ការសិក្សាគួរឲ្យចាប់អារម្មណ៍មួយបានបង្ហាញថា អតិថិជនមួយចំនួនធំចង់ទិញរថយន្តដែលប្រើអគ្គិសនី ជារថយន្តបន្ទាប់របស់ពួកគេ។

ការស្ទង់មតិមនុស្សជាង ៩ ០០០ នាក់នៅទូទាំង ១៣ ប្រទេស រួមមានទាំង សហរដ្ឋអាមេរិក កាណាដា ចិន អាល្លឺម៉ង់អូស្ត្រាលី សិង្ហបុរី និងនូវែលសេឡង់ បានរកឃើញថា មិនតិចជាង ៤១ ភាគរយនៃអ្នកឆ្លើយតបបាននិយាយថា ពួកគេចង់បានរថយន្តដែលប្រើថាមពលអគ្គីសនី (អគ្គិសនីសុទ្ធ, Hybrid ឬ Plug-in Hybrid) ប៉ុន្តែតួលេខខុសគ្នាអាស្រ័យតាមប្រទេសនីមួយៗដែរ។

នៅសហរដ្ឋអាមេរិក ៦៦ ភាគរយនៃអ្នកដែលបានស្ទាបស្ទង់មតិបាននិយាយថា រថយន្តបន្ទាប់របស់ពួកគេនឹងជាប្រភេទប្រើម៉ាស៊ីនចំហេះក្នុង ខណៈ ២៨ ភាគរយបាននិយាយថា ពួកគេកំពុងពិចារណាទាំងរថយន្តអគ្គិសនី, Hybird ឬ Plug-in Hybrid។

ដោយឡែកនៅអូស្រ្តាលីវិញមាន ៧៥ ភាគរយបាននិយាយថា រថយន្តបន្ទាប់របស់ពួកគេនឹងជារថយន្តប្រើសាំង ឬម៉ាស៊ូតខណៈដែល ១៧ ភាគរយទៀតនឹងជ្រើសយករថយន្តអគ្គិសនី។

ក្រឡេកទៅមើលប្រទេសកូរ៉េខាងត្បូងវិញមាន ៥១ ភាគរយនិយាយថា ពួកគេនឹងទិញរថយន្តអគ្គិសនី ខណៈ ៣២ ភាគរយទៀតនឹងជ្រើសរើសយករថយន្តប្រើសាំង ឬម៉ាស៊ូត។ ស្រដៀងគ្នានេះដែរ អ្នកឆ្លើយសំណួរ ៥៣ ភាគរយមកពីប្រទេសសិង្ហបុរីកំពុងពិចារណាលើរថយន្តអគ្គិសនីដែរ៕

ផ្ទាំងផ្សាយពាណិជ្ជកម្ម

រថយន្តរបស់លោក Mike Flewitt នាយកប្រតិបត្តិក្រុមហ៊ុន McLaren ដែលជាម៉ូដែល 720S ត្រូវបានប្រទះឃើញដាក់លក់នៅលើវិបសាយលក់រថយន្តនៅអង់គ្លេសឈ្មោះថា O’Kane Lavers’។

រថយន្តដែលដាក់លក់នេះមានប្រើប្រាស់ទឹកថ្នាំពណ៌ខៀវដែលមានឈ្មោះថា McLaren Special Operations Defined Paris Blue និងប្រើប្រាស់យ៉ាន់ប្រភេទ 10-spoke ផងដែរ។ កៅអីខាងក្នុងដើមឡើយគឺជាប្រភេទកៅអីប្រណាំង ប៉ុន្តែលោក Mike Flewitt បានប្ដូរមកប្រើប្រាស់ជាកៅអីដែលអាចសារ៉េបានច្រើនបែបជំនួសវិញ។

រថយន្តនេះបានដាក់លក់ក្នុងតម្លៃ ២២៦ ២៩៥ដុល្លារ ដោយទើបប្រើប្រាស់បានចម្ងាយ ១០ ៩០៣ម៉ាយ ហើយមានការធានាដែលមានសុពលភាពរហូតដល់ខែកក្កដាឆ្នាំក្រោយ។

គួរដឹងថារថយន្ត McLaren 720S ថ្មីសន្លាងមានដាក់លក់នៅអង់គ្លេស ក្នុងតម្លៃប្រមាណជា ៤២ម៉ឺនដុល្លារ៕

ផ្ទាំងផ្សាយពាណិជ្ជកម្ម

រថយន្ត Audi A1 ជំនាន់ទីមួយបានប្រកាសចេញកាលពីឆ្នាំ២០១០ ដែលជារថយន្តតូចជាងគេបំផុតរបស់ Audi ហើយជំនាន់ទីពីរបានប្រកាសចេញកាលពីឆ្នាំ២០១៨ ដែលរថយន្តទាំងពីរជំនាន់នេះមិនមានដាក់លក់នៅច្រើនទីផ្សារនោះទេ។

សារព័ត៌មាន Automotive News Europe បានបញ្ជាក់ជាមួយនឹងនាយកប្រតិបត្តិ Audi លោក Markus Duesmann ថានឹងមិនមានរថយន្ត A1 ជំនាន់ទីបីនោះឡើយ ដែលមានន័យថារថយន្តនេះនឹងត្រូវក្ស័យសង្ខារឆាប់ៗ។

នៅពេលដែលរថយន្ត A1 បញ្ឈប់ការផលិត រថយន្ត Audi Q2 ទំនងជាក្លាយរថយន្តប្រភេទ Entry ជំនួសវិញ ដោយសារតែ Audi មិនមានគោលបំណងផលិតរថយន្តដែលមានទំហំតូចជាងនេះឡើយ។

ទាក់ទងនឹងរថយន្តម៉ូដែលដទៃទៀត នៅត្រឹមឆ្នាំ២០៣០ លោក Duesmann រំពឹងថាសែស្រឡាយរថយន្តរបស់ Audi នឹងមានជម្រើសប្រើថាមពលច្រើនប្រភេទដោយផ្អែកលើទីផ្សារនីមួយៗ។ ខណៈដែល Audi រំពឹងថារថយន្តប្រើម៉ាស៊ីនពីស្តុងនឹងមានចំណែកតិចជាង ២០% នៃចំនួនលក់សរុបនៅអឺរ៉ុបនោះ ស្ថានភាពអាចខុសគ្នាសម្រាប់ទីផ្សារប្រទេសចិន និងអាមេរិក៕

ផ្ទាំងផ្សាយពាណិជ្ជកម្ម