លេចលឺថា! ឡានភីកអាប់ Toyota HiLux ជំនាន់ក្រោយ នឹងបន្តប្រើម៉ាស៊ីនម៉ាស៊ូតដដែល

November 6, 2024

កាលពីពេលថ្មីៗនេះ លេចលឺដំណឹងថា រថយន្តភីកអាប់ Toyota HiLux ជំនាន់ក្រោយដែលគ្រោងនឹងចេញលក់នៅក្នុងឆ្នាំ២០២៦ របស់ក្រុមហ៊ុន Toyota នឹងមិនមែនជារថយន្តថ្មីទាំងស្រុងដូចដែលបានរំពឹងទុកនោះទេ។

រូបភាព Render

ផ្ទុយទៅវិញ រថយន្តនេះ នឹងបន្តប្រើម៉ាស៊ីនម៉ាស៊ូតចំណុះ ២,៨លីត្រ turbo ទំហំ ៤ស៊ីឡាំង ដដែល ជាមួយនឹងការរចនាថ្មីបន្តិចបន្តួច ព្រមទាំងបន្ថែមជម្រើសម៉ាសុីនកូនកាត់ mild-hybrid 48V សម្រាប់ទីផ្សារអាមេរិកខាងត្បូង។

ទន្ទឹមនឹងនេះផងដែរ សម្រាប់ម៉ូដែលថ្មីនេះ នឹងបន្តប្រើគ្រោងឆ្អឹង IMV ដែលកំពុងប្រើលើ HiLux បច្ចុប្បន្នដដែលដោយមិនប្រើប្រាស់នូវគ្រោងឆ្អឹងថ្មី TNGA-F ដែលក្រុមហ៊ុន Toyota ច្រើនប្រើក្នុងម៉ូដែលបែប off-road ដទៃរបស់ខ្លួននោះឡើយ ដោយសារពួកគេយល់ថា ការធ្វើបែបនេះនឹងមិនធ្វើឲតម្លៃរបស់រថយន្តមួយនេះមានភាពឡើងខ្ពស់ពេក។

លើសពីនេះទៅទៀត Toyota HiLux ជំនាន់ក្រោយ នឹងទទួលបានការរចនាគ្រឿងក្រោយថ្មីៗ ជាមួយរូបរាងបែបជ្រុងៗ សម្រាប់ទីផ្សារតំបន់អាមេរិកខាងត្បូង និងតំបន់អាស៊ី ប៉ុន្តែមិនមានការផ្លាស់ប្តូរការរចនា ឫផ្នែកម៉ាសុីនក្នុងលក្ខខណ្ឌធំដុំជាដាច់ខាតសម្រាប់ជំនាន់ថ្មីនេះ។

រូបភាព Render គួរបញ្ជាក់ផងថា សម្រាប់ព៌ត័មានទាំងនេះគ្រាន់តែជាចរចាមអាមរបស់សារព៌ត័មានបរទេសតែប៉ុណ្ណោះ ប៉ុន្តែអាចមានភាគរយច្រើនដែលអាចកើតឡើង ខណៈព៌ត័មានលម្អិតមានតែរង់ចាំការប្រកាសចេញជាផ្លូវការរបស់ក្រុមហ៊ុន Toyota តែប៉ុណ្ណោះ៕

ផ្ទាំងផ្សាយពាណិជ្ជកម្ម

Nio ក្លាយជាដៃគូសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិជាផ្លូវការ

November 6, 2024

[បរទេស] ក្រុមហ៊ុមផលិតរថយន្តរបស់ប្រទេសចិន Nio បានក្លាយជាដៃគូរថយន្តផ្លូវការនៃសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិ COP លើកទី ២៩ ដែលនឹងប្រព្រឹត្តទៅនៅប្រទេសអាស៊ែបៃហ្សង់នៅថ្ងៃទី ១១ ខែវិច្ឆិកា ឆ្នាំ ២០២៤ ។

ក្នុងនោះ ប្រធានាធិបតីប្រទេសអាស៊ែបៃហ្សង់ លោក Ilham Aliyev បានទៅទស្សនាដើម្បីស្វែងយល់ពីលក្ខខណ្ឌដែលបានបង្កើតឡើងនៅទីនេះសម្រាប់សន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិ។ លោក Aliyev បានមើលរថយន្តខ្នាតតូចអគ្គិសនី ឡានក្រុងអគ្គិសនី និងរថយន្តដឹកអ្នកដំណើរ EV សម្រាប់ការដឹកជញ្ជូនភ្ញៀវផងដែរ។

Nio បានប្រកាសថា ខ្លួនបានផ្តល់រថយន្ត Nio ES8 (EL8) និង ES6 (EL6) crossovers និង Nio ET7 sedan ដល់ព្រឹត្តិការណ៍នេះ។ លើសពីនេះ ប្រធានាធិបតី ប្រទេសអាស៊ែបៃហ្សង់ក៏បានត្រួតពិនិត្យរថយន្តអគ្គិសនីដែលផលិតនៅប្រទេសចិន ហើយបានសម្តែងការទទួលស្គាល់ខ្ពស់ នេះបើយោងតាមមន្ត្រី Nio ។

គួរបញ្ជាក់ផងដែរថា Nio មិនមានបំណងនាំយករថយន្តរបស់ខ្លួនទៅលក់នៅទីផ្សារប្រទេសមួយនេះនោះទេ ដោយការផ្តល់រថយន្តសម្រាប់សន្និសីទស្តីពីការប្រែប្រួលអាកាសធាតុនៅទីប្រទេសនេះ អាចជាសេចក្តីថ្លែងការណ៍ដ៏រឹងមាំសម្រាប់ការចេញលក់នាពេលអនាគតនៅក្នុងទីផ្សារក្នុងស្រុក ៕

ផ្ទាំងផ្សាយពាណិជ្ជកម្ម

ភីកអាប់អគ្គិសនីសុទ្ធម៉ូដែលថ្មីរបស់ MG សាកភ្លើងម្តងរត់បាន ៤៣០គីឡូម៉ែត្រ គ្រោងចេញលក់នៅដើមឆ្នាំក្រោយ

November 6, 2024

[បរទេស] ក្រុមហ៊ុនផលិតរថយន្តបណ្តាក់ទុនរួមគ្នា SAIC-MG ប្រចាំនៅទីផ្សារប្រទេសអូស្រ្តាលី បានធ្វើការដាក់បង្ហាញចេញនៅភីកអាប់ Maxus eTerron 9 ប្រើអគ្គិសនីសុទ្ធ គ្រោងនឹងដាក់លក់ជាផ្លូវការនៅដើមឆ្នាំ ២០២៥ ។

Maxus eTerron 9 ផលិតឡើងនៅលើគ្រោងឆ្អឹងធ្វើពីដែកផ្តល់នៅភាពរឹងមាំ បំពាក់ម៉ូទ័រអគ្គិសនីចំនួន ២ អាចផលិតកម្លាំងបានសរុប ៤៣៥ សេះ ផ្គួបជាមួយអាគុយទំហំ ១០២ គីឡូវ៉ាត់ម៉ោង អាចបើកបរបានចម្ងាយ ៤៣០ គីឡូម៉ែត្រនៅពេលសាកថ្មពេញម្តង ដោយការសាកថ្មបានដល់ ៨០% ប្រើរយៈពេល ៤០នាទី ។

ភីកអាប់នេះមានប្រវែងតួខ្លួនសរុប ៥ ៥០០ ម.ម ទទឹង ២ ០០៥ ម.ម កំពស់ ១ ៨៦០ ម.ម និងប្រវែងគម្លាតកង់មុខ-ក្រោយ ៣ ៣០០ ម.ម ។ សម្រាប់ការឌីស្សាញផ្នែកខាងក្រៅ មានប៉ាណាបិទជិត អបសងខាងដោយចង្កៀងមុខ LED ជាមួយឡូហ្គោ Maxus នៅចំកណ្តាល ព្រមទាំងថាសកង់ស្ព័រទំហំធំ និងចង្កៀងក្រោយ LED ឌីស្សាញស៊ីគ្នានឹងផ្នែកខាងមុខ ។

ចំពោះនៅផ្នែកខាងក្នុងត្រូវបានឌីស្សាញនិងតុបតែងថ្មីហើយប្លែកបែប minimalistic ជាមួយអេក្រង់ touchscreen ទំហំធំ សម្រាប់បញ្ជាមុខងារសំខាន់ៗទូទៅលើរថយន្ត ក៏ដូចជាហ្វ្រាំងដៃអេឡិចត្រូនិច ជាមួយមួយមុខងារ Auto Hold ជាដើម ៕

ផ្ទាំងផ្សាយពាណិជ្ជកម្ម

ចិនប្ដឹងសហភាពអឺរ៉ុបទៅអង្គការពាណិជ្ជកម្មពិភពលោកថា គ្មានហេតុផលមូលដ្ឋានត្រឹមត្រូវសមនឹងទទួលយក

November 6, 2024

ថ្មីៗនេះ ដើម្បីីជាការឆ្លើយតបទៅអង្គការសហភាពអឺរ៉ុប ចិនបានប្ដឹងសហភាពអឺរ៉ុបទៅអង្គការពាណិជ្ជកម្មពិភពលោក (WTO) ដោយអះអាងថា ការដំឡើងពន្ធលើការនាំចូលរថយន្តអគ្គិសនីរបស់ពួកគេគឺគ្មានមូលដ្ឋានត្រឹមត្រូវដោយបានលើហេតុផលមិនសមនឹងទទួលយក។

ពោលគឺ សហភាពអឺរ៉ុបអះអាងថា ពន្ធនេះត្រូវបានដាក់ដើម្បីការពារផលិតករនៅក្នុងប្រទេសអឺរ៉ុបពីការប្រកួតប្រជែងពីសំណាក់ក្រុមហ៊ុនផលិតរថយន្តបរទេស និងព្រួយបារម្ភថាប្រទេសចិននឹងអាចក្លាយជាមហាអំណាចដែលមានឥទ្ធិពលបំផុតក្នុងទីផ្សាររថយន្តពិភពលោក និងមានឥទ្ធិពលបំផុតលើគូប្រជែងពិភពលោកដូចជា អាមេរិក និងអឺរ៉ុប ដោយមានការគាំទ្រពីរដ្ឋាភិបាលចិនផ្ទាល់។

ទន្ទឹមនឹងនេះផងដែរ បញ្ហានេះបានធ្វើឱ្យមន្រ្តីពីចិន និងសហភាពអឺរ៉ុបបានជួបជាមួយគ្នាជាច្រើនដងដើម្បីព្យាយាមស្វែងរកដំណោះស្រាយចាប់តាំងពីពេលដែលពន្ធនេះត្រូវបានប្រកាស។

គួរឲដឹងផងថា ការដំឡើងពន្ធនឹងត្រូវអនុវត្តនៅចុងខែតុលា ឆ្នាំ២០២៤ នេះ ដោយមានការដាក់ពន្ធចាប់ពី ៨ ទៅ ៤៥ ភាគរយ លើការនាំចូលរថយន្តអគ្គិសនីរបស់ប្រទេសចិនអាស្រ័យទៅតាមក្រុមហ៊ុន។

ក្នុងនោះដែរ ក្រសួងពាណិជ្ជកម្មចិនបានជំរុញឱ្យក្រុមហ៊ុន EV របស់ខ្លួនបញ្ឈប់ការវិនិយោគនៅក្នុងប្រទេសអឺរ៉ុបដែលគាំទ្រពន្ធនេះ៕

ផ្ទាំងផ្សាយពាណិជ្ជកម្ម

Toyota បញ្ចេញគំរូ Toyota Land Cruiser ប្រភេទភីកអាប់ គ្រោងនឹងបង្ហាញខ្លួននៅចុងឆ្នាំនេះ

November 5, 2024

[បរទេស] ក្រុមហ៊ុនផលិតរថយន្ត Toyota បានធ្វើការដាក់បង្ហាញចេញនៅគំរូ Toyota Land Cruiser ROX concept ដោយដាក់បញ្ចូលក្នុងទម្រង់ជារថយន្ត Pickup បែប Off-Road ថ្មី អាចនឹងបង្ហាញខ្លួននៅឯពិព័រណ៍រថយន្ត SEMA AUTO SHOW 2024 នៅសហរដ្ឋអាមេរិក ។

គំរូភីកអាប់នេះ បានយកចេញពីម៉ូដែល Land Cruiser 250 series ត្រូវបានផលិតនៅស្ទូឌីយ៉ូឌីស្សាញ CALTY របស់ Toyota ដោយជាង ៥០% រថយន្តដើមត្រូវបានរចនាឡើងវិញទាំងស្រុងរួមមាន, ទ្វារ, ឈ្នាន់ជើងផ្នែកចំហៀង, កាងដែកការពារផ្នែកខាងមុខ, ថាសកង់ស្រោបដោយសំបកកង់ក្រាសប្រភេទ Off-road ដំបូល roof-rail ជាមួយភ្លើង LED ជំនួយ រួមទាំងដំបូលបើក-បិទបាន និងទ្វារនៅទីតាំងជួរទី ២ សម្រាប់ភ្ជាប់ជាមួយឃ្លុបក្រោយ ។

លើសពីនេះ វិស្វកររបស់ Toyota បានឌីស្សាទ្វារឃ្លុបខាងក្រោយដែលអាចផ្ទុកកង់ទំនេរ ហើយបានពង្រឹងរចនាសម្ព័ន្ធដើម្បីផ្តល់នៅភាពរឹងមាំ និងហាប់ណែន ព្រមទាំងទទួលបានប្រព័ន្ធជើងក្រោម suspension ថ្មី ប្រភេទ TRD ផងដែរ ៕

គួរបញ្ជាក់ផងដែរថា បច្ចុប្បន្ន Toyota បានធ្វើការស្រង់មាតិលើបណ្តាញសង្គម ប្រសិនបើមានការចាប់អារម្មណ៍ច្រើនទៅលើគំរូរថយន្ត Pickup ម៉ូដែល Land Cruiser ROX មួយនេះ ទំនងជាអាចចូលរោងចក្រផលិតឆាប់ៗនេះ ៕

ផ្ទាំងផ្សាយពាណិជ្ជកម្ម

ចេញហើយ! Kia Sportage អាប់ឌែតថ្មី រូបរាងអំណាចមិនធម្មតា ឯតម្លៃខ្ទង់ ២មុឺនដុល្លារ មានជម្រើសម៉ាសុីនចំនួន៣

November 5, 2024

[ទីផ្សារបរទេស] កាលពីពេលថ្មីៗនេះ ក្រុមហ៊ុន Kia បានធ្វើការប្រកាសដាក់បង្ហាញចេញជាផ្លូវការនូវរថយន្ត Kia Sportage អាប់ឌែតថ្មី ផ្តល់ជូនចំនួន ៤ជម្រើស រួមមាន Prestige, Noblesse, Signature និង X-Line ជាមួយតម្លៃលក់ចាប់ពី ២១ ០០០ ដុល្លារ ដល់ ៣០ ៣០០ ដុល្លារ នៅក្នុងទីផ្សារប្រទេសកូរ៉េខាងត្បូង។

រថយន្តនេះ ដំណើរការដោយ៖

ម៉ាស៊ីនសាំងចំណុះ ១,៦ លីត្រ turbocharged ទំហំ ៤សុីឡាំង អាចផលិតកម្លាំងបានចំនួន ១៧៨ សេះ និងកម្លាំងរមួល ២៦៥ ញ៉ូតុនម៉ែត្រ ភ្ជាប់ដោយប្រអប់លេខអូតូចំនួន ៨វគ្គ។
ម៉ាសុីន Hybrid ចំណុះ ១,៦ លីត្រ turbocharged ទំហំ ៤សុីឡាំង អាចផលិតកម្លាំងសរុបបានចំនួន ២២០ សេះ និងកម្លាំងរមួល ២៥០ ញ៉ូតុនម៉ែត្រ ភ្ជាប់ដោយប្រអប់លេខអូតូចំនួន ៦វគ្គ។
ម៉ាស៊ីនសាំងចំណុះ ២,០ លីត្រ ទំហំ ៤សុីឡាំង អាចផលិតកម្លាំងបាន ១៤៤ សេះ និងកម្លាំងរមួល ១៩១ ញ៉ូតុនម៉ែត្រ ភ្ជាប់ដោយប្រអប់លេខអូតូចំនួន ៦វគ្គ។

ក្នុងនោះ រថយន្តនេះ ផ្តល់ជូនទាំងជម្រើសប្រព័ន្ធបើកបរប៉ុង ១ FWD និងប៉ុង ២ AWD (អាស្រ័យលើ Option)។

សម្រាប់ការរចនាផ្នែកខាងក្រៅ ត្រូវបានរចនារូបរាងថ្មីទាំងស្រុងនៅផ្នែកខាងមុុខ ដោយបានតុបតែងជាមួយប៉ាណាមុខពណ៌ខ្មៅទំហំធំ អបសងខាងដោយចង្កៀងមុខ LED រាងអក្សរ T រចនាបែបបញ្ឈរ ព្រមទាំងប្រើប្រាស់នូវថាសកង់ស្ព័រពណ៌ខ្មៅទំហំ ១៩អ៊ីញ និងដៃទ្វារប្រភេទ Flush-door ខណៈផ្នែកខាងក្រោយវិញទទួលបានការអាប់ឌែតថ្មីតិចតួច ជាមួយនឹងងចង្កៀងក្រោយ LED រាងអក្សរ C ។

ចំពោះនៅខាងផ្នែកក្នុងកាប៊ីនវិញ ត្រូវបានអាប់ឌែតថ្មីទៅលើផ្នែកតាប៊្លូ ដោយបំពាក់ដោយកុងទ័របង្ហាញព័ត៌មាន និងអេក្រង់កំសាន្ត ជាប្រភេទអេក្រង់ភ្លោះ ក៏ដូចជាការអាប់ឌែតថ្មីទៅលើកុងសូលកណ្តាល ព្រមទាំងទទួលបានពណ៌ថ្មី ប្រព័ន្ធមុខងារកម្មវិធីថ្មី Google Street View និងអាប់ឌែតថ្មីទៅលើប្រព័ន្ធជំនួយអ្នកបើកបរកម្រិតខ្ពស់របស់ខ្លួនដោយទទួលបាននូវប្រព័ន្ធ cruise-based cruise control ថ្មីដែលអាចលៃតម្រូវល្បឿនទៅតាមភាពជាក់ស្តែងនៅក្នុងការបើកបរ៕

ផ្ទាំងផ្សាយពាណិជ្ជកម្ម

ឡានអគ្គិសនីសុទ្ធដំបូងគេបង្អស់របស់ Suzuki បានបង្ហាញវត្តមានជាផ្លូវការហើយ

November 5, 2024

[បរទេស] ក្រុមហ៊ុនផលិតរថយន្ត Suzuki បានធ្វើការដាក់បង្ហាញចេញជាផ្លូវនៅរថយន្ត Suzuki eVitara ប្រភេទអគ្គិសនីសុទ្ធដំបូងគេបង្អស់របស់ក្រុមហ៊ុន ដែលផលិតនៅក្នុងប្រទេសឥណ្ឌា គ្រោងនឹងចេញលក់នៅក្នុងឆ្នាំ ២០២៥ ។

Suzuki eVitara ផ្តល់នៅជម្រើសថាមពលចំនួន ២ រួមមាន

ម៉ូទ័រអគ្គិសនីចំនួន ១ អាចផលិតកម្លាំងបាន ១៧២ សេះ និងកម្លាំងរមួល ១៩០ ញ៉ូតុនម៉ែត្រ ភ្ជាប់ដោយអាគុយទំហំ ៤៩ គីឡូវ៉ាត់ម៉ោង ខណៈចម្ងាយនៃការបើកបរ ក្រុមហ៊ុនមិនទាន់បង្ហាញទេ
ម៉ូទ័រអគ្គិសនីចំនួន ២ អាចផលិតកម្លាំងបាន ១៨១ សេះ និងកម្លាំងរមួល ៣០០ ញ៉ូតុនម៉ែត្រ ភ្ជាប់ដោយអាគុយទំហំ ៦១ គីឡូវ៉ាត់ម៉ោង ខណៈចម្ងាយនៃការបើកបរ ក្រុមហ៊ុនមិនទាន់បង្ហាញទេ

រថយន្តនេះមានប្រវែងតួខ្លួនសរុប ៤ ២៧៥ ម.ម វែងជាងម៉ូដែលប្រើចំហេះក្នុង ១០០ ម.ម និងប្រវែងគន្លាតកង់មុខ-ក្រោយវែង ២០០ ម.ម គឺមានប្រវែង ២ ៧០០ ម.ម ។ សម្រាប់ផ្នែកខាងក្រៅ មានប៉ាណាមុខបិទជិត ចង្កៀងមុខ-ក្រោយ LED ព្រមទាំងថាសកង់ស្ព័រប្រភេទ alloy wheels ជាដើម ។

ចំពោះនៅផ្នែកខាងក្នុងវិញទទួលបានការតុបតែងថ្មីទាន់សម័យជាងមុន ជាមួយកុងទ័របង្ហាញ និងអេក្រង់កំសាន្ត touchscreen រួមបញ្ចូលគ្នាជាប្រភេទភ្លោះ ក៏ដូចជាហ្រ្វាំងដៃអេឡិចត្រូនិច ជាមួយមុខងារ Auto Hold រួមទាំងប្រព័ន្ធប្រតិបត្តិការណ៍ទំនើបៗរបស់ Suzuki ផងដែរ ៕

ផ្ទាំងផ្សាយពាណិជ្ជកម្ម

ចេញហើយ! Geely Galaxy Starship 7 PHEV សាកម្តង់រត់បានខ្ទង់ ១៥០គ.ម

November 5, 2024

[ទីផ្សារចិន] កាលពីពេលថ្មីៗនេះ ក្រុមហ៊ុនផលិតរថយន្ត Geely បានធ្វើការដាក់បង្ហាញចេញជាផ្លូវការនូវរថយន្ត Geely Galaxy Starship 7 ប្រភេទ SUV ប្រើប្រាស់ម៉ាសុីនកូនកាត់ Plug-in hybrid ជាមួយតម្លៃលក់អាចចាប់ផ្តើមពី ២៤ ៦០០ ដុល្លារ ដល់ ៣១ ៥០០ ដុល្លារ នៅក្នុងទីផ្សារប្រទេសចិន។

Geely Galaxy Starship 7 ផលិតឡើងដោយប្រើប្រាស់គ្រោងឆ្អឹង GEA platform មានប្រវែងតួខ្លួនសរុប ៤ ៧៤០ ម.ម ទទឹង ១ ៩០៥ ម.ម កម្ពស់ ១ ៦៨៥ ម.ម ទម្ងន់ ១ ៧៩០ គ.ក និងប្រវែងគម្លាតកង់មុខ-ក្រោយ ២ ៧៥៥ ម.ម ដំណើរការដោយប្រព័ន្ធម៉ាសុីនកូនកាត់ Plug-in hybrid (Geely NordThor 2.0 plug-in hybrid system) ធ្វើការជាមួយម៉ាស៊ីនសាំងចំណុះ ១,៥ លីត្រ ទំហំ ៤សុីឡាំង អាចផលិតកម្លាំងបាន ១១០ សេះ ផ្គួបជាមួយជម្រើសអាគុយទំហំ ១៩ និង ២៩ គីឡូវ៉ាត់ម៉ោង អាចបើកបរបានចម្ងាយ ១០០ និង ១៥០ គីឡូម៉ែត្រ ដោយប្រើប្រាស់នូវថាមពលអគ្គិសនីសុទ្ធ និងមានកម្រិតស៊ីប្រេង ៤,៨លីត្រ/១០០ គីឡូម៉ែត្រ និងចាក់សាំងពេញអាចបើកបរបានចម្ងាយសរុប ១ ៤៣០ គីឡូម៉ែត្រ។

លើសពីនេះ Geely Galaxy Starship 7 ប្រើប្រាស់ប្រព័ន្ធបច្ចេកវិទ្យា 11-in-1 electric drive ជាមួយនឹងម៉ូទ័រអគ្គិសនីចំនួន២ P1+P3 ដែលមានប្រសិទ្ធភាពខ្ពស់រហូតដល់ ៩៨ភាគរយ ខណៈកម្លាំងមិនទាន់មានការដាក់បង្ហាញចេញនៅឡើយទេ។ ក្នុងនោះ រថយន្តនេះ អាចបង្កើនល្បឿនពី ០ – ១០០ គីឡូម៉ែត្រក្នុងមួយម៉ោង ចំណាយពេល ៧,៥ វិនាទី។

សម្រាប់ការរចនាផ្នែកខាងក្រៅ មានភាពស្ព័រដោយបំពាក់ជាមួយប៉ាណាមុខបិទជិត ចង្កៀងមុខ-ក្រោយ LED អូសកាត់ពីផ្នែកម្ខាងទៅម្ខាង ព្រមទាំងប្រើប្រាស់នូវថាសកង់ស្ព័រទំហំ ១៩អ៊ីញ និងដៃទ្វារប្រភេទ Flush-door។

ខណៈផ្នែកខាងក្នុងវិញ ទទួលបានអេក្រង់បង្ហាញព័ត៌មានឌីជីថលទំហំតូច និងអេក្រង់ព៌ត័មានកម្សាន្ត Touchsrceen ទំហំ ១៤,៦ អ៊ីញ ក៏ដូចជាភ្លើងបំភ្លឺ ambient light ដំបូលបើក កន្លែងសាកថ្មទូរស័ព្ទឥតខ្សែកម្លាំង ៥០វ៉ាត់ ប្រព័ន្ធ GPS មុខងារ AI voice assistant ម៉ាសុីនត្រជាក់អូតូ កៅអីម៉ាស្សា-ក្តៅ-ត្រជាក់ អេក្រង់លើកញ្ជក់ HUD ទំហំ ១៣,៨អ៊ីញ បាសសម្លេងចំនួន ១៦ចំនុច និងប្រព័ន្ធ ADAS ផ្សេងៗជាដើម៕

ផ្ទាំងផ្សាយពាណិជ្ជកម្ម

ចេញហើយ! Toyota Grand Highlander សេរ៊ីឆ្នាំ២០២៥ តម្លៃខ្ទង់ ៤មុឺនដុល្លារ មានជម្រើសម៉ាសុីនចំនួន៣

November 5, 2024

[ទីផ្សារបរទេស] កាលពីពេលថ្មីៗនេះ ក្រុមហ៊ុន Toyota បានធ្វើការប្រកាសដាក់បង្ហាញចេញជាផ្លូវការនូវតម្លៃលក់របស់រថយន្ត Toyota Grand Highlander សេរ៊ីឆ្នាំ២០២៥ ជាមួយតម្លៃលក់ចាប់ពី ៤០ ៨៦០ ដុល្លារ ដល់ ៥៨ ៧៧៥ ដុល្លារ នៅក្នុងទីផ្សារសហរដ្ឋអាមេរិក (តម្លៃទាបជាងជំនាន់មុនខ្ទង់ ២ ៤៦០ដុល្លារ) ។

រថយន្តនេះ ដំណើរការដោយ៖

ម៉ាសុីន Hybrid Max ធ្វើការជាមួយម៉ាស៊ីនសាំងចំណុះ ២,៥ លីត្រ turbocharged ទំហំ ៤សុីឡាំង និងម៉ូទ័រអគ្គិសនីចំនួន១ អាចផលិតកម្លាំងសរុបបាន ៣៦២ សេះ និងកម្លាំងរមួល ៥៤២ ញ៉ូតុនម៉ែត្រ។
ម៉ាសុីន Hybrid ធ្វើការជាមួយម៉ាស៊ីនសាំងចំណុះ ២,៥ លីត្រ ទំហំ ៤សុីឡាំង និងម៉ូទ័រអគ្គិសនីចំនួន២ អាចផលិតកម្លាំងសរុបបាន ២៤៥ សេះ និងកម្លាំងរមួល ៥៤២ ញ៉ូតុនម៉ែត្រ។
ម៉ាស៊ីនសាំងចំណុះ ២,៤ លីត្រ turbocharged ទំហំ ៤សុីឡាំង អាចផលិតកម្លាំងបាន ២៦៥ សេះ និងកម្លាំងរមួល ៤២០ ញ៉ូតុនម៉ែត្រ ភ្ជាប់ដោយប្រអប់លេខអូតូចំនួន ៨វគ្គ។

ក្នុងនោះ រថយន្តនេះ ផ្តល់ជូនទាំងជម្រើសប្រព័ន្ធបើកបរប៉ុង ១ FWD និងប៉ុង ២ AWD និងមានកម្រិតសុីប្រេងចន្លោះពី ៦,៩លីត្រ ទៅ ១០,២លីត្រ ក្នុងចម្ងាយ ១០០គីឡូម៉ែត្រ(អាស្រ័យលើ Option)។

សម្រាប់ការរចនាផ្នែកខាងក្រៅបានតុបតែងជាមួយប៉ាណាមុខពណ៌ខ្មៅទំហំធំ អបសងខាងដោយចង្កៀង LED ថាសកង់ស្ព័រពណ៌ខ្មៅទំហំ ២០អ៊ីញ និងចង្កៀងក្រោយប្រភេទ LED រាងអក្សរ C។

ចំពោះនៅខាងផ្នែកក្នុងកាប៊ីនវិញ ត្រូវបានតុបតែងដោយស្បែកពណ៌ខ្មៅ និងបំពាក់ដោយកុងទ័របង្ហាញព័ត៌មាន ៧អ៊ីញ និងអេក្រង់កំសាន្តទំហំ ១២,៣ អ៊ីញ ក៏ដូចជាឧបករណ៍បំពងសំលេងចំនួន ៦ចំនុច ម៉ាសុីនត្រជាក់ចំនួន ៣ចំនុច និង ប្រព័ន្ធជំនួយការបើកបរ Toyota Safety Sense 3.0 ជាដើម (អាស្រ័យលើ Option) ៕

ផ្ទាំងផ្សាយពាណិជ្ជកម្ម

Nio ថា ពួកគេមានគម្រោងនឹងណែនាំរថយន្ត PHEV ដំបូងរបស់ខ្លួននៅក្នុងឆ្នាំ២០២៦

November 4, 2024

ក្រុមហ៊ុន Nio បានប្រកាសថា ពួកគេមានគម្រោងនឹងណែនាំរថយន្តម៉ូដែលថ្មីប្រភេទ Plug-in Hybrid Electric Vehicle (PHEV) ដំបូងរបស់ខ្លួន ដែលនឹងប្រើប្រាស់នូវម៉ាកយីហោរបស់ក្រុមហ៊ុន Firefly ក្នុងឆ្នាំ២០២៦ និងផ្តោតសំខាន់លើទីផ្សារអន្តរជាតិមួយចំនួនដូចជា មជ្ឈិមបូព៌ា អាហ្វ្រិកខាងជើង និងអឺរ៉ុប។

ការសម្រេចនេះ បានកើតឡើងបន្ទាប់ពីការប្រឹក្សាពីក្រុមហ៊ុន CYVN Holdings ដែលជាអ្នកវិនិយោគធំរបស់ Nio ដើម្បីបង្កើនទីផ្សារលក់រថយន្តរបស់ពួកគេ បន្ទាប់ពីការលក់រថយន្តអគ្គិសនីសុទ្ធរបស់ពួកគេហាក់ដូចជាមិនកើនឡើងខ្ពស់។

ចំពោះការចេញលក់ម៉ូដែលថ្មីនេះ មានគោលបំណងដើម្បីដោះស្រាយបញ្ហាមួយចំនួនដូចជា ការពន្យារពេលនៅក្នុងការអភិវឌ្ឍស្ថានីយសាកថ្ម (ធ្លាប់ប្រកាសគម្រោងបង្កើតស្ថានីយស្ថានីយសាកថ្មរថយន្តអគ្គិសនីចំនួន ១២០កន្លែង នៅក្នុងតំបន់អឺរ៉ុបមុនចុងឆ្នាំ២០២៣ ប៉ុន្តែពេលបច្ចុប្បន្ននេះ Nio មានស្ថានីយសាកថ្មត្រឹមតែ ៥៧ កន្លែងប៉ុណ្ណោះនៅក្នុងប្រទេសនៅក្នុងតំបន់អឺរ៉ុប) និងដើម្បីកាត់បន្ថយការចំណាយអំពីការរឹតបន្តឹងពន្ធរបស់សហភាពអឺរ៉ុប៕

ផ្ទាំងផ្សាយពាណិជ្ជកម្ម