ក្រុមហ៊ុន Mercedes-AMG បានប្រកាសចេញរថយន្ត Sedan ស្ព័រម៉ូដែល GT 4-Door ស៊េរីឆ្នាំ២០២១ ប្រភេទតម្លៃថោកបំផុត ហៅថា GT43។
រថយន្ត Mercedes-AMG GT43 នេះ បំពាក់ម៉ាស៊ីនចំណុះ ៣,០លីត្រ turbocharged ទំហំ ៦ស៊ីឡាំង ជាមួយនឹងប្រព័ន្ធ EQ Boost mild-hybrid មានកម្លាំងសរុប ៣៦២សេះ ប្រើប្រអប់លេខអូតូ ៩វគ្គ និងប៉ុងពីរ 4MATIC+។
គួរឲ្យដឹងថា រថយន្ត GT 4-Door នេះ មានម៉ូដែល GT53 តម្លៃ ៩៩ ៩៥០ដុល្លារ និង GT63 S ១៤០ ២៥០ដុល្លារ ខណៈម៉ូដែល GT43 ដែលថោកបំផុតនេះគឺ ៨៩ ៩០០ដុល្លារ សម្រាប់ទីផ្សារសហរដ្ឋអាមេរិក៕
ក្រុមហ៊ុន Jaguar Land Rover បានប្រកាសពីគម្រោងចង់កាត់បន្ថយបុគ្គលិក ១ ១០០នាក់ចេញ ដើម្បីជួយសម្រួលដល់ផ្នែកហរិញ្ញវត្ថុ ដែលទទួលរងគ្រោះដោយសារតែជំងឺកូវីដ១៩។
ក្រុមហ៊ុនផលិតរថយន្តអង់គ្លេសនេះបានរាយការណ៍ថា ខ្លួនខាតបង់អស់ចំនួន ៥៣១លានដុល្លារក្នុងឆ្នាំនេះ បន្ថែមពីលើការខាតបង់ ៦២៩លានដុល្លារ កាលពីឆ្នាំមុន។
គួរឲ្យដឹងថា កាលពីឆ្នាំមុន ក្រុមហ៊ុនខាងលើបានកាត់បន្ថយបុគ្គលិកចំនួន ៥ ០០០នាក់រួចមកហើយ ដូច្នេះបើថែម ១ ១០០នាក់ទៀត សរុបស្មើ ៦ ១០០នាក់។
ទោះជាយ៉ាងណា Jaguar Land Rover ក៏បានឲ្យដឹងដែរថា ខ្លួនទទួលបានការបញ្ជាទិញរថយន្ត Land Rover Defender សរុប ២២ ០០០គ្រឿងរួចមកហើយ ដែលម៉ូដែលនេះក្រុមហ៊ុនសង្ឃឹមយ៉ាងមុតមាំថា នឹងលក់បានច្រើន៕
Lexus បានបង្ហាញចេញរថយន្តម៉ូដែល IS ស៊េរីថ្មីឆ្នាំ ២០២១ ជាផ្លូវការ។ ត្បិតថាវាមិនមែនជាជំនាន់ថ្មីមែនពិត (នៅតែស្ថិតក្នុងជំនាន់ទីបី ដែលប្រកាសចេញតាំងពីឆ្នាំ ២០១៣) ប៉ុន្តែវាមានការផ្លាស់ប្ដូររូបរាងថ្មី កាន់តែទាន់សម័យ និងទាក់ទាញជាងមុន។
នៅផ្នែកខាងមុខមានផ្លាស់ប្ដូរការឌីហ្សាញថ្មី ដែលមានរន្ធខ្យល់ប្រើប្រាស់រចនាបថថ្មី អមដោយអំពូល LED ដែលមានរាងស្ដើងជាងមុន និងការបំពាក់ភ្លើងបំភ្លឺពេលថ្ងៃនៅផ្នែកខាងក្រោមរថយន្ត ធ្វើឲ្យរថយន្តមានរូបរាងទាន់សម័យ។
នៅផ្នែកខាងក្រោយមានគូថដែលមានរាងកោងជាងមុន អមដោយកាងថ្មី និងអំពូលភ្លើងឲ្យសញ្ញាដែលមានការឌីហ្សាញថ្មី អំពូលទាំងសងខាងគឺភ្ជាប់គ្នាដោយអំពូលឆ្នូតតូចមួយ។ និយាយអំពីទំហំគឺធំជាងមុនបន្តិច ដែលវែងជាងមុន ៣០ម.ម ទទឹងធំជាងមុន ៣០ម.ម និងកម្ពស់ខ្ពស់ជាងមុខ ៥ម.ម។ អ្វីដែលមិនប្ដូរគឺប្រវែងពីកង់មុខ ទៅកង់ក្រោយ នៅតែមានប្រវែង ២៨០០ ម.ម។
ខណៈដែលរូបរាងរាងខាងក្រៅមានការផ្លាស់ប្ដូរច្រើន ចូលដល់ផ្នែកខាងក្នុងវិញគេមិនឃើញមានការផ្លាស់ប្ដូរណាគួរកត់សម្គាល់នោះទេ។ វាមានតាប្លូដែលផ្លាស់ប្ដូរម៉ូដបន្តិច មានរន្ធម៉ាស៊ីនត្រជាក់រាងមូលជំនួសឲ្យរាងផ្ដេក ហើយអេក្រង់ទំហំ ៨អ៊ីញ បានរំកិលមកក្បែរអ្នកបើកបរជាងមុនបន្តិចដើម្បីកាន់តែងាយស្រួលប្រើ។
នៅផ្នែកខាងលើមានអេក្រង់ថ្មីដែលមានទំហំ ១០,៣អ៊ីញ មានគាំទ្រមុខងារ Android Auto និង Apple CarPlay ហើយក៏មាន Amazon Alexa ផងដែរ។ អេក្រង់ទំហំធំនេះគឺមានសម្រាប់ Option ដែលមានប្រព័ន្ធនាំផ្លូវ ហើយវាអាចផ្គួបជាមួយ Speaker Mark Levinson ផងដែរ។
សម្រាប់ IS 300 គឺមានបំពាក់ម៉ាស៊ីន Turbocharged ចំណុះ ២,០លីត្រ ៤ស៊ីឡាំង ដែលផលិតកម្លាំងបាន ២៤១សេះ មានភ្ជាប់ជាមួយប្រអប់លេខ ៨វគ្គ និងប្រព័ន្ធបើកបរវិលកង់ក្រោយ។ វាមានមួយប្រភេទទៀតមានឈ្មោះជា IS 300 ដែរ ប៉ុន្តែប្រើម៉ាស៊ីន ៣,៥លីត្រ កម្លាំង ២៦០សេះ ប្រើប្រព័ន្ធបើកបរវិលកង់ទាំងអស់ និងប្រអប់លេខ ៦វគ្គ។ ចុងក្រោយគឺ IS 350 ដែលមានម៉ាស៊ីន V6 ៣,៥លីត្រ កម្លាំង ៣១១សេះ មានចែកចេញជាប្រភេទវិលកង់មុខ និងប្រភេទវិលកង់ទាំងអស់។
រថយន្ត Lexus IS ស៊េរីឆ្នាំ ២០២១ នេះ នឹងមានដាក់លក់លើទីផ្សារប្រទេសប្រមាណ ៤០ ប្រទេសលើពិភពលោក នាអំឡុងចុងឆ្នាំ ២០២០ ដែលតម្លៃនឹងត្រូវបង្ហាញពេលជិតចេញលក់៕
សង្វាក់ផលិតកម្មនៃរថយន្ត BMW i8 ត្រូវបានបញ្ចប់ក្រោយរថយន្តនេះត្រូវបានផលិតអស់រយៈពេល ៦ឆ្នាំរួចមក ដែលក្នុងរយៈពេលកន្លងមកនេះគេផលិតរថយន្តនេះបាន ២០ ៥០០ គ្រឿង។
រថយន្ត BMW i8 មួយគ្រឿងចុងក្រោយ ត្រូវបានផលិតរួចរាល់និងបានដឹកជញ្ជូនដល់អតិថិជននៅអាល្លឺម៉ង់ ដែលវាជា BMW i8 Roadster មានពណ៌ខៀវ ផលិតរួចរាល់នៅរោងចក្រនាទីក្រុង Leipzig កាលពីសប្ដាហ៍មុន។ វាគឺជារថយន្តមួយក្នុងចំណោមរថយន្ត ១៨ គ្រឿង ដែលត្រូវបានផលិតឡើងជាពិសេស មានការកុម្ម៉ង់ពណ៌ពីសំណាក់អតិថិជនផ្ទាល់។
ត្បិតថាការផលិតរថយន្ត BMW i8 ត្រូវបានបញ្ចប់មែន ប៉ុន្តែ BMW មិនទុកចន្លោះរថយន្តស្ព័រអគ្គិសនី ឲ្យនៅទំនេរឡើយ។ គេរំពឹងថា BMW អាចនឹងបង្ហាញចេញរថយន្តមកជំនួស BMW i8 នេះ នៅអំឡុងឆ្នាំ ២០២៣ ខាងមុខ ដែលមានតម្លៃប្រមាណ ១៦ម៉ឺនដុល្លារ៕
រថយន្តស្ព័រអ៊ីតាលី Ferrari Roma ស៊េរីឆ្នាំ២០២០ បានចេញលក់នៅក្នុងប្រទេសថៃជាផ្លូវការ ជាមួយនឹងតម្លៃចាប់ពី ២១លានបាត ឬប្រហែលខ្ទង់ ៦៨ម៉ឺនដុល្លារ។
Ferrari Roma បំពាក់ម៉ាស៊ីននៅខាងមុខ (front-engine), ប៉ុងមួយវិលកង់ក្រោយ ហើយមានការឌីហ្សាញរូបរាងបែប Classic យ៉ាងទាក់ទាញ។ Roma ប្រើម៉ាស៊ីនចំណុះ ៣,៩លីត្រ V8 ពីម៉ូដែល Portofino ដែលមានកម្លាំង ៦២០សេះ ប្រើប្រអប់លេខអូតូ ៨វគ្គ ប្រភេទ dual-clutch ពីម៉ូដែល SF90 Stradale។
គួរឲ្យដឹងថា រថយន្ត Ferrari Roma ខាងលើ គឺជាគូប្រជែងរវាង Lamborghini Huracan Evo RWD និង McLaren 540C ដែលមានតម្លៃខ្ទង់ ២០លានបាតដែរ៕
ក្រុមហ៊ុន Chevrolet បានប្រកាសចេញរថយន្តម៉ូដែល Orlando ស៊េរីឆ្នាំ២០២០ របស់ខ្លួនជាផ្លូវការ នៅក្នុងប្រទេសចិន។
រថយន្ត SUV ខ្នាតតូចនេះចែកចេញជា ២ ប្រភេទ គឺប្រភេទ ៥កៅអី និង ៧កៅអី ហើយប្រើម៉ាស៊ីនសាំងចំណុះ ១,៣លីត្រ Ecotec Turbocharged ទំហំ ៣ស៊ីឡាំង ជាមួយប្រព័ន្ធ Mild-Hybrid មានកម្លាំងសរុប ១៦១សេះ ប្រើប្រអប់លេខអូតូ ៦វគ្គ ប្រភេទ DSS។
ប្រព័ន្ធ Mild-Hybrid នៅលើរថយន្ត Orlando ផ្តល់ជម្រើសបើកបរ ៥ ដូចជា Auto Start, E-boost, Smart Charge, Brake Energy Regeneration និង E-idle។ វាមានកម្រិតស៊ីសាំងជាមធ្យមត្រឹមតែ ៦,១លីត្រ/១០០គីឡូម៉ែត្រ។
Chevrolet Orlando ឆ្នាំ២០២០ ត្រូវបានដាក់លក់ក្នុងតម្លៃ ១៩ ៣៥០ដុល្លារ សម្រាប់ប្រភេទ ៥កៅអី និង ២២ ៦០០ដុល្លារ សម្រាប់ប្រភេទ ៧កៅអី៕
BMW M8 Competition គឺជារថយន្តស្ព័រទ្វារពីរ ដែលមានសមត្ថភាពខ្លាំងក្លាមួយរបស់ BMW នាពេលបច្ចុប្បន្ន។ ម៉ាស៊ីន ៤,៤លីត្រ ៨ស៊ីឡាំង ប្រភេទ Twin-Turbocharged របស់វាអាចផលិតកម្លាំងបាន ៦១៧សេះ ដែលអាចឲ្យរថយន្តទម្ងន់ជាង ២តោននេះ អាចស្ទុះពី ០-៩៦ គ.ម/ម៉ ក្នុងពេលត្រឹម ៣វិនាទី។
រថយន្តនេះត្រូវបានគេយកសាកល្បងបើកបរនៅទីលាន Nurburgring ដើម្បីវាស់ពីសមត្ថភាពថាខ្លាំងកម្រិតណា។ ជាលទ្ធផល M8 Competition អាចបញ្ចប់ជុំលើទីលានដោយប្រើពេល ៧នាទី ៣២,៧៩ វិនាទី។
ការដែលអាចបញ្ចប់ជុំក្នុងពេលជាង ៧នាទីនេះ អាចបញ្ជាក់ថារថយន្ត M8 Competition គឺជារថយន្តដ៏ស្ទុះបំផុតមួយរបស់ BMW គឺលឿនជាងរថយន្ត BMW M5 នាពេលបច្ចុប្បន្ន។ ប៉ុន្តែវានៅចាញ់ BMW M4 GTS ដែលមានទម្ងន់ស្រាលជាង ដែលវាចំណាយពេល ៧នាទី និង ២៧,៨៨វិនាទី ដើម្បីបញ្ចប់ជុំ៕
Ford F-150 Raptor គឺជារថយន្តភីកអាប់កម្លាំងខ្លាំង និងមានរូបរាងយ៉ាងអង់អាចបំផុត ប៉ុន្តែមានប្រទេសជាច្រើនដែលមិនអាចរកទិញរថយន្តនេះបាន ក្នុងនោះមានប្រទេសថៃផងដែរ។ ដូចនេះទើបហាងមួយឈ្មោះ TTN Hypersport បានបង្កើតនូវ F-150 Raptor ផ្ទាល់ខ្លួន ដែលច្នៃចេញពី Ranger Raptor។
គេបានយក Ford Ranger Raptor ដែលមានលក់ទូលំទូលាយនៅប្រទេសថៃ មកកែមុខមាត់ឲ្យដូចជា F-150 Raptor យ៉ាងអ៊ីចឹង ខុសគ្នាតែទំហំរថយន្តប៉ុណ្ណោះ។ នៅផ្នែកខាងមុខគេបានប្ដូរមកប្រើប្រាស់អំពូលភ្លើងរបស់ F-150 Raptor, ប្ដូរកាងមុខ និងផ្ទាំងប៉ាណាយក្សដែលជាអត្តសញ្ញាណដ៏លេចធ្លោរបស់ F-150 Raptor។ នៅផ្នែកខាងក្រោយក៏មានការប្ដូរចង្កៀងមកប្រើម៉ូដដូចជា F-150 Raptor ផងដែរ។
ក្រៅពីការបន្ថែមគ្រឿងឲ្យ Ranger Raptor មានមុខមាត់ដូចជា F-150 Raptor ក្រុមហ៊ុន TTN Hypersport ក៏មានផ្ដល់ជូនអតិថិជននូវការលេងរថយន្តតាមចំណង់ចំណូលចិត្តរបស់ពួកគេ។ ឧទាហរណ៍ដូចឃើញក្នុងរូបភាព រថយន្តជាច្រើនគឺមានបំពាក់នូវកង់ដែលមានទំហំធំខុសពីធម្មតា ហើយទំនងជាមានការផ្លាស់ប្ដូរលើប្រព័ន្ធបូមផងដែរ។ ចំពោះតម្លៃនៃការកែមុខមាត់ពី Ranger Raptor ទៅជា F-150 Raptor គេមិនដឹងថាត្រូវចំណាយអស់ប៉ុន្មាននោះទេ ប៉ុន្តែលទ្ធផលឃើញថាជាទីពេញចិត្តតែម្ដង៕
រូបរាងរថយន្ត Lexus IS ស៊េរីឆ្នាំ២០២១ ត្រូវបានបែកធ្លាយនៅលើបណ្តាញអ៊ីនធឺណិត មុនពេលប្រកាសចេញប៉ុន្មានម៉ោងប៉ុណ្ណោះ។
រថយន្ត Lexus IS ថ្មីដែលនឹងត្រូវផ្លាស់ប្តូររូបរាងទាំងស្រុង នឹងត្រូវបង្ហាញខ្លួនជាផ្លូវការ នៅថ្ងៃទី១៥ ខែមិថុនា (ត្រូវនឹងថ្ងៃទី១៦ នៅកម្ពុជា) នេះ។
បើតាមរូបថតបែកធ្លាយនោះ បង្ហាញឲ្យឃើញថា រថយន្ត IS ថ្មី ទទួលបានការឌីហ្សាញថ្មីទាំងស្រុង ចាប់ពីផ្នែកខាងមុខ ចំហៀង និងក្រោយ ព្រមទាំងផ្នែកខាងក្នុងផងដែរ។
ទោះជាយ៉ាងណា នៅពេលនេះព័ត៌មានលម្អិតផ្លូវការអំពី Lexus IS ឆ្នាំ២០២១ នៅមិនទាន់ត្រូវបានបង្ហាញឡើយ ដូច្នេះយើងមានតែរង់ចាំថ្ងៃប្រកាសចេញផ្លូវការប៉ុណ្ណោះ៕
Ferrari 488 Pista គឺជារថយន្តស្ព័រកម្លាំងខ្លាំងដែលទាក់ទាញបំផុតមួយ ក្នុងចំណោមត្រកូល Ferrari។
ថ្មីៗនេះ គេបានប្រទះឃើញរថយន្ត Ferrari 488 Pista ដែលមានពណ៌បៃតង Verde Francesca យ៉ាងពិសេសនៅក្នុងប្រទេសអង់គ្លេស ហើយវាមានតែមួយគ្រឿងគត់លើពិភពលោក។
ពណ៌បេះតងលើរថយន្ត 488 Pista ខាងលើ ត្រូវបានបំផុសតាមពណ៌បៃតង Verde Tevere លើរថយន្ត Ferrari 250 SWB ដែលមានតែមួយគ្រឿងគត់ដែរលើលោក។
រថយន្ត Ferrari 488 Pista បំពាក់ម៉ាស៊ីនចំណុះ ៣,៩លីត្រ twin-turbocharged V8 មានកម្លាំង ៧១១សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹម ២,៨៥វិនាទី ហើយមានល្បឿនអតិបរមាដល់ ៣៤០គីឡូម៉ែត្រក្នុងមួយម៉ោង។
ទោះជាយ៉ាងណាក៏ដោយ គេមិនបានដឹងឡើយថា ទឹកថ្នាំដ៏ពិសេសពណ៌បៃតង Verde Francesca នោះ មានតម្លៃប៉ុន្មាន ប៉ុន្តែបើតាមមើលទៅ គឺវាមិនថោកឡើយ៕
