ឡានលក់ដាច់លឿនបំផុតនៅអាមេរិក សឹងតែជា SUV ទាំងអស់

August 29, 2020

ការសិក្សាថ្មីមួយបានបង្ហាញឲ្យឃើញពីល្បឿននៃការលក់រថយន្ត នៅលើទីផ្សារសហរដ្ឋអាមេរិក ក្នុងអំឡុងពេលកូវីដ១៩ ដោយក្នុងនោះ រថយន្ត SUV វ៉ារដាច់ប្រភេទរថយន្តផ្សេងៗដាច់តែម្តង។

រយៈការវិភាគលើរថយន្តលក់ដាច់ចំនួន ៤,៤លានគ្រឿង ទាំងថ្មី និងមួយទឹក ចាប់ពីខែមិនា ដល់មិថុនា ឆ្នាំ២០២០ គេហទំព៧រ iSeeCars បានរកឃើញថា ជាមធ្យមរថយន្តមួយគ្រឿងចំណាយពេលចតនៅកន្លែងលក់ ៩៦,៩ថ្ងៃ ទើបលក់ដាច់ ខុសពីពេលមិនទាន់មានកូវីដ១៩ ត្រឹម ៥៧,៨ថ្ងៃប៉ុណ្ណោះ។

ក្នុងនោះផងដែរ រថយន្តដែលលក់ដាច់លឿនបំផុតគឺ Chevrolet Trailblazer ដែលចំណាយពេលត្រឹម ១៩ថ្ងៃប៉ុណ្ណោះ។ តាមពីក្រោយ Trailblazer គឺរថយន្តកូរ៉េ Kia ចំនួន២ម៉ូដែល Telluride និង Seltos ដែលចំណាយពេល ២៥,៧ថ្ងៃ និង ៣១,៣ថ្ងៃ ទើបលក់ដាច់។

ចំណែកឯលេខ៤ បានទៅលើ SUV ដដែល គឺ Honda CR-V Hybrid (៣៥,២ថ្ងៃ), លេខ៥ Hyundai Palisade (៣៩ថ្ងៃ), លេខ៦ Mercedes-Benz GLB (៤០,៥ថ្ងៃ) ខណៈលេខ៧ គឺ Chevrolet Bolt EV ដែលមិនមែនជា SUV ចំណាយពេល ៤១,៧ថ្ងៃ ហើយលេខ៨ Toyota RAV4 Hybrid (៤៦,១ថ្ងៃ), លេខ៩ Buick Encore GX (៤៦,៦ថ្ងៃ) និង លេខ១០ Subaru Forester (៤៧,៣ថ្ងៃ)៕

ផ្ទាំងផ្សាយពាណិជ្ជកម្ម

ចង់ដឹងពេល Bugatti Chiron ជាន់ដល់ល្បឿន ៣០០គ.ម៉/ម៉ លឿនប៉ុណ្ណា អាចមើលវីដេអូនេះបាន (មានវីដេអូ)

August 29, 2020

ស្របពេលដែល Bugatti កំពុងអភិវឌ្ឍន៍រថយន្ត Chiron Super Sport 300+ ដល់ដំណាក់កាលចុងក្រោយ មុនពេលដឹកទៅឲ្យភ្ញៀវ លោក Mat Watson មកពីគេហទំព័ររថយន្តអង់គ្លេស CarWow ក៏មានឱកាសអង្គុយក្នុងរថយន្តនោះ ដើម្បីសាកល្បឿនរបស់វា។

គិតរហូតមកដល់ពេលនេះ វាមានរយៈពេល ១២ខែហើយដែល Bugatti បានធ្វើឲ្យពិភពលោកមានការភ្ញាក់ផ្អើល បន្ទាប់ពីដាក់បង្ហាញរថយន្ត Chiron Super Sport 300+ ដែលមានល្បឿនអតិបរមារហូតដល់ទៅ ៤៩០គីឡូម៉ែត្រក្នុងមួយម៉ោង ឬ ៣០៤ម៉ាយ៍ក្នុងមួយម៉ោង។

Bugatti Chiron Super Sport 300+ បំពាក់ម៉ាស៊ីនចំណុះ ៨,០លីត្រ quad-turbo ទំហំ ១៦ស៊ីឡាំង (W16) ដែលមានកម្លាំងសរុបរហូតដល់ទៅ ១ ៥៧៨សេះ។

យ៉ាងណាមិញ នេះគឺជាលើកទី១ សម្រាប់ Mat Watson ដែលអង្គុយក្នុងរថយន្ត Bugatti ហើយបានសាកល្បឿនរបស់វាជាលើកទី១ រហូតដល់ទៅ ៣០០គីឡូម៉ែត្រក្នុងមួយម៉ោង។ ចង់ដឹងថាអារម្មណ៍ពេលបានជិះដល់ល្បឿនប៉ុណ្ណេះយ៉ាងណា ទៅទស្សនាវីដេអូខាងក្រោមទាំងអស់គ្នា៖

ផ្ទាំងផ្សាយពាណិជ្ជកម្ម

លើកនេះ Mercedes S-Class ឆ្នាំ ២០២១ លែងសូវបិទបាំងរូបរាងហើយ

August 28, 2020

ក្រុមហ៊ុន Mercedes-Benz កំពុងស្ថិតនៅក្នុងដំណាក់កាលចុងក្រោយនៃការអភិវឌ្ឍន៍រថយន្ត S-Class ជំនាន់ថ្មី ដែលរថយន្តប្រណីតជំនាន់ថ្មីនេះនឹងបង្ហាញខ្លួនជាផ្លូវការនៅថ្ងៃទី២ ខែកញ្ញា តាមរយៈកម្មវិធីពិសេសដែលនឹងផ្សាយផ្ទាល់តាមអនឡាញ។

នៅនាទីចុងក្រោយ កាន់តែជិតដល់ពេលប្រកាសចេញ គេអាចឃើញកាន់តែច្បាស់នៃរូបរាងរបស់ S-Class ជំនាន់ថ្មី ដែលបើកបរសាកល្បងលើដងផ្លូវជាមួយការបិទបាំងរចនាបថតិចតួចបំផុត មិនដូចពីមុនៗនោះទេ។ យ៉ាងណាក្ដីនៅត្រង់អំពូលភ្លើងខាងមុខ និងអំពូលខាងក្រោយនៅមានការបិទបាំងយ៉ាងជិតតែម្ដង។ ទស្សនារូបភាពដូចខាងក្រោមនេះ ៖

ត្បិតថារចនាបថខាងក្រៅរបស់ S-Class ជំនាន់ថ្មីគេនៅមិនទាន់ដឹងច្បាស់ ១០០% ប៉ុន្តែគេបានដឹងច្បាស់អំពីរចនាបថខាងក្នុងរបស់រថយន្ត តាមរយៈការបង្ហាញរបស់ Mercedes នាពេលកន្លងមក។ នៅផ្នែកខាងក្នុងមានបំពាក់អេក្រង់រហូតដល់ ៥អេក្រង់ ដែលអេក្រង់នៅចំកណ្ដាលមានទំហំ ១២,៨អ៊ីញ មានមុខងារ Haptic Feedback ចំណែកអេក្រង់ដែលប្រើធ្វើជាកុងទ័ររថយន្ត មានបង្ហាញព័ត៌មានបែប 3D តែម្ដង៕

ផ្ទាំងផ្សាយពាណិជ្ជកម្ម

Porsche សម្រេចពន្យារពេលដាក់លក់ឡានអគ្គិសនីថ្មី

August 28, 2020

កាលពីខែមីនាកន្លងទៅ Porsche បានប្រកាសថារថយន្ត Taycan Cross Turismo នឹងដាក់លក់លើទីផ្សារនៅត្រឹមដំណាច់ឆ្នាំ ២០២០នេះ ប៉ុន្តែសោកស្ដាយដោយសារក្រុមហ៊ុនសម្រេចចិត្តលើកពេលការដាក់លក់របស់ខ្លួន។

ផ្អែកតាម Bloomberg បានឲ្យដឹងថា លោក Oliver Blume ជានាយកប្រតិបត្តិ Porsche បានបញ្ជាក់ថារថយន្ត Taycan Cross Turismo នឹងចេញលក់នៅអំឡុងដើមឆ្នាំ ២០២១ ជំនួសវិញ។ លោកបានបញ្ជាក់ថាជំងឺកូវីដ១៩ ជាចំណែកមួយដែលធ្វើឲ្យផែនការចេញលក់ត្រូវពន្យារពេល។

ត្បិតថាជំងឺកូវីដ១៩ធ្វើឲ្យប៉ះពាល់ដល់ផែនការខ្លួនក៏ដោយក្ដី ក៏ក្រុមហ៊ុន Porsche នៅតែអាចប្រយុទ្ធប្រឆាំងនឹងជំងឺកូវីដ១៩បានយ៉ាងល្អបើមើលលើលទ្ធផលលក់ក្នុងឆមាសទីមួយនៃឆ្នាំ ២០២០។ Porsche នៅតែអាចរក្សាប្រាក់ចំណេញនៅឆមាសទីមួយនេះបានក្នុងកម្រិតល្អមួយ ទោះបីជារោងចក្រត្រូវបិទ និងចំនួនលក់ថយចុះបន្តិចក្ដី។ នេះក៏ដោយសារតែតម្រូវការដ៏ខ្លាំងក្លានៃរថយន្ត Taycan, 911 Turbo និង 911 Targa៕

ផ្ទាំងផ្សាយពាណិជ្ជកម្ម

ថាមើល Audi RS7 កម្លាំង៧០០សេះ អាចយកឈ្នះ Lamborghini Aventador SV កម្លាំង៧២៩សេះអត់? (មានវីដេអូ)

August 28, 2020

ជាការពិតណាស់ រថយន្ត Audi RS7 ស៊េរីចាស់ មិនអាចយកឈ្នះលើ Lamborghini Aventador បានឡើយ ប៉ុន្តែសម្រាប់ RS7 មួយនេះបានកែម៉ាស៊ីនចំណុះ ៤,០លីត្រ twin-turbo V8 ពីកម្លាំង ៥៥២សេះ ឡើងទៅដល់ ៧០០សេះឯណោះ។ ជាមួយគ្នានេះ វាប្រើប្រអប់លេខអូតូ ៨វគ្គ និងប៉ុងពីរ AWD ដែលជួយឲ្យការបញ្ជូនកម្លាំងទៅកង់ទាំង៤ កាន់តែប្រសើរ។

ចំពោះរថយន្ត Lamborghini Aventador SV វិញ បំពាក់ម៉ាស៊ីនចំណុះ ៦,៥លីត្រ naturally aspirated V12 ដែលមានកម្លាំងរហូតដល់ទៅ ៧៣៩សេះ ប្រើប្រអប់លេខ ៧វគ្គ និងប៉ុងពីរដូចគ្នា។ វាអាចស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ២,៨វិនាទី ហើយមានល្បឿនអតិបរមាដល់ ៣៥០គីឡូម៉ែត្រក្នុងមួយម៉ោង។

បើនិយាយពីការប្រៀបធៀបទម្ងន់នៃរថយន្តទាំងពីរវិញ Aventador SV ស្រាលជាង RS7 ប្រហែល ១៨០គីឡូក្រាម ដូច្នេះវារៀងមានប្រៀបជាងបន្តិច។ ចង់ដឹងយ៉ាងណា ទស្សនាវីដេអូខាងក្រោមទាំងអស់គ្នា៖

ផ្ទាំងផ្សាយពាណិជ្ជកម្ម

កាន់លុយប៉ុន្មាន ទើបអាចទិញ Nissan GT-R ឆ្នាំ២០២១ បាន?

August 28, 2020

ក្រុមហ៊ុនរថយន្តជប៉ុន Nissan បានបញ្ចេញតម្លៃនៃរថយន្ត GT-R ស៊េរីឆ្នាំ២០២១ ជាផ្លូវការ សម្រាប់ទីផ្សារសហរដ្ឋអាមេរិក។

សម្រាប់ស៊េរីឆ្នាំ២០២១ នេះ GT-R នៅតែបែងចែកចេញជា ២ម៉ូដែល គឺ GT-R Premium មានតម្លៃចាប់ពី ១១៣ ៥៤០ដុល្លារ និង GT-R Nismo មានតម្លៃចាប់ពី ២១០ ៧៤០ដុល្លារ។

រថយន្ត Nissan GT-R Premium បំពាក់ម៉ាស៊ីនចំណុះ ៣,៨លីត្រ twin-turbo V6 មានកម្លាំង ៥៦៥សេះ ប្រើប្រអប់លេខអូតូ ៦វគ្គ និងប៉ុងពីរ AWD។ ដោយឡែក GT-R Nismo វិញ បំពាក់ម៉ាស៊ីនចំណុះ ៣,៨លីត្រ twin-turbo V6 ដូចគ្នា ប៉ុន្តែមានកម្លាំងដល់ ៦០០សេះ។

ក្រៅពីកម្លាំងខ្លាំងជាង GT-R Nismo ក៏មានចំណុចខុសគ្នាមួយចំនួនពី GT-R Premium ដែរ ដូចជា មានបំពាក់ដៃចង្កូតកាំម្ញី, ចង្កឹះលេខស្រោបដោយស្បែក រំលេចដោយពណ៌ក្រហម និង មានកុងទ័រពណ៌ក្រហម ជាដើម។ មិនតែប៉ុណ្ណោះ វាក៏បំពាក់កៅអីស្បែក Recaro ផងដែរ៕

ផ្ទាំងផ្សាយពាណិជ្ជកម្ម

ក្រសួងប្រកាសបញ្ចុះតម្លៃ៧៥% លើផ្លាកលេខភ្នំពេញ BG-1333

August 28, 2020

នៅលើទំព័រផ្លូវការ របស់ក្រសួងសាធារណការ និងដឹកជញ្ជូន បានធ្វើការបង្ហាញពីការលក់បញ្ចុះតម្លៃលេខភ្នំពេញ BG-1333 ត្រូវបានដាក់លក់បញ្ចុះតម្លៃ៧៥% ស្មើនឹង 1,000,000រៀល (តម្លៃពេញ 4,000,000រៀល)។ លោកអ្នកអាចចូលមើលនៅទីនេះ https://vehicle.mpwt.gov.kh/#/plates?plate=2BG1333

គួរបញ្ជាក់ផងដែរថា ផ្លាកលេខរាជធានី-ខេត្ត ត្រូវបានដាក់លក់បញ្ចុះតម្លៃតាមសេរីជាបន្តបន្ទាប់រួមមាន៖ ថយ១ស៊េរី ចុះតម្លៃ ៥០%, ថយ២ស៊េរី ចុះតម្លៃ ៧៥%, ថយ៣ស៊េរី ចុះតម្លៃ ៩០%, ថយ៤ស៊េរី ចុះតម្លៃ ៩៥% និងថយចាប់ពី៥ស៊េរីឡើងទៅ ចុះតម្លៃ ១០០%។ បងប្អូនប្រជាពលរដ្ឋនឹងកាន់តែមានជម្រើសយ៉ាងសម្បូរបែបក្នុងការជ្រើសរើសយកផ្លាកលេខរាជធានី-ខេត្តសេរីបច្ចុប្បន្ន ឬលេខបញ្ចុះតម្លៃ ឬលេខពិសេសផ្ទាល់ខ្លួនតាមការពេញចិត្តផងដែរ។

—
:::យោង៖ https://mpwt.gov.kh/kh/documents/declaration/286
:::ប្រព័ន្ឋស្វ័យប្រវត្តិកម្មដាក់ពាក្យចុះបញ្ជីរថយន្ត៖ https://vehicle.mpwt.gov.kh
:: Hotline មណ្ឌលប្រឹក្សាយោបល់ លើសេវាសាធារណៈ៖ ១២៧៥

ផ្ទាំងផ្សាយពាណិជ្ជកម្ម

Lexus RX ស៊េរីពិសេសរំលេចដោយពណ៌ខ្មៅ មានផលិតត្រឹម ១ពាន់គ្រឿងប៉ុណ្ណោះ

August 27, 2020

កាលពីថ្មីៗនេះ Lexus បានបង្ហាញចេញរថយន្តម៉ូដែល LX ស៊េរីពិសេស រួចមកបានបញ្ចេញរថយន្ត ES ស៊េរីពិសេស ហើយពេលនេះក្រុមហ៊ុនបានបញ្ចេញរថយន្ត RX ស៊េរីពិសេសបន្ថែមមួយទៀត។

រថយន្ត Lexus RX ស៊េរីពិសេសមានឈ្មោះថា RX Black Line ដែលនឹងមានផលិតត្រឹម ១០០០គ្រឿងប៉ុណ្ណោះ ក្នុងនោះមាន RX 350 ចំនួន ៧៥០គ្រឿង និង RX Hybrid ចំនួន ២៥០គ្រឿង ដែលរថយន្តពិសេសនេះមានពាំនាំលក្ខណៈពិសេសមួយចំនួនរបស់ប្រភេទ F Sport។

RX Black Line មានចំណុចពិសេសដូចជាយ៉ាន់កង់ទំហំ ២០អ៊ីញថ្មីពណ៌ខ្មៅ, ផ្ទាំងប៉ាណាមានក្រូម៉េ, កៅអីស្បែកពណ៌ខ្មៅដែលមានរំលេចពណ៌សនិងពណ៌ខ្មៅ។ គួរដឹងដែរថា RX Black Line មានជម្រើសពណ៌ចំនួនពីរគឺពណ៌ Ultra White និងពណ៌ថ្មីឈ្មោះ Grecian Water។

រថយន្ត RX Black Line នេះមានតម្លៃ ៥០ ៦៣៥ដុល្លារ សម្រាប់ RX 350 និងសម្រាប់ RX Hybrid វិញមានតម្លៃ ៥១ ៨៨៥ដុល្លារ៕

ផ្ទាំងផ្សាយពាណិជ្ជកម្ម

ក្រុមហ៊ុនចិននឹងផលិតឡាន Supercar លក់តម្លៃ ១,៤៥លានដុល្លារ

August 27, 2020

ក្រុមហ៊ុនរថយន្តចិន Hongqi បានសម្រេចថានឹងនាំយករថយន្ត Concept ម៉ូដែល Hongqi S9 ដែលខ្លួនបានបង្ហាញចេញកាលពីឆ្នាំ ២០១៩ យកមកផលិតលក់លើទីផ្សារជាផ្លូវការ។

រថយន្ត Hongqi S9 ដែលជាប្រភេទ Supercar នឹងផលិតត្រឹម ៧០គ្រឿងប៉ុណ្ណោះ ដែលនឹងផលិតនៅឆ្នាំ ២០២១ សម្រាប់តម្លៃ ១០លានយ័នក្នុងមួយគ្រឿង ដែលស្មើនឹងប្រមាណ ១,៤៥លានដុល្លារ ដែលធ្វើឲ្យវាក្លាយជារថយន្តចិនមានតម្លៃថ្លៃជាងគេបំផុត។

រថយន្តនេះនឹងបំពាក់ដោយម៉ាស៊ីន Turbocharged V8 ភ្ជាប់ជាមួយម៉ូទ័រអគ្គិសនីដែលអាចសាកភ្លើងបាន។ សរុបជារួចវាអាចផលិតកម្លាំងបាន ១៤០០សេះ ដែលអាចស្ទុះពី ០-១០០គ.ម/ម៉ ក្នុងពេលត្រឹម ១,៩វិនាទី និងមានល្បឿនអតិបរមា ៤០០គ.ម/ម៉៕

ផ្ទាំងផ្សាយពាណិជ្ជកម្ម

SUV កម្លាំង៧០០សេះរបស់ Dodge ដាក់តម្លៃខ្លួន ៨ម៉ឺនដុល្លារ

August 27, 2020

ក្រុមហ៊ុន Dodge បានប្រកាសពីតម្លៃនៃរថយន្ត Durango SRT Hellcat ដែលនឹងមានតម្លៃចាប់ពី ៨០ ៩៩៥ដុល្លារ សម្រាប់ទីផ្សារសហរដ្ឋអាមេរិក។

រថយន្ត Dodge Durango SRT Hellcat នេះបំពាក់ម៉ាស៊ីនចំណុះ ៦,២លីត្រ Supercharged V8 មានកម្លាំង ៧១០សេះ ប្រើប្រអប់លេខអូតូ ៨វគ្គ និងប៉ុងពីរ AWD មកស្តង់ដារ។ SUV ដ៏អង់អាចនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៥វិនាទី ហើយមានល្បឿនអតិបរមា ដល់ទៅ ២៩០គីឡូម៉ែត្រក្នុងមួយម៉ោង។ មិនតែប៉ុណ្ណោះ វាថែមទាំងអាចអូសសណ្តោងបានទម្ងន់រហូតដល់ទៅជិត ៤តោនទៀតផង។

យ៉ាងណាក៏ដោយ រថយន្ត Durango SRT Hellcat នឹងដាក់ឲ្យបញ្ជាទិញមុននៅចុងឆ្នាំនេះ។ ក្រៅពីម៉ូដែល SRT Hellcat ក្រុមហ៊ុន Dodge ក៏ផ្តល់ជម្រើសជាច្រើនម៉ូដែលទៀត ដូចជា SXT, GT, R/T, Citadel និង SRT 392 ផងដែរ៕