ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 804

ទីបំផុត! Honda Civic ២០២២ បង្ហាញមុខជាផ្លូវការហើយ

ក្រុមហ៊ុន Honda បានធ្វើការប្រកាសចេញនូវរថយន្ត Honda Civic សេរ៊ីថ្មី ២០២២ ជាផ្លូវការ ជាមួយការអាប់ដេតរូបរាងថ្មី កាន់តែទំនើប និងទាន់សម័យ, ជម្រើសម៉ាស៊ីនថ្មី និងប្រព័ន្ធសុវត្ថិភាពផងដែរ។

រថយន្ត Honda Civic ឆ្នាំ ២០២២នេះ មានចំនួន ៤ប្រភេទគឺ LX, Sport, EX និង Touring វាមានប្រវែងពីកង់មុខដល់កង់ក្រោយវែងជាងម៉ូឌែលមុន ៣៥,៥មីលីម៉ែត្រ និងទទឹងវែងជាង ១២មីលីម៉ែត្រ។

តាមរយ:ការប្រើប្រាស់ដែកថែប និងអាលុយមីញ៉ូមធ្វើអោយរថយន្ត Honda Civic ២០២២នេះ មានភាពរឹងមាំជាងមុនចំនួន ៨ ទៅ ១៣ភាគរយ។ បន្ថែមពីនេះត្រូវបានបំពាក់ជាមួយចង្កៀងLED មុខ-ក្រោយ ទំហំធំមុន, កាងក្រោយ រចនាឡើងរឹងម៉ាំជាងមុន, កញ្ជក់ជំហៀងទាំងសងខាងផ្លាស់ប្តូរទីតាំងដាក់នៅលើ A-pillar រួមជាមួយជម្រើសពណ៌តួខ្លួនចំនួន ៨ពណ៌ រួមបញ្ជូលជាមួយពណ៌ថ្មីចំនួន ៣៖ Meteorite Grey Metallic, Sonic Gray Pearl និង Morning Mist Blue Metallic។

រីឯផ្នែកខាងក្នុងការប៊ីនគឺមានភាពធំទូលាយជាងមុន និងបានបំពាក់ស្តង់ដាជាមួយអេក្រង់បង្ហាញព័ត៌មាន ប្រភេទឌីជីថល ទំហំ ១០,២អ៊ីញ, អេក្រង់កម្សាន្តទំហំ ៧អ៊ីញ, ប្រព័ន្ធត​ន្ត្រីប្រភេទ Bose ចំនួន ១២គ្រាប់ និងកៅអីប្រភេទ Body Stabilizing Seat ដែលផ្តល់នូវផាសុខភាពសម្រាប់ការធ្វើដំណើរ។ បន្ថែមពីនេះ នៅលើតាប្លូបានបំពាក់ជាមួយសំណាញ់រាងសំបុក្រឃ្មុំ ប្រវែងវែង ហើយនៅក្រោមសំណាញ់រាងសំបុក្រឃ្មុំនោះ គឺជាម៉ាស៊ីនត្រជាក់។

សម្រាប់ប្រព័ន្ធសុវត្ថិភាព និងប្រព័ន្ធជំនួយការបើការនៅលើរថយន្ត Honda Civic ឆ្នាំ ២០២២នេះ Honda បានអភិវឌ្ឍបន្ថែម អោយកាន់ល្អ​ប្រសើជាងមុនទៅលើ Honda Sensing Package ដោយប្រព័ន្ធអាចមើលឃើញកាន់តែច្បាស់ និងកំណត់អត្តសញ្ញាណអ្នកថ្មើរជើង, អ្នកជិះកង់ និ​ងយានយន្តដទៃទៀតលឿនជាងមុន។

Honda Civic ឆ្នាំ ២០២២ បំពាក់ជាមួយជម្រើសម៉ាស៊ីន ២ប្រភេទគឺ ១,៥លីត្រ Turbocharged ទំហំ ៤ស៊ីឡាំង មានកម្លាំង ១៨០សេះ និងកម្លាំងរមួល ២៤០Nm និងជម្រើស ២,០លីត្រ ទំហំ ៤ស៊ីឡាំង មានកម្លាំង ១៨៧សេះ និងកម្លាំងរមួល ៤ ២០០rpm ដំណើការដោយប្រអប់លេខ CVT។

រថយន្ត Honda Civic ឆ្នាំ ២០២២ នឹងត្រូវផលិតនៅរោងចក្ររបស់ Honda នៅប្រទេសកាណាដា ហើយគ្រោងនឹងលក់នៅលើទីផ្សារនៅរដូវក្តៅនេះ ដោយមានតម្លៃចាប់ពី ២២ ១៥០ដុល្លារ៕

ផ្ទាំងផ្សាយពាណិជ្ជកម្ម

Tesla ប្រឈមនឹងការផាកពិន័យ ១៤លានដុល្លារ ជុំវិញការកែឆ្នៃអាគុយឡាន

ទីភ្នាក់ងារការពារបរិស្ថាន Environmental Protection Agency ឬហៅកាត់ថា EPA បានផ្ញើសេចក្តីជូនដំណឹងមួយទៅក្រុមហ៊ុន Tesla ក្នុងខែនេះ ដោយប្រាប់ថា ពួកគេខកខានមិនបានធ្វើរបាយការណ៍ដែលបញ្ជាក់ថា ខ្លួនអនុលោមតាមស្តង់ដារនៃការបំភាយថ្នាំកូតលើផ្ទៃរថយន្ត។

ទោះជាយ៉ាងណា ក្រុមហ៊ុន Tesla បានបង្ហាញសេចក្តីជូនដំណឹងរបស់ EPA នៅក្នុងឯកសាររបាយការណ៍ត្រីមាសទី១ របស់ខ្លួន ហើយនិយាយថា ពួកគេបានឆ្លើយតបរាល់សំណើរព័ត៌មានពី EPA និងបដិសេធការចោទប្រកាន់នេះទៀតផង។

ក្រុមហ៊ុនផលិតរថយន្តអាមេរិកខាងលើក៏បានបន្ថែមទៀតថា ពួកគេមិនរំពឹងថានឹងមានផលប៉ះពាល់ជាអវិជ្ជមានដល់អាជីវកម្មរបស់ខ្លួនទេ ប៉ុន្តែលទ្ធផលពីការជូនដំណឹងរបស់ EPA នៅតែមិនទាន់កំណត់។

ដោយឡែក ទីភ្នាក់ងារបរិស្ថានអាល្លឺម៉ង់ UBA ក៏បានចេញការពិន័យជាទឹកប្រាក់ចំនួន ១២ លានអឺរ៉ូ (១៤,៥ លានដុល្លារ) ដល់ក្រុមហ៊ុនបុត្រសម្ព័ន្ធរបស់ Tesla នៅប្រទេសអាល្លឺម៉ង់ដែរ ដោយចោទប្រកាន់ពួកគេពីបទមិនគោរពតាមបទប្បញ្ញត្តិក្នុងស្រុក ស្តីពីការប្រមូលយក និងកែឆ្នៃអាគុយរថយន្តឡើងវិញ។

នៅក្នុងឯកសាររបាយការណ៍ត្រីមាសទី១ ខាងលើដដែលនោះ ក្រុមហ៊ុន Tesla បានអះអាងថា ខ្លួនពិតជាបានប្រមូលយកកញ្ចប់អាគុយរថយន្តមកវិញមែន ហើយថាខ្លួនបានជំទាស់ទៅនឹងការសម្រេចចិត្តរបស់ទីភ្នាក់ងារអាល្លឺម៉ង់ ដូច្នេះចំនួនទឹកប្រាក់ចុងក្រោយនៃការពិន័យណាមួយ នៅតែមិនទាន់បានសម្រេច។

គួរឲ្យដឹងដែរថា វាមិនមែនជាបញ្ហាតែមួយគត់ទេដែលក្រុមហ៊ុន Tesla កំពុងប្រឈមមុខនៅក្នុងប្រទេសអាល្លឺម៉ង់ ព្រោះថាក្រុមហ៊ុននេះអាចប្រឈមនឹងការពិន័យពីរដ្ឋាភិបាលនៅទីនោះជាច្រើនទៀត៕

ផ្ទាំងផ្សាយពាណិជ្ជកម្ម

Volkswagen ចេញឡានអគ្គិសនីកម្លាំងខ្លាំងថ្មី ហើយសាកម្តងជិះបាន ៤៨០គ.ម

ក្រុមហ៊ុន Volkswagen បានពង្រីកត្រកូលរថយន្តអគ្គិសនី ID.4 របស់ខ្លួន ដោយបន្ថែមម៉ូដែលថ្មីមួយទៀត ហៅថា ID.4 GTX។

រថយន្ត Volkswagen ID.4 GTX ថ្មីនេះ មានកម្លាំងខ្លាំងជាងម៉ូដែល ID.4 ធម្មតាដល់ទៅ ៩១សេះ សរុប ២៩៥សេះ ដោយសារតែការបន្ថែមម៉ូទ័រអគ្គិសនីមួយទៀត ពោលគឺប្រើម៉ូទ័រអគ្គិសនីពីរ អាចឲ្យវារត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹម ៦,២វិនាទី ហើយមានល្បឿនអតិបរមាដល់ ១៨០គីឡូម៉ែត្រក្នុងមួយម៉ោង ខណៈម៉ូដែល ID.4 ធម្មតាប្រើពេល ៨,៥វិនាទី និងមានល្បឿនត្រឹម ១៦០គីឡូម៉ែត្រក្នុងមួយម៉ោង។

គួរឲ្យដឹងដែរថា រថយន្ត ID.4 GTX នឹងដើរតួជាគូប្រជែងរបស់រថយន្តអគ្គិសនី Ford Mustang Mach-E និង Tesla Model Y ដែលសុទ្ធសឹងតែទទួលបានការចាប់អារម្មណ៍ខ្លាំង។

SUV អគ្គិសនីខ្នាតតូចខាងលើ មានបំពាក់កញ្ចប់អាគុយអគ្គិសនីទំហំ ៧៧គីឡូវ៉ាតម៉ោង ផ្តល់ចម្ងាយបើកបរ ២៩៨ម៉ាយ៍ ឬ ៤៨០គីឡូម៉ែត្រ នៅពេលសាកភ្លើងពេញម្តង តិចជាងម៉ូដែល ID.4 ធម្មតាដែលផ្តល់ចម្ងាយដល់ ៣១០ម៉ាយ៍ ឬ ៥០០គីឡូម៉ែត្រ។

ទោះជាយ៉ាងណាក៏ដោយ ក្រុមហ៊ុន Volkswagen មិនទាន់បានបង្ហាញតម្លៃលក់នៃរថយន្ត ID.4 GTX សម្រាប់ទីផ្សារសហរដ្ឋអាមេរិក និងអង់គ្លេស ប៉ុន្តែវាត្រូវបានដាក់លក់ក្នុងតម្លៃ ៦០ ៦០០ដុល្លារ នៅអាល្លឺម៉ង់ ថ្លៃជាងម៉ូដែល ID.4 ធម្មតា ៧ ២០០ដុល្លារ៕

ផ្ទាំងផ្សាយពាណិជ្ជកម្ម

សប្តាហ៍ដំបូង! រថយន្តដំបូងរបស់ Huawei ទទួលបានការបញ្ជាទិញរហូតដល់ ៦ពាន់គ្រឿង

ដូចបងប្អូនបានដឹងហើយថា កាលពីមួយសប្តាហ៍កន្លងទៅក្រុមហ៊ុន Huawei បានធ្វើការបង្ហាញចេញនូវរថយន្តដំបូង SERES SF5 ប្រភេទ Plug-in Hybrid របស់ខ្លួន ក្នុងកម្មពិធីតាំងពិពណ៌រថយន្តសៀងហៃ ២០២១ ដែលវាជាម៉ូឌែលរថយន្តផលិតឡើងក្រោមការសហការរវាងក្រុមហ៊ុន Huawei និងក្រុមហ៊ុន Cyrus។

ខណ:ពេលនេះផងដែរក្រុមហ៊ុន Huawei ក៏បានបង្ហាញពីចំនួនតួរលេខនៃការបញ្ជាទិញនៅសប្តាហ៍ដំបូង ដោយទទួលបានការបញ្ជាទិញរហូតដល់ចំនួន ៦ពាន់គ្រឿង ដោយរថយន្តនេះមានតម្លៃចាប់ពី ២៤៦ ៨០០យ៉េន ឬ ៣៨ ០០០ដុល្លារ។

បន្ថែមពីនេះ SERES SF5 បានបំពាក់ដោយសាំង ប្រភេទ Plug-in Hybrid ចំណុះ ១,៥លីត្រ ទំហំ ៤ស៊ីឡាំង ផ្គួបជាមួយម៉ូទ័រអគ្គិសនីចំនួន ២ មានកម្លាំងសរុប ៥៤៣ សេះ និងកម្លាំងបង្វិល ៨២០ Nm។ ម៉ូដែលប្រភេទ Crossover នេះមានសមត្ថភាពស្ទុះល្បឿនពី ០-១០០ គ.ម / ម៉ ប្រើពេលប្រហែល ៤,៧ វិនាទី។ លើសពីនេះ វាអាចបើកបរបានចម្ងាយជាង ១៨០គីឡូម៉ែត្រ សម្រាប់ពេលប្រើម៉ូទ័រអគ្គិសនីសុទ្ធតែមួយ និងបានចម្ងាយជាង ១ ០០០ គីឡូម៉ែត្រ នៅពេលមានជំនួយជួយពីម៉ូទ័រអគ្គិសនីទាំង ២ និងម៉ាស៊ីនចំហេះក្នុង។

រួមជាមួយបច្ចេកវិទ្យារបស់ក្រុមហ៊ុន Huawei ផ្ទាល់ដូចជា៖ ប្រព័ន្ធ Radar, Ultrasonic Sensors និងកាំមេរ៉ាជាច្រើនគ្រាប់ ដែលមានមុខងារសុវត្តិភាព ដូចជាប្រព័ន្ធបន្ថយល្បឿន និងរក្សាគំលាតសុវត្ថិភាពដោយស្វ័យប្រវត្តិ, ប្រព័ន្ធចាប់ហ្រ្វាំងដោយស្វ័យប្រវត្តិ, ប្រព័ន្ធផ្តល់ដំណឹងនៅពេលបើកបរចេញពីគន្លង និងឧបករណ៍ផ្តល់ដំណឹងពេលចេញពីគន្លង ផងដែរ។

នាពេលនេះរថយន្ត SERES SF5 កំពុងនឹងដាក់បង្ហាញនៅតាមបណ្តាហាងលក់របស់ Huawei មួយចំនួននៅប្រទេសចិន ហើយការដឹកជញ្ជូនសម្រាប់អតិថិជនដែលបានកក់រួច ត្រូវបានគេរំពឹងថានឹងកើតឡើងនៅខែឧសភាខាងមុខនេះ៕

ផ្ទាំងផ្សាយពាណិជ្ជកម្ម

មកស្គាល់យានយន្តដែលមានក្នុងរឿង Fast & Furious 9 តិចមើល!

Cr. The Fast Saga

F9 ឬ Fast & Furious 9 គឺជារឿងរបស់ Universal Pictures ដ៏ល្បីល្បាញមួយ និងទទួលបានការគាំទ្រយ៉ាងខ្លាំងពីបណ្តារអ្នកគាំទ្រ ជុំវិញពិភពលោក។ F9 ជារឿងវគ្គបន្ទាប់ទី៩ ចាប់តាំងពីវគ្គដំបូងក្នុងឆ្នាំ២០០១ The Fast and the Furious, Fast 2 Furious (២០០៣), The Fast and the Furious: Tokyo Drift (២០០៦), Fast & Furious (២០០៩), Fast Five (២០១១), Fast & Furious 6 (២០១៣), Furious 7 (២០១៥), The Fate of the Furious (២០១៧) និង F9 នេះឯងក្នុងឆ្នាំ២០២១។ តាមពិតទៅ រឿងនេះគ្រោងនឹងចាក់បញ្ចាំងតាំងពីខែមេសា ឆ្នាំ២០១៩ មកម្លេះ តែដោយសារតែជម្ងឺរាតត្បាតសកល កូវីដ-១៩ ទើបបានជារឿងនេះពន្យាពេលការចាក់ផ្សាយ។ សម្រាប់ពេលវេលាចាក់បញ្ចាំងជាថ្មីគឺ នៅថ្ងៃទី១៩ ខែឧសភា ឆ្នាំ២០២១ នៅហុងកុង កូរ៉េខាងត្បូង និងតៃវ៉ាន់ ដោយឡែកសហរដ្ឋអាមេរិចគឺនៅថ្ងៃទី២៥ ខែមិថុនា ឆ្នាំ២០២១។ អ្វីដែលជក់ចិត្តបំផុតនោះគឺការឈុតបើកឡានដ៏សាហាវ និងបច្ចេកទេសបើកបររបស់តួអង្គនីមួយៗ ហេតុនេះហើយ ខេមបូអូតូ សូមនាំបងប្អូនទាំងអស់គ្នា មកស្គាល់យានយន្តទាំងអស់ដែលមានប្រើនៅក្នុងឈុតឆាតរបស់រឿង F9 (ដកស្រង់តាមរយៈឈុតខ្លីៗប៉ុណ្ណោះ) នេះ ដែលមានដូចជា៖

  • Massey Ferguson 165
Cr. Mecum Auctions
  • 1970 Dodge Charger R/T
Cr. Universal Studios
  • 1968 Charger 500 (Mid-Engine)

  • 2020 Hellcat Widebody Charger
Cr. MoparInsider
  • Yamaha YZ450F
Cr. Universal Studios
  • 1974 Chevrolet Nova SS
Cr. Universal Studios

 

  • 2020 Toyota Supra
Cr. AutoEvolution
  • 2020 Jeep Gladiator
Cr. Universal Studios
  • 2018 Noble M600
Cr. Universal Studios
  • Ford GT350
Cr. Universal Studios
  • Pontiac Fiero
Cr. Universal Studios

សង្ឃឹមថាស្ថានភាពជម្ងឺកូវីដ-១៩ នៅកម្ពុជាឆាប់បញ្ចប់នាពេលដ៏ខ្លីខាងមុខ ហើយរោងកុន និងអាជីវកម្មជាច្រើនអាចបើកដំណើរការឡើងវិញ។ ខាងក្រោមនេះជាវីដេអូ Teaser ទី២៖

ផ្ទាំងផ្សាយពាណិជ្ជកម្ម

មើលកម្រិតស៊ីសាំងនៃឡាន SUV តម្លៃថោកជាងគេរបស់ Volkswagen

បន្ទាប់ពីបានប្រកាសចេញនូវតម្លៃលក់សម្រាប់រថយន្ត Volkswagen Taos ស៊េរីឆ្នាំ២០២២រួចមក នាពេលនេះក្រុមហ៊ុនផលិតរថយន្តអាល្លឺម៉ង់បានបង្ហាញចេញនូវកម្រិតស៊ីប្រេងរបស់រថយន្ត SUV ខ្នាតតូចនេះបន្ថែមទៀត។

រថយន្ត Taos គ្រប់ប្រភេទគឺមានបំពាក់ដោយប្រព័ន្ធបើកបរវិលកង់មុខ និងលេខស្វ័យប្រវត្តិ៨វគ្គមកជាស្តង់ដារ ដែលកម្រិតស៊ីប្រេងរបស់វាគឺ ៨,៤លីត្រ ក្នុង ១០០គ.ម សម្រាប់ការបើកបរក្នុងក្រុង និងការបើកបរលើផ្លូវលាតគឺ ៦,៥៣លីត្រ ក្នុង ១០០គ.ម ដែលកម្រិតជាមធ្យមគឺ ៧,៥៨លីត្រ ក្នុង ១០០គ.ម។

ដោយឡែកសម្រាប់រថយន្ត Taos ដែលប្រើប្រាស់ប្រព័ន្ធបើកបរ 4Motion វិលកង់ទាំងបួន និងប្រអប់លេខ៧វគ្គ មានកម្រិតស៊ីប្រេង ៩,៤លីត្រ ក្នុង ១០០គ.ម សម្រាប់ក្នុងក្រុង និងបើកបរផ្លូវលាតស៊ីប្រេង ៧,៣៥លីត្រ ហើយគិតជាមធ្យមគឺ ៨,៤លីត្រ។

រថយន្ត Taos ឆ្នាំ២០២២ មានតម្លៃចាប់ពី ២២ ៩៩៥ដុល្លារ សម្រាប់ប្រភេទ Taos S ដែលមិនទាន់បូកបញ្ចូលថ្លៃដឹកជញ្ជូន។ សម្រាប់ Taos SE មានតម្លៃចាប់ពី ២៧ ២៤៥ដុល្លារ និងប្រភេទ Taos SEL មានតម្លៃចាប់ពី ៣១ ៤៩០ដុល្លារ៕

ផ្ទាំងផ្សាយពាណិជ្ជកម្ម

Lexus ដណ្ដើមបានតំណែងលេខ១មកវិញ នៅទឹកដីកំណើត

ជាច្រើនឆ្នាំកន្លងមកនេះម៉ាករថយន្ត Lexus តែងតែចាញ់គូប្រកួតប្រជែងមកពីអាល្លឺម៉ង់គឺ Mercedes-Benz នៅលើទឹកដីកំណើតរបស់ខ្លួន។

យ៉ាងណាក្ដីនៅត្រីមាសទី១នៃឆ្នាំ២០២១នេះ ម៉ាករថយន្ត Lexus បានក្លាយជាម៉ាករថយន្តប្រណីតលក់ដាច់រថយន្តបានច្រើនជាងគេនៅជប៉ុន ក្រោយចំនួនលក់មានកំណើន ៨,៨% ដែលអាចលក់បានសរុប ១៦ ០៦៣គ្រឿង។

ដោយឡែកបើងាកទៅមើលលទ្ធផលរបស់ Mercedes វិញឃើញថាចំនួនលក់មានការថយចុះចំនួន ៩,៣% នៅត្រីមាសទី១នៃឆ្នាំ២០២១នេះ ដែលអាចលក់រថយន្តបានសរុប ១៣ ៩៦៩គ្រឿងប៉ុណ្ណោះ។

គួររំលឹកថាកាលពីត្រីមាសទី១ឆ្នាំ២០២០ ចំនួនលក់របស់ Mercedes និង Lexus មានខុសគ្នាត្រឹមជិត ៧០០គ្រឿងប៉ុណ្ណោះ ប៉ុន្តែនៅដើមឆ្នាំនេះម៉ាករថយន្តទាំងពីរហាក់មានគម្លាតឆ្ងាយពីគ្នា។

ម៉ាករថយន្តប្រណីតដទៃទៀតដែលកាន់កាប់តំណែងបន្តបន្ទាប់រួមមាន BMW, Audi, Volvo និង Porsche។ ចំណែកម៉ាករថយន្តប្រណីតរបស់ជប៉ុនដទៃទៀតមានដូចជា Acura និង Infiniti មិនឃើញមានវត្តមានលើតារាងកំពូលឡើយ៕

ផ្ទាំងផ្សាយពាណិជ្ជកម្ម

Hyundai Kona N បង្ហាញខ្លួនផ្លូវការ កម្លាំងជិត ៣០០សេះ

ក្រុមហ៊ុន Hyundai បានប្រកាសចេញរថយន្ត Kona N ថ្មីរបស់ខ្លួនជាផ្លូវការ ដើម្បីចូលរួមជាមួយនឹងម៉ូដែល i20 N, i 30 N និង Veloster N។

រថយន្ត Hyundai Kona N បង្ហាញខ្លួន ថ្មីនឹងបំពាក់ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំងដល់ ២៨៦សេះ ដំណើរការជាមួយប្រអប់លេខអូតូ ៨វគ្គ dual clutch អាចឲ្យវារត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៥,៥វិនាទី នៅពេលប្រើមុខងារ Launch Control និងមានល្បឿនអតិបរមាដល់ ២៤០គីឡូម៉ែត្រក្នុងមួយម៉ោង។

រថយន្ត Kona N មានបំពាក់មុខងារពិសេសចំនួន ៣ គឺ N Grin Shift, N Power Shift និង N Track Sense Shift។ មិនតែប៉ុណ្ណោះ វាក៏មានបំពាក់យ៉ាន់ ១៩អ៊ីញ ប្រភេទ Forged ព្រមទាំងប្រព័ន្ធហ្វ្រាំង ប្រភេទ high-performance, មុខងារ electronic limited slip differential, គ្រោងឆ្អឹងត្រូវបានពង្រឹងឲ្យរឹងមាំជាងមុន ក៏ដូចជាមុខងារបើកបរ Eco, Normal, Sport, N និង Custom ផងដែរ។

បើនិយាយពីប្រព័ន្ធសុវត្ថិភាពវិញ រថយន្ត SUV ខ្នាតតូចនេះមានបំពាក់មុខងារដូចជា Forward Collision-Avoidance Assist, Lane Keeping Assist, Lane Following Assist, Smart Cruise Control, Blind-Spot Collision-Avoidance Assist, High Beam Assist, Rear Cross-Traffic Collision-Avoidance Alert និង Safe Exit Warning ទៀតផង៕

ផ្ទាំងផ្សាយពាណិជ្ជកម្ម

លេចដំណឹង Rolls-Royce Dawn និង Wraith ចាកចេញពីទីផ្សារអាមេរិក នៅឆ្នាំក្រោយ

យោងតាមប្រភពព័ត៌មានបានឲ្យដឹងថា រថយន្ត Rolls-Royce Dawn និង Rolls-Royce Wraith នឹងលែងមានលក់ទៀតហើយនៅលើទីផ្សារសហរដ្ឋអាមេរិក បន្ទាប់ពីឆ្នាំ២០២១។

គេហទំព័ររថយន្ត Roadshow បានឲ្យដឹងថា រថយន្តទាំង ២ម៉ូដែលខាងលើ នឹងលែងមានលក់ទៀតសម្រាប់ពីស៊េរីឆ្នាំ២០២១ នេះ ដោយសារតែបញ្ហាបទបញ្ញត្តិនៅសហរដ្ឋអាមេរិក ប៉ុន្តែពួកវានឹងនៅតែបន្តលក់សម្រាប់ទីផ្សារដទៃទៀត។

ទោះជាយ៉ាងណាក៏ដោយ អ្វីដែលនឹងកើតឡើងបន្ទាប់ពីចំនុចនោះ នៅតែមិនទាន់ច្បាស់នៅឡើយទេ ប៉ុន្តែអ្នកនាំពាក្យក្រុមហ៊ុន Rolls-Royce បានប្រាប់ទៅកាន់គេហទំព័រ Roadshow ថា “មានរឿងច្រើនណាស់កំពុងកើតឡើង”។

អ្នកនាំពាក្យខាងលើបានបន្ថែមទៀតថា “វាអាចទៅរួចដែលថា ម៉ូដែល Dawn និង Wraith ឈប់លក់នៅសហរដ្ឋអាមេរិក ស្របពេលដែលម៉ូដែល Ghost បានទទួលការឌីហ្សាញថ្មីសម្រាប់ស៊េរីឆ្នាំ២០២១ ហើយ Dawn និង Wraith ត្រូវបានផលិតផ្អែកលើរថយន្ត Sedan ស៊េរីចាស់នៅឡើយ”៕

ផ្ទាំងផ្សាយពាណិជ្ជកម្ម

រថយន្តភីកអ៊ាប់ ៥ម៉ូដែលប្រចាំឆ្នាំ ២០២១ ដែលបានផ្លាស់ប្តូររូបរាងថ្មី សម្រាប់ទីផ្សារកម្ពុជា

REVIEW+ : កាលពីចុងឆ្នាំ រហូតមកដល់ដើមឆ្នាំ២០២១នេះ យើងឃើញថាមានប្រភពព័ត៌មានបរទេសជាច្រើនបានបង្ហាញមុខមាត់ថ្មីនៃរថយន្តភីកអ៊ាប់ (Pickup)នៅលើពិភពលោក។ ប៉ុន្តែសម្រាប់ទីផ្សាររបស់ប្រទេសកម្ពុជាវិញ មកទល់នឹងពេលនេះ យើងសង្កេតឃើញថាមានតែរថយន្ត ៥ម៉ូដែលផងដែរ ដែលបានធ្វើការផ្លាស់ប្តូរ និងណែនាំថ្មីគឺរថយន្ត Toyota Hilux Revo Rally, Isuzu D-Max, Nissan Navara ឆ្នាំ២០២១, Mazda BT-50 និងរថយន្ត Ford Ranger FX4 ឆ្នាំ២០២២។ ថ្ងៃនេះអត្ថបទ REVIEW+ របស់ខេមបូអូតូ សូមធ្វើការបង្ហាញពីចំណុចពិសេសធំៗរបស់រថយន្តទាំង ៥ ម៉ូដែល ដោយចាប់ផ្តើមពីរថយន្តដែលបានបង្ហាញវត្តមានមុនគេ តាមលំដាប់លំដោយដូចខាងក្រោម៖

ប្រភពរូប៖ Toyota Cambodia

១. រថយន្តតូយ៉ូតា Hilux Revo Rally ២០២១ តម្លៃប្រហាក់ប្រហែល ៥២​ ៥០០ដុល្លារ (ថែម ៦០០ដុល្លារសម្រាប់សកាំម៉ៃ) ដាក់លក់ជាផ្លូវការកាលពីថ្ងៃទី១០ ខែតុលា ឆ្នាំ២០២០៖ រថយន្តនេះនាំចូលផ្តាច់មុខដោយក្រុមហ៊ុន តូយ៉ូតា (ខេមបូឌា) ដោយបានធ្វើការផ្លាស់ប្តូរមុខមាត់ថ្មីនៅផ្នែកខាងមុខថ្មីទាំងស្រុង ជាពិសេសការរចនាលើប៉ាណាមុខ ចង្កៀងមុខប្រភេទ Bi-Beam LED (ហ្វា-កូដ អំពូល ១គ្រាប់ធំ)។ ថាសកង់រចនាបែបស្ព័រថ្មី ទំហំ១៨អុីញ ហើយនៅផ្នែកខាងក្រោយបានធ្វើការផ្លាស់ប្តូរនូវការរចនាថ្មីទៅលើចង្កៀងក្រោយ មានរូបរាងដូចជាលេខ 8 ជា LED បែបខ្សែបន្ទាត់។ បន្ថែមជំនួយការបើកឃ្លុបខាងក្រោយ ហៅថា Tailgate Assist ងាយស្រួលបិទ បើក និងស្រាលជាងមុខឆ្ងាយ និងបានបន្ថែមភ្លើង LED ៣ចំណុចនៅក្នុងឃ្លុប ជំនួយការលើកដាក់សំភារះនៅពេលយប់ផងដែរ។

ប្រភពរូប៖ Toyota Cambodia

ផ្នែកខាងក្នុងក៏បានធ្វើការផ្លាស់ប្តូរនូវក្រាហ្វីចលោតលើកុងទ័រតាមរូបរាងថ្មីខាងក្រៅ អេក្រង់កំសាន្តថ្មី ភ្ជាប់ជាមួយមុខងារ Apple CarPlay ឬ Android Auto អេក្រង់ ៨អុីញ និងមានបន្ថែមអំពូលជាខ្សែបន្ទាត់ បង្កប់តាមដៃទ្វាផងដែរ។ អ្វីដែលពិសេសសម្រាប់ម៉ូឌែលថ្មីនេះគឺប្រព័ន្ធសុវត្ថិភាពថ្មី TSS (Toyota Safety Sense)។ ដំណើរការដោយម៉ាស៊ីនម៉ាស៊ូតជំនាន់ថ្មី GD ២,៨លីត្រ ថាមពលកម្លាំង ២០១សេះ និងកម្លាំងរមួល ៥០០ញ៉ូតុនម៉ែត្រ។ (អានបន្ថែមលម្អិតផ្លូវការ)

២. រថយន្ត Isuzu D-Max ២០២១ តម្លៃប្រហាក់ប្រហែល ដាក់លក់ជាផ្លូវការកាលពីថ្ងៃទី៣១ ខែតុលា ឆ្នាំ២០២០៖ រថយន្តនេះត្រូវបាននាំចូលផ្តាច់មុខដោយក្រុមហ៊ុន ខេ (ខេមបូឌា) បានធ្វើការផ្លាស់ប្តូរថ្មីទាំងស្រុងដែរ បានរចនាប៉ាណាមុខកាន់តែទាក់ទាញបែបស្ព័រ ដោយចង្កៀងមុខប្រភេទ Bi-Beam LED (ហ្វា-កូដ អំពូល ១គ្រាប់)។ ថាសកង់បែបស្ព័ររចនាថ្មី ទំហំ ១៨អុីញ។ កន្លែងដែលពិសេសជាងគេនោះគឺមុខងារបញ្ឆេះរថយន្តពីចំងាយ Remote Engine Start។

មុខងារសុវត្ថិភាពថ្មី ក៏មិនធម្មតាដែរគឺមានសេនស័រជំនួយចូលចំណត ៨ចំណុច, ប្រព័ន្ធផ្តល់សញ្ញានៅកញ្ចក់ចំហៀងសងខាង BMS, ប្រព័ន្ធផ្តល់សញ្ញាពេលចេញពីចំណតនៅផ្នែកខាងក្រោយ RTCA។ រថយន្តនេះដំណើរការដោយម៉ាស៊ីនម៉ាស៊ូត ៣,០លីត្រ Ddi Blue Power ថាមពលកម្លាំង ១៩០សេះ និងកម្លាំងរមួល ៤៥០ ញ៉ូតុន។ (អានលម្អិតផ្លូវការ)

រូបភាពតំណាង វាអាចខុសពីរថយន្តនៅកម្ពុជាជាក់ស្តែង

៣. រថយន្ត Nissan Navara ២០២១ តម្លៃប្រហាក់ប្រហែល ៥៣ ៩០០ដុល្លារ ដាក់លក់ជាផ្លូវការកាលពីថ្ងៃទី៥ ខែមីនា ឆ្នាំ២០២១៖ រថយន្តនេះត្រូវបាននាំចូលផ្តាច់មុខដោយក្រុមហ៊ុន Tan Chong Motor Cambodia។ ការរចនាមានការចាប់អារម្មណ៌ខ្លាំង ដោយសារបានផ្លាស់ប្តូរថ្មីសន្លាង ទាំងស្រុង ជាពិសេសគឺផ្នែកខាងមុខរបស់វា ភ្ជាប់ដោយប៉ាណាស្ព័រ និងចង្កៀងមុខមានអំពូល LED ចំនួន ៤គ្រាប់ រួមជាមួយអំពូលបំភ្លឺផ្លូវប្រភេទ LED មួយខ្សែផងដែរ។

រូបភាពតំណាង វាអាចខុសពីរថយន្តនៅកម្ពុជាជាក់ស្តែង

ថាស់កង់ទំហំ ១៨អុីញរចនាបែបស្ព័រ អេក្រង់កំសាន្តទំហំ ៨អុីញភ្ជាប់ដោយមុខងារ Apple CarPlay ឬ Android Auto និងអ្វីដែលពិសេសនោះគឺមានមុខងារសុវត្ថិភាពឆ្លាតវៃដែលមានកាំម៉េរាចំនួន ៤គ្រាប់ លក្ខណៈ៣៦០ដឺក្រេ អាចមើលពីស្ថានភាពពេលផ្លូវពិបាក ឬហៅថា Intelligent Around View Monitor (IAVM), ពោងសុវត្ថិភាព ៧ចំណុច និងផ្លិតទឹកស្វ័យប្រវត្តិ។ ដំណើរការដោយម៉ាស៊ីនម៉ាស៊ូត ២,៥ លីត្រ កម្លាំងប្រហែល ១៨៧សេះ កម្លាំងរមួល ៤៥០ញ៉ូតុនម៉ែត្រ។ (អានលម្អិតក្រៅផ្លូវការ)

ប្រភពរូប៖ Mazda Cambodia

៤. រថយន្ត Mazda BT-50 ២០២២ តម្លៃប្រហាក់ប្រហែល ៤៥ ០០០ដុល្លារ ដាក់លក់ជាផ្លូវការកាលពីថ្ងៃទី៣ ខែមេសា ឆ្នាំ២០២១ នាំចូលផ្តាច់មុខដោយក្រុមហ៊ុន HGB Group។ ការរចនាគឺត្រូវបានផ្លាស់ប្តូរថ្មីទាំងស្រុង ទាំងមុខ ចំហៀង និងក្រោយ ជាពិសេសគឺផ្នែកខាងមុន ដោយបានយកលំនាំតាមត្រកូល SUV របស់ខ្លួន មកបំពាក់លើប្រភេទ Pickup នេះតែម្តង។ អ្វីដែលខ្ញុំចាប់អារម្មណ៌គឺមានមុខងារបញ្ឆេះរថយន្តពីចម្ងាយ Remote Engine Start។ ម៉ាស៊ីនម៉ាស៊ូតថ្មី ចំណុះ ៣,០លីត្រ ៤សុីឡាំង ថាមពលកម្លាំង១៩០សេះ កម្លាំងរមូល ៤៥០ញ៉ូតុនម៉ែត្រ។ (អានលម្អិតក្រៅផ្លូវការ)

៥. រថយន្ត Ford Ranger FX4 ២០២២ តម្លៃប្រហាក់ប្រហែល ៤៥ ០០០ដុល្លារ បើកកក់ជាផ្លូវការកាលពីថ្ងៃទី៥ ខែមេសា ឆ្នាំ២០២១ នាំចូលផ្តាច់មុខដោយក្រុមហ៊ុន អ​ អិម អេ ខេមបូឌា។ រថយន្តនេះជាប្រភេទមួយទៀត ក្នុងត្រកូលរបស់ Ford Ranger ដែលបានផ្លាស់ប្តូរផ្នែកខាងមុខ ចំហៀងមានតែម លេងកង់បែបស្ព័រ និងមានកាងលំអរនៅផ្នែកខាងក្រោយយ៉ាងរឹងមាំ។ ប្រើប្រាស់ចង្កូតភ្លើង ឬហៅថា បូមអេឡិចត្រូនិច កៅអីស្បែករំលេចដោយអក្សរ FX4 លេងថេរពណ៌ បន្ថែមភាពទាក់ទាញ។ មិនខុសពីរាងច្បងទេ វាប្រើប្រាស់ប្រព័ន្ធកំសាន្ត អេក្រង់ Touch Screen ៨ អុីញ បច្ចេកវិទ្យា SYNC 3 ភ្ជាប់ដោយមុខងារ Apple CarPlay ឬ Android Auto។ រថយន្តនេះដំណើរការដោយម៉ាស៊ីនម៉ាស៊ូត ២,២លីត្រ ថាមពលកម្លាំង ១៦០ps កម្លាំងរមួល ៣៨៥ញ៉ូតុនម៉ែត្រ។ (អានលម្អិតផ្លូវការ)

ប្រភពរូប៖ Ford Cambodia

តើបន្ទាប់ពីបានអានរួចមក តើមួយណាជាជម្រើសរបស់បងប្អូន? ពេលខ្លះ យើងអាចជ្រើសរើសរថយន្តអ្វីដែលយើងពេញចិត្ត ក៏អាចនិយាយបានថា ជាជម្រើសដ៏ល្អបំផុត មិនថារថយន្តនោះមានលក្ខណៈពិសេសនៅស្ទើរ ឬយ៉ាងណានោះទេ គឺរើសតាមបេះដូង។ អរគុណបងប្អូនទាំងអស់គ្នា សម្រាប់ការអាន ខ្ញុំរក្សា សូមអរគុណ សូមជម្រាបលា ជូនពរបងប្អូនទាំងអស់គ្នាមានខុសភាពល្អ និងជៀសផុតពីជម្ងឺកូវីដ-១៩។ សង្ឃឹមថាកម្ពុជា អាចវិលត្រលប់មកសភាពដើមវិញក្នុងពេលឆាប់ៗ ខាងមុខនេះ។

ផ្ទាំងផ្សាយពាណិជ្ជកម្ម
1...803804805...1,083ទំព័រ 804 នៃ 1,083

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com