[ទីផ្សារបរទេស] កាលពីពេលថ្មីៗនេះ ក្រុមហ៊ុនផលិតរថយន្ត Toyota បានធ្វើការដាក់បង្ហាញចេញជាផ្លូវការនូវតម្លៃរបស់រថយន្ត Toyota 4Runner ជំនាន់ទី៦ ស៊េរីឆ្នាំ២០២៥ ផ្តល់ជូនជម្រើសថ្មីចំនួន ២ បន្ថែមរួមមាន Traihunter និង Platinum សរុបទាំងអស់ ៩ ជម្រើស ជាមួយតម្លៃលក់ចាប់ពី ៤០ ៧៧០ ដុល្លារ ដល់ ៦៦ ៩០០ ដុល្លារ នៅក្នុងទីផ្សារសហរដ្ឋអាមេរិក។

រថយន្តនេះ ត្រូវបានផលិតឡើងនៅលើគ្រោងឆ្អឹង TNGA-F platform មានប្រវែងតួខ្លួនសរុប ៤ ៩៥០ ម.ម ទទឹង ១ ៩៧៦ ម.ម កម្ពស់ ១ ៧៩៨ ម.ម ប្រវែងគម្លាយកង់មុខ-ក្រោយ ២ ៨៤៤ ម.ម និងកំពស់ពីដីទៅបាតរថយន្ត ២៣៣ ម.ម ដំណើរការដោយ៖

• ម៉ាស៊ីនសាំងចំណុះ ២,៤ លីត្រ Turbocharged ទំហំ ៤ស៊ីឡាំង អាចផលិតកម្លាំងបាន ២៧៨ សេះ និងកម្លាំងរមួល ៤២៩ ញ៉ូតុនម៉ែត្រ ភ្ជាប់ដោយប្រអប់លេខអូតូ ៨វគ្គ និងជម្រើសប្រព័ន្ធបើកបរប៉ុង ១ RWD និងប៉ុង ២ 4WD និងមានកម្រិតសុីប្រេងខ្ទង់ ១១,៧លីត្រ ក្នុងរយៈចម្ងាយបើកបរ ១០០គីឡូម៉ែត្រ។
• ម៉ាស៊ីនកូនកាត់ I-Force Max Hybrid ធ្វើការជាមួយម៉ាស៊ីនសាំងចំណុះ ២,៤ លីត្រ Turbocharged ទំហំ ៤ស៊ីឡាំង និងម៉ូទ័រអគ្គិសនីចំនួន១ អាចផលិតកម្លាំងបានសរុប ៣២៦ សេះ និងកម្លាំងរមួល ៦៣០ ញ៉ូតុនម៉ែត្រ ផ្គួបជាមួយអាគុយទំហំ ១,៨៧គីឡូវ៉ាត់ម៉ោង និងភ្ជាប់ដោយប្រអប់លេខអូតូ ៨វគ្គ និងជម្រើសប្រព័ន្ធបើកបរប៉ុង ១ RWD និងប៉ុង ២ 4WD ជាមួយប្រព័ន្ធចាក់សោរប៉ុងស្វ័យប្រវត្តិ និងមានកម្រិតសុីប្រេងខ្ទង់ ១០,២លីត្រ ក្នុងរយៈចម្ងាយបើកបរ ១០០គីឡូម៉ែត្រ។

សម្រាប់ការរចនាផ្នែកខាងក្រៅរបស់រថយន្ត Toyota 4Runner ជំនាន់ទី៦ ស៊េរីឆ្នាំ២០២៥ គឺមានការរចនាជាមួយរូបរាងហាប់ណែនជាងមុន ជាពិសេសបានបំពាក់ថាសកង់ស្រោបដោយសំបកប្រភេទ Off-Road ទំហំ ៣៣អ៊ីញ ចង្កៀងមុខ-ក្រោយ LED ព្រមទាំងទ្វារក្រោយបើក-បិទដោយថាមពលអគ្គិសនីជាដើម។ មិនត្រឹមតែប៉ុណ្ណោះ ក៏បានធ្វើឲ្យប្រសើរឡើងនៅប្រព័ន្ធជើងក្រោមដែលអាចលើកកំពស់បាន ២,០អ៊ីញផ្នែកខាងមុខ និង ១,៥អ៊ីញនៅផ្នែកខាងក្រោយដើម្បីផ្តល់ការបើកបរ Off-road កាន់តែមានភាពរលូតផងដែរ។

ចំពោះនៅផ្នែកខាងក្នុងវិញ ទទួលបានអេក្រង់កុងទ័របង្ហាញព័ត៌មានឌីជីថលទំហំ ៧អ៊ីញ ដល់ ១២,៣អ៊ីញ និងអេក្រង់កំសាន្ត touchscreen ទំហំ ៨អ៊ីញ​ ដល់ ១៤,០ អ៊ីញ អាចភ្ជាប់ដោយមុខងារ Apple CarPlay និង Android Auto ក៏ដូចជាកន្លែងសាកថ្មឥតប្រើខ្សែផងដែរ។ លើសពីនេះទៅទៀត ក៏មានមកជាមួយកញ្ចប់សុវត្ថិភាព Toyota Safety sense 3.0 ជាស្តង់ដារទៀតផង។ គួរបញ្ជាក់ថា សម្ភារៈ និងគ្រឿងបរិក្ខាគឺទទួលបានទៅតាមជម្រើស ឫក៏ Options ៕

ផ្ទាំងផ្សាយពាណិជ្ជកម្ម