ឥណ្ឌូណេស៊ីអាចនឹងលក់តែរថយន្តអគ្គិសនី ចាប់ពីឆ្នាំ ២០៥០

June 15, 2021

ប្រទេសនៅក្នុងតំបន់អាស៊ីអាគ្នេយ៍មួយនេះ មានគោលបំណងលក់ម៉ូតូអគ្គិសនីចាប់ពីឆ្នាំ ២០៤០ ហើយចាប់ពីឆ្នាំ ២០៥០ លក់តែឡានអគ្គិសនីប៉ុណ្ណោះ។

គោលដៅច្បាស់លាស់ត្រូវបានប្រកាសនៅថ្ងៃនេះដោយរដ្ឋមន្រ្តីថាមពល Arifin Tasrif ខណៈប្រទេសឥណ្ឌូនេស៊ីខិតខំកាត់បន្ថយការបញ្ចេញកាបូន។ ក្នុងរយៈពេលមួយទសវត្សរ៍កន្លងមកនេះ ប្រទេសដែលមានចំនួនប្រជាជនច្រើនជាងគេទីបួននៅលើពិភពលោកដែលមានប្រជាជនចំនួន ២៧០ លាននាក់ លក់ម៉ូតូជាមធ្យមចំនួន ៦,៥ លានគ្រឿង និងមានរថយន្តប្រហែល ១លានគ្រឿងក្នុងមួយឆ្នាំ។ យោងតាមទិន្នន័យពីសមាគមឧស្សាហកម្មរថយន្តឥណ្ឌូនេស៊ីបានឱ្យដឹងថា ប្រទេសឥណ្ឌូណេស៊ីមានរថយន្តជាង ១៥ លានគ្រឿងនិងម៉ូតូចំនួន ១១២ លានគ្រឿងនៅក្នុងឆ្នាំ ២០១៩ ។

ទីក្រុង Jakarta ដែលជារដ្ឋធានីនៃប្រទេសឥណ្ឌូនេស៊ីស្ថិតក្នុងចំណោមទីក្រុងនានានៅអាស៊ីអាគ្នេយ៍ដែលមានកំរិតខ្ពស់បំផុតនៃការបំពុលបរិយាកាសនៅក្នុងពិភពលោក នេះបើយោងតាម Air Visual ដែលជាស្ថាប័នវាស់ស្ទង់សន្ទស្សន៍គុណភាពខ្យល់ (AQI) ។ បន្ថែមពីនេះ ការផ្លាស់ប្តូរប្រើប្រាស់រថយន្តអគ្គិសនីក៏បានគាំទ្រដល់ផែនការរបស់រដ្ឋាភិបាលឥណ្ឌូណេស៊ី ដើម្បីក្លាយជាមជ្ឈមណ្ឌលផលិតកម្មពិភពលោក ក៏ដូចជាបង្កើនទិន្នផលនីកែល សម្រាប់ការផលិតអាគុយលីចូម៕

ផ្ទាំងផ្សាយពាណិជ្ជកម្ម

ទើបចេញអា ២០២២ តែរថយន្ត Land Cruiser ឆ្នាំ១៩៩៤ លក់បានតម្លៃជាង ១៣ម៉ឺនដុល្លារ

June 14, 2021

រថយន្ត Land Cruiser ត្រូវបានគេអោយឈ្មោះថាជារថយន្តកំពូលអ្នកប្រយុទ្ធ ដោយសារតែអាចជំនៈគ្រប់ឧបសគ្គផ្លូវ និងមានភាពជាប់ធន់បំផុត។ បន្ទាប់ពីបញ្ចេញនូវម៉ូដែលឆ្នាំថ្មី ២០២២ រួចមក នៅលើគេហទំព័រលក់ដេញថ្លៃមួយ រថយន្ត Land Cruiser ដែលមានអាយុកាល ២៧ឆ្នាំ ត្រូវបានគេទិញយកក្នុងតម្លៃ ១៣៦ ០០០ដុល្លារសហរដ្ឋអាមេរិច។

រថយន្តនេះ ត្រូវបានរក្សាទុក (Car Collections) ជាមួយម្ចាស់ដើម អស់រយៈពេលជិត២៦ឆ្នាំ បន្ទាប់មកឆ្នាំ២០២០ ក៏ផ្លាស់មកម្ចាស់ទី២ និងក្រោយមកទៀត រហូតមកដល់ពេលនេះ ត្រូវបានគេទិញយកក្លាយជាម្ចាស់ទី៤ របស់រថយន្តមួយនេះ។ ទោះបីជាមានអាយុកាល ២៧ឆ្នាំក៏ពិតមែន ប៉ុន្តែរថយន្តនេះនៅតែរក្សាសៀវភៅណែនាំច្បាប់ដើម របាយការណ៌ជុសជួល ( Carfax report) និងឯកសារចុះបញ្ជើរយានយន្ត។ គ្រឿងបង្គុំខ្ចៅខ្យងរបស់ឡាន ហាក់នៅមានសភាពថ្មី និងដំណើរការល្អ ដូចជាមុខងារបិទបើកប៉ុងមុខក្រោយ មុខងារបញ្ជារដំបូលបើកខាងលើដោយថាមពលអេឡិចត្រូនិច កាងលំអរខាងក្រោយ ធ្នើរដាក់អីវ៉ាន់ខាងលើដំបូល អង់តែនវិទ្យុ កញ្ចក់បង្អូចក្រោយអាចទាញបិទបើកបាន និងម៉ាស៊ីនត្រជាក់។

ពេលបើកគម្របម៉ាស៊ីនភ្លាម យើងនឹងបានឃើញម៉ាស៊ីន ៤,៥លីត្រ ស៊ីឡាំង ៦ ប្រភេទ Inline ថាមពលកម្លាំង ២១២សេះ កម្លាំងរមួល ៣៧៣ញ៉ូតុនម៉ែត្រ ប្រភេទប៉ុង២ ប្រអប់លេខ ៤វគ្គ ស្វ័យប្រវត្តិ។ រថយន្តនេះមានប្រវត្តិថែទាំចុងក្រោយក្នុងខែ តុលា ឆ្នំា២០២០ ដោយបានផ្លាស់ប្តូរខ្សែក្រវ៉ាត់ អាគុយ និងប្រេងម៉ាស៊ីនផងដែរ។ សំណួរសួរថា ប្រសិនបើអ្នកមានលុយជាង ១៣ម៉ឺន តើអ្នកនឹងទិញរថយន្តថ្មី G-Class ឬ Land Cruiser ឆ្នាំ១៩៩៤? បងប្អូនអាចបញ្ចេញមតិនៅខាងក្រោមបាន។

ផ្ទាំងផ្សាយពាណិជ្ជកម្ម

Subaru Forester ឆ្នាំ២០២២ បង្ហាញមុខមាត់ថ្មី រឹតតែកាច

June 14, 2021

ក្រុមហ៊ុន Subaru បានប្រកាសចេញរថយន្ត SUV ម៉ូដែល Forester ស៊េរីឆ្នាំ២០២២ ជាផ្លូវការ ដែលទទួលបានការអាប់ដេតមុខមាត់ថ្មីផងដែរ។

Subaru Forester ឆ្នាំ២០២២ មានបំពាក់ចង្កៀងមុខ និងប៉ាណាមុខថ្មី ព្រមទាំងយ៉ាន់កង់ថ្មីផងដែរ មើលទៅរឹតតែកាច និងទាក់ទាញ។ សម្រាប់ទីផ្សារប្រទេសជប៉ុន រថយន្ត Forester នឹងផ្តល់ជម្រើសពណ៌ថ្មី ដូចជា Cascade Green Silica, Autumn Green Metallic និង Brilliant Bronze Metallic ទៀតផង។

Subaru អះអាងថា Forester ក៏បានអាប់ដេតលើប្រព័ន្ធជើងក្រោមដែរ ដោយជួយឲ្យវាកាន់តែប្រសើរសម្រាប់ការបើកបរ និងកម្រិតផាសុកភាព។ មិនតែប៉ុណ្ណោះបច្ចេកវិទ្យា EyeSight ជំនាន់ថ្មី ក៏ត្រូវបានអាប់ដេតឲ្យប្រសើរជាងមុនទៀតផង។

សម្រាប់ទីផ្សារប្រទេសជប៉ុន Forester ប្រើម៉ាស៊ីនចំណុះ ២,០លីត្រ ប្រភេទ e-Boxer ដោយមានជំនួយពីម៉ូទ័រអគ្គិសនី និងមុខងារ E-Active Shift Control ព្រមទាំងម៉ាស៊ីនចំណុះ ១,៨លីត្រ turbocharged ទំហំ ៤ស៊ីឡាំងផងដែរ។ ដោយឡែក សម្រាប់ទីផ្សារសហរដ្ឋអាមេរិកវិញ នឹងនៅតែបន្តប្រើម៉ាស៊ីនចំណុះ ២,៥លីត្រ ទំហំ ៤ស៊ីឡាំង មានកម្លាំង ១៨២សេះ ដដែល។

រថយន្ត Subaru Forester នឹងចេញលក់នៅខែសីហា ឆ្នាំ២០២១ នៅក្នុងប្រទេសជប៉ុន ខណៈតម្លៃរបស់វានឹងត្រូវប្រកាសនៅពេលក្រោយ៕

ផ្ទាំងផ្សាយពាណិជ្ជកម្ម

BMW X3 M និង X4 M ឆ្នាំ២០២២ កាន់តែខ្លាំង និងរហ័សជាងមុន

June 14, 2021

ក្រុមហ៊ុន BMW បានប្រកាសចេញរថយន្ត X3 M និង X4 M ស៊េរីឆ្នាំ២០២២ ជាផ្លូវការ ដោយទទួលបានការអាប់ដេតមួយចំនួន ដែលជួយឲ្យវាកាន់តែខ្លាំង និងរហ័សជាងមុន។

រថយន្ត BMW X3 M និង X4 M បំពាក់ម៉ាស៊ីនចំណុះ ៣,០លីត្រ twin-turbocharged ទំហំ ៦ស៊ីឡាំង មានកម្លាំង ៤៧៣សេះសម្រាប់ម៉ូដែលស្តង់ដារ និង ៥០៣សេះ សម្រាប់ម៉ូដែល Competition។

ក្រុមហ៊ុន BMW អះអាងថា X3 M និង X4 M អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៩វិនាទីប៉ុណ្ណោះ ខណៈពីមុនគឺ ៤,១វិនាទី សម្រាប់ម៉ូដែលស្តង់ដារ និង ៣,៧វិនាទី សម្រាប់ម៉ូដែល Competition ដែលពីមុនគឺ ៤,០វិនាទី។

ដោយឡែកចំពោះល្បឿនអតិបរមារបស់វាវិញ គឺត្រូវកំណត់ត្រឹម ២៥០គីឡូម៉ែត្រក្នុងមួយម៉ោង និងឡើងដល់ ២៨៥គីឡូម៉ែត្រក្នុងមួយម៉ោង បើមានកញ្ចប់ Option “M Driver’s Package”។ ក្រៅពីនោះគឺវានៅបន្តប្រើប្រព័ន្ធប៉ុងពីរ និងប្រអប់លេខអូតូ ៨វគ្គ ប្រភេទ ZF ដដែល។

សូមបញ្ជាក់ថា រថយន្ត BMW X3 M និង X4 M ឆ្នាំ២០២២ នឹងមានតម្លៃចាប់ពី ៦៩ ៩០០ដុល្លារ និង ៧៣ ៤០០ដុល្លារ ហើយនឹងចេញលក់នៅលើទីផ្សារសហរដ្ឋអាមេរិក ក្នុងខែកញ្ញាខាងមុខនេះតែម្តង៕

ផ្ទាំងផ្សាយពាណិជ្ជកម្ម

Lamborghini ជោគជ័យខ្លាំងសម្បើមក្រោយឆ្លងកាត់វិបត្តិកូវីដ

June 14, 2021

Lamborghini កំពុងតែទទួលបានជោគជ័យខ្លាំងក្នុងអាជីវកម្មរបស់ខ្លួន ដោយទទួលបានកំណើននៃការលក់ ក៏ដូចជាតម្រូវការខ្ពស់លើរថយន្តរបស់ខ្លួន ក្រោយពីបានឆ្លងកាត់វិបត្តិកូវីដ១៩កាលពីឆ្នាំ២០២០រួចមមក។

លោក Stephan Winkelmann បាននិយាយថា គិតត្រឹមពាក់កណ្ដាលឆ្នាំនេះក្រុមហ៊ុនបានលក់រថយន្តស្មើនឹងទំហំផលិតប្រមាណ ១០ខែរបស់ខ្លួន និងបានបញ្ជាក់ថាការលក់មានកំណើនជិត ២៥% នៅក្នុងត្រីមាសទីមួយនៃឆ្នាំ២០២១នេះផងដែរ។

គួរដឹងថា Lamborghini បានប្ដេជ្ញាថានឹងចំណាយទឹកប្រាក់ប្រមាណ ១,៨ពាន់លានដុល្លារ ដើម្បីផ្ដល់ជូននូវជម្រើស PHEV សម្រាប់រថយន្តគ្រប់ម៉ូដែលរបស់ខ្លួននៅត្រឹមឆ្នាំ ២០២៤។ ក្រុមហ៊ុនក៏មានបំណងបញ្ចេញលក់រថយន្តអគ្គិសនីសុទ្ធដំបូងរបស់ខ្លួននៅអំឡុងទសវត្សឆ្នាំ ២០៣០នេះផងដែរ៕

ផ្ទាំងផ្សាយពាណិជ្ជកម្ម

ម៉ូឌែលពិសេសថ្មីនៃ Mitsubishi Xpander លេងខ្លួនខ្មៅក្រិប ចេញលក់ក្នុងប្រទេសឥណ្ឌូនេស៊ី

June 14, 2021

ក្រុមហ៊ុន Mitsubishi Motors ឥណ្ឌូនេស៊ី បានធ្វើការប្រកាសចេញនូវម៉ូឌែលពិសេសថ្មីនៃត្រកូលរថយន្ត Xpander និង Xpander Cross ដែលមានឈ្មោះថា Rockford Fosgate Blaxk Edition(RFBE) ។

សម្រាប់ម៉ូឌែលពិសេសថ្មីនេះ បានលេងខ្លួនជាមួយពណ៌ខ្មៅកាន់តែស្ព័រជាងមុន លើប៉ាណាខាងមុខ, ស៊ុមកញ្ចក់សងខាង, របាំងការពារខាងក្រោម, ថាសកង់ទំហំ ១៦អ៊ីញ និងតែមឡូហ្គូ Black Edition នៅខាងក្រោយ។

រីឯផ្នែកខាងក្នុង កៅអីរបស់រថយន្ត Xpander Cross RFBE បានធ្វើការផ្លាស់ប្តូរពណ៌ថ្មីជាពីរពណ៌ និងកាន់ប្រណិតជាងមុន ចំណែក Xpander RFBE បានប្រើប្រាស់ជាមួយពណ៌ខ្មៅ បន្ថែមជាមួយការអាប់ដេតលើប្រព័ន្ធតន្រ្តី ដោយបានបំពាក់ជាឧបករណ៍បំពងសម្លេងចំនួន ៦គ្រាប់ និង Subwoofer ភ្ជាប់ទៅនឹងអេក្រង់កម្សាន្ត Touchscreen ទំហំ ៧អ៊ីញ ដែលអាចភ្ជាប់ជាមួយទូរស័ព្ទបានផងដែរ។

រថយន្ត Xpander RFBE បំពាក់ជាមួយម៉ាស៊ីនចំណុះ ១,៥លីត្រ ទំហំ ៤ស៊ីឡាំង មានកម្លាំង ១០៣សេះ ភ្ជាប់ជាមួយប្រអប់លេខ ៤វគ្គ ឬ ៥វគ្គអូតូ។ សម្រាប់ម៉ូឌែលពិសេស Xpander Cross RFBE មានតម្លៃចាប់ពី ២២ ៦១៣ដុល្លារ និងមានតម្លៃចាប់ពី ១៩ ២៥៦ដុល្លារ សម្រាប់ Xpander RFBE៕

ផ្ទាំងផ្សាយពាណិជ្ជកម្ម

ក្រុមហ៊ុនបច្ចេកវិទ្យាយក្សរបស់ចិន Huawei គ្រោងបញ្ចេញរថយន្តបើកបរដោយខ្លួនឯងនៅឆ្នាំ ២០២៥

June 13, 2021

ក្រុមហ៊ុនបច្ចេកវិទ្យាយក្សរបស់ចិន Huawei បានធ្វើការបញ្ជាក់ថាក្រុមហ៊ុនរបស់ខ្លួនគ្រោងបញ្ចេញរថយន្តបើកបរដោយខ្លួនឯងនៅឆ្នាំ ២០២៥។

បើទោះបីបច្ចុប្បន្ន ពុំទាន់លក់រថយន្តរបស់ខ្លួនឯងដោយផ្ទាល់ ប៉ុន្តែក្រុមហ៊ុនមួយនេះបានចូលរួមសហការក្នុងការអភិវឌ្ឃបច្ចេកវិទ្យា ជាមួយក្រុមហ៊ុនរថយន្តចិនផ្សេងជាច្រើន ក្នុងការផ្គត់ផ្គង់ប្រព័ន្ធបច្ចេកវិទ្យាឆ្លាតវៃផ្សេងៗ។

នាយកប្រតិបត្តិក្រុមហ៊ុន Huawei លោក Wang Jun បាននិយាយកាលពីដើមសប្តាហ៍កន្លងទៅថា ក្រុមហ៊ុនរបស់ខ្លួនគ្រោងនឹងបញ្ចេញនូវរថយន្តបើកបរដោយខ្លួនឯង (Self-Driving Car) នៅឆ្នាំ ២០២៥ ឬ នៅ ៤ឆ្នាំទៀត។

ក្រុមហ៊ុន Huawei ជឿជាក់ថា ការវិនិយោគនៅក្នុងវិស័យរថយន្ត អាចជួយអោយក្រុមហ៊ុនខ្លួនរស់នៅក្នុងគោលជំហរបស់ខ្លួនផ្ទាល់ បន្ទាប់ពីសហរដ្ឋអាចបានហាមឃាត់ក្រុមហ៊ុនខ្លួនកាលពីឆ្នាំ ២០១៩កន្លងទៅ។ ហើយក៏បានត្រៀមរួចជាស្រេចក្នុងការផ្តល់នូវបច្ចេកវិទ្យាឆ្លាតវៃ ក្រោមការផលិតនូវប្រព័ន្ធប្រតិបត្តិការ Harmony OS៕

ផ្ទាំងផ្សាយពាណិជ្ជកម្ម

ក្នុងពេលបង្ហាញ NX ស៊េរីថ្មី Lexus លួចបញ្ចេញរូបរាង និងដំណឹងរបស់ LX 2022 ដែរ (មានវីដេអូ)

June 13, 2021

បងប្អូនយើងប្រហែលជាបានឃើញរូបភាពនៃរូបរាង និងជាពិសេសគឺបច្ចេកវិទ្យាចុងក្រោយរបស់ក្រុមហ៊ុនផលិតរថយន្តប្រណិត Lexus ដែលបានបង្ហាញជាផ្លូវការនៃរថយន្តស៊េរីថ្មីរបស់ខ្លួនគឺ Lexus NX ២០២២។ រថយន្ត Lexus NX ឆ្នាំ ២០២២ ថ្មីនេះ ត្រូវបានរចនាឡើងដោយប្រើប្រាស់គ្រោងឆ្អឹង TNGA-K ដែលជួយអោយរថយន្តនេះមានទម្ងន់ស្រាលជាងមុនរហូតដល់ទៅ ៩១គីឡូក្រាម ជាមួយជម្រើសម៉ាស៊ីន ៤ប្រភេទគឺ៖

NX 250 ម៉ាស៊ីន ២,៥លីត្រ កម្លាំង ២០៣សេះ
NX 350 ម៉ាស៊ីន ២,៤លីត្រ Turbo កម្លាំង ២៧៥សេះ
NX 350h ម៉ាស៊ីន ២,៥លីត្រ (Hybrid) ផ្គួបជាមួយម៉ូទ័រអគ្គិសនីចំនួនមួយ កម្លាំង ២៣៩សេះ
NX 450h+ ម៉ាស៊ីន ២,៥លីត្រ (PHEV) អាចរត់ល្បឿន ០-៩៦ គ.ម/ម៉ ចំណាយពេលត្រឹមតែ ៦វិនាទេប៉ុណ្ណោះ។

រថយន្ត NX ទាំងអស់នឹងភ្ជាប់ដោយបច្ចេកវិទ្យាទំនើបចុងក្រោយកំរឹត ៣ ដែលមានឈ្មោះថា Lexus Safety System+ 3.0 ផងដែរ។

សម្រាប់ព័ត៌មានលម្អិតពីរថយន្ត NX ស៊េរីថ្មីនេះ បងប្អូនអាចចូលអានបន្ថែម ដោយចុចទីនេះ!

គួរអោយកត់សម្គាល់ផងដែរថា កាលពីថ្មីៗនេះក្រុមហ៊ុនតូយ៉ូតា ដែលជាក្រុមហ៊ុនបងប្អូនជាមួយ Lexus ក៏ទើបតែបញ្ចេញកំពូលរថយន្តលក្ខណៈគ្រួសារខ្នាតធំរបស់ខ្លួនផងដែរ គឺរថយន្ត LC300 ឆ្នាំ២០២២។ បងប្អូនក៏អាចចូលអានបន្ថែមដោយ ចុចទីនេះ!

បកមករឿងយើងវិញម្តង នៅក្នុងការបង្ហាញរូបរាងនៃរថយន្ត NX ស៊េរីថ្មី នៅក្នុងសន្និសិទ្ធសារព័ត៌មានតាមរយៈអនឡាញ នៅនាទី ទី៧ ក៏បានបង្ហើប រួមជាមួយហ្នឹងរូបរាងរថយន្តរបស់ LX ដែលគ្របដោយក្រណាត់ផងដែរ។ សូមទស្សនាវីដេអូខាងក្រោម ស្តីពីសន្និសិទ្ធសារព័ត៌របស់ Lexus ដែលមាននៅខាងក្រោម៖

អ្វីមួយទៀតដែលយើងធ្លាប់បានចេញផ្សាយ រថយន្ត LX ជំនាន់ថ្មីនោះនឹងអាចប្រើប្រាស់ឈ្មោះ LX 600 ដោយសារតែក្រុមហ៊ុននេះបានធ្វើការចុះឈ្មោះនេះរួចរាល់តាំងពីឆ្នាំ២០១៩មកម្ល៉េះ និងគ្រោងបញ្ចេញនៅខែតុលា ឆ្នាំនេះតែម្តង។ និងមួយទៀតនោះគឺលែងមានម៉ាស៊ីន V8 ដែលអាចនឹងយកលំនាំតាមរថយន្ត LC300 ដែលទើបតែចេញថ្មីៗនេះជាផ្លូវការ ដោយក្រុមហ៊ុន Toyota បានផ្តល់នូវជម្រើសម៉ាស៊ីនចំនួន ២ជម្រើសគឺ ម៉ាស៊ីនម៉ាស៊ូត ៣,៣ លីត្រ ៦ស៊ីឡាំង Twin-Turbo កម្លាំង ៣០២សេះ កម្លាំងរមួល ៧០០ញ៉ូតុនម៉ែត្រ និងម៉ាស៊ីនសាំងថ្មីចំណុះ ៣,៥ លីត្រ ៦ស៊ីឡាំង Twin-Turbo កម្លាំង ៤០៩សេះ កម្លាំងរមួល ៦៥០ញ៉ូតុនម៉ែត្រ។ ដំណើការដោយប្រអប់លេខ ១០វគ្គអូតូ ដែលជួយអោយរថយន្តកាត់បន្ថយការបំភាយឧស្ម័នកាបូនិចចំនួន ១០ភាគរយ ប្រើប្រៀបធៀបទៅនឹង LC200 និងអាចស្ទុះពីល្បឿន ០-១០០គ.ម/ម៉ ប្រើពេល ៦,៧វិនាទី។ ហើយរថយន្ត LX ជំនាន់ថ្មីនេះ នឹងប្រើប្រាស់គ្រោងឆ្អឹងថ្មី TNGA-F។ តែទោះជាយ៉ាងណាយើងនឹងរង់ចាំការប្រកាសជាផ្លូវការផងដែរ។

ផ្ទាំងផ្សាយពាណិជ្ជកម្ម

Apple ហៅអតីតប្រធានក្រុមហ៊ុន BMW មកជួយលើគម្រោងផលិតឡាន

June 12, 2021

ក្រុមហ៊ុនបច្ចេកវិទ្យាយក្ស Apple បានជួលអតីតប្រធានក្រុមហ៊ុន BMW និងជាអតីតនាយកប្រតិបត្តិ និងជាសហស្ថាបនិកក្រុមហ៊ុន Canoo មកជួយធ្វើការលើគម្រោងការផលិតរថយន្តរបស់ខ្លួន។ នេះបើផ្អែកតាមការចុះផ្សាយរបស់ Bloomberg។

លោក Ulrich Kranz នឹងធ្វើការលើគម្រោងការផលិតរថយន្តរបស់ Apple ក្រោមការដឹកនាំរបស់លោក Doug Field ដែលជាអតីតប្រធានក្រុមហ៊ុន Tesla។ លោក Ulrich បានចាកចេញពីក្រុមហ៊ុន Canoo កាលពីខែមេសា ហើយប៉ុន្មានសប្ដាហ៍ក្រោយមកក៏ត្រូវ Apple ហៅមកចូលរួម។

ការងាររបស់លោក Ulrich ដែលត្រូវធ្វើនៅក្រុមហ៊ុន Apple នៅមិនទាន់មានភាពច្បាស់លាស់នៅឡើយទេ ប៉ុន្តែវាបានបង្ហាញយ៉ាងច្បាស់ថា Apple ពិតជាកំពុងអភិវឌ្ឍន៍រថយន្តអគ្គិសនីដំបូងរបស់ខ្លួនពិតមែន។

គួរដឹងថាលោក Ulrich ធ្លាប់បានចំណាយពេល ៣០ឆ្នាំនៅក្រុមហ៊ុន BMW និងបានដឹកនាំការអភិវឌ្ឍរថយន្តម៉ូដែល i3 និងរថយន្តម៉ូដែល i8 ផងដែរ។ លោកក៏ធ្លាប់បម្រើការងារនៅក្រុមហ៊ុន Faraday Future បានមួយរយៈផងដែរ៕

ផ្ទាំងផ្សាយពាណិជ្ជកម្ម

Dodge កំពុងសំងំអភិវឌ្ឍន៍ឡានអគ្គិសនីមហាកម្លាំង អាចខ្លាំងជាង Tesla Model S Plaid

June 12, 2021

បើផ្អែកតាមប្រភពផ្ទៃក្នុងដែលបានជួបនិយាយជាមួយសារព័ត៌មាន The Detroit Bureau បានឲ្យដឹងថានៅក្នុងមជ្ឈមណ្ឌលឌីហ្សាញរបស់ក្រុមហ៊ុន Dodge មានវត្តមានរថយន្តអគ្គិសនីយ៉ាងតិច៦ម៉ូដែល និងរថយន្ត PHEV មួយម៉ូដែលផងដែរ។

ដំណឹងទាក់ទងនឹងរថយន្តទាំងនេះនៅមានតិចតួចនៅឡើយ ប៉ុន្តែក្នុងចំណោមរថយន្តអគ្គិសនីទាំង៦ម៉ូដែល នឹងមានមួយម៉ូដែលជារថយន្តល្បឿនលឿនបំផុតរបស់ក្រុមហ៊ុន Dodge។ ប្រសិនបើដូចនេះមែនគឺវាអាចលឿនជាងរថយន្ត Challenger SRT Demon ដែលអាចស្ទុះពី ០ ដល់ ៩៦គ.ម/ម៉ ក្នុងពេលត្រឹម ២,៣វិនាទី និងអាចរត់បានចម្ងាយ ៤០២ម៉ែត្រ ប្រើពេលត្រឹម ៩,៦៥វិនាទី។

រថយន្ត Challenger SRT Demon ធ្លាប់ជារថយន្តដែលស្ទុះលឿនជាងគេបំផុតក្នុងលោក ប៉ុន្តែរថយន្ត Tesla Model S Plaid ដែលប្រកាសចេញកាលពីថ្មីៗនេះដណ្ដើមបានតំណែងស្ទុះលឿនជាងគេនេះ ដោយអាចស្ទុះពី ០ ដល់ ៩៦គ.ម/ម៉ ក្នុងពេលត្រឹម ១,៩៩វិនាទី និងរត់បានចម្ងាយ ៤០២ម៉ែត្រ ប្រើពេលតែ ៩,២៣វិនាទី។

សារព័ត៌មាន The Detroit Bureau បានសន្និដ្ឋានថា Dodge ទំនងជាដណ្ដើមយកតំណែងនេះយកមកវិញជាមួយរថយន្តអគ្គិសនីរបស់ខ្លួន ប៉ុន្តែមិនទាន់មានដំណឹងអ្វីជាផ្លូវការនៅឡើយទេ៕

ផ្ទាំងផ្សាយពាណិជ្ជកម្ម