បញ្ចេញសរុបតែម្តង! Nissan នឹងដាក់បង្ហាញចេញរថយន្តជំនាន់ថ្មីដល់ទៅ ៣០ម៉ូដែលនៅ ២ឆ្នាំខាងមុខ

March 26, 2024

[បរទេស] កាលពីពេលថ្មីៗនេះ លោក Makoto Uchida នាយកប្រតិបត្តិក្រុមហ៊ុនផលិតរថយន្ត Nissan បានបង្ហាញថា ក្រុមហ៊ុនគ្រោងនឹងធ្វើការដាក់បង្ហាញចេញរថយន្តជំនាន់ថ្មីដល់ទៅ ៣០ម៉ូដែលនៅលើទីផ្សារពិភពលោកនៅក្នុងឆ្នាំ ២០២៦ ដោយក្នុងចំណោមនោះ មាន ១៦ម៉ូដែលជាប្រភេទអគ្គិសនី ។

ជាមួយគ្នានេះ ប្រហែល ៦០ភាគរយនៃរថយន្តប្រើម៉ាស៊ីនចំហេះខាងក្នុងសកលរបស់ Nissan នឹងត្រូវបានធ្វើឲ្យប្រសើរឡើងវិញ ក្នុងការជួយក្រុមហ៊ុនឱ្យសម្រេចបាននូវគោលដៅរបស់ខ្លួនក្នុងការបង្កើនការលក់ប្រចាំឆ្នាំចំនួន ១ លានគ្រឿង។ លើសពីនេះ Nissan មានបំណងកាត់បន្ថយតម្លៃនៃរថយន្តអគ្គិសនីជំនាន់ក្រោយចំនួន ៣០ ភាគរយផងដែរ ។

មិនត្រឹមតែប៉ុណ្ណោះ Nissan ក៏បានបង្ហាញរូបភាព Teaser នៃម៉ូដែលអគ្គីសនីសុទ្ធជំនាន់ថ្មី ដែលរួមមានដូចជា Nissan Leaf, Nissan Micra និង Nissan Juke ព្រមទាំងអាចបញ្ចេញរថយន្តប្រភេទ SUV ខ្នាតតូច និងរថយន្តភីកអាប់ផងដែរ ៕

ផ្ទាំងផ្សាយពាណិជ្ជកម្ម

ប្រជាជនអាមេរិកចង់ប្រើឡានអគ្គិសនី ប៉ុន្តែជាឡានដែលអាចសាកថ្មបានលឿន និងមានតម្លៃថោក

March 26, 2024

[ការសិក្សា] ជាង ៧០ភាគរយនៃអ្នកប្រើប្រាស់នៅសហរដ្ឋអាមេរិនកំពុងពិចារណាទៅលើការទិញ រថយន្តអគ្គិសនីនាពេលខាងមុខ ឬអនាគត។ ដើម្បីធ្វើអោយអ្នកទិញមានចំណាប់អារម្មណ៍លើម៉ូឌែលរថយន្តនៃក្រុមហ៊ុនរថយន្តនីមួយៗគឺត្រូវមានតម្លៃថោក ប៉ុន្តែវាពិតជាពិបាក។

ក្នុងនោះ យោងតាមការសិក្សាថ្មីមួយបានរកឃើញថា ក្រុមហ៊ុនផលិតរថយន្តនីមួយៗបានខាតលុយជាមធ្យមប្រហែល ៦ ០០០ដុល្លារ លើរថយន្តអគ្គិសនីនីមួយៗដែលពួកគេលក់ក្នុងតម្លៃ ៥០ ០០០ដុល្លារ បន្ទាប់ពីគិតបញ្ចូលទៅលើតម្លៃពន្ធហើយ។ ក្នុងនោះដើម្បីជួយកាត់បន្ថយការខាតបង់នោះ ក្រុមហ៊ុនផលិតរថយន្តនីមួយក៏ត្រូវការការគាំទ្រពីរដ្ឋាភិបាលនៃប្រទេសនេះ ខណ:ពេលខ្លួនបានព្យាយាមកាត់បន្ថយទៅលើបច្ចេកវិទ្យានៃរថយន្ត ក៏ដូចជាតម្លៃផងដែរ ដើម្បីធ្វើយ៉ាងណាអោយរថយន្តខ្លួនស្ថិតនៅតម្លៃមួយដែលអ្នកប្រើប្រាស់អាចទិញបាន។

បន្ថែមពីនេះ យោងតាមការស្រាវជ្រាវរបស់ BCG វិញ បានរកឃើញថាសន្ទុះនៃអតិថិជនដែលចង់ទិញរថយន្តអគ្គិសនី គឺចង់បានរថយន្តណាដែលអាចសាកថ្មបានលឿន។ ជាក់ស្តែងដូចជាអាចសាកត្រឹមរយៈពេល ២០នាទី អាចជិះបានខ្ទង់ ៥៦៣គីឡូម៉ែត្រ ជាពិសេសមានតម្លៃខ្ទង់ ៥ម៉ឺនដុល្លារ ឫទាបជាងនេះប៉ុណ្ណោះ។

ជាមួយតម្រូវការនេះ គេបានរគឃើញថារថយន្តលើទីផ្សារនាពេលបច្ចុប្បន្ននេះ ដែលអាចបំពេញបំណងប្រាថ្នារបស់អ្នកប្រើប្រាស់បានគឺមានតែមួយម៉ូឌែលប៉ុណ្ណោះ នោះគឺជា Hyundai loniq 6 SE RWD Long Range។ ប៉ុន្តែទោះជាយ៉ាងណា នាពេលខាងមុខក៏នឹងមានរថយន្តអគ្គិសនីផ្សេងទៀតនឹងបង្ហាញខ្លួនផងដែរ ដែលអាចបំពេញតម្រូវការនៃការចង់បាននេះ ប៉ុន្តែតម្លៃខ្ទង់ត្រឹម ៥០ ០០០ ដុល្លារវាពិតជាពិបាក ជាពិសេសសម្រាប់តម្រូវការសាកថ្មលឿន តែជិះបានឆ្ងាយ។ លើសពីនេះ BCG ក៏បានបង្ហាញថាបច្ចុប្បន្ននេះ អ្នកប្រើប្រាស់រថយន្តអគ្គិសនីមានត្រឹម ១២ភាគរយប៉ុណ្ណោះ ប៉ុន្តែអាចនឹងឡើងដល់ ២០-៣០ភាគរយនៅពេលដែលម៉ូឌែលរថយន្តថ្មីៗទៀតបង្ហាញខ្លួន៕

ផ្ទាំងផ្សាយពាណិជ្ជកម្ម

Toyota និង Honda ត្រូវប៉ាន់ដោយសារការលក់រថយន្តប្រភេទកូនកាត់ Hybrid

March 26, 2024

[បរទេស] យោងតាមគេហទំព័រ Nikkie បានឲ្យដឹងថា រថយន្តប្រភេទកូនកាត់ Hybrid ទទួលបានប្រជាប្រិយភាពយ៉ាងខ្លាំងនៅទីផ្សារសហរដ្ឋអាមេរិក ដោយលក់បានចំនួន ១០៦ ០០០ គ្រឿងនៅក្នុងខែកុម្ភៈ ឆ្នាំ២០២៤ កើនឡើងដល់ទៅ ៥៤% បើធៀបនឹងឆ្នាំមុន ។

ជាមួយគ្នានេះ ក្រុមហ៊ុនផលិតរថយន្តរបស់ប្រទេសជប៉ុនចំនួន ២ គឺ Toyota និង Honda មានសន្ទុះខ្លាំងក្នុងការរថយន្តប្រភេទកូនកាត់ Hybrid ដោយ Toyota បានលក់រថយន្ត RAV បានចំនួនដល់ទៅ ៤៣ ០០០ គ្រឿងនៅក្នុងខែកុម្ភៈ ដោយមានប្រភេទប្រើ Hybrid ច្រើនជាង ២០ ០០០គ្រឿង ដែលជាចំនួនច្រើនជាង ៣ដងពីការលក់ក្នុងឆ្នាំមុន ។ លើសពីនេះ រថយន្ត Camry និង Corolla hybrid ក៏មានលក់ដ៏ប្រសើរផងដែរ ។

រីឯក្រុមហ៊ុន Honda វិញ រថយន្ត Honda CR-V លក់បានចំនួនសរុប ៣២ ០០០ គ្រឿងនៅក្នុងខែកុម្ភៈ នៅទីផ្សារសហរដ្ឋអាមេរិក ដោយប្រភេទកូនកាត់ Hybrid លក់បានចំនួន ១៤ ០០០ គ្រឿង៕

ផ្ទាំងផ្សាយពាណិជ្ជកម្ម

MG5 ស៊េរីឆ្នាំ ២០២៤ ចេញលក់នៅទីផ្សារប្រទេសថៃជាមួយតម្លៃក្រោម ២មុឺនដុល្លារ

March 25, 2024

[បរទេស] ក្រុមហ៊ុនផលិតរថយន្ត MG ប្រចាំនៅទីផ្សារប្រទេសថៃ បានធ្វើការដាក់បង្ហាញចេញជាផ្លូវការនៅរថយន្ត MG5 ស៊េរីឆ្នាំ ២០២៤ ផ្តល់ជូននៅជម្រើស ២ម៉ូដែលរួមមានម៉ូដែល D និង X ជាមួយតម្លៃលក់ចាប់ពី ១៧ ២៨០ ដុល្លារ ដល់ ១៨ ៣៧៧ ដុល្លារ ។

MG5 ស៊េរីឆ្នាំ ២០២៤ បំពាក់ជាមួយម៉ាស៊ីនសាំងចំណុះ ១,៥ លីត្រ ទំហំ ៤ស៊ីឡាំង អាចផលិតកម្លាំងបាន ១១៤ សេះ និងកម្លាំងរមួល ១៥០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៨វគ្គ ប្រភេទ CVT ។

រថយន្តនេះ មានប្រវែងតួខ្លួនសរុប ៤ ៦៩៥ ម.ម ទទឹង ១ ៨៤២ ម.ម កំពស់ ១ ៤៨០ ម.ម និងប្រវែងគន្លាតកង់មុខ-ក្រោយ ២ ៦៨០ ម.ម ដោយមានការឌីស្សាញបែបស្ព័រ ជាមួយប៉ាណាមុខមួយផ្ទាំងធំ ចង្កៀងមុខ-ក្រោយ LED ថាសកង់ស្ព័រពណ៌ខ្មៅ រួមទាំងកងទ័របង្ហាញព័ត៌មានឌីជីថល និងអេក្រង់កំសាន្ត touchscreen រួមទាំងកៅអីស្រោបដោយស្បែកផងដែរ ។ លើសពីនេះ ក៏បានភ្ជាប់មកជាមួយប្រព័ន្ធជំនួយការអ្នកបើកបរដ៏ឆ្លាតវៃ MG Pilot ទៀរតផង ៕

ផ្ទាំងផ្សាយពាណិជ្ជកម្ម

ភីកអាប់អគ្គិសនីរបស់ Geely នេះ មានល្បឿនលឿនជាងគេក្នុងចំណោមភីកអាប់ដ៏ទៃ

March 25, 2024

[បរទេស] ក្រុមហ៊ុនផលិតរថយន្ត Geely បានធ្វើការដាក់បង្ហាញចេញជាផ្លូវការនៅភីកអាប់អគ្គិសនីសុទ្ធ Geely Radar RD6 Horizon ឆ្នាំ ២០២៤ ដែលជាភីកអាប់មានល្បឿនលឿនជាងគេក្នុងចំណោមភីកអាប់ដ៏ទៃនៅប្រទេសចិន ជាមួយតម្លៃលក់ចាប់ពី ២០ ១៥០ ដុល្លារ ដល់ ៣៧ ២០០ ដុល្លារនៅប្រទេសចិន ។

ភីកអាប់អគ្គិសនីនេះ ផលិតឡើងនៅលើគ្រោងឆ្អឹង SEA Platform បំពាក់ជាមួយម៉ូទ័រអគ្គិសនីចំនួន ២ ដែលអាចផលិតកម្លាំងបានសរុប ៤២២ សេះ និងកម្លាំងរមួល ៥៩៤ ញ៉ូតុនម៉ែត្រ អាចរត់ស្ទុះពីកុងទ័រ ០-១០០ គីឡូម៉ែត្រប្រើរយៈពេល ៤,៥ វិនាទី និងផ្គួបជាមួយអាគុយទំហំ ១០០ គីឡូវ៉ាត់ម៉ោងអាចបើកបរបានចម្ងាយ ៦៣២ គីឡូម៉ែត្រពេលសាកថ្មពេញម្តង ប្រភេទបើកបរប៉ុង២ ។

Geely Radar RD6 Horizon មានប្រវែងតួខ្លួនសរុប ៥ ២៦០ ម.ម ទទឹង ១ ៩០០ ម.ម កំពស់ ១ ៨៨០ ម.ម និងប្រវែងគន្លាតកង់មុខ-ក្រោយ ៣ ១២០ ម.ម ដោយមានប៉ាណាមុខបិទជិងអបជាមួយអក្សរ RADAR ចង្កៀងមុខ-ក្រោយ LED ខណៈផ្នែកខាងក្នុងអាចផ្ទុកបានដល់ ១២០០ លីត្រឯណ្ណោះ ។ លើសពីនេះ ក៏ទទួលបានប្រព័ន្ធជំនួយការអ្នកបើកបរដ៏ឆ្លាតវៃកម្រិតទី ២ ទៀតផង ។

ផ្ទាំងផ្សាយពាណិជ្ជកម្ម

អីយ៉ាស់! Toyota បង្ហាញក្តីសង្ឃឹម ដាក់ម៉ូដែលថ្មីរបស់ខ្លួនចូលផលិតកម្មឆាប់ៗ

March 25, 2024

[បរទេស] កាលពីឆ្នាំ ២០២៣ កន្លងទៅ ក្រុមហ៊ុនផលិតរថយន្ត Toyota បានបញ្ចេញគំរូរថយន្ត X-Van Gear Concept ប្រភេទ minivan នៅឯពិព័រណ៌រថយន្ត Japan Mobility Show 2023 ខណៈពេលនេះក្រុមហ៊ុនបានបញ្ចេញរូបភាពប៉ាតង់ ដែលជាការបង្ហាញនៅក្តីសង្ឃឹមអាចនឹងចូលផលិតកម្មឆាប់ៗនេះ ។

X-Van Gear ត្រូវបានរចនាឡើងដើម្បីជារថយន្តប្រភេទ minivan បែបផ្សងព្រេងជាមួយរូបរាងបែបប្រអប់ជ្រុងដូចទៅនឹង Toyota FJ Cruiser ប្រើប្រាស់ទ្វាររូតមុខ-ក្រោយ ជាមួយទំហំប្រហាក់ប្រហែលទៅនឹងរថយន្ត Toyota Noah និង Voxy ពោលគឺមានប្រវែងតួខ្លួនសរុប ៤ ៩៦៥ ម.ម ទទឹង ១ ៨២០ ម.ម កំពស់ ១ ៨៥៥ ម.ម ។

ចំពោះនៅផ្នែកខាងក្នុងវិញ បានផ្តល់នូវកៅអី ៣ជួរដែលត្រូវបានតំឡើងនៅលើដែកដែលអនុញ្ញាតឲ្យពួកគេអាចបង្វិលបាន និងបង្កើតកន្លែងធំទូលាយសម្រាប់ដាក់សម្ភារៈ ជាពិសេសសម្រាប់អ្នកចូលចិត្តផ្សងព្រេង។

គួរបញ្ជាក់ផងដែរថា ក្រុមហ៊ុនផលិតរថយន្តយក្យរបស់ប្រទេសជប៉ុនមិនទាន់បានធ្វើការបញ្ជាក់ថា រថយន្តនេះនឹងត្រូវបានចូលផលិតកម្មឬអត់នោះទេ ៕

ផ្ទាំងផ្សាយពាណិជ្ជកម្ម

BYD ចង់បានចំណែកទីផ្សារ 5% ពីការលក់ឡានអគ្គិសនីនៅអឺរ៉ុបរបស់ខ្លួន មុនពេលចាប់ផ្តើមផលិតកម្មនៅហុងគ្រី

March 24, 2024

[របាយការណ៍] ក្រុមហ៊ុនផលិតរថយន្តចិន BYD មានមហិច្ឆតាចង់បានចំណែកទីផ្សារនៃការលក់រថយន្តរបស់ខ្លួននៅក្នុងទីផ្សារអឺរ៉ុបចំនួន ៥ភាគរយ មុនពេលខ្លួនចាប់ផ្តើមផលិតកម្មនៅក្នុងប្រទេសហុងគ្រី។

ក្នុងនោះ BYD បានលក់រថយន្តនៅទីផ្សារអឺរ៉ុបចាប់តាំងពីឆ្នាំ២០២១ ជាមួយចំនួន ១៥ ៦៤៤គ្រឿង ដែលវាជាចំនួនតូចមួយនៃរថយន្ត EV និង PHEV ៣លានគ្រឿងដែល BYD បានចែកចាយទូទាំងពិភពលោកដោយកាលពីឆ្នាំមុន។

ជាមួយចំនួននេះ លោក Shu បានបញ្ចាក់ប្រាប់ថាលោកទើបតែចាប់ផ្តើម និងស្វែងយល់ពីរបៀបដែលប្រជាជនអឺរ៉ុបបានឆ្លើយតបទៅនឹងបច្ចេកវិទ្យា ផលិតផល និងសេវាកម្មរបស់ BYD ដោយទីផ្សារអឺរ៉ុបមានភាពខុសប្លែកពីទីផ្សារដទៃទៀត ជាពិសេសប្រទេសចិន និងសហរដ្ឋអាមេរិច ប៉ុន្តែ BYD ចង់បានចំណែកទីផ្សារ EV ៥% នៅអឺរុបមុនពេលចាប់ផ្ដើមផលិតកម្ម។

ក្រុមហ៊ុនផលិតរថយន្តយក្សរបស់ចិននេះ ជឿជាក់ថារោងចក្ររបស់ខ្លួននៅក្នុងប្រទេសហុងគ្រីនឹងដើរតួនាទីយ៉ាងសំខាន់ ដែលនឹងជួយអោយការផលិត និងការដឹកជញ្ជូនលឿនជាងមុននិងកសាងទំនុកចិត្តកាន់តែច្រើនពីអ្នកប្រើប្រាស់។ ខណ:ពេលដែលរោងចក្រថ្មីនឹងមានសម្ថភាពអាចផលិតរថយន្តបានចំនួន ១៥ម៉ឺនគ្រឿង ព្រមទាំងអាចឈានដល់ ៣០ម៉ឺនគ្រឿងផងដែរ៕

ផ្ទាំងផ្សាយពាណិជ្ជកម្ម

Toyota បញ្ចេញម៉ូដែលថ្មី ជាមួយតម្លៃលក់អត់ដល់ ២មុឺនដុល្លារ

March 23, 2024

[ទីផ្សារបរទេស] ក្រុមហ៊ុនផលិតរថយន្តបណ្តាក់ទុនរួមគ្នា GAC-Toyota បានធ្វើការដាក់ចេញលក់នៅរថយន្ត Toyota Corolla Levin ស៊េរីឆ្នាំ ២០២៤ នៅក្នុងទីផ្សារប្រទេសចិន ជាមួយតម្លៃលក់ចាប់ពី ១៧ ៩៥៥ ដុល្លារ ដល់ ១៨ ៧៨៥ ដុល្លារ ។

រថយន្តប្រភេទ Sedan នេះ ផលិតឡើងនៅលើគ្រោងឆ្អឹង TGNA platform ដំណើរការដោយម៉ាស៊ីនសាំងចំណុះ ១,២ លីត្រ Turbo ទំហំ ៤ស៊ីឡាំង អាចផលិតកម្លាំងបាន ១១៦ សេះ និងកម្លាំងរមួល ១៨៥ ញ៉ូតុនម៉ែត្រ ភ្ជាប់ដោយប្រអប់លេខអូតូ ១០វគ្គ ប្រភេទ S-CVT ។

Toyota Corolla Levin មានប្រវែងតួខ្លួនសរុប ៤៦៤០ ម.ម ទទឹង ១ ៧៨០ ម.ម កំពស់ ១៤៥៥ ម.ម និងប្រវែងគន្លាតកង់មុខ-ក្រោយ ២៧០០ ម.ម ខណៈការឌីស្សាញមានលក្ខណៈបែបស្ព័រ ជាមួយប៉ាណាមុខមួយផ្ទាំងធំ ចង្កៀងមុខ-ក្រោយប្រភេទ LED រួមទាំងថាសកង់ស្ព័រទំហំ ១៧អ៉ីញត្រូវបានរចនាថ្មី ។

ចំពោះនៅផ្នែកខាងក្នុងវិញ មានបំពាក់កុងទ័របង្ហាញព័ត៌មានឌីជីថលទំហំ ៤,២ អ៉ីញ និងអេក្រង់កំសាន្ត touchscreen ទំហំ ៩អ៉ីញ ព្រមទាំងកញ្ចប់សុវត្ថិភាព Toyota Safety Sense ផងដែរ ៕

ផ្ទាំងផ្សាយពាណិជ្ជកម្ម

Nissan Kicks ស៊េរីឆ្នាំ ២០២៥ អាប់ដេតថ្មីបន្ថែម បង្ហាញខ្លួនជាផ្លូវការហើយ

March 23, 2024

[ទីផ្សារបរទេស] ក្រុមហ៊ុនផលិតរថយន្ត Nissan បានធ្វើការដាក់បង្ហាញចេញជាផ្លូវការនៅរថយន្ត Nissan Kicks ស៊េរីឆ្នាំ ២០២៥ អាប់ដេតថ្មីបន្ថែម នៅទីផ្សារសហរដ្ឋអាមេរិក ជាមួយតម្លៃលក់ចាប់ពី ២២ ៤០០ ដុល្លារ ។

Nissan Kicks ស៊េរីឆ្នាំ ២០២៥ ទទួលបានម៉ាស៊ីនថ្មី ពោលបានបំពាក់ដោយម៉ាស៊ីនសាំងចំណុះ ២,០ លីត្រ អាចផលិតកម្លាំងបាន ១៣៩ សេះ និងកម្លាំងរមួល ១៩០ ញ៉ូតុនម៉ែត្រ ភ្ជាប់ដោយប្រអប់លេខអូតុ CVT ជាមួយជម្រើសប៉ុង២ជាលើកដំបូងផងដែរ ។

រថយន្តនេះ មានប្រវែងតួខ្លួនសរុប ៤ ៣៦៦ ម.ម ទទឹង ១ ៨០១ ម.ម កំពស់ ១ ៦២៦ ម.ម និងប្រវែងគន្លាតកង់មុខ-ក្រោយ ២ ៦៥៧ ម.ម ដែលត្រូវបានឌីស្សាញរូបរាងជាប្រអប់ជ្រុង ជាមួយចង្កៀងមុខ LED រួមបញ្ចូលគ្នាទៅនឹងប៉ាណាមួយផ្ទាំងធំ ក៏ដូចជាថាសកង់ស្ព័រ និងចង្កៀងក្រោយ LED ឌីស្សាញស្រដៀងគ្នាទៅនឹងរថយន្ត Alfa Romeo Milano ។

ចំពោះនៅផ្នែកខាងក្នុងវិញ មានកុងទ័របង្ហាញព័ត៌មានឌីជីថលទំហំ ៧អ៉ីញ និងអេក្រង់កំសាន្ត touchscreen ទំហំ ១២,៣ អ៉ីញ អាចភ្ជាប់មុខងារ Apple CarPlay និង Android Auto ក៏ដូចជាកន្លែងសាកថ្មឥតប្រើខ្សែ ឧបករណ៍បំពងសំឡេងម៉ាក BOSE ចំនុច ។ លើសពីនេះ ក៏ទទួលបានប្រព័ន្ធសុវត្ថិភាព និងជំនួយការអ្នកបើកបរ Nissan Safety Shield 360 ADAS Suite និងបានអាប់ដេតទៅលើប្រព័ន្ធ ProPilot Asisst system ទៀតផង ៕

ផ្ទាំងផ្សាយពាណិជ្ជកម្ម

ម៉ូដែលខ្ពស់បំផុតរបស់ Kia Carnival ឆ្នាំ ២០២៤ ចេញលក់នៅប្រទេសថៃតម្លៃ ៨មុឺនដុល្លារជាង

March 23, 2024

[ទីផ្សារបរទេស] ក្រុមហ៊ុនផលិតរថយន្ត Kia ប្រចាំនៅទីផ្សារប្រទេសថៃ គ្រោងនឹងធ្វើការដាក់បង្ហាញចេញជាផ្លូវការនៅ Kia Carnival ស៊េរីឆ្នាំ ២០២៤ ម៉ូដែលថ្មី SXL Luxury នៅឯពិព័រណ៌រថយន្ត Bangkok International Auto Show 2024 ដែលធ្វើនៅចាប់ពីថ្ងៃ ២៧ ខែមិនា ឆ្នាំ ២០២៤ ជាមួយតម្លៃលក់ចាប់ពី ៨២ ៤៣៧ ដុល្លារ ។

រថយន្តប្រភេទ MPV នេះ ដំណើរការដោយម៉ាស៊ីនម៉ាស៊ូតចំណុះ ២,២ លីត្រ ទំហំ ៤ស៊ីឡាំង អាចផលិតកម្លាំងបាន ២០២ សេះ និងកម្លាំងរមួល ៤៤០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៨វគ្គ ។

Kia Carnival SXL Luxury ស៊េរីថ្មីនេះ ត្រូវបានបង្កើតឡើងជារថយន្តទំនើប MPV Grand Utility Vehicle ដោយមានប៉ាណាទំហំធំ ចង្កៀងមុខ-ក្រោយ LED មានមុខងារបើក-បិទស្វ័យប្រវត្តិ រួមទាំងទ្វាររូតចំហៀងសងខាង និងទ្វារក្រោយបើក-បិទដោយថាមពលអគ្គិសនី និងថាសកង់ស្ព័រទំហំ ១៩អ៉ីញ ។

ចំពោះនៅផ្នែកខាងក្នុងវិញ ត្រូវបានផ្លាស់ប្តួរថ្មី ដោយបានឌីស្សាញតាប្លូបែបកាងនិងមានបំពាក់កុងទ័របង្ហាញព័ត៌មានឌីជីថលទំហំ ១២.៣ អ៉ីញ និងអេក្រង់កំសាន្ត touchscreen ទំហំ ១២,៣ អ៉ីញរួមចូលគ្នាជាអេក្រង់ភ្លោះ អាចភ្ជាប់មុខងារ Apple Carplay និង Android Auto ឧបករណ៍បំពងសំឡេងម៉ាក BOSE ១២ចំណុច និងកន្លែងសាកថ្មឥតប្រើខ្សែជាដើម ៕