Nissan Navara ឆ្នាំ ២០២១ លក់នៅថៃ តម្លៃចាប់ពី ១៩ ៦០០ដុល្លារ

November 10, 2020

រថយន្ត Nissan Navara ស៊េរីឆ្នាំ ២០២១ ដែលមានការផ្លាស់ប្ដូររូបរាងថ្មីបានបង្ហាញខ្លួនដល់ពិភពលោកកាលពីដើមខែវិច្ឆិកា ហើយពេលនេះ Nissan បានជ្រើសយកប្រទេសថៃជាទីផ្សារដំបូងគេនៅអាស៊ីអាគ្នេយ៍សម្រាប់ការដាក់លក់រថយន្តភីកអាប់ថ្មីនេះ។

នៅលើទីផ្សារប្រទេសថៃ រថយន្ត Nissan Navara ស៊េរីថ្មីនឹងត្រូវប្រកួតប្រជែងនឹងរថយន្ត Isuzu D-Max, Toyota Hilux, Chevrolet Colorado, Mitsubishi Triton, Mazda BT-50 និង Ford Ranger ផងដែរ។

រថយន្ត Nissan Navara ដែលលក់នៅថៃ មានម៉ាស៊ីនម៉ាស៊ូតចំណុះ ២,៣លីត្រ ដែលផលិតកម្លាំងបាន ១៦៣សេះ និងប្រើប្រអប់លេខដៃ ៦វគ្គ។ វាក៏មានប្រភេទម៉ាស៊ីន ២,៣លីត្រ កម្លាំង ១៩០សេះ ភ្ជាប់នឹងប្រអប់លេខអូតូ ឬលេខដៃ ៧វគ្គផងដែរ។

រថយន្ត Navara ស៊េរីឆ្នាំ ២០២១ នឹងដាក់លក់នៅទីផ្សារប្រទេសថៃចាប់ពីខែធ្នូតទៅ ដោយមានចំនួនបីជម្រើស មាន Pro Series, Double Cab និង King Cab ជាមួយតម្លៃមានចាប់ពីប្រមាណ ១៩ ៦០០ដុល្លារ ដល់ ៣៧ ៧០០ដុល្លារ៕

ផ្ទាំងផ្សាយពាណិជ្ជកម្ម

BMW X7 ប្រភេទ Dark Shadow Edition នឹងមានតែ ៥០០គ្រឿងក្នុងលោក

November 10, 2020

រថយន្ត BMW X7 វាបានផ្តល់នូវភាពលេចធ្លោររួចទៅហើយ ប៉ុន្តែក្រុមហ៊ុនបានធ្វើការបង្ហាញនូវម៉ូឌែលប្រភេទពិសេសថ្មីមួយទៀតគឺ Dark Shadow Edition ដែលមានតែ ៥០០គ្រឿងប៉ុណ្ណោះសម្រាប់ទីផ្សារពិភពលោក។ ការបង្ហាញរថយន្តប្រភេទ SUV កាលពីថ្មីៗនេះ គឺយើងបានឃើញវានៅអគារតាំងបង្ហាញរថយន្ត Abu Dhabi ហើយនោះគឺរថយន្ត X5 xDrive40i។ តែយើងក៏អាចទទួលយករថយន្ត X7 Dark Shadow Edition បំពាក់លក្ខណៈពិសេសដូចម៉ូឌែល M50i ដែលមានកម្លាំង ៥២៣សេះ ម៉ាស៊ីន ៤,៤លីត្រ ប្រើប្រាស់ទ័រប៉ូរភ្លោះ ស៊ីឡាំង៨។

យើងសម្គាល់ឃើញថា សម្រាប់ប្រភេទថ្មីនេះគឺមានពណ៌បែប Frozen Arctic Gray រាងខៀវច្រើន ជាងអ្វីដែលបានបង្ហាញជាផ្លូវការកាលពីខែមិថុនាកន្លងទៅនេះ។ តាមពិតទៅ រថយន្តនោះគឺបំពាក់ពណ៌ Frozen Dark តែក្រុមហ៊ុនអាឡឺម៉ងមួយនេះ បានធ្វើការបំពាក់ពណ៌អោយកាន់តែច្បាស់សម្រាប់ប្រភេទពិសេស Dark Shadow Edition X7 នេះជាពណ៌ Frozen Arctic Grey វិញគឺបែបរាងខៀវនេះឯង។ ទំហំកង់យ៉ាងធំរហូតដល់ ២២អុីញ ជារូបរាងអក្សរ V ជាមួយនឹងពណ៌ខ្មៅស្រអប់។

នៅខាងក្នុងវិញគឺប្រើប្រាស់ពណ៌ Nigh Blue Alcantara នៅលើដំបូលរថយន្ត និងបំពាក់ជាមួយស្បែកពណ៌ Nigh Blue ផងដែរ។

ផ្ទាំងផ្សាយពាណិជ្ជកម្ម

Porsche លក់ដាច់ឡានអគ្គិសនី ១០០០គ្រឿងហើយ នៅប្រទេសមួយនេះ

November 10, 2020

អ្នកទាំងអស់គ្នាប្រហែលជាដឹងហើយថា ន័រវេស គឺជាប្រទេសមួយដែលស្រលាញ់បរិស្ថាន និងចូលចិត្តប្រើប្រាស់រថយន្តអគ្គិសនី ហើយវាមិនមែនជារឿងចម្លែកទេ ដែលក្រុមហ៊ុន Porsche លក់រថយន្តអគ្គិសនីរបស់ខ្លួនដាច់ខ្លាំងនៅក្នុងប្រទេសនេះ។

យោងតាមប្រភពព័ត៌មានបានឲ្យដឹងថា ក្រុមហ៊ុនផលិតរថយន្តអាល្លឺម៉ង់ខាងលើ បានលក់ដាច់រថយន្តអគ្គិសនី Taycan ចំនួន ១ ០០០គ្រឿងហើយក្នុងប្រទេសន័រវេស។

គួរឲ្យដឹងថា Porsche ទើបតែបានបន្ថែមកូនពៅនៃត្រកូលរថយន្តអគ្គិសនីដំបូងបង្អស់របស់ខ្លួន គឺ Taycan 4S ដែលជាប្រភេទ Base Model ស្ថិតក្រោម Taycan Turbo និង Taycan Turbo S។

Taycan 4S មានកម្លាំងដល់ ៥២២សេះ ហើយមានតម្លៃចាប់ពី ១០៣ ៨០០ដុល្លារលើទីផ្សារបរទេស ខណៈ Taycan Turbo កម្លាំង ៦១៧សេះ និង Taycan Turbo S កម្លាំង ៧៥០សេះ មានតម្លៃចាប់ពី ១៥០ ០០០ដុល្លារឯណោះ៕

ផ្ទាំងផ្សាយពាណិជ្ជកម្ម

Land Rover Discovery ឆ្នាំ២០២១ អាប់ដេតទាំងក្រៅនិងក្នុង ហើយថែមជម្រើសម៉ាស៊ីនថ្មី

November 10, 2020

ក្រុមហ៊ុន Land Rover បានប្រកាសចេញរថយន្ត Discovery ស៊េរីឆ្នាំ២០២១ ជាផ្លូវការ ដោយក្នុងនោះបានអាប់ដេតលើរូបរាង និងកាប៊ីនខាងក្នុង ក៏ដូចជាបន្ថែមជម្រើសម៉ាស៊ីនថ្មីផងដែរ។

ផ្នែកខាងក្រៅ Discovery ឆ្នាំ២០២១ បានអាប់ដេតលើប៉ាណាមុខ និង ចង្កៀងមុខថ្មី ព្រមទាំងចង្កៀងក្រោយ និងកាងក្រោយថ្មីផងដែរ។ បន្ថែមពីនោះ វាក៏មានលេងគ្រឿងពណ៌ខ្មៅរលោងមួយជុំរថយន្ត ដែលជួយឲ្យវាកាន់តែស្រស់ស្អាត និងទាក់ទាញ។ អ្វីដែលជាការផ្លាស់ប្តូរធំបំផុតមួយ គឺការបំពាក់អេក្រង់កម្សាន្តថ្មី ទំហំ ១១,៤អ៊ីញ ព្រមទាំងដៃចង្កូត និងចង្កឹះលេខថ្មីផងដែរ។

ចំពោះទីផ្សារសហរដ្ឋអាមេរិក Land Rover Discovery ផ្តល់ជម្រើសម៉ាស៊ីនថ្មី គឺ ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ២៩៦សេះ។ ទោះជាយ៉ាងណា អតិថិជនក៏អាចជ្រើសរើសយកម៉ាស៊ីនចំណុះ ៣,០លីត្រ ទំហំ ៦ស៊ីឡាំង ជាមួយបច្ចេកវិទ្យា mild-hybrid ដែលបង្កើតកម្លាំងបាន ៣៥៥សេះ។

បើតាមគេហទំព័រ Motor1 បានឲ្យដឹងថា ម៉ាស៊ីនម៉ាស៊ូតចំណុះ ៣,០លីត្រ TD6 នឹងលែងមានលក់សម្រាប់ទីផ្សារសហរដ្ឋអាមេរិកទៀតហើយ។

យ៉ាងណាមិញ រថយន្ត Discovery ឆ្នាំ២០២១ នឹងចេញលក់នៅចុងឆ្នាំនេះ ជាមួយនឹងតម្លៃចាប់ពី ៥៣ ៩០០ដុល្លារ ថ្លៃជាងស៊េរីមុនដែលត្រឹម ៥២ ៣០០ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម

តូយ៉ូតា CH-R ២០២១ នឹងបន្ថែមប្រភេទស្ព័រ GR Sport សម្រាប់អឺរ៉ុប

November 10, 2020

ក្រុមហ៊ុនតូយ៉ូតា នឹងធ្វើការបន្ថែមម៉ូឌែលប្រភេទស្ព័រ GR Sport ទៅលើរថយន្ត CH-R ២០២១ សម្រាប់ទីផ្សារអឺរ៉ុប។ រថយន្តនោះនឹងត្រូវបានគេរចនាយ៉ាងពិសេសទាំងក្នុង និងក្រៅសម្រាប់ម៉ូឌែលថ្មីនេះ រួមជាមួយការអភិវឌ្ឍន៌បន្ថែមទៅលើដៃចង្កូត និងប៉ូមដើម្បីអោយការបើកបរកាន់តែផ្តល់នូវកំលាំងខ្លាំង ហើយវានឹងត្រូវបានគេដាក់បញ្ចូលក្នុងចង្វាក់ផលិតកម្មនៅខែមករា ឆ្នាំក្រោយនេះ រួមជាមួយតម្លៃផ្លូវការផងដែរ នេះបើតាមការបញ្ជាក់របស់ក្រុមហ៊ុន។

ផ្នែកខាងក្រៅរបស់វា រំលេចដោយការលេងពណ៌ខ្មៅព័ទ្ធជុំវិញ ប៉ាណាក្រូមេខ្មៅ ដែលបង្ហាញអោយកាន់តែមានភាពទាក់ទាញខ្លាំង។ មួយវិញទៀតគឺបំពាក់មកជាមួយនូវថាសកង់ទំហំ ១៩ អុីញ យ៉ាងពិសេសផងដែរ។

ផ្នែកខាងក្នុងវិញរឹតតែពិសេស ជាមួយនឹងការបំពាក់ជាមួយប្រភេទស្បែក លេងជាមួយ Alcantara និងកាំម្ញី រួមជាមួយថ្នេរដេរពណ៌ក្រហម និងប្រផេះ រំលេចជាមួយឡូហ្គូ GR។ ចំនែកដៃចង្កូត និងប្រអប់លេខស្រោបដោយស្បែក ដេរថ្នេរក្រហម រំលេចនូវចលនានៃពាក្យ GR នៅក្នុងកុងទ័រយ៉ាងស្រស់ស្អាតពេលបញ្ឆេះរថយន្តផងដែរ។ ប្រភេទ GR Sport នេះបំពាក់មកជាស្តង់ដារនូវលក្ខណៈពិសេសដែលមានដូចជា ប្រព័ន្ធកំសាន្ត JBL, កៅអីផ្នែកខាងមុខមានមុខងារកំដៅ និងបញ្ជារដោយថាមពលអេឡិចត្រូនិច, កញ្ចក់សងខាងបញ្ជេរដោយថាមពលអេឡិចត្រូនិច, កញ្ចក់អ្នកដំណើរខាងក្រោយប្រភេទ Privacy, ប្រើប្រាស់ប្រព័ន្ធបញ្ឆេះឆ្លាតវ៉ៃ Push Start / Stop និងចង្កៀងហ្វាខាងមុខ ប្រើប្រាស់ប្រភេទអំពូល LED។ ដូចទៅនឹងប្រភេទដទៃទៀតរបស់ CH-R ផងដែរ GR នេះគឺមានបំពាក់នូវមុខងារសុវត្ថិភាពឆ្លាតវៃ TSS។

សម្រាប់ម៉ូឌែលថ្មីឆ្នាំ ២០២១ តូយ៉ូតាក៏បានបន្ថែមនូវប្រភេទថ្មីមួយទៀតគឺ C-HR C-HIC ដែលរំលេចជា២ពណ៌ Oxide Bronze (ដូចរូបខាងក្រោម), ថាសកង់ ១៨អុីញ ១០ប្រឡោះ ហើយរថយន្តនេះនឹងមកដល់ក្នុងខែនេះ នៅអគារតាំងបង្ហាញរថយន្តអឺរ៉ុបផងដែរ។

ផ្ទាំងផ្សាយពាណិជ្ជកម្ម

ឡាន Volvo ជិះ១០០គ.ម ស៊ីសាំងជាង២លីត្រ ចេញលក់នៅថៃតម្លៃជិត៧ម៉ឺនដុល្លារ

November 9, 2020

Volvo បានបញ្ចេញលក់រថយន្ត XC40 Recharge T5 ស៊េរីឆ្នាំ ២០២០ នៅលើទីផ្សារអាស៊ីអាគ្នេយ៍ជាលើកដំបូង ដោយដាក់លក់នៅប្រទេសថៃ។

រថយន្ត Volvo XC40 Recharge T5 ស៊េរីឆ្នាំ ២០២០ គឺមានប្រើប្រាស់ម៉ាស៊ីន ១,៥លីត្រ ៣ស៊ីឡាំង ប្រភេទ Turbocharged ដែលផលិតកម្លាំងបាន ១៧៨សេះ។ វាក៏មានបំពាក់នូវម៉ូទ័រអគ្គិសនីចំនួនមួយដែលអាចផលិតកម្លាំងបាន ៨១សេះ សរុបទៅផលិតកម្លាំងបាន ២៥៨សេះ។

រថយន្តនេះអាចស្ទុះពី ០-១០០គ.ម/ម៉ ដោយប្រើពេល ៧,៣វិនាទី និងមានល្បឿនអតិបរមា ១៨០គ.ម/ម៉។ គួរដឹងថាអាគុយដែលផ្ទុកថាមពល ១០,៧kWh ដែលមានលើរថយន្តនេះ អាចឲ្យវាបើកបរដោយប្រើកម្លាំងអគ្គិសនីសុទ្ធបានចម្ងាយ ៤៤គីឡូម៉ែត្រ ហើយរថយន្តនេះស៊ីប្រេងជាមធ្យមត្រឹម ២,៣លីត្រប៉ុណ្ណោះ សម្រាប់ការបើកបរចម្ងាយ ១០០គ.ម។

នៅទីផ្សារប្រទេសថៃ រថយន្ត Volvo XC40 Recharge T5 ស៊េរីឆ្នាំ ២០២០ គឺមានតម្លៃចាប់ពី ២,០៩លានបាត ដែលស្មើនឹងប្រមាណ ៦៨ ៤៣៤ដុល្លារ៕

ផ្ទាំងផ្សាយពាណិជ្ជកម្ម

ឡានអគ្គិសនីតម្លៃ ៦ពាន់ដុល្លារ ទទួលបានការអនុញ្ញាតលក់នៅអាមេរិក

November 9, 2020

ក្រុមហ៊ុន Kandi America បានប្រកាសថារថយន្តម៉ូដែល Kandi K27 និង Kandi K23 របស់ខ្លួនទទួលបានអាជ្ញាប័ណ្ណអនុញ្ញាតពីភ្នាក់ងារ EPA សម្រាប់ការលក់រថយន្តទាំងពីរនៅសហរដ្ឋអាមេរិក។

ក្នុងរដ្ឋមួយចំនួន រថយន្ត K27 ប្រហែលជាអាចលក់ដាច់ខ្លាំង ដោយសារតែវាមានតម្លៃធូរបំផុត។ ជាក់ស្ដែងដូចជានៅរដ្ឋ Colorado រថយន្តនេះនឹងមានតម្លៃចាប់ពី ៥ ៩៩៩ដុល្លារ ពេលបូកដកថ្លៃប្រាក់ជំនួយពីរដ្ឋាភិបាលរួច។ ចំណែករថយន្ត K23 វិញ អាចមានតម្លៃទាបបំផុតចាប់ពី ១៥ ៩៩៩ដុល្លារ ឡើងទៅ។

រថយន្ត Model K27 មានកម្លាំងត្រឹម ២៧សេះ ប៉ុណ្ណោះ ដែលមានល្បឿនអតិបរមា ១០១ គ.ម/ម៉។ វាមានបំពាក់អាគុយទំហំ ១៧,៦៩ kWh ដែលចំណាយពេល ៧ម៉ោងក្នុងការសាក ហើយពេលសាកពេញអាចជិះបានចម្ងាយ ១៦០ គីឡូម៉ែត្រ៕

ផ្ទាំងផ្សាយពាណិជ្ជកម្ម

CEO ក្រុមហ៊ុន Ferrari ថាក្រុមហ៊ុនខ្លួនគ្មានគម្រោងផលិតរថយន្តអគ្គិសនីសុទ្ធឡើយ

November 9, 2020

ក្នុងអំឡុងសន្និសីទសារព័ត៌មានមួយ លោក Louis Camilleri ដែលជា CEO ក្រុមហ៊ុន Ferrari បានឲ្យដឹងថា លោកមិនត្រឹមតែគិតថាក្រុមហ៊ុនទាំងមូលមិនអាចបំលែងខ្លួនទៅជាក្រុមហ៊ុនរថយន្តអគ្គិសនីទាំងស្រុងទេ តែលោកក៏គិតថារថយន្តអគ្គិសនីនឹងមិនអាចលក់ដាច់លើស ៥០% នៃចំនួនលក់សរុបរបស់ Ferrari ដែរ។

ខណៈពេលដែល Ferrari ច្បាស់ណាស់ថានឹងមិនផលិតរថយន្តអគ្គិសនីសុទ្ធ បច្ចុប្បន្នវាមានរថយន្តអគ្គិសនីពាក់កណ្តាលដែរ គឺ Ferrari SF90 Stradale ដែលដំណើរការដោយម៉ាស៊ីន Plug-in Hybrid គួបផ្សំជាមួយម៉ាស៊ីនចំណុះ ៤,០លីត្រ twin-turbo V8 និងម៉ូទ័រអគ្គិសនីចំនួន ៣។

មិនតែប៉ុណ្ណោះ របាយការណ៍បានបញ្ជាក់ថា ក្រុមហ៊ុន Ferrari កំពុងតែសម្ងំផលិតម៉ាស៊ីន Hybrid V6 ប៉ុន្តែមិនទាន់ដឹងថាត្រូវប្រើលើម៉ូដែលណានៅឡើយទេ៕

ផ្ទាំងផ្សាយពាណិជ្ជកម្ម

ទីបំផុត BMW M3 ឆ្នាំ២០២១ បានចូលរោងចក្រផលិតហើយ!

November 9, 2020

រថយន្ត BMW M3 Sedan ស៊េរីឆ្នាំ២០២១ ថ្មីសន្លាង (ផ្លាស់ប្តូររូបរាងថ្មីទាំងស្រុង) បានចូលដល់សង្វាក់ផលិតកម្មហើយ នៅរោងចក្រនៃទីក្រុង Munich ប្រទេសអាល្លឺម៉ង់ ដែលជាកន្លែងផលិតរថយន្ត BMW 3 Series (G20) ទាំងអស់តែម្តង។

ការមកដល់នៃម៉ូដែល M3 នេះ បានបង្គ្រប់ត្រកូល 3 Series ឆ្នាំ២០២១ យ៉ាងពេញលេញតែម្តង នៅលើខ្សែសង្វាក់ផលិតកម្មនៅរោងចក្រនៃទីក្រុង Munich ដែលផលិតម៉ូដែល 3 Series Sedan និង 3 Series Touring ទាំងប្រភេទប្រើម៉ាស៊ីន Plug-in Hybrid, ម៉ាស៊ីនសាំង និងម៉ាស៊ីនម៉ាស៊ូតផងដែរ។

គួរឲ្យដឹងដែរថា គ្រប់ម៉ូដែល 3 Series ទាំងអស់គឺត្រូវបានផលិតឡើងនៅលើខ្សែសង្វាក់ផលិតកម្មតែមួយប៉ុណ្ណោះ។

រថយន្ត BMW M3 Sedan មានបំពាក់ម៉ាស៊ីនចំណុះ ៣,០លីត្រ twin-turbo ទំហំ ៦ស៊ីឡាំង មានកម្លាំង ៤៧៣សេះ សម្រាប់ម៉ូដែលធម្មតា និង ៥០៣សេះ សម្រាប់ម៉ូដែល Competition៕

ផ្ទាំងផ្សាយពាណិជ្ជកម្ម

Dodge Durango SRT Hellcat កម្លាំង៧១០សេះ អាចអូសយន្តហោះរួច ចេញតម្លៃលក់ហើយ!

November 9, 2020

រថយន្ត Dodge Durango SRT Hellcat នឹងមានលក់តែសម្រាប់ស៊េរីឆ្នាំ២០២១ នេះប៉ុណ្ណោះ ហើយវាមានន័យថា តម្រូវការនៃរថយន្តក៏ទំនងជាកើនឡើងខ្លាំងលើសការរំពឹងទុកផងដែរ។

ក្រុមហ៊ុន Dodge បានបើកឲ្យបញ្ជាទិញជាផ្លូវការ សម្រាប់ SUV កម្លាំងខ្លាំង បំពាក់កៅអី ៣ជួរនេះ ដោយម៉ូដែល Durango ប្រភេទកប់បំផុតនឹងមានតម្លស ៨០ ៩៩៥ដុល្លារ ហើយមានបំពាក់ម៉ាស៊ីន supercharged ចំណុះ ៦,២លីត្រ V8 ដែលបង្កើតកម្លាំងបានសរុប ៧១០សេះឯណោះ។ រថយន្តនេះដំណើរការដោយប្រអប់លេខអូតូ ៨វគ្គ និងប៉ុងពីរ AWD មកស្តង់ដារតែម្តង។

ដោយសារតែម៉ាស៊ីន Hellcat V8 រថយន្ត Durango អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៥វិនាទី ហើយមានល្បឿនអតិបរមាដល់ ២៩០គីឡូម៉ែត្រក្នុងមួយម៉ោង និងអាចអូសសណ្តោងបានទម្ងន់ជិត ៤តោន។

លក្ខណៈពិសេសលើរថយន្តនេះមានដូចជា ប្រព័ន្ធជើងក្រោម sport-tuned suspension បូកផ្សំនឹង adaptive dampers ព្រមទាំងប្រព័ន្ធហ្វ្រាំង Brembo ជាមួយពីស្តុងចំនួន ៦ នៅខាងមុខ និង ពីស្តុង ៤ នៅខាងក្រោយ និង យ៉ាន់ទំហំ ២០អ៊ីញផងដែរ៕