រថយន្ត Ford Ranger ស៊េរីថ្មីឆ្នាំ ២០២៣ រូបរាងថ្មីទាំងស្រុងបានមកដល់ហើយ!

May 26, 2022

កាលពីពេលថ្មីៗនេះនៅលើបណ្តាញសង្គមជាច្រើនមានការផ្ទុះនៃការចែកចាយ និងផ្សព្វផ្សាយពីរថយន្ត Ford Ranger ស៊េរីថ្មីឆ្នាំ ២០២៣ យ៉ាងច្រើនសន្ធឹកសន្ធាប់ ជាពិសេសនោះគឺការបង្ហាញវត្តមានក្នុងកម្មវិធី Test Drive ខ្នាតធំនៅប្រទេសជិតខាងតែម្តង ទន្ទឹមជាមួយគ្នានេះដែរក៏មានមតិជាច្រើនបានបញ្ចេញលើការផ្សព្វផ្សាយនោះថាតើពេលណាទើបរថយន្តនេះមានវត្តមានក្នុងប្រទេសកម្ពុជា?

សម្រាប់ចម្លើយនោះគឺដើម្បីឆ្លើយតបទៅនឹងការទន្ទឹងរង់ចាំរបស់ប្រិយមិត្ត ដូច្នេះអតិថិជន និងប្រិយមិត្តគាំទ្រស្រឡាញ់រថយន្ត Ford Ranger អាចអញ្ជើញមកទស្សនារូបរាងពិត ក៏ដូចជាសាកសួរព័ត៌មាននៅតាមបណ្តាសាខាអគារតាំងបង្ហាញរថយន្ត Ford ការតាំងបង្ហាញរថយន្ត Ford តាមបណ្តាខេត្ត និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
ការតាំងបង្ហាញរថយន្ត Ford តាមបណ្តាខេត្ត លេខទូរស័ព្ទទំនាក់ទំនង៖ 095 666 356 | 031 9 666 356

ផ្ទាំងផ្សាយពាណិជ្ជកម្ម

Kia K5 អាចនឹងត្រូវអស់ជីវិត ជាមួយ Hyundai Sonata ខណៈផលិតកម្ម Stinger នឹងបញ្ចប់ឆាប់ៗ

May 26, 2022

វាហាក់ដូចជា ក្រុមហ៊ុន Hyundai Motor Group កំពុងត្រៀមខ្លួនធ្វើការបោសសំអាតដ៏ធំមួយ ហើយរថយន្ត Sedan ទាំងអស់នឹងត្រូវរងគ្រោះ។

បន្ទាប់ពីមានរបាយការណ៍ដែលថា Hyundai Sonata ជិតអស់ជីវិតនោះ គេហទំព័រ Automotive News បានបង្ហើបថា រថយន្ត Kia K5 នឹងជួបជោគវាសនាស្រដៀងគ្នានេះដែរ។

ទោះបីជាមិនមានអ្វីជាផ្លូវការក៏ដោយ អ្នកវិភាគម្នាក់ដែលបាននិយាយទៅកាន់ Automotive News ជឿជាក់ថា Sonata នឹងត្រូវបានផ្តល់ការកែលម្អម្តងទៀត មុនពេលវាត្រូវគេបោះបង់ចោល នៅឆ្នាំ ២០២៧ ឬ ២០២៨ ខាងមុខ។

ទោះជាយ៉ាងណាក៏ដោយ ក្រុមហ៊ុន Hyundai កំពុងបដិសេធពាក្យចចាមអារ៉ាមអំពីការឈប់ផលិតរថយន្តទាំងនេះ ខណៈពួកគេបានឆ្លើយតបដោយបញ្ជាក់ថា៖

Sonata នៅតែមាន ហើយនឹងបន្តក្លាយជាផ្នែកមួយដ៏សំខាន់នៃផលិតផលរបស់ Hyundai។ ពាក្យចចាមអារ៉ាមណាមួយអំពីអនាគតរបស់វា គឺជាការនិយាយតគ្នាសុទ្ធសាធ។

យ៉ាងណាមិញ វាមិនមែនជាការបដិសេធទាំងស្រុងនោះទេ ខណៈក្រុមហ៊ុន Hyundai កំពុងផ្តោតសំខាន់លើផ្នែកអគ្គិសនី ហើយក្រុមហ៊ុនបានបញ្ជាក់រួចមកហើយថា រថយន្ត Hyundai Ioniq 6 ដែលនឹងមកដល់នាពេលខាងមុខ នឹងមានទំហំប្រហាក់ប្រហែលនឹង Sonata ដូច្នេះវាអាចមានសក្តានុពលក្នុងការជំនួស Sonata បាន។

យ៉ាងណាមិញ យើងទំនងជានឹងត្រូវរង់ចាំ ២-៣ឆ្នាំទៀត មុនពេលដឹងពីជោគវាសនារបស់ Hyundai Sonata និង Kia K5 ក៏ដូចជា Kia Stinger ផងដែរ៕

ផ្ទាំងផ្សាយពាណិជ្ជកម្ម

Ford នឹងបន្តផលិតឡាន Hybrid យ៉ាងហោចណាស់ ដល់ឆ្នាំ ២០៣៥ ព្រោះហេតុផងមួយនេះ

May 26, 2022

យោងតាមប្រភពព័ត៌មានបានឲ្យដឹងថា ក្រុមហ៊ុន Ford កំពុងកំណត់គោលដៅគ្មានការបំភាយឧស្ម័នពុល សម្រាប់រថយន្តទាំងអស់របស់ខ្លួន នៅក្នុងទីផ្សារអឺរ៉ុប នាឆ្នាំ ២០២៣ ហើយទីផ្សារអាមេរិកខាងជើងនឹងធ្វើតាមនេះដែរ។ ទោះជាយ៉ាងណាក៏ដោយ ក្រុមហ៊ុនផលិតរថយន្តអាមេរិកខាងលើ នឹងនៅតែបន្តផលិតរថយន្តចំហេះក្នុង (ICE)។

យោងតាមគេហទំព័រ Ford Authority នាយកប្រតិបត្តិក្រុមហ៊ុន Ford លោក Jim Farley បាននិយាយនៅឯកិច្ចប្រជុំម្ចាស់ភាគហ៊ុននៃម៉ាកយីហោឆ្នាំ ២០២២ ថា ខ្លួនមានចេតនាក្នុងការផលិតរថយន្ត Hybrid រហូតដល់ឆ្នាំ ២០៣៥ ឯណោះ។

លោក Farley បាននិយាយថា៖

ជាដំបូង រថយន្ត Hybrid បានក្លាយជាផ្នែកដ៏សំខាន់បំផុតនៃត្រកូលរថយន្តរបស់យើងនៅ Ford ហើយយើងមានត្រកូល Hybrid ខ្លាំងបំផុតមិនធ្លាប់មាន។

លោក Farley បានបន្តទៀតថា៖

យើងបានលក់រថយន្ត Hybrid ជិត ៨៨ ០០០ គ្រឿងនៅក្នុងសហរដ្ឋអាមេរិកតែម្នាក់ឯង កាលពីឆ្នាំមុន ហើយយើងលក់វាបានចំនួន ៣៦ ០០០ គ្រឿងរួចទៅហើយនៅត្រឹមខែមេសា។ វាពិតជាគួរឲ្យរំភើបណាស់សម្រាប់ពួកយើងក្នុងការមើលឃើញ ពីការរីកចម្រើនមិនត្រឹមតែរថយន្តអគ្គិសនីពេញលេញរបស់យើងប៉ុណ្ណោះទេ ប៉ុន្តែជោគជ័យរបស់យើងលើប្រភេទ Plug-in Hybrid នៅអឺរ៉ុប និងចិន ព្រមទាំង រថយន្ត Hybrid ជាពិសេសនៅអាមេរិកខាងជើង ដូចជា F-150 Hybrid ដ៏ពេញនិយមរបស់យើង។ វាជាការផ្លាស់ប្តូរដ៏ធំមួយសម្រាប់យើង ប៉ុន្តែចំពោះ Hybrid និង Plug-in Hybrid យើងមិនដែលប្ដេជ្ញាចិត្តជាងនេះទេ ហើយយើងបន្តមើលឃើញការលក់របស់យើងកើនឡើង ដោយសារការវិនិយោគរបស់យើងក្នុងបច្ចេកវិទ្យានេះ។

គួរបញ្ជាក់ឲ្យដឹងដែរថា ក្រុមហ៊ុន Ford បានទទួលជោគជ័យជាច្រើននៅក្នុងវិស័យរថយន្ត Hybrid ដោយចំនួនលក់រថយន្តប្រភេទនេះបានកើនឡើងលើសពីការរំពឹងទុកទៅទៀត។ ជាលទ្ធផល ក្រុមហ៊ុន Ford នឹងបន្ថែមជម្រើសម៉ាស៊ីន Hybrid លើម៉ូដែលអនាគតរបស់ខ្លួន ដូចជា Bronco Sport, Ranger និងសូម្បីតែ Mustang ផងដែរ៕

ផ្ទាំងផ្សាយពាណិជ្ជកម្ម

BYD បញ្ចេញគំរូរថយន្តអគ្គិសនី BYD UX ប្រភេទ SUV ថ្មី មុនពេលបង្ហាញខ្លួនជាផ្លូវការ ក្នុងទីផ្សារប្រទេសចិន

May 26, 2022

[ទីផ្សារបរទេស] ក្រុមហ៊ុនផលិតរថយន្ត BYD បានធ្វើការដាក់បង្ហាញចេញនៅគំរូរថយន្តអគ្គិសនី BYD UX ប្រភេទ SUV ថ្មី ដែលមានទំហំធំជាងរថយន្ត TANG DM ដែលរំពឹងថានឹងមានតម្លៃយ៉ាងហោចណាស់ ៤៤ ៦៩៧ ដុល្លារ គ្រោងបង្ហាញខ្លួនជាផ្លូវការនៅត្រីមាសទី៣ ឆ្នាំនេះ ក្នុងទីផ្សារប្រទេសចិន។

គួរឲ្យដឹងថា ទីផ្សាររថយន្តប្រភេទ SUV និងប្រភេទ Crossover កំពុងទទួលបានប្រជាប្រិយភាពយ៉ាងឆាប់រហ័ស។ ទន្ទឹមនឹងនេះ ក្រុមហ៊ុន BYD កំពុងធ្វើឲ្យផលិតផលរបស់ខ្លួនកាន់តែទូលំទូលាយផងដែរ។

សម្រាប់រថយន្តអគ្គិសនី BYD UX ប្រភេទ SUV គឹជារថយន្តម៉ូដែលខ្ពស់បំផុត នឹងត្រូវបានដាក់ជារថយន្ត SUV ខ្នាតធំបំផុតរបស់ម៉ាក BYD ក្រោមគំនិត X Dream និងប្រើប្រាស់ជាមួយគ្រោងឆ្អឹង e-platform 3.0 ជាមួយបច្ចេកវិទ្យា CTB battery technology ។

ចំពោះផ្នែកខាងក្រៅបានយកការរចនាចេញពី BYD X Dream Concept ស្ទើរតែទាំងស្រុងនៅក្នុងទីតាំងនៃរថយន្ត SUV ទំហំមធ្យម ដោយរក្សាការរចនាក្រោមគំនិត “Dragon Face” ជាមួយប៉ាណាខាងមុខធំ ចង្កៀងភ្លើងក្រោយ LED រាងជាក្រញ៉ាំនាគ និងថាសកង់ស្ព័រទំហំធំផងដែរ។

ជាមួយគ្នានេះ ក្រុមហ៊ុន BYD បានបញ្ជាក់យ៉ាងច្បាស់នៅក្នុងខែមីនាថា រថយន្តថ្មីរបស់ម៉ាកនេះ នឹងត្រូវបានបំពាក់ដោយថាមពលអគ្គិសនីដូចជា hybrid, plug-in hybrid និងអគ្គិសនីសុទ្ធ។ បន្ថែមពីនេះ រថយន្តនេះ ត្រូវបានបំពាក់ដោយម៉ូទ័រអគ្គិសនីចំនួនមួយមានកម្លាំង ២១៤ សេះ និងនៅប្រភេទម៉ូទ័រអគ្គិសនីចំនួនពីរ ផលិតកម្លាំងបាន ៤៨២ សេះ ហើយនឹងមានប្រភេទថាមពលចំនួនបី រួមទាំង UXEA/UXEB/UXEC ជាមួយប្រភេទប៉ុង១ និងប៉ុង២ ផងដែរ៕

ផ្ទាំងផ្សាយពាណិជ្ជកម្ម

Kia Sorento ស៊េរីឆ្នាំ២០១២ ប្ដូរម៉ាស៊ីនអស់៩លើក ប្ដូរប្រអប់លេខ៤លើក ក្រោយជិះបានជិត ១លានគ.ម

May 25, 2022

[ទីផ្សារបរទេស] រថយន្ត Kia Sorento ស៊េរីឆ្នាំ២០១២ មួយគ្រឿង បានឆ្លងកាត់ការប្ដូរម៉ាស៊ីនអស់ចំនួន៩លើក និង ប្ដូរប្រអប់លេខអស់៤លើក ក្រោយពីម្ចាស់រថយន្តប្រើប្រាស់អស់រយៈពេល១០ឆ្នាំ និងបើកបរបានចម្ងាយ ៩៧៨ ៦០០គីឡូម៉ែត្រ។

រយៈពេល១០ឆ្នាំនៃការប្រើប្រាស់នេះ រថយន្តបានឆ្លងកាត់ការប្ដូរម៉ាស៊ីនចំនួន ២០៣ដង និង ប្ដូរប្រេងប្រអប់លេខចំនួន ២០ដង ផងដែរ ហើយជាមធ្យមរថយន្តនេះអាចបើកបរបានចម្ងាយ ៤ ៨២០គ.ម សម្រាប់ការប្ដូរប្រេងម៉ាស៊ីនមួយលើក និងបើកបរបាន ១០៩ ០០០គ.ម សម្រាប់ការប្ដូរម៉ាស៊ីនមួយលើក ហើយអាចបើកបរបានចម្ងាយ ២៤៥ ០០០គ.ម សម្រាប់ប្ដូរប្រអប់លេខមួយលើក។

គួរដឹងថា ម្ចាស់រថយន្ត Kia Sorento ខាងលើ ទទួលបានការធានាដោយមិនកំណត់រយៈចម្ងាយបើកបរ ក្នុងរយៈពេល១០ឆ្នាំ ពីហាងលក់រថយន្ត។ បន្ថែមពីនេះ ម្ចាស់រថយន្តក៏បានធានារ៉ាប់រងបន្ថែមទៀតអំឡុងពេលប្រើប្រាស់ ហេតុនេះការផ្លាស់ប្ដូរគ្រឿងបន្លាស់ មិនត្រូវចំណាយប្រាក់ច្រើនប៉ុន្មានឡើយ។

បន្ទាប់ពីប្រើអស់១០ឆ្នាំ ការធានាត្រូវបានហួសកំណត់ ហើយគ្រឿងបន្លាស់សំខាន់ៗជាច្រើនត្រូវផ្លាស់ប្ដូរ ដែលនាំឲ្យម្ចាស់រថយន្តលក់រថយន្តចេញភ្លាមៗក្នុងតម្លៃ ១ ៤២៥ដុល្លារ និងបានបន្ថែមទឹកប្រាក់ ១៨ ០០០ដុល្លារ ដើម្បីទិញយករថយន្តម៉ូដែល Saturn Vue ដែលជារថយន្ត SUV សម្រាប់គ្រួសារតូច៕

ផ្ទាំងផ្សាយពាណិជ្ជកម្ម

ក្រុមហ៊ុនឡានផ្សេងសុទ្ធតែលោតលេខក្រហម មានតែ Tesla និង Genesis លោតបៃតងខុសគេ

May 25, 2022

[ទីផ្សារបរទេស] ទិន្នន័យរថយន្តចុះបញ្ជីថ្មីសម្រាប់ត្រីមាសទីមួយ នៃឆ្នាំ២០២២ លើទីផ្សារសហរដ្ឋអាមេរិក បានបង្ហាញថារថយន្តអគ្គិសនីបានដណ្ដើមចំណែកទីផ្សាររថយន្តប្រណីតតម្លៃខ្ពស់ៗបានយ៉ាងធំធេង។

ផ្អែកតាម Automotive News បានឲ្យឃើញថា Tesla នាពេលនេះត្រូវបានចាត់ទុកថាជាក្រុមហ៊ុនឈានមុខគេលើផ្នែករថយន្តតម្លៃថ្លៃ ដោយមានតួលេខចុះបញ្ជីថ្មីចំនួន ១១៣ ៨៨២គ្រឿង ដែលតួលេខនេះកើនឡើង ៥៩% ធៀបនឹងត្រីមាសទីមួយ នៃឆ្នាំ២០២១។

គួរចាប់អារម្មណ៍ផងដែរថាក្នុងចំណោមក្រុមហ៊ុនដែលលក់រថយន្តប្រណីតបានច្រើនជាងគេ មានតែ Tesla និង Genesis ប៉ុណ្ណោះ ដែលមានកំណើនការលក់ ខណៈដែលក្រុមហ៊ុនគូប្រជែងផ្សេងៗសុទ្ធតែថយចុះចំនួនលក់។

ជាក់ស្ដែងដូចជា BMW មានចំនួន ៨០ ៤៨២គ្រឿង ថយចុះ ៣% ចំណែក Lexus មានចំនួន ៦៦ ៩០៧គ្រឿង ថយចុះ ១៧%។សម្រាប់ម៉ាករថយន្ត Genesis មានចំនួន ១២ ៥៤៩គ្រឿង ដែលកើនឡើង ៥៣% ធៀបនឹងត្រីមាសទីមួយ ឆ្នាំ២០២១៕

ផ្ទាំងផ្សាយពាណិជ្ជកម្ម

ប្រសិនបើចង់ស្នើសុំបណ្ណបើកបរថ្មីបន្ទាប់ពីបាត់ តើដឹងអត់ត្រូវការឯកសាអ្វីខ្លះ ហើយអស់តម្លៃប៉ុន្មាន?

May 25, 2022

យោងតាមការបង្ហោះឡើយនៃទំព័រផ្លូវការរបស់ក្រសួងសាធារណការ និងដឹកជញ្ជូន (MPWT) បានបង្ហាញថា សម្រាប់ករណីដែលបានបាត់នូវបណ្ណបើកបរគឺត្រូវបានអនុញ្ញាតអោយស្នើសុំថ្មី ដោយការស្នើសុំនេះត្រូវបានតម្រូវអោយភ្ជាប់មកជាមួយនូវឯសារសំខាន់ៗដូចជា៖

អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)
ពាក្យបណ្តឹង (មានបញ្ជាក់ពីប៉ុស្ដិ៍នគរបាលរដ្ឋបាល)
លិខិតបញ្ជាក់កាយសម្បទា (មានតែនៅទីតាំងមួយចំនួន)
រូបថតខ្នាត ៤ x ៦ ផ្ទៃពណ៌សចំនួន ៣សន្លឹក

បន្ទាប់ពីតម្រូវអោយមានភ្ជាប់មកជាមួយឯកសារដូចបានបញ្ជាក់នៅខាងលើហើយនោះ ចំពោះតម្លៃសេវានៃការស្នើសុំទុតិយតាបណ្ណបើកបរនេះវិញគឺត្រូវបានបែកចែកដូចខាងក្រោម៖

បណ្ណបើកបរប្រភេទ “ក” តម្លៃ ២០ ០០០រៀល
បណ្ណបើកបរប្រភេទ “ខ” “គ” “ឃ” និង “ង” តម្លៃ ៣០ ០០០រៀល

ដូច្នេះសម្រាប់ព័ត៌មានលម្អិតបន្ថែមអាចទំនាក់ទំនងទៅកាន់លេខទូរសព្ទ(Hotline)៖ 1275៕

ផ្ទាំងផ្សាយពាណិជ្ជកម្ម

ឡានអគ្គិសនី Lotus Eletre សាកថ្មម្តងជិះបាន ៦០០ គីឡូម៉ែត្រ ជាមួយតម្លៃខ្ទង់ ១២មុឺនដុល្លារជាង នឹងបង្ហាញខ្លួននៅដើមខែក្រោយនេះ

May 25, 2022

[ទីផ្សារបរទេស] ក្រុមហ៊ុនផលិតរថយន្ត Lotus គ្រោងនឹងដាក់បង្ហាញចេញនៅរថយន្តអគ្គិសនី Lotus Eletre (E Let Tra) Electric Hyper-SUV ថ្មី ជាមួយតម្លៃរំពឹងចាប់ពី ១២៥ ៤៤០ ដុល្លារ នឹងមានលក់នៅចក្រភពអង់គ្លេស ចិន នៅថ្ងៃទី១ ខែមិថុនា ឆ្នាំ ២០២២ និងអឺរ៉ុបក្នុងឆ្នាំ ២០២៣។

រថយន្ត Lotus Eletre ប្រើប្រាស់នៅគ្រោងឆ្អឹង Pure-EV platform ថ្មី មានប្រវែងតួខ្លួនសរុប ៥ ១០៣ ម.ម ទទឹង ២ ០១៩ ម.ម កំពស់ ១ ៦៣០ ម.ម និងប្រវែងគន្លាតកង់មុខ-ក្រោយ ៣ ០១៩ ម.ម ។ ជាមួយគ្នានេះ រថយន្តអគ្គិសនី Lotus Eletre ផ្តោតលើផ្នែករថយន្តគ្រួសារក្នុងតម្លៃសមរម្យ វាមានតម្លៃទាបជាងរថយន្តស្ព័រ ព្រោះ Lotus ត្រូវការពង្រីកផលិតផលជាក់ស្តែងរបស់ខ្លួន។

ផ្នែកខាងក្រៅនៃ Lotus Eletre សង្កត់ធ្ងន់លើការរចនាបែបស្ព័រ ដែលមានចង្កៀងមុខបែបដាច់ពីគ្នានៅគែមខាងមុខនៃគម្រប់ម៉ាស៊ីន ប៉ាណាមុខបិទជិត, Lidar sensor ចំនួន៤, ថាសកង់ស្ព័រទំហំ ២៥ អ៊ីញ ប្រភេទ 5-spoke, ហ្វ្រាំងកាលីប័រ 10-piston ពណ៌លឿង, ដៃទ្វារលាក់ដ៏ធំ និងចង្កៀងខាងក្រោយ LED អូសកាត់ពីផ្នែកម្ខាងទៅផ្នែកម្ខាង។

ចំពោះផ្នែកខាងក្នុង Lotus អះអាងថា Eletre ភ្ជាប់ជាមួយប្រព័ន្ធ បើកបរដោយស្វ័យប្រវត្តិ និងមុខងារ OTA ។ ដៃចង្កូតរាងមូល នៅចំកណ្តាលមានអេក្រង់កំសាន្តប្រភេទ OLED រាងផ្ដេកទំហំ ១៥,១ អ៊ីញ ដែលមានសមត្ថភាពបង្ហាញពណ៌រហូតដល់ ១ ពាន់លានពណ៌ អេក្រង់បង្ហាញលើកញ្ចក់ AR HUD ទំហំ ២៩ អ៊ីញ ឧបករណ៍បំពងសំឡេងម៉ាក KEF ដ៏ប្រណិត ១៥ចំនុច ដល់ ២៣ចំនុច និងបច្ចេកវិទ្យាទំនើបៗផ្សេងទៀតផងដែរ។

ចូលទៅកាន់ផ្នែកម៉ាស៊ីនវិញ រថយន្តនេះបំពាក់ជាមួយម៉ូទ័រអគ្គិសនីចំនួនពីរមានកម្លាំង ៥៩២ សេះ ភ្ជាប់ជាមួយអាគុយទំហំធំជាង ១០០ គីឡូវ៉ាត់ម៉ោង អាចបើកបរបានចម្ងាយ ៦០០គីឡូម៉ែត្រក្នុងការសាកថ្មម្តង នឹងមានជម្រើសកម្លាំងដល់ ៧០០ សេះ ផងដែរ៕

ផ្ទាំងផ្សាយពាណិជ្ជកម្ម

មេ Volkswagen បោះសម្តីធ្ងន់ៗថា ឡានអគ្គិសនីខ្លួននឹងលក់ដាច់ជាង Tesla ត្រឹម២០២៥

May 25, 2022

នាយកប្រតិបត្តិក្រុមហ៊ុន Volkswagen លោក Herbert Diess ជឿជាក់ថា ក្រុមហ៊ុនរបស់ខ្លួននឹងអាចតាមទាន់ ហើយបន្ទាប់មកនឹងវ៉ាដាច់ក្រុមហ៊ុន Tesla បើនិយាយពីការលក់រថយន្តអគ្គិសនីជាសកល នៅត្រឹមឆ្នាំ ២០២៥។

ជាមួយគ្នានេះដែរ លោក Diess ក៏បានបន្ថែមទៀតថា កង្វះខាតខ្សែសង្វាក់ផ្គត់ផ្គង់ពិភពលោក ហៀបនឹងធូរស្រាលបន្តិច ហើយថា Volkswagen នឹងមានសន្ទុះការលក់ឡើងខ្ពស់ នាពាក់កណ្តាលឆ្នាំនេះ។

លោក Diess បានធ្វើអត្ថាធិប្បាយទៅកាន់គេហទំព័រ CNBC ដោយប្រាប់អំពីអនាគតនៃម៉ាកនេះ។ ជាការពិតណាស់រឿងសំខាន់គឺ លោកជឿថា Volkswagen នឹងវ៉ាដាច់ Tesla នៅឆ្នាំត្រឹម ២០២៥។

«ទីផ្សារតែងតែនិយាយអំពីអនាគត។ បច្ចុប្បន្ន Tesla កំពុងនាំមុខគេ បើនិយាយអំពីរថយន្តអគ្គិសនី ហើយប្រហែលវាជាក្រុមហ៊ុនរថយន្តទាន់សម័យបំផុតរួចទៅហើយ ហើយពួកគេមានគុណសម្បត្តិមួយចំនួន។ យើងនៅតែមានគោលបំណងរក្សាការកើនឡើង ហើយប្រហែលជាអាចវ៉ាដាច់ Tesla នៅឆ្នាំ ២០២៥ នៅពេលយើងនិយាយពីការលក់»។ នេះបើតាមសម្តីលោក Diess ប្រាប់ទៅកាន់ CNBC។

សូមបញ្ជាក់ថា Volkswagen គឺជាក្រុមហ៊ុនផលិតរថយន្តចុងក្រោយគេ ដែលប្រកាសជាសាធារណៈអំពីចេតនារបស់ខ្លួនក្នុងការយកឈ្នះ Tesla នាពេលខាងមុខ។

គួររំលឹកថា លោកស្រី Mary Barra នាយកប្រតិបត្តិនៃក្រុមហ៊ុន General Motors បានចេញមកកាលពីឆ្នាំមុន ជាមួយនឹងគោលដៅក្លាយជាអ្នកលក់រាយរថយន្តអគ្គិសនីឈានមុខគេ នៅឆ្នាំ ២០២៥។ ក្នុងនោះ General Motors សង្ឃឹមថា នឹងផលិតរថយន្តបាន ២ លានគ្រឿងក្នុងមួយឆ្នាំ នៅពេលនោះ៕

ផ្ទាំងផ្សាយពាណិជ្ជកម្ម

ទីបំផុត Ford ចេញតួលេខកម្លាំង Bronco Raptor ២០២២ ផ្លូវការហើយ!

May 25, 2022

ចំពោះអ្នកចូលចិត្តរថយន្ត Ford Bronco Raptor ប្រាកដជាសប្បាយចិត្ត ខណៈលោក Jim Farley ដែលជា CEO ក្រុមហ៊ុនផលិតរថយន្តអាមេរិកខាងលើ បានបង្ហាញថា វានឹងមានកម្លាំងខ្លាំងជាងការប៉ាន់ស្មានពីមុនទៅទៀត។

គួររំលឹកឲ្យដឹងថា Ford ធ្លាប់បានអះអាងថា SUV ដែលប្រើម៉ាស៊ីន twin-turbo ចំណុះ ៣,០លីត្រ EcoBoost V6 នេះ នឹងបង្កើតកម្លាំងបានជាង ៤០០សេះ ហើយឥឡូវនេះតួលេខផ្លូវការបានចេញមកហើយ គឺ ៤១៨សេះ និងកម្លាំងរមួល ៥៩៦ញ៉ូតុនម៉ែត្រ។

បើប្រៀបធៀបទៅ រថយន្ត Ford Bronco ម៉ូដែលស្តង់ដារ ប្រើម៉ាស៊ីនចំណុះ ២,៣លីត្រ EcoBoost ទំហំ ៤ស៊ីឡាំង មានកម្លាំង ៣០០សេះ និងកម្លាំងរមួល ៤៤០ញ៉ូតុនម៉ែត្រ។ វាផ្តល់ជម្រើសម៉ាស៊ីន EcoBoost V6 ចំណុះ ២,៧លីត្រ កម្លាំង ៣៣០សេះ និងកម្លាំងរមួល ៥៦២ញ៉ូតុនម៉ែត្រដែរ។

តាមរយៈតួលេខនេះ រថយន្ត Bronco Raptor នឹងក្លាយជាគូប្រជែងរបស់ Jeep Wrangler Rubicon 392 ដែលប្រើម៉ាស៊ីនចំណុះ ៦,៤លីត្រ V8 មានកម្លាង ៤៧០សេះ និងកម្លាំងរមួល ៦៣៧ញ៉ូតុនម៉ែត្រ។

ទោះបីជាយ៉ាងណាក៏ដោយ Bronco Raptor មានបំពាក់លក្ខណៈពិសេសមួយចំនួន ដូចជា ការឌីហ្សាញរូបរាង, សាក់ស៊ីរឹងមាំជាងមុន, បូមខ្លាំងជាងមុន, សម្បកកង់ ៣៧អ៊ីញ និង កម្ពស់ពីបាតក្រោមទៅដី ៣៣៣មីល្លីម៉ែត្រ ជាដើម៕