មកមើលរូបរាងឡានវ៉ែនខ្នាតតូចថ្មីរបស់ Hyundai មានលក់តែក្នុងប្រទេសមួយនេះប៉ុណ្ណោះ

August 16, 2021

រូបភាពជាច្រើនសន្លឹកបង្ហាញឲ្យឃើញនូវរថយន្តវ៉ែនខ្នាតតូចថ្មីរបស់ Hyundai ម៉ូដែល Custo ត្រូវបានបែកធ្លាយនៅលើបណ្តាញសង្គមក្នុងប្រទេសចិន មុនពេលវាត្រូវបង្ហាញខ្លួនក្នុងកម្មវិធី Chengdu Auto Show នៅចុងខែនេះ។

រូបភាពថ្មីទាំងនោះបានបង្ហាញឲ្យឃើញពីការឌីហ្សាញរូបរាងនៃរថយន្ត Hyundai Custo ស៊េរីឆ្នាំ២០២២ ដែលមានបំពាក់ប៉ាណាមុខរាងស្រដៀងនឹងម៉ូដែល Tucson និង Santa Cruz, អំពូល LED Daytime Running Light បង្កប់ក្នុងប៉ាណាមុខ និង ចង្កៀងមុខ LED រាងស្រួច។

ជាមួយគ្នានេះដែរ Hyundai បានបន្តការឌីហ្សាញបែបមាំដល់ផ្នែកខាងក្រោយ ដែលមានបំពាក់ចង្កៀង LED, អំពូល LED Light Bar និងកាងពណ៌ទឹកប្រាក់។

មិនតែប៉ុណ្ណោះ រូបភាពនៃកាប៊ីនខាងក្នុងរបស់វាក៏បានលេចធ្លាយដែរ ដោយបង្ហាញឲ្យឃើញដៃចង្កូត ៤កាំ, កុងទ័រឌីជីថល និង អេក្រង់កម្សាន្តទំហំ ១០,៤អ៊ីញ។

ចំពោះម៉ាស៊ីនរបស់វាវិញ Hyundai មិនទាន់បានបញ្ជាក់នៅឡើយទេ ប៉ុន្តែរបាយការណ៍បានអះអាងថា វានឹងប្រើម៉ាស៊ីនចំណុះ ១,៦លីត្រ turbocharged មានកម្លាំង ១៧០សេះ និង ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ២៣៦សេះ៕

ផ្ទាំងផ្សាយពាណិជ្ជកម្ម

ត្រឹម ១១ថ្ងៃ! MG 5 ជំនាន់ថ្មីលក់បានជិត ៨០០គ្រឿង

August 15, 2021

កាលពីថ្ងៃទី ២០ ខែកក្កដាកន្លងទៅ ក្រុមហ៊ុន SAIC Motor-CP និងក្រុមហ៊ុន MG Sale Thailand បានធ្វើការប្រកាសចេញលក់រថយន្ត MG 5 សេរ៊ីថ្មីឆ្នាំ ២០២១ ក្នុងប្រទេសថៃជាផ្លូវការ។

បន្ទាប់ពីចេញលក់ជាផ្លូវការបានរយ:ពេល ១១ថ្ងៃរថយន្ត MG 5 ឆ្នាំ២០២១ បានធ្វើការដឹកជញ្ជូនដល់អតិជនចំនួនលើសពី ៧៣៣គ្រឿង ក្នុងចំនួនអ្នកកក់សរុបច្រើនជាង ៣ ០០០គ្រឿង។ ដោយម៉ូឌែល C មានចំនួន ២៥គ្រឿង, D ចំនួន ៩១គ្រឿង និងម៉ូឌែលខ្ពស់បំផុត X មានចំនួន ៦១១គ្រឿង។

គួរបញ្ជាក់ផងដែរថាសម្រាប់ទីផ្សារប្រទេសថៃ រថយន្ត MG 5 ម៉ូឌែល C មានតម្លៃចាប់ពី ១៧ ០០០ដុល្លារ, ម៉ូឌែល D មានតម្លៃចាប់ពី ១៨ ២០០ដុល្លារ និងម៉ូឌែល X មានតម្លៃចាប់ពី ២០ ៩៥៥ដុល្លារ។ សម្រាប់រថយន្ត Sedan នេះដំណើរការដោយម៉ាស៊ីនចំណុះ ១,៥លីត្រ ទំហំ ៤ស៊ីឡាំង មានកម្លាំង ១១៤សេះ ភ្ជាប់ជាមួយប្រអប់លេខ CVT ៨វគ្គអូតូ ហើយសម្រាប់ការបើកបរចម្ងាយ ១០០គីឡូម៉ែត្រស៊ីប្រេងជាមធ្យម ៥,៦លីត្រ៕

ផ្ទាំងផ្សាយពាណិជ្ជកម្ម

Ford គ្រោងវិនិយោគលុយ ៣០ពាន់លានដុល្លារលើរថយន្តអគ្គិសនី ដើម្បីជួយសម្រេចគោលដៅរបស់លោក Joe Biden

August 15, 2021

នៅខែឧសភាកន្លងទៅ ក្រុមហ៊ុន Ford បានប្រកាសថាខ្លួននឹងបង្កើនការវិនិយោគលើគម្រោង រថយន្តអគ្គិសនី រួមទាំងការអភិវឌ្ឍន៍ថាមពលអាគុយ នូវចំនួនទឹកប្រាក់ ៣០ពាន់លានដុល្លារនៅឆ្នាំ ២០៣០។ ឥឡូវនេះ Lisa Drake នាយកប្រតិបត្តិរបស់ក្រុមហ៊ុន Ford អាមេរិកខាងជើងនិយាយថា ក្រុមហ៊ុនរំពឹងថានឹងចំណាយប្រាក់ច្រើនលើយានយន្តដើរដោយថាមពលអគ្គិសនីច្រើនជាងរថយន្តប្រេងឥន្ធនះនៅត្រឹមឆ្នាំ ២០២៣ ។

យោងតាមការចុះផ្សាយរបស់ The Detroit News បានបង្ហាញថា៖ លោក Jim Farley នាយកប្រតិបត្តិរបស់ក្រុមហ៊ុន Ford បាននិយាយថាក្រុមហ៊ុនរបស់ខ្លួនទទួលបាននូវការកក់រថយន្តភីកអាប់អគ្គិសនី Ford Lightning ចំនួនលើសពី ១២ម៉ឺនគ្រឿង ហើយបានបង្ហាញថា ៧៥ ភាគរយនៃអតិថិជនទាំងនោះគឺជាអតិថិជនមកពីក្រុមហ៊ុនផលិតរថយន្តផ្សេងទៀត។

លោក Drake ក៏បានបន្ថែមថា ក្រុមហ៊ុន Ford នឹងចូលរួមក្នុងការសម្រេចគោលដៅរបស់ប្រធានាធិបតីលោក Joe Biden ក្នុងការជំរុញឱ្យការលក់រថយន្តថ្មីពី ៤០ ទៅ ៥០ ភាគរយជារថយន្តប្រើអគ្គិសនីនៅឆ្នាំត្រឹមឆ្នាំ ២០៣០៕

ផ្ទាំងផ្សាយពាណិជ្ជកម្ម

Hypercar លឿនបំផុតរបស់ Bugatti ផលិតត្រឹមចំនួន ៤០គ្រឿងប៉ុណ្ណោះ ឯតម្លៃជិត ៥លានដុល្លារ

August 15, 2021

កាលពីខែតុលាឆ្នាំមុនកន្លងទៅ រថយន្តគំរូ Bugatti Bolide ត្រូវបានប្រកាសចេញជាផ្លូវការ ដែលជារថយន្ត Hypercar ដែលមានទម្ងន់ស្រាលបំផុត និងលឿនបំផុតរបស់ក្រុមហ៊ុន ដោយផ្តោតសំខាន់លើទីលានប្រណាំង។

នាពេលនេះ ក្នុងកម្មវិធី The Quail Motorsport Gathering ឆ្នាំ២០២១ ក្រុមហ៊ុន Bugatti បានធ្វើការប្រកាសអំពីចំនួននៃការផលិតនៃរថយន្តនេះ ជាមួយចំនួនកំណត់ត្រឹម ៤០គ្រឿងប៉ុណ្ណោះ ដោយក្នុងមួយគ្រឿងមានតម្លៃ ៤,៨លានដុល្លារ។ ប៉ុន្តែការផលិតរថយន្តចំនួន ៤០គ្រឿងនេះ Bugatti នឹងចំណាយពេល ៣ឆ្នាំ ដោយម្ចាស់រថយន្តនឹងទទួលបានរថយន្តនៅឆ្នាំ ២០២៤។

រថយន្ត Bugatti Bolide បានបំពាក់ម៉ាស៊ីនចំណុះ ៨,០លីត្រ ទំហំ ១៦ស៊ីឡាំង មានកម្លាំងរហូតដល់ទៅ ១ ៦០០សេះ តិចជាងរថយន្តគំរូដែលមានកម្លាំង ១ ៨៥០សេះ ហើយមានទម្ងន់ត្រឹមតែ ១ ៤៥០គីឡូក្រាមប៉ុណ្ណោះ។ ព្រមទាំងអាចរត់ដល់ល្បឿនអតិបរមាលើស ៥០០គីឡូម៉ែត្រក្នុងមួយម៉ោង និងអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ២,១៧វិនាទីប៉ុណ្ណោះ។

ដើម្បីអាចផលិតរថយន្ត Bolide ឲ្យស្រាលបែបនេះបាន Bugatti បានប្រើប្រាស់គ្រោងឆ្អឹង Carbon Fiber, ខ្ចៅ Titanium, គ្រឿង Titanium Alloy កម្រាស់ស្តើង បានពី 3D-Print, ហ្វ្រាំង Ceramic និង Carbon Fiber លើផ្នែកជាច្រើនផ្សេងទៀត៕

ផ្ទាំងផ្សាយពាណិជ្ជកម្ម

ហេតុផលដែលគួរប្តូរសំបកកង់រថយន្តចេញភ្លាមៗ នៅពេលមានសញ្ញាប្លែកៗទាំងនេះ | ចំណេះដឹងយានយន្ត

August 15, 2021

[ចំណេះដឹងយានយន្ត] កង់រថយន្តមានតួនាទីទទួលខុសត្រូវលើការធ្វើដំណើរស្ទើរតែទាំងស្រុងហើយវាក៏អាចមានគ្រោះថ្នាក់ ប្រសិនបើម្ចាស់រថយន្តមិនខ្វាយខ្វល់ពីអាយុកាលប្រើប្រាស់និងមិនត្រួតពិនិត្យសម្ពាធខ្យល់ឲ្យបានត្រឹមត្រូវមុនពេលធ្វើដំណើរផ្លូវឆ្ងាយ។ ជាក់ស្តែងកន្លងមកករណីរថយន្តក្រឡាប់ និងបុកបណ្តាលមកពីការផ្ទុះកង់ឬសឹកក្រឡាកង់ដែលធ្វើឲ្យរអិលជាដើម។ ដូចនេះដើម្បីសុវត្ថិភាពអ្នកបើកបរគ្រប់រូបគួរប្រញាប់ឆែកមើល និងប្តូរកង់រថយន្តថ្មី នៅពេលមានសញ្ញាប្លែកៗទាំងនេះកើតឡើងខណៈពេលកំពុងបើកបរ។

១. ឡើងប៉ោងស្នាមឆូត និងប្រេះ៖ សញ្ញាទាំងនេះរមែងធ្វើឲ្យកង់ធូរហើយអ្នកប្រើប្រាស់រថយន្តភាគច្រើនតែងគិតថាវាគ្រាន់តែជាការធូរកង់ធម្មតាប៉ុណ្ណោះ។ យល់ល្អគួរប្រញាប់យកទៅឲ្យយានដ្ឋានឆែកមើលថាតើគួរប្រើប្រាស់បន្ត ឬក៏ត្រូវប្តូរថ្មី។ ករណីឡើងប៉ោង មានស្នាមឆូត ឬប្រេះរបកលើសំបកកង់ វាអាចបង្កគ្រោះថ្នាក់ផ្ទុះកង់រថយន្តនៅពេលណាមួយដោយមិនបានរំពឹងទុក។

២. សឹកក្រឡាកង់៖ នៅពេលសង្កេតឃើញកង់រថយន្តសឹកក្រឡាស្ទើរតែរលូងគួរប្រញាប់យកទៅប្តូរចេញថ្មីភ្លាមដើម្បីជៀសវាងគ្រោះថ្នាក់ដោយសារការរអិលពេលបើកបរ។

៣. កង់ធូរញឹកញាប់៖ ប្រសិនបើប៉ះហើយនៅតែធូរឬធ្លាយវាគឺជាសញ្ញាដែលម្ចាស់រថយន្តគួរតែប្តូរចេញ។ម្ចាស់រថយន្តគួរតែឆែកមើលសម្ពាធខ្យល់ឲ្យបានញឹកញាប់និងប្រើប្រាស់សម្ពាធខ្យល់ឲ្យបានត្រឹមត្រូវទៅតាមស្ថានភាពផ្លូវ និងអាកាសធាតុ។

៤. កង់ធូរខុសធម្មតា៖ ប្រសិនបើសង្កេតឃើញកង់នៅតែធូរឬធូរខុសធម្មតាបើទោះបើកបរក្នុងអាកាសធាតុត្រជាក់វាក៏ជាសញ្ញាដែលអ្នកបើកបរគួរប្រញាប់យកទៅឲ្យយានដ្ឋានឆែកមើលឬផ្លាស់ប្តូរថ្មីទើបប្រសើរ។

៥. ញ័រ៖ ជួនកាលអាចមានសំឡេងក្រុកៗឬញ័រកើតឡើងនៅពេលកំពុងបើកបរ។ប្រសិនបើមានអារម្មណ៍ថា វាកើតឡើងនៅខាងក្រោមកៅអីមានន័យថាកង់ខាងក្រោយសឹកនិងអស់អាយុកាលប្រើប្រាស់។ ហើយប្រសិនបើចង្កូតញ័រវាបង្ហាញថាកង់កំពុងមានបញ្ហាជាមួយនឹងបូម។ជាមួយគ្នានេះអ្នកជំនាញក៏បានផ្តល់យោបបល់ដែរថានៅពេលមានសំឡេងខុសប្រក្រតី កើតឡើងក្នុងអំឡុងពេលបើកបរ អ្នកបើកបរគ្រប់រូបគួរប្រញាប់យកទៅឲ្យយានដ្ឋានត្រួតពិនិត្យ។ ជាពិសេសចំពោះការប្តូរកង់ គួរប្តូរម្តងទាំងគូ ឬទាំងបួនទើបប្រសើរ ដើម្បីធ្វើឲ្យការបើកបរ មានភាពរលូន និងសុវត្ថិភាព៕

ផ្ទាំងផ្សាយពាណិជ្ជកម្ម

ឡានអគ្គិសនីតម្លៃជាង ៤០០០ដុល្លារ បង្កើតកំណត់ត្រាលក់ថ្មី

August 14, 2021

រថយន្ត Wuling Hongguang Mini EV អាចលក់ចេញបានសរុបរហូតដល់ ៣០ ៧០៦គ្រឿងនៅក្នុងខែកក្កដា ដែលជាតួលេខលក់ប្រចាំខែខ្ពស់បំផុតចាប់តាំងពីរថយន្តនេះបានចេញលក់តាំងពីខែកក្កដា ឆ្នាំ២០២០មក។

តួលេខលក់ដ៏ច្រើនក្នុងមួយខែនេះក៏បានបញ្ជាក់អំពីទំហំផលិតខ្ពស់របស់ក្រុមហ៊ុន SAIC-GM-Wuling ផងដែរ។ រថយន្តលក់ដាច់ជាងគេទីពីរនៅប្រទេសចិនគឺរថយន្ត Tesla Model 3 ដែលលក់ចេញបានពាក់កណ្ដាលរថយន្ត Mini EV តែប៉ុណ្ណោះ។

ចំណុចទាក់ទាញធំបំផុតរបស់រថយន្ត Hongguang Mini EV គឺដោយសារតែវាមានតម្លៃទាក់ទាញខ្លាំង គឺចាប់ពីប្រមាណ ៤១០០ដុល្លារ ទៅ ៥៥០០ដុល្លារប៉ុណ្ណោះ ហើយវាក៏មានថ្លៃជួសជុលទាបផងដែរ។

រថយន្តអគ្គិសនីខ្នាតតូចនេះមានផ្ដល់ជម្រើសអាគុយចំនួនពីរដែលមានទំហំ ៩,៣kWh អាចជិះបានចម្ងាយ ១២០គីឡូម៉ែត្រ និងមួយទៀតមានទំហំ ១៣,៩kWh អាចជិះបាន ១៧០គីឡូម៉ែត្រ៕

ផ្ទាំងផ្សាយពាណិជ្ជកម្ម

ឡានមួយទឹកលក់ដាច់លឿនជាងគេទាំង៣ម៉ូដែលនៅអាមេរិក សុទ្ធតែជាឡានអគ្គិសនី

August 14, 2021

ផ្អែកតាមការសិក្សារបស់ iSeeCars.com បានបង្ហាញថារថយន្ត Tesla Model 3 ដែលប្រើប្រាស់រួច ជាធម្មតាប្រើពេលជាមធ្យម ១៥,៧ថ្ងៃអាចលក់ចេញបានមួយគ្រឿង ត្បិតថាមានតម្លៃជាមធ្យម ៤៦ ៩៨២ដុល្លារក្ដី។

តែជាង២សប្ដាហ៍អាចលក់ចេញមួយគ្រឿង បានធ្វើឲ្យ Tesla Model 3 ក្លាយជារថយន្តមួយទឹកដែលលក់ចេញបានលឿនជាងគេនៅសហរដ្ឋអាមេរិក ប្រចាំខែកក្កដា ឆ្នាំ២០២១។ ចំណែករថយន្តស្ថិតនៅចំណាត់ថ្នាក់លេខពីរដែលប្រើពេល ២០,៨ថ្ងៃ ក៏ជារថយន្តអគ្គិសនីដែរគឺម៉ូដែល Chevrolet Bolt EV ដែលមានតម្លៃលក់ជាមធ្យម ២២ ០០៥ដុល្លារ។

ចំណាត់ថ្នាក់ទីបីនៅតែជារថយន្តអគ្គិសនីដដែល គឺរថយន្តម៉ូដែល Tesla Model S ដែលប្រើប្រាស់ពេលជាមធ្យម ២១,៣ថ្ងៃ អាចលក់ចេញបានមួយគ្រឿង ជាមួយតម្លៃលក់ជាមធ្យម ៦៤ ២០៥គ្រឿង៕

ផ្ទាំងផ្សាយពាណិជ្ជកម្ម

អ្វីជាចំណុះម៉ាស៊ីន (CC)? | ចំណេះដឹងយានយន្ត

August 14, 2021

[ចំណេះដឹងយានយន្ត] ដែលហៅថា (CC) គឺជាសង់ទីម៉ែត្រគូប (Cubic Centimeter) ឬ Cm³ ដែលជាឯកតារង្វាស់ ដើម្បីវាស់ទំហំឬ ចំណុះរបស់ម៉ាស៊ីន។ វាជាឯកតាវាស់មាឌគូបដែលមានទំហំ 1cm x 1cm x 1cm ។ CC ត្រូវបានគេស្គាល់ដែលថាជា ទំហំរបស់ម៉ាស៊ីន (Engine Displacement)។ វាមានន័យថាការបំលាស់ពីស្តុងនៅខាងក្នុងស៊ីឡាំងពីចំណុចផុតលើ (TDC) ទៅចំណុចផុតក្រោម (BDC) ក្នុងមួយវគ្គនៃម៉ាស៊ីន។ ចំណុះម៉ាស៊ីនត្រូវបានវាស់ជាលីត្រដែលត្រូវនឹងសង់ទីម៉ែត្រគូប។

ប្រសិនបើម៉ាស៊ីនមានចំណុះដែលអាចនិយាយថា 1000cc ឬ 1000cm³ នោះចំណុះរបស់ម៉ាស៊ីនគឺ 1 លីត្រ។ សម្រាប់ឧទាហរណ៍៖ 1000cc = 1000 cm³ = 1 Liter = 1.0 L

របៀបវាស់ចំណុះឬទំហំរបស់ម៉ាស៊ីន

ដើម្បីគណនាមាឌរបស់ម៉ាស៊ីនអ្នកត្រូវប្រើរូបមន្ត V = 3,14/4 x (D)² x H x N

ដោយ V = មាឌ, D = អង្គត់ផ្ចិត, H = កម្ពស់, N = ចំនួនស៊ីឡាំង

វាគឺជាចំណុះដែលបានរួមបញ្ចូលគ្នានៃស៊ីឡាំងទាំងអស់ដែលបានបន្ថែមជាមួយគ្នា ខណៈពេលវាបានបញ្ចប់មួយវគ្គ។

ឧ. ប្រសិនបើម៉ាស៊ីន ៤ស៊ីឡាំងមានចំណុះ 1000cc ឬ 1.0 L មានន័យថាស៊ីឡាំងទាំង ៤ រួមបញ្ចូលគ្នាបានចំណុះអតិបរមា 1000 cm³ ឬ 1.0 L នៃបរិមាណខ្យល់ ឬ ល្បាយខ្យល់ឥន្ធនៈនៅក្នុងនោះ។ ប្រសិនបើម៉ាស៊ីនមានស៊ីឡាំងតែមួយមានចំណុះ 1000cc ឬ 1.0L នៅខាងក្នុង៕

ផ្ទាំងផ្សាយពាណិជ្ជកម្ម

Volkswagen លក់ឡានអគ្គិសនីត្រកូលID. ដាច់បាន ៥៨០០ គ្រឿងនៅចិន ក្នុងខែកក្កដា

August 14, 2021

ក្រុមហ៊ុនផលិតរថយន្តអាល្លឺម៉ង់ Volkswagen AG បានលក់ដាច់រថយន្តអគ្គិសនីត្រកូល ID. សរុបចំនួន ៥ ៨០០គ្រឿង ក្នុងប្រទេសចិន ដែលជាទីផ្សាររថយន្តធំបំផុតរបស់ពិភពលោក នៅក្នុងខែកក្កដា កើនឡើងពីចំនួនជិត ៣ ០០០ គ្រឿងកាលពីខែមុន។

ក្រុមហ៊ុន Volkswagen មានគោលដៅលក់នៅប្រទេសចិនសម្រាប់រថយន្តត្រកូល ID. ចន្លោះពី ៨០ ០០០ ទៅ ១០០ ០០០ គ្រឿងនៅឆ្នាំនេះ ហើយវាក៏អាស្រ័យលើការចែកចាយបន្ទះឈីបផងដែរ។

គួរឲ្យដឹងថា ក្រុមហ៊ុន Volkswagen កំពុងផលិត និងលក់រថយន្តស្ព័រអគ្គិសនី ID.4 និង ID.6 នៅក្រុមហ៊ុនបណ្តាក់ទុនពីររបស់ចិន។ វាក៏នឹងដាក់លក់រថយន្ត ID.3 នៅចុងឆ្នាំនេះផងដែរ។

ប្រភពមួយបានប្រាប់ទៅកាន់សារព័ត៌មាន Reuters កាលពីខែមិថុនាថា ក្រុមហ៊ុន Volkswagen មានមហិច្ឆតាក្នុងការយកឈ្នះក្រុមហ៊ុន Tesla Inc ក្នុងឆ្នាំ ២០២៥ ដោយកំពុងតែចាប់ផ្តើមយឺតៗនៅក្នុងប្រទេសចិន។

ជាមួយគ្នានេះដែរ នាយកប្រតិបត្តិក្រុមហ៊ុន Volkswagen លោក Herbert Diess បាននិយាយកាលពីខែមុនថា ខ្លួនត្រូវតែផ្លាស់ប្តូរវិធីសាស្រ្តក្នុងការលក់រថយន្តអគ្គិសនីនៅក្នុងប្រទេសចិន៕

ផ្ទាំងផ្សាយពាណិជ្ជកម្ម

ក្រុមហ៊ុន Nissan Motor Thailand ងាកមកផ្តោតលើការនាំចេញឡានវិញ បន្ទាប់ពីទីផ្សារក្នុងស្រុកនៅតែបន្តទទួលរងពីការជាប់គាំង ដោយសារជំងឺកូវីដ១៩

August 14, 2021

ក្រុមហ៊ុន Nissan Motor Thailand នៅប្រទេសថៃ មានបំណងបង្កើនការលក់នាំចេញរបស់ខ្លួន ខណៈពេលដែលទីផ្សារក្នុងស្រុកនៅតែបន្តទទួលរងពីការជាប់គាំង ដោយសារជំងឺកូវីដ១៩។

ក្រុមហ៊ុនផលិតរថយន្តជប៉ុនខាងលើរំពឹងថា ការលក់រថយន្តក្នុងស្រុកនឹងធ្លាក់ចុះ នៅឆមាសទីពីរក្នុងឆ្នាំ ២០២១ នេះ។

សម្រាប់ឆ្នាំសារពើពន្ធ ២០២០ (ពីខែមេសា ២០២០ ដល់មីនា ២០២១) ក្រុមហ៊ុន Nissan បានកត់ត្រាការលក់រថយន្តក្នុងស្រុកចំនួន ៣៩ ៦០០ គ្រឿង ដែលស្មើនឹងចំណែកទីផ្សារ ៥%។

លោក Isao Sekiguchi ប្រធានក្រុមហ៊ុន Nissan Motor Thailand បាននិយាយថា ក្រុមហ៊ុនមានគម្រោងលក់រថយន្តបន្ថែមទៀតនៅបរទេស ស្របតាមការស្ទុះងើបឡើងវិញនៃសេដ្ឋកិច្ចពិភពលោក ហើយវានឹងផ្តោតលើទីផ្សារដែលមានសក្តានុពលខ្ពស់ដូចជាមជ្ឈឹមបូព៌ាជាដើម។

លោក Sekiguchi បានមានប្រសាសន៍ថា “ការផ្ទុះឡើងនៃជំងឺកូវីដ១៩ បានប៉ះពាល់ដល់ប្រទេសជាច្រើន រួមទាំងនៅអាស៊ាន និងជប៉ុនផងដែរ។ ប្រទេសថៃបានដាក់ចេញវិធានការបិទខ្ទប់ប្រទេសឡើងវិញ ទោះបីជាវាធ្វើឱ្យសេដ្ឋកិច្ចធ្លាក់ចុះក៏ដោយ”។