ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 715

Honda Civic Hatchback ឆ្នាំ២០២២ ចេញលក់ក្នុងតម្លៃជាង ២ម៉ឺនដុល្លារ

កាលពីខែមិថុនាកន្លងទៅ ក្រុមហ៊ុន Honda បានធ្វើការបញ្ចេញនូវរថយន្ត Honda Civic Hatchback ឆ្នាំ២០២២ ជាផ្លូវការ នាពេលនេះក្រុមហ៊ុនបានធ្វើការប្រកាសអំពីតម្លៃនៃរថយន្តប្រភេទ Hatchback នេះនៅលើទីផ្សារសហរដ្ឋអាមេរិចជាផ្លូវការ។

សម្រាប់រថយន្ត Honda Civic Hatchback ២០២០ ផ្តល់នូវជម្រើស ៤ម៉ូឌែលគឺ

  • LX មានតម្លៃចាប់ពី ២២ ៩០០ដុល្លារ
  • Sport មានតម្លៃចាប់ពី ២៤ ១០០ដុល្លារ
  • EX-L មានតម្លៃចាប់ពី ២៦ ៦០០ដុល្លារ
  • Sport Touring មានតម្លៃចាប់ពី ២៩ ៤០០ដុល្លារ។

យ៉ាងណាមិញ រថយន្តនេះផ្តល់នូវជម្រើសម៉ាស៊ីន ២ជម្រើសគឺ ២,០លីត្រ ទំហំ ៤ស៊ីឡាំង មានកម្លាំង ១៥៨សេះ និងកម្លាំងរមួល ១៨៧ញ៉ូតុនម៉ែត្រ។ និងជម្រើស ១,៥លីត្រ ទំហំ ៤ស៊ីឡាំង មានកម្លាំង ១៨០សេះ និងកម្លាំងរមួល ២៤០ញ៉ូតុនម៉ែត្រ។ ភ្ជាប់ជាមួយប្រអប់លេខដៃ ឬ CVT ចំនួន ៦វគ្គ។

បន្ថែមពីនេះ Honda Civic Hatchback ឆ្នាំ២០២២ ទទួលបានការឌីស្សាញថ្មីឡើងវិញពីរថយន្ត Sedan ជាមួយចំណុចដែលគួរអោយចាប់អារម្មណ៍បំផុតនៃរថយន្ត Civic Hatchback នេះ គឺបានបំពាក់ចង្កៀងខាងក្រោយថ្មីភ្ជាប់ជាមួយអំពូលជាខ្សែបន្ទាត់ប្រភេទ LED រួមជាមួយ Spoiler ខាងលើ និងថាសកង់ទំហំ ១៧-១៨អ៊ីញ។ រីឯផ្នែកខាងក្នុងបានបំពាក់ជាមួយកុងទ័រ LCD បង្ហាញព័ត៌មានទំហំ ៧អ៊ីញ, អេក្រង់កម្សាន្តទំហំ ៧អ៊ីញ ភ្ជាប់ជាមួយមុខងារ Apple Carplay និង Android Auto។ បន្ថែមពីនេះ សម្រាប់ប្រភេទខ្ពស់បំផុត(High-end Version) នឹងបំពាក់ជាមួយ កុងទ័រ LCD បង្ហាញព័ត៌មានទំហំ ១០,២អ៊ីញ, អេក្រង់កម្សាន្តទំហំ ៩អ៊ីញ និងចង្កឹះលេខដៃ(Paddle Shift)៕

ផ្ទាំងផ្សាយពាណិជ្ជកម្ម

តើប្រព័ន្ធហ្រ្វាំង ABS ជាអ្វី? ដំណើរការយ៉ាងដូចម្តេច? | ចំណេះដឹងយានយន្ត

[​ចំណេះដឹងយានយន្ត] ABS មកពីពាក្យពេញគឺ Anti-lock Braking System ឬ Anti-slip Braking System។ ប្រព័ន្ធហ្រ្វាំង ABS គឺជាប្រព័ន្ធដែលការពារកុំឲ្យកង់រថយន្តរអិល និងបញ្ឈប់កង់រថយន្តយឺតៗនៅពេលជាន់ហ្រ្វាំង។ ហ្រ្វាំង ABS គឺបានគ្រប់គ្រងដោយម៉ូឌុលកុងត្រូលអេឡិចត្រូនិច (Electronic Control Unit) ។

ផ្នែកនៃប្រព័ន្ធហ្រ្វាំង ABS គឺមាន៖

  • ម៉ូឌុលកុងត្រូលអេឡិចត្រូនិក (Electronic Control Unit)
  • បណ្តុំកុងត្រូលប្រេងហាដ្រូលិក រួមមាន បូមប្រេងអេឡិចត្រូនិក តួរវ៉ាល់សូលេណយ និងសំណុំកុងត្រូល។
  • Hydraulic Control Group (Electric Hydraulic Pump + Solenoid Valve Body + Control Unit)
  • ទុយោរនិងបំពង់ហាយដ្រូលិក (Hydraulic Pipe and Hoses)
  • សែនស័រល្បឿនកង់រថយន្ត (Wheel Speed Sensor)
  • កុងតាក់ហ្រ្វាំង (Brake Switch (Brake Pedal Sensor))

ការដំណើរការ

ប្រេងហ្រ្វាំងត្រូវបានបំណែននៅពេលជាន់ឈ្នាន់ហ្រ្វាំងសង្កត់ចុះ គឺត្រូវបានបញ្ជូនទៅកាន់ហ្រ្វាំងនៃកង់រថយន្តនីមួយៗដាច់ដោយឡែកៗពីគ្នាដោយបណ្តុំកុងត្រូលប្រេងហាយដ្រូលិក ABS ( Hydraulic Control Group)។ មានច្រកប្រេងចូលចំនួន១ និងបណ្តាញច្រកប្រេងចេញចំនួន៤(សម្រាប់កង់ទាំង៤)នៅតួរវ៉ាល់សូលេណយ(Solenoid Valve Body) នៅលើម៉ូឌុល ABS (ABS Module)។ ម៉ូទ័របូមអេឡិចត្រូនិកនឹងលៃតម្រូវសម្ពាធប្រេងហ្រ្វាំងដោយបង្កើន បន្ថយ ឬរក្សាសម្ពាធប្រេង។

ម៉ូឌុលកុងត្រូលអេឡិចត្រូនិក / បទបញ្ជា ABS គឺត្រួតពិនិត្យមើលល្បឿនកង់រថយន្តដោយទទួលសញ្ញាពីសែនស័រល្បឿនកង់រថយន្ត(Wheel Speed Sensor) នៅលើកង់នីមួយៗរបស់រថយន្ត។ នៅពេលចាប់ហ្រ្វាំងគឺពេលដែលសែនស័រដឹងថាកង់ណាមួយវិលយឺត ឬរអិល(ជាប់) វាជួយកាត់បន្ថយសម្ពាធប្រេងហាយដ្រូលិកដែលបញ្ជូនទៅកង់នោះយ៉ាងជាក់លាក់ និងលឿនបំផុត។ ដូច្នេះវាការពារកុំអោយកង់រអិល ឬជាប់គាំងនៅពេលដែលជាន់ឈ្នាន់ហ្រ្វាំងចុះក្រោម។ នៅពេលដែលជាន់ឈ្នាន់ហ្រ្វាំងរហូតដល់ផុតអស់នោះ វានឹងបញ្ជូនកម្លាំងសម្ពាធប្រេងកាន់តែខ្លាំងនៅកាន់កង់រហូតដល់កម្រិតកង់លេងវិល ឬអូសកង់ ។

ឧទាហរណ៍ កង់រថយន្តខាងស្តាំបានចូលក្នុងទឹក ហើយកង់ខាងឆ្វេងស្ថិតនៅលើដីស្ងួត។ ក្នុងករណីនេះ កម្លាំងកកិតឬផ្ទៃប៉ះដីនៃកង់ខាងស្តាំនិងខាងឆ្វេងគឺ ខុសគ្នា។ ដីសើមឬនៅក្នុងទឹក ធ្វើអោយកង់រអិលកាន់តែស្រួលក្នុងពេលជាន់ហ្រ្វាំង។ សូម្បីតែក្នុងករណីនេះ ប្រព័ន្ធហ្រ្វាំង ABS បញ្ជូនសម្ពាធប្រេងហ្រ្វាំងទៅគឺខុសៗគ្នា ទៅកង់ខាងស្តាំនិងខាងឆ្វេង ដើម្បីការពារការរអិលកង់និងពិបាកក្នុងការគ្រប់គ្រងចង្កូត៕

ផ្ទាំងផ្សាយពាណិជ្ជកម្ម

Subaru BRZ ឆ្នាំ២០២២ ញាត់ Option ពេញ ថ្លៃជិត ៤ម៉ឺនដុល្លារ

Subaru BRZ ជំនាន់ថ្មី ស៊េរីឆ្នាំ២០២២ គឺជារថយន្តស្ព័រដែលមានតម្លៃថោកបំផុតមួយ នៅលើទីផ្សារបច្ចុប្បន្ន ជាមួយនឹងតម្លៃចាប់ពី ២៧ ៩៩៥ដុល្លារ នៅលើទីផ្សារសហរដ្ឋអាមេរិក។

រថយន្ត Subaru BRZ ឆ្នាំ២០២២ ផ្តល់ជម្រើស ២ ម៉ូដែល គឺ Limited Premium តម្លៃចាប់ពី ២៧ ៩៩៥ដុល្លារ និង Limited តម្លៃចាប់ពី ៣០ ៤៩៥ដុល្លារ។ វាបំពាក់ម៉ាស៊ីនសាំងចំណុះ ២,៤លីត្រ ប្រភេទ Boxer Engine ទំហំ ៤ស៊ីឡាំងថ្មី មានកម្លាំង ២២៨សេះ។

Subaru បានផ្តល់ជម្រើសប្រអប់លេខដៃ ៦វគ្គមកស្តង់ដារលើ BRZ ឆ្នាំ២០២២ ប៉ុន្តែក៏ផ្តល់ Option ប្រអប់លេខអូតូដែរ ក្នុងតម្លៃ ១ ៨០០ដុល្លារ។ ពាក់ព័ន្ធជាមួយពណ៌វិញ វាមានសរុប ៧ជម្រើស គឺ WR Blue Pearl, Crystal Black Silica, Magnetite Gray Metallic, Ignition Red, Ice Silver Metallic, Sapphire Blue និង Crystal White Pearl។

យ៉ាងណាមិញ ក្រុមហ៊ុន Subaru ក៏មានផ្តល់ Option ជាច្រើនទៀត ដែលអាចធ្វើឲ្យតម្លៃ BRZ ឆ្នាំ២០២២ ប្រែប្រួលយ៉ាងខ្លាំង។ ក្នុងនោះមានដូចជា កញ្ចក់ស្រទុំអូតូ (៣៥៥ដុល្លារ), បន្ទះសម្រាប់ដាក់ទូរសព្ទ (១៩៩,៩៩ដុល្លារ), ស្បែកស្រោបចង្កឹះលេខ (២១៥ដុល្លារ), ប៊ូតុងបញ្ឆេះម៉ាស៊ីន (២៤៥,៩៥ដុល្លារ), កាងកាត់ខ្យល់ខាងមុខ (៣៩៩,៩៥ដុល្លារ), កាងកាត់ខ្យល់ក្រោយ (៣៣៩,៩៥ដុល្លារ) និងកាងកាត់ខ្យល់ចំហៀង (៤៩៩,៩៥ដុល្លារ)។

មិនតែប៉ុណ្ណោះ ប្រសិនបើចង់ឲ្យរថយន្ត Subaru BRZ ឆ្នាំ២០២២ មើលទៅរឹតតែកាច អតិថិជនក៏អាចបន្ថែមកាងលំហូរខ្យល់ក្រោយ (rear bumper diffuser) ក្នុងតម្លៃ ៦៩៩,៩៥ដុល្លារ, កាងកន្ទុយត្រី spoiler (៣៤៩,៩៥ដុល្លារ) និង រន្ធបឺតខ្យល់ខាងមុខ (១៣៩,៩៥ដុល្លារ) ផងដែរ។ សរុបជារួមមក ប្រសិនបើញាត់ Option ឲ្យពេញ រថយន្ត Subaru BRZ ឆ្នាំ២០២២ នឹងមានតម្លៃដល់ទៅ ៣៩ ១៦០ដុល្លារឯណោះ៕

ផ្ទាំងផ្សាយពាណិជ្ជកម្ម

ឡាន Lotus Emira V6 First Edition ចេញតម្លៃជាផ្លូវការ ចាប់ពីខ្ទង់ ១០ម៉ឺនដុល្លារ

ក្រុមហ៊ុនរថយន្តអង់គ្លេស Lotus បានប្រកាសពីតម្លៃនៃរថយន្ត Evira V6 First Edition ជាផ្លូវការ ដោយចាប់ពី ១០៤ ០៦៥ដុល្លារ នៅចក្រភពអង់គ្លេស និង ១១២ ៤៥០ដុល្លារ នៅប្រទេសអាល្លឺម៉ង់។

រថយន្ត Lotus Emira ក៏នឹងចេញប្រភេទ Base Model ដែលប្រើម៉ាស៊ីន AMG ទំហំ ៤ស៊ីឡាំងដែរ នៅឆ្នាំ២០២៣ ហើយវានឹងត្រូវដាក់លក់ក្នុងតម្លៃចាប់ពី ៨២ ១៥៥ដុល្លារ នៅចក្រភពអង់គ្លេស។

រថយន្ត Lotus Emira V6 First Edition បំពាក់ម៉ាស៊ីន Toyota 2GR-FE ចំណុះ ៣,៥លីត្រ ទំហំ ៦ស៊ីឡាំង ជាមួយនឹង Edelbrock 1740 supercharger មានកម្លាំង ៤០០សេះ និងកម្លាំងរមួល ៤២០ញ៉ូតុនម៉ែត្រ ដំណើរការដោយប្រអប់លេខដៃ ឬ លេខអូតូ ៦វគ្គ។

រថយន្តនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៤,៣វិនាទី សម្រាប់ប្រភេទលេខដៃ និង ៤,២វិនាទី សម្រាប់ប្រភេទលេខអូតូ ខណៈល្បឿនអតិបរមារបស់វាអាចឡើងដល់ ២៩០គីឡូម៉ែត្រក្នុងមួយម៉ោង។

រថយន្ត Lotus Emira V6 First Edition នេះនឹងផ្តល់ជម្រើស ៦ពណ៌ គឺ Seneca Blue, Magma Red, Hethel Yellow, Dark Verdant, Shadow Grey និង Nimbus Grey៕

ផ្ទាំងផ្សាយពាណិជ្ជកម្ម

មកស្គាល់ឡានអគ្គិសនី៥ តម្លៃធូរថ្លៃជាងគេនៅអាមេរិក

ក្រៅពីប្រទេសចិន និងតំបន់អឺរ៉ុប រថយន្តអគ្គិសនីក៏មានចំណែកទីផ្សារគួរសមផងដែរនៅសហរដ្ឋអាមេរិក ហើយម៉ាករថយន្តក្នុងស្រុក បានប្រកួតប្រជែងម៉ាករថយន្តក្រៅស្រុកទាំងលើផ្នែកឌីហ្សាញ និងតម្លៃលក់។ ខាងក្រោមនេះជារថយន្តអគ្គិសនីតម្លៃធូរថ្លៃជាងគេទាំង៥នៅសហរដ្ឋអាមេរិក។

១. Nissan Leaf

រថយន្ត Nissan Leaf នាពេលបច្ចុប្បន្នគឺជារថយន្តអគ្គិសនីធូរថ្លៃជាងគេនៅសហរដ្ឋអាមេរិក ជាមួយតម្លៃប្រមាណ ២៨ ០០០ដុល្លារ។ វាមានបំពាក់អាគុយចំណុះ ៤០គីឡូវ៉ាត់ម៉ោង ដែលអាចបើកបរបានចម្ងាយ ២៤០គីឡូម៉ែត្រ។

២. Mini Cooper SE

រថយន្ត Mini Cooper SE មានតម្លៃចាប់ពីប្រមាណ ៣០ ០០០ដុល្លារ ដែលវាប្រើប្រាស់អាគុយចំណុះ ៣២,៥គីឡូវ៉ាត់ម៉ោង អាចបើកបរបានចម្ងាយ ១៨៣គីឡូម៉ែត្រ ពេលសាកភ្លើងពេញ។

៣. Chevrolet Bolt EV

រថយន្ត Bolt EV មានតម្លៃដាក់លក់ប្រមាណ ៣២ ០០០ដុល្លារ ដែលអាគុយចំណុះ ៦៥គីឡូវ៉ាត់ម៉ោងរបស់វា អាចឲ្យបើកបរបានចម្ងាយ ៤១៦គីឡូម៉ែត្រ ពេលសាកភ្លើងពេញ។

៤. Mazda MX-30 EV

រថយន្ត Mazda MX-30 មានតម្លៃចាប់ពី ៣៤ ៦០០ដុល្លារ ហើយអាគុយរបស់វាមានទំហំ ៣៥,៥គីឡូវ៉ាត់ម៉ោង។ ពេលសាកភ្លើងពេញវាអាចបើកបរបានចម្ងាយប្រមាណ ១៦០គីឡូម៉ែត្រប៉ុណ្ណោះ។

៥. Hyundai Kona Electric

Kona Electric អាចបើកបរបានចម្ងាយប្រមាណ ៤១៤គីឡូម៉ែត្រ ដោយមានអាគុយចំណុះ ៦៤គីឡូវ៉ាត់ម៉ោង ហើយវាមានតម្លៃចាប់ពីប្រមាណ ៣៥ ០០០ដុល្លារ៕

ផ្ទាំងផ្សាយពាណិជ្ជកម្ម

ឡានអគ្គិសនី Cadillac មួយប្រភេទ ត្រឹមតែ១០នាទីមានអ្នកកក់ទិញអស់គ្មានសល់

Cadillac បានប្រកាសថារថយន្តអគ្គិសនី Lyriq ប្រភេទ Debut Edition មានអ្នកកុម្ម៉ង់ទិញអស់គ្មានសល់ក្នុងរយៈពេលត្រឹម១០នាទី បន្ទាប់ពីបើកទទួលការកុម្ម៉ង់។

គួរដឹងថាការកក់នេះមិនមានន័យថារថយន្តទាំងអស់សុទ្ធតែត្រូវបានទិញនោះទេ ដោយការកក់ខ្លះអាចនឹងត្រូវរំសាយចោលវិញ។ បន្ថែមពីនេះក្រុមហ៊ុន Cadillac មិនបានប្រាប់នោះទេថារថយន្ត Lyriq Debut Edition ប៉ុន្មានគ្រឿងដែលខ្លួនដាក់លក់ វាអាចចំនួនប៉ុន្មានរយ ឬប៉ុន្មានពាន់គ្រឿង ឬលើសពីនេះ។

រថយន្ត Lyriq Debut Edition ទាំងអស់មានបំពាក់អាគុយចំណុះ ១០០,៤គីឡូវ៉ាត់ម៉ោង និងម៉ូទ័រអគ្គិសនីមួយនៅខាងក្រោយ ដែលអាចផលិតកម្លាំងប៉ាន់ស្មានប្រមាណ ៣៤០សេះ។ ចំណុចលេចធ្លោផ្នែកខាងក្រៅមានដូចជាដំបូលកញ្ចក់ពេញលេញ, យ៉ាន់ទំហំ២០អ៊ីញជាស្តង់ដារ និងជម្រើសយ៉ាន់ទំហំ២២អ៊ីញ។

ឯផ្នែកខាងក្នុងវិញមានឧបករណ៍បំពងសំឡេងម៉ាក AKG ចំនួន១៩គ្រាប់, មុខងារទប់សំឡេងរំខាន, ចង្កូតកំដៅ, កៅអីអ្នកបើកបរ និងកៅអីអ្នកដំណើរខាងមុខអាចសារ៉េបាន៨របៀប រួមទាំងអេក្រង់កម្សាន្ត និងកុងទ័រឌីជីថលទំហំដល់ ៣៣អ៊ីញ៕

ផ្ទាំងផ្សាយពាណិជ្ជកម្ម

អ្វីជាភ្លើងសញ្ញាហ្រ្វាំងរថយន្ត? | ចំណេះដឹងយានយន្ត

[​ចំណេះដឹងយានយន្ត] ភ្លើងសញ្ញាហ្រ្វាំងនៅលើតាប្លូមានន័យថារថយន្តរបស់អ្នកគឺមានបញ្ហាជាមួយប្រព័ន្ធហ្រ្វាំងឬទាញហ្រ្វាំងដៃឡើងលើដើម្បីចត់រថយន្ត។ នៅក្នុងដំណើរការធម្មតា ភ្លើងសញ្ញាហ្រ្វាំងនឹងភ្លឺឡើងបន្ទាប់ពីអ្នកកាច់សោរមកទីតាំងបើករ បន្ទាប់មកពន្លឺភ្លើងនឹងរលត់ទៅវិញ បន្ទាប់ពីអ្នកលែងហ្រ្វាំងដៃវិញ។ ប្រសិនបើភ្លើងសញ្ញាហ្វ្រាំងនៅតែភ្លឺមិនរលត់ បានន័យប្រព័ន្ធហ្រ្វាំងនៃរថយន្តគឺមានបញ្ហាហើយ។

ភ្លើងសញ្ញាហ្រ្វាំងគួរតែភ្លឺឡើងក្នុងលក្ខខណ្ឌដូចខាងក្រោម៖

  • ភ្លើងសញ្ញាហ្រ្វាំងនឹងភ្លឺឡើង នៅពេលអ្នកចាប់ផ្តើមបញ្ឆេះរថយន្ត ដើម្បីបង្ហាញថាអំពូលភ្លើងព្រមានគឺមានដំណើរកាធម្មតាហើយរលត់ទៅវិញ
  • ភ្លើងសញ្ញាហ្រ្វាំងនឹងភ្លឺឡើង​ នៅពេលដែលអ្នកទាញហ្រ្វាំងដៃមកលើដើម្បីចត់រថយន្តឬកុំអោយរថយន្តរអិល
  • ភ្លើងសញ្ញាហ្រ្វាំងនឹងភ្លឺឡើង នៅពេលដែលរថយន្តមានបញ្ហាជាមួយប្រព័ន្ធហ្វ្រាំង
  • ភ្លើងសញ្ញាហ្រ្វាំងនឹងភ្ជាប់នឹងមកជាភ្លើងអាគុយ ដើម្បីប្រាប់ដំណើរថារថយន្តមានបញ្ហាជាមួយប្រព័ន្ធសាកអាគុយ
  • សែនស័រឈ្នាន់ហ្រ្វាំងបានបញ្ជាអោយភ្លើងសញ្ញាហ្រ្វាំងបើក ដោយសារតែផ្នែកនៃឈ្នាន់ហ្រ្វាំងត្រូវបានកែច្នៃ ថែមរបស់ក្រៅផ្សេងៗ។

អ្វីដែលអ្នកគួរត្រួតពិនិត្យនៅពេលភ្លើងសញ្ញាហ្រ្វាំងភ្លឺជាប់រហូត

  • ត្រួតពិនិត្យកម្រិតប្រេងហ្រ្វាំងក្នុងកំប៉ុងប្រេងហ្រ្វាំង អោយស្ថិតក្នុងកម្រិតសមស្របតាមការណែនាំនៅលើសំបកកំប៉ុង
  • ត្រួតពិនិត្យហ្រ្វាំងដៃ ត្រូវតែបានប្រលែងមកវិញអស់ ប្រាកដថាមិនមានអ្វីកល់ឬទប់វាឡើយ
  • សូមពិនិត្យមើលភ្លើងសញ្ញាសាកអាគុយនិងភ្លើងសញ្ញាហ្រ្វាំងមិនបានបើកក្នុងពេលតែមួយពេលរថយន្តកំពុងដំណើរការ

ផ្ទាំងផ្សាយពាណិជ្ជកម្ម

លែងអោយចាំយូរ! Toyota Tundra ឆ្នាំ២០២២ ចេញជាផ្លូវការ ជាមួយជម្រើស ៦ម៉ូឌែល

បន្ទាប់ពីបង្ហាញខ្លួនជាលើកដំបូងកាលពីឆ្នាំ ២០០០ នាពេលនេះរថយន្តភីកអាប់ខ្នាតធំ Toyota Tundra ឆ្នាំ២០២២ថ្មី ត្រូវបានទទួលការអភិវឌ្ឍន៍ថ្មី កាន់តែទំនើប និងថាមពលកាន់តែខ្លាំង។

ផ្នែកខាងក្រៅបានផ្លាស់ប្តូរមុខមាត់ថ្មីទាំងស្រុងដោយបំពាក់ជាមួយប៉ាណាថ្មី, ចង្កៀងមុខប្រភេទ Full LED, ចង្កៀងក្រោយថ្មីដែលភ្លឺជាងមុន ២០ភាគរយ និងកន្លែងសាកថ្មនៅទ្រុងក្រោយ ១២០V។ រីឯផ្នែកខាងក្នុងបានផ្តល់នូវភាពទូលាយ និងផាសុកភាពជាងមុនជាមួយដំបូលកញ្ចក់ខាងលើ បន្ថែមជាមួយការបំពាក់ជាមួយកៅអីស្បែក, កុងទ័រឌីជីថលទំហំ ១២,៣អ៊ីញ, អេក្រង់កម្សាន្តទំហំ ៨អ៊ីញ ឬ ១៤អ៊ីញ ដែលភ្ជាប់ជាមួយមុខងារ Apple Carplay និង Android Auto, ប៊ូតុងមុខងារ(Switchgear)នៅក្រោមអេក្រង់កម្សាន្ត និងកញ្ចក់ក្រោយបិតបើកដោយថាមពលអេឡិចត្រូនិច។

ចំពោះសម្ថភាពនៃការដឹកជញ្ជូនភីកអាប់នេះ វាទទួលបានការបង្កើនសម្ថភាពចំនួន ១១ភាគរយថ្មី ដែលអាចដឹកបានទម្ងន់ ៨៨០គីឡូក្រាម និងអូសសណ្តោងបាន ៥ ៤៤៣គីឡូក្រាម ដែលបង្កើនបាន ១៧,៦ភាគរយ។

អ្វីដែលកាន់តែគួរអោយកត់សំគាល់បន្ថែមទៀតនោះគឺ ការប្រើប្រាស់ជាមួយ Multi-link rear Suspension ជាមួយបូមរ៉ឺស័រ ដែល Toyota និយាយថាវាបានធ្វើការបង្កើននូវផាសុកភាព ផ្តល់នូវលំនឹង និងសម្ថភាពការគ្រប់គ្រង់។ ចំណែកឯ Shock absorbers បានធ្វើការផ្លស់ប្តូរទីតាំងចេញពីតួរសាក់ស៊ីនៃរថយន្ត ដើម្បីបង្កើនការនៅប្រសិទ្ធភាពពេលរលាក់ផងដែរ។ បន្ថែមជាមួយបំពាក់ជាមួយ Double Wishbone Suspension ថ្មីដែលជួយអោយចង្កូតមានលំនឹងជាងមុន ២៥ភាគរយ, Adaptive Variable Suspension ដោយជួយកែសម្រួលលក្ខខណ្ឌនៃការបើកបរដោយស្វ័យប្រវត្តិ, Multi-Terrain Monitor ដែលបង្ហាញពីឧបសគ្គភ្លាមៗ និង Multi-Terrain Select សម្រាប់ជ្រើសរើសជម្រើសការបើកបរល្អបំផុតផងដែរ។

ខណៈពេលក្រុមហ៊ុនពុំទាន់បញ្ចេញនូវព័ត៌មានលម្អិតនៃមុខងារនៃប្រព័ន្ធជំនួយការបើកបរគ្រប់គ្រាន់ Toyota Tundra ២០២២ បានបំពាក់ជាមួយកញ្ចប់សុវត្តិភាព TSS 2.5 ដែលរួមមាន pre-collision system with pedestrian and cyclist detection, dynamic radar cruise control, lane departure alert, lane tracing assist (lane centering), automatic high beams និង blind spot monitor, road sign assist។

ជាមួយការប្រើប្រាស់សាក់ស៊ីថ្មី ភីកអាប់ខ្នាតធំនេះផ្តល់នូវជម្រើសម៉ាស៊ីន ២ប្រភេទគឺម៉ាស៊ីន ៣,៥លីត្រ Twin-turbocharged V6 ផលិតកម្លាំងបាន ៣៨៩សេះ និងកម្លាំងបង្វិល ៦៤៩ញ៉ូតុនម៉ែត្រ ឬម៉ាស៊ីនហាយប្រ៊ីដ ឈ្មោះថា i-Force Max ដោយអាចផលិតកម្លាំងបាន ៤៣៧សេះ និងកម្លាំងបង្វិល ៧៩០ញ៉ូតុនម៉ែត្រ។ គួរបញ្ជាក់ផងដែរថាម៉ាស៊ីនទាំងពីរដំណើរការដោយប្រអប់លេខ ១០វគ្គអូតូ។

រថយន្តភីកអាប់ Toyota Tundra ២០២២ ផ្តល់នូវជម្រើស ៦ម៉ូឌែលគឺ SR, SR5, Limited, Platinum, 1794 និង TRD Pro។ និងជម្រើសតួរខ្លួន ២ប្រភេទ Double Cab (ប្រវែងទ្រុងក្រោយ ១៦៧សង់ទីម៉ែត្រ) និង CrewMax  (ប្រវែងទ្រុងក្រោយ ២៤៦សង់ទីម៉ែត្រ) រថយន្តនេះនឹងចេញលក់នាចុងឆ្នាំនេះ ជាមួយតម្លៃរំពឹងទុកចាប់ពី ៣៦ ០០០ដុល្លារឡើងទៅ៕

ផ្ទាំងផ្សាយពាណិជ្ជកម្ម

Suzuki Jimny ថ្មី ប្រកាសចេញនៅជប៉ុន ទទួលបានការអាប់ដេតតិចបំផុត

រថយន្ត Suzuki Jimny ស៊េរីថ្មី នឹងចេញលក់នៅលើទីផ្សារប្រទេសជប៉ុន នាថ្ងៃទី២០ ខែតុលា ឆ្នាំ២០២១ ខាងមុខនេះ។

ចំពោះម៉ូដែលប្រើប្រអប់លេខអូតូ ៤វគ្គ ឥឡូវនេះមានមុខងារ automatic start-stop ដែលអាចកាត់បន្ថយការបំភាយឧស្ម័នផ្ទះកញ្ចក់ និង កាត់បន្ថយកម្រិតស៊ីប្រេង ទៀតផង។

ទោះជាយ៉ាងណាក៏ដោយ មុខងារ automatic start-stop នេះ នឹងដំណើរការតែនៅពេលរថយន្ត ប្រើម៉ូដបើកបរប៉ុងមួយ (two-wheel drive mode) ប៉ុណ្ណោះ។

បន្ថែមពីនេះ រថយន្ត Suzuki Jimny និង Jimny Sierra ឥឡូវនេះមានបំពាក់ចង្កៀងមុខអូតូ ទោះបីជាពួកវាមិនមានប្រព័ន្ធ Suzuki Safety Support ក៏ដោយ ក៏ដូចជា គម្របកង់សាគួ ទៀតផង។ ក្រៅពីនោះ មិនមានអ្វីផ្លាស់ប្តូរខុសពីស៊េរីមុនទៀតឡើយ ហើយវាក៏មិនទាន់ច្បាស់ឡើយថា ការអាប់ដេតថ្មីទាំងនេះនឹងមានលើទីផ្សារផ្សេងទៀត ឬក៏អត់។

គួរឲ្យដឹងដែរថា ចំពោះទីផ្សារប្រទេសជប៉ុន រថយន្ត Suzuki Jimny ដែលមានតម្លៃថោកបំផុតគឺ៖

  • Jimny XG ប្រើលេខដៃ ៥វគ្គ មានតម្លៃចាប់ពី ១៣ ៥០០ដុល្លារ
  • Jimny XL តម្លៃចាប់ពី ១៤ ៦០០ដុល្លារ
  • Jimny XC តម្លៃចាប់ពី ១៦ ១៦០ដុល្លារ
  • Jimny Sierra JL តម្លៃចាប់ពី ១៦ ៣០០ដុល្លារ
  • Jimny Sierra JC តម្លៃចាប់ពី ១៧ ៨០០ដុល្លារ សម្រាប់លេខដៃ និង ១៨ ៩៦០ដុល្លារ សម្រាប់លេខអូតូ
ផ្ទាំងផ្សាយពាណិជ្ជកម្ម

Toyota Sienna ប្រភេទ Woodland Edition ឆ្នាំ២០២២ នឹងមានតម្លៃចាប់ពី ៤៦ ០០០ដុល្លារ

ព័ត៌មានលម្អិតអំពីតម្លៃនៃរថយន្ត Toyota Sienna ប្រភេទ Woodland Edition ឆ្នាំ២០២២ បានលេចឡើង បន្ទាប់ពីវារថយន្តនេះបានបង្ហាញខ្លួនកាលពីដើមឆ្នាំកន្លងទៅ។

រថយន្ត Toyota Sienna Woodland Edition ត្រូវបានផលិតឡើងដោយផ្អែកតាមម៉ូដែល XLE ហើយមានតម្លៃចាប់ពី ៤៦ ៥៦៥ដុល្លារ នៅលើទីផ្សារសហរដ្ឋអាមេរិក ពោលគឺថ្លៃជាងម៉ូដែល Sienna XLE ដល់ទៅ ៣ ៥០០ដុល្លារឯណោះ។

ជាមួយគ្នានេះដែរ ប្រសិនបើអតិថិជនជ្រើសយក Option អេក្រង់កម្សាន្តនៅកៅអីក្រោយ និង Option មួយចំនួនផ្សេងទៀត តម្លៃរបស់ Sienna Woodland Edition អាចឡើងដល់ទៅ ៤៨ ០០០ដុល្លារឯណោះ។

គួរឲ្យដឹងថា Sienna Woodland Edition មានលក្ខណៈពិសេសមួយចំនួនខុសពីម៉ូដែល Sienna XLE ដោយក្នុងនោះរួមមានទាំង ពណ៌ស៊ីម៉ង់, ឡូហ្គូពណ៌ខ្មៅ, ក្រមេពណ៌ខ្មៅ និង រឺហ្គែរលើដំបូល ជាដើម។ មិនតែប៉ុណ្ណោះ Toyota ក៏បានកល់បូមលើម៉ូដែលពិសេសនេះខ្ពស់ជាងមុន ០,៦អ៊ីញ, បំពាក់ទំពក់ថ្ពក់ ដែលអាចអូសសណ្តោងបានទម្ងន់ ១៥៨០គីឡូក្រាម និង យ៉ាន់កង់ទំហំ ១៨អ៊ីញ ទៀតផង។

ចំណែកឯកាប៊ីនខាងក្នុងវិញ វាមានបំពាក់ពូក រំលេចដោយថ្នេរដេរ, កៅអីជួរទី២ ជាកៅអីធំ, ទ្វារចំហៀងទាត់ជើងបើកអូតូ និងប្រព័ន្ធសំឡេង JBL មាន Speaker ១២គ្រាប់ផងដែរ។

រថយន្ត Toyota Sienna ថ្មីទាំងអស់ប្រើម៉ាស៊ីន Hybrid ចំណុះ ២,៥លីត្រ ទំហំ ៤ស៊ីឡាំង ជាមួយនឹងម៉ូទ័រអគ្គិសនី ២គ្រឿង ដែលបង្កើតកម្លាំងបានសរុប ២៤៣សេះ ហើយមានកម្រិតស៊ីសាំងត្រឹមតែ ៦,៥លីត្រ/១០០គីឡូម៉ែត្រ។

រថយន្ត Sienna Woodland Edition ក៏មានបំពាក់ប្រព័ន្ធ Toyota Safety Suite ជំនាន់ទី២ ដោយក្នុងនោះមានមុខងារដូចជា Pre-Collision system with Pedestrian Detection, Lane Departure Alert with Lane Trace Assist និង Full Speed Adaptive Cruise Control ទៀតផង៕

ផ្ទាំងផ្សាយពាណិជ្ជកម្ម
1...714715716...1,084ទំព័រ 715 នៃ 1,084

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com