ឡានអគ្គិសនី Ford Bronco គ្រោងនឹងចេញលក់ក្នុងពេលឆាប់ៗនេះនៅសហរដ្ឋអាមេរិក

December 26, 2022

[បរទេស] បន្ទាប់ពីការចេញលក់ភីកអាប់អគ្គិសនីថ្មី Ford F-150 Lightning ខណៈពេលនេះ ក្រុមហ៊ុន Ford រៀបចំដាក់បង្ហាញរថយន្តអគ្គិសនី Bronco ជាមួយនឹងភីកអាប់អគ្គិសនី Ford Ranger ជាមួយការផលិតដែលរំពឹងទុកមិនលើសពីឆ្នាំក្រោយ ប៉ុន្តែការដាក់បង្ហាញអាចនឹងរង់ចាំរយៈពេល ២ ទៅ ៣ ឆ្នាំទៀត។

កាលពីឆ្នាំ ២០២១ កន្លងទៅ នាយកប្រតិបត្តិក្រុមហ៊ុន Ford Motor លោក Jim Farley ធ្លាប់បានណែនាំទៅកាន់នាយកផ្នែកទំនាក់ទំនងផលិតផលរបស់ Ford អាមេរិកខាងជើង លោក Mike Levine សម្រាប់ការកំណត់រចនាសម្ព័ន្ធ SUV Off-Road ដែលនឹងជា Ford Bronco EV ។

ក្រុមហ៊ុន FORD ត្រៀមខ្លួនរួចជាស្រេចសម្រាប់ការផលិតរថយន្តអគ្គិសនីយ៉ាងច្រើននៅលើគ្រោងឆ្អឹង EV platform ចំនួន ៥ ដែលគាំទ្រប្រភេទបើកបរប៉ុង ១ និងប៉ុង ២ ហើយគោលបំណងផលិតរថយន្តអគ្គិសនីជាង ៨០០ ០០០ គ្រឿងក្នុងមួយឆ្នាំ។

FORD ចូលរួមជាមួយក្រុមហ៊ុន BlueOvalSK ដើម្បីផលិតកោសិកាអាគុយថ្មី នៅក្នុងរោងចក្រចំនួន ២ នៅសហរដ្ឋអាមេរិក ក្រុមហ៊ុនក៏បានបង្ហាញពីផែនការសម្រាប់អាគុយ IonBoost lithium-ion, អាគុយ IonBoost Pro lithium-ion phosphate និងអាគុយដែលមានតម្លៃទាប។ វារួមបញ្ចូលគ្នានូវបច្ចេកវិទ្យា Solid Power ជាមួយនឹងបច្ចេកទេសវិស្វកម្មរបស់ក្រុមហ៊ុន Ford ហើយរំពឹងថាតម្លៃអាគុយនឹងធ្លាក់ចុះ ៤០% ដែលរំពឹងថាមុនឆ្នាំ ២០៣០ ។

គួរបញ្ជាក់ផងដែរថា សម្រាប់រថយន្តអគ្គិសនី Ford Bronco EV render រចនាដោយ KDesign AG ដោយប្រើគំនិតរចនា F-150 Lightning ជាពិសេស ចង្កៀងមុខខាងមុខ និងខាងក្រោយ បង្ហាញយ៉ាងល្អឥតខ្ចោះនូវអត្តសញ្ញាណរបស់រថយន្តអគ្គិសនី Ford ។

បច្ចុប្បន្ននេះ Bronco ភ្ជាប់មកជាមួយម៉ាស៊ីនសាំងចំនួនពីរគឺ ម៉ាស៊ីនសាំងចំណុះ ២,៣ លីត្រ ទំហំ ៤ ស៊ីឡាំង អាចផលិតកម្លាំងបាន ២៧០ សេះ និងកម្លាំងរមួល ៤២០ ញ៉ុតុនម៉ែត្រ និងម៉ាស៊ីនសាំងចំណុះ ២,៧ លីត្រ V6 ផលិតកម្លាំងបាន ៣១០ សេះ និងកម្លាំងរមួល ៥៤២ ញ៉ូតុនម៉ែត្រ ភ្ជាប់ដោយប្រអប់លេខដៃ ៧ វគ្គ និងប្រអប់លេខអូតូ ១០ វគ្គ អាចប្រើបានតែក្នុងប្រភេទបើកបរ 4×4 4-wheel drive៕

ផ្ទាំងផ្សាយពាណិជ្ជកម្ម

គូប្រជែង Ford Transit Custom របស់ Maxus ដាក់លក់ជាផ្លូវការនៅដើមឆ្នាំក្រោយ

December 26, 2022

[បរទេស] ក្រុមហ៊ុនផលិតរថយន្ត Maxus បានធ្វើការដាក់បង្ហាញចេញនៅរថយន្ត Maxus V70 ប្រភេទ minivan ថ្មី ដែលជាគូប្រកួតប្រជែងនឹងរថយន្ត Ford Transit Custom គ្រោងនឹងដាក់លក់នៅក្នុងប្រទេសចិននៅដើមឆ្នាំ ២០២៣។

រថយន្ត Maxus V70 មានប្រវែងតួខ្លួនសរុប ៤ ៩៩៨ ម.ម ទទឹង ២ ០៣០ ម.ម កំពស់ ២ ០៣៥ ម.ម និងប្រវែងគម្គាតកង់មុខ-ក្រោយ ៣ ០០០ ម.ម។ សម្រាប់ការរចនាមើលទៅទំនើបជាងការផ្តល់ជូនផ្សេងទៀតរបស់ Maxus ដោយមានបំពាក់ជាមួយប៉ាណាមុខបិទជិត, ចង្កៀងមុខប្រភេទ Matrix LED គ្រឿងបន្ថែមនៅលើកាងខាងក្រោម និងចង្កៀងខាងក្រោយដែលដាក់បញ្ឈរ ដែលភ្ជាប់តាមរយៈបន្ទះ LED នៅពីលើកញ្ចក់ខាងក្រោយ។

Maxus V70 មានទ្វាររូតសម្រាប់អ្នកដំណើរខាងក្រោយ និងទ្វារក្រោយជា ២ ផ្នែក។ នៅផ្នែកខាងក្នុងមានកៅអីសម្រាប់អ្នកដំណើរ ៦ នាក់ ដល់ ៩ នាក់។ Maxus មិនបានបង្ហាញរូបភាពនៅផ្នែកខាងក្នុងទេ ប៉ុន្តែរថយន្ត Minivan អាចត្រូវបានបំពាក់ដោយអេក្រង់កំសាន្ត touchscreen ដែលមានដូចជាថេប្លេត សោប៊្លូធូស កៅអីខាងមុខ និងដៃចង្កូតដែលមានមុខងារកម្ដៅ។

រថយន្ត Maxus V70 ផលិតនៅលើគ្រោងឆ្អឹងថ្មីរបស់ SAIC និងបំពាក់ជាមួយម៉ាស៊ីនម៉ាស៊ូតចំណុះ ២,០ លីត្រ turbocharged អាចផលិតកម្លាំងបាន ១២៥ សេះ ភ្ជាប់ដោយប្រអប់លេខស្វ័យប្រវត្តិ ៩ វគ្គ ដែលអនុញ្ញាតឱ្យមានល្បឿនអតិបរមា ១៥៦ គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Tesla បញ្ចុះតម្លៃឡានដល់ជិត១ម៉ឺនដុល្លារ មុនដាច់ឆ្នាំ២០២២

December 24, 2022

[ទីផ្សារបរទេស] បន្ទាប់ពីបានបញ្ចុះតម្លៃរថយន្ត Tesla Model 3 និង Model Y ចំនួន ៣៧៥០ដុល្លារ កាលពីដើមខែរួចមក ពេលនេះ Tesla បានផ្ដល់ជូនការបញ្ចុះតម្លៃកាន់តែច្រើនជាងមុនគឺចុះថ្លៃដល់ ៧៥០០ដុល្លារ ប្រសិនបើរថយន្តត្រូវបានដឹកជញ្ជូននៅសហរដ្ឋអាមេរិកមុនដាច់ខែធ្នូ។

ការបញ្ចុះតម្លៃនេះត្រូវបានបង្ហាញលើវិបសាយរបស់ក្រុមហ៊ុន Tesla និងក្រោយពីក្រុមហ៊ុនបានផ្ដល់ជូនការសាកភ្លើងចម្ងាយ ១ម៉ឺនម៉ាយ ដោយឥតគិតថ្លៃនៅស្ថានីយសាកភ្លើងល្បឿនលឿនរបស់ខ្លួន។

ការផ្ដល់ជូនទាំងពីរនេះគឺភ្ជាប់មកជាមួយគ្នាហើយវាមានសុពលភាពត្រឹមតែខែធ្នូនេះប៉ុណ្ណោះ ដែលមានន័យថា Tesla ព្យាយាមអូសទាញអតិថិជនបន្ថែមឲ្យទិញរថយន្តរបស់ខ្លួនមុនឆ្នាំថ្មីចូលមកដល់។

ការចុះផ្សាយរបស់ស្ថាប័នព័ត៌មានមួយចំនួនយល់ឃើញថាការបញ្ចុះតម្លៃនេះគឺជាការឆ្លើយតបរបស់ Tesla ចំពោះមតិអវិជ្ជមានជុំវិញការទិញយកបណ្ដាញសង្គម Twitter ពីសំណាក់លោក Elon Musk ដែលជានាយកប្រតិបត្តិ Tesla។ ក្រោយការទិញយក តម្លៃហ៊ុនរបស់ Tesla បានថយចុះដែលធ្វើឲ្យវិនិយោគិនព្រួយបារម្ភពីអនាគតរបស់ Tesla៕

ផ្ទាំងផ្សាយពាណិជ្ជកម្ម

ឡានអគ្គិសនី VinFast VF 8 បន្ថែមការបើកបរដល់ ៤០២ គីឡូម៉ែត្រពេលសាកថ្មម្តង

December 24, 2022

[បរទេស] កាលពីពេលថ្មីៗកន្លងទៅនេះ រថយន្តអគ្គិសនី VF 8 City Editions ចំនួន ៩៩៩ គ្រឿងដំបូងបានមកដល់សហរដ្ឋអាមេរិក ហើយឥឡូវនេះក្រុមហ៊ុនផលិតរថយន្តវៀតណាមបានធ្វើការបញ្ចេញនៅព័ត៌មានលម្អិតបន្ថែមអំពីរថយន្តនេះបន្ថែម។

ដោយចាប់ផ្តើមជាមួយនឹងម៉ូដែល VF 8 Eco City Edition មានបំពាក់ជាមួយម៉ូទ័រអគ្គិសនីចំនួន ២ ផ្គួបអាគុយទំហំ ៨២ គីឡូវ៉ាត់ម៉ោង អាចផលិតកម្លាំងបាន ៣៤៩ សេះ និងកម្លាំងរមួល ៥០០ ញ៉ូតុនម៉ែត្រប្រភេទបើកបរប៉ុង ២ វិលកង់ទាំងអស់ អាចបង្កើនល្បឿនពី ០-១០០ គីឡូម៉ែត្រ/ម៉ោងក្នុងរយៈពេលប្រហែល ៦,៥ វិនាទី និងអាចបើកបរបានចម្ងាយប្រហែល ២៨៨ គីឡូម៉ែត្រក្នុងការសាកថ្មម្តង។

លើសពីនេះ អតិថិជនក៏អាចទទួលបាន VF 8 Plus City Edition ផងដែរ ដែលបានបំពាក់ជាមួយម ដែលត្រូវបានធ្វើឱ្យប្រសើរឡើងជាមួយនឹងកម្លាំង ៤២០ សេះ និងកម្លាំងរមួល ៦១៩ ញ៉ូតុនម៉ែត្រ និងបានបន្ថែមល្បឿនដល់ទៅ ១០០ គីឡូម៉ែត្រ/ម៉ោង ចំណាយពេលប្រហែល ៥,៥ វិនាទី ខណៈដែលបើកបរបានចម្ងាយប្រហែល ២៨៨ គីឡូម៉ែត្រក្នុងការសាកថ្មម្តងដដែល។ VinFast បាននិយាយថា City Editions អាចសាកពី ១០% ទៅ ៧០% ក្នុងរយៈពេល ២៤ នាទី ឬតិចជាងនេះដោយប្រើសាកថ្មល្បឿនលឿន DC fast។

ម៉ូដែលនេះមានបំពាក់ជាមួយចង្កៀងប្រភេទ LED និងថាសកង់ស្ព័រទំហំ ១៩-២០ អ៊ីញ។ សម្រាប់ផ្នែកខាងក្នុង មានមកជាមួយកៅអីខាងមុខមានមុខងារកំដៅអាចលៃតម្រូវតាមថាមពលអគ្គិសនី ប្រព័ន្ធម៉ាស៊ីនត្រជាក់ ២ តំបន់ អេក្រង់កំសាន្ត touchscreen ទំហំ ១៥,៦ អ៊ីញ ឧបករណ៍បំពងសំឡេងចំនួន ៨-១០ ចំនុច ដំបូលកញ្ចក់បែប Panoramic sunroof និងទា្វរក្រោយបើក-បិទដោយថាមពលអគ្គិសនីផងដែរ។

សម្រាប់រថយន្ត VF 8 City Edition មានតម្លៃលក់ចាប់ពី ៥៥ ៥០០ ដុល្លារជាមួយថ្លៃដឹកជញ្ជូន ១ ២០០ ដុល្លារសម្រាប់ម៉ូដែល Eco និងមានតម្លៃចាប់ពី ៦២ ៥០០ ដុល្លារសម្រាប់ម៉ូដែល Plus City Edition។

ទាក់ទងផ្នែកប្រព័ន្ធសុវត្ថិភាពវិញ រថយន្តនេះមានមកជាមួយប្រព័ន្ធជំនួយពេលជាប់ស្តុប ប្រព័ន្ធផ្តល់សញ្ញាពេលមានឧបសគ្គមកពីខាងមុខ ប្រព័ន្ធផ្តល់សញ្ញាពេលរថយន្តចាកពីគន្លងផ្លូវ ប្រព័ន្ធកំណត់ល្បឿនថេរ និងប្រព័ន្ធសុវត្ថិភាពជាច្រើនទៀតក៏បានដាក់បញ្ចូលក្នុងរថយន្តនេះផងដែរ៕

ផ្ទាំងផ្សាយពាណិជ្ជកម្ម

នាយកជាន់ខ្ពស់ក្រុមហ៊ុនឡាន ទម្លាក់ការរំពឹងទុកចំពោះការគ្រប់គ្រងទីផ្សាររបស់ឡានអគ្គិសនី

December 24, 2022

[ទីផ្សារបរទេស] ការស្ទង់មតិប្រចាំឆ្នាំដែលធ្វើឡើងដោយស្ថាប័ន KPMG បានវិភាគលើការយល់ឃើញរបស់នាយកជាន់ខ្ពស់ចំនួនជាង ៩០០រូបនៃក្រុមហ៊ុនយានយន្ត។ នាយកជាន់ខ្ពស់ទាំងនេះជឿថារថយន្តអគ្គិសនីនឹងមានចំណែកទីផ្សារចន្លោះពី ១០% ទៅ ៤០% លើសកលលោកត្រឹមឆ្នាំ២០៣០ ជាការថយចុះពី ២០% ទៅ ៧០% ដែលពួកគេបានប៉ាន់ស្មានកន្លងមក។

សម្រាប់សហរដ្ឋអាមេរិកវិញ នាយកជាន់ខ្ពស់ទាំងនោះជឿថារថយន្តអគ្គិសនីនឹងមានចំណែក ៣៥% នៃទីផ្សាររថយន្តថ្មីត្រឹមឆ្នាំ២០៣០ ជាការថយចុះយ៉ាងគំហុកពីការប៉ាន់ស្មានកាលពីមួយឆ្នាំមុន ដែលជឿថារថយន្តអគ្គិសនីមានចំណែក ៦៥%។

ការស្ទង់មតិរបស់ KPGM បានរកឃើញថាមានការធ្លាក់ចុះគួរឲ្យកត់សម្គាល់ក្នុងការប៉ាន់ស្មានពីចំណែកទីផ្សាររថយន្តអគ្គិសនីនៅប្រទេសឥណ្ឌា ប្រេស៊ីល និងប្រទេសជប៉ុន។ នេះក៏ដោយសារបញ្ហាហេដ្ឋារចនាសម្ព័ន្ធនៅប្រទេសឥណ្ឌា ការផ្ដោតលើថាមពលជំនួសប្រេងឥន្ធនៈនៅប្រទេសប្រេស៊ីល និងក្រុមហ៊ុនរថយន្តជប៉ុនផ្ដល់អាទិភាពលើរថយន្ត Hybrid ជាងរថយន្តអគ្គិសនី ហើយពួកគេកំពុងសាកល្បងរថយន្តដែលដើរដោយថាមពលអ៉ីដ្រូហ្សែន។

ការស្ទង់មតិបានរកឃើញថា ៨២% នៃនាយកជាន់ខ្ពស់ជឿថារយៈពេល១០ឆ្នាំខាងមុខ រថយន្តអគ្គិសនីអាចនឹងត្រូវប្រើប្រាស់ដោយមិនមានការផ្ដល់ជូនពិសេស ហើយពួកវានឹងមានតម្លៃស្មើនឹងរថយន្តម៉ាស៊ីនពីស្តុង។

បន្ថែមពីនេះពួកគេជឿថា Tesla នឹងនៅតែក្រុមហ៊ុនផលិតរថយន្តអគ្គិសនីឈានមុខនៅឆ្នាំ២០៣០ ប៉ុន្តែក្រុមហ៊ុនដូចជា Audi, BMW, Ford, Honda និង BYD ត្រូវបានរំពឹងថានឹងអាចកាត់បន្ថយគម្លាតដ៏ឆ្ងាយនាពេលបច្ចុប្បន្នបាន ខណៈដែលក្រុមហ៊ុន Apple ត្រូវបានគេជឿថាអាចក្លាយជាក្រុមហ៊ុនផលិតរថយន្តអគ្គិសនីធំលំដាប់ទីបួននៅឆ្នាំ២០៣០៕

ផ្ទាំងផ្សាយពាណិជ្ជកម្ម

ជិះឡានអគ្គិសនី F-150 Lightning អាចសន្សំថ្លៃប្រេងបានជិត ៣ម៉ឺនដុល្លារ

December 23, 2022

[ទីផ្សារបរទេស] អ្នកប្រហែលជាធ្លាប់បានដឹងហើយថារថយន្តអគ្គិសនីបានចូលរួមចំណែកយ៉ាងធំក្នុងការជួយដល់បរិស្ថានធៀបនឹងរថយន្តម៉ាស៊ីនពីស្តុង ហើយពេលនេះ Ford បានចេញផ្សាយតួលេខបង្ហាញអំពីសមត្ថភាពការពារបរិស្ថាននៃរថយន្តអគ្គិសនីរបស់ខ្លួន។

ការសិក្សារបស់ Ford បានបង្ហាញថាប្រសិនបើអ្នកបើកបររថយន្តអគ្គិសនី និងប្រើប្រាស់ប្រភពភ្លើងក្នុងសហរដ្ឋអាមេរិកដើម្បីសាកវា អ្នកអាចកាត់បន្ថយការបញ្ចេញឧស្ម័នកាបូនឌីអុកស៊ីតបានរហូតដល់ ៦០% បើធៀបនឹងប្រភេទពីស្តុងនៃរថយន្តដែលអ្នកប្រើ។

Ford បានបង្ហាញថារថយន្ត F-150 Lightning អាចជួយកាត់បន្ថយការសាយភាយឧស្ម័នបាន ៧៨តោន ក្នុងវដ្ដជីវិតរបស់រថយន្តនេះ ខណៈដែលរថយន្ត Mustang Mach-E អាចជួយកាត់បន្ថយបាន ៤២តោន និងរថយន្ត E-Transit អាចជួយកាត់បន្ថយបាន ៥៥តោន។

តាមការចុះផ្សាយរបស់ Electrek ផ្អែកតាមការរកឃើញរបស់ Ford ឲ្យដឹងថារថយន្តភីកអាប់ F-150 Lightning អាចជួយឲ្យម្ចាស់រថយន្តសន្សំសំចៃថវិកាបាន ២៧ ២០០ដុល្លារ ពីការចំណាយលើប្រេង ៣៣ ២០០លីត្រ ក្នុងវដ្ដជីវិតនៃរថយន្ត ដោយផ្អែកលើតម្លៃប្រេងឥន្ធនៈបច្ចុប្បន្ន។

ដោយឡែកសម្រាប់រថយន្ត E-Transit អាចជួយសន្សំសំចៃថវិកាបាន ១៩ ២០០ដុល្លារ ពីការចំណាយលើប្រេងឥន្ធនៈ ២៣ ៤០០លីត្រ និងរថយន្ត Mustang Mach-E សន្សំសំចៃថវិកាបានជិត ១៥ ០០០ដុល្លារ ពីប្រេងសាំង ១៨ ៩០០លីត្រ៕

ផ្ទាំងផ្សាយពាណិជ្ជកម្ម

ឡានអគ្គិសនី Porsche Taycan សាកភ្លើងបានលឿនជាងពីរដងជាមួយដុំសាកថ្មី

December 23, 2022

[ទីផ្សារបរទេស] រថយន្ត Porsche Taycan ប្រហែលជារថយន្តអគ្គិសនីលឿនបំផុតមួយលើទីផ្សារ ប៉ុន្តែល្បឿនសាករបស់វាមិនសូវជាលឿនប៉ុន្មានឡើយ ដោយវាចំណាយពេលសាកភ្លើងចាប់ពី ៩ម៉ោង ដល់ ១០ម៉ោង ឯណោះ។

ពេលនេះដែរ Porsche បានណែនាំពីដុំសាកភ្លើងថ្មីកម្លាំង ១៩,២kW ខ្លាំងជាងមុនពីរដង អាចឲ្យរថយន្ត Porsche Taycan ដែលប្រើពេលសាក ៩,៥ម៉ោង កាលពីមុន នៅសល់ពេលត្រឹមតែ ៤,៨ម៉ោង ខណៈដែល Porsche Taycan Performance Battery Plus ដែលប្រើពេលសាក ១០,៥ម៉ោង ពេលនេះចំណាយពេលត្រឹម ៥,៣ម៉ោង។

ដើម្បីទទួលបានដុំសាកនេះ អតិថិជនត្រូវចំណាយប្រាក់ ១៨៥០,១៥ដុល្លារ លើការដំឡើង និងចំណាយលើថ្លៃពលកម្មរយៈពេលប្រមាណ ១២ម៉ោង ដែលសរុបតម្លៃគឺប្រមាណជាង ៤ពាន់ដុល្លារ។ អតិថិជនដែលទិញរថយន្ត Taycan ថ្មីអាចកុម្ម៉ង់រថយន្តជាមួយដុំសាកលឿននេះដោយបន្ថែមទឹកប្រាក់ ១៦៨០ដុល្លារ៕

ផ្ទាំងផ្សាយពាណិជ្ជកម្ម

ចូលឆ្នាំថ្មីភ្លាម! គំរូរថយន្តថ្មី ២ ម៉ូដែលរបស់ Honda នឹងបង្ហាញខ្លួនផ្លូវការ

December 23, 2022

[បរទេស] ក្រុមហ៊ុនផលិតរថយន្ត Honda នឹងចូលរួមពិរព័ណ៍រថយន្ត Tokyo Auto Salon ឆ្នាំ ២០២៣ ដែលនឹងប្រារព្ធឡើងចាប់ពីថ្ងៃទី ១៣ ដល់ថ្ងៃទី ១៥ ខែមករា ឆ្នាំ ២០២៣ ជាមួយនឹងរថយន្តជាច្រើនប្រភេទនៅក្នុងប្រទេសកំណើតរបស់ខ្លួន។

មិនត្រឹមតែប៉ុណ្ណោះ Honda នឹងដាក់បង្ហាញគំរូរថយន្តចំនួន ២ ម៉ូដែលជាលើកដំបូងគឺ CIVIC e:HEV SPORTS ACCESSORY CONCEPT និង ZR-V e:HEV SPORTS ACCESSORY CONCEPT នឹងគោលដៅដាក់បង្ហាញនៅឆ្នាំ ២០២៤។

សម្រាប់គំរូ Civic Sports e:HEV” បំពាក់ជាមួយម៉ាស៊ីនសាំងចំណុះ ២,០ លីត្រ ទំហំ ៤ ស៊ីឡាំង ដែលបានអភិវឌ្ឍថ្មី និងរួមបញ្ចូលជាមួយម៉ាស៊ីនកូនកាត់ hybrid កម្រិតខ្ពស់ផ្អែកលើរថយន្ត Civic និង ZR-V ដែលមានការបើកបរដ៏ទាក់ទាញ ។ សម្រាប់ CIVIC e:HEV SPORTS ACCESSORY CONCEPT វាសង្កត់ធ្ងន់ទៅលើភាពស្ព័រ ជាមួយនឹងគ្រឿងបន្ថែមបែបស្ព័រក្រោមប្រធានបទ “FEEL SPORTS” រូបរាងដ៏គួរឲ្យទំនើបរ និងការបើកបរកាន់តែសប្បាយ។

ខណៈគំរូ ZR-V e:HEV SPORTS ទទួលបានគំនិតនៃការរចនាបែប “Emotional Urban Sports” ក្រោមកញ្ចប់ MUGEN package ធ្វើឲ្យរូបរាងកាន់តែប្រណិត ជាមួយនឹងការតុបតែងបែបលក្ខណៈគ្រួសារ រួមទាំងការរចនាឡើងវិញនៅប៉ាពាមុខថ្មីដែលមានលក្ខណៈបែបស្ព័រទៅលើ កាងខាងមុខ កាងចំហៀង កាងខាងក្រោយថ្មីទាំងអស់ និងចង្កៀងក្រោយកពណ៌ខ្មៅ៕

ផ្ទាំងផ្សាយពាណិជ្ជកម្ម

Tesla ផ្តល់ជូនការសាកថ្ម Supercharge ជិះបានជាង ១០ ០០០ គីឡូម៉ែត្រដោយឥតគិតថ្លៃមុនដាច់ឆ្នាំ

December 23, 2022

[បរទេស] ក្រុមហ៊ុនផលិតរថយន្ត Tesla បានធ្វើការផ្តល់ជូនការសាក Supercharge ដែលអាចបើកបរបានចម្ងាយជាង ១៦ ០៩៣ គីឡូម៉ែត្រដោយឥតគិតថ្លៃ ដល់អតិថិជននៅសហរដ្ឋអាមេរិក និង ១០ ០០០ គីឡូម៉ែត្រដល់អតិថិជនក្នុងប្រទេសកាណាដា ដែលទទួលបានរថយន្ត Tesla ថ្មីនៅក្នុងខែនេះ។

ក្រុមហ៊ុន Tesla តែងតែជំរុញឲ្យមានការចែកចាយរថយន្តនៅចុងត្រីមាសនីមួយៗ ហើយជំរុញការលក់ជាមួយនឹងការលើកទឹកចិត្តផងដែរ។ ដោយក្នុងនោះ Tesla កំពុងផ្តល់ទៅលើ Model 3 និង Model Y នៅសហរដ្ឋអាមេរិករួចហើយដោយបញ្ចុះតម្លៃ ៧ ៥០០ ដុល្លារ សម្រាប់ការដឹកជញ្ជូននៅ ឬមុនថ្ងៃទី ៣១ ខែធ្នូ ហើយសង្ឃឹមថាការផ្តល់ជូន Supercharging ម៉ាយ/គីឡូម៉ែត្រ ដោយឥតគិតថ្លៃនឹងជួយបង្កើនការលក់បន្ថែមទៀត។

តាមពិតទៅ Tesla បានប្រកាសពីការផ្តល់ជូននេះដូចគ្នាទៅនឹងនៅចក្រភពអង់គ្លេសកាលពីសប្តាហ៍មុន ដោយបញ្ជាក់ថាពួកគេនឹងទទួលបានការសាកថ្ម Supercharge ដោយឥតគិតថ្លៃដែលអាចបើកបរបានចម្ងាយ ៩ ៦៥៦ គីឡូម៉ែត្រប្រសិនបើពួកគេដឹកជញ្ជូនមុនដំណាច់ឆ្នាំនេះ។

ការផ្តល់ជូនថ្មីរបស់ក្រុមហ៊ុន Tesla មានជាការធ្លាក់ចុះនៃតម្រូវការរថយន្តរបស់ក្រុមហ៊ុន។ នៅចុងត្រីមាសទី ៣ ក្រុមហ៊ុនបានចែកចាយរថយន្តចំនួន ៩០៨ ៥៧៣ គ្រឿង តិចជាងចំនួនដែលពួកគេបានចែកចាយនៅឆ្នាំ ២០២១។ នេះមានន័យថាគ្មានឱកាសដែលក្រុមហ៊ុននឹងសម្រេចបាននៅគោលដៅកើនឡើង ៥០% នៃការចែកចាយពីមួយឆ្នាំទៅមួយឆ្នាំ។

ខណៈដែរ ការផ្តល់ជូនការសាកថ្ម Supercharging ដោយឥតគិតថ្លៃនៅសហរដ្ឋអាមេរិក និងកាណាដា កើតឡើងភ្លាមៗបន្ទាប់ពី Tesla គ្រោងនឹងសាងសង់រោងចក្រថ្មីនៅក្នុងប្រទេសម៉ិកស៊ិកកូ។ ជាមួយគ្នានេះ ការផ្តល់ជូន Supercharging ឥតគិតថ្លៃនេះនឹងផុតកំណត់បន្ទាប់ពី ២ ឆ្នាំ ហើយមិនអាចផ្ទេរទៅម្ចាស់ថ្មីបានទេ៕

ផ្ទាំងផ្សាយពាណិជ្ជកម្ម

រថយន្ត Ford Territory ស៊េរីថ្មីឆ្នាំ២០២៣ រូបរាងថ្មីទាំងស្រុង ត្រូវបានដាក់សម្ពោធជាផ្លូវការនៅប្រទេសកម្ពុជា

December 23, 2022

នាថ្ងៃទី ២១ ខែធ្នូ ឆ្នាំ២០២២ កន្លងទៅនេះ ក្រុមហ៊ុន អ អិម អេ (ខេមបូឌា) បានបង្កើតនូវមហាព្រឹត្តិការណ៍ដ៏ធំសម្បើមជាថ្មីម្តងទៀតប្រចាំឆ្នាំនោះគឺការប្រារព្ធកម្មវិធីបើកបរសាកល្បង និងពិធីសម្ពោធជាផ្លូវការនៃរថយន្ត Ford Territory ស៊េរីថ្មីឆ្នាំ២០២៣ ដែលកម្មវិធីនេះបានប្រារព្ធធ្វើឡើងនៅ ដឹ ព្រេមៀ សេនធ័រ សែនសុខដែលមានភ្ញៀវកិត្តិយសអញ្ជើញចូលរួមប្រមាណជាង ៣ ៥០០នាក់។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖

ខ្ញុំមានសេចក្តីសោមនស្សរីករាយ ក្រៃលែងដែលទីបំផុតយើងបាននាំយកនូវរថយន្ត Ford Territory ស៊េរីឆ្នាំ២០២៣ នេះមកដល់ទីផ្សារនៃព្រះរាជាណាចក្រកម្ពុជាហើយ។ ខ្ញុំក៏សូមថ្លែងអំណរគុណ ដល់អតិថិជន Ford គ្រប់រូបដែលបានធ្វើការអត់ធ្មត់និង ទន្ទឹងរងចាំអស់រយៈពេលជាច្រើនខែ ដើម្បីក្លាយជាម្ចាស់រថយន្តទំនើបនេះ ។ រថយន្ត Ford Territory ស៊េរីឆ្នាំ២០២៣ នេះ ត្រូវបានផ្លាស់ប្តូររូបរាងថ្មីទាំងស្រុង ដែលមានភាពទំនើប ប្រណិតភាព ផាសុខភាព ងាយស្រួលក្នុងការបើកបរ។ លើសពីនេះទៅទៀត យើងក៏សង្ឃឹមយ៉ាងមុតមាំថា Ford Territory ស៊េរីឆ្នាំ២០២៣ នឹងមានវត្តមាននៅលើដងផ្លូវក្នុងពេលឆាប់ៗនេះ ហើយនឹងទទួលបាននូវការពេញចិត្ត ក៏ដូចជាការគាំទ្រពីសំណាក់អតិថិជនផងដែរ។

កម្មវិធីសម្ពោធជាផ្លូវការ និងការបើកបរសាកល្បងនៃ រថយន្ត Ford Territory ស៊េរីឆ្នាំ២០២៣ នេះ ប្រារព្ធឡើងក្នុងគោលបំណងដើម្បីឲ្យអតិថិជនយល់ជ្រាបកាន់តែច្បាស់ពីវត្តមាននៃកំពូលរថយន្តអេសយូវី SUV មួយនេះជាមួយនឹងរូបរាងថ្មីទាំងស្រុង និងទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Territory ស៊េរីថ្មីឆ្នាំ២០២៣ នេះដោយផ្ទាល់ជាមួយនឹងអ្នកជំនាញបច្ចេកទេសFord ដើម្បីសាកល្បងនូវមុខងារដ៏ថ្មីស្រឡាង ប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយដែលបានបំពាក់នៅលើរថយន្តនេះ ។

កាន់តែពិសេសនោះគឺ ផ្នែកខាងក្រៅនៃរថយន្ត Ford Territory ស៊េរីឆ្នាំ២០២៣ នេះ ត្រូវបានរចនារូបរាងថ្មីទាំងស្រុង ជាមួយនឹងចង្កៀងមុខដែលមានភ្លើងបំភ្លឺពេលថ្ងៃ អំពូលកាត់អ័ព្ទ និងចង្កៀងខាងមុខជាប្រភេទ LED បិទនិងបើកហ្វាកូដដោយស្វ័យប្រវត្ត ជាមួយមុខងារ (Follow Me Home) ចង្កៀងក្រោយជាប្រភេទ LED បែប 3D ដែលមានពន្លឺភ្លឺច្បាស់ល្អ។ មិនតែប៉ុណ្ណោះ Ford Territory ស៊េរីឆ្នាំ២០២៣ នេះ ក៏មានបំពាក់នូវ សែនសឺចំនួន ១២គ្រាប់ជុំវិញរថយន្ត ផ្លឹតទឹកអូតូ និង កញ្ចក់ក្តោបអូតូ ដែលជួយអោយការបើកបរកាន់តែមានភាពឆ្លាតវៃ។

ចំណែកឯផ្នែកខាងក្នុងនៃរថយន្តនេះវិញ ត្រូវបានរចនាម៉ូដប្រណិត ធំទូលាយ ប្រកបដោយផាសុខភាព ដែលមានដូចជា៖

កៅអីបែបប្រណិតដែលបានបំពាក់នូវមុខងារកៅអីត្រជាក់ផ្នែកខាងមុខ
ដំបូលកញ្ចក់ធំអាច បិទនិងបើកបាន និងពោងសុវត្ថិភាពជុំវិញរថយន្ត
រថយន្តនេះក៏បានបំពាក់នូវកុងទ័រឌីជីថលទំនើបទាន់សម័យទំហំ ១២,៣អ៊ីញ
អេក្រង់ Touch Screen កណ្តាលទំហំ ១២ អ៊ីញ ជាមួយប្រព័ន្ធ Wireless Apple CarPlay និង Android Auto
ចង្កឹះលេខអេឡិចត្រូនិច E-Shifter ដែលអាចធ្វើការដោយស្វ័យប្រវត្ត

ប្រព័ន្ធហ្វ្រាំងដៃអេឡិចត្រូនិចស៊េរីថ្មី
ប្រព័ន្ធសាកទូរស័ព្ទឥតខ្សែ (Wireless Charging)
ចង្កូតអេឡិចត្រូនិច (EPAS) ធូរងារស្រួលពេលបើកបរ
ប្រព័ន្ធបន្សុទ្ធខ្យល់ PM 2.5 និងគ្រប់គ្រងសីតុណ្ហភាពដោយស្វ័យប្រវត្ត
ប្រព័ន្ធចុចបញ្ឆេះរថយន្ត (Smart key)
កញ្ចក់មើលក្រោយកាត់បន្ថយចំណាំងផ្លាត (Auto-Dimming)

ជាពិសេសនោះគឺអតិថិជននឹងពេញចិត្តជាមួយនឹងកម្លាំងម៉ាស៊ីនថ្មីនៃរថយន្ត Ford Territory ស៊េរីថ្មីឆ្នាំ២០២៣ ដែលម៉ាស៊ីនជំនាន់ថ្មីនេះជាប្រភេទម៉ាស៊ីនសាំង ១,៥L EcoBoost ដែលអាចផលិតកម្លាំងសេះបានរហូតដល់ទៅ ១៦៣PS និងកម្លាំងរមួលកង់រហូតដល់ទៅ ២៥០Nm និងប្រអប់លេខស្វ័យប្រវត្ត ៧វគ្គ ដែលផ្តល់នូវសន្ទុះខ្លាំងក្នុងការបើកបរ។

មិនតែប៉ុណ្ណោះនៅមានមុខងារប្រព័ន្ធសុវត្ថិភាព និងបច្ចេកវិទ្យាទំនើបៗចុងក្រោយ ជាច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬ អ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់ និង ទៅមុខដោយស្វ័យប្រវត្តតាមរថយន្តខាងមុខ និងតម្រង់គន្លងផ្លូវ
ប្រព័ន្ធផ្តល់សញ្ញាគ្រោះថ្នាក់ពេលបើកទ្វារថយន្ត
អ្វីដែលអតិថិជននឹងពេញចិត្តខ្លាំងមួយទៀតនោះគឺ ប្រព័ន្ធបើក និងបិទឃ្លុបក្រោយដោយស្វ័យប្រវត្តដោយគ្រាន់តែគ្រវាសជើង
អ្វីដែលកាន់តែអស្ចារ្យនោះគឺរថយន្ត Ford Territory ស៊េរីថ្មីឆ្នាំ២០២៣ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពីចំណតដោយស្វ័យប្រវត្ត និងមានប្រព័ន្ធកាំមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត ជាមួយនឹងអេក្រង់ Touchscreen ១២អ៊ីញ។

រថយន្ត Ford Territory ស៊េរីថ្មីឆ្នាំ ២០២៣ មានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ទៅ ៦ ជម្រើសរួមមាន៖ ពណ៌ក្រហម ខៀវ ខ្មៅ ទឹកមាស សូកូឡា និងពណ៌ស។ ជាមួយនឹងតម្លៃពិសេសត្រឹមតែ ៤៨ ៩០០ ដុល្លាតែប៉ុណ្ណោះ។

សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរ និងបើកបរសាកល្បងរថយន្ត Ford Territory ស៊េរីថ្មីឆ្នាំ ២០២៣ នៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999 | 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883៕

ផ្ទាំងផ្សាយពាណិជ្ជកម្ម