[បរទេស] នៅក្នុងការទិញរថយន្ត Tesla ថ្មី ហើយលក់ត្រឡប់វិញដើម្បីរកប្រាក់ចំណេញអាចនឹងចប់នៅពេលដែលទិន្នន័យថ្មីបង្ហាញថាតម្លៃ Tesla មួយទឹកនៅសហរដ្ឋអាមេរិកបានធ្លាក់ចុះលឿនជាងបើប្រៀបធៀបទៅនឹងម៉ូដែលពីក្រុមហ៊ុនផលិតរថយន្តផ្សេងទៀត។
យោងតាមទិន្នន័យឧស្សាហកម្មពី Edmunds តម្លៃជាមធ្យមរបស់ Tesla មួយទឹកបានកត់ត្រាការធ្លាក់ចុះ ១៧% ដោយធ្លាក់ចុះពី ៦៧ ២៩៧ ដុល្លារក្នុងខែកក្កដាមកត្រឹម ៥៥ ៧៥៤ ដុល្លារក្នុងខែវិច្ឆិកា។ នេះគឺធំជាងការធ្លាក់ចុះតម្លៃរថយន្តមួយទឹកសរុប ៤% ក្នុងអំឡុងពេលដូចគ្នា។
ក្នុងរយៈពេល ២ ឆ្នាំចុងក្រោយនេះ Tesla បានដំឡើងតម្លៃរថយន្តថ្មីលឿនជាងក្រុមហ៊ុនផលិតរថយន្តផ្សេងទៀត ដែលឆ្លើយតបទៅនឹងតម្រូវការខ្ពស់សម្រាប់រថយន្តអគ្គិសនីដែលអាចបរបានចម្ងាយឆ្ងាយ ដោយសារការកើនឡើងតម្លៃប្រេងឥន្ធនៈ។
គួរឲ្យដឹងថា បច្ចុប្បន្ននេះ ការបន្ធូរបន្ថយតម្លៃប្រេងឥន្ធនៈ ក៏ដូចជាការកើនឡើងអត្រាការប្រាក់ និងការកើនឡើងនៃទិន្នផលផលិតកម្មរបស់ក្រុមហ៊ុន Tesla និងការប្រកួតប្រជែងរថយន្តអគ្គិសនី ដែលកំពុងកើនឡើងបានផ្លាស់ប្តូរតុល្យភាពរវាងការផ្គត់ផ្គង់ និងតម្រូវការដែលនាំឱ្យមានការធ្លាក់ចុះនៃតម្លៃ Tesla មួយទឹក។ ហេតុដូច្នេះហើយ ក្រុមហ៊ុនផលិតរថយន្តបានសម្របតាមស្តង់ដារថ្មីដោយផ្តល់ការបញ្ចុះតម្លៃរថយន្តថ្មីចំនួន ៧ ៥០០ ដុល្លារ សម្រាប់ Model 3 និង Model Y ដែលគ្រោងនឹងប្រគល់ជូនមុនដំណាច់ឆ្នាំ ២០២២ ក្នុងកិច្ចខិតខំប្រឹងប្រែងដើម្បីជំរុញតម្រូវការចុងឆ្នាំ។
មិនត្រឹមតែប៉ុណ្ណោះ លោក Elon Musk បានសារភាពថាក្រុមហ៊ុន Tesla ពិចារណាលើការបញ្ចុះតម្លៃរថយន្តថ្មី ដើម្បីរក្សាកំណើនបរិមាណ ដែលនឹងធ្វើឱ្យប្រាក់ចំណេញកាន់តែទាប។ ដូចដែលបានរាយការណ៍ដោយ Reuters ភាគហ៊ុន Tesla បានធ្លាក់ចុះ ៧,៣% ដល់កម្រិតទាបជាង ២ ឆ្នាំនៃ ១១៤,១២ ដុល្លារនៅក្នុងការជួញដូរដំបូងកាលពីថ្ងៃអង្គារដោយកត់ត្រាការធ្លាក់ចុះ ៦៥% ក្នុងឆ្នាំ ២០២២ ៕
