[REVIEW+] វិសាលភាពនៃរថយន្តប្រភេទ SUV ខ្នាតមធ្យមរបស់ក្រុមហ៊ុន Mazda កំពុងតែបន្តជាមួយការបង្ហាញចេញនូវម៉ូឌែលថ្មី CX-60 សម្រាប់ទីផ្សារអឺរ៉ុប, ជប៉ុន និងអូស្ត្រាលី ជាមួយការប្រើប្រាស់នូវស្ថាប័ត្យកម្មរថយន្តថ្មី និងជម្រើសម៉ាស៊ីនថ្មីដំបូងបំផុតរបស់ក្រុមហ៊ុននោះគឺម៉ាស៊ីនប្រភេទ Plug-In Hybrid។
ទំហំ និងរូបរាងនៃការឌីស្សាញ៖ សម្រាប់រថយន្តខ្នាតធម្យម CX-60 មានទំហំធំជាងរថយន្ត CX-50 ដែលក្រុមហ៊ុនបានធ្វើការបង្ហាញចេញកាលពីឆ្នាំមុនកន្លងទៅបន្តិច ជាមួយការប្រើប្រាស់នូវស្ថាប័ត្យកម្មថ្មីឈ្មោះថា Skyactiv Multi-Solution Scalable Architecture ដោយមានប្រវែងសរុប ៤ ៧៤៥មម, ទទឹង ១ ៨៩០មម, កម្ពស់ ១ ៦៨០មម និងប្រវែងគម្លាតកង់ ២ ៨៧០មម។
បើក្រឡេកមើលទៅលើការឌីស្សាញនៃរថយន្តនេះ ត្រូវបានបង្កើតឡើងលើគំនិតនៃការឌីស្សាញឲ្យឈ្មោះថា ‘Kodo-Soul of Motion’ របស់ក្រុមហ៊ុន Mazda ដែលចំណុចប្លែកភ្នែកបំផុតនោះគឺ ចង្កៀងមុខភ្ជាប់ដោយអំពូលបំភ្លឺពេលថ្ងៃនៅចំកណ្តាលរាងជាអក្សរ L, ជម្រើសថាសកង់ទំហំ ១៨-២០អ៊ីញ និងជម្រើសពណ៌តួរខ្លួន Jet Black, Deep Crystal Blue, Sonic Silver, Platinum Quartz, Arctic White, Rhodium White Premium Metallic, Machine Grey និង Soul Red Crystal។
ការរចនា និងគ្រឿងបរិក្ខា៖ ចំណែកឯផ្នែកខាងក្នុង ត្រូវបានឌីស្សាញឡើងជាមួយគំនិតនៃការរចនាបែបជប៉ុន នៃរចនាបទ Kaichou ដែលផ្តល់នូវលក្ខណៈពិសេសសម្រាប់ CX-60។ ជាក់ស្តែងរថយន្តនេះបានបំពាក់មកជាមួយកុងទ័របង្ហាញព័ត៌មាន TFT-LCD ប្រភេទឌីជីថលទំហំ ១២,៣អ៊ីញ, អេក្រង់កម្សាន្តទំហំ ១២,៣អ៊ីញ, អេក្រង់បង្ហាញព័ត៌មានបាញ់លើកញ្ចក់ HUD ទំហំធំ ដែលធំជាងនៅលើ CX-30 ចំនួន ៣ដង និងដំបូលកញ្ចក់ខាងលើ ។ ចំណែកនៅឃ្លុបក្រោយនៃរថយន្តអាចផ្ទុកឥវ៉ាន់បានដល់ចំណុះ ៥៧០លីត្រ និងរហូតដល់ ១ ១៤៨លីត្រនៅពេលបត់កៅអីខាងក្រោយចុះ ព្រមទាំងមានសម្ថភាពក្នុងការអូសណ្តាងបានរហូតទៅដល់ទម្ងន់ ២ ៥០០គីឡូក្រាម។
លើសពីនេះរថយន្តនេះក៏បានបំពាក់មកជាមួយប្រព័ន្ធដ៏គួរអោយចាប់អារម្មណ៌បំផុតគឺ Driver Personalization System ដែលកំណត់ទៅលើទីតាំងនៃការបើកបរដោយស្វ័យប្រវត្តិ ដែលប្រើប្រាស់នូវកាំម៉េរាដើម្បីចាប់ទីតាំងភ្នែក និងកម្ពស់របស់អ្នកបើកបរ ដើម្បីលៃតម្រូវដោយស្វ័រប្រវត្តិ ទៅលើកៅអី, ដៃចង្កូត, អេក្រង់បង្ហាញព័ត៌មាន HUD និងកញ្ចក់សងខាង។
ជម្រើសម៉ាស៊ីន៖ ក្នុងនោះផងដែរ រថយន្ត Mazda CX-60 ២០២៣ ទទួលបាននូវជម្រើសចំនួន ៣ប្រភេទគឺ
- ជម្រើសម៉ាស៊ូនដែលមានថាមពលខ្លាំង ដែល Mazda ពុំធ្លាប់ផលិត គឺម៉ាស៊ីនកូនកាត់ Plug-In Hybrid ចំណុះ ២,៥លីត្រ SkyActiv-G ទំហំ ៤ស៊ីឡាំង កម្លាំង ១៨៩សេះ ផ្គួបជាមួយម៉ូទ័រអគ្គិសនីចំនួន១ កម្លាំង ១៣៤សេះ ដែលអាចផលិតកម្លាំងសរុបបាន ៣២៣សេះ និងកម្លាំងរមួល ៥០០ញ៉ូតុនម៉ែត្រ។ ជាមួយថាមពលដ៏ខ្លាំងនេះ រថយន្តនេះអាចស្ទុះពីល្បឿន ០-១០០គ.ម/ម៉ ប្រើពេល ៥,៨វិនាទី និងមានល្បឿនអតិបរមាន ២០០គ.ម/ម៉។ បន្ថែមពីនេះរថយន្តនេះក៏អាចបើកបរដោយប្រើអគ្គិសនីសុទ្ធបាន ៦០គីឡូម៉ែត្រជាមួយការសាកពេញម្តងប្រើពេល ៤ម៉ោង និងមានកម្រិតស៊ីប្រេង ១,៥លីត្រសម្រាប់ប្រភេទបំពាក់កង់ទំហំ ១៨អ៊ីញ និង ១,៦លីត្រសម្រាប់ប្រភេទកង់ទំហំ ២០អ៊ីញ។
- ជម្រើសម៉ាស៊ីនសាំង ៣,០លីត្រ ប្រភេទ e-Skyactiv X ទំហំ ៦ស៊ីឡាំង រួមផ្សំជាមួយបច្ចេកវិទ្យា mild-hybrid ៤៨វ៉ុល។
- ជម្រើសម៉ាស៊ីនម៉ាស៊ូត ៣,៣លីត្រ ប្រភេទ e-Skyactiv D ទំហំ ៦ស៊ីឡាំង រួមផ្សំជាមួយបច្ចេកវិទ្យា mild-hybrid ៤៨វ៉ុល។
សូមបញ្ជាក់ផងដែរថាជម្រើសម៉ាស៊ីនរថយន្តទាំង ៣ប្រភេទនេះដំណើរការដោយប្រអប់លេខស្វ័យប្រវត្តិ ៨វគ្គ និងប្រព័ន្ធ i-Activ AWD។
ប្រព័ន្ធជើងក្រោម និងបច្ចេកវិទ្យា៖ សម្រាប់ប្រព័ន្ធជើងក្រោមនៃរថយន្ត Mazda បានវិនិយោគពេលវេលាយ៉ាងច្រើទៅលើរថយន្ត cx-60 នេះ ដោយផ្នែកខាងមុខ CX-60 បានបំពាក់មកជាមួយ Double Wishbones suspension និងផ្នែកខាងក្រោយបំពាក់មកជាមួយ Multi-Link Suspension។ ក្នុងនោះដែល Mazda បាននិយាយថា៖ ប្រព័ន្ធ suspension នេះនឹងផ្តល់អោយអ្នកបើកបរទទួលបាននូវបទពិសោធន៍នៃការធ្វើចលនានៃរបស់រថយន្តដោយរលូន មិនថាស្ថិតក្នុងស្ថានភាពនៃការបើកបរបែបណានោះឡើយ។
ក្រៅពីនៃរថយន្តនេះក៏បំពាក់មកជាមួយបច្ចេកវិទ្យា Kinematic Posture Control (KPC), កាំម៉េរា ៣៦០ដឺក្រ, Vehicle Exit Warning, Traffic Sign Recognition, Lane-Keep Assist System, Blind Spot Monitoring, Rear Cross Traffic Alert, i-Adaptive Cruise Control, Hill Launch Assist, Emergency Stop Signaling System និងមុខងារជាមួយច្រើនបន្ថែមទៀត។
តម្លៃ៖ សម្រាប់នៅលើទីផ្សារអឺរ៉ុប និងអង់គ្លេស រថយន្ត Mazda CX-60 ២០២៣ មានតម្លៃចាប់ពី ៥៧ ៦៥០ដុល្លារ ដល់ ៦៣ ០៣១ដុល្លារ ជាមួយជម្រើសម៉ូឌែលដូចជា៖ Prime, Exclusive, Homura និង Takumi ខណៈប្រភេទ Plug-In Hybrid គឺសម្រាប់ការបញ្ជាទិញមុន ជាមួយការចាប់ផ្តើមដឹកជញ្ជូននៅចន្លោះខែ កញ្ញាដល់ខែធ្នូ៕
