ឡានអគ្គិសនីសុទ្ធ BYD TANG EV ស៊េរីថ្មីចុងក្រោយ ចេញលក់ជាផ្លូវការនៅប្រទេសចិនជាមួយតម្លៃខ្ទង់ ៣មុឺនដុល្លារ

September 1, 2023

[ទីផ្សារបរទេស] ក្រុមហ៊ុនផលិតរថយន្ត BYD បានធ្វើការដាក់បង្ហាញចេញជាផ្លូវការនៅរថយន្ត BYD TANG EV ស៊េរីថ្មីចុងក្រោយ ផ្តល់ជូន ៣ ម៉ូដែលសម្រាប់ជ្រើសរើសជាមួយលក្ខណៈពិសេសខុសៗគ្នា មានតម្លៃលក់ចាប់ពី ៣៤ ៣០០ ដុល្លារ ដល់ ៤១ ១០០ ដុល្លារនៅក្នុងប្រទេសចិន ។

រថយន្ត BYD Tang EV ឆ្នាំ ២០២៣ មានប្រវែងតួខ្លួនសរុប ៤ ៩០០ ម.ម ទទឹង ១ ៩៥០ ម.ម កំពស់ ១ ៧២៥ ម.ម និងប្រវែងគន្លាតកងមុខ-ក្រោយ ២ ៨២០ ម.ម ។ ដោយទទួលបានការរអាប់ដេតគួរឱ្យកត់សម្គាល់ជាច្រើនដូចជា បំពាក់ថាសកង់ថ្មីទំហំ ២០ អ៉ីញ, ចង្កៀងមុខ-ក្រោយ LED ហើយរថយន្តនេះត្រូវបានបំពាក់ដោយប្រព័ន្ធទប់លំនឹងដ៏ឆ្លាតវៃ Disus-C intelligent damping body control system ផ្តល់នៅការបើកបរកាន់តែរលូតជាងមុនផងដែរ ។

ចំពោះនៅផ្នែកខាងក្នុងវិញ ត្រូវបានតុបតែងជាមួយពូកស្បែកដែលមានគុណភាពខ្ពស់ ដោយនៅលើតាប្លូមានកុងទ័របង្ហាញព័ត៌មាន ១២,៣ អ៉ីញ និងអេក្រង់កំសាន្ត touchscreen ទំហំ ១៥,៦ អ៉ីញ ភ្ជាប់មុខងារដ៏សំបូរ ក៏ដូចជាកន្លែងសាកថ្មឥតប្រើខ្សែរ ឧបករណ៍បំពងសំឡេងម៉ាក Dynaudio ១២ ចំនុច និងប្រព័ន្ធកាំម៉េរាកម្រិត HD ១០៨០ ផងដែរ ។

ទាក់ទងទៅនឹងផ្នែកម៉ាស៊ីនវិញ រថយន្តនេះ ទទួលបានជម្រើសម៉ាស៊ីនចំនួន ៣ រួមមាន ៖

ម៉ូទ័រអគ្គិសនីចំនួន ១ មានកម្លាំង ២២៥ សេះ និងកម្លាំងរមួល ៣៥០ ញ៉ូតុនម៉ែត្រ ផ្គួបជាមួយអាគុយទំហំ ៩០,៣ គីឡូវ៉ាត់ម៉ោង អាចបើកបរបានចម្ងាយ ៦០០ គីឡូម៉ែត្រ ក្នុងការសាកថ្មពេញម្តង
ម៉ូទ័រអគ្គិសនីចំនួន ១ មានកម្លាំង ២៤១ សេះ និងកម្លាំងរមួល ៣៥០ ញ៉ូតុនម៉ែត្រ អាចបើកបរបានចម្ងាយ ៧៣០ គីឡូម៉ែត្រក្នុងការសាកថ្មពេញម្តង
ម៉ូទ័រអគ្គិសនីចំនួន ២ មានកម្លាំងសរុប ៥១០ សេះ និងកម្លាំងរមួល ៧០០ ញ៉ូតុនម៉ែត្រ អាចបើកបរបានចម្ងាយ ៦៣៥ គីឡូម៉ែត្រក្នុងការសាកថ្មពេញម្តង ដោយម៉ូដែលទាំង ៣ នេះ គាំទ្រដោយឆ្នាំងសាកល្បឿនលឿន អាចសាលបានពី ៣០% ទៅ ៨០% ប្រើរយៈពេល ៣០ នាទី ៕

ផ្ទាំងផ្សាយពាណិជ្ជកម្ម

Toyota ផ្តល់ជូនកញ្ចប់តែងខ្លួនថ្មីសម្រាប់ Toyota Sequoia ជាមួយរូបរាងថ្មីប្លែក និងសមត្ថភាពខ្លាំងជាងមុន

August 31, 2023

[បរទេស] ក្រុមហ៊ុនផលិតរថយន្ត Toyota បានបន្ថែមកញ្ចប់តូខ្លួន Nightshade package មានតម្លៃ ៥០០ ដុល្លារ និង TRD Sport package ថ្មី មានតម្លៃចន្លោះពី ២ ៦៧៥ ដុល្លារ ដល់ ៤២៩០ ដុល្លារ សម្រាប់ឆ្នាំ ២០២៤ ទៅលើរថយន្ត Toyota Sequoia ស៊េរីថ្មីចុងក្រោយ ប្រភេទ SUV ខ្នាតធំ បន្ទាប់ពីផ្តល់ជូននៅលើរថយន្ត Toyota Tundra ។

សម្រាប់កញ្ចប់ Nightshade package ផ្តល់ជូនទៅលើរថយន្ត Toyota Sequoia បានតុបតែងជាមួយពណ៌ខ្មៅទៅលើ ប៉ាណា ថាសកង់ទំហំ ២០អ៉ីញ, ត្រឡោកកញ្ចក់ ដែលផ្តល់ឲ្យរថយន្តមានរូបរាងកាន់តែអំណាចមួយកម្រិតថែមទៀត ។

ខណៈកញ្ចប់ TRD Sport package បានធ្វើឲ្យប្រសើរឡើងនៅប្រព័ន្ធជើងក្រោមដូចជា ប្រព័ន្ធចាក់សោរប៉ុង, ប្រព័ន្ធ Crawl Control និងប្រព័ន្ធទប់លំនឹង Multi-Terrain ជួយដល់ការបើកបរលើផ្លូវ Off-road កាន់តែល្អប្រសើរ ។ លើសពីនេះ ក៏បានបន្ថែមនៅប្រព័ន្ធ TRD-Tuned shock abserber, ប៉ូម TRD-Tuned spring ជាដើម ។

ទាក់ទងទៅនឹងផ្នែកម៉ាស៊ីនវិញ មិនមានផ្លាស់ប្តូរនោះទេ ពោលម៉ូដែលកូនកាត់ hybrid ដំណើរការដោយម៉ាស៊ីនចំណុះ ៥,៧ លីត្រ V8 twin-turbo ជាមួយតម្លៃលក់ចាប់ពី ៦២ ៧២៥ ដុល្លារ ដល់ ៨២ ៧១៥ ដុល្លារ ៕

ផ្ទាំងផ្សាយពាណិជ្ជកម្ម

ពិធីសម្ពោធជាផ្លូវការ អគារតាំងបង្ហាញរថយន្ត និងមជ្ឍមណ្ឌល ជួសជុលរថយន្ត Ford សាខាជ្រោយចង្វារ

August 31, 2023

ក្រុមហ៊ុន RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត Ford នៅក្នុងទីផ្សារប្រទេសកម្ពុជា បានរៀបចំកម្មវិធីសម្ពោធជាផ្លូវការ អគារតាំងបង្ហាញរថយន្ត និងមជ្ឍមណ្ឌលជួសជុលរថយន្ត Ford សាខាជ្រោយចង្វារ។ កម្មវិធីសម្ពោធនេះ ត្រូវបានប្រារព្ធឡើងនៅថ្ងៃទី ២៩ ខែសីហា ឆ្នាំ២០២៣ ក្រោមអធិបតីភាពរបស់ថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA Cambodia រួមទាំងភ្ញៀវកិត្តិយសជាតិ និងអន្តរជាតិប្រមាណជាង ១០០ នាក់។

ឆ្លៀតក្នុងឱកាសនេះដែរ លោក សេង វឹង នាយកគ្រប់គ្រងទូទៅផ្នែករថយន្តFord នៃក្រុមហ៊ុន RMA Cambodia បានមានប្រសាសន៍ថា៖ “ សព្វថ្ងៃនេះក្រុមហ៊ុន Ford មានអគារតាំងបង្ហាញរថយន្តចំនួន ៣ ដែលកំពុងដំណើរការនៅក្នុងរាជធានីភ្នំពេញ និងចំនួន ២ ទៀតនៅតាមបណ្តាលខេត្តគឺ ខេត្តកំពង់ចាម និងខេត្តសៀមរាប ហើយខ្ញុំពិតជាមានសេចក្តីសោមនស្សរីករាយចំពោះពិធីសម្ពោធជាផ្លូវការនៃអគារតាំងបង្ហាញរថយន្ត Ford សាខាទី ៦ នេះ។ ហើយយើងក៏បាននឹងកំពុងតែត្រៀមខ្លួនក្នុងការបើកដំណើរការអគារតាំងបង្ហាញរថយន្ត និងមជ្ឍមណ្ឌលជួសជុលរថយន្ត Ford ៣ទីតាំងបន្ថែមទៀតនៅក្នុងរាជធានីភ្នំពេញ និងតាមបណ្តាខេត្តដែលមានសក្តានុពលនានា ដើម្បីឆ្លើយតបទៅនឹងតម្រូវការ និងផ្តល់ភាពងាយស្រួលជូនដល់អតិថិជនទូទាំងប្រទេសកម្ពុជា។ ”

លោក DJ. Simpson នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិកនៃក្រុមហ៊ុន Ford Motor Company បានមានប្រសាសន៍ថា៖ “ ពិធីសម្ពោធជាផ្លូវការអគារតាំងបង្ហាញរថយន្ត និងមជ្ឍមណ្ឌលជួសជុលរថយន្ត Ford សាខាជ្រោយចង្វារនេះ គឺជាសក្ខីភាពនៃការពង្រីកវិសាលភាពរបស់ក្រុមហ៊ុន អ អិម អេ ដើម្បីផ្តល់នូវសេវាកម្មប្រកបដោយទំនុកចិត្តដល់អតិថិជនគ្រប់រូប ជាពិសេសអតិថិជននៅក្នុងរាជធានីភ្នំពេញ។ យើងខ្ញុំសូមថ្លែងអំណរគុណដល់អតិថិជន និងដៃគូរបស់យើងនៅក្នុងប្រទេសកម្ពុជា សម្រាប់ការបន្តគាំទ្រផលិតផល និងសេវាកម្មរបស់ក្រុមហ៊ុន Ford ។ ភាពជោគជ័យរបស់យើងនឹងមិនអាចកើតឡើងបានទេ ប្រសិនបើគ្មានការគាំទ្រពីសំណាក់អថិតិថជនគ្រប់ជាន់ថ្នាក់។”

គួរបញ្ជាក់ផងដែរថា អគារតាំងបង្ហាញរថយន្ត និងមជ្ឍមណ្ឌលជួសជុលរថយន្ត Ford សាខាជ្រោយចង្វារនេះ មានទីតាំងស្ថិតនៅអគារលេខ ៤១៨ ផ្លូវលេខ ៦ ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ និងត្រូវបានសាងសង់នៅលើផ្ទៃដីទំហំ ៤,០២៤ ម៉ែត្រការ៉េ។ មជ្ឍមណ្ឌលជួសជុលរថយន្ត ហ្វដ សាខាជ្រោយចង្វារនេះ មានប៉ុងសម្រាប់ជួសជុលរថយន្តចំនួន ២០ និងសម្ភារៈបរិក្ខារក៏ដូចជាឧបករណ៍សម្រាប់ជួសជុលរថយន្តដែលបំពាក់ដោយបច្ចេកវិទ្យាទំនើបៗជំនាន់ចុងក្រោយ រួមជាមួយនឹងជាងជំនាញជួសជុលរថយន្តដែលទទួលបានបណ្តុះបណ្តាលផ្ទាល់ពីរោងចក្រFordជាច្រើនរូប រង់ចាំបម្រើសេវាកម្មជូនដល់អតិថិជនប្រកបដោយ គុណភាព ប្រសិទ្ធភាព និងទំនុកចិត្តថែមទៀតផង។

សម្រាប់ព័ត៌មានបន្ថែមទាក់ទងនឹងទីតាំង ក៏ដូចជាសេវាកម្មផ្សេងៗរបស់អគារតាំងបង្ហាញ និងមជ្ឍមណ្ឌលជួសជុលរថយន្ត Ford សាខាជ្រោយចង្វារ សូមលោកអ្នកធ្វើការទំនាក់ទំនងតាមលេខទូរស័ព្ទ 017 999 027 ឬ 087 999 079៕

ផ្ទាំងផ្សាយពាណិជ្ជកម្ម

ក្រុមហ៊ុនយក្យរបស់ចិន ៣ ចាប់ដៃគ្នាផលិតឡានអគ្គិសនីសុទ្ធ សាកភ្លើងពេញម្តងជិះបានខ្ទង់ ៧០០ គីឡូម៉ែត្រ

August 31, 2023

[ទីផ្សារបរទេស] ក្រុមហ៊ុនបច្ចេកវិទ្យា Huawei បានចាប់ដៃគ្នាជាមួយ Changan និង CATL បានធ្វើការដាក់បង្ហាញចេញជាផ្លូវការនៅរថយន្ត Avatr 12 ប្រភេទ sedan អគ្គិសនីសុទ្ធ គ្រោងនឹងចេញលក់ថ្ងៃទី ៤ ខែកញ្ញា ឆ្នាំ ២០២៣ ជាមួយតម្លៃលក់ចាប់ពី ៤១ ១៧៧ ដុល្លារ ដល់ ៦៨ ៦២៨ ដុល្លារនៅទីផ្សារប្រទេសចិន ។

រថយន្តនេះ មានប្រវែងតួខ្លូនសរុប ៥ ០២០ ម.ម ទទឹង ១ ៩៩៩ ម.ម កំពស់ ១ ៤៦០ ម.ម និងប្រវែងគន្លាតកង់មុខ-ក្រោយ ៣ ០២០ ម.ម ។ សម្រាប់ការរចនានៅផ្នែកខាងក្រៅជាមួយ concept បែប futuristic ស្រដៀងទៅនឹងរថយន្ត AVATR 11 ដែលមានក្រឡាខាងមុខបិទជិត ចង្កៀងមុខ LED រាងស្លីម ព្រមទាំងបំពាក់ថាសកង់ស្ព័រទំហំ ២០ អ៉ីញ និងចង្កៀងក្រោយរចនាឡើងបែប unique ផងដែរ។ មិនត្រឹមតែប៉ុណ្ណោះ ក៏បានបំពាក់ ប្រព័ន្ធចាប់សញ្ញា Lidar ចំនួន៣ Ultrasonic Radar ចំនួន ១២ និងកាម៉េរាចំនួន ១៣ ។

ចំពោះនៅផ្នែកខាងក្នុងវិញ ត្រូវបានឌីស្សាញឡើងបែបស្ព័រ ជាមួយប្រណិតភាព កៅអីស្រោបដោយស្បែកមានមុខងារខ្យល់-កំដៅ ដោយនៅលើតាប្លូមានបំពាក់អេក្រង់ចំនួន ៣ រួមមាន កុងទ័របង្ហាញព័ត៌មានទំហំ ១០,២៥ អ៉ីញ អេក្រង់កំសាន្ត touchscreen ទំហំ ១៥,៦ អ៉ីញ ភ្ជាប់ប្រព័ន្ធប្រតិបត្តិការ Huawei Hamony Os system និងអេក្រង់សម្រាប់អ្នកដំណើរទំហំ ១០,២៥ អ៉ីញ រួមទាំងឧបករណ៍បំពងសំឡេងចំនួន ១៤ ចំនុចជាដើម ។

ទាក់ទងទៅនឹងផ្នែកម៉ាស៊ីនវិញ រថយន្តនេះបំពាក់ដោយម៉ូទ័រអគ្គិសនី Huawei DriveONE ចំនួន ២ ផលិតកម្លាំងសរុបបាន ៥៧៨ សេះ និងកម្លាំងរមួល ៦៥០ ញ៉ូតុនម៉ែត្រ ផ្គួបជាមួយអាគុយទំហំ ៩៤,៥៣ គីឡូវ៉ាត់ម៉ោង អាចបើកបរបានចម្ងាយ ៦៥០ គីឡូម៉ែត្រ ដល់ ៧០០ គីឡូម៉ែត្រក្នុងការសាកថ្មពេញម្តង និងគាំទ្រដោយឆ្នាំងសាកល្បឿន អាចសាកបានពី ៣០% ទៅ ៨០% ប្រើរយៈពេលតែ ១៥ នាទីប៉ុណ្ណោះ ៕

ផ្ទាំងផ្សាយពាណិជ្ជកម្ម

ឡានអគ្គិសនីសុទ្ធ Lexus RZ 450e ឆ្នាំ២០២៣ ចេញតម្លៃលក់នៅទីផ្សារប្រទេសកម្ពុជាតម្លៃខ្ទង់ ១១ មុឺនដុល្លារជាង

August 30, 2023

យោងតាមការបង្ហោះពីគេហទំព័រភ្នាក់ងារទិញរថយន្តពីបរទេសដែលមានឈ្មោះថា Auto US Direct Cambodia បានធ្វើការបង្ហាញចេញនៅតម្លៃលម្អិតនៃរថយន្តអគ្គិសនីសុទ្ធ Lexus RZ 450e ឆ្នាំ២០២៣ ជាមួយតម្លៃសរុប ១១០ ៧៣៧ ដុល្លារ សម្រាប់នៅទីផ្សារប្រទេសកម្ពុជា ។

សម្រាប់តម្លៃ ១១០ ៧៣៧ ដុល្លារ ដែលបានរួមបញ្ចូលនៅដូចជា៖

តម្លៃឡាន ៦១ ៣១០ ដុល្លារ ($61,310)
តម្លៃពន្ធនាំចូល ៤១ ១៧៨ ដុល្លារ ($41,178)
តម្លៃដឹកជញ្ជូន ២ ៤៥០ ដុល្លារ ($2,450)
តម្លៃកាត់ឈ្មោះនៅអាមេរិក ៨៩៩ ដុល្លារ ($899)
តម្លៃឯកសារនៅខ្មែរ ៩០០ ដុល្លារ ($900)
តម្លៃសេវាកម្មរបស់ក្រុមហ៊ុននៅកម្ពុជា ៥០០ ដុល្លារ ($500)
តម្លៃសេវាកម្មរបស់ក្រុមហ៊ុននៅអាមេរិច ៣ ៥០០ ដុល្លារ ($3,500)
តម្លៃសរុបទាំងអស់ ១១០ ៧៣៧ ដុល្លារ ($110,737)

គួរបញ្ជាក់ផងដែរថា សម្រាប់រថយន្តអគ្គិសនីសុទ្ធ Lexus RZ 450e ស៊េរីឆ្នាំ ២០២៣ នេះ គឺជាម៉ូដែល premium ប្រភេទបើកបរប៉ុង ២ all-wheel drive សាកភ្លើងពេញម្តងបើកបរបានចម្ងាយ ៣៥៤ គីឡូម៉ែត្រ ។ សម្រាប់ព័ត៌មានលម្អិត បងប្អូនអាចទាក់ទងក្រុមហ៊ុនផ្ទាល់តាមគេហទំព័រ Auto US Direct Cambodia ឬតាមរយៈលេខទូរស័ព្ទ 068 288 687 ៕

ផ្ទាំងផ្សាយពាណិជ្ជកម្ម

Geely Cool Champion ស៊េរីឆ្នាំ ២០២៤ ចេញលក់ជាផ្លូវការនៅប្រទេសកំណើត ឯតម្លៃតែជាង ១មុឺនដុល្លារ

August 30, 2023

[ទីផ្សារបរទេស] ក្រុមហ៊ុនផលិតរថយន្ត Geely បានធ្វើការដាក់បង្ហាញចេញជាផ្លូវការនៅរថយន្ត Geely Binrui Cool Champion ស៊េរីឆ្នាំ ២០២៤ ប្រភេទ sedan ជាមួយការឌីស្សាញថ្មី មានតម្លៃលក់ចាប់ពី ១២ ៣០០ ដុល្លារនៅក្នុងទីផ្សារប្រទេសចិន ។

រថយន្តនេះ មានប្រវែងតួខ្លួនសរុប ៤ ៧១៩ ម.ម ទទឹង ១ ៧៩៥ ម.ម កំពស់ ១ ៤៥៥ ម.ម និងប្រវែងគន្លាតកង់មុខ-ក្រោយ ២ ៦៧០ មម ។ បើនិយាយពីរូបរាងវិញ មានប៉ាណាមុខតុបតែងជាមួយរបាស្រោបដោយក្រូម៉េ និងឡូហ្គោនៅចំកណ្តាលបានប្តូរទៅជាពណ៌ពណ៌ប្រផេះ ប្រើប្រាស់នៅថាសកង់ស្ព័រទំហំ ១៧ អ៉ីញ និងចង្កៀងក្រោយប្រភេទ LED ព្រមទាំងបំពង់ស៊ីមាំង ជួយបន្ថែមភាពស្ព័រផងដែរ ។

ចំពោះនៅផ្នែកខាងក្នុងវិញ ដោយនៅលើតាប្លូមានបំពាក់កុងទ័របង្ហាញព័ត៌មាន LCD ទំហំ ១០,២៥ អ៉ីញ និងអេក្រង់កំសាន្ត touchscreen ទំហំ ១២,៣ អ៉ីញរួមបញ្ចូលគ្នាជាអេក្រង់ភ្លោះ ភ្ជាប់ជាមួយប្រព័ន្ធ Galaxy OS ដែលអាចប្រើប្រាស់មុខងារបញ្ជាដោយសំលេង និងប្រព័ន្ធ OTA ព្រមទាំងប្រអប់លេខអេឡិចត្រូនិច និងដំបូលកញ្ចក់ sunroof ជាដើម ។

ទាក់ទងទៅនឹងផ្នែកម៉ាស៊ីនវិញ រថយន្តនេះបំពាក់ជាមួយម៉ាស៊ីនចំណុះ ១,៥ លីត្រ ទំហំ ៤ ស៊ីឡាំង អាចផលិតកម្លាំងបាន ១៨១ សេះ និងកម្លាំងរមួល ២៩០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៧ វគ្គ ជាមួយកម្រិតស៊ីសាំងចន្លោះពី ៥-៦ លីត្រក្នុងរយៈចម្ងាយ ១០០ គីឡូម៉ែត្រ ៕

ផ្ទាំងផ្សាយពាណិជ្ជកម្ម

មកស្គាល់ក្រុមហ៊ុនផលិតរថយន្តរបស់ប្រទេសចិនធំៗទាំង ៥ ដែលកំពុងវៃលុកទីផ្សារនៅលើសកលលោក

August 29, 2023

[បរទេស] បច្ចុប្បន្ននេះ ក្រុមហ៊ុនផលិតរថយន្តរបស់ប្រទេសចិនមានចំនួនដល់ទៅ ១៧០ ម៉ាកយីហោផ្សេងគ្នា ដែលមានការផ្គត់ផ្គង់មានទំហំធំដូចតម្រូវការនៅក្នុងទីផ្សាររបស់ខ្លួន។ ទោះបីជាទំហំរបស់វាក៏ដោយ ក៏ប្រទេសចិននៅមានកម្រិតទាបនៅឡើយ បើប្រៀបធៀបទៅនឹង សហរដ្ឋអាមេរិក និងអឺរ៉ុបខាងលិច។ ខាងក្រោមនេះ គឺជាម៉ាកយីហោទាំង ៥ របស់ប្រទេសចិនដែលអាចវៃលុកនៅទីផ្សារបរទេស៖

MG គឺជាម៉ាកយីហោដែលមានដើមកំណើតនៅអង់គ្លេស ដែលបាននៅក្នុងឧស្សាហកម្មរថយន្តអស់រយៈពេលជិត ១០០ ឆ្នាំ ប៉ុន្តែស្ថិតនៅក្រោមការគ្រប់គ្រងរបស់ចិនចាប់តាំងពីឆ្នាំ ២០០៦ ។ នៅឆ្នាំ ២០២២ វាគឺជាម៉ាកយីហោដែលពេញនិយមបំផុតនៅទីផ្សារខាងក្រៅប្រទេសចិន។ លើសពីនេះ MG គឺជាម៉ាកយីហោដែលផលិតរថយន្តអគ្គិសនី BEV (Battery Electric Vehicle) ដែលលក់ដាច់បំផុតទី ៤ នៅអឺរ៉ុបក្នុងឆមាសទីមួយនៃឆ្នាំ ២០២៣ ។

BYD គឺជាក្រុមហ៊ុនដ៏ធំមួយនៅក្នុងប្រទេសចិន ប៉ុន្តែនៅតែមានទីផ្សារតូចសម្រាប់នៅទីផ្សារក្នុងទ្វីបអឺរ៉ុប ប៉ុន្តែបានទទួលការទាក់ទាញនៅក្នុងតំបន់ផ្សេងទៀតផងដែរ។ វាជាម៉ាកយីហោមួយក្នុងចំណោមម៉ាកដែលមានការរីកចម្រើនលឿនបំផុតនៅលើពិភពលោក ដោយសាររថយន្តប្រើអគ្គិសនីប្រភេទ Plug-in Hybrid និងរថយន្តអគ្គិសនីសុទ្ធ។

Geely/Zeekr ជាម៉ាកយីហោដ៏ធំបំផុតនៅភាគខាងលិចរបស់ប្រទេសចិន ដែលមានទំនាក់ទំនងដ៏រឹងមាំជាមួយក្រុមហ៊ុនផលិតរថយន្តនៅលោកខាងលិចផ្សេងទៀតដែលជាផ្នែកមួយនៃក្រុមហ៊ុន Geely Group យីហោនេះមានលទ្ធភាពទទួលបានការប្រកួតប្រជែងទៅលើគ្រោងឆ្អឹង និងបច្ចេកវិទ្យាដែលអនុលោមតាមស្តង់ដារអឺរ៉ុប និងអាមេរិកខាងជើង។

NIO កំពុងតែវិវត្តន៍ខ្លួនទៅជាក្រុមហ៊ុនផលិតរថយន្តដ៏ធំនាពេលបច្ចុប្បន្ននេះ ជាមួយបច្ចេកវិទ្យាជាច្រើនដូចជា សម្ថតិភាពដំណើរការអាគុយ និងបច្ចេកវិទ្យាកាលវិភាគផ្លាស់ប្តូរអាគុយជាដើម ។

Wuling ក្រុមហ៊ុននេះត្រូវបានគេចាត់ទុកជាម៉ាករថយន្តចិនដែលមានតម្លៃទាបដែលមានការប្រកួតប្រជែងខ្លាំង និងត្រូវបានប្រើម៉ាកយីហោជាសកលរបស់ដៃគូរបស់ខ្លួនគឺ Chevrolet ដែលអាចចាប់យកចំណែកទីផ្សារបានយ៉ាងងាយស្រួល និងឆាប់រហ័សនៅក្នុងតំបន់ដូចជា អាមេរិកឡាទីន មជ្ឈិមបូព៌ា និងអាហ្វ្រិកជាដើម ៕

ផ្ទាំងផ្សាយពាណិជ្ជកម្ម

កូនឡានអគ្គិសនីសុទ្ធ Geely Panda សាកភ្លើងម៉ាពេញជិះបានជាង ២០០ គីឡូម៉ែត្រ តម្លៃជិត ៧ ពាន់ដុល្លារ

August 29, 2023

[ទីផ្សារបរទេស] ក្រុមហ៊ុនផលិតរថយន្ត Geely បានធ្វើការដាក់បង្ហាញចេញនៅរថយន្ត Geely Geome Panda ប្រភេទអគ្គិសនីសុទ្ធខ្នាតតូច គ្រោងនឹងចេញលក់នៅក្នុងខែកញ្ញា ឆ្នាំ ២០២៣ ជាមួយតម្លៃលក់រំពឹងចាប់ពី ៦៨០០ ដុល្លារនៅក្នុងប្រទេសចិន ។

រថយន្តនេះ មានប្រវែងតួខ្លួនសរុប ៣ ១៣៥ ម.ម ទទឹង ១ ៥៦៥ ម.ម កំពស់ ១ ៦៥៥ ម.ម និងប្រវែងកន្លាតកង់មុខ-ក្រោយ ២ ០១៥ ម.ម ។ សម្រាប់ការរចនានៅផ្នែកខាងក្រៅផ្តោតទៅលើការបើករលើផ្លូវលំបាកៗ ឬ Off-road មានលក្ខណៈស្រដៀងគ្នាទៅនឹងរថយន្ត Ford Bronco ជាមួយចង្កៀងរាងមូល និងកាងការពារមុខ-ក្រោយពណ៌ខ្មៅជាដើម។

ចំពោះនៅផ្នែកខាងក្នុង មានបំពាក់កៅអីស្រោបដោយស្បែក ព្រមទាំងកុងទ័របង្ហាញព័ត៌មានទំហំ ៩,២ អ៉ីញ និងអេក្រង់កំសាន្ត touchscreen ទំហំ ៨ អ៉ីញ ប្រអប់លេខអេឡិចត្រូនិច ប្រព័ន្ធបញ្ជាពីចម្ងាយ App remote control car និងអាចផ្ទុកបានដល់ទៅ ៨០០ លីត្រឯណ្ណោះ ។

ទាក់ទងទៅនឹងផ្នែកម៉ាស៊ីនវិញ រថយន្តនេះ ដំណើរការដោយម៉ូទ័រអគ្គិសនីចំនួន ១ មានកម្លាំង ៤០,២ សេះ និងកម្លាំងរមួល ១១០ ញ៉តុនម៉ែត្រ ផ្គួបជាមួយអាគុយលីដ្យូមទំហំ ១៧,០៣ គីឡូវ៉ាត់ម៉ោង អាចបើកបរបានចម្ងាយ ២០០ គីឡូម៉ែត្រក្នុងការសាកថ្មពេញម្តង ដែលគំាទ្រដោយឆ្នាំងសាកល្បឿនលឿន DC ៕

ផ្ទាំងផ្សាយពាណិជ្ជកម្ម

សំដីតែប៉ុន្មានម៉ាត់របស់បិតាស្ថាបនិក Ferrari ធ្វើឲ្យក្រុមហ៊ុន Lamborghini ត្រូវបានបង្កើតឡើង

August 29, 2023

[បរទេស] បើយើងនិយាយដល់ឈ្មោះក្រុមហ៊ុនផលិតរថយន្តស្ព័រដ៏ប្រណិតរបស់ប្រទេសអ៊ីតាលីទាំង ២ នេះ Lamborghini ហើយនឹង Ferrari ប្រាកដណាស់បងប្អូននឹងនឹកឃើញទៅដល់រថយន្តស្ព័រទំនើបៗដែលមានតម្លៃថ្លៃៗ ។ ក្នុងនោះ ក្រុមហ៊ុន Ferrari ត្រូវបានបង្កើតឡើងនៅឆ្នាំ ១៩៣៩ ដោយលោក Enzo Ferrari ដោយចាប់ផ្តើមដំបូងដោយផលិតរថយន្តប្រណាំងលំដាប់ខ្ពស់ ខណៈ Lamborghini បង្កើតនៅឆ្នាំ ១៩៦៣ ដោយលោក Ferruccio Lamborghini ដោយដំបូងឡើយជាក្រុមហ៊ុនផលិតត្រាក់ទ័រប៉ុណ្ណោះ ដោយក្រុមហ៊ុនទាំងពីរនេះបានវិវត្តន៍ទៅជាម៉ាករថយន្តប្រណិតល្បីៗលំដាប់ពិភពលោកមកទល់បច្ចុប្បន្ន ។

សម្រាប់លោក Ferruccio Lamborghini កើតក្នុងគ្រួសារកសិករ ប៉ុន្តែគាត់ចាប់អារម្មណ៍លើខាងមេកានិចច្រើនជាង ហើយបានបម្រើការនៅក្នុងកងទ័ពអាកាសកំឡុងសង្គ្រាមលោកលើកទី ២ បន្ទាប់ពីនោះ លោកបានបើកអាជីវកម្មលក់ត្រាក់ទ័រ ដែលអាជីវកម្មនេះទទួលបានជោគជ័យយ៉ាងខ្លាំង ។ ភាពជោគជ័យនេះ ធ្វើឲ្យបានទិញរថយន្តប្រណិតៗជាច្រើន ខណៈរថយន្តដែលគាត់ពេញចិត្តជាងគេគឺរថយន្តរបស់ក្រុមហ៊ុន Ferrari ។

រីឯលោក Enzo Ferrari កើតនៅក្នុងគ្រួសារមួយដែលប្រកបអាជីវកម្មជាជាងឈើ បន្ទាប់ពីអាជីវកម្មរបស់គ្រួសារលោកក្ស័យធន Enzo Ferrari បានដឹងថាគាត់ចង់ក្លាយជាអ្នកបើករថយន្តប្រណាំងតាំងពីក្មេង។ គាត់បានចាប់ផ្តើមការប្រណាំងជាមួយក្រុម Alfa Romeos ហើយបន្ទាប់មកបានសម្រេចចិត្តបង្កើតក្រុមប្រណាំងផ្ទាល់ខ្លួនរបស់គាត់ដែលមានឈ្មោះថា Scuderia Ferrari ដោយទទួលបានជោគជ័យយ៉ាងខ្លាំងនៅក្នុងការប្រណាំង ដែលធ្វើឲ្យក្រុមហ៊ុន Ferrari ទទួលបានភាពពេញនិយមខ្លាំង ។

លោក Ferruccio Lamborghini ពិតជាចូលចិត្តរថយន្តរបស់ក្រុមហ៊ុន Ferrari គឺរថយន្ត Ferrari 250 GT ប៉ុន្តែរថយន្តដែលគាត់ប្រើប្រាស់វាមានសំឡេងរំខាន និងនៅពេលបើកបរនៅលើផ្លូវមិនមានភាពរលូត រហូតដល់លោករកឃើញបញ្ហានេះគឺដោយសារបញ្ហាប្រអប់លេខ ដែលធ្វើលោកបានសម្តែងការមិនពេញចិត្តចំពោះបញ្ហានេះ គាត់បានសម្រេចចិត្តបានទៅជួបលោក Enzo Ferrari ដើម្បីពីភាក្សាអំពីបញ្ហានេះ ព្រមទាំងចង់ចាប់ដៃគូរសហការគ្នា ប៉ុន្តែលោកត្រូវបានលោក Enzo បដិសេធ ហើយបាននិយាយថា ប្រអប់លេខមិនមែនជាបញ្ហាទេ បញ្ហាពិតនោះគឺលោកមិនចេះរបៀបប្រើប្រាស់ឡាន Ferrari (ត្រលប់ទៅលក់ត្រាក់ទ័រវិញទៅ) ធ្វើឲ្យលោកខឹងនឹងដោយសារអាកប្បកិរិយាក្រអឺតក្រទមរបស់ Enzo Ferrari ហើយសម្រេចចិត្តផលិតរថយន្តផ្ទាល់ខ្លួនគោលបំណងគឺដើម្បីទៅប្រគួតប្រជែងជាមួយ Ferrari តែម្តង ដែលជាហេតុផលក្រុមហ៊ុន Lamborghini ត្រូវបានបង្កើតឡើងមក ហើយការប្រកួតប្រជែងបានបន្តរហូតមកដល់សព្វថ្ងៃនេះ ៕

ផ្ទាំងផ្សាយពាណិជ្ជកម្ម

អសា្ចរ្យណាស់! Xpeng ធ្វើតេស្តឡានហោះរបស់ខ្លួន ដោយឆ្លងកាត់ទន្លេបញ្ចប់ដោយភាពជោគជ័យ (មានវីដេអូ)

August 28, 2023

[បរទេស] កាលពីពេលថ្មីៗ កន្លងទៅនេះ ក្រុមហ៊ុន AeroHT ជាក្រុមហ៊ុនដៃគូររបស់ក្រុមហ៊ុនផលិតរថយន្ត Xpeng បានធ្វើតេស្តជោគជ័យទៅលើរថយន្តហោះរបស់ខ្លួន ដោយបានបញ្ចប់ការហោះហើរឆ្លងកាត់ទន្លេក្នុងខេត្ត Hunan ដែលមានចម្ងាយ ១,៥ គីឡូម៉ែត្រ ដោយចំណាយពេល ៤ នាទីក្នុងការហោះ ។

រថយន្តហោះ Xpeng X2 មានប្រវែងសរុបនៅពេលបើកស្លាប ៥ ១៧២ ម.ម ទទឹង ៥ ១២៤ ម.ម និងកំពស់ ១ ៣៦២ ម.ម និងនៅពេលបត់មានប្រវែងសរុប ៤ ៩៤៩ ម.ម ទទឹង ២ ១១៣ ម.ម និងកំពស់ ២ ០៥៥ ម.ម មានទំងន់ ៥៦០ គីឡូក្រាមហើយអាចផ្ទុកបាន ១៦០ គីឡូក្រាម។ Xpeng X2 ជាប្រភេទកៅអីពីរ ជាមួយតួខ្លួនត្រូវបានផលិតឡើងដោយវត្ថុធាតុដើមពីកាបូន។

គួរឲ្យដឹងថា រថយន្តហោះនេះខុសពី Drone ដ៏ទៃដែលភាគច្រើនដែលមានម៉ូទ័រតែបួន ខណៈរថយន្តនេះ ត្រូវបានបំពាក់ដៃ octocopter ដោយនីមួយៗមានម៉ាស៊ីន និងស្លាបកង្ហាមួយគូ។ លើសពីនេះ ប្រសិនបើម៉ូទ័រខូច ក៏មានឆ័ត្រយោងជំនួយដែលភ្ជាប់មកជាមួយដែលជំនួយដល់ការពេលមានឧបត្តវហេតុកើតឡើងផងដែរ ។

ក្រុមហ៊ុន AeroHT អះអាងថា នេះជាការហោះហើរឆ្លងទន្លេលើកដំបូង និងជាព្រឹត្តិការណ៍ដ៏សំខាន់ក្នុងការអភិវឌ្ឍន៍បច្ចេកវិទ្យារថយន្តហោះ។ ក្នុងនោះ មុនពេលហោះឆ្លងកាត់ទន្លេ Xpeng X2 រថយន្តនេះក៏បានឆ្លងកាត់ការហោះហើរសាកល្បងជិត ៤០០០ ដងរួចមកហើយ ។ មិនត្រឹមតែប៉ុណ្ណោះ វានឹងក្លាយជាផលិតកម្មដ៏ធំ សម្រាបវៃលុកទីផ្សារក្នុងឆ្នាំ ២០២៥ នៅប្រទេសចិន ៕