រថយន្ត Nissan Leaf ជំនាន់ថ្មី ត្រូវបានគេរាយការណ៍ថា បានត្រៀមខ្លួនរួចជាស្រេចដើម្បីប្រែក្លាយទៅជារថយន្តប្រភេទ Crossover វិញ។

បើយោងតាមលោក Guillaume Cartier ជាប្រធាននៃ AMIEO (Africa, Middle East, India, Europe & Oceania) របស់ក្រុមហ៊ុន Nissan បានឲ្យដឹងថា រថយន្តនេះនឹងត្រូវផលិតនៅរោងចក្រ Sunderland Plant ដែលជាផ្នែកមួយនៃការវិនិយោគចំនួន ១,៣ពាន់លានដុល្លារ។

មិនតែប៉ុណ្ណោះ រថយន្តនេះត្រូវបានគេរំពឹងថានឹងបង្ហាញខ្លួននៅអំឡុងឆ្នាំ២០២៥ ហើយត្រូវផលិតផ្អែកតាមគ្រោងឆ្អឹង CMF-EV Platform ដែលបច្ចុប្បន្នកំពុងប្រើលើរថយន្ត Nissan Ariya និង Renault Megane E-Tech Electric។

ទោះបីជាយ៉ាងណាក៏ដោយ ព័ត៌មានលម្អិតអំពីរថយន្តនេះមានមិនច្រើននោះទេ ប៉ុន្តែការប្រែខ្លួនក្លាយទៅជារថយន្តប្រភេទ Crossover មិនមែនជារឿងគួរឲ្យភ្ញាក់ផ្អើលនោះទេ ព្រោះថាអ្នកប្រើប្រាស់ចូលចិត្តពួកវាខ្លាំង។

ជាមួយគ្នានេះដែរ Nissan មិនមែនជាក្រុមហ៊ុនផលិតរថយន្តតែមួយនោះទេដែលធ្វើបែបនេះ ជាក់ស្តែងរថយន្ត Chevrolet Bolt ថ្មីៗនេះបានប្រែខ្លួនទៅជារថយន្តប្រភេទ Crossover ជាមួយនឹងការបញ្ចេញម៉ូដែល Chevrolet Bolt EUV៕

ផ្ទាំងផ្សាយពាណិជ្ជកម្ម

កាលពីដើមឆ្នាំ Honda បានបង្ហាញចេញរូបរាងរថយន្ត HR-V ជំនាន់ថ្មីសម្រាប់លក់លើទីផ្សារអឺរ៉ុប និងជប៉ុន ដោយមានបន្ថែមនូវជម្រើសម៉ាស៊ីន Hybrid ថ្មីជាលើកដំបូង។ ដោយឡែក Honda បានបង្ហាញចេញរថយន្ត HR-V ប្រភេទថ្មីមួយទៀត ដែលនឹងមានដាក់លក់តែនៅប្រទេសចិនប៉ុណ្ណោះ។

HR-V ពិសេសសម្រាប់ប្រភេទចិន មានប្រើប្រាស់ថាមពលអគ្គិសនីសុទ្ធ ដែលនេះគឺជាលើកដំបូងហើយដែលរថយន្ត HR-V ត្រូវបានដាក់លក់ជាប្រភេទអគ្គិសនី។

មុនការប្រកាសចេញរថយន្តនេះជាផ្លូវការ រូបភាពនៃរូបរាងរបស់វាត្រូវបានបង្ហោះចេញដោយមន្ទីរឧស្សាហកម្ម និងបច្ចេកវិទ្យាព័ត៌មាននៃប្រទេសចិន ដែលជាដំណើរការមួយមុនការចេញលក់រថយន្តជាផ្លូវការ។

តាមរយៈរូបភាពបានបង្ហាញថា HR-V អគ្គិសនីគឺបានយកលំនាំតាមរថយន្ត SUV e:prototype ដែលបានបង្ហាញខ្លួនក្នុងកម្មវិធីតាំងបង្ហាញរថយន្តក្រុងសៀងហៃឆ្នាំ២០២១។ បន្ថែមពីនេះដែរគេឃើញមានឈ្មោះ e:NS1 ដែលនេះទំនងជាឈ្មោះ HR-V អគ្គិសនីសម្រាប់ទីផ្សារប្រទេសចិន។

ផ្អែកតាមឯកសារបានឲ្យដឹងថា e:NS1 នេះមានដំណើរការដោយម៉ូទ័រអគ្គិសនីដែលផលិតកម្លាំងបាន ២០១សេះ ដែលមានអាគុយទំហំ ៦៨,៨គីឡូវ៉ាត់ម៉ោងមកជាមួយ ប៉ុន្តែមិនទាន់មានដំណឹងពីរយៈចម្ងាយបើកបរនៅឡើយទេ។ ដំណឹងផ្សេងទៀតអំពីរថយន្ត e:NS1 រំពឹងថានឹងត្រូវប្រកាសចេញក្នុងពេលឆាប់ៗខាងមុខនេះ៕

ផ្ទាំងផ្សាយពាណិជ្ជកម្ម

ក្រុមហ៊ុន VinFast បានប្រកាសចេញលក់ជាផ្លូវការនូវរថយន្តអគ្គិសនី VF e34 នៅទីផ្សាររថយន្តវៀតណាម ដែលនេះគឺជារថយន្តអគ្គិសនីដំបូងគេរបស់ក្រុមហ៊ុនផលិតរថយន្តរបស់វៀតណាម។

រថយន្តនេះមានប្រវែង ៤៣០០ម.ម ទទឹង ១៧៩៣ម.ម និងមានកម្ពស់ ១៦១៣ម.ម ដោយអាគុយមានបំពាក់នៅផ្នែកខាងក្រោម ដើម្បីធ្វើឲ្យផ្នែកខាងក្នុងកាន់តែមានទំហំធំទូលាយ។ រថយន្ត VF e34 នេះនឹងត្រូវប្រកួតប្រជែងជាមួយរថយន្តប្រភេទ CUV ដទៃទៀតដែលលក់នៅវៀតណាម មានដូចជា Honda CR-V និង Mazda CX-5 ជាដើម។

រថយន្តនេះមានបំពាក់ដោយយ៉ាន់កង់ទំហំ ១៨អ៊ីញ, មានគូថទ្វារក្រោយជាប្រភេទអេឡិចត្រូនិក, កម្ពស់ពីដីគឺ ១៨០ម.ម, មានប្រើប្រាស់អំពូល LED ទាំងមុខ និងទាំងក្រោយផងដែរ។

អាគុយដែលមានបំពាក់លើរថយន្តនេះអាចបើកបរបានចម្ងាយ ២៨៥គីឡូម៉ែត្រ ពេលសាកភ្លើងពេញម្ដងៗ ដោយម៉ូទ័រអគ្គិសនីរបស់វាអាចផលិតកម្លាំងបាន ១៤៧សេះ។ រថយន្តនេះអាចសាកភ្លើងបាន៤កម្រិត ដោយដុំសាក ១១គីឡូវ៉ាត់ អាចសាកពី ១០% ឡើងដល់ ៧០% ក្នុងពេល ២ម៉ោង១០នាទី, ដុំសាក ៣០គីឡូវ៉ាត់ប្រើពេលប្រមាណ១ម៉ោង, ដុំសាក ៦០គីឡូវ៉ាត់ប្រើពេលប្រមាណ ៣០នាទី និងដុំសាក ២៥០គីឡូវ៉ាត់ អាចឲ្យរថយន្តជិះបានចម្ងាយ ១៨០គីឡូម៉ែត្រ ពេលសាកប្រមាណ ១៨នាទីប៉ុណ្ណោះ។

គួរដឹងថានៅលើទីផ្សារវៀតណាម រថយន្ត VF e34 នេះមានដាក់លក់ក្នុងតម្លៃចាប់ពីប្រមាណ ៣០ ៣០០ដុល្លារ ដែលរំពឹងថានឹងចេញលក់លើទីផ្សារចាប់ពីខែវិច្ឆិកា ឆ្នាំ២០២១នេះ៕

ផ្ទាំងផ្សាយពាណិជ្ជកម្ម

សព្វថ្ងៃនេះ រថយន្តអគ្គិសនីជំនាន់ថ្ម ភាគច្រើនសុទ្ធតែផ្តល់ចម្ងាយបើកបរឆ្ងាយ ប៉ុន្តែចម្ងាយរបស់ពួកវានៅតែមិនអាចបំពេញ និងយកឈ្នះទៅលើរថយន្តប្រើប្រេងសាំង ឬម៉ាស៊ូតដដែល។

ចម្ងាយបើកបរនៃរថយន្តអគ្គិសនី គឺជាកត្តាដ៏ធំមួយក្នុងការពិចារណា មុនពេលសម្រេចចិត្តទិញវាយកមកប្រើប្រាស់។ ទោះបីជាយ៉ាងណាក៏ដោយ បច្ចុប្បន្ននេះក្រុមហ៊ុនផលិតរថយន្តជាច្រើន បានផ្តល់នូវជម្រើសរថយន្តអគ្គិសនី ដែលមានចម្ងាយបើកបរឆ្ងាយៗ រហូតអាចយកឈ្នះរថយន្តប្រើប្រេងសាំង ឬម៉ាស៊ូតមួយចំនួនទៀតផង។

ខាងក្រោមនេះគឺជារថយន្តអគ្គិសនីទាំង ១០ ម៉ូដែល ផ្តល់នូវចម្ងាយបើកបរឆ្ងាយបំផុតប្រចាំឆ្នាំ២០២១៖

១០) Polestar 2 – ៣៣៥ម៉ាយ៍ ឬ ៥៤០គីឡូម៉ែត្រ

៩) Volkswagen ID.3 – ៣៣៦ម៉ាយ៍ ឬ ៥៤០គីឡូម៉ែត្រ

៨)Tesla Model X – ៣៦០ម៉ាយ៍ ឬ ៥៨០គីឡូម៉ែត្រ

៧)Tesla Model 3 – ៣៦០ ម៉ាយ៍ ឬ ៥៨០គីឡូម៉ែត្រ

៦)BMW i4 – ៤៦៧ម៉ាយ៍ ឬ ៥៩០គីឡូម៉ែត្រ

៥)Ford Mustang Mach-E – ៣៧៩ម៉ាយ៍ ឬ ៦១០គីឡូម៉ែត្រ

៤)BMW iX – ៣៨០ម៉ាយ៍ ឬ ៦១០គីឡូម៉ែត្រ

៣)Tesla Model S – ៤០៥ម៉ាយ៍ ឬ ៦៥០គីឡូម៉ែត្រ

២)Mercedes EQE – ៤១០ម៉ាយ៍ ឬ ៦៦០គីឡូម៉ែត្រ

១)Mercedes EQS – ៤៨៥ម៉ាយ៍ ឬ ៧៨០គីឡូម៉ែត្រ

ផ្ទាំងផ្សាយពាណិជ្ជកម្ម