[បរទេស] រថយន្ត Honda Civic TYPE R ស៊េរីថ្មី ដែលត្រូវបានយកមកដាក់បង្ហាញដោយផ្ទាល់ពីព្រឹត្តិការណ៍ Motor Expo 2022 លើកទី ៣៩ ដោយមិនទាន់មានកាលបរិច្ឆេទចេញលក់ជាផ្លូវការនៅឡើយ។ ប៉ុន្តែវាច្បាស់ណាស់ថានឹងត្រូវបាននាំចូលពីប្រទេសជប៉ុន (CBU) ហើយនឹងមានលក់ក្នុងចំនួនមានកំណត់នៅទីផ្សារប្រទេសថៃ។
Honda Civic TYPE R ត្រូវបានដាក់បង្ហាញចេញនៅប្រទេសជប៉ុនកាលពីខែកញ្ញាឆ្នាំមុន។ វាត្រូវបានបង្កើតឡើងដោយផ្អែកលើមូលដ្ឋានដូចគ្នានឹង Civic Hatchback ដែលជាតួទ្វារ៥ និងប្រើប្រាស់ម៉ាស៊ីនសាំងចំណុះ ២,០ លីត្រ Turbo ទំហំ ៤ ស៊ីឡាំងដែលអាចផលិតកម្លាំងបាន ៣៣០ សេះ និងកម្លាំងរមួល ៤២០ ញ៉ូតុនម៉ែត្រ ភ្ជាប់ដោយប្រអប់លេខដៃ ៦ វគ្គ ហើយបានផ្លាស់ប្តូរ flywheel ឲ្យស្រាលជាងមុន និងប្រព័ន្ធ rev-match system ក៏ត្រូវបានកែលម្អផងដែរ ដើម្បីធ្វើឲ្យការបើកបរកាន់តែល្អប្រសើរ។
គួរឲ្យដឹងថា រថយន្ត Honda Civic TYPE R ដែលត្រូវបានដាក់បង្ហាញនៅក្នុងប្រទេសថៃត្រូវបានតុបតែងដោយគ្រឿងបន្ថែម TYPE R ដូចជាកាងជ្រែកខ្យល់ spoiler ខាងមុខពណ៌ខ្មៅរលោង, កាងធ្លាក់នៅចំហៀងពណ៌ខ្មៅរលោង, បំពង់ស៊ីមាំងពណ៌ខ្មៅរលោងចំនួន ៣ និងកាង spoiler ខាងក្រោយពណ៌ខ្មៅរលោងធ្វើពីអាលុយមីញ៉ូមជាដើម។
ផ្នែកខាងក្នុងកាប៊ីននៅតែផ្ដោតលើភាពស្ព័រ ត្រូវបានតុបតែងជាមួយនឹងកៅអី TYPE R ពណ៌ក្រហម និងផ្នែកផ្សេងៗ វាបានភ្ជាប់មកជាមួយនូវប៊ូតុងប្រអប់លេខអាលុយមីញ៉ូមដែលរចនាថ្មី។ លើសពីនេះ Honda Civic TYPE R ថ្មីក៏បានភ្ជាប់មកជាមួយនៅអេក្រង់បង្ហាញព័ត៌មាននៃការបើកបរដែលត្រូវបានរចនាឡើងជាពិសេសសម្រាប់ម៉ូដែល TYPE R។ បន្ថែមជាមួយរបៀបបើកបរ +R mode ដែលអាចបង្ហាញព័ត៌មានចាំបាច់សម្រាប់ការប្រើប្រាស់ល្បឿនលឿន រួមជាមួយនឹងការប្តូរប្រអប់លេខ ដែលបំផុសគំនិតដោយរថយន្តប្រណាំងផងដែរ៕
