ស្ងាត់ៗ Lexus បង្ហើបរូបរាងឡាន IS ស៊េរីថ្មីឆ្នាំ ២០២១

June 1, 2020

Lexus បានធ្វើឲ្យគេភ្ញាក់ផ្អើលខ្លាំងជាមួយរូបភាព Teaser នៃរថយន្តម៉ូដែល IS ស៊េរីឆ្នាំ ២០២១ ដែលកន្លងមកគេមិនធ្លាប់លេចឮចចាមអារ៉ាម ឬប្រទះឃើញរថយន្តនេះបើកបរសាកល្បងលើដងផ្លូវនោះឡើយ។

Lexus បានឲ្យដឹងថារថយន្ត IS ជំនាន់ថ្មី ដែលមានការផ្លាស់ប្ដូររូបរាងថ្មីនឹងបង្ហាញមុខជាផ្លូវការនាថ្ងៃទី ៩ ខែមិថុនាខាងមុខនេះ។ តាមរយៈរូបភាព Teaser នៃផ្នែកខាងក្រោយរបស់រថយន្ត អាចបញ្ជាក់ថារថយន្ត IS នឹងមានការផ្លាស់ប្ដូររូបរាងថ្មី ដោយសារអំពូលឆ្នូតពណ៌ក្រហមនេះមិនមានលើស៊េរីបច្ចុប្បន្នឡើយ ហើយវាជាអត្តសញ្ញាណមួយដែល Lexus បានប្រើលើរថយន្តស៊េរីថ្មីៗកន្លងមក។

ចំពោះលក្ខណៈសម្បត្តិផ្សេងទៀតអំពី Lexus IS ជំនាន់ថ្មី គេនៅមិនទាន់ដឹងនៅឡើយទេ។ ជាមួយនឹងការឈប់ផលិតរថយន្តម៉ូដែល GS គេជឿជាក់ថាម៉ូដែល IS ថ្មីអាចនឹងមានការកែសម្រួលជាពិសេសដើម្បីអាចជំនួសម៉ូដែល GS ដូចជាមានផ្នែកខាងក្នុងទំហំធំ និងមានរូបរាងកាន់តែកាត់ទៅបែបស្ព័រជាដើម៕

ផ្ទាំងផ្សាយពាណិជ្ជកម្ម

ឡានអគ្គិសនីដំបូងរបស់វៀតណាម នឹងចាប់ផ្ដើមផលិតឆ្នាំ ២០២១

June 1, 2020

ម៉ាកយីហោរថយន្តដំបូងរបស់វៀតណាម VinFast បានប្រកាសថាខ្លួននឹងចាប់ផ្ដើមការផលិតរថយន្តអគ្គិសនីដំបូងរបស់ខ្លួននៅឆ្នាំក្រោយនេះ ដោយយកសហរដ្ឋអាមេរិកជាទីផ្សារគោលដៅ។ VinFast មានផែនការថានឹងបង្ហាញរថយន្តអគ្គិសនីនេះក្នុងកម្មវិធី Los Angeles Auto Show នាខែវិច្ឆិកាឆ្នាំ ២០២០ នេះ។

ក្រុមហ៊ុន VinFast នឹងប្រើប្រាស់អាគុយដែលផលិតឡើងដោយក្រុមហ៊ុនកូរ៉េខាងត្បូង LG Chem។ ក្នុងសេចក្ដីថ្លែងការណ៍ VinFast បានប្រកាសថា ៖ “យើងរំពឹងថានឹងបង្ហាញចេញរថយន្តអគ្គិសនីជាផ្លូវការនៅកម្មវិធី Los Angeles Auto Show ខែវិច្ឆិកា ឆ្នាំ ២០២០ រួចចាប់ផ្ដើមការសាកល្បងរថយន្តនៅខែមករា ឆ្នាំ ២០២១ ហើយការផលិតទ្រង់ទ្រាយធំនឹងធ្វើឡើងត្រឹមខែកក្កដា ឆ្នាំ ២០២១។”

រថយន្តអគ្គិសនីរបស់ VinFast ត្រូវបានឌីហ្សាញឡើងដោយក្រុមហ៊ុនឌីហ្សាញរបស់អ៊ីតាលីឈ្មោះ Pininfarina ដោយវាអាចជិះបានចម្ងាយ ៥០០គ.ម ពេលសាកភ្លើងពេញ។ កាលពីខែមេសា ឆ្នាំ ២០១៩ ក្រុមហ៊ុន LG Chem បានបង្កើតក្រុមហ៊ុនដែលបង្កើតឡើងរួមគ្នាជាមួយ VinFast ដើម្បីផលិតអាគុយលីចូមសម្រាប់ម៉ូតូ និងរថយន្តរបស់ VinFast។

គួរដឹងថា VinFast អាចបញ្ចេញលក់រថយន្តបាន ៥១២៤គ្រឿង នៅត្រីមាសដំបូងនាឆ្នាំ ២០២០ ក្នុងទីផ្សារក្នុងស្រុក។ លទ្ធផលលក់នេះអាចឲ្យក្រុមហ៊ុនស្ថិតនៅលំដាប់លេខ ៥ នាំមុខម៉ាកយីហោដទៃដូចជា Mitsubishi, Mazda និង Ford។ រថយន្តដែល VinFast មានលក់បច្ចុប្បន្នមាន Lux SA2.0, Lux A2.0 និង Fadil៕

ផ្ទាំងផ្សាយពាណិជ្ជកម្ម

ភីកអាប់ SsangYong Musso ឆ្នាំ២០២០ អាចដឹកទម្ងន់ដល់ ៦,៩តោន តម្លៃ ២៦០០០ដុល្លារ

June 1, 2020

ក្រុមហ៊ុនរថយន្តកូរ៉េ SsangYong បានប្រកាសចេញរថយន្តភីកអាប់ Musso ស៊េរីឆ្នាំ២០២០ របស់ខ្លួនជាផ្លូវការ នៅលើទីផ្សារអឺរ៉ុប ដោយបន្ថែមប្រភេទគ្រែដឹកវែងជាងមុន។

រថយន្ត SsangYong Musso ថ្មីនេះមានគ្រែដឹកវែងជាងមុន ៣១០មីល្លីម៉ែត្រ ខណៈផ្តល់កាប៊ីនដែលមានកន្លែងអង្គុយសម្រាប់មនុស្ស ៥នាក់ដដែល។ ភីកអាប់នេះអាចដឹករហូតដល់ទៅទម្ងន់ ៦,៩តោន ហើយអូសសណ្តោងបានទម្ងន់ ៣,៥តោនឯណោះ។

SsangYong Musso បំពាក់ម៉ាស៊ីនម៉ាស៊ូត e-XDi220 ចំណុះ ២,២លីត្រ turbo ទំហំ ៤ស៊ីឡាំង មានកម្លាំង ១៧៩សេះ។ វាមានទាំងជម្រើសលេខដៃ និងលេខអូតូ ៦វគ្គ ខណៈប្រព័ន្ធប៉ុងពីរ4WD ត្រូវបានបំពាក់មកស្តង់ដារតែម្តង។

ភីកអាប់នេះផ្តល់ជម្រើសដល់ទៅ ៤ម៉ូដែល គឺ EX, Rebel, Saracen និង Rhino ដែលមានតម្លៃចាប់ពី ២៦ ៩៥០ដុល្លារ ដល់ ៣៦ ៧៥០ដុល្លារ៕

ផ្ទាំងផ្សាយពាណិជ្ជកម្ម

តម្លៃខ្លួន ១,១លានដុល្លាររបស់ Nissan GT-R50 បើទិញឡានផ្សេង បានអីខ្លះ?

June 1, 2020

ថ្មីៗនេះក្រុមហ៊ុន Nissan បានប្រកាសចេញរថយន្តស្ព័រផលិតមានចំនួនកំណត់ GT-R50 By Italdesign របស់ខ្លួនជាផ្លូវការ ដែលមានតម្លៃខ្លួនរហូតដល់ទៅ ១,‌លានដុល្លារឯណោះ។ រថយន្តដែលផលិតត្រឹម ៥០គ្រឿងលើពិភពលោកនេះ បំពាក់ម៉ាស៊ីនផលិតដោយដៃចំណុះ ៣,៨លីត្រ twin-turbocharged V6 មានកម្លាំង ៧១០សេះ។

ជាមួយនឹងតម្លៃប៉ុណ្ណេះ ប្រសិនបើយកទៅទិញរថយន្តផ្សេង តើបានអីខ្លះ? ខាងក្រោមនេះគឺជាចម្លើយ៖

រថយន្ត Nissan GT-R ១០គ្រឿង ឬ Nissan GT-R Nismo ៥គ្រឿង

រថយន្ត Aston Martin V12 Speedster (៩៣៨ ៥០០ដុល្លារ)

រថយន្ត McLaren Senna (១,០៥លានដុល្លារ)

រថយន្ត Lamborghini Aventador SVJ (៥១៨ ០០០ដុល្លារ) + Urus (២១១ ២០០ដុល្លារ) + Huracan Evo Spyder (២៨៧ ៤០០ដុល្លារ)

រថយន្ត Ferrari 812 Superfast (៣៣៨ ៧៥០ដុល្លារ) + Ferrari SF90 Stradale (៦២៥ ០០០ដុល្លារ)

រថយន្ត Porsche 718 Spyder (៩៧ ៦៥០ដុល្លារ) + 718 Cayman GT4 (១០០ ៥៥០ដុល្លារ) + 911 Turbo S Cabriolet (២១៧ ៦៥០ដុល្លារ) + Taycan Turbo S (១៨៨ ៩៦០ដុល្លារ) + Panamera Turbo S E-Hybrid Sport Turismo (១៩៣ ០៥០ដុល្លារ) + Macan Turbo (៨៥ ៩៥០ដុល្លារ) + Cayenne Turbo S E-Hybrid Coupe (តម្លៃ ១៦៥ ៧៥០ដុល្លារ) សរុបអស់តែ ១,០៥លានដុល្លារ

ផ្ទាំងផ្សាយពាណិជ្ជកម្ម

តម្លៃរាយប្រេងឥន្ធនៈត្រឹមថ្ងៃទី០១ ដល់ ១៥ ខែមិថុនា ឆ្នាំ២០២០!

June 1, 2020

តម្លៃលក់រាយប្រេងឥន្ធនៈថ្មី ដែលត្រូវអនុវត្ត ពីថ្ងៃទី០១ ដល់ថ្ងៃទី១៥ ខែមិថុនា ឆ្នាំ២០២០ ដោយតម្លៃរាយសម្រាប់សាំងធម្មតា EA92 ២ ៧០០ រៀល/លីត្រ និង ២ ៥០០ រៀល/លីត្រសម្រាប់ប្រេងម៉ាស៊ូត។

ខាងក្រោមនេះជាសេចក្តីប្រកាសផ្លូវការ៖

ផ្ទាំងផ្សាយពាណិជ្ជកម្ម

ចេញតម្លៃលក់ហើយ ឡាន Chevrolet Suburban Z71 ស៊េរីឆ្នាំ២០២១

May 30, 2020

រថយន្ត Chevrolet Suburban ប្រភេទ Z71 ស៊េរីឆ្នាំ២០២១ បានប្រកាសចេញតម្លៃលក់ជាផ្លូវការ នៅលើទីផ្សារសហរដ្ឋអាមេរិក។

រថយន្ត Chevrolet Suburban Z71 ថ្មីនេះ បំពាក់ម៉ាស៊ីនចំណុះ ៥,៣លីត្រ V8 មានកម្លាំង ៣៥៥សេះ មកស្តង់ដារតែម្តង ប៉ុន្តែក៏មានជម្រើសម៉ាស៊ីនធំមួយទៀត ចំណុះ ៦,២លីត្រ V8 មានកម្លាំងរហូតដល់ទៅ ៤២០សេះ។ វាប្រើប្រអប់លេខអូតូ ១០វគ្គ និងប៉ុងពីរ។

រថយន្ត Chevrolet Suburban Z71 ឆ្នាំ២០២១ ត្រូវបានដាក់លក់ក្នុងតម្លៃចាប់ពី ៦៣ ១៩៥ដុល្លារ នៅលើទីផ្សារសហរដ្ឋអាមេរិក សម្រាប់ប្រភេទម៉ាស៊ីនធំចំណុះ ៦,២លីត្រ។ គួរឲ្យដឹងថា Chevrolet Suburban ប្រភេទធម្មតា (Base Model) ប្រើម៉ាស៊ីនតូច មានតម្លៃចាប់ពីត្រឹម ៥២ ៩៩៥ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម

បាត់មុខយូរ! ម៉ូដែល Type S នឹងមានលើឡាន Acura វិញ កាន់តែខ្លាំងជាងមុនទៅទៀត!

May 30, 2020

បន្ទាប់ផ្អាកផលិតម៉ូដែល Type S អស់រយៈពេលជាយូររួចមក ឥឡូវម៉ូដែលនេះនឹងមានលើរថយន្ត Acura វិញ គឺប្រើលើម៉ូដែល TLX។

រថយន្ត Acura TLX Type S ស៊េរីឆ្នាំ២០២១ នឹងបំពាក់ម៉ាស៊ីនសាំងចំណុះ ៣,០លីត្រ turbocharged V6 ដែល Acura សន្យាថា នឹងមានកម្លាំងខ្លាំងជាងម៉ាស៊ីនចំណុះ ៣,៥លីត្រ V6 កម្លាំង ២៩០សេះ ដែលមានបំពាក់លើ Type S ស៊េរីមុនៗទៅទៀត។

ក្រៅពីប្រើម៉ាស៊ីនថ្មី Type S នឹងបំពាក់ប្រព័ន្ធហ្វ្រាំងប្រភេទ high-performance ថ្មី និង ប្រព័ន្ធប៉ុងពីរ Super Handling All-Wheel Drive ផងដែរ។ ទោះជាយ៉ាងណា Type S នឹងមិនមានជម្រើសលេខដៃឡើយ។

យ៉ាងណាក៏ដោយ រថយន្ត Acura TLX Type S ថ្មីខាងលើ នឹងចេញលក់នាឆ្នាំ២០២១ ខណៈតម្លៃរបស់វានឹងត្រូវប្រកាសនាពេលក្រោយ៕

ផ្ទាំងផ្សាយពាណិជ្ជកម្ម

ក្នុងពេល ៣ខែ McLaren លក់ឡានបាន ៣០៧គ្រឿងប៉ុណ្ណោះ

May 30, 2020

ក្រោយពីបានប្រកាសអំពីការកាត់បន្ថយបុគ្គលិក ១២០០ នាក់រួចមក McLaren បានបង្ហាញចេញរបាយការណ៍ចំណូលចំណាយសម្រាប់ត្រីមាសទី ១ ឆ្នាំ ២០២០ ដែលមានលទ្ធផលមិនល្អប៉ុន្មានឡើយ។

ក្រុមហ៊ុនអង់គ្លេសនេះមានការខាតបង់ទឹកប្រាក់ប្រមាណ ១៦៣លានដុល្លារ ក្នុងត្រីមាសដំបូង ធៀបនឹងពេញមួយឆ្នាំ ២០១៩ មានការខាតបង់ត្រឹមប្រមាណ ៣៤,៥លានដុល្លារប៉ុណ្ណោះ។ ចំណែកចំណូលនៅត្រីមាសទីមួយវិញគឺមានប្រមាណ ១៣៤លានដុល្លារ។

ក្នុងរយៈពេល ៣ខែដំបូងនៃឆ្នាំ ២០២០ នេះដែរ McLaren អាចលក់រថយន្តបានសរុប ៣០៧គ្រឿង ធៀបនឹងពេលដូចគ្នាកាលឆ្នាំមុនលក់បាន ៩៦៣គ្រឿង។ ក្រុមហ៊ុនរំពឹងថាត្រីមាសទី ២ អាចនឹងមានលទ្ធផលមិនខុសពីត្រីមាសទីមួយប៉ុន្មានឡើយ ប៉ុន្តែត្រីមាសទី ៣ និងទី ៤ អាចនឹងល្អប្រសើរឡើងវិញ៕

ផ្ទាំងផ្សាយពាណិជ្ជកម្ម

ដឹងថ្ងៃប្រកាសចេញ Ford F-150 ឆ្នាំ ២០២១ ជាផ្លូវការហើយ!

May 30, 2020

Ford គ្រោងនឹងបង្ហាញចេញរថយន្ត F-150 ស៊េរីថ្មីឆ្នាំ ២០២១ នាថ្ងៃទី ២៥ ខែមិថុនា ដែលបង្ហាញចេញតាមរយៈកម្មវិធីផ្សាយផ្ទាល់តាមអនឡាញ។ ក្រុមហ៊ុនបានបញ្ជាក់បន្ថែមថាក្នុងពេលប៉ុន្មានសប្ដាហ៍ខាងមុខទៀតនឹងប្រាប់អំពីវិធីចូលទស្សនាការបង្ហាញចេញរថយន្តនេះ។

ត្បិតថាមិនទាន់បង្ហាញមុខជាផ្លូវការ ប៉ុន្តែគេរំពឹងថា F-150 ស៊េរីឆ្នាំ ២០២១ នឹងមានណែនាំនូវបច្ចេកវិទ្យាថ្មីៗជាច្រើន រួមជាមួយជម្រើសម៉ាស៊ីន Hybrid ថ្មីផងដែរ។ ចំណែករូបរាងរបស់វាក៏នឹងមានការផ្លាស់ប្ដូរច្រើនខុសពីស៊េរីបច្ចុប្បន្ន នេះបើផ្អែកតាមរូបភាពលេចធ្លាយកន្លងមក។

ទោះជាជំងឺកូវីដ១៩កំពុងបន្តរាតត្បាតខ្លាំងមែន ប៉ុន្តែ Ford បានបញ្ជាក់ឲ្យដឹងថាការដឹកជញ្ជូនរថយន្ត Ford F-150 ជំនាន់ថ្មីនឹងចាប់ផ្ដើមពីអំឡុងត្រីមាសទីបួននេះ មិនឲ្យអតិថិជនត្រូវរង់ចាំដល់ឆ្នាំក្រោយនោះទេ៕

ផ្ទាំងផ្សាយពាណិជ្ជកម្ម

បារាំងចិត្តបានជាងគេនៅអឺរ៉ុប ផ្ដល់ប្រាក់ឧបត្ថម្ភដល់ ១៣០០០ដុល្លារ សម្រាប់ការទិញឡានអគ្គិសនី

May 29, 2020

រដ្ឋាភិបាលបារាំងបានបញ្ចេញនូវកញ្ចប់លុយប្រមាណ ១,៤៣ពាន់លានដុល្លារ សម្រាប់ជួយឧបត្ថម្ភដល់ការទិញរថយន្តអគ្គិសនី ជាសកម្មភាពមួយដែលអាចជួយកាត់បន្ថយតម្លៃរថយន្តអគ្គិសនីបានជិត ៤០% សម្រាប់រថយន្តខ្លះ និងជួយកាត់បន្ថយឧស្ម័នពុលកាបូនឌីអុកស៊ីតក្នុងបរិស្ថានផងដែរ។

អ្នកទិញរថយន្តអគ្គិសនីអាចទទួលបានប្រាក់ឧបត្ថម្ភរហូតដល់ប្រមាណ ១៣ ២១១ដុល្លារ ធ្វើឲ្យវាក្លាយជាប្រាក់ឧបត្ថម្ភដែលច្រើនជាងគេបំផុតក្នុងសហភាពអឺរ៉ុប។ ឧទាហរណ៍ថារថយន្ត Renault Zoe ដែលមានតម្លៃប្រមាណ ៣៥ ២៣០ដុល្លារ អ្នកទិញត្រូវចំណាយលុយផ្ទាល់ខ្លួនត្រឹម ២២ ០០០ដុល្លារប៉ុណ្ណោះ។

ទន្ទឹមនឹងនេះដែរ អ្នកប្រើប្រាស់រថយន្តម៉ាស៊ូតចាស់ៗអាចទទួលបានប្រាក់លើកទឹកចិត្តប្រមាណ ៥៥០០ដុល្លារ ប្រសិនបើឈប់ប្រើរថយន្តនោះ ហើយអាចទទួលបាន ៧៧០០ដុល្លារ ប្រសិនបើមានចំណងចង់ទិញរថយន្តអគ្គិសនីមកប្រើជំនួស៕

ផ្ទាំងផ្សាយពាណិជ្ជកម្ម