ក្រុមហ៊ុន Honda បានក្លាយខ្លួនជាក្រុមហ៊ុនផលិតរថយន្តជប៉ុនដំបូងគេ សម្រាប់សេវាកម្មលក់រថយន្តរបស់ខ្លួននៅលើប្រព័ន្ធអនឡាញ ទៅកាន់អតិថិជនក្នុងទឹកដីកំណើតរបស់ខ្លួន។
សេវាកម្មដែលមានឈ្មោះថា Honda ON ត្រូវបានផ្តល់ជូនប្រជាជននៅទីក្រុងតូក្យូជាមួយកិច្ចសន្យាជាវមុន(Subscription Contract Basic) មុនពេលពង្រីកសេវាកម្មនេះទូទាំងប្រទេសជប៉ុនទាំងមូល។ ចំពោះសេវាកម្ម Honda ON នេះត្រូវបានអនុញ្ញាតអោយអតិថិជនបញ្ចប់ដំណើរការទាំងមូលតាមអ៊ីនធឺណេត ចាប់តាំងពីការពិគ្រោះយោបល់រហូតដល់ចុះកិច្ចសន្យា។
តាមរយៈសេវាកម្មនេះ អតិថិជនអាចជ្រើសយកនូវរយៈពេលកិច្ចសន្យារយៈពេល ៣ ឬ ៥ឆ្នាំ សម្រាប់រថយន្ត N-Box, Fit, Freed ឬ Vezel (HR-V)។ ដោយពួកគេនឹងធ្វើការបង់ប្រាក់ប្រចាំខែ ដែលរួមបញ្ជូលទាំងថ្លៃនៃរថយន្ត និងថ្លៃដើមថែទាំង បន្ថែមពីនេះក្រុមហ៊ុនក៏ផ្តល់នូវជម្រើសក្នុងការទិញឡើងវិញ បន្ទាប់ពីកិច្ចសន្យាទិញបានផុតកំណត់។
នៅពេលប្រើប្រាស់សេវាកម្មអតិថិជនអាចជ្រើសរើសថាតើក្រុមហ៊ុនចែកចាយ Honda ក្នុងស្រុកមួយណាដែលពួកគេចង់ឱ្យរថយន្តរបស់ពួកគេត្រូវបានដឹកជញ្ជូន និងថែទាំ។
សម្រាប់តម្លៃនៃការទិញ (Subscription) នេះក្នុងមួយខែបន្ទាប់ពីលើពន្ធរយចរាល់រថយន្ត N-Box ត្រូវបានបង់ចាប់ពី ២៧៩ដុល្លារ, Honda Fit ចាប់ពី ៣៨២ដុល្លារ, Freed ចាប់ពី ៤៣៩ដុល្លារ និង Vezel ចាប់ពី ៤៣៥ដុល្លារ។ គួរបញ្ជាក់ផងដែរថា សេរវាកម្មនេះក៏អាចផ្តល់អោយអតិថិជនរបស់ខ្លួនអាចកំណត់កាលវិភាគក្នុងការបើកបរសាកល្បងផងដែរ៕
