Hyundai និង Kia ជោគជ័យខ្លាំងជាងគេលើទីផ្សារអាមេរិកនៅឆ្នាំ ២០២០

January 1, 2021

ផ្អែកតាម JD Power បានឲ្យដឹងថាចន្លោះពីខែមករា ដល់ខែវិច្ឆិកានៃឆ្នាំ ២០២០ ទីផ្សាររថយន្តនៅសហរដ្ឋអាមេរិកមានការធ្លាក់ចុះ ១២% បើធៀបរយៈពេលដូចគ្នាក្នុងឆ្នាំ ២០១៩។ ការធ្លាក់ចុះនេះក៏ដោយសារជំងឺកូវីដ១៩ ប៉ុន្តែគេសង្កេតឃើញថា Kia និង Hyundai ហាក់អាចឈរជើងបានរឹងមាំជាងគេ។

អ្នកវិភាគទីផ្សារមកពី Cox Automative បាននិយាយដូចនេះថា ៖ “ទីផ្សារសម្រាប់ក្រុមហ៊ុនរថយន្តទាំងអស់សុទ្ធតែមានការធ្លាក់ចុះ ប៉ុន្តែសម្រាប់ Hyundai និង Kia ហាក់ដូចជាចេញមកខ្លាំងក្លាជាងគេ។”

ហេតុផលចម្បងដែល Hyundai និង Kia នៅតែអាចធ្វើបានល្អក្នុងវិបត្តិកូវីដ១៩នោះ គឺដោយសារតែការបង្ហាញចេញរថយន្តថ្មីៗជាច្រើនពីសំណាក់ក្រុមហ៊ុនទាំងពីរ ជាក់ស្ដែងដូចជារថយន្ត Kia Telluride ដែលជា SUV ដ៏ពេញនិយមមួយ។

បន្ថែមពីនេះដែរ ការគ្រប់គ្រងបានល្អលើជំងឺកូវីដ១៩នៅប្រទេសកូរ៉េខាងត្បូង មានន័យថាសង្វាក់ផលិតកម្មនៅរោងចក្រផលិតរថយន្តរបស់ក្រុមហ៊ុនទាំងពីរមិនសូវប៉ះពាល់ខ្លាំងដូចជាក្រុមហ៊ុនដទៃឡើយ៕

ផ្ទាំងផ្សាយពាណិជ្ជកម្ម

Nissan ទទួលស្គាល់ថាឡានស៊េរីចាស់ៗធ្វើឲ្យចំនួនលក់ធ្លាក់ចុះ

December 31, 2020

Nissan បានទទួលស្គាល់ថារថយន្តដែលខ្លួនបានប្រកាសចេញនៅប៉ុន្មានឆ្នាំកន្លងមកនេះគឺមានចំនួនច្រើនលើសលប់ ធ្វើឲ្យរថយន្តមួយចំនួនមានអាយុកាលច្រើន ពោលគឺមិនបានឡើងស៊េរីរថយន្តគ្រប់ម៉ូដែលនោះឡើយ។

ហេតុផលនេះហើយដែលនាំឲ្យចំនួនលក់របស់ Nissan មានការធ្លាក់ចុះច្រើនគួរសម ជាពិសេសគឺនៅអឺរ៉ុប។ នៅឆ្នាំ ២០១៧ ក្រុមហ៊ុនអាចលក់រថយន្តនៅអឺរ៉ុបបាន ៥៦៦ ១៩១គ្រឿង ហើយនៅឆ្នាំ ២០១៩ បានធ្លាក់ចុះមកនៅត្រឹម ៣៩៤ ០៩១គ្រឿងប៉ុណ្ណោះ។

ក្នុងកិច្ចសម្ភាសន៍ជាមួយ Car Magazine លោក Ashwani Gupta ជានាយកប្រតិបត្តិសកលនៅ Nissan បាននិយាយដូចនេះថា ៖ “យើងដើរលឿនពេកក្នុងការពង្រីកទីផ្សារក្នុងពិភពលោក ដោយរំពឹងថាទីផ្សាររបស់យើងនឹងរីកធំ ហើយចំនួនលក់របស់យើងនឹងកាន់តែល្អ។ ប៉ុន្តែទាំងពីរនេះមិនបានកើតឡើងឡើយ។”

លោក Gupta បានបន្តថា ៖ “ជាលទ្ធផល យើងមានរថយន្តជាច្រើនដែលខកខានមិនបានទទួលបានកែប្រែរូបរាង (ចេញជាស៊េរីថ្ម) គឺដោយសាររថយន្តរបស់យើងមានច្រើនម៉ូដែលពេក។ វាក៏ដោយសារការបណ្ដាក់ទុនផងដែរ ប្រសិនបើអ្នកមិនមានទឹកប្រាក់ នោះក៏មិនអាចចេញរថយន្តស៊េរីថ្មីបានដែរ។”

ដោយសារមើលឃើញពីកំហុសឆ្គងនេះ លោក Gupta បាននិយាយថា Nissan បានផ្លាស់ប្ដូរនូវផែនការយុទ្ធសាស្ត្រដោយអនុវត្តន៍វិធីសាស្ត្រកាត់បន្ថយការចំណាយ និងបញ្ឈប់ការផលិតរថយន្តដែលមិនសូវមានទីផ្សារ។ Nissan នឹងសហការជាមួយ Renault ដោយផ្ដោតលើទីផ្សារសំខាន់ៗរបស់ខ្លួនដែលមានសហរដ្ឋអាមេរិក ចិន និងជប៉ុន។

នៅទីផ្សារអឺរ៉ុប Nissan នឹងផ្ដោតសំខាន់លើរថយន្តតួខ្ពស់មានដូចជា Qashqai, Juke និង X-Trail ដែលជារថយន្តមានសក្ដានុពល៕

ផ្ទាំងផ្សាយពាណិជ្ជកម្ម

ឡាន SUV និងឡានភីកអាប់ខ្លឹមៗដែលចេញលក់លើទីផ្សារឆ្នាំក្រោយ

December 31, 2020

នៅឆ្នាំ ២០២១ ខាងមុខក្រុមហ៊ុនផលិតរថយន្តនឹងចាប់ផ្ដើមបញ្ចេញលក់រថយន្តជាច្រើនដែលខ្លួនបានប្រកាសចេញក្នុងឆ្នាំ ២០២០ ហើយខាងក្រោមនេះគឺជារថយន្ត SUV និងរថយន្តភីកអាប់ដែលមានគេទន្ទឹងរង់ចាំច្រើនបំផុត។

១. GMC Hummer EV

រថយន្តនេះនឹងចេញលក់មុនគេនូវប្រភេទ Hummer EV Edition 1 ដែលម៉ូទ័រអគ្គិសនីចំនួនបីរបស់វាអាចផលិតកម្លាំងបានសរុបរហូតដល់ ១ពាន់សេះ អាចឲ្យរថយន្តនេះស្ទុះពី ០-៩៦គ.ម/ម៉ ក្នុងពេលត្រឹម ៣វិនាទីប៉ុណ្ណោះ។

Hummer EV Edition 1 នឹងចាប់ផ្ដើមបញ្ចេញលក់នៅអំឡុងចុងឆ្នាំ ២០២១ ដែលវាមានតម្លៃចាប់ផ្ដើមពី ១១៣ ០០០ដុល្លារ។

២. BMW iX

វាគឺជារថយន្ត SUV អគ្គិសនីដែលអាចបើកបរបានចម្ងាយដល់ ៤៨២គីឡូម៉ែត្រ ពេលសាកភ្លើងពេញ។ បើតាមគម្រោងការ BMW iX នឹងចូលរោងចក្រផលិតនៅប្រទេសអាល្លឺម៉ង់ ហើយចេញលក់ចាប់ពីឆមាសទីពីរឆ្នាំ ២០២១ ដោយមានតម្លៃរំពឹងទុក ៧៥ ០០០ដុល្លារ។

៣. Ford Bronco

Ford Bronco នេះបានបង្ហាញវត្តមានដោយទទួលបានលទ្ធផលវិជ្ជមានជាច្រើន។ ក្នុងរយៈពេលដ៏ខ្លីប៉ុណ្ណោះមានអ្នកកុម្ម៉ង់ទិញរហូតដល់ជាង ២៣ម៉ឺននាក់ ហើយរថយន្តនេះរំពឹងថានឹងបញ្ចេញលក់ចាប់ពីដើមឆ្នាំក្រោយ ជាមួយតម្លៃចាប់ពី ២៨ ៥០០ដុល្លារ។

៤. Genesis GV70

GV70 ដែលជាសិស្សប្អូនរបស់ GV80 រំពឹងថានឹងបញ្ចេញលក់លើទីផ្សារនៅអំឡុងត្រីមាសទី៣នៃឆ្នាំ ២០២១ ដោយវានឹងមានតម្លៃចាប់ពី ៤២ ៥០០ដុល្លារ។

៥. Nissan Ariya

រថយន្តអគ្គិសនីដែលអាចបើកបរបានចម្ងាយ ៤៨២គីឡូម៉ែត្រមួយនេះ រំពឹងថានឹងចេញលក់នៅទីផ្សារជប៉ុនក្នុងអំឡុងចុងឆ្នាំ ២០២១ ជាមួយតម្លៃចាប់ពី ៤ម៉ឺនដុល្លារ៕

ផ្ទាំងផ្សាយពាណិជ្ជកម្ម

បែកធ្លាយតម្លៃឡាន Jeep Wrangler ប្រើម៉ាស៊ីន៨ ឆ្នាំ២០២១

December 31, 2020

បង្ហាញខ្លួនកាលពីឆ្នាំមុន និងត្រូវបានកំណត់ឲ្យចេញលក់នៅសហរដ្ឋអាមេរិក នាដើមឆ្នាំក្រោយ Jeep Wrangler Rubicon 392 គឺជារថយន្តត្រកូល Wrangler ដែលមានកម្លាំងខ្លាំងបំផុត មានលក់នាពេលបច្ចុប្បន្ន។

យ៉ាងណាក៏ដោយ បើយោងតាមការបែកធ្លាយមួយបានបង្ហាញថា រថយន្ត Jeep Wrangler Rubicon 392 នេះមានតម្លៃចាប់ពី ៧៧ ០៥៥ដុល្លារ។ បើសិនជាការពិតមែន នោះវានឹងមានតម្លៃថ្លៃជាង Wrangler Rubicon ធម្មតាដល់ទៅជិត ៣៥ ០០០ដុល្លារឯណោះ ព្រោះថាប្រភេទ Base Model មានតម្លៃចាប់ពីត្រឹម ២៨ ៣១៥ដុល្លារប៉ុណ្ណោះ។

គួរឲ្យដឹងថា Wrangler Rubicon 392 មានបំពាក់ម៉ាស៊ីនចំណុះ ៦,៤លីត្រ Hemi V8 មានកម្លាំងរហូតដល់ទៅ ៤៧០សេះ ដំណើរការដោយប្រអប់លេខអូតូ ៨វគ្គ និងប៉ុងពីរ។ រថយន្តនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៤,៥វិនាទី។

មិនតែប៉ុណ្ណោះ Wrangler Rubicon 392 ក៏មានកម្ពស់ខ្ពស់ជាង Wrangler ធម្មតា ៥ សង់ទីម៉ែត្រ ដោយមានបាតឈរផុតពីដីកម្ពស់ ២៦ សង់ទីម៉ែត្រ និងអាចលយទឹកបានជម្រៅ ៨២,៥សង់ទីម៉ែត្រ។ លើសពីនេះទៅទៀតនោះ វាបានប្រើប្រព័ន្ធបូមពិសេស, យ៉ាន់ ១៧អ៊ីញ និងសម្បកកង់ ៣៣អ៊ីញ, រន្ធបឺតខ្យល់លើគម្របម៉ាស៊ីន និងបំពង់ស៊ីម៉ាំង ៤ ទៀតផង៕

ផ្ទាំងផ្សាយពាណិជ្ជកម្ម

Honda Civic Type R ប៉ះឡាន Toyota GR Yaris បានត្រឹមហិតផ្សែង (មានវីដេអូ)

December 31, 2020

Toyota GR Yaris គឺជារថយន្តខ្នាតតូចដែលទទួលបានការចាប់អារម្មណ៍ខ្លាំងមួយ ពីសំណាក់អ្នកនិយមចូលចិត្តរថយន្ត ដោយសារតែវាមានរូបរាងស្រស់ស្អាត ហើយដំណើរការក៏មិនណយដែរ ខណៈវាគឺជាគូប្រជែងរបស់ Honda Civic Type R។

រថយន្ត Toyota GR Yaris មានបំពាក់ម៉ាស៊ីនសាំងចំណុះ ១,៣លីត្រ turbocharged ទំហំ ៣ ស៊ីឡាំង មានកម្លាំង ២៦៨ សេះ ដំណើរការដោយប្រអប់លេខដៃ ៦វគ្គ និងប្រព័ន្ធប៉ុងពីរ AWD។

ចំណែកឯរថយន្ត Honda Civic Type R វិញ មានបំពាក់ម៉ាស៊ីនសាំងចំណុះ ២,០លីត្រ turbocharged ទំហំ ៤ ស៊ីឡាំង មានកម្លាំង ៣០៦សេះ ដំណើរការប្រអប់លេខដៃ ៦វគ្គ និងប្រព័ន្ធប៉ុងមួយវិលកងមុខ FWD៕

ចង់ដឹងយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

ឡាន SUV ២ម៉ូឌែលរបស់ Honda នឹងឈប់លក់នៅរុស្ស៊ីនៅឆ្នាំ ២០២២

December 31, 2020

ក្រុមហ៊ុន Honda បានសម្រេចចិត្តថា ខ្លួននឹងបញ្ឈប់ការផ្គត់ផ្គង់រថយន្តថ្មីៗ ដល់អ្នកចែកចាយផ្លូវការរបស់ខ្លួននៅក្នុងប្រទេសរុស្ស៊ី នៅឆ្នាំ ២០២២ ដើម្បីរៀបចំរចនាសម្ព័ន្ធប្រតិបត្ដិការជាសកលរបស់ខ្លួនឡើងវិញក្នុងពេលមានជំងឺរាតត្បាតជាសកល។ បច្ចុប្បន្នក្រុមហ៊ុន Honda លក់តែ ២ ម៉ូឌែលប៉ុណ្ណោះនៅប្រទេសរុស្ស៊ី ហើយទាំងពីរម៉ូដែលនេះជាប្រភេទរថយន្ត SUV (CR-V និង Pilot) ប៉ុន្តែយីហោជប៉ុននេះ នឹងនៅតែមានវត្តមាននៅក្នុងទីផ្សាររុស្ស៊ី ក្នុងការលក់ម៉ូតូ និងឧបករណ៍ ប្រភេទថាមពល។ បន្ថែមពីនេះ ពួកគេក៏នឹងរក្សាសកម្មភាពដែលទាក់ទង នឹងសេវាកម្មក្រោយពេលលក់រថយន្ត(after-sale service)របស់ខ្លួនផងដែរ។

ក្រុមហ៊ុន Honda ពុំមានរោងចក្រផលិតនៅប្រទេសរុស្ស៊ី ដូចក្រុមហ៊ុន Toyota និង Nissanឡើយ ហើយកាលពីខែមុនពួកគេលក់បានតែ ៧៩ គ្រឿងដែលមានការធ្លាក់ចុះ ៥០% បើប្រៀបធៀបទៅនឹង ២០១៩។ លើសពីនេះទៀតការលក់សរុបរបស់ខ្លួននៅក្នុងប្រទេសរុស្ស៊ីក្នុងឆ្នាំនេះ គិតត្រឹមខែវិច្ឆិកាបានធ្លាក់ចុះ ១៥% ស្មើនឹង ១ ៣៨៣ គ្រឿង។

លើសពីនេះ សម្រាប់ផែនការរបស់ Honda សម្រាប់អឺរ៉ុបក៏បានលើកឡើងផងដែរ នូវការកាត់បន្ថយការប្រើប្រាស់ ប្រេងសាំង និងប្រេងម៉ាស៊ូតនៅត្រឹមឆ្នាំ ២០២៣ ដោយប្រើប្រាស់ម៉ូទ័រអគ្គិសនី ឬប្រភេទHybridជំនួសវិញ ហើយការផលិតរថយន្តអគ្គិសនីពេញលេញ ក្រុមហ៊ុនមិនទាន់ត្រៀមខ្លួនក្នុងការផលិត រថយន្តប្រភេទអគ្គិសនីសុទ្ធនៅឡើយទេ ដោយសាររថយន្តប្រភេទអគ្គិសនី មានតម្លៃថ្លៃជាង រថយន្តប្រភេទធម្មតា ៣០ ទៅ ៥០ភាគរយ៕

ផ្ទាំងផ្សាយពាណិជ្ជកម្ម

មើលការទម្លាក់ឡាន Lamborghini Sian មួយគ្រឿងដំបូងគេបំផុត

December 30, 2020

រថយន្ត Lamborghini Sian មួយគ្រឿងដំបូងគេបានធ្វើដំណើរទៅដល់ទ្វីបអាមេរិកខាងជើង មុនពិធីបុណ្យគ្រីស្មាស់តែម្ដង។

Lamborghini បានបង្ហាញចេញរថយន្ត Sian ជាលើកដំបូងតាំងពីខែកញ្ញា ឆ្នាំ ២០១៩ ដែលវាជាផលិតឡើងផ្អែកតាមរថយន្ត Aventador។ រថយន្តមួយគ្រឿងដែលចេញពីរោងចក្រមុនគេគឺមានពណ៌ខាងក្រៅពណ៌ទឹកក្រូចដែលពណ៌នេះមានឈ្មោះថា Arancio Atlas ហើយមានគួបផ្សំដោយផ្នែកសរសៃកាបូនភ្លឺរលោងជាច្រើនផងដែរ។

រថយន្ត Sian នេះគឺមានដំណើរការដោយម៉ាស៊ីនចំណុះ ៦,៥លីត្រ មានចំនួន ១២ស៊ីឡាំង ដែលភ្ជាប់នឹងប្រព័ន្ធ Hybrid ធ្វើឲ្យកម្លាំងសរុបមានដល់ ៨០៨សេះ។ ប្រព័ន្ធ Hybrid លើរថយន្តនេះគឺមានម៉ូទ័រអគ្គិសនីកម្លាំង ៣៤សេះ បំពាក់លើប្រអប់លេខដែលអាចជួយឲ្យមានការឆ្លើយតបបានរហ័ស និងសមត្ថភាពខ្លាំងជាងមុនផងដែរ។

Lamborghini អះអាងថារថយន្ត Sian នេះអាចស្ទុះពី ០-១០០គ.ម/ម៉ ដោយប្រើពេលមិនដល់ ២,៨វិនាទី ជាមួយល្បឿនអតិបរមា ៣៥០គ.ម/ម៉។ រថយន្តនេះដែរគឺមានផលិតត្រឹម ៦៣គ្រឿងប៉ុណ្ណោះក្នុងលោក៕

ផ្ទាំងផ្សាយពាណិជ្ជកម្ម

Ford Ranger ផលិតនៅវៀតណាម នឹងចាប់ផ្ដើមលក់លើទីផ្សារពាក់កណ្ដាលឆ្នាំក្រោយ

December 30, 2020

រថយន្តភីកអាប់ដែលលក់ដាច់ជាងគេនៅទីផ្សារវៀតណាម នឹងផ្លាស់ប្ដូរពីនាំចូលមកពីប្រទេសថៃ មកដំឡើងក្នុងស្រុកវិញចាប់ផ្ដើមពីពាក់កណ្ដាលឆ្នាំ ២០២១ ខាងមុខនេះ។

ការបញ្ជាក់ពីអ្នកចាត់ការរបស់ Ford Vietnam បានឲ្យដឹងថានាពេលបច្ចុប្បន្ននេះរោងចក្រនៅ Hai Doung កំពុងបិទបញ្ចប់ការដំឡើងសង្វាក់ផលិតកម្ម ដើម្បីត្រៀមចាប់ផ្ដើមបើកដំណើរការការផលិត។

រថយន្ត Ford Ranger ដែលនាំចូលមកទីផ្សារវៀតណាម គឺមានដំឡើងនៅប្រទេសថៃ ហើយសម្រាប់ម៉ូដែលដែលដំឡើងក្នុងស្រុកផ្ទាល់នេះ រំពឹងថានឹងមានតម្លៃធូរថ្លៃជាងប្រភេទដែលនាំចូល។

បច្ចុប្បន្ននេះ Ford មានរោងចក្រផលិតរថយន្តពីរប៉ុណ្ណោះនៅអាស៊ានគឺនៅប្រទេសថៃ និងប្រទេសវៀតណាម។ Ford ចង់ផ្ទេរការផលិតពីប្រទេសថៃទៅប្រទេសវៀតណាមខ្លះៗដោយចាប់ផ្ដើមជាមួយរថយន្ត Ranger ទៅ៕

ផ្ទាំងផ្សាយពាណិជ្ជកម្ម

តោះបងប្អូនមកមើល បណ្តុំរថយន្តប្រណីតៗ របស់មហាសេដ្ឋីអាយុ ២៩ឆ្នាំម្នាក់

December 30, 2020

Piyush Nagar គឺជាជនជាតិឥណ្ឌាដែលរស់នៅក្នុងទីក្រុងឌូបៃ ដែលជាម្ចាស់នៃរថយន្តប្រណីតៗ បំផុតមួយនៅលើពិភពលោក។ កាលពីអាយុ ២៣ ឆ្នាំ Nagar បានទទួលបន្ទុកអាជីវកម្មពីគ្រួសារ ដែលជាអាជីវកម្មដ៏ធំមួយនៅក្នុងវិស័យ Petrochemical real estate, អាហារ និងភេសជ្ជៈ។

បណ្តុំនៃម៉ាករថយន្តប្រណីតរបស់ Piyush Nagar រួមមាន Rolls-Royce, Bentley, Lamborghini, McLaren និងម៉ូឌែលប្រភេទស្ព័រថ្លៃៗ ជាច្រើនទៀត។ ហើយក្នុងចំណោមរថយន្ត Rolls-Royce ទាំង១០ គ្រឿងរួមមាន Phantom series VII, Phantom series VIII LWB, Phantom series VIII, Dawn, Cullinan, Ghost, Wraith Black Badge… គឺពាក់ស្លាកលេខដែលផ្តើមដោយលេខ៩។

Rolls-Royce

Ferrari

Bentley

McLaren

Lamborghini

Mercedes G-class

ផ្ទាំងផ្សាយពាណិជ្ជកម្ម

Mitsubishi ចាប់ផ្តើមផលិតរថយន្ត SUV ៧កៅអីរបស់ខ្លួន ក្នុងតំបន់អាស៊ីអាគ្នេយ៍

December 30, 2020

ក្រុមហ៊ុន Mitsubishi បានប្រកាសអំពីការចាប់ផ្តើមផលិតកម្ម ផលិតរថយន្ត Outlander PHEV នៅក្នុងប្រទេសថៃ ដែលជាកន្លែងផលិតរថយន្តនេះ សម្រាប់ទីផ្សារតំបន់អាស៊ីអាគ្នេយ៍។ ប្រទេសថៃ គឺជាប្រទេសដំបូងផងដែរ ដែលនឹងផលិតរថយន្ត Outlander PHEV របស់ក្រុមហ៊ុន Mitsubishi នៅក្រៅប្រទេសជប៉ុន។

យោងតាមក្រុមហ៊ុនជប៉ុន មូលហេតុចម្បងសម្រាប់ផលិតកម្មក្នុងស្រុក គឺដោយសារនៅក្នុងទីផ្សារថៃមានកំណើនសក្តានុពលខ្ពស់ ដោយយានយន្តដែលផលិតនៅក្នុងប្រទេសនេះត្រូវបានគេរំពឹងថានឹងត្រូវបាននាំចេញទៅប្រទេសដទៃទៀតនៅក្នុងតំបន់។ ហើយសម្រាប់រថយន្តគ្រឿងដំបូង ដែលនឹងប្រគល់ជូនអតិថិជននៅប្រទេសថៃ ត្រូវបានគេរំពឹងថានឹងប្រព្រឹត្តទៅនៅខែមករាឆ្នាំ២០២១នេះ។

រថយន្ត Outlander PHEV បំពាក់ជាមួយម៉ាស៊ីនសាំងចំណុះ ២,៤លីត្រ និងម៉ូទ័រអគ្គិសនី ២។ ហើយសម្រាប់តម្លៃនៅក្នុងទីផ្សារប្រទេសថៃគឺ គេរំពឹងថានឹងមានតម្លៃចាប់ពី ៥៤ ៤០០ដុល្លារ ទៅ ៥៨ ០០០ដុល្លារ៕

ផ្ទាំងផ្សាយពាណិជ្ជកម្ម