គ្រោះថ្នាក់ចរាចរណ៍រវាង Bugatti Chiron និង Chiron ធ្វើឲ្យខូចខាតទ្រព្យតម្លៃ ៤លានដុល្លារ

August 15, 2020

គ្រោះថ្នាក់ចរាចរណ៍មួយដែលបានកើតឡើងក្នុងតំបន់ Gotthard Pass ប្រទេសស្វីសកាលពីថ្មីៗកន្លងទៅនេះ មានទំហំខូចខាតស្មើនឹងទឹកប្រាក់ ៣,៧លានអឺរ៉ូ (ប្រមាណជាង ៤លានដុល្លារ)។

ទំហំខូចខាតមានច្រើនក៏ដោយសារក្នុងនោះមានរថយន្ត Bugatti Chiron ថ្មីមួយគ្រឿងដែលវាមានតម្លៃមិនក្រោម ៣លានដុល្លារនោះទេ។ ក្រៅពីរថយន្ត Bugatti Chiron ក៏មានការជាប់ពាក់ព័ន្ធជាមួយរថយន្តផ្ទះចល័តមួយ រថយន្ត Mercedes-Benz C-Class និងរថយន្ត Porsche 911 Cabriolet ផងដែរ។

ការចុះផ្សាយរបស់សារព័ត៌មានក្នុងស្រុកបានឲ្យដឹងថា រឿងរ៉ាវកើតឡើងដោយសាររថយន្តផ្ទះចល័តបើកបរយឺតពេក ហើយអ្នកបើកបររថយន្ត Bugatti ដែលបើកពីក្រោយ Porsche និង Mercedes-Benz ក៏សម្រេចចិត្តឡើងវ៉ារថយន្តទាំងបីនៅខាងមុខ។ ពេលជាមួយគ្នានោះរថយន្ត Porsche ក៏ចង់វ៉ាដែរ ទើបបណ្ដាលឲ្យ Bugatti ទៅប៉ះពៀរនឹងរថយន្ត Porsche ហើយរថយន្ត Porsche ទៅប៉ះរថយន្តដទៃទៀតនៅខាងមុខតែម្ដងទៅ។

ត្បិតថារថយន្ត Porsche រងគ្រោះធ្ងន់ជាងគេ ប៉ុន្តែអ្នកបើកបររថយន្ត Mercedes-Benz ទំនងជាមនុស្សតែម្នាក់គត់ដែលរងរបួសធ្ងន់ ហើយត្រូវបានប្រញាប់បញ្ជូនទៅកាន់មន្ទីរពេទ្យដែលនៅក្បែរភ្លាមៗ៕

ផ្ទាំងផ្សាយពាណិជ្ជកម្ម

Hyundai ចេញឡាន Elantra N Line ឆ្នាំ២០២១ ថ្មី មានទាំងជម្រើសលេខដៃទៀត!

August 15, 2020

ក្រុមហ៊ុន Hyundai បានប្រកាសចេញរថយន្ត Elantra N Line ស៊េរីឆ្នាំ២០២១ ជាផ្លូវការ ដោយបានអាប់ដេតលើការឌីហ្សាញ និងធ្វើឲ្យដំណើរការរបស់វា កាន់តែប្រសើរថែមទៀតផង។

រថយន្ត Elantra N Line បំពាក់ម៉ាស៊ីនចំណុះ ១,៦លីត្រ GDI turbocharged ទំហំ ៤ស៊ីឡាំង មានកម្លាំង ២០១សេះ ហើយមានទាំងជម្រើសលេខដៃ ៦វគ្គ ឬលេខអូតូ dual-clutch និងប្រើប៉ុងមួយវិលកង់មុខ។

បើនិយាយពីផ្នែកសុវត្ថិភាពវិញ Elantra N Line មានបំពាក់មុខងារជាច្រើន ដូចជា Forward Collision-Avoidance Assist, Lane Keeping Assist, Lane Following Assist, High Beam Assist, Driver Attention Warning និង Blind Spot Collision-Avoidance Assist with Rear Cross-Traffic Collision-Avoidance Assist ផងដែរ។

ទោះជាយ៉ាងណា ក្រុមហ៊ុន Hyundai មិនទាន់បានប្រកាសថ្លៃចេញលក់ជាផ្លូវការ ក៏ដូចជាតម្លៃលក់របស់វានៅឡើយទេ៕

ផ្ទាំងផ្សាយពាណិជ្ជកម្ម

BMW M5 ប្រើអគ្គិសនីសុទ្ធ កម្លាំង១០០០សេះ អាចនឹងកើតមាន!

August 15, 2020

យោងតាមប្រភពព័ត៌មានបានឲ្យដឹងថា ក្រុមហ៊ុន BMW កំពុងតែសម្ងំធ្វើការលើរថយន្ត M5 ប្រភេទ Hybrid និងអគ្គិសនីសុទ្ធ។

របាយការណ៍ខាងលើបានបន្ថែមទៀតថា BMW 5-Series ជំនាន់ថ្មី នឹងចេញនៅត្រីមាសទី៣ នៃឆ្នាំ២០២៣ ហើយរយៈពេល ១ឆ្នាំក្រោយមក រថយន្ត M5 ជំនាន់ថ្មីក៏នឹងបង្ហាញខ្លួនដែរ។

គេហទំព័រ Car Magazine អះអាងថា ជម្រើសម៉ាស៊ីនចំនួន ២ នឹងត្រូវផ្តល់ឲ្យ ដោយក្នុងនោះ ទី១ គឺ Plug-in Hybrid ដែលគួបផ្សំម៉ាស៊ីន turbocharged V8 ជាមួយម៉ូទ័រអគ្គិសនីច្រើនគ្រឿង ដើម្បីអាចបង្កើតកម្លាំងបាន ៧៥០សេះ។

ដោយឡែក ជម្រើសទី២ គឺ ដំណើរការដោយថាមពលអគ្គិសនីសុទ្ធ ដែលមានកម្លាំងរហូតដល់ទៅ ១ ០០០សេះ ហើយអាចបើកបរបានចម្ងាយ ៧០០គីឡូម៉ែត្រ រាល់ពេលសាកភ្លើងពេញម្តង៕

ផ្ទាំងផ្សាយពាណិជ្ជកម្ម

ឡានអគ្គិសនី Hyundai សាកភ្លើងពេញជិះបានលើស ១ពាន់គីឡូម៉ែត្រ

August 14, 2020

Hyundai សាងបានកំណត់ត្រារយៈចម្ងាយថ្មីមួយសម្រាប់រថយន្តអគ្គិសនី Kona Eletric ចំនួនបីគ្រឿង ដែលបានធ្វើតេស្តរយៈពេល ៣ថ្ងៃ នៅលើទីលានប្រណាំងរថយន្ត Lausitzring នៅប្រទេសអាល្លឺម៉ង់។

នៅចុងបញ្ចប់នៃការធ្វើតេស្ត រយៈ Kona Electric នីមួយៗសុទ្ធតែអាចជិះបានចម្ងាយលើសពី ១០០០ គីឡូម៉ែត្រ សម្រាប់ការសាកថ្មពេញម្ដង ដោយពួកវាអាចជិះបានចម្ងាយ ១០១៨,៧គ.ម ១០២៤,១គ.ម និងមួយទៀតជិះបាន ១០២៦គ.ម។

ការធ្វើតេស្តរបស់ Hyundai លើរថយន្ត Kona Electric បានចំណាយពេលសរុបជិត ៣៥ម៉ោង ដែលក្នុងនោះមានក្រុមចំនួនបី មានពីរក្រុមមកពី Hyundai និងមួយទៀតមកពី AutoBild ហើយបានត្រួតពិនិត្យដោយក្រុមហ៊ុន Dekra ជាក្រុមហ៊ុនត្រួតពិនិត្យរថយន្តនៅអឺរ៉ុប។ ម៉ាស៊ីនត្រជាក់ និងប្រព័ន្ធកម្សាន្តត្រូវបានបិទពេលធ្វើតេស្ត ប៉ុន្តែមានបើកភ្លើងបំភ្លឺពេលថ្ងៃដើម្បីអនុលោមតាមច្បាប់អឺរ៉ុប។

ចុងបញ្ចប់នៃការធ្វើតេស្ត បានឆ្លងកាត់ការប្ដូរអ្នកបើកបរចំនួន ៣៦នាក់ ហើយរថយន្តនីមួយៗជាមធ្យមមានបើកបរក្នុងល្បឿន ២៩ ទៅ ៣១ គ.ម/ម៉។ ផ្អែកតាម Hyundai បានឲ្យដឹងថា ល្បឿនដែលបើកបរនេះគឺជាល្បឿនដែលគេបើកបរក្នុងទីក្រុងនៅអឺរ៉ុប៕

ផ្ទាំងផ្សាយពាណិជ្ជកម្ម

មើល Rolls-Royce សាកកម្លាំងជាមួយ Lamborghini លទ្ធផលយ៉ាងណា?

August 14, 2020

រថយន្ត Rolls-Royce Wraith និង Lamborghini Urus ត្រូវបានគេយកសាកល្បងកម្លាំងគ្នា ដោយចង់ដឹងថារថយន្តណាអាចជិះដល់ទីមុនលើដីចម្ងាយ ៤០០ម៉ែត្រ។

ដំបូងមកដឹងសិនថា រថយន្ត Lamborghini Urus បានកែម៉ាស៊ីនមកប្រើម៉ាស៊ីន Twin-Turbocharged ចំណុះ ៤,០លីត្រ ៨ស៊ីឡាំង ដែលផលិតកម្លាំងបាន ៧៥០សេះ ឯណោះ ដែលម៉ាស៊ីននេះបានកែច្នៃដោយក្រុមហ៊ុន Hennessey អ្នករៀបចំការសាកកម្លាំងនេះផ្ទាល់។

ចំណែករថយន្ត Rolls-Royce Wraith វិញមានទម្ងន់ធ្ងន់ជាងរថយន្ត Urus ប្រមាណ ២៣០គីឡូក្រាម ប៉ុន្តែមានបំពាក់ដោយម៉ាស៊ីនកម្លាំងខ្លាំងជាប្រភេទ Twin-Turbocharged ចំណុះ ៦,៦លីត្រ ១២ស៊ីឡាំង ផលិតកម្លាំងបាន ៦២៤សេះ។

តាមតួលេខបង្ហាញ Lamborghini Urus មានប្រៀបជាង Rolls-Royce Wraith ហើយជាពិសេសបានបំពាក់ម៉ាស៊ីនកម្លាំងខ្លាំងរបស់ Hennessy ទៀត។ ប៉ុន្តែពេលសាកកម្លាំងជាក់ស្ដែងវិញយ៉ាងណាដែរ? ចង់ដឹងទស្សនាវីដេអូខាងក្រោម ៖

ផ្ទាំងផ្សាយពាណិជ្ជកម្ម

ចេញតម្លៃហើយ ឡាន Ford GT Le Mansory ផលិតតែ ៣គ្រឿងគត់លើលោក

August 14, 2020

នៅពេលដែលក្រុមហ៊ុន Mansory ដាក់បង្ហាញរថយន្ត Ford GT Le Mansory កាលពីខែមិថុនា ពួកគេបានប្រកាសពីលក្ខណៈពិសេសទាំងអស់អំពីវា ប៉ុន្តែមិនបានប្រាប់ពីតម្លៃរបស់វាឡើយ។

ឥឡូវនេះ យោងតាមប្រភពព័ត៌មានបានបង្ហាញថា រថយន្ត Ford GT Le Mansory ដែលផលិតមានចំនួនកំណត់នេះ ត្រូវបានដាក់លក់ក្នុងតម្លៃ ២,១លានដុល្លារ។ តម្លៃប៉ុណ្ណេះ អ្នកអាចទិញបានរថយន្តផ្សេងទៀតដូចជា McLaren Senna, Bugatti Veyron, Porsche 918 និង Ford GT ធម្មតាដល់ទៅ ២គ្រឿងឯណោះ។

គួរឲ្យដឹងថា រថយន្ត Ford GT Le Mansory នេះ នឹងត្រូវផលិតតែ ៣គ្រឿងគត់លើលោក។ ការឌីហ្សាញលើ Ford GT Le Mansory ក៏ខុសពី Ford GT ធម្មតាដែរ ជាពិសេសការបំពាក់ Carbon Fiber លើតួខ្លួន និងការឌីហ្សាញឡើងវិញនូវផ្នែកខាងមុខ, បំពាក់ចង្កៀង LED ថ្មី, ដំបូលម៉ាស៊ីនថ្មី និងរន្ធបឺតខ្យល់ធំជាងមុន ជាដើម។

រថយន្ត Ford GT Le Mansory បំពាក់ម៉ាស៊ីនចំណុះ ៣,៥លីត្រ twin-turbo V6 មានកម្លាំង ៧០០សេះ អាចរត់ដល់ល្បឿនអតិបរមា ៣៥៤គីឡូម៉ែត្រក្នុងមួយម៉ោង ឬ ២២០ម៉ាយ៍ក្នុងមួយម៉ោង៕

ផ្ទាំងផ្សាយពាណិជ្ជកម្ម

មានលុយ ៨ម៉ឺនដុល្លារ អាចទិញឡាន Muscle Car រហ័ស និងខ្លាំងបំផុតលើលោកបាន!

August 14, 2020

រថយន្ត Challenger SRT Super Stock ឆ្នាំ២០២០ ដែលជារថយន្តប្រភេទ Muscle Car រហ័ស និងកម្លាំងខ្លាំងបំផុតលើលោក នឹងចេញលក់នៅចុងឆ្នាំនេះ ជាមួយនឹងតម្លៃចាប់ពី ៧៩ ៥៩៥ដុល្លារ ថ្លៃជាងម៉ូដែល Challenger SRT Hellcat Redeye Widebody ដល់ទៅ ៣ ០០០ដុល្លារឯណោះ។

គួរឲ្យដឹងថា ម៉ូដែល Super Stock នេះគឺផលិតផ្អែកតាមម៉ូដែល Challenger SRT Hellcat Redeye Widebody ហើយវាមានបំពាក់ប្រព័ន្ធបូម adaptive-damping sport suspension និងកែកុនលើដំណើរការរបស់ប្រអប់លេខ។ មិនតែប៉ុណ្ណោះ វាក៏បំពាក់ហ្វ្រាំង Brembo និងយ៉ាន់ទំហំ ១៨អ៊ីញ ទៀតផង។

អ្វីដែលគួរឲ្យកត់សម្គាល់បំផុតនោះគឺ ការកែកុនលើម៉ាស៊ីន supercharged ចំណុះ ៦,២លីត្រ V8 ដែលឥឡូវនេះបង្កើតកម្លាំងបានរហូតដល់ទៅ ៨០៧សេះ ខ្លាំងជាង Hellcat Redeye ១០សេះ និង ខ្សោយជាង Demon ៣៣សេះ។

ម៉ាស៊ីននេះគឺដំណើរការជាមួយប្រអប់លេខអូតូ ៨វគ្គ ដែលអាចឲ្យវារត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,២៥វិនាទី ហើយមានល្បឿនអតិបរមាដល់ ២៧០គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Lexus LX 570 ចេញស៊េរីឆ្នាំ ២០២១ មានមួយប្រភេទប្ដូរមុខថ្មី

August 13, 2020

Lexus បានបង្ហាញចេញរថយន្ត LX 570 ស៊េរីឆ្នាំ ២០២១ សម្រាប់លក់នៅលើទីផ្សារសហរដ្ឋអាមេរិក ដែលមានបន្ថែមនូវការអាប់ដេតមួយ និងមានការផ្លាស់ប្ដូរមុខមាត់សម្រាប់ Option មួយចំនួនផងដែរ។

ជាក់ស្ដែងដូចជា ជាមួយកញ្ចប់ Sport Package ថ្មី មានការបំពាក់នូវផ្ទាំងប៉ាណាថ្មីដែលមានរចនាបថស្រដៀងគ្នានឹងរថយន្ត Lexus RX ស៊េរីថ្មីឆ្នាំ ២០២១ ដែរ ហើយកាងខាងក្រោមក៏មានរូបរាងស្អាតជាងមុនផងដែរ។ Sport Package នេះដែរក៏មានបន្ថែមនូវយ៉ាន់កង់ទំហំ ២១អ៊ីញថ្មីផងដែរ។ ចំណែកចំណុចដទៃទៀតមិនមានការផ្លាស់ប្ដូរខុសពីមុននោះទេ។

Lexus ក៏បានបន្ថែមប្រភេទពិសេសឈ្មោះថា LX Inspiration Series ដែលមានផលិតត្រឹម ៥០០គ្រឿងប៉ុណ្ណោះ។ ស៊េរីពិសេសនេះមានជម្រើសពណ៌ចំនួនពីរគឺពណ៌ Black Onyx និងពណ៌ White Pearlហើយមានរចនាពណ៌ខ្មៅលើផ្នែកមួយចំនួនដូចជានៅលើផ្ទាំងប៉ាណា, ស៊ុមកញ្ចក់, ដៃទ្វារ, យ៉ាន់កង់ទំហំ ២១អ៊ីញ និងស្លាក LX 570 សុទ្ធតែរចនាពណ៌ខ្មៅ។ នៅផ្នែកខាងក្នុងឯណោះវិញក៏មានបំពាក់គ្រឿងបរិក្ខារពិសេសផងដែរ ដោយមានកៅអីអង្គុយស្រោបដោយស្បែកខ្មៅរំលេចដោយពណ៌ក្រហមមើលទៅទាក់ទាញបំផុត។

រថយន្ត Lexus LX 570 ស៊េរីឆ្នាំ ២០២១ គ្រប់ប្រភេទនៅតែបំពាក់នូវម៉ាស៊ីន V8 ចំណុះ ៥,៧លីត្រ ដែលមានកម្លាំង ៣៨៣សេះ ហើយភ្ជាប់ជាមួយប្រអប់លេខអូតូ ៨វគ្គ និងមានប្រព័ន្ធបើកបរវិលកង់ទាំងបួន។

គួរដឹងដែរថា Lexus មិនទាន់បានប្រាប់អំពីតម្លៃរបស់រថយន្តស៊េរីថ្មីនេះនៅឡើយទេ ហើយវាទំនងជានឹងដាក់លក់លើទីផ្សារអាមេរិកនាចុងឆ្នាំ ២០២០ នេះ៕

ផ្ទាំងផ្សាយពាណិជ្ជកម្ម

ឡានអគ្គិសនីលក់ដាច់ជាងគេនៅកូរ៉េ លែងជាឡានកូរ៉េហើយ

August 13, 2020

ទីផ្សាររថយន្តអគ្គិសនីនៅប្រទេសកូរ៉េខាងត្បូងឃើញមានសញ្ញាវិជ្ជមាន ដោយមានរថយន្តសរុបខ្ទង់ ២២ ០០០គ្រឿង បានចរាចរណ៍លក់លើទីផ្សារក្នុងរយៈពេល ៧ខែដំបូងនៃឆ្នាំ ២០២០ ដែលមានកំណើន ៧% ធៀបនឹងឆ្នាំមុន។

សញ្ញាវិជ្ជមាននេះភាគច្រើនគឺដោយសារតែរថយន្តអគ្គិសនី Tesla Model 3 ដែលបានឆក់យកតំណែងកំពូលពីរថយន្ត Hyundai Kona EV ចាប់តាំងពីខែមីនាមក។ កាលពីខែមីនារថយន្ត Hyundai Kona EV កាន់កាប់ចំណែកទីផ្សាររថយន្តអគ្គិសនីនៅកូរ៉េខាងត្បូងបាន ៤៥% ប៉ុន្តែចូលដល់ខែកក្កដាចំណែកទីផ្សារនៅសល់ត្រឹម ៣១% ប៉ុណ្ណោះ។ បន្ថែមពីនេះទៀតចំនួនលក់របស់ Hyundai Kona EV ក្នុងពេល៧ខែដំបូងនៃឆ្នាំ ២០២០ មានការថយចុះ ៤៥% ឯណោះធៀបនឹងពេលដូចគ្នាកាលពីឆ្នាំ ២០១៩។

តួលេខរបស់ EV-Sales បានបង្ហាញថា រយៈពេល៧ខែដំបូងនៃឆ្នាំ ២០២០ រថយន្ត Tesla Model 3 អាចលក់ចេញបាន ៦ ៨៨៨ គ្រឿង ស្ថិតនៅលំដាប់លេខមួយជារថយន្តអគ្គិសនីលក់បានច្រើនជាងគេ។ ចំណែក Hyundai Kona EV លក់បាន ៥ ១២០គ្រឿង ស្ថិតនៅលំដាប់លេខពីរ តាមពីក្រោយដោយ Kia Niro EV ដែលលក់បាន ២ ៣១៥គ្រឿង។

ក្រៅពី Tesla មានម៉ាករថយន្តបរទេសពីរទៀតដែលស្ថិតក្នុងតំណែងកំពូលទាំង៥ ដោយមានរថយន្ត Chevrolet Bolt ជាប់លេខ៤ លក់បាន ១ ៣៥៧គ្រឿង និងរថយន្ត BMW 530e លក់បាន ១ ១៦៨គ្រឿង៕

ផ្ទាំងផ្សាយពាណិជ្ជកម្ម

Mazda CX-3 ឆ្នាំ២០២១ ចេញតម្លៃផ្លូវការ តែ២ម៉ឺនដុល្លារ

August 13, 2020

Mazda បានចាប់ផ្តើមទទួលការកក់បណ្តើរៗហើយ សម្រាប់រថយន្ត CX-3 ស៊េរីឆ្នាំ២០២១ ដែលនឹងចេញលក់លើទីផ្សារសហរដ្ឋអាមេរិក នាខែក្រោយ។

SUV ខ្នាតតូចនេះនឹងមានតម្លៃចាប់ពី ២០ ៦៤០ដុល្លារ សម្រាប់ប្រភេទប៉ុងមួយវិលកង់មុខ និង ២២ ០៤០ដុល្លារ សម្រាប់ប្រភេទប៉ុងពីរ។

លក្ខណៈពិសេសលើរថយន្តនេះមានដូចជា មុខងារ Active Driving Display, Android Auto, Apple CarPlay, អេក្រង់ Mazda Connect ទំហំ ៧អ៊ីញ Touchscreen, Bluetooth និង Speaker ៦គ្រាប់ មកស្តង់ដារតែម្តង។ ក្រៅពីនោះក៏មានមុខងារ ហ្វ្រាំងដៃអេឡិចត្រូនិច ជាមួយមុខងារ Auto Hold, Smart Key និង ប៊ូតុងបញ្ឆេះម៉ាស៊ីន ផងដែរ។

បន្ថែមពីនេះបច្ចេកវិទ្យា iActivSense ក៏ត្រូវបានបំពាក់មកស្តង់ដារ ដោយក្នុងនោះរួមមានមុខងារដូចជា Night Pedestrian Detection, Advanced Smart City Brake Support, Smart Brake Support with Collision Warning, Radar Cruise Control, Lane Departure Warning, High Beam Control, Blind Spot Monitoring with Rear Cross-Traffic Alert និង កាមេរ៉ាមើលក្រោយ។