន Honda បានដាក់បង្ហាញជាផ្លូវការនូវម៉ូតូម៉ូឌែល Beat ស៊េរីឆ្នាំ ២០២២ ប្រភេទ Scooter សម្រាប់ទីផ្សារនៅក្នុងប្រទេសឥណ្ឌូនេស៊ី។

សម្រាប់ម៉ូតូ Honda Beat ទទួលបានការឌីហ្សាញដោយប្រើប្រាស់តួខ្លួន eSAF ថ្មី, ចង្កៀងមុខ LED, កុងទ័រប្រភេទឌីជីថល, រន្ធសាកថ្មទូរស័ព្ទនៅក្រោមកៅអី និងប្រព័ន្ធសោរតេលេបញ្ជាផងដែរ។

បន្ថែមពីនេះវាមានប្រព័ន្ធហ្វាំ្រង CBS ដែលរក្សាតុល្យភាពកម្លាំងហ្វ្រាំងរវាងកង់ខាងមុខ-ក្រោយ, ប្រព័ន្ធ ACG Starter សម្រាប់ការបញ្ឆេះម៉ាស៊ីនអោយកាន់តែរលូនជាងមុន, ប្រព័ន្ធ ISS សម្រាប់ពន្លុត និងបញ្ឆេះម៉ាស៊ីន ដើម្បីជួយសន្សំសំចៃប្រេង។

ម៉ូតូ Honda Beat បានបំពាក់នូវម៉ាស៊ីន ១ ស៊ីឡាំង SOHC 4 stroke ជាមួយប្រព័ន្ធស្អំប្រេង Air-cooled ចំណុះ ១១០ សេសេ ផលិតកម្លាំង ៩សេះ និងកម្លាំងរមួល ៩.៣ញ៉ូតុនម៉ែត្រ និងភ្ជាប់ជាមួយប្រអប់លេខអូតូ CVT ។ ដោយទ្បែកចំពោះកម្រិតនៃការប្រើប្រាស់សាំងក្នង ១លីត្រ អាចធ្វើដំណើរបានចម្ងាយ ៦០ គីទ្បូម៉ែត្រ ។

សូមបញ្ជាក់ថា Honda Beat ស៊េរីឆ្នាំ២០២២ មានជម្រើស ៤ពណ៍ ដូចជា៖ លឿង ក្រហម ខៀវ និងខ្មៅ សម្រាប់ទីផ្សារនៅក្នុងប្រទេសឥណ្ឌូនេស៊ីន៕

ផ្ទាំងផ្សាយពាណិជ្ជកម្ម

ញាក់សាច់! ឡាន McLaren Elva នេះ មានតែ ២គ្រឿងប៉ុណ្ណោះ ក្នុងប្រទេសថៃ ជាមួយតម្លៃខ្ទង់ ៦លានដុល្លារ

February 7, 2022

[ទីផ្សារបរទេស] ក្រុមហ៊ុនផលិតរថយន្ត McLaren បានធ្វើការដាក់បញ្ចេញនៅរថយន្តម៉ាក McLaren Elva ស៊េរីថ្មី ដែលត្រូវបានបង្ហាញខ្លួនជាលើកដំបូងលើពិភពលោកក្នុងឆ្នាំ ២០១៩ ជាស៊េរី Ultimate Series នៃរថយន្ត hypercar មានតែ ១៤៩ គ្រឿងប៉ុណ្ណោះដែលត្រូវបានផលិតទូទាំងពិភពលោក ដោយប្រទេសថៃទទួលបានសរុបចំនួន ២ គ្រឿង ដែលមានតម្លៃ ៦ ០៧០ ៥៤០ ដុល្លារ។

សម្រាប់រថយន្ត McLaren Elva ត្រូវបានគេបង្កើតឡើងជារថយន្តស្រាលបំផុតដែល McLaren មិនធ្លាប់មាន។ សម្រាប់ក្នុងការកាប៊ីនវិញបំពាក់ជាមួយកៅអីស្ព័រចំនួន២ និងត្រូវបានរចនាឡើងដោយប្រើប្រាស់កាបូនសរសៃទម្ងន់ស្រាល។ កៅអីត្រូវបានរចនាឡើងឲ្យខ្លីជាងធម្មតាបន្តិច ដើម្បីផ្តល់កន្លែងដាក់ជើងគ្រប់គ្រាន់សម្រាប់ងាយស្រួលចេញ និងចូល។ អតិថិជនអាចជ្រើសរើសពណ៌ និងជម្រើសកៅអី និងខ្សែក្រវ៉ាត់សុវត្ថិភាព ៦ចំណុចសម្រាប់ប្រើប្រាស់ក្នុងទីលានប្រណាំងផងដែរ។

ក្នុងនោះ រថយន្ត McLaren Elva ក៏ផ្តល់នៅប្រព័ន្ធ Adaptive Dynamic Controls ដែលអាចកែតម្រូវការគ្រប់គ្រង និងថាមពលរបស់រថយន្តជាបីរបៀប Comfort, Sport និង Track អាស្រ័យលើរចនាប័ទ្មនៃស្ថានភាពការបើកបរជាក់ស្តែង។ ម៉ូដែលនេះក៏រួមបញ្ចូលជាមួយប្រព័ន្ធ 3-level Electronic Stability Control (ESC) ប្រព័ន្ធគ្រប់គ្រងស្ថេរភាព និង Variable Drift Control (VDC) ផងដែរ។ ទន្ទឹមនឹងនេះ McLaren Elva ក៏មានបំពាក់នៅប្រព័ន្ធ Active Air Management system ជាលើកដំបូង និងប្រព័ន្ធ active air brake system ដើម្បីជួយបង្កើនប្រសិទ្ធភាពកាត់បន្ថយល្បឿនផងដែរ។

ចូលទៅកាន់ផ្នែកម៉ាស៊ីនវិញរថយន្តនេះបំពាក់ជាមួយម៉ាស៊ីនចំណុះ ៤,០ លីត្រ ទំហំ ៨ស៊ីឡាំង ផលិតកម្លាំងបាន ៨១៥ សេះ និងកម្លាំងរមួល ៨០០ ញ៉ូតុនម៉ែត្រ ភ្ជាប់មកជាមួយប្រអប់លេខអូតូ ៧វគ្គ ប្រភេទ dual-clutch ដែលអាចបង្កើនល្បឿនពី ០-១០០ គីឡូម៉ែត្រ/ម៉ោង ត្រឹមតែ ២,៨ វិនាទី បន្តឈានដល់ ២០០ គីឡូម៉ែត្រ/ម៉ោង ត្រឹមតែរយៈពេល ៦,៨ វិនាទី និងល្បឿនអតិបរមា ៣២៦ គីឡូម៉ែត្រ/ម៉ោង។ ចំពោះកម្រិតស៊ីប្រេងជាមធ្យមរបស់រថយន្តនេះគឺ ១១,៩ លីត្រ/១០០ គីឡូម៉ែត្រ ឬប្រហែល ៨,៤ គីឡូម៉ែត្រ/លីត្រ យោងតាមស្តង់ដារធ្វើតេស្ត WLTP របស់អឺរ៉ុប៕

ផ្ទាំងផ្សាយពាណិជ្ជកម្ម

ជីវិតឡាន Malibu កាន់តែខើច ខណៈ Chevrolet លែងទទួលការកុម្ម៉ង់

February 7, 2022

[ទីផ្សារបរទេស] ក្នុងមួយរយៈពេលចុងក្រោយនេះ ក្រុមហ៊ុន General Motors បានបញ្ចប់ជីវិតរថយន្តរបស់ខ្លួនជាច្រើន រួមទាំង Buick Regal, Buick LaCrosse, Cadillac CT6 និង Cadillac XTS ព្រមទាំងរថយន្ត Chevrolet មួយចំនួនទៀត ដូចជា Cruze, Impala, Sonic និង Volt ផងដែរ។

ជាមួយគ្នានេះ រថយន្ត Chevrolet Spark ក៏នឹងត្រូវអស់ជីវិត ខណៈម៉ូដែល Malibu ក៏ទំនងដូច្នោះដែរ បន្ទាប់ពីក្រុមហ៊ុន Chevrolet បានឈប់ទទួលយកការបញ្ជាទិញសម្រាប់រថយន្ត Malibu ឆ្នាំ ២០២២។

អ្នកនាំពាក្យរបស់ក្រុមហ៊ុន Chevrolet លោក Kevin Kelly បានប្រាប់ទៅកាន់គេហទំព័រ CarsDirect ថា “ក្រុមហ៊ុនលែងទទួលការបញ្ជាទិញសម្រាប់ Malibu ទៀតហើយ ដោយសារតែយើងបានទទួលការបញ្ជាទិញគ្រប់គ្រាន់ ដើម្បីបំពេញឆ្នាំ២០២២ ហើយ”។

ថ្វីបើមានការអះអាងបែបនេះមែន ប៉ុន្តែវាអាចជាសញ្ញាដ៏អាក្រក់មួយ ព្រោះថាពេលនេះទើបតែខែកុម្ភៈប៉ុណ្ណោះ ស្របពេលដែលការលក់របស់ Malibu បានធ្លាក់ចុះយ៉ាងខ្លាំង ដូច្នេះវាមិនមែនជារឿងគួរឲ្យភ្ញាក់ផ្អើលនោះទេដែលក្រុមហ៊ុនមិនចង់ផលិតពួកគេច្រើនពេក។

យ៉ាងណាមិញ បើគិតជាតួលេខ ការលក់របស់ Malibu បានធ្លាក់ចុះជារៀងរាល់ឆ្នាំចាប់តាំងពីឆ្នាំ ២០១៦ ដោយពេលនោះក្រុមហ៊ុនលក់វាបានចំនួន ២២៧ ៨៨១ គ្រឿងឯណោះ នៅក្នុងសហរដ្ឋអាមេរិក។ ខណៈពេលដែលការលក់របស់វាបានថយចុះបន្តិចម្ដងៗ ចំនួនលក់នៃរថយន្ត Malibu បានធ្លាក់ចុះមកត្រឹម ៣៩ ៣៧៦ គ្រឿងប៉ុណ្ណោះក្នុងឆ្នាំ ២០២១៕

ប្រភព ៖ carscoops