Kia Sorento ឆ្នាំ២០២១ ដូររាងថ្មីទាំងស្រុង ឡើងថ្លៃជាង ២ពាន់ដុល្លារ

November 23, 2020

រថយន្ត Kia Sorento ស៊េរីឆ្នាំ២០២១ កំពុងតែធ្វើដំណើរទៅកាន់ Showroom នៅទូទាំងពិភពលោក។ រថយន្ត SUV នេះទទួលបានការឌីហ្សាញថ្មីទាំងស្រុង ប៉ុន្តែដើរតាមគន្លងរបស់ម៉ូដែល Kia Telluride ដែលជួយឲ្យវារឹតតែស្រស់ស្អាត និងទាក់ទាញ។

ចំណែកឯកាប៊ីនខាងក្នុងក៏ទទួលបានការអាប់ដេតគួរឲ្យកត់សម្គាល់ដែរ។ ទោះជាយ៉ាងណា ការឌីហ្សាញថ្មីគឺតែងតែជះផលប៉ះពាល់មួយដល់អ្នកទិញ ពោលគឺតម្លៃវាថ្លៃជាងមុន។

យ៉ាងណាមិញ Kia ទើបតែបានបញ្ចេញតម្លៃជាផ្លូវការនៃរថយន្ត Sorento ឆ្នាំ២០២១ ដោយលើកនេះគឺចាប់ពី ២៩ ៣៩០ដុល្លារ សម្រាប់ម៉ូដែល Sorento LX (Base Model) ថ្លៃជាងឆ្នាំមុន ២ ៤៥០ដុល្លារ។

រថយន្ត Kia Sorento នឹងផ្តល់ម៉ាស៊ីនចំនួន ២ ជម្រើស គឺ ចំណុះ ២,៥លីត្រ ទំហំ ៤ស៊ីឡាំង មានកម្លាំង ១៩១សេះ និង ចំណុះ ២,៥លីត្រ Turbo ទំហំ ៤ស៊ីឡាំង មានកម្លាំង ២៨១សេះ ដំណើរការដោយប្រអប់លេខអូតូ ៨វគ្គ ប្រភេទ dual-clutch។ បន្ថែមពីនេះវាក៏មានបំពាក់អេក្រង់កម្សាន្ត Touchscreen ទំហំ ១២,៣អ៊ីញ និង មុខងារជំនួយការបើកបរជាច្រើនផ្សេងទៀតផង៕

ផ្ទាំងផ្សាយពាណិជ្ជកម្ម

Toyota កោះហៅភីកអាប់ Hilux ឆ្នាំ២០២០ ចូលរោងចក្រវិញ ដោយសារបញ្ហាតូចមួយ

November 23, 2020

Toyota Hilux គឺជារថយន្តដែលមានភាពធន់បំផុតមួយនៅលើទីផ្សារបច្ចុប្បន្ន ប៉ុន្តពេលនេះ ក្រុមហ៊ុន Toyota នៅក្នុងប្រទេសអូស្ត្រាលី បានកោះហៅវាចូលមករោងចក្រវិញ ដោយសារតែបញ្ហាដ៏ចម្លែកមួយ។

បើតាមរយៈការអះអាងរបស់ក្រុមហ៊ុនខាងលើបានឲ្យដឹងថា រថយន្ត Hilux មួយចំនួនបានបាត់ឡូហ្គូមួយ ដែលបញ្ជាក់ថារថយន្តត្រូវនឹងស្តង់ដាររបស់ប្រទេសអូស្ត្រាលី។ Toyota អះអាងថា ពួកវាគួរតែត្រូវបំពាក់នៅអំឡុងពេលដឹកជញ្ជូននៅកំពង់ផែ។

បញ្ហាខាងលើនេះបានប៉ះពាល់តែលើរថយន្ត Hilux ស៊េរីឆ្នាំ២០២០ ចំនួន ១៥គ្រឿងប៉ុណ្ណោះ ដោយពួកវាត្រូវបានដំឡើងនៅចន្លោះថ្ងៃទី១ ខែមិថុនា និង ថ្ងៃទី៤ ខែសីហា ឆ្នាំ២០២០ នេះ។

គួរឲ្យដឹងថា រថយន្ត Toyota Hilux ដែលដាក់លក់នៅក្នុងប្រទេសអូស្ត្រាលី មានចំនួន ៥ម៉ូដែល គឺ WorkMate, SR, SR5, Rogue និង Rugged ហើយមានតម្លៃចាប់ពី ២១ ២០០ដុល្លារ ដល់ ៥៤ ១០០ដុល្លារ៕

ផ្ទាំងផ្សាយពាណិជ្ជកម្ម

Kia បង្ហាញរថយន្ត Kia Sportage Ace សេរ៊ីថ្មី ការរចនាថ្មី សម្រាប់ទីផ្សារប្រទេសចិន

November 23, 2020

រថយន្ត Kia Sportage Ace សេរ៊ីថ្មី ឆ្នាំ២០២១ សម្រាប់ទីផ្សារប្រទេសចិន ត្រូវបានក្រុមហ៊ុន Kia ដាក់បង្ហាញខ្លួននៅក្នុងកម្មវិធីតាំងបង្ហាញរថយន្ត Guangzhou Auto Show ដែលបានរៀបចំឡើងក្នុងប្រទេសចិន ជាមួយរូបរាងដែលបានធ្វើការផ្លាស់ប្តូរមុខមាត់ថ្មី យ៉ាងទាក់ទាញ។ ហើយវាពិតជាពិសេសណាស់ សម្រាប់រថយន្ត Sportage ដែលផលិតឡើងសម្រាប់ទីផ្សារប្រទេសចិន ដោយសារតែវាខុសគ្នាជាមួយទីផ្សារដទៃ។

ជាមួយរូបរាងផ្នែកខាងក្រៅនៃ រថយន្ត Kia Sportage ឆ្នាំ២០២១នេះ បានបំពាក់ជាមួយប៉ាណាពណ៍ខ្មៅ លំនាំជារូបរាងច្រមុះសត្វខ្លា យ៉ាងវែងរហូតដល់ចង្កៀងទាំងសងខាង, កាង ប្រភេទប្រាក់ ដែលលាតសន្ធឹងនៅលើប៉ាណា និងជុំវិញចង្កៀងទាំងសងខាង។ បន្ថែមពីនេះ សម្រាប់ម៉ូឌែល ឆ្នាំ២០២១ Sportage បានបំពាក់ជាមួយអំពូលបំភ្លឺពេលថ្ងៃ, ភ្លើងសម្រាប់ផ្តល់សញ្ញានៅលើកញ្ចក់, Splitter និងលើកាងមុខ-ក្រោយ ពណ៍ទឹកក្រូច, យ៉ាន់កង់ ប្រភេទប្រាក់, ស៊ីម៉ាំងភ្លោះ និងអាប់ដេលើទ្វាសងខាង។

ចំណែកផ្នែកខាងក្នុងនៃរថយន្ត គឺក្រុមហ៊ុន Kia ពុំទាន់មានការបញ្ចេញរូបភាពនៅឡើយទេ។

ផ្ទាំងផ្សាយពាណិជ្ជកម្ម

Hyundai បង្ហាញឡានអគ្គិសនីថ្មីសម្រាប់ទីផ្សារប្រទេសចិន

November 21, 2020

ក្រុមហ៊ុន Hyundai បានបង្ហាញចេញរថយន្តម៉ូដែល Mistra ស៊េរីថ្មី ក្នុងកម្មវិធីតាំងបង្ហាញរថយន្ត Guangzhou Motor Show ដែលបានរៀបចំឡើងក្នុងប្រទេសចិន។

រថយន្ត Mistra គឺជារថយន្តដែលឌីហ្សាញឡើងសម្រាប់លក់នៅលើទីផ្សារប្រទេសចិនជាពិសេស ហើយជាមួយ Mistra ស៊េរីថ្មីនេះ ក្រុមហ៊ុនបានបន្ថែមនូវប្រភេទអគ្គិសនីថ្មីដែលវាមានប្រើប្រាស់អាគុយចំណុះ ៥៦,៥គីឡូវ៉ាត់ម៉ោង។

អាគុយនេះផ្ដល់ថាមពលដល់ម៉ូទ័រអគ្គិសនីដែលអាចផលិតកម្លាំងបាន ១៨១សេះ និងអាចបើកបរបានចម្ងាយ ៥២០គីឡូម៉ែត្រ ហើយវាអាចសាកថ្មពី ៣០% ដល់ ៨០% ក្នុងពេលត្រឹម ៤០នាទីប៉ុណ្ណោះ។

រថយន្តនេះក៏មានប្រភេទប្រើប្រាស់ម៉ាស៊ីនធម្មតា ដោយមានម៉ាស៊ីនចំណុះ ១,៨លីត្រ អាចផលិតកម្លាំងបាន ១៤១សេះ។ អតិថិជនក៏អាចជ្រើសយកម៉ាស៊ីន Turbocharged ចំណុះ ១,៥លីត្រ ដែលអាចផលិតកម្លាំងបាន ១៦៨សេះ ផងដែរ៕

ផ្ទាំងផ្សាយពាណិជ្ជកម្ម

អង់គ្លេសនឹងហាមមិនឲ្យលក់ឡានម៉ាស៊ីនសាំង និងម៉ាស៊ីនម៉ាស៊ូត ចាប់ពីឆ្នាំ ២០៣០

November 21, 2020

នាយករដ្ឋមន្ត្រីអង់គ្លេសលោក Boris Johnson បានបញ្ជាក់ថារដ្ឋាភិបាលនឹងហាមឃាត់ការលក់រថយន្តម៉ាស៊ីនសាំង និងរថយន្តម៉ាស៊ីនម៉ាស៊ូតថ្មីៗនៅក្នុងឆ្នាំ ២០៣០ ខាងមុខនេះ។

លោកនាយករដ្ឋមន្ត្រីបាននិយាយថារដ្ឋាភិបាលគ្រោងនឹងបណ្ដាក់ទុកជាទឹកប្រាក់ជាង ៣,៧ពាន់លានដុល្លារលើរថយន្តអគ្គិសនី, ពង្រាយស្ថានីយសាកភ្លើងឲ្យបានច្រើន និងបង្កើតរោងចក្រផលិតអាគុយប្រើប្រាស់បានយូរនៅអង់គ្លេសផ្ទាល់។ តាមរយៈការបណ្ដាក់ទុននេះ រដ្ឋាភិបាលនឹងអាចហាមឃាត់ការលក់រថយន្តម៉ាស៊ីនសាំង និងម៉ាស៊ូតថ្មីក្នុងឆ្នាំ ២០៣០។

យ៉ាងណាក្ដីរដ្ឋាភិបាលនឹងបន្តអនុញ្ញាតឲ្យមានការលក់រថយន្ត Hybrid ថ្មីៗ ដែលមានសមត្ថភាពអាចបើកបរបានរយៈចម្ងាយឆ្ងាយដោយមិនបញ្ចេញឧស្ម័នពុលចេញពីបំពង់ស៊ីមាំង ដែលនឹងអនុញ្ញាតត្រឹមឆ្នាំ ២០៣៥។ រដ្ឋាភិបាលនឹងកំណត់លើរយៈចម្ងាយជាក់លាក់នៃរថយន្ត Hybrid នៅក្នុងការប្រកាសពេលក្រោយ បន្ទាប់ពីពិភាក្សារួច។

គួរដឹងថាមានប្រទេសផ្សេងទៀតនៅអឺរ៉ុបក៏បានប្រកាសកាលបរិច្ឆេទហាមឃាត់ការលក់រថយន្តដំណើរការដោយម៉ាស៊ីនសាំង និងម៉ាស៊ូតផងដែរ ដែលក្នុងនោះមានប្រទេសបារាំងបានកំណត់យកឆ្នាំ ២០៤០, ប្រទេសន័រវែសកំណត់យកឆ្នាំ ២០២៥ និងប្រទេសអាល្លឺម៉ង់កំណត់យកឆ្នាំ ២០៣០៕

ផ្ទាំងផ្សាយពាណិជ្ជកម្ម

លេចឮថា Nissan អាចនឹងផលិតឡានភីកអាប់អគ្គិសនី ប្រជែង Ford និង Tesla

November 21, 2020

ភាពពេញនិយមចំពោះរថយន្តភីកអាប់អគ្គិសនី កំពុងតែផ្ទុះឡើងខ្លាំង ខណៈរបាយការណ៍ថ្មីមួយបានចង្អុលបង្ហាញថា ក្រុមហ៊ុន Nissan កំពុងតែសម្លឹងមើលលទ្ធភាពក្នុងការបង្កើតរថយន្ត Titan EV ដែលដំណើរការដោយថាមពលអគ្គិសនី។

យោងតាមគេហទំព័រ Bloomberg បានឲ្យដឹងថា Nissan កំពុងតែពិភាក្សាជាមួយក្រុមហ៊ុន Hercules Electric Vehicles អំពីលទ្ធភាពក្នុងការទិញយកប្រព័ន្ធថាមពលអគ្គិសនី (electric powertrains) មកប្រើលើរថយន្តរបស់ខ្លួន គឺម៉ូដែល Titan នេះតែម្តង។

ប្រភពខាងលើដដែលអះអាងថា Nissan ក៏ស្ម័គ្រចិត្តចែករំលែកគ្រឿងគ្រូវរបស់ខ្លួន សម្រាប់ប្រើលើរថយន្តអគ្គិសនីរបស់ Hercules គឺម៉ូដែល Alpha វិញដែរ។

គួរឲ្យដឹងថា រថយន្ត Hercules Alpha មានបំពាក់ម៉ូទ័រអគ្គិសនីចំនួន ៤ ដែលបង្កើតកម្លាំងបានសរុប ១ ០០០សេះ ហើយអាចរត់ស្ទុះពីកុងទ័រ ០-១០០ គីឡូម៉ែត្រក្នុងមួយម៉ោង ប្រើពេល ៤វិនាទី និងមានល្បឿនអតិបរមា ១៩០គីឡូម៉ែត្រក្នុងមួយម៉ោង ព្រមទាំងមានចម្ងាយបើកបរដល់ ៤៨០គីឡូម៉ែត្រ រាល់ពេលសាកភ្លើងពេញម្តង។

គួរឲ្យដឹងដែរថា វាគឺជារឿងគួរឲ្យភ្ញាក់ផ្អើលមួយនៅពេលដែល Nissan កំពុងសម្រេចចិត្តយក Titan ធ្វើជារថយន្តអគ្គិសនី ស្របពេលដែលចំនួនលក់របស់វានៅសហរដ្ឋអាមេរិកបានធ្លាក់ចុះ រយៈពេល ៣ឆ្នាំជាប់ៗគ្នា ហើយលក់បានតែ ៣១ ៥១៤គ្រឿងប៉ុណ្ណោះ កាលពីឆ្នាំ២០១៩៕

ផ្ទាំងផ្សាយពាណិជ្ជកម្ម

ប្រទេសធំមួយនេះ នឹងលែងមានលក់ឡាន Volkswagen Passat ទៀតហើយ

November 21, 2020

ក្រុមហ៊ុណ Volkswagen បានបង្ហើបឲ្យដឹងពីគម្រោងនៃការបញ្ចប់ជីវិតរបស់រថយន្ត Passat នៅឯរោងចក្ររបស់ខ្លួន ដែលស្ថិតក្នុងទីក្រុង Chattanooga រដ្ឋ Tennessee សហរដ្ឋអាមេរិក។

ក្រុមហ៊ុនរថយន្តអាល្លឺម៉ង់មួយនេះកំពុងតែដុតដៃដុតជើង បញ្ចេញរថយន្តអគ្គិសនីទៅលើទីផ្សារ ហើយទើបតែបានបញ្ចេញរថយន្ត ID.4 ទៀតផង។

រថយន្តអគ្គិសនី Volkswagen ID.4 ដែលលក់នៅសហរដ្ឋអាមេរិក នឹងត្រូវផលិតនៅរោងចក្រ Chattanooga ដោយចាប់ផ្តើមក្នុងឆ្នាំ២០២២ ហើយសង្វាក់ផលិតកម្មនឹងឈានដល់កម្រិតពេញលេញ នៅឆ្នាំ២០២៣ ដែលជាពេលក្រុមហ៊ុនខាងលើនឹងឈប់ផលិតរថយន្ត Passat តែម្តង។

គួរឲ្យដឹងថា Volkswagen កំពុងតែវិនិយោគទឹកប្រាក់ចំនួន ៨០០លានដុល្លារ ក្នុងការពង្រីករោងចក្រ Chattanooga ដើម្បីត្រៀមខ្លួនសម្រាប់ការផលិត ID.4 ហើយក៏នឹងបញ្ចប់ផលិតកម្មនៃរថយន្ត Passat និងការលក់ក្នុងស្រុកផងដែរ៕

ផ្ទាំងផ្សាយពាណិជ្ជកម្ម

Lamborghini បញ្ចេញឡានមហាកម្លាំងថ្មី តម្លៃជាង ៣២ម៉ឺនដុល្លារ

November 20, 2020

Lamborghini បានបង្ហាញចេញជាផ្លូវការនូវរថយន្តម៉ូដែល Huracan STO ដែលជារថយន្តមហាកម្លាំងមួយ មានដាក់លក់ក្នុងតម្លៃចាប់ពី ៣២៧ ៨៣៨ដុល្លារ (មិនទាន់គិតពន្ធ) នៅសហរដ្ឋអាមេរិក។

រថយន្ត Huracan STO នេះគឺមានបំពាក់ដោយម៉ាស៊ីន ៥,២លីត្រ ១០ស៊ីឡាំង ដែលអាចផលិតកម្លាំងបាន ៦៣១សេះ។ ជាមួយលក្ខណៈសម្បត្តិនេះអាចឲ្យរថយន្តបង្កើនសន្ទុះពី ០-១០០ គ.ម/ម៉ ដោយប្រើពេលត្រឹម ៣វិនាទី និងអាចស្ទុះពី ០-២០០ គ.ម/ម៉ ដោយប្រើពេល ៩វិនាទី ជាមួយល្បឿនអតិបរមា ៣១០ គ.ម/ម៉។

Lamborghini បានបន្ថែមប្រភេទបើកបរថ្មីចំនួនបីសម្រាប់ប្រព័ន្ធ ANIMA ដែលក្នុងនោះមាន STO, Trofeo និង Pioggia។ STO គឺសម្រាប់ការបើកបរលើផ្លូវថ្នល់ ចំណែក Trofeo គឺផ្ដោតលើការបើកបរល្បឿនលឿន និង Pioggia គឺសម្រាប់ការបើកបរលើផ្លូវសើម។

រថយន្ត Lamborghini Huracan STO នឹងចាប់ផ្ដើមដឹកជញ្ជូនជូនអតិថិជននៅអំឡុងត្រីមាសទីពីរឆ្នាំក្រោយ ដោយនៅអឺរ៉ុបវាមានតម្លៃចាប់ពី ២៩៥ ៩៨៣ដុល្លារ, នៅអង់គ្លេសមានតម្លៃចាប់ពី ២៨៧ ៦៣៨ដុល្លារ, នៅចិនមានតម្លៃចាប់ពី ៥៩៣ ៧៨៨ដុល្លារ និងនៅជប៉ុនមានតម្លៃចាប់ពី ៣៦១ ២២៩ដុល្លារ ជាតម្លៃដែលមិនទាន់គិតពន្ធទាំងអស់៕

ផ្ទាំងផ្សាយពាណិជ្ជកម្ម

Mazda ជាប់ជាម៉ាកឡានគួរឲ្យទុកចិត្តជាងគេនៅអាមេរិក

November 20, 2020

ទស្សនាវដ្ដីវាយតម្លៃផលិតផលរបស់អាមេរិកឈ្មោះថា Consumer Reports បានបញ្ចេញចំណាត់ថ្នាក់ម៉ាករថយន្តគួរឲ្យទុកចិត្តជាងគេប្រចាំឆ្នាំ ២០២០ ដែលឃើញថា Mazda ស្ថិតនៅតំណែងលេខមួយជាលើកដំបូងក្នុងប្រវត្តិសាស្ត្រ។

Mazda អាចដណ្ដើមបានចំណាត់ថ្នាក់កំពូលដែលពីមុនមកធ្លាប់កាន់កាប់ដោយម៉ាក Toyota និងម៉ាក Lexus ដែលជាម៉ាករថយន្តមានដើមកំណើតពីប្រទេសជប៉ុនដូចគ្នា។ ជោគជ័យរបស់ Mazda គឺដោយសារក្រុមហ៊ុនបានធ្វើការកែរូបរាងរថយន្តថ្មីដោយឃ្លាតឆ្ងាយខ្លាំងពីរូបរាងដើម និងជៀសវាងពីការបន្ថែមប្រព័ន្ធម៉ាស៊ីន និងប្រព័ន្ធកម្សាន្តថ្មីៗ។

គួរដឹងថាលទ្ធផលខាងលើនេះគឺសម្រេចបានផ្អែកតាមទិន្នន័យដែលគេប្រមូលបានពីសមាជិក Consumer Reports ដែលប្រាប់អំពីបទពិសោធន៍របស់ពួកគេជាមួយការប្រើប្រាស់រថយន្តរបស់ពួកគេ ដែលសរុបគឺមានរថយន្តជាង ៣០ម៉ឺនគ្រឿងឯណោះ៕

ផ្ទាំងផ្សាយពាណិជ្ជកម្ម

Audi SQ2 ឆ្នាំ២០២១ រូបរាងហំជាងមុន បន្ថែមបច្ចេកវិទ្យាថ្មី អាចរត់ដល់ល្បឿន ២៥០គ.ម៉/ម៉

November 20, 2020

ក្រុមហ៊ុន Audi បានអាប់ដេតលើរូបរាង និងបច្ចេកវិទ្យាមួយចំនួន នៅលើរថយន្ត SQ2 ស៊េរីឆ្នាំ២០២១ ដែលនឹងចេញលក់នៅដើមឆ្នាំ២០២១ ខាងមុខ។

រថយន្ត SUV ខ្នាតតូច Audi SQ2 ថ្មីនេះ នឹងមានតម្លៃចាប់ពី ៥៤ ១២០ដុល្លារ នៅលើទីផ្សារប្រទេសអាល្លឺម៉ង់។ វាមានបំពាក់ម៉ាស៊ីនសាំងចំណុះ ២,០លីត្រ TFSI ដែលបង្កើតកម្លាំងបានសរុប ២៩៦សេះ ដំណើរការដោយប្រអប់លេខអូតូ ៧វគ្គ S Tronic និង ប្រព័ន្ធប៉ុងពីរ quattro AWD។

រថយន្ត SQ2 អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៤,៩វិនាទីប៉ុណ្ណោះ ហើយមានល្បឿនអតិបរមាដល់ ២៥០គីឡូម៉ែត្រក្នុងមួយម៉ោង។

មិនតែប៉ុណ្ណោះ វាមានបំពាក់ប្រព័ន្ធជំនួយសុវត្ថិភាព Audi’s Pre Sense Front Safety System មកស្តង់ដារ ដោយក្នុងនោះរួមមានទាំងមុខងារ Adaptive Cruise Assist ផងដែរ៕

ផ្ទាំងផ្សាយពាណិជ្ជកម្ម