BMW M5 ឆ្នាំ២០២១ ចេញជាផ្លូវការ តម្លៃខ្ទង់ ១០ម៉ឺនដុល្លារ

June 19, 2020

ក្រុមហ៊ុន BMW បានប្រកាសចេញរថយន្ត Sedan ស្ព័រកម្លាំងខ្លាំងម៉ូដែល M5 ស៊េរីឆ្នាំ២០២១ ជាផ្លូវការ ដោយបានអាប់ដេតប៉ាណាមុខ, ចង្កៀងមុខ, កាងមុខក្រោយ និងចង្កៀងក្រោយ ផងដែរ។

ក្រៅពីទទួលបានការអាប់ដេតមួយចំនួនលើរូបរាងខាងក្រៅ BMW M5 ក៏បន្ថែមពណ៌ថ្មីចំនួន ៥ ទៀត ដោយក្នុងនោះរួមមានទាំង ពណ៌ប្រផេះ Brands Hatch Grey និង ពណ៌ក្រហម Motegi Red Metallic ទៀតផង។ លើសពីនេះវាក៏មានបំពាក់យ៉ាន់ថ្មីទំហំ ២០អ៊ីញ បានពីម៉ូដែល M8 ផងដែរ។

BMW M5 បំពាក់ម៉ាស៊ីន twin-turbo ចំណុះ ៤,៤លីត្រ V8 មានកម្លាំង ៥៩២សេះ ប្រើប្រអប់លេខអូតូ ៨វគ្គ និងប៉ុងពីរ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៤វិនាទី។

BMW ក៏ផ្តល់ជម្រើស M5 Competition ដែរ ដោយមានកម្លាំងដល់ ៦១៧សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៣វិនាទី។ ម៉ូដែល ២ អាចរត់ដល់ល្បឿនអតិបរមា ២៥០គីឡូម៉ែត្រក្នុងមួយម៉ោង និង ៣០៥គីឡូម៉ែត្រក្នុងមួយម៉ោង នៅពេលបំពាក់កញ្ចប់ Option “M Driver’s Package”។

M5 ឆ្នាំ២០២១ នឹងចេញលក់នៅក្នុងខែសីហា ជាមួយនឹងតម្លៃ ១០៣ ៥០០ដុល្លារ សម្រាប់ M5 ធម្មតា និង ១១១ ១០០ដុល្លារ សម្រាប់ M5 Competition៕

ផ្ទាំងផ្សាយពាណិជ្ជកម្ម

Toyota Supra ឆ្នាំ២០២១ ប្រភេទ៤ម៉ាស៊ីន ថោកជាងប្រភេទ៦ម៉ាស៊ីន ៨ពាន់ដុល្លារ

June 19, 2020

ថ្មីៗនេះក្រុមហ៊ុន Toyota បានប្រកាសចេញរថយន្ត Supra ស៊េរីឆ្នាំ២០២១ ជាផ្លូវការ ដោយក្នុងនោះមានទាំងប្រភេទប្រើម៉ាស៊ីន ៤ស៊ីឡាំង និង ៦ស៊ីឡាំង។

រថយន្ត Toyota Supra 2.0 ដែលបំពាក់ម៉ាស៊ីន ៤ស៊ីឡាំង មានកម្លាំង ២៥៥សេះ ប្រើប្រអប់លេខអូតូ ៨វគ្គ អាចរត់ពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៥វិនាទី ហើយមានល្បឿនអតិបរមាដល់ ២៥០គីឡូម៉ែត្រក្នុងមួយម៉ោង។ Supra ម៉ាស៊ីនតូចនេះមានតម្លៃចាប់ពី ៤២ ៩៩០ដុល្លារ សម្រាប់ទីផ្សារសហរដ្ឋអាមេរិក។

ដោយឡែក រថយន្ត Toyota Supra 3.0 ដែលបំពាក់ម៉ាស៊ីន ៦ស៊ីឡាំងវិញ មានកម្លាំងដល់ ៣៨២សេះ អាចរត់ពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៩វិនាទី លឿនជាងប្រភេទម៉ាស៊ីនតូច ១,១វិនាទី។ Supra ម៉ាស៊ីនធំនេះមានតម្លៃចាប់ពី ៥០ ៩៩០ដុល្លារ សម្រាប់ទីផ្សារសហរដ្ឋអាមេរិក ថ្លៃជាង Supra 2.0 ត្រឹម ៨ ០០០ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម

ទីបំផុត Ford បង្ហាញរូបរាងផ្លូវការដំបូងនៃភីកអាប់ F-150 ឆ្នាំ ២០២១

June 19, 2020

Ford F-150 ឆ្នាំ ២០២១ នឹងបង្ហាញរូបភាពជាផ្លូវការនាថ្ងៃទី ២៥ ខែមិថុនានេះ ហើយពេលនេះក្រុមហ៊ុនបានបញ្ចេញរូបភាព Teaser ដំបូងនៃរថយន្តភីកអាប់ដែលផ្លាស់ប្ដូររូបរាងថ្មីនេះ។

ត្បិតថារូបភាពមិនបានបង្ហាញអ្វីច្រើន ប៉ុន្តែវាបានបញ្ជាក់ការផ្លាស់ប្ដូរការឌីហ្សាញលើចង្កៀងខាងមុខ ដែលមានរុំព័ទ្ធដោយអំពូលភ្លើងបំភ្លឺពេលថ្ងៃប្រភេទ LED រាងជាអក្សរ C។ កន្លងមករូបរាងខាងមុខរបស់ F-150 ស៊េរីថ្មី ត្រូវបានគេថតជាប់ជាច្រើនលើកមកហើយ ពេលវាបើកបរសាកល្បងលើដងផ្លូវ។ បើតាមរូបភាពដែលគេថតបានកន្លងមក នៅផ្នែកខាងមុខក៏មានផ្លាស់ប្ដូររន្ធខ្យល់ដែលមានឌីហ្សាញថ្មីផងដែរ។

ក្រៅពីរូបភាព Teaser នេះ ក្រុមហ៊ុន Ford ក៏បានបញ្ជាក់ដែរថា រថយន្ត F-150 ឆ្នាំ ២០២១ នឹងបញ្ចេញលក់លើទីផ្សារចាប់ផ្ដើមពីចុងឆ្នាំនេះ។ គួរដឹងដែរថា F-150 ស៊េរីថ្មី អាចនឹងមានបន្ថែមនូវប្រភេទដែលប្រើប្រាស់ថាមពលអគ្គិសនីសុទ្ធ ដែលនឹងមកដល់លើទីផ្សារក្នុងពេល ២ឆ្នាំទៀត៕

ផ្ទាំងផ្សាយពាណិជ្ជកម្ម

សង្ស័យថានេះជា Rolls-Royce តម្លៃរាប់សិបលានដុល្លារ មានតែមួយក្នុងលោក

June 19, 2020

វិបសាយរថយន្ត CarScoops ទទួលបានរូបភាពមួយដែលបង្ហាញអំពីរូបរាងរថយន្ត Rolls-Royce ដ៏អាថ៌កំបាំងមួយម៉ូដែល។ ប្រភពដែលផ្ដល់រូបភាពឲ្យវិបសាយនេះ បាននិយាយថាវាគឺជារថយន្ត Rolls-Royce ថ្មី ដែលត្រៀមបង្ហាញមុខ ហើយវាមានលក្ខណៈខុសពីរថយន្ត Rolls-Royce នាពេលបច្ចុប្បន្នផ្សេងៗទៀត។

រូបភាពបានបង្ហាញអំពីការឌីហ្សាញដំបូលដែលមានកម្ពស់ខ្ពស់ ហើយវាមានរូបរាងតូច ដែលទំនងជាមានទ្វារតែពីរប៉ុណ្ណោះ។ ប្រសិនបើរូបភាពនេះ អាចយកជាការបានមែន វាអាចជាប្រភេទរថយន្តមានតែមួយក្នុងលោក ដែល Rolls-Royce ផលិតជូនអតិថិជនមានទ្រព្យមហាសាលរបស់ខ្លួន។ ដូចកាលពីឆ្នាំ ២០១៧ ក្រុមហ៊ុន Rolls-Royce បានបង្ហាញនូវរថយន្ត Rolls-Royce Sweptail មានតែមួយគ្រឿងក្នុងលោក រូបរាងពិសេសលើសរថយន្ត Rolls-Royce ដទៃ ដែលមានតម្លៃដល់ទៅ ១២,៨ លានដុល្លារឯណោះ។

ប្រភពរបស់ CarScoops បានឲ្យដឹងដែរថា Rolls-Royce អាចនឹងបង្ហាញរថយន្តនេះក្នុងកម្មវិធី Pebble Beach Concours d’Elegance នាខែសីហា។ ប៉ុន្តែដោយសារកម្មវិធីនេះត្រូវបានរំសាយចោលព្រោះការផ្ទុះជំងឺកូវីដ១៩ ដូចនេះគេរំពឹងថា Rolls-Royce អាចនឹងប្រើវិធីបង្ហាញរថយន្តតាមអនឡាញជំនួសវិញ៕

ផ្ទាំងផ្សាយពាណិជ្ជកម្ម

Mercedes-AMG ចេញ E 63 S ឆ្នាំ២០២១ មានទាំងប្រភេទ Sedan និង Wagon

June 18, 2020

ក្រុមហ៊ុន Mercedes-AMG បានប្រកាសចេញរថយន្ត E 63 S ស៊េរីឆ្នាំ២០២១ ជាផ្លូវការ ដោយមានតួខ្លួន ២ ប្រភេទ គឺ Sedan និង Wagon (គូទហើម)។

E 63 S ថ្មីនេះទទួលបានការឌីហ្សាញថ្មីដូចជា ចង្កៀងមុខ LED, កាងមុខ និងប៉ាណាមុខ Panamericana ជាដើម។ បន្ថែមពីនេះវាក៏មានតុបតែងតួខ្លួនជាមួយនឹងពណ៌ខ្មៅ ដែលជាផ្នែកមួយនៃកញ្ចក់ Option “AMG Night Package” ហើយក៏មានលេង Carbon Fiber ដែលជាកញ្ចប់ Option “AMG Exterior Carbon-Fiber Package” ផងដែរ។

រថយន្ត Mercedes-AMG E 63 S ឆ្នំាំ២០២១ នៅតែបំពាក់ម៉ាស៊ីនចំណុះ ៤,០លីត្រ twin-turbocharged មានកម្លាំង ៦០៣សេះ ទាំងប្រភេទ Sedan និង Wagon។ វាប្រើប្រអប់លេខ AMG Speedshift ៩វគ្គ dual-clutch និងប៉ុងពីរ។ រថយន្តនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,៣វិនាទី សម្រាប់ Sedan និង ៣,៤វិនាទី សម្រាប់ Wagon។

E 63 S ក៏មានបំពាក់ប្រព័ន្ធបូម AMG Ride Control+ ដែលអាចសារ៉េបូមឡើងចុះ និងសារ៉េកម្រិតបូម ៣ ប្រភេទៀត គឺ Comfort, Sport និង Sport+។ យ៉ាងណាមិញ ក្រុមហ៊ុន Mercedes-AMG នឹងប្រកាសតម្លៃរបស់ E 63 S ឆ្នាំ២០២១ នៅពេលក្រោយ៕

ផ្ទាំងផ្សាយពាណិជ្ជកម្ម

Volkswagon ចេញឡាន Arteon គូទហើមថ្មី រាងរឹតតែអេម ខាងក្នុងកាន់តែទូលាយ

June 18, 2020

ក្រុមហ៊ុន Volkswagon បានបញ្ចេញរថយន្តម៉ូដែល Arteon ស៊េរីឆ្នាំ២០២១ ប្រភេទគូទហើមថ្មីហៅថា Arteon Shooting Brake។

រថយន្ត Volkswagon Arteon Shooting Brake ថ្មីនេះ មានការឌីហ្សាញផ្នែកខាងក្រោយ ខុសពីម៉ូដែល Arteon ធម្មតា ហើយក៏បានអាប់ដេតផ្នែកខាងមុខផងដែរ។ ក្រៅពីនោះ វាមានបន្ថែមរបាំងប្លាស្ទិចការពារផុកលើកង់ , កាងផ្នែកចំហៀង និងកាងខាងក្រោយ ព្រមទាំងមានកម្ពស់ឈរផុតពីដីខ្ពស់ជាងមុនទៀតផង។

បន្ថែមពីនោះវាមានបំពាក់ចង្កៀង LED, ដំបូលកញ្ចក់វែង Panoramic Roof, កញ្ចក់ពណ៌ខ្មៅ និង យ៉ាន់ដល់ទំហំ ១៩អ៊ីញ។

រថយន្តនេះនឹងបន្តប្រើម៉ាស៊ីនសាំងដដែល គឺ ចំណុះ ២,០លីត្រ turbocharged ទំហំ ៤ស៊ីឡាំង កម្លាំង ១៨៦សេះ សម្រាប់ម៉ូដែល 330 TSI និង ២២០សេះ សម្រាប់ 380 TSI៕

ផ្ទាំងផ្សាយពាណិជ្ជកម្ម

VW នឹងចំណាយ ២៦៧លានដុល្លារ ដើម្បីអាចកាន់កាប់ Audi បាន ១០០%

June 18, 2020

កាលពីខែមីនា មានការចុះផ្សាយថាសម្ព័ន្ធ Volkswagen Group ចង់ទិញយកភាគហ៊ុនដែលសេសសល់ពីម្ចាស់ភាគហ៊ុន Audi ដើម្បីអាចគ្រប់គ្រងក្រុមហ៊ុនរថយន្តនេះបាន ១០០% តែម្ដង។

មកទល់ពេលនេះ VW Group គឺមានកាន់កាប់ភាគហ៊ុន ៩៩,៦៤% នៃ Audi ដោយមានម្ចាស់ភាគហ៊ុនមួយចំនួនតូចនៅកាន់កាប់ជាប់ចំណែកភាគហ៊ុន ០,៣៦% ទៀត។ ភាគហ៊ុន ០,៣៦% នេះ គឺមានចំនួនហ៊ុនសរុបដល់ទៅ ១៥២ ៧៤៩ ហ៊ុន ឯណោះ ដែល VW Group ត្រូវចំណាយ ២៣៧លានអឺរ៉ូ (ប្រមាណ ២៦៧លានដុល្លារ) ដើម្បីទិញយកបាន ព្រោះថាមួយហ៊ុនមានតម្លៃ ១៥៥១,៥៣អឺរ៉ូ (ប្រមាណ ១ ៧៤២ដុល្លារ) ឯណោះ។

ការផ្ទេរភាគហ៊ុនដែលនៅសេសសល់នេះរំពឹងថានឹងធ្វើឡើងនៅក្នុងកិច្ចប្រជុំប្រចាំឆ្នាំបន្ទាប់របស់ VW Group ដែលដើមឡើយគ្រោងនឹងប្រព្រឹត្តទៅនាថ្ងៃទី ១៤ ខែឧសភា ឆ្នាំ ២០២០ ប៉ុន្តែត្រូវបានលើកពេលទៅខែកក្កដា ឬខែសីហាវិញ។

គួរដឹងថា Audi នៅតែម៉ាកដែលសំខាន់មួយសម្រាប់ VW Group ហើយជាពិសេសខាងផ្នែកស្រាវជ្រាវ និងអភិវឌ្ឍន៍ Audi គឺជាជើងខ្លាំងមួយរបស់ VW Group៕

ផ្ទាំងផ្សាយពាណិជ្ជកម្ម

មើលរចនាបថខាងក្នុងនៃឡានភីកអាប់គូប្រជែង Cybertruck ត្រៀមប្រកាសថ្ងៃទី ២៥នេះ

June 18, 2020

Lordstown Motors បានបង្ហាញរូបគំនូរព្រាងនៃផ្នែកខាងក្នុងរថយន្តភីកអាប់អគ្គិសនី Endurance របស់ខ្លួន ដែលរថយន្តនេះត្រៀមនឹងប្រកាសនាថ្ងៃទី ២៥ ខែមិថុនាខាងមុខ ចំថ្ងៃតែមួយជាមួយនឹង Ford F-150 ជំនាន់ថ្មី។

តាមរយៈរូបភាពគំនូរព្រាងបានបង្ហាញថារថយន្ត Endurance គឺមានបរិក្ខារខាងក្នុងពោរពេញដោយបច្ចេកវិទ្យាទំនើប និងទាន់សម័យថែមទៀតផង។ ដូចដែលឃើញស្រាប់ គឺមានកុងទ័រប្រភេទឌីជីថល ដែលភ្ជាប់គ្នាជាមួយនឹងប្រព័ន្ធកម្សាន្តនៅចំកណ្ដាលតែម្ដង។

រថយន្ត Endurance ត្រៀមនឹងចេញលក់លើទីផ្សារនាខែមករាឆ្នាំក្រោយ ដែលមានម៉ូទ័រអគ្គិសនីចំនួនបួនសម្រាប់ទ្រទ្រង់កង់នីមួយៗ អាចផលិតកម្លាំងបានសរុប ៦០០សេះ។ ម៉ូទ័រទាំងបួនអាចឲ្យរថយន្តស្ទុះពី ០-៩៦ គ.ម/ម៉ ក្នុងពេលត្រឹម ៥,៥វិនាទី និងជិះបានចម្ងាយ ៤០២ គ.ម ពេលសាកភ្លើងពេញម្ដងៗ៕

ផ្ទាំងផ្សាយពាណិជ្ជកម្ម

Lamborghini ប្រកាសលែងចូលរួមកម្មវិធីតាំងបង្ហាញឡានធំៗ

June 17, 2020

កម្មវិធីតាំងបង្ហាញរថយន្តទ្រង់ទ្រាយធំត្រូវបានគេមើលឃើញថាមិនសូវទទួលបានផលចំណេញដល់ក្រុមហ៊ុនដែលចូលរួមប៉ុន្មានទេ ហើយពេលនេះ Lamborghini បានសម្រេចចិត្តថានឹងលែងចូលរួមកម្មវិធីប្រភេទនេះតទៀតហើយ។

ក្នុងកិច្ចសម្ភាសន៍ជាមួយ Autocar India ប្រធានផ្នែកទីផ្សារនិងទំនាក់ទំនងរបស់ Lamborghini លោក Katia Bassi បាននិយាយថា ៖ “យើងបានសម្រេចថាបោះបង់ចោលកម្មវិធីតាំងបង្ហាញរថយន្ត ដោយសារយើងកាន់តែជឿជាក់ច្បាស់ថា ការមានទំនាក់ទំនងស្និទ្ធស្នាលជាមួយអតិថិជន គឺជារឿងសំខាន់ជាង ហើយកម្មវិធីតាំងបង្ហាញរថយន្តមិនស៊ីនឹងទស្សនវិជ្ជារបស់យើងទៀតនោះទេ។”

ត្បិតថា Lamborghini បោះបង់ចោលកម្មវិធីតាំងបង្ហាញរថយន្តមែន ប៉ុន្តែក្រុមហ៊ុនមិនបោះបង់ចោលទាំងស្រុងនោះឡើយ។ ផ្ទុយទៅវិញ Lamborghini នឹងផ្ដោតលើកម្មវិធីតាំងបង្ហាញរថយន្តដែលមិនមែនជាការតាំងពិព័រណ៍ទាំងស្រុង ដូចជាកម្មវិធី Goodwood Festival of Speed និង Pebble Beach Concours d’Elegance ជាដើម។

Lamborghini ក៏ផ្ដោតលើការបង្កើនភាពស្និទ្ធស្នាលជាមួយអតិថិជន ដូចជាការធ្វើដំណើរកម្សាន្ត និងកម្មវិធីជួបជុំអ្នកបើកបររថយន្ត Lamborghini ជាដើម៕

ផ្ទាំងផ្សាយពាណិជ្ជកម្ម

Range Rover ពិសេស ផលិតអបអរខួបទី៥០ឆ្នាំ មានត្រឹម ១៩៧០គ្រឿងគត់

June 17, 2020

រថយន្ត Range Rover ឆ្នាំ ២០២១ ប្រភេទពិសេសមួយ ត្រូវបានប្រកាសចេញឡើង ដើម្បីអបអរសាទរខួបទី ៥០ឆ្នាំ នៃរថយន្ត SUV ដ៏ពេញនិយមមួយម៉ូដែលនេះ។

រថយន្តពិសេសនេះត្រូវបានគេឲ្យឈ្មោះថា Range Rover Fifty ដែលនឹងមានផលិតត្រឹម ១៩៧០ គ្រឿងប៉ុណ្ណោះនៅទូទាំងពិភពលោក ដោយលេខ ១៩៧០នេះ គឺតំណាងឲ្យឆ្នាំដែល Range Rover មួយគ្រឿងដំបូងគេចាប់ផ្ដើមផលិត។

រថយន្តពិសេសនេះមានលក្ខណៈសម្បត្តិស្រដៀងនឹង Range Rover Autobiography ដែរ ហើយវាមានជម្រើសពណ៌ខាងក្រៅចំនួនបួនក្នុងនោះរួមមាន Santorini Black, Aruba Silver, Carpathain Grey និង Rosello Red។ យ៉ាងណាក្ដី នឹងមាន Range Rover Fifty មួយចំនួនតូចប៉ុណ្ណោះ មានជម្រើសពណ៌ពិសេសលើសនេះគឺពណ៌ Bahama Gold, Davos Whiteនិង Tuscan Blue។

អតិថិជនអាចជ្រើសរើសជាប្រភេទស្តង់ដារ និងប្រភេទ Long-Wheelbase ដែលមានតួខ្លួនវែង។ ចំណែកម៉ាស៊ីនក៏មានច្រើនជម្រើសផងដែរ មានទាំងសាំង និងម៉ាស៊ូត រួមទាំងប្រភេទ Plug-in Hybrid ទៀតផង។