[បរទេស] កាលពីពេលថ្មីនេះ ក្រុមហ៊ុនផលិតរថយន្ត Zeekr បានធ្វើការដាក់បង្ហាញចេញជាផ្លូវការនូវរថយន្តអគ្គិសនីសុទ្ធ Zeekr X ស៊េរីឆ្នាំ២០២៥ ក្នុងទីផ្សារប្រទេសថៃ និងសិង្ហបុរី។ បច្ចុប្បន្ននេះរថយន្តអគ្គិសនី Zeekr X RHD នៅក្នុងប្រទេសថៃទទួលបាន ២ ជម្រើសរួមមាន standard និង Flagship versions រួមជាមួយពណ៌ខាងក្រៅចំនួន៥ ដែលមានតម្លៃលក់ចាប់ពី ៣៤,០០០ ដុល្លារ ដល់ ៣៨,៤០០ ដុល្លារ។ សម្រាប់ទីផ្សារសិង្ហបុរីវិញមានតម្លៃលក់់ចាប់ពី ១៥០,៧០០ ដុល្លារ ដល់ ១៦២,០០០ ដុល្លារ។
គួរឲដឹងផងថា ក្រុមហ៊ុនផលិតរថយន្ត Zeekr បាននាំយករថយន្តអគ្គិសនី Zeekr X RHD ចូលទីផ្សារប្រទេសថៃជាផ្លូវការនៅថ្ងៃទី ១១ ខែកក្កដា បច្ចុប្បន្ននេះ ក្រុមហ៊ុនផលិតរថយន្ត Zeekr មានហាងតាំងបង្ហាញរថយន្តចំនួន៤ នៅក្នុងទីក្រុងបាងកក ប្រទេសថៃ ហើយគ្រោងបើកបន្ថែមចំនួន ១៤ ទីតាំងផ្សេងទៀតនៅចុងឆ្នាំ២០២៤ េនះ។ លើសពីនេះទៅទៀត បើគិតត្រឹមដំណាច់ខែមិថុនា Zeekr បានវាយលុកទីផ្សារអន្តរជាតិចំនួន ២៥ប្រទេស រួចមកហើយរួមទាំងប្រទេសស៊ុយអែត ហូឡង់ អាល្លឺម៉ង់ អារ៉ាប់រួម និងអារ៉ាប៊ីសាអូឌីត និងបានចុះហត្ថលេខាលើកិច្ចព្រមព្រៀងជាមួយដៃគូនៅក្នុងប្រទេសអ៊ីស្រាអែល និងកាហ្សាក់ស្ថាន ជាដើម ហើយរំពឹងថានឹងកើនឡើងដល់ ៥០ប្រទេស ក្នុងទីផ្សារអន្តរជាតិនៅចុងឆ្នាំនេះ។ បន្ថែមពីនេះទៅទៀតក្រុមហ៊ុន Zeekr ក៏គ្រោងបើកការបញ្ជាទិញរថយន្ត Zeekr X ក្នុងទីផ្សារអូស្ត្រាលីក្នុងខែសីហានេះផងដែរ។
រថយន្តនេះ មានប្រវែងតួខ្លួនសរុប ៤ ៤៥០ ម.ម ទទឹង ១ ៨៣៦ ម.ម កំពស់ ១ ៥៧២ និងប្រវែងកម្លាតកង់មុខ-ក្រោយ ២ ៧៥០ ម.ម ដំណើរការដោយ៖
- ម៉ូទ័រអគ្គិសនីចំនួន ១ អាចផលិតកម្លាំងបាន ២៦៨ សេះ និងកម្លាំងរមួល ៣៤៣ ញ៉ូតុនម៉ែត្រ ភ្ជាប់មកជាមួយប្រភេទបើកបរប៉ុង ១ RWD ជាស្តង់ដារ ផ្គួបជាមួយអាគុយទំហំ ៦៦ គីឡូវ៉ាត់ម៉ោង អាចបើកបរបានចម្ងាយ ៥៦០ គីឡូម៉ែត្រ នៅពេលសាកថ្មពេញម្តង និិងរត់ស្ទុះពី ០-១០០ គីឡូម៉ែត្រ/ម៉ោង ចំណាយពេល ៥,៨ វិនាទី។
- ម៉ូទ័រអគ្គិសនីចំនួន ២ អាចផលិតកម្លាំងបាន ៤២២ សេះ និងកម្លាំងរមួល ៥៤៣ ញ៉ូតុនម៉ែត្រ ភ្ជាប់មកជាមួយប្រភេទបើកបរប៉ុង ២ AWD ជាស្តង់ដារ ផ្គួបជាមួយអាគុយទំហំ ៦៦ គីឡូវ៉ាត់ម៉ោង អាចបើកបរបានចម្ងាយ ៥១២ គីឡូម៉ែត្រ នៅពេលសាកថ្មពេញម្តង និិងរត់ស្ទុះពី ០-១០០ គីឡូម៉ែត្រ/ម៉ោង ចំណាយពេល ៣,៨ វិនាទី។
សម្រាប់នៅផ្នែកខាងក្នុងវិញមានបំពាក់កុងទ័របង្ហាញព័ត៌មានឌីជីថលទំហំ ៨,៨ អ៊ីញ, អេក្រង់កំសាន្ត touchscreen ទំហំ ១៤,៦អ៊ីញ និងអេក្រង់លើកញ្ជក់ head up display ទំហំ ២៤,៣ អ៊ីញ, កន្លែងសាកថ្មឥតខ្សែទំហំ ៥០ វ៉ាត់, ផែនទី 3D, ទូរទឹកកក ទំហំ ៥,៧ លីត្រ, ឧបករណ៍បំពងសំឡេង Yamaha ចំនួន ១៣ គ្រាប់, មុខងារសម្គាល់មុខ និងប្រព័ន្ធ ADAS ផ្សេងៗជាដើម។
