រថយន្ត Porsche Taycan បានបង្កើតកំណត់ត្រាពិភពលោក Guinness World Record ថ្មី ក្លាយជារថយន្តអគ្គិសនីអាចបើក Drift បានយូរបំផុត។
កំណត់ត្រាថ្មីនេះត្រូវបានធ្វើឡើងនៅឯ Porsche Experience Center ក្នុងទីលាន Hockenheimring ដោយគ្រូបង្ហាត់របស់ក្រុមហ៊ុន Porsche គឺលោក Dennis Retera បានបើក Drift រថយន្ត Taycan ចំនួន ២១០ជុំ លើទីលានប្រវែង ២០០ម៉ែត្រនោះ។
គួរឲ្យដឹងថា លោក Retera បានចំណាយពេល ៥៤នាទី និងអាចបើក Drift បានចម្ងាយ ៤២គីឡូម៉ែត្រ៕
ចង់ដឹងយ៉ាងណា សូមទស្សនាវីដេអូខាងក្រោម៖
រថយន្ត Audi TT RS បានត្រលប់មកវិញជាមួយនឹងស៊េរីឆ្នាំ២០២១ ដោយទទួលបានការអាប់ដេតមួយចំនួន ប៉ុន្តែបានឡើងថ្លៃដល់ទៅជិត ៥ ០០០ដុល្លារ។
វាមិនមែនជាចំនួនលុយតិចឡើយសម្រាប់រថយន្តស្ព័រមួយនេះ ដោយ Audi TT RS ឥឡូវមានតម្លៃចាប់ពី ៧៣ ៥៤៥ដុល្លារ សម្រាប់ទីផ្សារសហរដ្ឋអាមេរិក។
ទោះជាយ៉ាងណា Audi បានបំពាក់លក្ខណៈពិសេសមកស្តង់ដារជាច្រើន ដូចជា លេងពណ៌ខ្មៅសម្រាប់ផ្នែកខាងក្រៅ, មុខងារ Apply CarPlay និង Android Auto, ដុំហ្វ្រាំងពណ៌ក្រហម និង យ៉ាន់ Audi Sport ២០អ៊ីញ ជាដើម។
ចំណែកឯកាប៊ីនខាងក្នុងវិញ វារំលេចដោយ Carbon Fiber, ប្រព័ន្ធសំឡេង Bang and Olufsen Stereo System, អេក្រង់កម្សាន្ត MMI ព្រមទាំងមុខងារ Lane-Change Assist មកស្តង់ដារទៀតផង។
មិនខុសពីឆ្នាំមុន TT RS នៅតែបំពាក់ម៉ាស៊ីនចំណុះ ២,៥លីត្រ Turbocharged ទំហំ ៥ស៊ីឡាំង មានកម្លាំង ៣៩៤សេះ ដំណើរការដោយប្រអប់លេខអូតូ ៧វគ្គ ប្រភេទ dual-clutch និង ប៉ុងពីរ AWD។ រថយន្តស្ព័រខ្នាតតូចនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៦វិនាទី ហើយមានល្បឿនអតិបរមាដល់ ២៥០គីឡូម៉ែត្រក្នុងមួយម៉ោង៕
ការរឹតបន្តឹងលើច្បាប់បញ្ចេញឧស្ម័នពុលនៅអង់គ្លេសបានធ្វើឲ្យក្រុមហ៊ុនផលិតរថយន្តភាគច្រើនពិបាកនឹងសម្របខ្លួនតាម ដែលនាំឲ្យមានម៉ាកសញ្ញាជាច្រើនបាននាំគ្នាកាត់បន្ថយជម្រើសម៉ាស៊ីនម៉ាស៊ូតចេញពីស៊េរីរថយន្តរបស់ខ្លួន។
ឧទាហរណ៍ជាក់ស្ដែងចុងក្រោយបំផុតមួយគឺក្រុមហ៊ុន BMW ដែលក្រុមហ៊ុនបានសម្រេចចិត្តបញ្ឈប់ការលក់រថយន្ត 2-Series Coupe និង 2-Series Convertible ជាមួយជម្រើសម៉ាស៊ីនម៉ាស៊ូត នៅលើទីផ្សារអង់គ្លេស។ រថយន្តពីរប្រភេទនេះនឹងមានតែជម្រើសម៉ាស៊ីនសាំងប៉ុណ្ណោះ ដោយមានជម្រើសម៉ាស៊ីន ១,៥លីត្រ ដល់ម៉ាស៊ីន ៣,០លីត្រ។
មិនមែនតែរថយន្តពីរប្រភេទខាងលើនោះទេដែលរងការប៉ះពាល់ នៅមានរថយន្ត X5, X6 និង X7 ក៏ត្រូវបានបំបាត់ចោលនូវជម្រើសម៉ាស៊ីនម៉ាស៊ូត M50d ផងដែរ។ ម៉ាស៊ីនម៉ាស៊ូតនេះមានចំណុះ ៣,០លីត្រ ជាប្រភេទ Quad-Turbocharged ដែលអាចផលិតកម្លាំងបាន ៣៩៤សេះ និងអាចស្ទុះពី ០-១០០គ.ម/ម៉ ដោយប្រើពេល ៥,២វិនាទី៕
តម្លៃភាគហ៊ុនរបស់ក្រុមហ៊ុន Tesla បានបន្តកើនឡើងឥតឈប់ឈរគិតចាប់តាំងពីដើមឆ្នាំរហូតមកដល់បច្ចុប្បន្ន ដែលក្នុងរយៈពេលជិត ១២ខែប៉ុណ្ណោះ តម្លៃក្នុងមួយហ៊ុនមានការកើនឡើងប្រមាណ ៤៦០ដុល្លារ ជាមួយតម្លៃបច្ចុប្បន្នគឺ ៥៥៥ដុល្លារក្នុងមួយហ៊ុន។
ការកើនឡើងតម្លៃហ៊ុននេះធ្វើឲ្យម្ចាស់ហ៊ុននៅ Tesla មានការកើនឡើងទ្រព្យសម្បត្តិទៅតាមនោះដែរ ហើយក្នុងនោះក៏មានលោក Elon Musk ម្នាក់ដែលជានាយកប្រតិបត្តិក្រុមហ៊ុន Tesla។ បច្ចុប្បន្ននេះទ្រព្យសម្បត្តិរបស់លោក Elon Musk បានឡើងដល់ ១៣៦ពាន់លានដុល្លារ ដែលធ្វើឲ្យលោកក្លាយជាមហាសេដ្ឋីមានទ្រព្យច្រើនជាងគេលំដាប់ទីពីរក្នុងលោក។
ក្នុងឆ្នាំ ២០២០ នេះតែឯង ទ្រព្យសម្បត្តិរបស់លោក Elon Musk មានការកើនឡើងរហូតដល់ ១០៨ពាន់លានដុល្លារឯណោះ ដែលជាការកើនឡើងទ្រព្យសម្បត្តិច្រើនក្នុងពេលដ៏ខ្លីបំផុតដែលគេមិនធ្លាប់ជួបពីមុនមក៕
McLaren បានធ្វើការបញ្ជាក់ជាផ្លូវការថារថយន្ត Hybrid មហាកម្លាំងជំនាន់ថ្មីរបស់ខ្លួន ដែលគ្រោងនឹងបញ្ចេញលក់លើទីផ្សារនាដើមឆ្នាំក្រោយនេះ គឺនឹងមានឈ្មោះថា “Artura”។
រថយន្ត Artura នឹងមានប្រើប្រាស់ម៉ាស៊ីនថ្មីប្រភេទ Twin-Turbocharged ៦ស៊ីឡាំង ដែលមានរូបរាងតូច ដែលដំណើរការជាមួយម៉ូទ័រអគ្គិសនីចំនួនមួយ។ រថយន្ត Artura នេះដែរក៏នឹងអាចបើកបរដោយប្រើកម្លាំងអគ្គិសនីសុទ្ធ ក្នុងរយៈចម្ងាយមួយដែលសមល្មមសម្រាប់ការបើកបរក្នុងក្រុងជាប្រចាំថ្ងៃ។ នេះបើតាមការបង្ហើបពី McLaren។
រថយន្ត Artura ក៏នឹងជារថយន្តដំបូងគេដែលផលិតឡើងដោយប្រើប្រាស់គ្រោងឆ្អឹងថ្មី ដែលបានកែសម្រួលជាពិសេសសម្រាប់ប្រព័ន្ធម៉ាស៊ីន Hybrid ហើយវាបានឌីហ្សាញ និងផលិតឡើងដោយមជ្ឈមណ្ឌល Composites Technology របស់ក្រុមហ៊ុនផ្ទាល់៕
Nissan បានបង្ហាញចេញរថយន្ត Note ជំនាន់ថ្មីនៅក្នុងប្រទេសចិន ដោយការបញ្ចេញលក់គ្រោងនឹងចាប់ផ្ដើមនៅថ្ងៃទី២៣ ខែធ្នូខាងមុខនេះ។
រថយន្ត Nissan Note ជំនាន់ថ្មីមានផ្លាស់ប្ដូររូបរាងថ្មី ដែលចូលមកជំនួសរថយន្ត Note ជំនាន់មុនដែលបង្ហាញមុខលើទីផ្សារតាំងពីឆ្នាំ ២០១២ មកម្ល៉េះ។ រូបរាងខាងក្រៅមានការផ្លាស់ប្ដូរថ្មី ជាមួយកង់ដែលមានរចនាបថថ្មី និងមានបន្ថែមជម្រើសពណ៌ Opera Mauve មកជាមួយផងដែរ។
នៅផ្នែកខាងក្នុងក៏មានការផ្លាស់ប្ដូរដែរ ដោយមានបំពាក់អេក្រង់កម្សាន្ត ជាមួយនឹងការប្រើកុងទ័រប្រភេទឌីជីថល។ ចង្កូតរថយន្តគឺមានរូបរាងថ្មីដែលអាចបញ្ជាមុខងារមួយចំនួនចេញពីចង្កូតបាន ហើយក៏មាននូវកន្លែងសាកថ្មទូរសព្ទដោយឥតប្រើខ្សែនៅខាងក្នុងរថយន្តផងដែរ។
រថយន្តនេះបានបំពាក់នូវប្រព័ន្ធ e-Power ជំនាន់ទីពីរ ដែលមានម៉ូទ័រអគ្គិសនី និងឧបករណ៍បម្លែងថាមពលថ្មី។ ម៉ូទ័រអគ្គិសនីថ្មីអាចបញ្ចេញកម្លាំងបានច្រើនជាងមុន ៦% ហើយម៉ាស៊ីនសាំងក៏អាចសន្សំសំចៃថាមពលបានច្រើនជាងមុនផងដែរ។ បន្ថែមពីនេះប្រភេទប្រើអគ្គិសនីសុទ្ធ គឺមានបំពាក់នូវម៉ូទ័រពីរ ដែលអាចបើកបរដោយវិលកង់ទាំងបួន។
រថយន្ត Nissan Note ស៊េរីឆ្នាំ ២០២១ លក់នៅទីផ្សារក្នុងស្រុកគឺនឹងមានតម្លៃចាប់ពីប្រមាណ ១៩ ៥១០ដុល្លារ ដល់ប្រមាណ ២១ ០២២ដុល្លារ៕
រថយន្តបើកបរដោយខ្លួនឯងកាន់តែខិតជិតទៅរកភាពសាមញ្ញមួយនៃជីវិតរស់នៅរបស់យើង។ មិនយូរប៉ុន្មាន ក្រុមហ៊ុន Walmart នឹងដឹកជញ្ជូនអីវាន់ដល់ផ្ទះរបស់អ្នក ដោយប្រើប្រាប់យានយន្តស្វ័យប្រវត្តិ ហើយក្រុមហ៊ុនដូចជា Tesla ដែលមានការជឿនលឿនផ្នែកបច្ចេកវិទ្យានេះ បង្ហាញថា រថយន្តរបស់ខ្លួនមានសមត្ថភាពលើគ្រប់ផ្លូវទាំងអស់។
ឥឡូវនេះ Motional ដែលជាក្រុមហ៊ុនទ្រទ្រង់ដោយក្រុមហ៊ុន Aptiv និងក្រុមហ៊ុនរថយន្ត Hyundai ទើបតែទទួលបានការយល់ព្រមពីរដ្ឋ Nevada ដើម្បីអាចបើកដំណើរការរថយន្តបើកស្វ័យប្រវត្តិរបស់ខ្លួន នៅទីក្រុង Las Vegas សហរដ្ឋអាមេរិក។
ទោះជាយ៉ាងណា វាមិនមែនមានន័យថា យើងនឹងអាចមើលឃើញរថយន្តរបស់ Hyundai បើកបរនៅលើដងផ្លូវដោយគ្មានតៃកុងក្នុងពេលឆាប់ៗនោះទេ ប៉ុន្តែវាមានន័យថា នៅពេលដែលពួកគេត្រៀមខ្លួនរួចជាស្រេចដើម្បីបើកដំណើរការបច្ចេកវិទ្យានោះ ពួកគេក៏ទទួលបានការអនុញ្ញាតរួចស្រាប់ទៅហើយ៕
ការកោះហៅរថយន្តដែលប្រើប្រាស់ពោងសុវត្ថិភាពរបស់ក្រុមហ៊ុន Takata នៅតែបន្ត ស្របពេលដែល រដ្ឋបាលសុវត្ថិភាពចរាចរណ៍ផ្លូវគោកជាតិ National Highway Traffic Safety Administration (NHTSA) បានរុញច្រានឲ្យក្រុមហ៊ុនផលិតរថយន្តអាមេរិក General Motors កោះហៅភីកអាប់ និង SUV ជិត ៦លានគ្រឿង ពីស៊េរីឆ្នាំ២០០៧-២០១៤។
ស្របពេលដែលបញ្ហាលើឧបករណ៍បំប៉ោងនៃពោងសុវត្ថិភាព Takata ត្រូវបានមនុស្សជាច្រើនដឹងឮ ក្រុមហ៊ុន GM បានដាក់ញត្តិដើម្បីចៀសវាងការហៅរថយន្តទាំងនោះមកវិញ ដោយសារពួកគេជឿជាក់ថា សកម្មភាពនេះមិនត្រូវបានធានាដោយផ្អែកលើកំណត់ត្រាអង្គហេតុ និងវិទ្យាសាស្ត្រឡើយ។
បើយោងតាមសារព័ត៌មាន Reuters បានឲ្យដឹងថា ការកោះហៅរថយន្តជិត ៦លានគ្រឿងត្រលប់មកវិញនេះ អាចនឹងធ្វើឲ្យពួកគេខាតបង់លុយ ១,២ពាន់លានដុល្លារឯណោះ។
ទោះជាយ៉ាងណាក៏ដោយ NHTSA គឺធ្វើតាមតែនិតិវិធីរបស់ខ្លួនប៉ុណ្ណោះ បន្ទាប់ពីពោងសុវត្ថិភាព Takata ត្រូវបានគេស្តីបន្ទោសចំពោះការស្លាប់មនុស្សចំនួន ២៧នាក់៕
រថយន្ត Honda N-One ស៊េរីឆ្នាំ ២០២១ ដែលក្រុមហ៊ុនទើបបានបង្ហាញចេញកាលពីខែកញ្ញាកន្លងទៅនេះ បានដាក់លក់ជាផ្លូវការនៅប្រទេសជប៉ុនកាលពីថ្ងៃទី២០ ខែវិច្ឆិកាកន្លងទៅនេះ។
រថយន្ត N-One ស៊េរីថ្មីមានចែកចេញជាបួនប្រភេទ ដោយមានជា Original, Premium, Premium Tourer និង RS ជាមួយតម្លៃចន្លោះពីប្រមាណ ១៥ ៣៩០ដុល្លារ ដល់ប្រមាណ ១៩ ៤៦៥ដុល្លារ ដែលតម្លៃនេះមានគិតបញ្ចូលអត្រាពន្ធ ១០% ផងដែរ។
គ្រប់ប្រភេទទាំងអស់គឺមានដំណើរការដោយម៉ាស៊ីន DOHC ចំណុះ ៦៦០សេសេ ហើយមានជា Turbocharged សម្រាប់ប្រភេទ Premium និង RS។ ម៉ាស៊ីននេះគឺភ្ជាប់នឹងប្រអប់លេខ CVT ប៉ុន្តែចំពោះប្រភេទ RS គឺមានភ្ជាប់នឹងប្រអប់លេខដៃ៦វគ្គ។ គួរដឹងថាប្រភេទ Original, Premium និង Premium Tourer ក៏មានជម្រើសប្រព័ន្ធបើកបរវិលកង់ទាំងបួនមកជាមួយផងដែរ។
រថយន្ត N-Oneក៏មានមុខងារសុវត្ថិភាពមួយចំនួនផងដែរដូចជាមុខងារ Pedestrian Collision Mitigation, Collision Mitigation Braking, Road Departure Mitigation, Lane Keeping Assist, Hill-start Assist, Traffic-sign Recognition, Adaptive Cruise Control និង Automatic High Beams៕
Toyota បានបង្ហាញចេញរថយន្ត Camry Hybrid ស៊េរីឆ្នាំ ២០២១ សម្រាប់លក់លើទីផ្សារអឺរ៉ុប ដោយហាក់មានការផ្លាស់ប្ដូររូបរាងថ្មីខុសប្លែកពីប្រភេទលក់នៅទីផ្សារដទៃ ហើយផ្នែកខាងក្នុងក៏មានប្រែប្រួលខ្លះដែរ។
រថយន្ត Camry Hybrid សម្រាប់អឺរ៉ុបឃើញមានផ្លាស់ប្ដូរឌីហ្សាញខាងមុខដោយបំពាក់កាងថ្មី និងរន្ធខ្យល់ខាងលើ/ខាងក្រោមក៏មានផ្លាស់ប្ដូររចនាបថផងដែរ។ បន្ថែមពីនេះ Toyota ក៏បានបន្ថែមយ៉ាន់កង់ Alloy ទំហំ ១៧អ៊ីញ និង ១៨អ៊ីញ ដែលមានការឌីហ្សាញថ្មី រួមជាមួយជម្រើសពណ៌ថ្មីឈ្មោះ Deep Metal Grey។
នៅផ្នែកខាងក្នុងរថយន្តមានបំពាក់នូវអេក្រង់ Touch ទំហំ៩អ៊ីញថ្មី ដែលមានទីតាំងនៅកម្ពស់ខ្ពស់ជាងមុន។ ការផ្លាស់ប្ដូរថ្មីនេះក៏មានបន្ថែមគ្រាប់ចុចដែលកាន់តែងាយស្រួលបញ្ជាជាងមុន ជាមួយនឹង Software ដែលដំណើរការលឿនជាងមុន ហើយមានមកស្រាប់នូវមុខងារ Apple CarPlay និង Android Auto។
ដោយឡែកចំពោះផ្នែកម៉ាស៊ីនវិញ Toyota មិនបានធ្វើការផ្លាស់ប្ដូរនោះទេ ដោយវានៅតែប្រើប្រាស់ប្រព័ន្ធ Hybrid អាចសាកបញ្ចូលកម្លាំងអគ្គិសនីដល់អាគុយបានដោយខ្លួនឯង ដែលមានម៉ូទ័រអគ្គិសនីមួយ ជាមួយម៉ាស៊ីនសាំងចំណុះ ២,៥លីត្រ ៤ស៊ីឡាំង ផលិតកម្លាំងបាន ២១៥សេះ៕
