ជារៀងរាល់ឆ្នាំក្រុមហ៊ុន Interbrand របស់សហរដ្ឋអាមេរិកតែងតែចេញផ្សាយការសិក្សាអំពីម៉ាកសញ្ញាដែលមានតម្លៃដាច់គេលើលោកទាំង១០០ ហើយលទ្ធផលនាឆ្នាំនេះឃើញថា Mercedes នៅតែកាន់កាប់តំណែងជាម៉ាករថយន្តប្រណីតដែលមានតម្លៃជាងគេលើលោក។

ជាក់ស្ដែងតម្លៃនេះម៉ាក Mercedes-Benz មានការកើនឡើង ៣% ធៀបនឹងឆ្នាំ២០២០ បានកើនឡើងដល់ ៥០,៨៦ពាន់លានដុល្លារ។ នេះមានន័យថា Mercedes-Benz នៅតែអាចរក្សាតំណែងជាម៉ាករថយន្តប្រណីតដែលមានតម្លៃជាងគេ ដែលនេះគឺជាឆ្នាំទី៦ហើយ ហើយមានតែម៉ាក Mercedes-Benz ប៉ុណ្ណោះដែលជាម៉ាករថយន្តប្រណីតអាចស្ថិតនៅក្នុងលំដាប់ថ្នាក់កំពូលទាំង១០នៃការសិក្សារបស់ Interbrand។

យ៉ាងណាក្ដី បើគិតជាទូទៅ Mercedes-Benz មិនមែនជាម៉ាករថយន្តដែលមានតម្លៃជាងគេនោះទេ ដែលតំណែងនេះគឺបានលើក្រុមហ៊ុន Toyota ទៅវិញ ដែលម៉ាកសញ្ញានៃក្រុមហ៊ុននេះមានតម្លៃ ៥៤,១ពាន់លានដុល្លារ កើនឡើង ៥%។

ដោយឡែកបើនិយាយតែពីម៉ាករថយន្តប្រណីត គូប្រជែងដែលស្ថិតនៅកៀកនឹង Mercedes-Benz ជាងគេគឺ BMW ដែលស្ថិតនៅលំដាប់ថ្នាក់លេខ១២ ជាមួយម៉ាកសញ្ញាមានតម្លៃ ៤១,៦ពាន់លានដុល្លារ ដែលមានកំណើន ៥%៕

ផ្ទាំងផ្សាយពាណិជ្ជកម្ម

រថយន្ត Rivian R1T ចាប់ផ្ដើមបញ្ចេញលក់លើទីផ្សារសហរដ្ឋអាមេរិកជាបណ្ដើរៗហើយ ដោយរថយន្ត R1S នឹងចេញ​លក់​នាពេលបន្ទាប់ក្នុងពេលឆាប់ៗខាងមុខនេះ។ យ៉ាងណាក្ដីរថយន្តទាំងពីរនេះ មិនមែនជាកិច្ចការអាទិភាពធំសំខាន់របស់ Rivian នោះឡើយ ដោយរថយន្តវ៉ែនអគ្គិសនីដែលផលិតឡើងជាពិសេសសម្រាប់ Amazon ឯណោះទេ ដែលជាអាទិភាពសំខាន់របស់ក្រុមហ៊ុននាពេលនេះ។

នៅត្រឹមដំណាច់ឆ្នាំ២០២២ ក្រុមហ៊ុន Rivian បានចុះកុងត្រា​ជាមួយ Amazon ក្នុងការផ្គត់ផ្គង់រថយន្តវ៉ែន​អគ្គិសនីចំនួន ១ម៉ឺនគ្រឿង ហើយនៅចុងសតវត្សឆ្នាំ២០២០នេះ តួលេខនេះនឹងកើនឡើងរហូតដល់ចំនួនសរុប ១០ម៉ឺនគ្រឿង។ ហេតុនេះហើយធ្វើឲ្យរថយន្តវ៉ែននេះក្លាយជាអាទិភាពធំជាងគេរបស់ Rivian។

ដោយឡែក បើតាមឯកសារ​ VIN ដែលចុះបញ្ជីជាមួយស្ថាប័ន NHTSA របស់អាមេរិក កាលពីពេលថ្មីៗនេះ បានឲ្យដឹងច្បាស់ថារថយន្តវ៉ែនអគ្គិសនីនេះ នឹងមានឈ្មោះថា 700 Van និង 500 Van មិនមែនឈ្មោះថា “RCV” ដូចដែលលេចឮតាមពាក្យចចាមអារ៉ាមកន្លងមកនោះទេ។

ឯកសារ VIN ដដែលបានបង្ហាញថារថយន្តវ៉ែននេះមានជម្រើស៤ប្រភេទ ដោយមានប្រភេទប្រើម៉ូទ័រអគ្គិសនីពីរ AWD, ប្រភេទប្រើម៉ូទ័រអគ្គិសនីពីរ FWD និងប្រភេទប្រើម៉ូទ័រមួយ FWD។ ប្រសិនបើគ្រប់យ៉ាងអាចដំណើរការទៅតាមផែនការ នោះគម្រោងការរវាង Rivian និង Amazon មួយនេះ នឹងធ្វើឲ្យក្រុមហ៊ុនទាំងពីរឈានមុខគូប្រជែងក្នុងវិស័យដឹកជញ្ជូនទំនិញតាមរថយន្តវ៉ែន៕

ផ្ទាំងផ្សាយពាណិជ្ជកម្ម

ចំនួននៃការនាំចូលរថយន្តរបស់វៀតណាមពីប្រទេសថៃ និងឥណ្ឌូនេស៊ី ក្រោយរយៈពេល ៩ខែនៃឆ្នាំ២០២១ បានកើនឡើងរហូត៩១ ២៦១គ្រឿង ស្មើ ៦២ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ២០២០។

យោងតាមអគ្គនាយកដ្ឋានគយ ក្នុងខែកញ្ញាក្រុមហ៊ុនវៀតណាមបាននាំចូលរថយន្ត CBU( Completely Built Up) គ្រប់ប្រភេទចំនួន ៨ ៦៦៩ គ្រឿង ស្មើនឹងប្រមាណ ១៩៧ លានដុល្លារអាមេរិក។ បើ​ធៀប​នឹង​ខែ​មុន រថយន្ត​ដែល​នាំ​ចូល​បាន​ថយ​ចុះចំនួន ១៥%។

ជាក់ស្តែងប្រទេសវៀតណាមបាននាំចូលរថយន្តពីប្រទេសចំនួន៣ រួមមាន ឥណ្ឌូនេស៊ីចំនួន ៣ ៥៥៣គ្រឿង, ថៃចំនួន ៣ ២៩៤គ្រឿង និងប្រទេសចិនចំនួន ១ ០៤១គ្រឿង។ ចំនួននៃការនាំចូលពីទីផ្សារទាំង ៣នេះមានចំនួន ៩១ភាគរយ នៃចំនួនរថយន្តសរុបដែលបាននាំចូលទៅកាន់ប្រទេសវៀតណាមក្នុងខែនេះ។

ទោះបីជាចំនួនរថយន្តនាំចូលក្នុងខែកញ្ញាមានការថយចុះ បើធៀបនឹងខែសីហាក៏ដោយ ក៏ចំនួននៅតែកើនឡើងបើធៀបនឹងរយៈពេលដូចគ្នាកាលពីឆ្នាំមុន។ ជាក់ស្តែង ចំនួនរថយន្តនៅរយៈពេល៩ខែដែលនាំចូលទៅប្រទេសវៀតណាមមានដល់ទៅ ១១៤ ៣៧៧ គ្រឿង កើនឡើង ៧១,៥% ធៀបនឹងរយៈពេលដូចគ្នាក្នុងឆ្នាំ ២០២០។ ដោយឡែកសម្រាប់រថយន្ត (៩ កៅអី ឬតិចជាងនេះ) មានចំនួននាំចូល ៧៨ ២៨២ គ្រឿង កើនឡើង ៥៧,៨ភាគរយ។

នៅក្នុងនោះផ្នែកគ្រឿងបន្លាស់ ក្នុងរយៈពេល ៩ ខែនៃឆ្នាំ ២០២១ ក្រុមហ៊ុនក្នុងប្រទេសវៀតណាមបាននាំចូលចំនួន ៣,៧ ពាន់លានដុល្លារ កើនឡើង ៣៩,៨ភាគរយ ស្មើនឹងការកើនឡើងចំនួន ១,០៥ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

ដូចដែលបានព្យាករណ៍ដោយអ្នកជំនាញឧស្សាហកម្ម ចំនួនរថយន្តដែលបាននាំចូលទៅប្រទេសវៀតណាមនៅតែបន្តកើនឡើង បើទោះបីជាក្រុមហ៊ុនជាច្រើនបានប្តូរទៅដំឡើងរថយន្តក្នុងស្រុកក៏ដោយ។ នេះបង្ហាញថារថយន្តដែលនាំចូលនៅតែដើរតួនាទីយ៉ាងសំខាន់ក្នុងរចនាសម្ព័ន្ធអាជីវកម្មរបស់ក្រុមហ៊ុនផលិតរថយន្ត៕

ផ្ទាំងផ្សាយពាណិជ្ជកម្ម

យោងតាមប្រភពព័ត៌មានបានឲ្យដឹងថា រថយន្តមួយក្នុងចំណោមរថយន្តចំនួន ៥គ្រឿង ដែលត្រូវបានលក់នៅក្នុងតំបន់អឺរ៉ុប នាត្រីមាសទី៣ ឆ្នាំ២០២១ នេះ គឺជារថយន្តអគ្គិសនី ខណៈដែលការលក់នៃរថយន្តអគ្គិសនីបន្តកើនឡើង ស្របពេលដែលរថយន្តដែលប្រើប្រេងឥន្ធនៈបានធ្លាក់ចុះ។

សមាគមក្រុមហ៊ុនផលិតរថយន្តអឺរ៉ុប European Automobile Manufacturers’ Association ឬហៅកាត់ថា ACEA ដែលតំណាងឲ្យក្រុមហ៊ុនផលិតរថយន្ត, រថយន្តដឹកទំនិញ, រថយន្តវ៉ែន និងរថយន្តក្រុងធំៗនៅអឺរ៉ុប បាននិយាយថា ការលក់រថយន្តអគ្គិសនី និង Plug-in Hybrid នៅទូទាំងសហភាពអឺរ៉ុប មានចំនួន ១៩ភាគរយនៃការលក់ទាំងអស់។

គួរឲ្យដឹងថា ការលក់រថយន្តអគ្គិសនីបានកើនឡើងជិត ៥៧ភាគរយ ដល់ជាង ២១២ ០០០ គ្រឿង ខណៈដែលរថយន្ត Plug-in Hybrid បានកើនឡើងជិត ៤៣ ភាគរយ ដល់ជាង ១៩៧ ០០០ គ្រឿង។

គួររំលឹកឲ្យដឹងដែរថា កាលពីជាង ១០ឆ្នាំមុន រថយន្តម៉ាស៊ូតរួមចំណែកច្រើនជាង ៥០ ភាគរយនៃការលក់សរុបនៅអឺរ៉ុប ប៉ុន្តែមានចំនួនតិចជាង ១៨ ភាគរយ គិតក្នុងត្រីមាសទី៣ នៃឆ្នាំ២០២១ នេះ៕

ផ្ទាំងផ្សាយពាណិជ្ជកម្ម