[ទីផ្សារបរទេស] នៅក្នុងឆ្នាំ២០២១ មានរថយន្តសាកភ្លើងជិត ៦,៥លានគ្រឿង បានលក់ចេញលើទីផ្សារពិភពលោក ដែលមានកំណើនប្រមាណ ៣,១% ធៀបនឹងចំនួនលក់ ៣,១លានគ្រឿង កាលពីឆ្នាំ២០២០។ នេះបើផ្អែកតាមទិន្នន័យរបស់ EV-Volumes។

ក្នុងនោះផងដែរ ចំណែកទីផ្សារនៃរថយន្តសាកភ្លើងបានកើនឡើងដល់ ៩% ធៀបនឹង ៤% កាលពីឆ្នាំ២០២០ ដោយរថយន្តអគ្គិសនីសុទ្ធលក់ចេញបានប្រមាណ ៤,៩លានគ្រឿង កើនឡើង ៦៩% ខណៈដែលរថយន្ត PHEV លក់ចេញបាន ១,៩លានគ្រឿង កើនឡើង ៣១%។

រថយន្តដែលលក់ដាច់ជាងគេគឺ Tesla Model 3, Hong Guang MINI EV ជាមួយរថយន្ត Tesla Model Y ដែល Model 3 ប៉ាន់ស្មានថាលក់បានលើសពី៥០ម៉ឺនគ្រឿង ហើយមានន័យថាវាបានក្លាយជារថយន្តសាកភ្លើងលក់ដាច់ជាងគេរយៈពេល៤ឆ្នាំជាប់គ្នា គិតចាប់តាំងពីឆ្នាំ២០១៨មក។

ចំណែក Hong Guang MINI EV អាចលក់ចេញបានសរុបជាង ៤២៤ ៤០០គ្រឿង នៅពេញមួយឆ្នាំ២០២១ ដែលវាគឺជារថយន្តអគ្គិសនីដែលមានតម្លៃធូរថ្លៃបំផុតមួយ។ រថយន្ត Tesla Model Y វិញ ប៉ាន់ស្មានថាលក់បានជាង ៤១ម៉ឺនគ្រឿង ហើយវាទំនជានឹងក្លាយជារថយន្តអគ្គិសនីលក់ដាច់ជាងគេនៅក្នុងឆ្នាំ២០២២នេះ។

រថយន្តសាកភ្លើងដែលលក់ដាច់បានច្រើនជាងគេផ្សេងទៀតរួមមាន Volkswagen ID.4, BYD Qin Plus PHEV, Li Xiang One EREV, BYD Han EV, BYD Song Pro/Plus PHEV, Changan Benni EV និង Volkswagen ID.3៕

ផ្ទាំងផ្សាយពាណិជ្ជកម្ម

[ទីផ្សារបរទេស] ជាមួយរថយន្ត DBX707 ក្រុមហ៊ុន Aston Martin បានប្រកាសចេញរថយន្ត SUV ដែលមានកម្លាំងខ្លាំងដាច់គេ ដែលនឹងរុញប្រជាប្រិយភាពត្រកូលរថយន្ត DBX ឲ្យកាន់តែទទួលបានការគាំទ្រខ្លាំងបន្ថែមទៀត។

យ៉ាងណាក្ដី ពេលសួរអំពីផែនការប្រកាសចេញរថយន្ត SUV ផ្សេងទៀត ក្រុមហ៊ុន Aston Martin បញ្ជាក់ថាមិនមានគម្រោងនោះឡើយ។ លោក Tobias Moers នាយកប្រតិបត្តិនៃក្រុមហ៊ុនបានបញ្ជាក់ថាក្រុមហ៊ុននឹងមិនប្រកាសចេញឡាន SUV បន្ថែមឡើយ។

ពេលសួរអំពីរថយន្ត DBX ខ្នាតតូច លោកបានឆ្លើយថាវាគ្មានហេតុផលដែលក្រុមហ៊ុនត្រូវបង្កើតគូប្រកួតប្រជែងថ្មីសម្រាប់រថយន្ត DBX នោះឡើយ ហើយសម្រាប់រថយន្តប្រភេទតួវែង (Long Wheelbase) នាយកប្រតិបត្តិរូបនេះនិយាយដោយខ្លីថាទុកតួនាទីនេះឲ្យអ្នកផ្សេងជាអ្នកផលិតចុះ។

គួររំលឹកថាលោក Andy Palmer ដែលធ្លាប់ជាអតីតនាយកប្រតិបត្តិ Aston Martin ធ្លាប់បាននិយាយកាលពីខែកុម្ភៈ ឆ្នាំ២០២០ ថា រថយន្ត Lagonda ប្រភេទអគ្គិសនីអាចនឹងប្រកាសចេញនៅក្រោយឆ្នាំ ២០២៥ ខណៈដែលនាយកប្រតិបត្តិថ្មីទើបបានបញ្ជាក់ខ្លីៗពីរថយន្តនេះថាការវិលត្រឡប់របស់ Lagonda គឺនៅវែងឆ្ងាយ៕

ផ្ទាំងផ្សាយពាណិជ្ជកម្ម

[ទីផ្សារបរទេស] ក្រោយពេលបុណ្យចូលឆ្នាំថ្មីប្រពៃណីចិន ត្រូវបានបញ្ចប់ ក្រុមហ៊ុនផលិតរថយន្តជាច្រើនមានគម្រោងបញ្ចេញផលិតផលដើម្បីបង្កើតសន្ទុះសម្រាប់ឆ្នាំថ្មី នៅក្នុងប្រទេសវៀតណាម។ ក្នុងនោះ MG នឹងក្លាយជារថយន្តដំបូងគេជាមួយនឹងការបង្ហាញខ្លួនរបស់រថយន្ត MG5 ប្រភេទ sedan នៅថ្ងៃទី ៧ ខែកុម្ភៈ ខាងមុខនេះ។ បន្ទាប់មក Honda បានដាក់បង្ហាញរថយន្ត Civic ថ្មី ហើយ Toyota នឹងបញ្ចេញនូវបងប្អូងត្រកូល MPVរបស់ខ្លួនគឺ Avanza និង Veloz ក្នុងត្រីមាសទី១ ផងដែរ។

MG សម្រាប់រថយន្ត MG5 បើយោងតាមអ្នកចែកចាយមួយចំនួនក្នុងប្រទេសវៀតណាម តម្លៃលក់របស់ MG5 ប្រភេទ sedan នេះត្រូវបានគេរំពឹងថានឹងមានតម្លៃពី ២២ ៩៥៨ ដុល្លារ​ ដល់ ២៦ ៤៩០ ដុល្លារ។ ចំពោះផ្នែកម៉ាស៊ីនវិញរថយន្តនេះដំណើរការដោយម៉ាស៊ីនចំណុះ ១,៥ លីត្រ ទំហំ ៤ស៊ីឡាំង ផលិតកម្លាំងបាន ១១៤ សេះ ភ្ជាប់មកជាមួយប្រអប់លេខអូតូ​ CVT ៨វគ្គ។

Honda Civic ក្រុមហ៊ុន Honda ដែលមាន​គម្រោងបង្ហាញខ្លួន​ដល់​អតិថិជន​វៀតណាម​ក្រោយ​បុណ្យ​ចូល​ឆ្នាំ មានតម្លៃចាប់ពី ៣០៩០៥ ដុល្លារ​ ដល់ ៣៩៧៣៥ ដុល្លារ ។ បើនិយាយពីផ្នែកម៉ាស៊ីនវិញ រថយន្ត Honda Civic ជំនាន់ទី១១ នៅ​ប្រទេស​វៀតណាម ដំណើរការដោយម៉ាស៊ីនចំណុះ ១,៥ លីត្រ turbocharged ផលិតកម្លាំងបាន ១៧៨ សេះ និងកម្លាំងរមួល ២៤០ ញ៉ូតុនម៉ែត្រ ភ្ជាប់ជាមួយប្រអប់លេខអូតូ CVT។

Toyota Avanza សម្រាប់រថយន្តឥឡូវនេះ អ្នកចែកចាយកំពុងផ្តល់ជូនអតិថិជននូវប្រភេទថ្មីពីរគឺ Avanza, E និង G ដែលមានតម្លៃចាប់ពី ២២​ ៩៥៨ ដុល្លារ ដល់ ២៦ ០៤៨ ដុល្លារ ខណៈ រថយន្ត​នេះ​ត្រូវ​បាន​គេ​រំពឹង​ថា​នឹង​ចេញ​លក់​នៅ​ត្រីមាស​ទី​មួយ​។ ចំពោះផ្នែកម៉ាស៊ីនវិញ រថយន្ត Toyota Avanza នៅក្នុងប្រទេសវៀតណាម ដំណើរការដោយម៉ាស៊ីនចំណុះ ១,៥ លីត្រ ទំហំ ៤ស៊ីឡាំង ដែលអាចផលិតកម្លាំងបាន ១០៤ សេះ និងកម្លាំងរមួល ១៣៧ ញ៉ូតុនម៉ែត្រ ភ្ជាប់មកជាមួយប្រអប់លេខអូតូ CVT ៥វគ្គ។

Toyota Veloz សម្រាប់រថយន្តនេះត្រូវបានគេរំពឹងថានឹងចេញលក់ក្នុងពេលដំណាលគ្នាជាមួយ Avanza ដែលមានតម្លៃចាប់ពី ២៤ ២៨២ ដុល្លារ​ ដល់ ២៨ ៦៩៧ ដុល្លារ។ ក្នុងនោះដែរ រថយន្តនេះបានចាប់ផ្តើមបើកទទួលការកក់ មុនពេលចូលឆ្នាំរួចមកហើយ។ សម្រាប់រថយន្ត Toyota Veloz  ប្រើប្រាស់ម៉ាស៊ីនចំណុះ ១,៥ លីត្រ ទំហំ ៤ ស៊ីទ្បាំង ផលិតកម្លាំង ១០៣ សេះ និងកម្លាំងរមួល ១៣៧ ញ៉ូតុនម៉ែត្រ ភ្ជាប់មកជាមួយប្រអប់លេខអូតូ CVT ៥វគ្គ៕

ផ្ទាំងផ្សាយពាណិជ្ជកម្ម

[ទីផ្សារបរទេស] ក្រុមហ៊ុន Kawasaki បានបើកដំណើរការសេវាកម្មឈ្មោះថា “Kawasaki Online Shop” សម្រាប់ធ្វើការលក់គ្រឿងបន្លាស់ និងគ្រឿងបរិក្ខាផ្សេងៗ។

សម្រាប់សេវាកម្មអនឡាញនេះ ត្រូវបានដាក់នូវផលិតផល Original ពីក្រុមហ៊ុន Kawasaki ដែលមានគ្រឿងបន្លាស់សម្រាប់ជួសជុលម៉ូតូ និងស្គីរបស់ Kawasaki នៅក្នុងប្រទេសជប៉ុន។ បន្ថែមពីនេះ គ្រឿងបរិក្ខាបន្ថែមសម្រាប់ការធ្វើដំណើរ និងទំនិញក៏ត្រូវបានផ្តល់ជូនផងដែរ។

សម្រាប់អ្នកដែលមានបំណងបញ្ជាទិញគ្រឿងបន្លាស់ ឬគ្រឿងបរិក្ខាផ្សេងៗ អាចធ្វើការបញបញ្ជាទិញពីផ្ទះ ជាក់ស្តែងដូចជាសម្លៀកបំពាក់ និងទំនិញដែលអ្នកចង់បាន។ ហើយផលិតផលត្រូវបានដឹកជញ្ជូនយ៉ាងឆាប់រហ័សទៅកាន់អតិថិជនដោយផ្ទាល់ពីមជ្ឈមណ្ឌលគ្រឿងបន្លាស់របស់ Kawasaki ៕

ប្រភព៖ response.jp

ផ្ទាំងផ្សាយពាណិជ្ជកម្ម