ការបង្ហាញពីភាពអស្ចារ្យរបស់រថយន្ត MG HS ដែលទទួលបានចំណាត់ថ្នាក់លំដាប់ផ្កាយ ៥ ពី Euro NCAP នៃការតេស្តប្រព័ន្ធសុវត្ថិភាព

November 19, 2020

ប្រសិនបើលោកអ្នកកំពុងស្វែងរកទិញរថយន្តថ្មី នោះប្រព័ន្ធសុវត្ថិភាពគឺប្រហែលជាចំណុចសំខាន់បំផុត។ នៅលើទីផ្សារសព្វថ្ងៃនេះ រថយន្ត MG HS ដែលកំពុងមានការកើនឡើងនៃចរាចរណ៏លើដងផ្លូវ និងកំពុងពេញនិយមសម្រាប់រថយន្តប្រភេទ SUV ។ ជាមួយនឹងការបំពាក់មកដោយបច្ចេកវិទ្យាទំនើប និងមានការតេស្តពីកម្រិតសុវត្ថិភាពពី Euro NCAP ហើយវាពិតជាសាកសមសម្រាប់ប្រជាជនកម្ពុជាផងដែរ។

ក្រុមហ៊ុន MG បានទទួលពានរង្វាន់លំដាប់ផ្កាយ ៥ ពីការតេស្តកម្រិតសុវត្ថិភាពពី Euro NCAP (European New Car Assessment Program) សម្រាប់ម៉ូឌែល MG HS ហើយម៉ូឌែលនេះក៏មានលក់នៅលើទីផ្សារកម្ពុជាហើយ។ រថយន្ត MG HS ទទួលបានវិញ្ញាបនបត្រផ្នែកសុវត្ថិភាពលំដាប់ផ្កាយ ៥ ពី ANCAP (Australian New Car Assessment Program) ដែលធ្វើអោយយីហោនេះទទួលបាន ”Double Five-star” សម្រាប់រថយន្តប្រភេទ SUV កម្រិតស្តង់ដារសុវត្ថិភាពទាំងអឺរ៉ុប និងអូស្ត្រាលី។

បើនិយាយអំពីសុវត្ថិភាព លោកអ្នកអាចក្រឡេកមកមើលរថយន្ត MG HS ដែលទទួលបានផ្កាយ ៥ ពី Euro NCAP ផ្នែកស្តង់ដារសុវត្ថិភាព។ ប្រៀបធៀបពីការបំពាក់ដោយដែកដែលមានគុណភាពខ្ពស់ធ្វើអោយរថយន្ត MG HS មានភាពធុន។ ប្រព័ន្ធសុវត្ថិភាពត្រូវបានគិតយ៉ាងល្អិតល្អន់ដូចជា Side and Curtain Airbag, Cruise control, Engine Start-Stop, Auto Hold, Hill-Start Assist Control និង Electric Parking Brake, សេនស័រក្រោយ និងកាមេរ៉ាក្រោយជំនួយពេលចតរថយន្ត ដែលលោកអ្នកអាចបើកបរបានមានទំនុកចិត្ត។

រថយន្ត MG HS រចនាឡើងជាមួយនឹងភាពទាន់សម័យបែបរថយន្តស្ព័រនៃប្រភេទ SUV។ ចំណុចពិសេសនៃរថយន្ត MG HS គឺផ្តល់ជូននូវកម្លាំង ១៦៩សេះ ហើយបំពាក់ដោយម៉ាស៊ីនសាំង ១,៥លីត្រ Turbo ប្រើប្រអប់លេខអូតូ ៧វគ្គ ដែលធ្វើអោយរថយន្តនេះមានកម្លាំងខ្លាំង។ ហើយវាក៏បានបំពាក់ជាមួយ Smart key ដែលអ្នកគ្រាន់តែចុចប៊ូតុងមួយ ម៉ាស៊ីននឹងធ្វើការ។ រថយន្ត MG ទាំងអស់ គឺបានបំពាក់ដោយគ្រឿងបរិក្ខារទំនើបៗ ហើយវាមានអត្តសញ្ញាណដ៏ល្អប្លែកពីរថយន្តនៅលើទីផ្សារនៃប្រភេទ SUV។ ប្រសិនបើអ្នកដឹងអំពីតម្លៃវិញ អ្នកនឹងកាន់តែចាប់អារម្មណ៏ជាមួយម៉ូឌែលនេះ ដែលអ្នកអាចរកជាវបានក្នុងតម្លៃត្រឹមតែ ៤៣ ០០០ដុល្លារ ជាមួយនឹងការផ្តល់ជូននូវការធានារយៈពេល ៣ឆ្នាំ ឬ ១០០ ០០០គីឡូម៉ែត្រ។

ផ្ទាំងផ្សាយពាណិជ្ជកម្ម

មេ Bugatti នឹងឡើងកាន់តំណែងជាមេ Lamborghini មួយទៀត

November 18, 2020

ការចុះផ្សាយរបស់សារព័ត៌មាន Autonews Europe បានឲ្យដឹងថា Volkswagen Group បានចាត់តាំងលោក Stephan Winkelmann ដែលជានាយកប្រតិបត្តិក្រុមហ៊ុនរថយន្ត Bugatti ឲ្យកាន់តំណែងជានាយកប្រតិបត្តិនៃក្រុមហ៊ុន Lamborghini មួយទៀត។

លោក Stephan ដែលបានកាន់តំណែងនៅ Bugatti អស់រយៈពេល ៣ឆ្នាំមកហើយនោះ នឹងឡើងកាន់មុខតំណែងជាន់ខ្ពស់មួយទៀតនៅ Lamborghini ឆាប់បំផុតគឺនៅថ្ងៃទី១ ខែធ្នូ ខាងមុខ។ លោកនឹងឡើងកាន់តំណែងជំនួសនាយកប្រតិបត្តិការ Lamborghini បច្ចុប្បន្ន គឺលោក Stefano Domenicali ដែលលោក Stefano នឹងឡើងកាន់តំណែងជានាយកប្រតិបត្តិ Formula One នៅថ្ងៃទី១ ខែមករា ឆ្នាំ ២០២១ ខាងមុខ។

គួរដឹងថាលោក Stephan ធ្លាប់កាន់តំណែងជានាយកប្រតិបត្តិ Lamborghini ម្ដងរួចមកហើយ គឺកាលចន្លោះឆ្នាំ ២០០៥ ដល់ឆ្នាំ ២០១៦ ដែលមានន័យថានេះជាលើកទីពីរហើយដែលលោក Stephan ឡើងកាន់តំណែងនេះ៕

ផ្ទាំងផ្សាយពាណិជ្ជកម្ម

គំរូរាងឡាន Honda Civic ជំនាន់ថ្មី ចេញជាផ្លូវការហើយ

November 18, 2020

Honda បានបង្ហាញចេញជាផ្លូវការនូវរថយន្ត Civic Prototype ស៊េរីឆ្នាំ ២០២២ ដែលជាគំរូនៃការឌីហ្សាញរបស់រថយន្ត Civic ជំនាន់ថ្មី។ ត្បិតថាវាមានឈ្មោះជាផលិតផលគំរូ ប៉ុន្តែផលិតផលសម្រេចអាចនឹងមានរូបរាងមិនខុសពីនេះប៉ុន្មានឡើយ។

គំរូរាងរថយន្ត Civic ជំនាន់ទី១១ ឃើញថា Honda បានផ្លាស់ប្ដូរមកប្រើប្រាស់ការឌីហ្សាញថ្មីកាន់តែទាន់សម័យ ដែលខុសប្លែកពីជំនាន់បច្ចុប្បន្នតែម្ដង។ Honda បាននិយាយថាផលិតផលសម្រេចនៃ Civic ជំនាន់ថ្មីនឹងបង្ហាញមុខនៅសហរដ្ឋអាមេរិកអំឡុងត្រីមាសទីពីរនៃឆ្នាំ ២០២១ ដោយដំបូងគឺបង្ហាញចេញប្រភេទ Sedan រួចហើយទើបចេញប្រភេទ Civic Hatchback, Civic Si និង Civic Type R ជាបន្តបន្ទាប់។

ក្រៅពីមានការឌីហ្សាញថ្មីហើយនោះ Honda និយាយថារថយន្ត Civic នឹងមានបំពាក់មកជាមួយនូវប្រព័ន្ធសុវត្ថិភាពថ្មីៗមួយចំនួន ដូចជាបច្ចេកវិទ្យា Honda Sensing ជំនាន់ថ្មី និងបច្ចេកវិទ្យាជំនួយដល់ការបើកបរ និងមានមកជាមួយនូវពោងសុវត្ថិភាពដែលឌីហ្សាញថ្មីទៀតផង។ បន្ថែមពីនេះក៏មានប្រើប្រាស់គ្រោងឆ្អឹងថ្មីដែលអាចការពារការប៉ះទង្គិចបានល្អប្រសើរជាងមុនផងដែរ៕

ផ្ទាំងផ្សាយពាណិជ្ជកម្ម

Mercedes-AMG GT Black Series ថ្មី បំបែកកំណត់ត្រា Lamborghini Aventador SVJ បានសម្រេច

November 18, 2020

រថយន្ត Mercedes-AMG GT Black Series ស៊េរីឆ្នាំ២០២១ បានបំបែកកំណត់ត្រាថ្មី ក្លាយជារថយន្តសម្រាប់លក់ (Production Car) ដែលរត់ជុំវិញទីលាន Nurburgring Nordschleife លឿនបំផុត ដោយចំណាយពេលត្រឹមតែ ៦នាទី និង ៤៣វិនាទីប៉ុណ្ណោះ (6:43.616)។

តៃកុងរថយន្តនៅពីក្រោយភាពជោគជ័យនេះ គឺលោក Maro Engel។ គួរឲ្យដឹងថា Mercedes មិនបានកែកុនអ្វីបន្ថែមលើរថយន្តនោះឡើយ ដោយគ្រាន់តែសារ៉េប្រព័ន្ធជើងក្រោម និង គ្រឿង Aerodynamics របស់វាប៉ុណ្ណោះ។

គួរឲ្យដឹងដែរថា អ្នកកាន់កាប់កំណត់ត្រាចាស់ គឺ Lamborghini Aventador SVJ បានប្រើពេល ៦នាទី និង ៤៤វិនាទី ដើម្បីរត់ជុំវិញទីលានដែលមានប្រវែង ២០,៨៣គីឡូម៉ែត្រនោះ។

Black Series គឺជាម៉ូដែលពិសេសមួយសម្រាប់រថយន្ត AMG GT ដោយវាមានបំពាក់ម៉ាស៊ីន twin-turbo ចំណុះ ៤,០លីត្រ V8 មានកម្លាំងរហូតដល់ទៅ ៧២០សេះឯណោះ។ រថយន្តនេះដំណើរការដោយប្រអប់លេខអូតូ ៧វគ្គ ប្រភេទ dual-clutch ដែលអាចឲ្យវារត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹម ៣,២វិនាទី ហើយមានល្បឿនអតិបរមាដល់ ៣៥០គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Jeep Wrangler Rubicon 392 ថ្មី ប្រើម៉ាស៊ីន V8 កម្លាំងជិត ៥០០សេះ

November 18, 2020

ក្រុមហ៊ុន Jeep បានប្រកាសចេញរថយន្ត Wrangler Rubicon 392 ស៊េរីឆ្នាំ២០២១ ថ្មីរបស់ខ្លួនជាផ្លូវការ ដោយបំពាក់ម៉ាស៊ីនចំណុះ ៦,៤លីត្រ Hemi V8 មានកម្លាំងរហូតដល់ទៅ ៤៧០សេះឯណោះ។

Wrangler Rubicon 392 មានតែប្រភេទតួខ្លួនទ្វា៤ និងដំណើរការដោយប្រអប់លេខអូតូ ៨វគ្គ និងប៉ុងពីរប៉ុណ្ណោះ។ រថយន្ត SUV នេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៤,៥វិនាទីប៉ុណ្ណោះ។

អ្នកអាចសម្គាល់ម៉ូដែល Wrangler Rubicon 392 ខុសពីម៉ូដែល Wrangler ផ្សេងទៀត តាមរយៈរន្ធបឺតខ្យល់លើគម្របម៉ាស៊ីនរបស់វា ដែលបានខ្ចីពីម៉ូដែល Gladiator Mojave។ ក្រៅពីនោះ វាមានបំពាក់ឡូហ្គូ 392 និង ប្រព័ន្ធបំពង់ស៊ីម៉ាំង៤ ទៀតផង។

អ្វីដែលរឹតតែពិសេសនោះគឺ Wrangler Rubicon 392 មានកម្ពស់ខ្ពស់ជាង Wrangler ធម្មតា ២អ៊ីញ (៥សង់ទីម៉ែត្រ) ហើយផ្តល់នូវកម្ពស់បាតក្រោមផុតពីដី ១០,៣អ៊ីញ (២៦សង់ទីម៉ែត្រ) ងាយស្រួលដល់ការបើកបរ Off-road។ Jeep ក៏បានពង្រឹងគ្រោងឆ្អឹងរបស់វាឲ្យរឹងមាំជាងមុន និងថែមទាំងអាប់ដេតលើប្រព័ន្ធជើងក្រោមរបស់វា ឲ្យកាន់តែប្រសើរជាងមុនទៀតផង។

ស្របពេលតម្លៃលក់របស់វាមិនទាន់ចេញជាផ្លូវការ រថយន្ត Jeep Wrangler Rubicon 392 នឹងចេញលក់នៅដើមឆ្នាំ២០២១ នៅលើទីផ្សារសហរដ្ឋអាមេរិក៕

ផ្ទាំងផ្សាយពាណិជ្ជកម្ម

ឡាន Bentley Flying Spur ប្រភេទម៉ាស៊ីន៨ ចាប់ផ្ដើមចូលរោងចក្រផលិតហើយ

November 17, 2020

ក្រោយពីបានបង្ហាញចេញលក្ខណៈសម្បត្តិនៃរថយន្ត Flying Spur ដែលប្រើប្រាស់ម៉ាស៊ីន៨ កាលពីខែមុនរួចមក នាពេលនេះ Bentley បានប្រកាសថាការផលិត និងការដឹកជញ្ជូននៃរថយន្តកំពុងតែប្រព្រឹត្តទៅហើយ។

រថយន្ត Flying Spur ប្រភេទម៉ាស៊ីន៨ គឺមានទម្ងន់ស្រាលជាងប្រភេទម៉ាស៊ីន១២ ចំនួន ១០០គីឡូក្រាម ដែលធ្វើឲ្យវាមានភាពរហ័សរហួនជាងមុន។ វាមានដំណើរការដោយម៉ាស៊ីន Twin-Turbo ចំណុះ ៤,០លីត្រ ៨ស៊ីឡាំង ដែលអាចផលិតកម្លាំងបាន ៥៤២សេះ។

រថយន្ត Flying Spur ដែលស្រាលជាងគេនេះដែរ អាចបង្កើនសន្ទុះពី ០-១០០ គ.ម/ម៉ ដោយប្រើពេលត្រឹម ៤,១វិនាទី និងមានល្បឿនអតិបរមា ៣១៨គ.ម/ម៉។ ពេលចាក់ប្រេងសាំងមួយពេញ វាអាចបើកបរបានចម្ងាយ ៧០៩គីឡូម៉ែត្រ និងមានកម្រិតស៊ីប្រេងជាមធ្យម ១២,៧លីត្រ/១០០គ.ម៕

ផ្ទាំងផ្សាយពាណិជ្ជកម្ម

ពេលប៉ះជាមួយ The Rock ទើបដឹងថាឡានអគ្គិសនី Porsche Taycan តូចកម្រិតណា!

November 17, 2020

តារាសម្ដែង Dwayne Johnson ដែលមនុស្សភាគច្រើនស្គាល់ឈ្មោះជា The Rock នោះ បានដឹងថាមាឌរបស់ខ្លួនមិនអាចចូលក្នុងរថយន្តស្ព័របានចុះនោះទេ ហើយថ្មីៗនេះ Porsche Taycan បានក្លាយជារថយន្តដែលចូលមិនចុះមួយទៀតសម្រាប់តារាសម្ដែងរូបនេះ។

The Rock បានជួបជាមួយរថយន្តអគ្គិសនី Taycan ជាលើកដំបូង ក្នុងអំឡុងពេលថតខ្សែភាពយន្តដែលមានចំណងជើងថា Red Notice ដោយរូបលោកត្រូវថតប្លង់បើកប្រដេញដោយប្រើរថយន្តអគ្គិសនីនេះ។

តារាសម្ដែងរូបនេះបានប្រាប់ដល់ Follower ចំនួន ២០៣លាននាក់ នៅលើគណនី Instagram របស់ខ្លួន ថាដោយសារលោកមានខ្នងធំ ទើបត្រូវជួបបញ្ហាពេលចូលក្នុងរថយន្ត Taycan។ ត្បិតថាមានបញ្ហាពិបាកចូលក្នុងរថយន្ត ប៉ុន្តែ The Rock បានបញ្ជាក់ថារូបគេ និងក្រុមការងារបានរិះរកដំណោះស្រាយចំពោះបញ្ហានេះបាន និងអាចបង្ហើយប្លង់ដែលត្រូវថតបានតាមការគ្រោងទុកផងដែរ។

ទោះយ៉ាងណាក៏ដោយ មិនមានការបញ្ជាក់ថាគេបានសម្រេចដករថយន្ត Porsche Taycan ឬធ្វើការកែសម្រួលរថយន្ត Taycan នោះទេ។ ចម្លើយគឺមានតែរង់ចាំទស្សនាភាពយន្ត Red Notice ដែលគ្រោងចេញផ្សាយលើសេវាកម្ម Netflix នាឆ្នាំក្រោយ៕

ផ្ទាំងផ្សាយពាណិជ្ជកម្ម

ឡានចាក់អ៊ីដ្រូហ្សែន Toyota Mirai ឆ្នាំ២០២១ នឹងចេញលក់នាខែក្រោយនេះហើយ!

November 17, 2020

រថយន្ត Toyota Mirai ស៊េរីឆ្នាំ២០២១ ដែលដំណើរការដោយប្រើអ៊ីដ្រូហ្សែន នឹងចេញលក់នៅលើទីផ្សារសហរដ្ឋអាមេរិក ក្នុងខែធ្នូ ឆ្នាំ២០២០ ខាងមុខនេះ ដោយចែកចេញជា ២ ម៉ូដេល និងមានបំពាក់ប្រព័ន្ធ Toyota Safety Sense 2.5+ មកស្តង់ដារតែម្តង។

រថយន្ត Mirai ជំនាន់ទី២ នេះ ទទួលបានការឌីហ្សាញថ្មីទាំងស្រុង ពោលគឺទាបជាងមុន, វែងជាងមុន និងទទឹងធំជាងមុន ហើយមានបំពាក់យ៉ាន់ Alloy ២០អ៊ីញ និងពណ៌សរុបចំនួន ៥ គឺ Hydro Blue, Oxygen White, Supersonic Red, Heavy Metal និង Black។

ក្រៅពីនោះ វាក៏មានបំពាក់អេក្រង់កម្សាន្តទំហំ ១២,៣អ៊ីញ, ឧបករណ៍បំពងសំឡេង JBL ១៤គ្រាប់, មុខងារ Android Auto, Apple CarPlay និង Amazon Alexa, កុងទ័រឌីជីថល ៨អ៊ីញ, កន្លែងសាកថ្មទូរសព្ទឥតខ្សែ។

បើទោះបីជាមិនទាន់មានព័ត៌មានផ្លូវការពី Toyota ប៉ុន្តែរបាយការណ៍មួយចំនួនអះអាងថា Mirai ឆ្នាំ២០២១ មានធុងផ្ទុកអ៊ីដ្រូហ្សែន ៣ ដែលអនុញ្ញាតឲ្យវាអាចបើកបរបានចម្ងាយដល់ ៨៥០គីឡូម៉ែត្រ។ រថយន្តនេះត្រូវគេអះអាងថា នឹងមានកម្លាំង ១៨០សេះ ហើយអាចរត់ដល់ល្បឿនអតិបរមា ១៧៥គីឡូម៉ែត្រក្នុងមួយម៉ោង។ ចំពោះតម្លៃផ្លូវការរបស់វានឹងត្រូវប្រកាសនាពេលក្រោយ៕

ផ្ទាំងផ្សាយពាណិជ្ជកម្ម

មកមើលការធ្វើតេស្តបុក ឡានអគ្គិសនីដំបូងបង្អស់របស់ Mazda ថារឹងមាំប៉ុណ្ណា (វីដេអូ)

November 17, 2020

កម្មវិធីវាយតម្លៃរថយន្តថ្មីរបស់អឺរ៉ុប Euro NCAP ទើបតែបានចេញផ្សាយលទ្ធផលចុងក្រោយបង្អស់ នៃរថយន្តអគ្គិសនី Mazda MX-30 ស៊េរីថ្មី។

រថយន្តអគ្គិសនីដំបូងបង្អស់របស់ Mazda ម៉ូដែល MX-30 នេះ ទទួលបានពិន្ទុសរុប “ផ្កាយ៥” ដោយក្នុងនោះ ការការពារមនុស្សពេញវ័យ និងក្មេង ទទួលបានពិន្ទុ ៩១ និង ៨៧។ ចំណែកឯការការពារអ្នកថ្មើរជើង និងមុខងារជំនួយសុវត្ថិភាព ទទួលបានពិន្ទុ ៦៨ និង ៧៣។

Mazda MX-30 គឺមានបំពាក់ម៉ូទ័រអគ្គិសនីដែលផលិតកម្លាំងបាន ១៤៣សេះ ដែលវាបានថាមពលពីអាគុយលីចូមចំណុះ ៣៥,៥ គីឡូវ៉ាត់ម៉ោង។ តាមការធ្វើតេស្តរបស់ WLTP បានឲ្យដឹងថារថយន្តអគ្គិសនីនេះអាចជិះបានចម្ងាយ ២០០ គ.ម ពេលសាកភ្លើងពេញ។ អាគុយរបស់រថយន្ត MX-30 អាចសាកពី ០ ដល់ ៨០% ក្នុងពេលប្រហែល ៤០នាទី ដោយប្រើប្រាស់ឆ្នាំងសាក DC៕

ចង់ដឹងយ៉ាងណាសូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

GMC Canyon AT4 ឆ្នាំ២០២១ ប្រភេទពិសេស Off-Road ចេញផ្លូវការ

November 17, 2020

GMC Canyon AT4 Off-Road Performance Edition ឆ្នាំ២០២១ គឺជារថយន្តមួយម៉ូឌែលដែលក្រុមហ៊ុន GMC បានផលិតឡើងជាមួយលក្ខណៈ ពិសេសៗ និងមានសម្ថភាពខ្លាំងលើផ្លូវ Off-Road។

ម៉ូឌែលពិសេសនេះ បានបំពាក់បន្ថែមជាមួយ ស៊ីម៉ាំងពណ៍ខ្មៅ, ឡូហ្គូ AT4ពណ៍ខ្មៅ, បូម ប្រភេទ suspension leveling kit, យ៉ាន់កង់ ទំហំ១៧អ៊ីញ ស្រោបដោយសំបកកង់ Goodyear Wrangler ទំហំ ៣១អ៊ីញ។ បន្ថែមពីនេះ វាក៏បានបំពាក់ជាមួយកាងអាលុយមីញ៉ូម កម្រាស់ ៤មីលីម៉ែត្រ នៅខាងក្រោមយ៉ាងរឹងមាំ សម្រាប់ការពារម៉ាស៊ីន, កាឡេកង់មុខ, ម៉ែត្រចង្កូត និងធុងប្រេងម៉ាស៊ីន។

ម៉ូឌែល GMC ពិសេសនេះទំនងជាបំពាក់ជាមួយ ម៉ាស៊ីនសាំងចំណុះ ៣,៦លីត្រ ៦ស៊ីឡាំង កម្លាំង ៣០៨សេះ និងកម្លាំងរមួល ៣៧៣ញ៉ូតុនម៉ែត្រ និងម៉ាស៊ីនម៉ាស៊ូតចំណុះ ២,៨លីត្រ Turbodiesel ៤ស៊ីឡាំង កម្លាំង ១៨១សេះ និងកម្លាំងរមួល ៥០០ញ៉ូតុនម៉ែត្រ។

សម្រាប់ម៉ូឌែលពិសេសនេះ នឹងបើកទទួលការបញ្ជាទិញក្នុងពេលចុងឆ្នាំនេះ ដោយតម្លៃរបស់វានឹងមានតម្លៃខ្ពស់ជាម៉ូឌែលធម្មតា ចាប់ពី ៣៩ ៣៩៥ និងចាប់ពី ៤៥ ៥៧០ដុល្លារ សម្រាប់ម៉ាស៊ីនម៉ាស៊ូត៕

ផ្ទាំងផ្សាយពាណិជ្ជកម្ម