មេ Toyota ហាក់មិនពេញចិត្តនឹងការផ្លាស់ប្ដូរទៅប្រើឡានអគ្គិសនីប៉ុន្មានឡើយ

December 21, 2020

បើតាមការចុះផ្សាយរបស់ Wall Street Journal បានឲ្យដឹងថាលោក Akio Toyoda នាយកប្រតិបត្តិក្រុមហ៊ុន Toyota ហាក់មិនពេញចិត្តនឹងរថយន្តអគ្គិសនីប៉ុន្មានឡើយ។

ក្នុងកិច្ចប្រជុំមួយកាលពីសប្ដាហ៍មុន លោក Toyoda បាននិយាយថា ៖ “ម៉ូដែលអាជីវកម្មបច្ចុប្បន្ននៃឧស្សាហកម្មយានយន្តនឹងត្រូវដួលរលំ។ ពេលណាយើងផលិតឡើងអគ្គិសនីកាន់តែច្រើន ក៏មិនមានការបញ្ចេញឧស្ម័នកាបូនឌីអុកស៊ីតកាន់តែច្រើនដែរ…ពេលដែលអ្នកនយោបាយនិយាយថា «យើងនាំគ្នាលុបបំបាត់រថយន្តប្រើប្រាស់ថាមពលប្រេងឥន្ធនៈ» តើពួកគេមានយល់អំពីចំណុចនេះទេ?”

ការលើកឡើងរបស់លោក Toyoda ដែលបង្ហាញនូវគំនិតអវិជ្ជមានចំពោះរថយន្តអគ្គិសនីនេះ បានធ្វើឡើងក្រោយពីរដ្ឋាភិបាលជប៉ុនបានប្រកាសអំពីផែនការដែលអាចនាំឲ្យមានការហាមឃាត់មិនឲ្យលក់រថយន្តប្រើថាមពលប្រេងឥន្ធនៈនៅត្រឹមឆ្នាំ ២០៣០៕

ផ្ទាំងផ្សាយពាណិជ្ជកម្ម

ឡាន Porsche Taycan កាន់តែពេញនិយមខ្លាំងហើយនៅអាមេរិក

December 21, 2020

ចាប់តាំងពីការចេញលក់នៅខែធ្នូឆ្នាំមុនមក តម្រូវការរថយន្តអគ្គិសនី Porsche Taycan មានខ្ពស់គួរឲ្យភ្ញាក់ផ្អើល ដោយនៅសហរដ្ឋអាមេរិកវាអាចលក់ចេញបានលើសពី ៤ពាន់គ្រឿងហើយ។

នៅត្រីមាសទី៣ នៃឆ្នាំ ២០២០ នេះ រថយន្ត Porsche Taycan បានក្លាយជារថយន្តលក់ដាច់ជាងគេលំដាប់ទី៣ របស់ Porsche លើទីផ្សារអាមេរិក ដែលលក់បានច្រើនជាងរថយន្ត 911 ប៉ុន្តែនៅចាញ់រថយន្ត Macan និង Cayenne នៅឡើយ។ អាចចាត់ទុកថាជាលទ្ធផលដ៏ល្អមួយ ដោយសារការផលិតរថយន្ត Taycan ត្រូវបានបិទអំឡុងពេលផ្ទុះជំងឺកូវីដ១៩ ធ្វើឲ្យមានការយឺតយ៉ាវរាប់សប្ដាហ៍។

រថយន្ត Taycan ក៏បានជួយឲ្យម៉ាក Porsche ទទួលបានអតិថិជនថ្មីៗច្រើនផងដែរ។ បើតាមការឲ្យដឹងពី Porsche មានមួយភាគបីនៃម្ចាស់រថយន្ត Porsche Taycan គឺជាអ្នកប្ដូរមកពីម៉ាករថយន្តផ្សេង៕

ផ្ទាំងផ្សាយពាណិជ្ជកម្ម

នេះហើយជាឡាន Aston Martin DBS Superleggera Concorde គ្រឿងទី១ ក្នុងចំណោម១០គ្រឿងលើលោក

December 21, 2020

ក្រុមហ៊ុន Aston Martin បានចាប់ផ្តើមសង្វាក់ផលិតកម្មនៃរថយន្ត DBS Superleggera Concorde ហើយ ពោលគឺរយៈពេលជាង ១ឆ្នាំ បន្ទាប់ពីដាក់បង្ហាញវាជាផ្លូវការ។

ទោះជាយ៉ាងណាក៏ ដោយក្រុមហ៊ុនមិនបានបញ្ជាក់ពីមូលហេតុ ដែលធ្វើឲ្យខ្លួនចាយពេលយូរយ៉ាងនេះឡើយ ប៉ុន្តែជំងឺឆ្លងរាតត្បាតកូវីដ១៩ ក៏អាចជាមូលហេតុដែរ។

រថយន្ត Aston Martin DBS Superleggera Concorde គ្រឿងទី១ ក្នុងចំណោម ១០គ្រឿងនេះ មានតួខ្លួនពណ៌ស រំលេចដោយដំបូលពណ៌ខ្មៅ និងក្រហម។ ក្នុងនោះគេក៏លេងតែមទង់ជាតិចក្រភពអង់គ្លេសលើខ្លួនរបស់វាផងដែរ។

រថយន្តម៉ូដែលពិសេសផលិតមានចំនួនកំណត់នេះ នៅតែបំពាក់ម៉ាស៊ីន twin-turbocharged ចំណុះ ៥,២លីត្រ V12 មានកម្លាំង ៧១៥សេះ អាចរត់ស្ទុះពីកុងទ័រ ០-១០០គីឡូម៉ែត្រ ប្រើពេល ៣,៤វិនាទី ហើយមានល្បឿនអតិបរមា ៣៤០គីឡូម៉ែត្រក្នុងមួយម៉ោង។

គួរឲ្យដឹងថា នៅពេលដាក់បង្ហាញរថយន្ត DBS Superleggera Concorde កាលពីឆ្នាំ២០១៩ ក្រុមហ៊ុន Aston Martin បានអះអាងថា ចំណូលពីការលក់រថយន្តនីមួយៗ នឹងផ្តល់ទៅឲ្យអង្គការមិនរកប្រាក់កម្រៃ ដែលជួយដល់កុមារ និងបង្រៀនពួកគេឲ្យបើកយន្តហោះ៕

ផ្ទាំងផ្សាយពាណិជ្ជកម្ម

Honda ចេញលក់ Civic Type R ២០២១ ថ្លៃជាងមុន ២ពាន់ដុល្លារ

December 21, 2020

រថយន្ត Honda Civic Type R ស៊េរីឆ្នាំ២០២១ បានចេញលក់ជាផ្លូវការនៅក្នុងប្រទេសអូស្ត្រាលី ដោយទទួលបានការអាប់ដេត ដូចទៅនឹងទីផ្សារដទៃទៀតដែរ។

ចំណុចអាប់ដេតសំខាន់បំផុតសម្រាប់ Civic Type R ឆ្នាំ២០២១ គឺ Software ថ្មី សម្រាប់ប្រព័ន្ធបូម Adaptive Damper System ដែលវាយតម្លៃស្ថានភាពផ្លូវបានលឿនជាងមុន ១០ដង ជួយឲ្យការបើកបរកាន់តែប្រសើរជាងមុន។

រថយន្តប្រភេទ Hatchback នេះមានបំពាក់ម៉ាស៊ីនសាំងចំណុះ ២,០លីត្រ turbocharged VTEC ទំហំ ៤ស៊ីឡាំង មានកម្លាំងរហូតដល់ទៅ ៣០៦សេះ ដូចទៅនឹងស៊េរីមុនៗដែរ ហើយដំណើរការដោយប្រអប់លេខដៃ ៦វគ្គ និងប៉ុងមួយវិលកង់មុខ។

Civic Type R ២០២១ បានបំពាក់ចង្កឹះលេខថ្មី ព្រមទាំងមុខងារ Active Sound Control ដែលជួយឲ្យសំឡេងម៉ាស៊ីនកាន់តែពិរោះ នៅពេលប្រើ Sport និង +R Mode។

ចំពោះទីផ្សារប្រទេសអូស្ត្រាលី រថយន្តនេះមានតម្លៃចាប់ពី ៥៤ ៩៩០ដុល្លារអូស្ត្រាលី ឬ ៤១ ៨០០ដុល្លារអាមេរិក ពោលគឺថ្លៃជាងស៊េរីមុន ៣ ០០០ដុល្លារអូស្ត្រាលី ឬ ២ ២៨០ដុល្លារអាមេរិក៕

ផ្ទាំងផ្សាយពាណិជ្ជកម្ម

Hyundai Santa Fe ២០២១ ចេញលក់ផ្លូវការនៅអូស្ត្រាលី មានម៉ាស៊ីន ២ជម្រើស

December 20, 2020

រថយន្ត Hyundai Santa Fe ២០២១ ដែលបានធ្វើការផ្លាស់ប្តូររូបរាងថ្មី ចាប់ផ្តើមដាក់លក់ជាផ្លូវការនៅប្រទេសអូស្ត្រាលី មាន៤ប្រភេទសម្រាប់អោយអតិថិជនជ្រើសរើស។ រថយន្ត Santa Fe ប្រភេទធម្មតាមានតម្លៃចាប់ពី ៣៣ ៦៣០ដុល្លារ ម៉ាស៊ីនសាំង ៣,៦លីត្រ ៦ស៊ីឡាំង ថាមពលកម្លាំង ២៦៨សេះ កម្លាំងបង្វិល ៣៣២ញ៉ូតុនម៉ែត្រ និងម៉ាស៊ីនម៉ាស៊ូត ២,២លីត្រ ថាមពលកម្លាំង ១៩៨សេះ និងកម្លាំងបង្វិល ៤៤០ញ៉ូតុនម៉ែត្រ។ ម៉ាស៊ីនសាំង បំពាក់ជាមួយប្រអប់លេខអូតូ ៨វគ្គ រីឯម៉ាស៊ីនម៉ាស៊ូត ៨វគ្គ Dual-Clutch (លេខដៃ និងអូតូ) តម្លៃចាប់ពី ៣៦ ២៦៤ដុល្លារ។

ចំពោះប្រភេទលើនេះបន្តិច Santa Fe Active មានជម្រើសម៉ាស៊ីនសាំង និងម៉ាស៊ូតដែលមានតម្លៃចាប់ពី ៣៦ ៣៣៩ដុល្លារ ដល់ ៣៨ ៩៧២ដុល្លារ។ ប្រភេទ Elite វិញ មា៉ស៊ីនសាំងមានតម្លៃចាប់ពី ៤០ ៨៥៣ដុល្លារ និងម៉ាស៊ីនម៉ាស៊ូតតម្លៃ ៤៣ ៤៨៦ដុល្លារ និងប្រភេទខ្ពស់ជាងគេ Highlander មានតម្លៃចាប់ពី ៤៧ ០៣៧ដុល្លារ (សាំង) និង ៤៩ ៧០៥ដុល្លារ (ម៉ាស៊ូត)។

ចំពោះលក្ខណៈពិសេសសម្រាប់ប្រភេទកំរឹតទាបមានបំពាក់ប្រព័ន្ធកម្សាន្តទំហំ ៨អុីញ មានមុខងារ Apple CarPlay និង Android Auto ជាមួយកាំមេរ៉ា មើលក្រោយ ប្រព័ន្ធរក្សាកម្លាតគ្រោះថ្នាក់ពេលចូលចំណត ប្រព័ន្ធតាមដានសម្ពាធខ្សល់កង់រថយន្ត និងប្រព័ន្ធកញ្ចប់សុវត្ថិភាព SmartSense ដែលមានមុខងារ Forward Collision-Avoidance Assist with Junction Turning, Driver Attention Warning និង Blind-Spot Collision Avoidance-Assist។ ធៀបជាមួយប្រភេទ Highlander បំពាក់ជាមួយអេក្រង់កុងទ័រទំហំ ១២,៣អុីញ ប្រព័ន្ធកម្សាន្តទំហំ ១០,២៥អុីញ ឧបករណ៌ប្រព័ន្ធសម្លេងប្រភេទ Harmon Kardon កៅអីស្បែកបញ្ជេារកម្តៅ ឬត្រជាក់ និងមុខងារទំនើបជាច្រើនទៀត។

ផ្ទាំងផ្សាយពាណិជ្ជកម្ម

យក Honda Civic ២០០៩ ច្នៃទៅជា Lamborghini Aventador (មានវីដេអូ)

December 20, 2020

គំនិតនៃការការច្នៃចម្លងម៉ូដរថយន្តណាមួយ វាតែងតែធ្វើអោយមនុស្សមានការយល់ច្រលំ ហើយហេតុផលមួយដ៏ល្អគឺដោយសារតែវាបង្កើតមកពិតជាគួរឱ្យរន្ធត់ណាស់។ ជាក់ស្តែងដូចជារថយន្តមួយគ្រឿងដែលត្រូវបានគេថតបានកាលពីពេលថ្មីនេះៗ នៅប្រទេសឥណ្ឌា គឺរថយន្តចម្លងម៉ូដតាម Lamborghini Aventador នេះចឹងដែរ។

Aventador នេះត្រូវបានបង្កើតឡើងដោយក្រុមហ៊ុនក្នុងស្រុកមួយឈ្មោះ Executive Mod Trendz មានទីតាំងនៅទីក្រុង Mumbai។ វាត្រូវបានកើតឡើងជារឿយ ដែលមានការចម្លងម៉ូដនេះត្រូវបានផលិតឡើង ក្នុងតម្លៃសមរម្យ ដោយយកម៉ាស៊ីនឡានស្ព័រកម្រឹតមធ្យមពីរថយន្ត Pontiac Fiero ត្រូវបានកែច្នៃលើរថយន្ត Honda Civic ឆ្នាំ ២០០៩ ប្រភេទម៉ាស៊ីនមុខ វិលកង់មុខ។

ដូចនេះហើយ បង្គុំនៃរថយន្តចម្លងម៉ូដ Aventador វាមើលទៅមិនដូចជារបស់ពិតនោះទេ។ ជាក់ស្តែង នៅក្នុងវីដេអូដែលថតបានពេលកំពុងបើកបរលើផ្លូវ ប្រទេសឥណ្ឌា បានបង្ហាញថាវាខុសពីរថយន្តពិតត្រង់ដំបូលខ្ពស់ជាង។ ទោះជាយ៉ាងនេះក្តី វាមានចំណុចខ្លះដែលមើលទៅដូចរថយន្តពិតផងដែរ ដូចជា ចង្កៀងមុខ ភ្លើងអំពូលស៊ីញ៉ូក្រោយ តែវានៅតែជា Lamborghini ក្លែងក្លាយដដែល។ អ្នកកែច្នៃ មិនមែនធ្វើនៅលើតែផ្នែកខាងក្រៅនោះទេ ប៉ុន្តែផ្នែកខាងក្នុងក៏បានបំពាក់តាម Aventador រំលេចកៅអីស្បែកពណ៌ទឹកក្រូច តាប្លូ និងដៃចង្កូត។ កាន់តែស្រដៀងទៀតនោះគឺកន្លែង Center Console ហើយដៃចង្កូតមានឡូហ្គូរបស់ Lamborghini។

ផ្ទាំងផ្សាយពាណិជ្ជកម្ម

Porsche ដាក់ដំណើរការប្រព័ន្ធលក់ឡានតាមអនឡាញនៅប្រទេសអឺរ៉ុបជាច្រើន

December 19, 2020

ក្រោយពីទទួលបានជោគជ័យក្នុងការសាកល្បងនៅប្រទេសអាល្លឺម៉ង់កាលពីឆ្នាំមុនរួចមក នាពេលនេះ Porsche បានដាក់ដំណើរការប្រព័ន្ធលក់រថយន្តបែបឌីជីថលនៅក្នុងប្រទេសចំនួន ៨ទៀតនៅអឺរ៉ុប។

នេះមានន័យថាអតិថិជននៅអេស្ប៉ាញ, ព័រទុយហ្គាល់, ស្វីស, អ៊ីតាលី, បារាំង, ប៉ូឡូញ, ស្លូវើនៀ និងអេស្តូនី នាពេលនេះអាចទិញរថយន្ត Porsche ថ្មីឬមួយទឹក តាមអនឡាញបានដោយគ្រាន់តែអង្គុយយ៉ាងស្រួលលើសាឡុង លើគ្រែគេង ឬនៅការិយាល័យ។ ចក្រភពអង់គ្លេសអាចនឹងជាប្រទេសបន្ទាប់ដែលនឹងដាក់ដំណើរការសេវានេះ។

ដោយអាស្រ័យលើទីផ្សារ ការលក់រថយន្តអាចនឹងធ្វើឡើងតាមអនឡាញឲ្យបានច្រើនដងតាមដែលអាចទៅរួច ដោយអតិថិជនអាចឲ្យមានការដឹកជញ្ជូនរថយន្តទៅដល់ផ្ទះរបស់ពួកគេផ្ទាល់ មិនចាំបាច់ទៅដល់ហាងលក់ឡើយ៕

ផ្ទាំងផ្សាយពាណិជ្ជកម្ម

ឡាន Ferrari ពាសដែក តម្លៃខ្ទង់ ៦០ម៉ឺនដុល្លារ

December 19, 2020

ក្រុមហ៊ុនមួយឈ្មោះថា AddAmor បានបង្ហាញនូវរថយន្ត Ferrari 458 Speciale ដ៏ពិសេសមួយ ដែលមានការពាសដែកផ្នែកខាងក្រៅ មើលទៅប្រៀបដូចជារថយន្តធម្មតាអ៊ីចឹង។

AddAmor បានបំពាក់នូវប្រព័ន្ធការពារកម្រិត B4 លើរថយន្តអ៊ីតាលីមហាកម្លាំង ដែលវាអាចធន់នឹងគាប់កាំភ្លើងខ្លី រួមទាំងគ្រាប់កាំភ្លើង .44 Magnum ផងដែរ។ ការពាសដែកការពារលើរថយន្តនេះដែរ បានបន្ថែមទម្ងន់ត្រឹម ៧០គីឡូក្រាមប៉ុណ្ណោះលើរថយន្ត ដោយសារគេបានប្រើប្រាស់វត្ថុធាតុពិសេសដែលមានភាពរឹងមាំជាងដែកធម្មតា១០ដង ប៉ុន្តែស្រាលជាង ៦០%។

បន្ថែមពីនេះគេបានជ្រើសរើសប្រើប្រាស់វត្ថុធាតុស្រាលៗជាច្រើនទៀតលើរថយន្ត ជាមួយការបំពាក់នូវ Option ប្រភេទសរសៃកាបូនគ្រប់ប្រភេទដែល Ferrari មានផ្ដល់ជូនសម្រាប់រថយន្ត 458 Speciale និងប្រើបំពង់ស៊ីមាំង Capristo ដែលមានទម្ងន់ស្រាលផងដែរ។ នេះមានន័យថាទម្ងន់រថយន្តក្រោយពាសដែករួចគឺធ្ងន់ជាងធម្មតា ៣០គីឡូក្រាម ហើយតាមរយៈប្រព័ន្ធបំពង់ស៊ីមាំងដែលជួយបន្ថែមកម្លាំង ៤០សេះទៀត មានន័យថាការឡើងទម្ងន់នេះពិបាកនឹងមើលដឹងណាស់។

ក្រុមហ៊ុន AddAmor មិនបានបញ្ជាក់ថាបានចំណាយទឹកប្រាក់អស់ប៉ុន្មានសម្រាប់ការកែច្នៃរថយន្ត 458 Speciale នេះដែរ ប៉ុន្តែបាននិយាយថាវាមានតម្លៃប្រមាណ ៦២៥ ០០០ដុល្លារ៕

ផ្ទាំងផ្សាយពាណិជ្ជកម្ម

ភីកអាប់ Ram 1500 TRX ចូលរោងចក្រផលិតហើយ ខណៈគ្រឿងទី១ ទោះមានលុយ ក៏មិនប្រាកដទិញបាន

December 19, 2020

Ram 1500 TRX គឺជារថយន្តភីកអាប់ដ៏ខ្លាំងក្លាបំផុតមួយ ហើយឥឡូវនេះវាបានចូលខ្សែសង្វាក់ផលិតកម្មជាផ្លូវការហើយ ខណៈគ្រឿងទី១ នៃរថយន្តនេះបានចេញពីរោងចក្រ នៅក្នុងរដ្ឋ Michigan បាត់ទៅហើយ។

រថយន្ត Ram 1500 TRX គ្រឿងទី១ ដែលជាប្រភេទ Launch Edition នោះ នឹងត្រូវយកទៅដាក់លក់ដេញថ្លៃ សម្រាប់ជួយដល់មូនិធិនៅពេលអនាគត។ ទោះជាយ៉ាងណាក៏ដោយ ក្រុមហ៊ុនមិនបានបង្ហាញប្រាប់ពីព័ត៌មានលម្អិតបន្ថែមទៀតឡើយ។

គួរឲ្យដឹងថា Ram 1500 TRX Launch Edition មានតម្លៃ ៩២ ០១០ដុល្លារ ដោយមានតួខ្លួនពណ៌ប្រផេះ Anvil Gray ហើយបំពាក់យ៉ាន់ ១៨អ៊ីញ, សម្បកកង់ ៣៥អ៊ីញ, ដំបូល Panoramic Sunroof និង ប្រព័ន្ធសំឡេង Harman Kardon ១៩គ្រាប់ ជាដើម។

មិនខុសពីម៉ូដែលធម្មតា Launch Edition បំពាក់ម៉ាស៊ីន supercharged ចំណុះ ៦,២លីត្រ V8 មានកម្លាំង ៧០២សេះ ដំណើរការដោយប្រអប់លេខអូតូ ៨វគ្គ និងប៉ុងពីរ។ វាអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹម ៤,៥វិនាទី ហើយមានល្បឿនអតិបរមាដល់ ១៩០គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

ឡានអគ្គិសនី Nissan Leaf ២០២១ ថ្លៃជាងមុនតែ ២០ដុល្លារ

December 19, 2020

ក្រុមហ៊ុន Nissan បានប្រកាសចេញរថយន្តអគ្គិសនី Leaf ស៊េរីឆ្នាំ២០២១ ជាផ្លូវការ សម្រាប់ទីផ្សារសហរដ្ឋអាមេរិក ដោយក្នុងនោះបានកំណត់តម្លៃរបស់វាចាប់ពី ៣១ ៦២០ដុល្លារ ដែលមានន័យថា វាថ្លៃជាងស៊េរីឆ្នាំ២០២០ ត្រឹមតែ ២០ដុល្លារប៉ុណ្ណោះ។

ទោះបីជាយ៉ាងណាក៏ដោយ មិនមានការផ្លាស់ប្តូរធំដុំសម្រាប់រថយន្តអគ្គិសនីមួយនេះឡើយ។ ប៉ុន្តែវាបានបន្ថែមពណ៌ថ្មី ព្រមទាំងបច្ចេកវិទ្យាថ្មី សម្រាប់ស៊េរីឆ្នាំ២០២១ ផងដែរ។ ឥឡូវនេះ មុខងារ Apple CarPlay និង Android Auto ក៏ដូចជា Nissan App ត្រូវបានបំពាក់មកស្តង់ដារតែម្តង។

Nissan Leaf ឆ្នាំ២០២១ ផ្តល់ជម្រើសថាមពលចំនួន ២ គឺ ៤០គីឡូវ៉ាត់ម៉ោង និង ៦២គីឡូវ៉ាត់ម៉ោង ដោយពួកវាអាចសាកដល់ ៨០% ក្នុងរយៈពេល ៤៥នាទីប៉ុណ្ណោះ។ កញ្ចប់អាគុយតូច អាចឲ្យវាបើកបរបានចម្ងាយ ១៥០ម៉ាយ៍ ឬ ២៤០គីឡូម៉ែត្រ ខណៈកញ្ចប់អាគុយធំ អាចបាន ២២៦ម៉ាយ៍ ឬ ៣៦០គីឡូម៉ែត្រ។

ជាមួយគ្នានេះ ប្រភេទ ៤០គីឡូវ៉ាត់ម៉ោង នឹងបំពាក់ម៉ូទ័រអគ្គិសនីមួយ ដែលផ្តល់កម្លាំង ១៤៧សេះ ខណៈ ៦២គីឡូវ៉ាត់ម៉ោង បំពាក់ម៉ូទ័រអគ្គិសនីមួយ ដែលផ្តល់កម្លាំង ២១៤សេះ៕